Неделя 4 по Пятидесятнице. Апостола Иуды, брата Господня. Глас 3. ВСЕНОЩНОЕ БДЕНИЕ. УТРЕНЯ. КАНОН
2 iю́ля 2023 гóда. Недéля 4 по Пятидеся́тнице. Апóстола Iýды, брáта Госпóдня. Глас 3. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ПСАЛОМ ИЗБРАННЫЙ
Небесá повéдают слáву Бóжiю, творéнiе же рукý Егó возвещáет твердь./ Исповéдят Небесá чудесá Твоя́, Гóсподи./ Вмéсто отéц Твои́х бы́ша сы́нове Твои́./ Постáвиши я́ кня́зи по всей земли́./ Бог богóв Госпóдь глагóла и призвá зéмлю./ От востóк сóлнца до зáпад хвáльно И҆́мя Госпóдне./ Освети́ша мóлнiя Егó вселéнную,/ возвести́ша Небесá прáвду Егó,/ и ви́деша вси лю́дiе слáву Егó./ Кня́зи Iýдовы влады́ки их./ Воцари́ся Бог над язы́ки./ Бог прославля́емь в совéте святы́х./ Вéлiй и стрáшен есть над все́ми окрéстными Егó./ Рцы́те во язы́цех, я́ко Госпóдь воцари́ся./ Возвести́те во язы́цех слáву Егó, во всех лю́дех чудесá Егó./ Во всю зéмлю изы́де вещáнiе их,/ и в концы́ вселéнныя глагóлы их./ Покори́ лю́ди нам и язы́ки под нóги нáша./ Вéлiй Госпóдь наш и вéлiя крéпость Егó.// Той даст си́лу и держáву лю́дем Свои́м: благословéн Бог.
Хор: Величáем тя,/ апóстоле Хрїстóв Iýдо,/ и чтим болéзни и труды́ твоя́,/ úмиже трудúлся есù// во благовéстiи Хрїстóве.
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 3: Удивля́я видéнiем,/ орошáя глагóланiи,/ блистáяйся Áнгел миронóсицам глагóлаше:/ что живáго и́щете во грóбе;/ востá истощи́вый грóбы./ Тли Премени́теля разумéйте Непремéннаго./ Рцы́те Бóгови: коль стрáшна делá Твоя́,// я́ко род спасл еси́ человéческiй!
СЕДАЛЬНЫ ПО ПОЛИЕЛЕИ
Глас 2 (по 1‑м стiхослóвiи): Улови́в язы́ки апóстол слáвный/ и научи́в концы́ земны́я Тебé клáнятися со Отцéм и Дýхом, Хрiстé Бóже,/ тогó рáди утверди́ Цéрковь Твою́/ и вéрным низпосли́ благословéнiе Твоé,// еди́не Ми́лостиве и Человеколю́бче.
Глас 4 (по 2‑м стiхослóвiи): Лучý, я́ко сóлнце, прáвды испусти́ тя Хрiстóс/ просвети́ти всю зéмлю, апóстоле слáвный Iýдо:/ Божéственными твои́ми моли́твами озаря́еши/ и Божéственным свéтом невечéрним всех просвещáеши,// вéрою совершáющих святýю пáмять твою́.
Слáва Ѻтцý и Сы́ну и Святóму Дýху,
Седáлен прáздника по полiелéе, глас 8: Мрéжею слóва возвéд из глубины́ неразу́мiя боголéпно, язы́ки привéл еси́ вéрою/ и, я́ко истóчник сый вод духóвных, вселéнную всю напои́л еси́ благодáтiю./ Тéмже и спáсшiися тобóю, Богоглáсе,/ я́ко дрýга тя бли́жняго Хрiстóва ублажáем, апóстоле Iýдо, вопiю́ще ти́:/ моли́ Хрiстá Бóга согрешéнiй оставлéнiе даровáти// чтýщим любóвiю святýю пáмять твою́.
И ны́не и прúсно и во вéки векóв, амúнь.
Богорóдичен из минéи: Небéсная пою́т Тя, Благодáтная, Мáти Безневéстная,/ и мы славослóвим неизслéдованное Твоé рождествó, Богорóдице,// моли́ спасти́ся душáм нáшим.
СТЕПЕННА, ГЛАС 3
1 АНТИФОН
Плен Сióнь Ты изъя́л есú от Вавилóна:// и менé от страстéй к животý привлецы́, Слóве. (Дважды)
В юг сéющии слезáми Божéственными,// жнут клáсы рáдостiю присноживóтiя. (Дважды)
Слáва Ѻтцý и Сы́ну и Святóму Дýху.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
И ны́не и прúсно и во вéки векóв. Амúнь.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
2 АНТИФОН
Аще не Госпóдь созúждет дом добродéтелей, всýе труждáемся:// дýшу же покрывáющу, никтóже наш разорúт град. (Дважды)
Плодá чрéвна Дýхом сынотворéное// Тебé, Хрiстý, я́коже и Отцý, святíи всегдá суть. (Дважды)
Слáва Ѻтцý и Сы́ну и Святóму Дýху.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
И ны́не и прúсно и во вéки векóв. Амúнь.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
3 АНТИФОН
Боя́щiися Гóспода блажéни, в путù ходя́ще зáповедей:// снедя́т бо живóтное всеплóдiе. (Дважды)
Ѻ́крест трапéзы Твоея́ возвесели́ся,// зря Твоя́, Пастыреначáльниче, исчáдiя, нося́ща вéтви благодéланiя. (Дважды)
Слáва Ѻтцý и Сы́ну и Святóму Дýху.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
И ны́не и прúсно и во вéки векóв. Амúнь.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
ПРОКИМЕН
Чтец: Прокíмен, глас трéтiй, псалóм Давíдов. Рцы́те во язы́цех, я́ко Госпóдь воцари́ся, и҆́бо испрáви вселéнную, я́же не подви́жится. (Пс.95:10А)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Воспóйте Гóсподеви песнь нóву, воспóйте Гóсподеви вся земля́. (Пс.95:1)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Рцы́те во язы́цех, я́ко Госпóдь воцари́ся,
Хор: И҆́бо испрáви вселéнную, я́же не подвúжится.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.112): Во врéмя óно, во еди́ну от суббóт, зелó рáно, прiидóша жены́ на гроб, нося́ще я́же уготóваша аромáты, и другíя с ни́ми. Обретóша же кáмень отвалéн от грóба, и вшéдше, не обретóша телесé Гóспода Iисýса. И бысть не домышля́ющимся им о сем, и се мýжа два стáста в них в ри́зах блещáщихся. Пристрáшным же бы́вшим им, и поклóншим ли́ца на зéмлю, рекóста к ним: что и́щете живáго с мéртвыми? Несть зде, но востá. Помяни́те, я́коже глагóла вам, ещé сый в Галiлéи, глагóля, я́ко подобáет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтiй день воскрéснути. И помянýша глагóлы Егó. И возврáщшася от грóба, возвести́ша вся сiя́ единомунáдесяте и всем прóчим. Бя́ше же Магдали́на Марíя, и Iоáнна, и Марíя Iáковля, и прóчiя с ни́ми, я́же глагóлаху ко апóстолом сiя́. И яви́шася пред ни́ми я́ко лжа глагóлы их, и не вéроваху им. Петр же востáв течé ко грóбу, и прини́к ви́де ри́зы еди́ны лежáща, и оты́де, в себé дивя́ся бы́вшему.
[Русский синодальный перевод]В то время, в первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем Апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (Лк 24:1-12).
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 3
(совмещенный с канóном крестовоскрéсным (глас 3), Богорóдицы (глас 3) и канóном Апóстола Iýды, глас 5)
ПЕСНЬ 1
Iрмóс: Вóды дрéвле/ мáнiем Божéственным/ во едúно сóнмище совокупúвый/ и разделúвый мóре Iзрáильтеским лю́дем,/ Сей Бог наш/ препрослáвлен есть.// Томý Едúному поúм, я́ко прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же зéмлю осуди́в,/ престýпльшему пóтом изнести́ плодá тéрнiе,/ от тéрнiя венéц из руки́ законопрестýпныя,/ Сей Бог наш, плóтски прiéмый,// кля́тву разруши́л есть, я́ко прослáвися.
Хор: Слáва, Гóсподи, Святóму Воскресéнiю Твоемý.
Чтец: Победи́тель и Одолéтель смéрти,/ и҆́же смéрти убоя́вся, яви́ся:/ стрáстную бо плоть одушевлéнную прiéм,/ Сей Бог наш, и брáвся с мучи́телем,// вся совоскреси́, я́ко прослáвися.
Хор: Пресвятáя Богорóдице, спасù нас.
Богорóдичен: И҆́стинную Богорóдицу вси язы́цы слáвят Тя, без сéмене рóждшую:/ сошéд бо во утрóбу освящéнную Твою́,/ Сей Бог наш, Éже по нам осуществовáся,// Бог же и Человéк из Тебé роди́ся.
Канон крестовоскресный, глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Род человéчь порабощéн мучи́телем грехолю́бным,/ крóвiю Божéственною Хрїстóс искупи́,// и обоготвори́в обнови́л есть, я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко ýбо смéртен, смéрти хотя́й,/ И́же животý сокрóвищник, Хрїстóс вкуси́,/ а я́ко безсмéртен сый естествóм,// мéртвыя оживотвори́л есть, я́ко прослáвися.
Канон Богородицы, глас 3
Хор: Пресвятáя Богорóдице, спасù нас.
Чтец: Колéно приклоня́ет вся́ко естествó небéсных, Дéво,/ воплóщшемуся из Тебé,// со земны́ми же достолéпно преиспóдняя, я́ко прослáвися.
Хор: Пресвятáя Богорóдице, спасù нас.
Чтец: О примирéнiй Я́же в Тебé!/ Благи́х бо незави́стно Подáтель,/ я́ко Бог Дýха Божéственнаго подáвый нам,// плоть от Тебé, Отрокови́це, прiя́т, я́ко прослáвися.
Канон апостола Иуды, глас 5
Хор: Святы́й апóстоле Iýдo, молù Бóга о нас.
Чтец: Таи́нниче Небéсных, Iýдо всемýдре,/ ученичé Спáсов и óбщниче и́стинныя жи́зни,// язы́к мой подви́гни и слóво упрáви на пéнiе твоé, всеблажéнне.(Двáжды)
Хор: Святы́й апóстоле Iýдо, молù Бóга о нас.
Чтец: Влекíй Спáсов ярéм, апóстоле,/ и браздý секíй, и обновля́я благодáтiю, сéмя сéял еси́// и мног плод принéсл еси́ призвáвшему, преслáвне. (Двáжды)
Слáва Ѻтцý и Сы́ну и Святóму Дýху.
Тропáрь: Слóва воплóщшагося обрéт Учи́теля/ и Сегó, Богови́дче, лучáми просвещáемь,/ был еси́ свет вторы́й,// пéрваго сiя́ньми сообразýяся, досточýдне.
И ны́не и прúсно и во вéки векóв. Амúнь.
Богорóдичен: Вéра да повéдуется тóкмо, а не сказáнiе,/ éже пáче умá чудéс, Богороди́тельнице Пречи́стая,// Непостижи́маго Бóга Слóва родилá еси́, оболчéна в человéчество.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: И҆́же от несýщих вся Приведы́й,/ Слóвом созидáемая,/ совершáемая Дýхом,/ Вседержúтелю Вы́шнiй,// в любвù Твоéй утвердù менé.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м постыдéся нечести́вый,/ содéла бо я́му, ю́же ископá, впадé:/ смирéнных же вознесéся, Хрїстé, рог,// во Твоéм воскресéнiи.
Хор: Слáва, Гóсподи, Святóму Воскресéнiю Твоемý.
Чтец: Благочéстiя проповéданiе язы́ком,/ я́ко водá покры́ моря́, Человеколю́бче:// воскрéс бо от грóба, Трóическiй откры́л еси́ свет.
Хор: Пресвятáя Богорóдице, спасù нас.
Богорóдичен: Преслáвная глагóлана бы́ша о Тебé,/ Грáде Одушевлéнный при́сно Цáрствующаго:// Тобóю бо, Влады́чице, сýщим на земли́ Бог спожи́л есть.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Очищéнiе, Пречи́стый Крéсте, и́дольских яви́лся еси́ Ты нечистóт:// я́ко Iисýс Пребожéственный на Тебé рýце распростéрл есть.
Хор: Слáва, Гóсподи, Крестý Твоемý Честнóму и Воскресéнiю.
Чтец: Да вси вéрнiи,/ живопрiéмный Грóбе, тебé покланя́емся:/ погребéся бо в тебé// и востá Хрiстóс вои́стинну Бог наш.
Глас 3
Хор: Пресвятáя Богорóдице, спасù нас.
Чтец: Жезл из кóрене Iессéова, прорóчески прозя́бши Дéва,/ цвет Тя, Хрїстé, возсiя́ нам:// Свят еси́, Гóсподи.
Хор: Пресвятáя Богорóдице, спасù нас.
Чтец: Да Божéственному причáстiю земнорóдныя содéлаеши,/ от Дéвы плоть нáшу Ты, обнищáл еси́, прiéм:// Свят еси́, Гóсподи.
Глас 5
Хор: Святы́й апóстоле Iýдo, молù Бóга о нас.
Чтец: Взя́тся учени́к Хрiстóвых благолéпiе превы́ше вся́каго вели́чества:/ сíи бо бы́ша Емý дрýзи же и свóйственнiи, и срóдницы,/ и соснéдницы, и тáин сказáтели.(Двáжды)
Хор: Святы́й апóстоле Iýдо, молù Бóга о нас.
Чтец: Iýдо, брáтiя твоя́ тя похваля́ют, брáта я́вльшася/ и непщýема я́вльшагося плóтiю Слóва Превéчнаго, от Присносýщнаго возсiя́вшаго,// от нерождéна Роди́теля. (Двáжды)
Слáва Ѻтцý и Сы́ну и Святóму Дýху.
Тропáрь: Умертви́в на земли́ твоя́ ýды, пожи́л еси́ с жи́знiю всех Хрiстá, пребогáте,/ и живонóсныя жи́зни всей вселéнней провозвéстник ты был еси́,// глагóлы живóтныя проповéдая.
И ны́не и прúсно и во вéки векóв. Амúнь.
Богорóдичен: Се Ты пáче всех, Чи́стая, ублажи́лася еси́,/ превозшлá еси́ всех свя́тостiю,/ всех превознеслáся еси́// и всех яви́лася вы́шши Небéсных сил, Мáти Бóжiя бы́вши.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трижды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Апóстола Iýды, глас 2: Твéрдым умóм избрáн учени́к ты яви́лся еси́/ и столп необори́м Цéркве Хрiстóвы,/ язы́ком проповéдал еси́ слóво Хрiстóво,/ вéровати глагóля во Еди́но Божествó;/ от Негóже прослáвився, прiя́л еси́ дар исцелéнiй,// цели́ти недýги притекáющих к тебé,// апóстоле Iýдо всехвáльне.
Íкос: И́стиннаго благочéстiя проповéдника и держáвнаго и́стины побóрника достóйно восхвáлим,/ я́ко подóбника Хрiстý и свидéтеля:/ стрáсти бо Егó на тéле мýжески прiя́т,// я́ко учени́к Словесé и апóстол, Iýдо всехвáльный.
Ин кондáк Ап. Iýды, глас 2: Пáвлу я́влься собесéдник, апóстоле,/ с сим нам прóповедь возвести́л еси́ Божéственныя благодáти,/ тайноглагóльниче Iýдо блажéнне./ Сегó рáди вопiéм ти:// не престáй моля́ся о всех нас.
Седáлен Ап. Iýды, глас 8: Рóждшагося Влады́ки и брáта бы́вша всем избрáнным, Iýдо блажéнне, брат был еси́/ и от Негó апóстол во вся концы́ послáлся еси́, премýдре,/ слóво вéры всем всевáя и просвещáя во тьме невéденiя рабóтающiя лукáвому миродéржцу./ Сегó рáди вопiéм ти:/ моли́ Хрiстá Бóга грехóв оставлéнiе даровáти// чтýщим любóвiю святýю пáмять твою́.(Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен минéи, глас 8: Я́ко Всенепорóчная Невéсто Творцý, я́ко Неискусомýжная Мáти Избáвителю,/ прiя́телище я́ко сýщи Утéшителя, Препéтая,/ беззакóнiю мя сýща сквéрное оби́телище и бесóм игрáлище в рáзуме бы́вша,/ потщи́ся от тех злодéйства мя избáвити/ и свéтлое жили́ще добродéтелей соверши́, Светонóсная Нетлéнная,/ отжени́ ó6лак страстéй и Вы́шняго причáстiя сподóби// и Свéта невечéрняго моли́твами Твои́ми.
ПЕСНЬ 4
Iрмóс: Положúл еси́ к нам твéрдую любóвь, Гóсподи,/ Единорóднаго бо Твоегó Сы́на за ны на смерть дал есù./ Тéмже Ти зовéм, благодаря́ще:// слáва сúле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Я́звы, Хрiстé, и рáны ми́лостивно подъя́л еси́,/ досáду по лани́тома ударéнiй терпя́, и долготерпели́вне оплевáнiя нося́,/ и҆́миже содéлал еси́ мне Спасéнiе:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Тéлом смéртным, Животé, смéрти причасти́лся еси́,/ стрáсти рáди ни́щих, и воздыхáнiя убóгих Твои́х,/ и растли́в тлéющаго, Препрослáвленне,// всех совоскреси́л еси́, я́ко прослáвися.
Хор: Пресвятáя Богорóдице, спасù нас.
Богорóдичен: Помяни́, Хрiстé, éже стяжáл еси́ стáдо стрáстiю Твоéю:/ Препрослáвленныя Твоея́ Мáтере ми́лостивныя мольбы́ прiéм,/ и посети́в озлóбленное,// избáви си́лою Твоéю, Гóсподи.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Создáвый по óбразу Твоемý, Человеколю́бче, человéка,/ и умерщвлéна грехóм преступлéнiя рáди,// распéнся на лóбнем, спасл еси́.
Хор: Слáва, Гóсподи, Крестý Твоемý Честнóму и Воскресéнiю.
Чтец: Мéртвыя ýбо, и́хже пожрé смерть, отдадé,/ разори́ся же и áдово тлетвóрное цáрство,// воскрéсшу Ти из грóба, Гóсподи.
Глас 3
Хор: Пресвятáя Богорóдице, спасù нас.
Чтец: И҆́же постáвивый гóры, Влады́ко, мéрилом Божéственнаго рáзума,/ отсечéн еси́ от Дéвы Кáмень, кромé рук:// си́ле Твоéй слáва, Человеколю́бче.
Хор: Пресвятáя Богорóдице, спасù нас.
Чтец: Недýгующее исцели́л еси́ нáше естествó, Влады́ко,/ скорéйшую из Дéвы сiю́ соедини́в цельбý,// Твоé Пречи́стое, Слóве, Божествó.
Глас 5
Хор: Святы́й апóстоле Iýдo, молù Бóга о нас.
Чтец: Вели́кiй Спáсов апóстол явлéнiя Дýха сподóблен// и возлю́блен бысть, зрéнiя Егó зарю́ и добрóту ви́дев. (Двáжды)
Хор: Святы́й апóстоле Iýдо, молù Бóга о нас.
Чтец: Благодáти сый испóлнен и дарóв, от Бóга подáнных, апóстоле,// на спаси́тельное пристáнище тя песнослóвящiя наставля́й. (Двáжды)
Слáва Ѻтцý и Сы́ну и Святóму Дýху.
Тропáрь: Си́лою непобеди́мою Дýха Пресвятáго ограждáемь, служи́телю неизречéнных,// лукáвствiя отгоня́еши дýхи слóвом благодáти.
И ны́не и прúсно и во вéки векóв. Амúнь.
Богорóдичен: Несказáнно зачéнши, Всенепорóчная, Творцá Твоегó и Бóга,/ моли́ спасти́ ны от бед// и душéвное спасéнiе подáти пою́щим Тя, Влады́чице.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: К Тебé ýтреннюю, всех Творцý,/ преимýщему всяк ум мíрови,/ занé свет повелéнiя Твоя́,// в нúхже настáви мя.
Хор: Слáва, Гóсподи, Святóму Воскресéнiю Твоемý.
Чтец: Судiи́ непрáведному,/ еврéйскою зáвистiю прéдан быв, Всеви́дче,/ и всей прáведне судя́й земли́,// Адáма дрéвняго избáвил еси́ осуждéнiя.
Хор: Слáва, Гóсподи, Святóму Воскресéнiю Твоемý.
Чтец: Твой мир цéрквам Твои́м, Хрiстé,/ непобеди́мою си́лою Крестá Твоегó,// из мéртвых воскресы́й, подáждь, и спаси́ дýши нáша.
Хор: Пресвятáя Богорóдице, спасù нас.
Богорóдичен: Ски́нiя Святáя, и прострáннейши небéс,/ я́ко И҆́же во всей твáри Невмести́маго Слóва Бóжiя прiéмши,// Еди́на яви́лася еси́, Приснодéво.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Копiéм в ребрó Твоé, о Хрiстé мой, прободéн быв,/ от ребрá человéча создáнную,/ губи́тельства всем человéком бы́вшую ходáтаицу,// кля́твы свободи́л еси́.
Хор: Слáва, Гóсподи, Крестý Твоемý Честнóму и Воскресéнiю.
Чтец: Рáвен Отцý по Существý сый,/ свящéнный храм Пречи́стаго Твоегó и Всечестнáго телесé,// из мéртвых воскреси́л еси́, Хрiстé Спáсе наш.
Глас 3
Хор: Пресвятáя Богорóдице, спасù нас.
Чтец: Слóво Бóжiе Сын Твой, Дéво,/ Содéтель Адáма первоздáннаго,/ не создáнiе, áще и плоть одушевлéну// Себé из Тебé создáл есть.
Хор: Пресвятáя Богорóдице, спасù нас.
Чтец: Рáвен Отцý Сын Твой, Дéво,/ Слóво Бóжiе, Ипостáсь совершéнна во двою́ естествý,// Iисýс Госпóдь, Бог совершéн и Человéк.
Глас 5
Хор: Святы́й апóстоле Iýдo, молù Бóга о нас.
Чтец: Закóна остáвль сéни, и́стины óбраз свéтло проповéдал еси́,// сáмую и́стину стяжáв настáвника. (Двáжды)
Хор: Святы́й апóстоле Iýдо, молù Бóга о нас.
Чтец: Слóва повелéнiе исполня́я, апóстоле, язы́ки вся, учéнiи твои́ми научáя, обтéкл еси́,// и сих крестя́ Трóическим призывáнiем.(Двáжды)
Слáва Ѻтцý и Сы́ну и Святóму Дýху.
Тропáрь: Дождь небéсный, я́ко росá свы́ше, Божéственное вещáнiе твоé, Богопроповéдниче,// мглу разори́ многобóжiя еди́наго Бóга проповéданiем.
И ны́не и прúсно и во вéки векóв. Амúнь.
Богорóдичен: Умертви́ стрáсти моя́, Богороди́тельнице,/ и дýшу мою́, умерщвлéнную грехóвными сластьми́, возстáви,// Мáти и́стиннаго Воскресéнiя.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Бéздна послéдняя грехóв обы́де мя,/ и исчезáет дух мой;/ но простры́й, Влады́ко, высóкую Твою́ мы́шцу,// я́ко Петрá, мя, Упрáвителю, спасù.
Хор: Слáва, Гóсподи, Святóму Воскресéнiю Твоемý.
Чтец: Бéздна ми́лости и щедрóт обы́де мя,/ благоутрóбным сни́тiем Твои́м:/ воплóщься бо, Влады́ко,// и быв в рáбiи зрáце, обожи́л еси́, с Собóю сопрослáвив.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́т умертви́тель,/ умерщвлéнаго оживлéнно ви́дя:/ Твоегó воскресéнiя сíи суть, Хрiстé, óбразы,// и стрáсти Твоея́ пречи́стыя победи́тельная.
Хор: Пресвятáя Богорóдице, спасù нас.
Богорóдичен: Пречи́стая, я́же Еди́на Создáтелю и человéком, пáче умá исходáтаившая,// Сы́на Твоегó ми́лостива прегрéшшим рабóм Твои́м, и побóрника бы́ти, помоли́ся.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Рáнами Ты искуси́вся, от áда урáненых,/ стрáстiю Крестá совоскреси́л еси́./ Тéмже Ти зовý:// возведи́ от тли живóт мой, Человеколю́бче.
Хор: Слáва, Гóсподи, Крестý Твоемý Честнóму и Воскресéнiю.
Чтец: Отверзáются Ти Хрiстé стрáхом вратá áдова,/ сосу́ды же врáжiя восхищáются:/ тéмже Тя жены́ сретóша,// вмéсто печáли рáдость прiи́мша.
Глас 3
Хор: Пресвятáя Богорóдице, спасù нас.
Чтец: Воображáется éже по нам, от Нетлéнныя Дéвы,/ И҆́же óбразом неразлýчный, óбразом быв и вéщiю,// не прелóжся Божествóм Человéк.
Хор: Пресвятáя Богорóдице, спасù нас.
Чтец: Бéздны грехóв, и бýри страстéй, Пречи́стая, избáви мя:/ еси́ бо пристáнище, и бéздна чудéс,// вéрою притекáющим к Тебé.
Глас 5
Хор: Святы́й апóстоле Iýдo, молù Бóга о нас.
Чтец: Видéнiя учéнiем, житiя́ дея́ньми свéтло, Хрiстóв апóстоле, сiя́я,// сýщiя во глубинé невéденiя просвети́л еси́. (Двáжды)
Хор: Святы́й апóстоле Iýдо, молù Бóга о нас.
Чтец: Посылáеши всем человéком свéтлое и учéнiя Дýха испóлнено послáнiе,// священноявлéнне пречýдне. (Двáжды)
Слáва Ѻтцý и Сы́ну и Святóму Дýху.
Тропáрь: Богови́дец вещáет Небéсная,/ я́коже словéсную нéкую Бóжiю слáву повéдая// нас рáди плóтiю Я́вльшагося и чудесы́.
И ны́не и прúсно и во вéки векóв. Амúнь.
Богорóдичен: Пресвятáя Влады́чице Богомáти,/ избáви мя тли и страстéй смущéнiе утоли́,// истóчник безстрáстiя рóждшая.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 3: Воскрéсл еси́ днесь от грóба, Щéдре,/ и нас возвéл есѝ от врат смéртных;/ днесь Адáм ликýет, и рáдуется Éва,/ вкýпе же и прорóцы с патрiáрхи воспевáют непрестáнно// Божéственную держáву влáсти Твоея́.
Íкос: Нéбо и земля́ днесь да ликовствýют,/ и Хрiстá Бóга единомýдренно да воспевáют,/ я́ко ýзники от гробóв воскреси́./ Срáдуется вся тварь,/ принося́щи достóйныя пéсни Создáтелю всех,/ и Избáвителю нáшему:/ я́ко человéки из áда днесь, я́ко Жизнодáтель, совозвéд,/ на небесá совозвышáет,/ и низлагáет врáжiя возношéнiя,/ и вратá áдова сокрушáет// Божéственною держáвою влáсти Своея́.
ПЕСНЬ 7
Iрмóс: Я́коже дрéвле/ благочестúвыя три óтроки оросúл есù/ в плáмени халдéйстем,/ свéтлым Божествá огнéм/ и нас озарù,/ благословéн есù, взывáющiя,// Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлая катапетáсма, в распя́тiи Содéтеля,/ сокровéнную в Писáнiи явля́ющи вéрным и҆́стину,// благословéн еси́, зовýщим, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Прободéнным Твои́м рéбром,/ кáплями Боготóчныя Животворя́щiя Крóве, Хрiстé,/ смотри́тельно кáплющiя на зéмлю,/ сýщих от земли́ возсоздáл еси́,// благословéн еси́, зовýщих, Бóже отéц нáших.
Хор: Пресвятáя Трóице, Бóже наш, слáва Тебé.
Трóичен: Дýха Благáго со Отцéм прослáвим, и с Сы́ном Единорóдным,/ Еди́но в Трiéх вéрнiи чтýще Начáло, и Еди́но Божествó:// благословéн еси́, зовýще, Бóже отéц нáших.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Не прóста сóлнце на крестé ви́сяща человéка,/ но Бóга воплощéнна зря помрачáется. Емýже и поéм:// благословéн еси́, Гóсподи, Бóже отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: Крéпкаго Божествóм прiéм ад страшли́вый, нетлéнiя Подáтеля,/ дýши прáведных вопiю́щiя изблевá:// благословéн еси́, Гóсподи, Бóже отéц нáших.
Глас 3
Хор: Пресвятáя Богорóдице, спасù нас.
Чтец: И҆́же слáвы Госпóдь, и держáй гóрнiя си́лы,/ И҆́же со Отцéм седя́й, дéвственныма рукáма носи́мь:/ благословéн еси́, Гóсподи, Бóже отéц нáших.
Хор: Пресвятáя Богорóдице, спасù нас.
Чтец: Я́ра смерть, но сiю́ Тебé бесéдовавшую погуби́л еси́,/ от Дéвы Богоипостáсная плоть быв:// благословéн еси́, Гóсподи, Бóже отéц нáших.
Глас 5
Хор: Святы́й апóстоле Iýдo, молù Бóга о нас.
Чтец: Богови́дна ссýщiем Божествá бы́вша,/ вси Iýду воспоéм, соглáсно пою́ще:// Бóже, благословéн еси́. (Двáжды)
Хор: Святы́й апóстоле Iýдо, молù Бóга о нас.
Чтец: Духодви́жимый и Богодухновéнный язы́к твой мiр обрати́ Хрiстóвым проповéданiем,/ Емýже вси поéм:// Бóже, благословéн еси́. (Двáжды)
Слáва Ѻтцý и Сы́ну и Святóму Дýху.
Тропáрь: Даéт тебé Небéсное наслéдiе Госпóдь и престóл пресвéтел,/ на нéмже почивáя, божéственне поéши:// Бóже, благословéн еси́.
И ны́не и прúсно и во вéки векóв. Амúнь.
Богорóдичен: Усты́ и рáзумом Тя Богорóдицу Влады́чицу проповéдуем, веселя́щеся:/ Бóга бо родилá еси́, Емýже вси поéм:// Бóже, благословéн еси́.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Нестерпúмому огню́ соединúвшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благословúте, вся делá Госпóдня, Гóспода// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлость,/ егдá крест Твой водрузи́ся на лóбнем,/ и тварь преклоня́шеся стрáхом, воспевáющи:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Святóму Воскресéнiю Твоемý.
Чтец: Воскрéсл еси́ Хрiстé из грóба,/ и пáдшаго прельщéнiем, дрéвом испрáвил еси́ Божéственною си́лою, зовýща и глагóлюща:/ благослови́те вся делá Госпóдня, Гóспода,// пóйте и превозноси́те Егó во век.
Хор: Пресвятáя Богорóдице, спасù нас.
Богорóдичен: Храм Бóжiй яви́лася еси́ Вмести́лище одушевлéнное, и Ковчéг:/ Творцá бо человéком, Богороди́тельнице Пречи́стая, примири́ла еси́,/ и достóйно вся делá поéм Тя,// и превознóсим во вся вéки.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Слóво нестрáстное, безстрáстно ýбо Божествóм,/ стрáждет же плóтiю Бог, Емýже и поéм:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Уснýвый ýбо, я́ко смéртен,/ воскрéсл еси́, я́ко Безсмéртен, Спáсе,/ и спасáеши от смéрти пою́щих:/ благослови́те вся делá Госпóдня, Гóспода,// пóйте и превозноси́те Егó во вéки.
продолженiе зри здесь