Неделя четвертая Великаго поста, прп. Иоанна лествичника, глас 8 УТРЕНЯ (окончание) ЧАС ПЕРВЫЙ
26 мáрта 2023 гóда. Недéля четвéртая Велúкaго постá. Преподóбнаго Iоáнна Лéствичника. Глас 8. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
ПЕСНЬ 8
Iрмóс: Седмери́цею пещь/ халдéйскiй мучи́тель Богочести́вым неи́стовно разжжé,/ си́лою же лýчшею спасéны сiя́ ви́дев,/ Творцý и Избáвителю вопiя́ше:/ óтроцы, благослови́те,/ свящéнницы, воспóйте,// лю́дiе, превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iисýсова Божествá Пребожéственная си́ла,/ в нас боголéпно возсiя́ла есть:/ плóтiю бо вкуш за всех смерть крéстную,/ разруши́ áдову крéпость./ Егóже непрестáнно дéти благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Распны́йся востá, великовы́йный падé,/ пады́й и сокрушéнный испрáвися,/ тля отвéржена бысть, и нетлéнiе процветé:// Жи́знiю бо мéртвенное пожéрто бысть. Дéти благослови́те, свящéнницы воспóйте, лю́дiе превозноси́те во вся вéки.
Хор: Пресвятáя Богорóдице, спасù нас.
Трóичен: Трисвéтлое Божествó,/ Еди́ну сiя́ющее зарю́ от Еди́наго Трiипостáснаго Естествá, Роди́теля Безначáльна:/ Единоестéственно же Слóво Отцý, и Сцáрствующаго Единосýщнаго Дýха,/ дéти благослови́те, свящéнницы воспóйте,// лю́дiе превозноси́те во вся вéки.
Глас 8
Хор: Пресвятáя Богорóдице, спасù нас.
Чтец: Сопроти́вных разжжéнныя и пламенови́дныя на нас угаси́ стрéлы:// я́ко да поéм Тя во вся вéки.
Хор: Пресвятáя Богорóдице, спасù нас.
Чтец: Преестéственне Содéтеля и Спáса,/ Бóга Слóва родилá еси́, Дéво:// тéмже Тя поéм, и превознóсим во вся вéки.
Глас 5
Хор: Помúлуй мя, Бóже, помúлуй мя.
Чтец: От разбóйник пóмыслов мои́х Спáсе,/ растли́х житié моé согрешéнiй я́звами./ Тéмже Божéственнаго обнажи́хся óбраза,// Тебé человеколюби́ваго Бóга, но ущéдри мя.
Хор: Помúлуй мя, Бóже, помúлуй мя.
Чтец: Пришéл еси́ на зéмлю от вы́шних Спáсе,/ ущéдрив биéньми урáненнаго мя всегó прегрешéний я́звами Щéдре,// и излия́л еси́ на мя Христé, ми́лость Твою́.
Хор: Помúлуй мя, Бóже, помúлуй мя.
Чтец: Тéло и дýшу Ты Влады́ко Спáсе,/ избáву дал еси́ за мя, и спасл мя еси́,/ мечéм грехóв уязвлéнаго,// в неисцéльных я́звах, я́ко ми́лостивый.
Хор: Пресвятáя Богорóдице, спасú нас.
Богорóдичен: Тя пáче умá Богомýжным слóвом/ рóждшую Гóспода и дéвствующую,/ вся делá Дéво благослови́м// и превознóсим во вся вéки.
Глас 8
Хор: Преподóбне óтче Iоáнне, молù Бóга о нас.
Чтец: Столп тя одушевлéнный я́ко вои́стинну,/ и óбраз воздержáнiя óтче стяжáвше,// вси твою́ пáмять почитáем Iоáнне.
Хор: Преподóбне óтче Iоáнне, молù Бóга о нас.
Чтец: Мнóжество рáдуется монáхов,/ и ликýет преподóбных собóр и прáведных:// венéц бо достóйно с ни́ми прiя́л еси́.
Благословúм Отцá, и Сы́на, и Святáго Дýха, Гóспода.
Тропáрь: Укрáшен добродéтельми,/ в невéстник неизречéнныя слáвы сошéл еси́,// песнь воспевáя Хрiстý во вéки.
И ны́не и прúсно и во вéки векóв, амúнь.
Богорóдичен: Пóмощи я́же от Тебé трéбующiя не прéзри Дéво,// пою́щiя и превознося́щiя Тя во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Ужасéся о сем Нéбо,/ и земли́ удиви́шася концы́,/ я́ко Бог яви́ся человéком плóтски,/ и чрéво Твоé бысть прострáннейшее Небéс./ Тем Тя, Богорóдицу,// Áнгелов и человéк чиноначáлiя величáют.
Хор: Слáва, Гóсподи, Святóму Воскресéнiю Твоемý.
Чтец: Божéственным и Безначáльным Естествóм прост сый,/ сложи́лся еси́ прiя́тiем плóти, в Тебé Самóм Сiю́ состáвив, Слóве Бóжiй,/ и пострадáв я́ко человéк, пребы́л еси́ кромé страстéй, я́ко Бог.// Тéмже Тя во Двою́ Существý нераздéльно и неслiя́нно величáем.
Хор: Слáва, Гóсподи, Святóму Воскресéнiю Твоемý.
Чтец: Отцá по Существý Божéственному,/ я́коже естествóм быв человéк,/ рекл еси́ Бóга Вы́шнiй, рабóм снизходя́,/ воскрéс от грóба, благодáтiю Отцá/ земнорóдным полóж, и҆́же по естествý Бóга же и Влады́ку,// с Ни́мже Тя вси величáем.
Хор: Пресвятáя Богорóдице, спасù нас.
Богорóдичен: Яви́лася еси́, о Дéво Мáти Бóжiя,/ пáче естествá рóждши плóтiю Бóга Слóва,/ Егóже Отéц отры́гну от сéрдца Своегó прéжде всех век, я́ко Благ,// Егóже ны́не и телéс превы́шша разумéем, áще и в тéло облечéся.
Глас 8
Хор: Пресвятáя Богорóдице, спасù нас.
Чтец: Рáдости и весéлiя испóлнь есть пáмять Твоя́,/ приступáющим исцелéнiя точáщи,// и благочéстно Богорóдицу Тя возвещáющим.
Хор: Пресвятáя Богорóдице, спасù нас.
Чтец: Псалмы́ Тя воспевáем Благодáтная,/ и немóлчно, éже рáдуйся, принóсим:// Ты бо источи́ла еси́ всем рáдость.
Глас 5
Хор: Помúлуй мя, Бóже, помúлуй мя.
Чтец: Зáповеди Твоя́ Влады́ко,/ не сохрани́в рáзумом мои́м,/ в стрáсти вшед сластéй,/ обнажи́хся благодáти,/ и я́звами извéржен наг.// Тéмже молю́ Тя, Спáсе, спаси́ мя.
Хор: Помúлуй мя, Бóже, помúлуй мя.
Чтец: Нижé леви́т возмóже отмы́ти стрýпы моя́:/ но пришéл еси́ ко мне Блáже сострадáтельно,/ и излия́л еси́ ми́лость Твои́х щедрóт Спáсе на мя,// я́ко всеизря́дный врач исцеля́я мя.
Хор: Помúлуй мя, Бóже, помúлуй мя.
Чтец: Я́ко сый благоутрóбен, ущéдрив спасл еси́ Христé,/ я́звами лю́те от разбóйник Спáсе убиéна мя:/ дýшу же и тéло Свое́,// я́ко динаря́ два дал еси́ избавлéние.
Хор: Пресвятáя Богорóдице, спасú нас.
Богорóдичен: Пáче умá рождествó Твоé Богомáти,/ без мýжа бо зачáтие в Тебé,/ и дéвственно рождéние бысть:/ и́бо Бог есть рождéйся,// Егóже величáюще, Тя Дéво ублажáем.
Глас 8
Хор: Преподóбне óтче Иоáнне, молú Бóга о нас.
Чтец: Врач боля́щих в прегрешéниих, от Бóга блажéнне,/ губи́тель же яви́лся еси́ и прогони́тель лукáвых духóв:// тéмже тя ублажáем.
Хор: Преподóбне óтче Иоáнне, молú Бóга о нас.
Чтец: Зéмлю, я́коже тли жили́ще, остáвил еси́ óтче,/ и в земли́ всели́лся еси́ крóтких, и с ни́ми весели́шися,// Божéственныя наслаждáяся слáдости.
Слáва Отцý и Сыну и Святóму Дýху.
Тропáрь: Днесь день прáзднственный,/ вся бо созывáет монáшествующих стадá, в лик духóвный,// на трапéзу и снедь нетлéнныя жи́зни.
И ныне и прúсно и во вéки векóв, амúнь.
Богорóдичен: В Тебé всели́вся Всенепорóчная,/ прéжде родоначáльники злонрáвно прельсти́вшаго человекоуби́йцу Низложи́вый,// роди́ся, и вся ны спасé.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный oсьмы́й: Два Áнгела ви́девши внутрь грóба, Марíя удивля́шеся,/ и Хрiстá не знáющи, я́ко вертогрáдаря вопрошáше:/ гóсподи, где положи́л еси́ тéло Iисýса моегó?/ Звáнiем же Тогó познáвши бы́ти Самогó Спáса,/ слы́ша: не прикасáйся Мне, ко Отцý отхождý,// рцы брáтiи Моéй.
Слáва Ѻтцý и Сы́ну и Святóму Дýху.
Светúлен Трióди (прп. Iоáнна): Ми́ра благострáстiя, я́коже врéднаго уклони́лся еси́,/ и безбрáшiем плоть увяди́в,/ обнови́л еси́ души́ крéпость преподóбне,/ и слáвою обогати́лся еси́ небéсною преслáвне.// Тéмже не престáй моля́ся о нас Iоáнне.
И ны́не и прúсно и во вéки векóв. Амúнь.
Богорóдичен Трióди: Госпóдственно Богорóдицу Тя исповéдуем Влады́чице, Тобóю спасéни:/ и́бо Бóга родилá еси́ неизречéнно, разóршаго Крестóм смерть,/ к Себé же привлéкшаго преподóбных собóры:// с ни́миже Тя восхваля́ем Дéво.
ХВАЛИТНЫ
Хор, глас 8: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 8: Гóсподи, áще и суди́лищу предстáл еси́ от Пiлáта суди́мый,/ но не отступи́л еси́ от престóла со Отцéм седя́:/ и воскрéс из мéртвых,/ мiр свободи́л еси́ от рабóты чуждáго,// я́ко Щедр и Человеколю́бец.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, орýжiе на дiáвола/ Крест Твой дал еси́ нам:/ трепéщет бо и трясéтся, не терпя́ взирáти на си́лу Егó:/ я́ко мéртвыя возставля́ет, и смерть упраздни́./ Сегó рáди покланя́емся// погребéнiю Твоемý и востáнiю.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, áще и я́ко мéртва/ во грóбе iудéи положи́ша,/ но я́ко Царя́ спя́ща вóини Тя стрежáху,/ и я́ко животá сокрóвище, печáтiю печáташа,/ но воскрéсл еси́,// и пóдал еси́ нетлéнiе душáм нáшым.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Áнгел Твой, Гóсподи,/ Воскресéнiе проповéдавый,/ стрáжи ýбо устраши́,/ женáм же возгласи́, глагóля:/ что и́щете Живáго с мéртвыми;/ воскрéсе Бог сый,// и вселéнней жизнь даровá.
На 4. Хвалúте Егó в тимпáне и лúце, хвалúте Егó во стрýнах и оргáне.
И҆́ны стiхúры анатóлiевы: Пострадáл еси́ Крестóм, Безстрáстный Божествóм,/ погребéнiе прiя́л еси́ триднéвное,/ да нас свободи́ши от рабóты врáжiя,/ и обезсмéртив оживотвори́ши нас Хрїстé Бóже,// воскресéнiем Твои́м, Человеколю́бче.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Покланя́юся, и слáвлю, и воспевáю, Хрїстé/ Твоé из грóба Воскресéнiе,/ и́мже свободи́л еси́ нас от áдовых нереши́мых уз:/ и даровáл еси́ мíрови, я́ко Бог, жизнь вéчную,// и вéлiю ми́лость.
На 2. Воскреснú Гóсподи Бóже мой, да вознесéтся рукá Твоя́,/ не забýди убóгих Твоúх до концá.
Стiхира: Жизнопрiéмнаго Твоегó грóба стрегýще законопрестýпнiи,/ с кустодíею запечáташа тогдá:/ Ты же, я́ко Безсмéртен Бог и Всеси́лен,// воскрéсл еси́ триднéвен.
Исповéмся Тебé Гóсподи, всем сéрдцем моúм,/ повéм вся чудесá Твоя́.
Стiхúра: Дошéдшу Ти во вратá áдова, Гóсподи,/ и сiя́ сокруши́вшу,/ плéнник си́це вопiя́ше:/ кто Сей есть, я́ко не осуждáется в преиспóдних земли́,/ но и я́ко сень разруши́ смéртное узи́лище?/ Прiя́х Того я́ко мéртва, и трепéщу, я́ко Бóга.// Всеси́льне поми́луй нас.
Воскреснú Гóсподи Бóже мой, да вознесéтся рукá Твоя́,/ не забýди убóгих Твоúх до концá.(Пс.9:33)
Стiхúра, самоглáсен дне Трióди, глас 1: Прiиди́те дéлаим в тáйном виногрáде,/ плоды́ покая́ния в нем творя́ще,/ не в брáшнех и питии́х труждáющеся,/ но в моли́твах и постéх добродéтели исправля́юще:/ си́ми угождáемый Госпóдь/ дéла, динáрь подаéт,/ и́мже дýши избавля́ет дóлга грехóвнаго,// еди́н Многоми́лостивый.
Слáва Отцý и Сыну и Святóму Дýху.
Прiиди́те дéлаим в тáйном виногрáде,/ плоды́ покая́ния в нем творя́ще,/ не в брáшнех и питии́х труждáющеся,/ но в моли́твах и постéх добродéтели исправля́юще:/ си́ми угождáемый Госпóдь/ дéла, динáрь подаéт,/ и́мже дýши избавля́ет дóлга грехóвнаго,// еди́н Многоми́лостивый.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси́ áда,/ разруши́л еси́ осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твои́м,/ послáл еси́ я на прóповедь,/ и тéми мир Твой пóдал еси́ вселéнней,// Еди́не Многоми́лостиве.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрiстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбнаго Iоáнна Лéствичника, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская осьмáя, глас 8: Марíины слéзы не всýе проливáются тéпле,/ се бо сподóбися и учáщих Áнгелов,/ и видéнiя Самогó Iисýса./ Но ещé земнáя мýдрствует, я́ко женá немощнáя:/ тéмже и отсылáется не прикасáтися Хрїстý./ Но обáче проповéдница посылáется Твои́м ученикóм,/ и҆́мже благовествовáнiе нося́щи,/ éже ко Отéческому жрéбiю восхóд возвещáющи.// С нéюже сподóби и нас явлéнiя Твоегó, Влады́ко Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 8: С высоты́ снизшéл еси́, Благоутрóбне, погребéнiе прiя́л еси триднéвное, да нас свободи́ши страстéй, Животé и Воскресéнiе нáше, Гóсподи, слáва Тебé!
Слáва Отцý и Сы́ну и Святóму Дýху.
Тропáрь Трióди (прп. Iоáнна), глас 1: Пусты́нный жи́тель и в телеси́ áнгел,/ и чудотвóрец яви́лся еси́ Богонóсе óтче наш Iоáнне:/ постóм, бдéнiем, моли́твою небéсная даровáнiя прiи́м,/ исцеля́еши недýжныя, и дýши вéрою притекáющих ти./ Слáва Дáвшему ти крéпость:/ слáва Венчáвшему тя:// слáва Дéйствующему тобóю всем исцелéнiя.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк Трióди (прп. Iоáнна), глaс 4: На высотé Госпóдь воздержáнiя и́стинна тя положи́,/ я́коже звездý нелéстную, световодя́щую концы́,// настáвниче Iоáнне óтче наш.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбнаго Iоáнна Лéствичника, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу