НИКОЛА ЛЕТНИЙ. Перенесение мощей святителя и чудотворца Николая. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ
22 мáя 2023 гóда. Понедéльник 6-й седмúцы по Пáсхе. Перенесéнiе мощéй святúтеля и чудотвóрца Нiколáя из Мир Ликíйских в Бар. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном. НИКОЛА ЛЕТНИЙ
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Псалом 103, предначинáтельный
Стiхú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхú избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 5
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
[Пропускается до стихир]Изведи́ из темни́цы дýшу мою́, исповéдатися и҆́мени Твоемý. Менé ждут прáведницы, дóндеже воздáси мне.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúры Трióди, глас 5: Свет всему́ естеству́ человéческому,/ и О́ко тéлу ми́ра сего́,/ сый Бо́же и Сло́ве,/ и очесéм о́бще,/ Содéтель и Зижди́тель познавáемь:/ и ны́не от смешéнiя брéнiя и плюновéнiя,/ слепáго неизречéнно воочáеши пéрсты Твои́ми/ созидáющими и брéнiе, и видéнiе:/ éже и улучи́в, прéжде в рождéнных знáемый,/ со́лнца отню́д не ви́дя,/ Тебé Слáдкое ви́дит Со́лнце,// зря о́браз, нас за благоутро́бiе неизречéнное Создáвшаго.
Да бýдут ýши Твоù// внéмлюще глáсу молéнiя моегó.
Стiхúра: Удо́в лишéнiем,/ и отложéнiем человéческiя плотски́я ору́дiйныя чáсти богатéя,/ прéжде слепы́й от утро́бы мáтерни произшéдый,/ я́ко не бы́ти создáнiе помышля́ше,/ очéс лишéнiе,/ из него́же ногáма,/ и множáйшая телесé преткновéнiя,/ éже о кáменiе бывáху:/ и́же Тобо́ю и сié богáтство стяжáв, ви́дит свет ми́ра,/ и Тебé свéтов Строи́теля Бо́га и Влады́ку твáрем возвещáет,// и Содéтеля всеми́рнаго.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Усты́ и душéю и умо́м,/ от пéрсти Зижди́тельски и плюновéнiя очéс зéницы Дáвшаго,/ и о́бщее просвещéнiе, и́же прéжде слепы́й исповéдаше,/ тва́рем всеми́рнаго Смотри́теля и Строи́теля,/ за милосéрдiе то́кмо создáнiя вочеловéчившагося,/ и проповéдаше я́ко Бо́га Всеси́льнаго:/ его́же кни́жницы рéвностiю, и éже к ним бесéдованiе отню́д не могу́ще зрéти,/ слепотству́юще мно́жае, изгнáна от собо́рища су́дят,// иногдá зéницы Дáвшаго слепо́му, душéвныя и телéсныя.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúры свт. Нiколáя. Глас 8: На нéбо добродéтелей возшéд превысóких,/ чудотвóрец яви́лся еси́ в Ми́рех, слáвне:/ тéлом в Бáре почивáя,/ дýхом вездé вéрныя посещáеши/ и вся от бед изымáеши,/ достóйно честь прiéмля,/ во святи́телех прославля́ешися,/ Хрiстóв угóдниче блажéнне./ Тя ны́не молéбно призывáюще,/ уми́льно глагóлем:/ помоли́ся, святи́телю Никóлае, Спáсу всех// умири́ти мир и спасти́ дýши нáша.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: На нéбо добродéтелей возшéд превысóких,/ чудотвóрец яви́лся еси́ в Ми́рех, слáвне:/ тéлом в Бáре почивáя,/ дýхом вездé вéрныя посещáеши/ и вся от бед изымáеши,/ достóйно честь прiéмля,/ во святи́телех прославля́ешися,/ Хрiстóв угóдниче блажéнне./ Тя ны́не молéбно призывáюще,/ уми́льно глагóлем:/ помоли́ся, святи́телю Никóлае, Спáсу всех// умири́ти мир и спасти́ дýши нáша.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Молéбными пéсньми, сошéдшеся, празднолю́бцы,/ нáшего застýпника честнóе пренесéнiе рáдостно восхвáлим,/ и́же вся страны́ просвещáет чудесы́/ и скорбя́щiя божéственне утешáет,/ оби́димыя избавля́ет,/ и́же ми́лостынею Бóга одолжи́/ и тогó рáди прiя́т стокрáтное воздая́нiе./ К немýже вси мы взывáем:/ помоли́ся, святи́телю Никóлае, Спáсу всех// умири́ти мир и спасти́ дýши нáша.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Молéбными пéсньми, сошéдшеся, празднолю́бцы,/ нáшего застýпника честнóе пренесéнiе рáдостно восхвáлим,/ и́же вся страны́ просвещáет чудесы́/ и скорбя́щiя божéственне утешáет,/ оби́димыя избавля́ет,/ и́же ми́лостынею Бóга одолжи́/ и тогó рáди прiя́т стокрáтное воздая́нiе./ К немýже вси мы взывáем:/ помоли́ся, святи́телю Никóлае, Спáсу всех// умири́ти мир и спасти́ дýши нáша.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Áнгельская жили́ща дости́г добродéтельми,/ предстои́ши Влады́це твоемý Хрiстý,/ Емýже раб благопокори́в был еси́,/ и от рáки ми́ро тóчиши,/ вéрным посóбствуя чудесы́ твои́ми/ и к Бóгу приводя́ благочести́выя./ Не от Бáра ны́не призывáем тя,/ но от гóрнего Iерусали́ма,/ идéже рáдостно ликýеши со апóстолы, и прорóки, и святи́тели:/ помоли́ся, Богонóсе Никóлае, Спáсу всех// умири́ти мiр и спасти́ дýши нáша.
Слáва Ѻтцý и Сы́ну и Святóму Дýху.
Глас 6: Святи́телей удобрéнiе/ и отцéв слáву,/ истóчника чудéс и вéрных застýпника вели́каго,/ сошéдшеся, о празднолю́бцы,/ пéсненными похвалáми воспоéм, глагóлюще:/ рáдуйся, ми́рянов храни́телю,/ и первоседáтелю честны́й, и стóлпе неподви́жимый./ Рáдуйся, свети́льниче всесвéтлый,/ и́же мирскíя концы́ просвещáя чудесы́./ Рáдуйся, скорбя́щих Божéственная рáдосте/ и оби́димых тéплый предстáтелю./ И ны́не, всеблажéнне Никóлае,/ не престáй моля́ся Хрiстý Бóгу/ о вéрою и любóвiю чтýщих приснорáдостную// и всепрáзднственную пáмять твою́.
И ны́не и прúсно и во вéки векóв, амúнь.
Догмáтик Трióди. Глас 2: Слепы́й роди́выйся в своéм пóмысле глагóлаше:/ едá аз грех рáди роди́тельных роди́хся без óчiю?/ Едá аз за невéрiе язы́ков роди́хся во обличéнiе?/ Не домышля́юся вопрошáти: когдá нощь, когдá день?/ Не терпи́та ми́ нóзе кáменнаго претыкáнiя:/ не ви́дех бо сóлнца сiя́юща,/ нижé во óбразе менé Создáвшаго:/ но молю́ ти ся Хрiстé Бóже,// при́зри на мя и поми́луй мя.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ВЕЧЕРНИЙ ПРОКИМЕН ДНЯ
Чтец: Прокíмен, глас осьмы́й: Се ны́не благослови́те Гóспода, вси раби́ Госпóдни. (Пс.133:1А)
Хор: Се ны́не благословúте Гóспода,/ вси рабù Госпóдни.
Чтец: Стоя́щiи во хрáме Госпóдни, во двóрех дóму Бóга нáшего. (Пс.133:1Б)
Хор: Се ны́не благословúте Гóспода,/ вси рабù Госпóдни.
Чтец: Се ны́не благослови́те Гóспода.
Хор: Вси рабù Госпóдни.
ПАРЕМИИ
Чтец: При́тчей чтéнiе.
(Из глав 10, 3 и 8) Пáмять прáведнаго с похвалáми, и благословéнiе Госпóдне на главé егó. Блажéн человéк, и́же обрéте премýдрость, и смéртен, и́же увéде рáзум. Лýчше бо сiю́ куповáти, нéжели злáта и сребрá сокрóвища. Честнéйшая же есть кáменiй многоцéнных, все же честнóе недостóйно ея́ есть. Долготá бо дней и лéта животá в десни́це ея́, в шýйце же ея́ богáтство и слáва. От уст ея́ исхóдит прáвда, закóн же и ми́лость на язы́це нóсит. Послýшайте ýбо менé, о чáда, честнáя бо рекý, и блажéн человéк, и́же пути моя́ сохрани́т. Исхóди бо мои́ - исхóди животá, и уготовля́ется хотéнiе от Гóспода. Сегó рáди молю́ вас и предлагáю мой глас сыновóм человéческим: я́ко аз, премýдрость, устрóих совéт, и рáзум и смысл аз призвáх. Мой совéт и утверждéнiе, мой рáзум, моя́ же крéпость. Аз менé лю́бящiя люблю́, и́щущiи же менé обря́щут благодáть. Разумéйте ýбо, незлóбивiи, ковáрство, ненакáзаннiи же, прилагáйте сердцá. Послýшайте менé и пáки, честнáя бо рекý, и отвéрзу от устéн прáвая, я́ко и́стине поучи́тся гортáнь мой, мéрзки же предо мнóю устны́ лжи́выя. С прáвдою вси глагóлы уст мои́х, ничтóже в них стрóпотно, нижé развращéнно. Вся прáва суть разумевáющим и прóста обретáющим рáзум. Научáю бо вас и́стине, да бýдет о Гóсподе надéжда вáша, и испóлнитеся Дýха.
[Русский синодальный перевод]Память праведника пребудет благословенна, и благословения - на голове его. Блажен человек, который снискал мудрость, и человек, который приобрел разум, - потому что приобретение её лучше приобретения серебра, и прибыли от неё больше, нежели от золота: она дороже драгоценных камней, и ничто из желаемого тобою не сравнится с нею. Долгоденствие - в правой руке её, а в левой у неё - богатство и слава; из уст её выходит правда; закон и милость она на языке носит. Слушайте меня, дети, потому что я буду говорить важное: Блажен человек, который слушает меня, потому что, кто нашел меня, тот нашел жизнь, и получит благодать от Господа. К вам, люди, взываю я, и к сынам человеческим голос мой! Я, премудрость, обитаю с разумом и ищу рассудительного знания. У меня совет и правда; я разум, у меня сила. Любящих меня я люблю, и ищущие меня найдут меня. Научитесь, неразумные, благоразумию, и глупые - разуму. Слушайте, потому что я буду говорить важное, и изречение уст моих - правда; ибо истину произнесет язык мой, и нечестие - мерзость для уст моих; все слова уст моих справедливы; нет в них коварства и лукавства; все они ясны для разумного и справедливы для приобретших знание. Ибо я учу вас истинному, чтобы была в Господе надежда ваша, и вы исполнились Духа.(10:7А, 5 А; 3:13-16; 8:6, 34А, 35, 4, 12, 14, 17, 5-9)
Чтец: При́тчей чтéнiе.
(Из глав 10 и 8): Устá прáведнаго кáплют премýдрость, язы́к же непрáведнаго поги́бнет. Устнé мужéй прáведных кáплют благодáти, устá же нечести́вых развращáются. Мéрила льсти́вая - мéрзость пред Гóсподем, вес же прáведный прiя́тен Емý. Идéже áще вни́дет досаждéнiе, тáмо и безчéстiе, устá же смирéнных поучáются премýдрости. Совершéнiе прáвых настáвит их и поползновéнiе отрицáющихся упасéт их. Не пóльзуют имéнiя в день я́рости, прáвда же избáвит от смéрти. У́мер прáведный, остáви раскáянiе, нарýчна же бывáет и посмея́тельна нечести́вых пáгуба. Прáвда непорóчнаго исправля́ет пути́, в нечéстiе же пáдает непрáвда. Прáвда мужéй прáвых избáвит их, безсовéтiем же пленя́ются беззакóннiи. Скончáвшуся мýжу прáведну, не поги́бнет надéжда, похвалá же нечести́вых поги́бнет. Прáведник от лóва убéгнет, в негóже мéсто предаéтся нечести́вый. Во устéх нечести́вых сеть грáжданом, чýвство же прáведных благоспéшное. Во благи́х прáведных испрáвится град, и в поги́бели нечести́вых рáдованiе. Во благословéнiи прáвых возвы́сится град, усты́ же нечести́вых раскопáется. Ругáется грáжданом лишéнный рáзума, муж же мýдрый безмóлвiе вóдит.
[Русский синодальный перевод]Уста праведника источают мудрость, а язык зловредный отсечется. Уста праведного знают благоприятное, а уста нечестивых - развращенное. Неверные весы - мерзость пред Господом, но правильный вес угоден Ему. Придет гордость, придет и посрамление; но со смиренными - мудрость. (Праведник, умирая, оставляет сожаление; но внезапна и радостна бывает погибель нечестивых.) Непорочность прямодушных будет руководить их, а лукавство коварных погубит их. Не поможет богатство в день гнева, правда же спасет от смерти. Правда непорочного уравнивает путь его, а нечестивый падет от нечестия своего. Правда прямодушных спасет их, а беззаконники будут уловлены беззаконием своим. Со смертью человека нечестивого исчезает надежда, и ожидание беззаконных погибает. Праведник спасается от беды, а вместо него попадает в нее нечестивый. Устами лицемер губит ближнего своего, но праведники прозорливостью спасаются. При благоденствии праведников веселится город, и при погибели нечестивых бывает торжество. Благословением праведных возвышается город, а устами нечестивых разрушается. Скудоумный высказывает презрение к ближнему своему; но разумный человек молчит. (Притч.10:31 - 11:12)
Чтец: Премýдрости Соломóни чтéнiе.
(Из главы 4): Прáведник, áще пости́гнет скончáтися, в покóи бýдет./ Стáрость бо честнá не многолéтна,/ нижé в числé лет исчитáется. Сединá же есть мýдрость человéком/ и вóзраст стáрости - житié несквéрное./ Благоугóден Бóгови быв, возлю́блен бысть/ и живы́й посредé грéшник, престáвлен бысть./ Восхищéн бысть, да не злóба измени́т рáзума егó,/ или́ лесть прельсти́т дýшу егó./ Рачéнiе бо злóбы помрачáет дóбрая,/ и парéнiе пóхоти пременя́ет ум незлóбив./ Скончáвся вмáле, испóлни лéта дóлга,/ угóдна бо бе Гóсподу душá егó,/ сегó рáди потщáся от среды́ лукáвствiя. Лю́дiе же, ви́девше, и не разумéвше,/ нижé полóжше в помышлéнiи таковóе,/ я́ко благодáть и ми́лость в преподóбных Егó// и посещéнiе во избрáнных Егó.
[Русский синодальный перевод]Праведник, если и рановременно умрёт, будет в покое, ибо не в долговечности честная старость и не числом лет измеряется: мудрость есть седина для людей, и беспорочная жизнь - возраст старости. Как благоугодивший Богу, он возлюблен, и, как живший посреди грешников, преставлен, восхищен, чтобы злоба не изменила разума его, или коварство не прельстило души его. Ибо упражнение в нечестии помрачает доброе, и волнение похоти развращает ум незлобивый. Достигнув совершенства в короткое время, он исполнил долгие лета; ибо душа его была угодна Господу, потому и ускорил он из среды нечестия. А люди видели это и не поняли, даже и не подумали о том, что благодать и милость со святыми Его и промышление об избранных Его.(Прем 4:7-15)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры святúтеля, глас 2, самоглáсны: Ѻ́тче Нiкóлае,/ áще и Ми́рская странá молчи́т,/ но мiр весь, и́же тобóю просвещéнный,/ ми́ра же благоухáнiи и чудéс мнóжествы/ взывáет благохвáльными пéсньми;/ и спáсшiися тобóю осуждéннiи,/ с сýщими в Ми́рех и мы, пою́ще, вопiéм:// моли́ спасти́ся душáм нáшим.
Глас 4: Ѻ́тче Нiкóлае,/ Пресвятáго Дýха мирополóжница сый,/ я́ко в Ми́рех благоухáеши Божéственными аромáты:/ Хрiстóвым бо апóстолом подóбник быв,/ вселéнную обхóдиши словесы́ чудéс твои́х./ Тéмже и дáльним, я́ко близ, во сне явля́яся,/ от смéрти избавля́еши,/ и́же непрáведным судóм умрéти имýщiя,/ спасáя преслáвно от бед мнóгих призывáющiя тя./ Тéмже, и нас, от находя́щих лю́тых свободи́// твои́ми моли́твами, при́сно восхваля́ющих тя.
Глас 8: Дóблестей твои́х, преподóбне óтче,/ плод просвети́л есть вéрных сердцá:/ кто бо, слы́ша безмéрное твоé смирéнiе,/ терпéнiю не удиви́ся,/ éже к ни́щим ти́хости, к скорбя́щим утешéнiю;/ вся Боголéпно научи́л еси́, святи́телю Нiкóлае,/ и ны́не неувядáемым венцéм увя́злся еси́,// моли́ся о душáх нáших.
На хвалý потéкл еси́ Госпóдню, Нiкóлае,/ во врéменней жи́зни,/ и Той тя прослáви на Небéсней и и́стинней жи́зни./ Тéмже дерзновéнiе стяжáв к Немý,// моли́ спасти́ дýши нáша.
Слáва Отцý и Сыну и Святóму Дýху.
Глас 6: Благíй рáбе вéрный,/ дéлателю виногрáда Хрiстóва,/ ты и тяготý дневнýю понéсл еси́,/ ты и дáнный ти талáнт возрасти́л еси́/ и по тебé пришéдшим не зави́дел еси́./ Тéмже вратá Небéсная отверзóшася тебé,/ вни́ди в рáдость Гóспода твоегó// и моли́ о нас, свя́те Нiкóлае.
И ныне и прúсно и во вéки векóв, амúнь.
Стiхúра Трióди, глас 5: Гóсподи, мимоходя́ путéм,/ обрéл еси́ человéка слéпа от рождéнiя,/ и удивлéни бы́вше ученицы́, вопрошáху Тя глагóлюще:/ Учи́телю, кто согреши́, сей ли, или́ роди́тели егó, да слеп роди́ся?/ Ты же Спáсе мóй возопи́л еси́ к ним:/ ни сéй согреши́, ни роди́тели егó,/ но да явя́тся делá Бóжiя на нем./ Мне подобáет дéлати делá Послáвшаго Мя,/ я́же никтóже мóжет дéлати./ И сiя́ рек, плю́нув дóлу, и брéнiе сотвóрь, помáзал еси́ óчи егó,/ рек к нему́: иди́ умы́йся в Силоáмстей купéли./ Он же умы́вся здрав бысть, и вопiя́ше к Тебé:/ вéрую Гóсподи, и поклони́ся Тебé.// Тéмже вопiéм и мы: поми́луй нас.
Гóсподи, поми́луй. (40 раз)
Слáва Отцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры святúтеля, глас 4): Звездý незаходи́мую всесвéтлаго сóлнца,/ нéбо духóвное,/ повéдающее слáву Бóжiю спаси́тельную,/ Божéственнаго проповéдника, просвéщника язы́ком,/ рекý, изливáющую вóды рáзума/ и напая́ющую вéрных сердцá,// да ублажи́м Нiколáя, преслáвнаго святи́теля.
Стiх: Честнá пред Гóсподем/ смерть преподóбных Егó.(Пс.115:6)
Мóрем, святи́телю, бы́ша шéствiя твоя́/ из Мир Ликíйских в Бар град:/ взя́тся бо от грóба ковчéг твой/ и к зáпадом дóйде от востóка,/ благочéстно послéдовавшим монáхом,/ и́же при грóбе твоéм честь ти твори́вшим,/ мановéнiем Влады́ки всех,// Нiкóлае преслáвне.
Стiх: Свящéнницы Твоú облекýтся прáвдою, и преподóбнiи Твоú возрáдуются.(Пс.131:9)
Кораблеплáванiем ти, вóду блажéнну содéя,/ и, ко грáду Бáру пришéд,/ ми́ро источи́л еси́, слáвне,/ и, стрáсти неисцéльныя исцеля́я,/ ту сýщим был еси́ прибéжище,/ и застýпник, и избáвитель,/ ко всех Царю́ и Спáсу моля́ся,// Нiкóлае святи́телю.
Слáва Отцý и Сыну и Святóму Дýху.
Iоáнна монáха, глас 6: Человéче Бóжiй и вéрный рáбе,/ слугó Госпóдень,/ мýжу желáнiй,/ сосýде избрáнный,/ стóлпе и утверждéнiе Цéркве,/ Цáрствiя наслéдниче,// не премолчи́, вопiя́ за ны ко Гóсподу.
И ны́не и прúсно и во вéки векóв, амúнь.
Стiхúра Трióди, глас 8: Мимоходя́ Iисýс от святи́лища,/ обрéте человéка слéпа от рождéнiя,/ и умилосéрдився положи́ брéнiе на óчiю егó,/ и речé к немý:/ иди́, умы́йся в Силоáме:/ и умы́вся прозрé, слáву возсылáя Бóгу./ Сосéди же егó глагóлаху емý:/ кто твои́ зéницы отвéрзе, и́хже никтóже от зря́щих исцели́ти возмóже?/ Он же возопи́в речé:/ Человéк Iисýс глагóлемый,/ Он ми речé: умы́йся в Силоáме, и прозрéх./ Той есть вои́стинну, Егóже речé Моисéй в закóне Хрiстá, Мессíю,// Той есть Спас душ нáших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь свт. Нiколáя, глас 4: Приспé день свéтлаго торжествá,/ град Бáрскiй рáдуется,/ и с ним вселéнная вся ликовству́ет пéсньми и пéньми духóвными:/ днесь бо свящéнное торжествó,/ в пренесéнiе честны́х и многоцелéбных мощéй/ святи́теля и чудотвóрца Нiколáя,/ я́коже сóлнце незаходи́мое, возсiя́ светозáрными лучáми,/ разгоня́я тьму искушéнiй же и бед/ от вопiю́щих вéрно:// спасáй нас, я́ко предстáтель наш вели́кiй, Нiкóлае.(Двáжды)
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших.
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[B приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню