НИКОЛА ЛЕТНИЙ. Перенесение мощей святителя и чудотворца Николая. ВСЕНОЩНОЕ БДЕНИЕ. УТРЕНЯ. КАНОН
22 мáя 2023 гóда. Понедéльник 6-й седмúцы по Пáсхе. Перенесéнiе мощéй святúтеля и чудотвóрца Нiколáя из Мир Ликíйских в Бар. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Хор: Величáем тя,/ святúтелю óтче Нiкóлае,/ и чтим святýю пáмять твою́,/ ты бо мóлиши за нас // Хрїстá Бóга нáшего.
Гóсподи, поми́луй. (12 раз)
Седáльны прáздника по полiелéе, глас 1: Освя́щ себé житiéм совершéнным, яви́лся еси́ святи́тель Бóга Вы́шнего,/ от Негóже укрепля́емь, ерети́чествующих устá загради́л еси́.// Тем твоé пренесéнiе свéтло прáзднуем, Хрiстá Бóга величáюще. (Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор (по кафíсме седáлен Трióди, глас 5): Прéжде Крестá Твоегó Щéдре, и Востáнiя,/ идýщу Ти, слепы́й от рождéнiя взывáше тéпле:/ Сы́не Давíдов поми́луй,/ даждь ми́ свет очесéм,/ да узрю́ Тя и аз:/ егóже зéницы помáзав брéнiем от плюновéнiя Слóве,// томý свет свéтло дал еси́.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступù// и спасù, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый, псалóм Давíдов: Честнá пред Гóсподем смерть преподóбных Егó.(Пс.115:6)
Хор: Честнá пред Гóсподем/ смерть преподóбных Егó.
Чтец: Что воздáм Гóсподеви о всех, я́же воздадé ми? (Пс.115:3)
Хор: Честнá пред Гóсподем/ смерть преподóбных Егó.
Чтец: Честнá пред Гóсподем.
Хор: Смерть преподóбных Егó.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
Гóсподи, поми́луй. (3раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ЕВАНГЕЛИЕ
От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.35Б(от полý): Речé Госпóдь ко пришéдшим к Немý Iудéем: ами́нь, ами́нь глагóлю вам, не входя́й двéрьми во двор óвчiй, но прелáзя и́нуде, той тать есть и разбóйник. А входя́й двéрьми пáстырь есть овцáм. Сему́ двéрник отверзáет, и óвцы глас егó слы́шат, и своя́ óвцы глашáет по и́мени, и изгóнит их. И егдá своя́ óвцы ижденéт, пред ни́ми хóдит, и óвцы по нем и́дут, я́ко вéдят глас егó. По чуждéм же не и́дут, но бежáт от негó, я́ко не знáют чуждáго глáса. Сiю́ при́тчу речé им Iису́с, они́ же не разумéша, что бя́ше, я́же глагóлаше им. Речé же пáки им Iису́с: ами́нь, ами́нь глагóлю вам, я́ко Аз есмь дверь овцáм. Вси, ели́ко их прiи́де прéжде Менé, тáтiе суть и разбóйницы, но не послу́шаша их óвцы. Аз есмь дверь, Мнóю áще кто вни́дет, спасéтся, и вни́дет и изы́дет, и пáжить обря́щет.
Сказал Господь пришедшим к Нему Иудеям: истинно, истинно говорю вам: кто не дверью входит во двор овчий, но перелазит иным путем, тот вор и разбойник; а входящий дверью есть пастырь овцам. Ему придверник отворяет, и овцы слушаются голоса его, и он зовет своих овец по имени и выводит их. И когда выведет своих овец, идет перед ними; а овцы за ним идут, потому что знают голос его. За чужим же не идут, но бегут от него, потому что не знают чужого голоса. Сию притчу сказал им Иисус; но они не поняли, что такое Он говорил им. Итак, опять Иисус сказал им: истинно, истинно говорю вам, что Я дверь овцам. Все, сколько их ни приходило предо Мною, суть воры и разбойники; но овцы не послушали их. Я - дверь: кто войдет Мною, тот спасется, и войдет, и выйдет, и пажить найдет. (Ин 10:1-9)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами святи́теля,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра cвятúтеля, глас 6: Наслéдниче Бóжiй,/ сопричáстниче Хрiстóв,/ служи́телю Госпóдень, свя́те Нiкóлае,/ по и́мени твоемý тáко и житié твоé:/ спросiя́ бо седи́не рáзум,/ свидéтельствоваше свéтлость лицá твоегó душéвное незлóбiе,/ извéствоваше крóтость слóва молчали́вое./ Жизнь твоя́ слáвна и успéнiе со святы́ми,// моли́ о душáх нáших.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН Праздника Триоди, ГЛАС 5
(Канóн Трióди, совмещéнный с канóнами свт. Нiколáя, глас 8 (пéрвый), и, глас 4 (вторóй)
ПЕСНЬ 1
Iрмóс: Зéмлю, на ню́же не возсiя́, ни ви́де сóлнце когдá,/ бéздну, ю́же не ви́де нáгу, широтá небéсная,/ Iзрáиль прóйде невлáжно, Гóсподи,/ и ввел еси́ егó в гóру святы́ни Твоея́,// хвáляща и пою́ща побéдную песнь. (Двáжды)
Хор (припéв): Слáва Тебé, Бóже наш, слáва Тебé.
Чтец: Распя́тiе вóльное воспрiи́м, Спáсе, плóтiю,/ источи́л еси́ благословéнiе, и жизнь мíрови, Влады́ко,/ еди́не Всеблагословéнне, и всех Содéтелю./ Тéмже благослови́м Тя, поéм и слáвим, пою́ще,// воспевáюще побéдную песнь.
Хор: Слáва Тебé, Бóже наш, слáва Тебé.
Чтец: В рóве Тя преиспóднейшем мéртва бы́вша, Хрїстé,/ положи́ благообрáзный Ióсиф,/ и привали́ к двéрем грóба кáмень, Долготерпели́ве./ Но воскрéсл еси́ слáвне, и мир совозстáвил еси́ пою́щiй,// воспевáющiй побéдную песнь.
Хор: Слáва Тебé, Бóже наш, слáва Тебé.
Чтец: Ми́ра что принóсите со слезáми вы,/ глагóлаше честны́м женáм А́нгел явлéйся?/ Хрiстóс востá:/ тéкше рцы́те богови́дцем ученикóм, рыдáющим и плáчущим,// я́ко да взыгрáют и ликовствýют свéтло.
Хор: Слáва Тебé, Бóже наш, слáва Тебé.
Чтец: Чудесá преслáвная сотворя́я, Избáвитель/ исцели́ и слéпа от рождéнiя,/ брéнiем помáзав, и рек:/ иди́ и умы́йся в Силоáме,/ я́ко да познáеши Мя Бóга/ по земли́ шéствующа, плоть нося́ща,// за милосéрдiе щедрóт.
Канон свт. Николáя, глас 8 (первый)
Хор: Святúтелю óтче Нiкóлае, молù Бóга о нас.
Чтец: Песнь устéн мои́х прiими́, Благодáтелю Хрiстé,/ и уясни́ ми язы́к, не поминáя мнóгих мои́х грехóв,/ да воспою́ честнóе житié Твоегó святи́теля/ в пáмять пренесéнiя мощéй егó.
Хор: Святúтелю óтче Нiкóлае, молù Бóга о нас.
Чтец: Чудотвóрный дар прiéм и терпéнiя венцы́, святи́тельством украшáяся,/ Бóгу помоли́ся, óтче, прегрешéнiй прощéнiе даровáти нам,/ слáвящим твоé пренесéнiе.
Хор: Святúтелю óтче Нiкóлае, молù Бóга о нас.
Чтец: Пáстырь Хрiстóва стáда, óтче, ины́м овцáм посылáешися, к лати́нскому язы́ку,/ да вся удиви́ши чудесы́ твои́ми и ко Хрiстý приведéши, блажéнне,/ Емýже и о нас моли́ся непрестáнно.
Хор: Пресвятáя Богорóдице, спасù нас.
Богорóдичен: Далéче бы́вше иногдá,/ язы́честiи нарóди Рождествóм Твои́м, Богорóдице, к Бóгу прибли́жихомся:/ Ты бо мене Обожи́вшаго породилá еси́ и дрéвнiя кля́твы Свобóждшаго Своéю крóвiю.
Канон свт. Николáя, глас 4 (второй)
Хор: Святúтелю óтче Нiкóлае, молù Бóга о нас.
Чтец: Просвети́ дýшу и сéрдце, молю́ Ти ся, Светодáвче, твáри Содéтелю,/ дар подáждь ми воспевáнiем пéти Твоегó угóдника пречестнáго,// и́мже мир от скóрби избáви. (Двáжды)
Слáва Ѻтцý и Сы́ну и Святóму Дýху.
Чтец: Небéсную ты обрéт премýдрость,/ я́ко талáнта вручéннаго, благоупотреби́л еси́:/ тóю бо, разори́в противобóжную лесть,// умудри́л еси́ лю́ди Божéственным учéнiем.
И ны́не и прúсно и во вéки векóв. Амúнь.
Богорóдичен: Зачинáется Превéчный, и совершéнный обновля́ется,/ из Отрокови́цы Дéтищ раждáется,/ Егóже проповéдал еси́ во двою́ существý,// во еди́ной же Ипостáси, Богоблажéнне.
Катавáсiя Пáсхи, глас 1: Воскресéнiя день,/ просвети́мся, лю́дiе./ Пáсха, Госпóдня Пáсха:/ от смéрти бо к жизни,/ и от землѝ к небесѝ,/ Хрїстóс Бог нас преведé,// побéдную пою́щiя.
ПЕСНЬ 3
Iрмóс: Дви́жимое сéрдце моé, Гóсподи,/ волнáми житéйскими,/ утверди́, во пристáнище ти́хое// наставля́я я́ко Бог. (Двáжды)
Хор: Слáва Тебé, Бóже наш, слáва Тебé.
Чтец: Колéблющихся сердцá утверди́л еси́,/ зéмлю всю поколебáв, Долготерпели́ве,/ честны́м распя́тiем Твои́м// éже претерпéл еси́ плóтiю.
Хор: Слáва Тебé, Бóже наш, слáва Тебé.
Чтец: В нóвем грóбе Тебé положи́, Щéдре, Ióсиф благообрáзный,// воскрéсл же еси́ из мéртвых триднéвен, новосотвори́вый нас.
Хор: Слáва Тебé, Бóже наш, слáва Тебé.
Чтец: Что я́ко мéртва и́щете Гóспода?/ Воскрéсе, я́коже речé,/ Áнгел женáм вещáше,// блистáяся божéственным зрáком.
Хор: Слáва Тебé, Бóже наш, слáва Тебé.
Чтец: Слéпа иногдá от рождéнiя, пристýпльша к Тебé/ исцели́л еси́ Всещéдре,// слáвяща смотрéнiе Твоé и чудесá.
Глас 8
Хор: Святúтелю óтче Нiкóлае, молù Бóга о нас.
Чтец: Незлóбивый нрáвом и крóткiй óбразом,/ житié имéя áнгельское, Богоблажéнне Нiкóлае,// не престáй о нас моля́ся еди́ному Человеколю́бцу.
Хор: Святúтелю óтче Нiкóлае, молù Бóга о нас.
Чтец: Кiй град, блажéнне, не имéет тебé помóщника?/ Кáя ли душá не призывáет твоегó и́мене?// Или́ кóего мéста не присещáеши дýхом, твои́ми чудесы́ удивля́я вся, Нiкóлае?
Хор: Святúтелю óтче Нiкóлае, молù Бóга о нас.
Чтец: Бáрскiй ýбо град прiя́т тéло твоé, но дух твой в Вы́шнем Iерусали́ме,/ идéже ликýеши со прорóки, и апóстолы, и святи́тели кýпно,// моля́ся о нас еди́ному Человеколю́бцу.
Хор: Пресвятáя Богорóдице, спасù нас.
Богорóдичен: Просвещéнiе ми испроси́, Пречи́стая Влады́чице,/ омрачéнному грехи́ мнóгими, порóждшая Свет всемý ми́ру,// и страстнýю мглу далéче отжени́, еди́на Богоблажéнная.
Глас 4
Хор: Святúтелю óтче Нiкóлае, молù Бóга о нас.
Чтец: Печáльнiи тя обретóхом крéпкое утешéнiе,/ помрачéнiи - свет, и злых изменéнiе и́же скорбьми́ одержи́мии,// свящéннейшiй óтче. (Двáжды)
Слáва Ѻтцý и Сы́ну и Святóму Дýху.
Чтец: Святи́телю Нiкóлае, Бóжiя устá быв,/ из уст вóлка непрiя́зненна лю́ди избáвил еси́, слáвне,// и привéл еси́ Творцý дар, дая́й исцелéнiе всем.
И ны́не и прúсно и во вéки векóв. Амúнь.
Богорóдичен: Еди́н роди́тися извóли плóтiю из Тебé,/ вы́ше слóва сый Слóво, Богомáти Пречи́стая,// избрáвый слугý Себé и учи́теля нарóдом iерáрха Нiколáя.
Катавáсiя Пáсхи, глас 1: Прiиди́те, пи́во пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одожди́вша Хрїстá,// в Нéмже утверждáемся.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прáздника Тріóди (о слепóм) глас 4: Душéвныма очи́ма ослеплéн,/ к Тебé, Хрiстé, прихождý,/ я́коже слепы́й от рождéнiя,/ покая́нiем зовý Ти:// Ты сýщих во тьме Свет пресвéтлый.
Íкос: Струю́ ми дáруй, Хрiстé, премýдрости неизречéнныя, и рáзума гóрняго,/ свéте сýщих во тьме, и прельщáемых настáвниче,/ да возмогý чудесá Твоя́ повéдати, окая́нный,/ я́же божéственная кни́га научи́ Евáнгелiа ми́ра,/ си́есть, слепáго чудотворéнiе:/ я́ко от рождéнiя слеп сый,/ óчи чýвственныя прiéмлет и душéвныя, вéрою взывáя:// Ты сýщих во тьме свет пресвéтлый.
Седáлен свт. Нiколáя, глaс 1: Пренесéнiе твои́х честны́х мощéй положéнiе нам бысть прáзднества свéтла,/ святи́телю Госпóдень прехвáльный,/ éже хвáлим благочéстно, и рáдостно чту́ще тя свéта незаходи́маго Сóлнца,// вéрным добрóто, Нiкóлае. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Трióди (о слепóм), глaс 8: Всех Влады́ка и Творéц преходя́,/ обрéте на пути́ слéпа седя́ща, плáчуща и глагóлюща:/ не ви́дех в житiи́ сóлнца сiя́юща,/ нижé луны́ свéта озаря́ющаго./ Тéмже вопiю́ Ти:/ рождéйся от Дéвы, просвещéй вся́ческая,/ просвети́ мя я́ко благоутрóбен,/ да зовý припáдая Тебé, Влады́ко Хрiстé Бóже:/ прегрешéнiй оставлéнiе дáруй,// за мнóжество ми́лости нам, Человеколю́бче.
ПЕСНЬ 4
Iрмóс: Услы́шах, Гóсподи, слух Твой и убоя́хся,/ разумéх смотрéнiе Твоé и прослáвих Тя,// еди́не Человеколю́бче. (Двáжды)
Хор: Слáва Тебé, Бóже наш, слáва Тебé.
Чтец: Умéрша мя дрéвом, пожрéн быв, Спáсе мой,/ жизнь сый, оживи́л еси́ за вели́кую ми́лость:// сегó рáди, Слóве, слáвлю Тя.
Хор: Слáва Тебé, Бóже наш, слáва Тебé.
Чтец: Ученикóм, Гóсподи, соводворя́яся преслáвно,/ сим глагóлал еси́: иди́те,// проповéдите всю́ду Моé Воскресéнiе.
Хор: Слáва Тебé, Бóже наш, слáва Тебé.
Чтец: Уверя́я, Гóсподи, востáнiе Твоé, éже из грóба,/ лю́бящим Тя Хрiстé,// во дни мнóги соводвори́лся еси́, рáдость творя́ им.
Хор: Слáва Тебé, Бóже наш, слáва Тебé.
Чтец: Воочи́л еси́ Гóсподи, слéпа из утрóбы рождéнна, рек:// иди́, умы́йся, и прозри́, Моé слáвя Божествó.
Глас 8
Хор: Святúтелю óтче Нiкóлае, молù Бóга о нас.
Чтец: Свéтом Вы́шнего озаря́емь, святи́телю,/ моé сéрдце просвети́ и тьму грехóвную отжени́,// да, рáдуяся, пою́ твоé святóе пренесéнiе.
Хор: Святúтелю óтче Нiкóлае, молù Бóга о нас.
Чтец: Возстýпль на лéствицу добродéтелей, блажéнне,/ чудотвóрец яви́лся еси́ по всей земли́, Нiкóлае,// и сегó рáди от Мир бáрстiи лю́дiе прiéмлют святы́я мóщи твоя́.
Хор: Святúтелю óтче Нiкóлае, молù Бóга о нас.
Чтец: Iерéи вéрнiи о тебé хвáлятся,/ и лю́дiе христолюби́вiи призывáют тя, во бранéх помóщника,// и мы, недостóйнiи, подвизáем тя к Бóгу за ны моли́тися, Нiкóлае.
Хор: Пресвятáя Богорóдице, спасù нас.
Богорóдичен: Чи́ны áнгельскiя удивля́ет, Богорóдице, тáйны Твоея́ глубинá,/ бéсы же смущáет Твоя́ iкóна.// Е́йже мы клáняемся, чтýще Тя, Бóжiю Мáтерь.
Глас 4
Хор: Святúтелю óтче Нiкóлае, молù Бóга о нас.
Чтец: Начáльна, Богоглáсе, Свéта Бóжiя причáстiем вторы́й яви́лся еси́,/ сiя́нiем просвещáющ мрáчный,// я́ко рачи́тель добродетéли, преизя́щен слáвою. (Двáжды)
Слáва Ѻтцý и Сы́ну и Святóму Дýху.
Чтец: Начáльна, Богоглáсе, Свéта Бóжiя причáстiем вторы́й яви́лся еси́,/ сiя́нiем просвещáющ мрáчный,// я́ко рачи́тель добродетéли, преизя́щен слáвою.
И ны́не и прúсно и во вéки векóв. Амúнь.
Богорóдичен: Естествóм несказáнно Вы́шнего Свéта,/ милосéрдiем пребогáтаго рóждшая неизречéнно,// обнищáвшiя ны, Пречи́стая, Бóжiими дáры обогати́.
Катавáсiя Пáсхи, глас 1: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Ангела,/ я́сно глагóлюща:/ днесь спасéнiе мíру,/ я́ко воскрéсе Хрiстóс,// я́ко всеси́лен.
ПЕСНЬ 5
Iрмóс: Окая́нную дýшу мою́, нощеборю́щуюся со тьмóю страстéй,/ предвари́в ущéдри, и возсiя́й мы́сленное сóлнце,/ днесвéтлыя звезды́ во мне,// во éже раздели́ти нощь от свéта. (Двáжды)
Хор: Слáва Тебé, Бóже наш, слáва Тебé.
Чтец: Вознéслся еси́ на Дрéво, Щéдре,/ и совознéсл еси́ вся человéки,/ и бори́теля змíя умертви́л еси́,// и оживи́л еси́ создáнiе рук Твои́х, я́ко еди́н Бог всех.
Хор: Слáва Тебé, Бóже наш, слáва Тебé.
Чтец: Положи́лся еси́ во грóбе вóлею, Царю́ Безсмéртне,/ и цáрствiя áдова вся истощи́л еси́,// мéртвыя Воскресéнiем Твои́м воздви́гнув.
Хор: Слáва Тебé, Бóже наш, слáва Тебé.
Чтец: Чудесá вéлiя содéловающаго, Слóве, на земли́,/ лю́дiе уби́ша Тя, беззакóннiи:/ но Сам, Гóсподи, еди́н всеси́лен сый, я́коже предрéкл еси́,// из мéртвых воскрéсл еси́, Хрiстé.
Хор: Слáва Тебé, Бóже наш, слáва Тебé.
Чтец: О́чи отвéрзл неви́девшаго свет чу́вственный,/ души́ просвети́л еси́ зéницы,/ и слáвити сотвори́л еси́ сегó, познáвша Тя, Творцá,// за благоутрóбiе яви́вшася человéка.
Глас 8
Хор: Святúтелю óтче Нiкóлае, молù Бóга о нас.
Чтец: В Ми́рех престóл имéл еси́, в Бар тéло пресели́л еси́,/ и ду́хом на Небеси́ пребывáеши, святи́телю Нiкóлае, со апóстолы, я́ко преéмник,// с ни́миже о нас моли́, пою́щих твоé пренесéнiе.
Хор: Святúтелю óтче Нiкóлае, молù Бóга о нас.
Чтец: Всех хрiстiáн надéждо, и оби́димых вéлiй застýпниче, и боля́щих цели́телю,/ печáльных утéшителю и к Бóгу от человéк ходáтаю,// отéчеству нáшему мир испроси́ и спасáй ны от погáных нахождéнiя.
Хор: Святúтелю óтче Нiкóлае, молù Бóга о нас.
Чтец: Погружéнную дýшу мою́ мнóгими страстьми́, Нiкóлае, умерщвлéнную грехопадéнiем,/ оживи́ твои́ми моли́твами и напрáви на покая́нiе,// да с вéрными всéми твоé слáвлю пренесéнiе.
Хор: Пресвятáя Богорóдице, спасù нас.
Богорóдичен: Егóже тьмы áнгельскiя и серафи́мская мнóжества ужасáются/ и разýмная тварь трепéщет,/ Тогó я́ко Младéнца, Дéво, питáеши,// Егóже обрáзно на рукý Твоéю ви́дяще, всегдá покланя́емся.
Глас 4
Хор: Святúтелю óтче Нiкóлае, молù Бóга о нас.
Чтец: Мнóгим чудотворéнiем крáсне нóзе стяжáв,/ всем благáя благовести́л еси́,/ от вражды́ вéтхiя свобóдны творя́ Божéственным учéнiем,// спаси́ ны, священноначáльниче. (Двáжды)
Слáва Ѻтцý и Сы́ну и Святóму Дýху.
Чтец: Бóга благоволéнiем на хребéт морски́й всед/ и со благоговéйными мýжи мнóгу пучи́ну прешéд,// ко грáду Бáрску пришéл еси́, блажéнне Нiкóлае.
И ны́не и прúсно и во вéки векóв. Амúнь.
Богорóдичен: Щит вéрным, Бóжiя Мáти Дéво, Тя вои́стинну слáвим, áнгельски зову́ще Ти:/ рáдуйся, Благословéнная и Благодáтная, слы́шанiе и глагóланiе стрáшно// и ди́вно покóище Влады́це твáри вся́кiя.
Катавáсiя Пáсхи, глас 1: Утренюем ýтреннюю глубокý,/ и вмéсто ми́ра песнь принесéм Влады́це,/ и Хрiстá ýзрим/ прáвды Сóлнце,// всем жизнь возсiя́юща.
ПЕСНЬ 6
Iрмóс: Я́коже прорóка от звéря избáвил еси́, Гóсподи,/ и менé из глубины́ несодержи́мых страстéй возведи́, молю́ся,// да приложý призрéти ми ко хрáму святóму Твоемý. (Двáжды)
Хор: Слáва Тебé, Бóже наш, слáва Тебé.
Чтец: Распны́йся с разбóйники, Влады́ко,/ избáвил еси́ от разбóйник лукáвых, душетлéнных страстéй, Человеколю́бче Гóсподи,// вся пою́щiя Твоé распя́тiе и востáнiе соглáсно.
Хор: Слáва Тебé, Бóже наш, слáва Тебé.
Чтец: Положи́ша без дыхáнiя Тебé мéртва, Хрiстé, во грóбе,/ всем мéртвым вдыхáюща жизнь:/ воскрéсл же еси́, Гóсподи, вся истощи́вый, Слóве, грóбы,// Божéственною Твоéю си́лою.
Хор: Слáва Тебé, Бóже наш, слáва Тебé.
Чтец: По востáнiи, Хрiстé, другóм глагóлал еси́:/ седи́те ýбо во Iерусали́ме,// дóндеже облечéтеся си́лою свы́ше непобеди́мою, и извéстною пóмощiю.
Хор: Слáва Тебé, Бóже наш, слáва Тебé.
Чтец: Брéнiе сотвóрь, óчи слепáго от рождéнiя помáзал еси́,/ и даровáл еси́ емý прозрéти,// пою́щу Твою́, Слóве, неизречéнную си́лу, éюже спасл еси́ мир.
Глас 8
Хор: Святúтелю óтче Нiкóлае, молù Бóга о нас.
Чтец: Я́ко от окри́на, от Божéственныя твоея́ цéркве нескýдно прiéмлем здрáвiе телесéм/ и душáм очищéнiе, святи́телю Нiкóлае,// чудесá бо тóчиши благодáтiю несомнéнною вéрою уповáющим на тя.
Хор: Святúтелю óтче Нiкóлае, молù Бóга о нас.
Чтец: От напáстей разли́чных, и бед лю́тых, и скорбéй, одержáщих ны,/ и от разли́чных злых, óтче, я́ко Хрiстóв угóдник преслáвный, избáви рабы́ твоя́,// достодóлжно чтýщiя твоé святóе пренесéнiе.
Хор: Святúтелю óтче Нiкóлае, молù Бóга о нас.
Чтец: Грехóвным мрáзом истéрп и житéйским вéтром поревáемь,/ я́ко другóе сóлнце, óтче, подóбiе твоегó óбраза ви́дев,// твои́ми моли́твами да согрéюся, служи́телю Хрiстóв Нiкóлае.
Хор: Пресвятáя Богорóдице, спасù нас.
Богорóдичен: Земны́х ум Небéсныя тáйны не увéсть, ни тварь Творцá рáзума домы́слится:/ прехóдит бо ум человéч от Дéвы рождествó Госпóдне.// Е́йже моля́щеся вéрою, грехóв прощéнiе прiи́мем.
Глас 4
Хор: Святúтелю óтче Нiкóлае, молù Бóга о нас.
Чтец: Лю́ди Бóжiя ко спасéнiю устрóивый во плóти Я́вльшагося мнóгiя рáди блáгости,/ проповéдниче Нiкóлае и язы́к учи́телю,// спаси́ ны наставлéнiем твои́м. (Двáжды)
Слáва Ѻтцý и Сы́ну и Святóму Дýху.
Чтец: Имéвый путь мóре и стези́ вóды,/ умоли́ у Гóспода, éже нам мóре житéйское преплы́ти без врéда// и стезéю вод слéзных дости́гнути Цáрствiе Небéсное.
И ны́не и прúсно и во вéки векóв. Амúнь.
Богорóдичен: Ты дверь Царя́ Небéс и храм слáвы Егó, Дéво Всепéтая,/ отвéрзи нам двéри милосéрдiя// и введи́ ны моли́твами Твои́ми в жили́ща Небéсныя слáвы.
Катавáсiя Пáсхи, глас 1:Снизшéл есѝ в преиспóдняя землѝ,/ и сокрушил есѝ вереѝ вéчныя,/ содержáщiя свя́занныя, Хрiстé,/ и триднéвен, яко от ки́та Ióна,// воскрéсл есѝ от грóба.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Святúтеля Нiколáя, глас 3: Взы́де, я́ко звездá, от востóка до зáпада/ твоя́ мóщи, святи́телю Нiкóлае,/ мóре же освяти́ся шéствiем твои́м,/ и град Бáрскiй прiéмлет тобóю благодáть:/ нас бо дéля яви́лся еси́ чудотвóрец изя́щный,// преди́вный и ми́лостивый.
Íкос: Воспои́м ны́не святи́теля пéсньми, Ми́рским лю́дем пáстыря и учи́теля,/ да моли́твами егó просвети́мся:/ сей бо яви́ся чист весь, нетлéнен дýхом,/ Хрiстý принося́ жéртву непорóчну, чи́сту, Бóгу благопрiя́тну,/ я́ко святи́тель, очищéн и душéю и тéлом./ Тéмже сый и́стинно Цéркви предстáтель и побóрник сея́// и чудотвóрец изя́щен, преди́вен и ми́лостив.
ПЕСНЬ 7
Iрмóс: Огня́ гаси́лище отрокóв моли́тва, орошáющая пещь,/ проповéдница чудесé, не опаля́ющи, ниже́ сожигáющи,// песнослóвцы Бóга отéц нáших. (Двáжды)
Хор: Слáва Тебé, Бóже наш, слáва Тебé.
Чтец: Воздви́жену Тебé на Дрéво, Спáсе,/ погасé сóлнце, земля́ волнýяшеся, колебáшеся тварь вся,// и от гроб мéртвiи востая́ху.
Хор: Слáва Тебé, Бóже наш, слáва Тебé.
Чтец: Востáвшу Ти из мéртвых, Царю́,/ дýши совозстáша тáмо спя́щiя,/ слáвящiя си́лу Твою́.// Éюже смéртныя ýзы разреши́шася.
Хор: Слáва Тебé, Бóже наш, слáва Тебé.
Чтец: Рáно миропомáзати Тя жéнскiй прiи́де лик,/ увéдевше же, Гóсподи, востáвша Тя,/ рáдовахуся со свящéнными ученики́:// и́миже подáждь нам очищéнiе зол.
Хор: Слáва Тебé, Бóже наш, слáва Тебé.
Чтец: Брéнiем помáзал еси́ óчи слепáго,/ и семý повелéл еси́ к Силоáму ити́,/ омы́вся же, прозрé,// песнослóвя Тя, Хрiстé, Царю́ всех.
Глас 8
Хор: Святúтелю óтче Нiкóлае, молù Бóга о нас.
Чтец: Днесь рáдуются Áнгели Бóжiи, рыдáет же дéмонское мнóжество:/ спасл бо еси́ лю́ди от напáсти и отгнáл еси́ дýхи тéмныя./ Тем достóйно одолéвый нарицáешися./ Сегó рáди вопiéм Гóсподеви:// отéц нáших Бóже, благословéн еси́.
Хор: Святúтелю óтче Нiкóлае, молù Бóга о нас.
Чтец: Одержи́мiи печáлiю нéмощи, разли́чными недýги утруждéни,/ с вéрою к рáце твоéй влекýтся/ и, получи́вше твою́ ми́лость, быстрообрáзно отхóдят, рáдостно Гóсподеви пою́ще:// отéц нáших Бóже, благословéн еси́.
Хор: Святúтелю óтче Нiкóлае, молù Бóга о нас.
Чтец: Предстоя́т ти, блажéнне, собóри правовéрных людéй,/ и хвáлятся о тебé церкóвнiи учи́тели,/ прославля́ют же тя цари́, я́ко застýпника./ Мы же ти мóлимся, спаси́ ны, Нiкóлае, пою́щiя Гóсподеви:// отéц нáших Бóже, благословéн еси́.
Хор: Пресвятáя Богорóдице, спасù нас.
Богорóдичен: О, кáко, Спáса моегó воспою́, Егóже трéпетно хвáлят Áнгели?/ Но Ты, Мáти, настáви мя и милосéрдiе Сынóвнее благоутрóбiем Твои́м понýди/ поми́ловати ны, на Тя уповáющiя,// я́ко Ты, за ны моля́щи Егó, от мýки избáвиши.
Глас 4
Хор: Святúтелю óтче Нiкóлае, молù Бóга о нас.
Чтец: Вещéй сýетством всемý умý человéческому обуя́вшу,/ я́ко сóлiю, даждь цельбý слóвом твои́м и пéти Гóсподеви научи́:// препéтый отцéв Госпóдь и Бог, благословéн еси́. (Двáжды)
Слáва Ѻтцý и Сы́ну и Святóму Дýху.
Чтец: О, преслáвная твоя́ чудесá, я́же сотвори́л еси!/ Недýги бо исцеля́еши и бед избавля́еши, всем вопи́ти повелевáя Гóсподеви:// препéтый отéц нáших Бóже, благословéн еси́.
И ны́не и прúсно и во вéки векóв. Амúнь.
Богорóдичен: Нáшему смирéнiю Застýпница и стенá, Богороди́тельнице Чи́стая, Ты еси́./ И́же раби́ Твои́ сýще, всегдá вопiéм Гóсподеви:// препéтый отéц нáших Бóже, благословéн еси́.
Катавáсiя Пáсхи, глас 1: Ѻ́троки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачи́т благолéпiе,/ Еди́н благословéн// отцéв Бог, и препрослáвлен.
ПЕСНЬ 8
Iрмóс: Áнгелов сонм, человéков собóр,/ Царя́ и Зиждителя всех,/ свящéнницы, пóйте, благослови́те, левити,// лю́дiе, превозноси́те во вся вéки. (Двáжды)
Хор: Слáва Тебé, Бóже наш, слáва Тебé.
Чтец: Áнгельстiи чи́нове на Крестé Тя ви́девше ви́сима, Хрiстé Всецарю́,/ и тварь всю изменя́юща стрáхом,// ужасóшася, пою́ще Твоé человеколю́бiе.
Хор: Слáва Тебé, Бóже наш, слáва Тебé.
Чтец: Ад дóле Тебé ви́дев, стеня́ше,/ и подавáше скóро мéртвыя,/ от вéка тáмо храни́мыя, Хрiстé,// песнослóвящiя Твоé человеколю́бiе.
Хор: Слáва Тебé, Бóже наш, слáва Тебé.
Чтец: Сотворя́я чудесá, Хрiстé, изря́дная,/ вóлею воздви́жен был еси́ на Крест,/ и с мéртвыми совокупи́лся еси́, умертви́вый áда,// и вся мýжеством отреши́л еси́ ýзники.
Хор: Слáва Тебé, Бóже наш, слáва Тебé.
Чтец: Слепáго воочи́л еси́ к Тебé приступи́вша, Хрiстé,/ семý повелéвый в Силоáмову купéль ити́,/ омы́тися и прозрéти, и Бóга Тя проповéдати,// плóтiю яви́вшагося во спасéнiе мíра.
Глас 8
Хор: Святúтелю óтче Нiкóлае, молù Бóга о нас.
Чтец: Áнгели Небéс я́ко служи́теля тя воспрiéмлют,/ прорóцы и апóстоли я́ко клеврéта сретáют,/ Сам Госпóдь тебé воспрiéмлет,// мы же, грéшнiи, ми́лости прóсим.
Хор: Святúтелю óтче Нiкóлае, молù Бóга о нас.
Чтец: Вели́ка власть от Бóга вданá ти есть, Нiкóлае:/ мóре повинýется, воздýх слýшает, и язы́цы покаря́ются,// ви́дяще преслáвная твоя́ чудесá.
Хор: Святúтелю óтче Нiкóлае, молù Бóга о нас.
Чтец: Нóвому Iзрáилю, хрiстiáнскому нарóду, Спáсе,/ славнéйши Моисéя показáл еси́ Твоегó святи́теля Нiколáя,// от всех зол нас избавля́юща.
Хор: Пресвятáя Богорóдице, спасù нас.
Богорóдичен: Очищéнiе грехóв я́ко Мáти Бóжiя испроси́/ и рýку ми простри́, Госпожé, погружéнному во глубинé нечáянiя,// да, надéждею востáв, превозношáю Тя во вéки вся.
Глас 4
Хор: Святúтелю óтче Нiкóлае, молù Бóга о нас.
Чтец: Возрáсл еси́, я́ко цвет благоухáнен, ми́рскiя земли́, слáвне,/ всем принося́ благоухáнныя вони́, целéбныя дáры хвáлящим тя и пою́щим:// Гóспода воспевáйте, делá, и превозноси́те Егó во вся вéки. (Двáжды)
Благословúм Отцá, и Сы́на, и Святáго Дýха, Гóспода.
Чтец: Искáпавый Бóжiя благодáти слáдость, я́ко горá мáсличная елéй,/ мóре имéл еси́ путь, безбéдствен благодáтiю Гóспода, Ему́же слáдце зовéм:// Гóспода воспевáйте, делá, и превозноси́те Егó во вся вéки.
И ны́не и прúсно и во вéки векóв. Амúнь.
Богорóдичен: Ликóв преми́рных со удивлéнiем раждáеши и пребывáеши при́сно Дéва:/ Слóво бо родилá еси́, Человéка бы́вша непрелóжна Божествóм,/ Ему́же вси поéм:// Гóспода воспевáйте, делá, и превозноси́те Егó во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Пáсхи, глас 1: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Я́ко сотвори́ Тебé вели́чiя Си́льный,/ Дéву явль Тя чи́сту по рождествé,/ я́ко рóждшую без сéмене Своегó Творцá,// тем Тя, Богорóдице, величáем. (Двáжды)
Хор: Слáва Тебé, Бóже наш, слáва Тебé.
Чтец: На Дрéве крéстнем пригвозди́лся еси́, Хрiстé Бóже,/ и вся победи́л еси́ врáжiя сопроти́вная начáла,/ и пéрвую кля́тву потреби́л еси́, Спáсе:// тéмже Тя по дóлгу величáем.
Хор: Слáва Тебé, Бóже наш, слáва Тебé.
Чтец: Я́ко ви́де Тя, Слóве, ад дóле с душéю, воздохнý,/ и вся мéртвыя стрáхом отреши́,/ познáвшiя держáву влáсти Твоея́:// тéмже Тя по дóлгу величáем.
Хор: Слáва Тебé, Бóже наш, слáва Тебé.
Чтец: Знáменiя сотворя́юща, и чудесá стрáшная,/ собóр еврéйскiй зря, зáвистiю уби́,/ плени́вшаго ад Воскресéнiем Свои́м,// и всех, я́ко си́лен, возставля́ющаго.
Хор: Слáва Тебé, Бóже наш, слáва Тебé.
Чтец: Востáл еси́, я́коже рекл еси́, Животодáвче, из мéртвых,/ и яви́лся еси́ святы́м ученикóм по востáнiи,/ знáменiя сотвори́вый, и воочи́вый слепы́я:// с ни́миже Тя во вéки величáем.
Глас 8
Хор: Святúтелю óтче Нiкóлае, молù Бóга о нас.
Чтец: Благословéн Госпóдь Бог наш, я́ко прослáви святи́теля во странáх,/ чудéс струи́ испущáюща, в Ми́рех и в лати́нех вся исцеля́юща// и в Россíи ми́лостивно посещáюща.
Хор: Святúтелю óтче Нiкóлае, молù Бóга о нас.
Чтец: Честны́м сном уснýл еси́ и тéло в Бар пóльзы рáди пусти́л еси́,/ неусы́пный быв застýпник всем, вéрою призывáющим тя,// моли́твами твои́ми, Нiкóлае.
Хор: Святúтелю óтче Нiкóлае, молù Бóга о нас.
Чтец: Благословéн Небесé и земли́ Творéц,/ Бог Вседержи́тель, Отéц Безначáльный и Всеси́льный,/ и Сын прéжде век, от недр отрыгновéнное Слóво,/ И́мже вся бы́ша, я́же о нас,// и Дух исходя́й Святы́й, Трóице Святáя, слáва Тебé.
Хор: Пресвятáя Богорóдице, спасù нас.
Богорóдичен: Изви́тiем словéс по достоя́нiю Тя похвали́ти не достизáю,/ Небéсных сил пребóльшу и твáри всея́ Честнéйшу, Бóга и Творцá порóждшую плóтiю.// Егóже моли́, Богорóдице, да поми́лует ны в День сýдный.
Продолженiе здесь