Неделя третья Великаго поста Крестопоклонная. Глас 7. ОБЕДНИЦА (Изобразительные)
19 мáрта 2023 гóда. Недéля трéтiя Велúкaго постá. Крестопоклóнная. Глас 7. Воскрéсная прáздничная слýжба для домáшнего (келéйнаго) совершéнiя. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душé моя́, Гóспода,/ благословéн есѝ Гóсподи.
Псалом 102
Благословѝ, душé моя́, Гóспода,/ и вся внýтренняя моя и҆́мя святóе Егó./ Благословѝ, душé моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоé:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижé во век враждýет,/ не по беззакóнїем нáшим сотвори́л есть нам,/ нижé по грехóм нáшым воздáл есть нам./ Я́ко по высотé небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благослови́, душé моя, Гóспода,/ и вся внýтренняя моя и҆́мя святóе Егó./ Благословéн еси, Гóсподи.
Слáва Ѻтцý и Сы́ну и Святóму Дýху.
Псалом 145
Хвали́, душé моя, Гóспода./ Восхвалю́ Гóспода в животé моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстé Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянú нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Чтец (стiхúры воскрéсные, глас 7): Красéн бе и добр в снедь, и҆́же менé умертви́вый плод:/ Хрїстóс есть Дрéво живóтное,/ от Негóже яды́й не умирáю,/ но вопiю́ с разбóйником:// помяни́ мя Гóсподи, во Цáрствiи Твоéм.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: На Крест вознéсся Щéдре,/ Адáмово рукописáнiе дрéвняго грехá заглáдил еси́,/ и спасл еси́ от прéлести весь род человéческiй.// Тéмже воспевáем Тя, благодéтелю Гóсподи.
На 8. Хор: Блажéни мúлостивiи,/ я́ко тíи помúловани бýдут.
Чтец: Пригвозди́л еси́ на Крестé Щéдре, грехи́ нáша Хрїстé,/ и Твоéю смéртiю смерть умертви́л еси́/ воздви́гнувый умéршiя из мéртвых:// тéмже покланя́емся Твоемý святóму воскресéнiю.
Хор: Блажéни чúстiи сéрдцем,/ я́ко тíи Бóга ýзрят.
Чтец: Излiя́ яд змiй в слýхи Éвины иногдá:/ Хрїстóс же на Дрéве крéстнем источи́л есть ми́рови жи́зни слáдость./ Тéмже взывáем:// помяни́ нас Гóсподи, во Цáрствiи Твоéм.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Во грóбе я́ко смéртен положéн был еси́, Животé всех Хрїстé:/ и вереи́ áдовы сломи́л еси́:/ и воскрéс во слáве триднéвен я́ко си́лен, всех просвети́л еси́:// слáва Твоемý востáнiю.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Госпóдь воскрéс триднéвен из мéртвых,/ даровá мир Свой ученикóм,/ и сих благослови́в послá, рек:// вся приведи́те во Цáрствiе Моé.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец (стiхúры Трióди (Крестá), глас 1): Воскрéсл еси́ смерть упраздни́в Хрiстé,/ я́коже вели́кiй Царь,/ от áдовых сокрóвищ воззвáл еси́ нас// в наслаждéнiе Цáрства Небéснаго, в зéмлю безсмéртiя.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Плéщуще пéсньми Божéственными вéрнiи, воскли́кнем Бóгу,/ Крест Госпóдень целýюще:// освящéнiя бо источáет истóчник, всем сýщим в мíре.
Хор: Слáва Ѻтцý и Сы́ну и Святóму Дýху.
Чтец (Трóичен): Еди́ницу в трех начертáнiих пою́, и Трóицу во еди́ном естествé покланя́емую, Бóга трóе кýпно, Свет трисóлнечный, Отцá, и Сы́на, и Святáго Дýха.
Хор: И ны́не и прúсно и во вéки векóв. Амúнь.
Богорóдичен: Чудéс вели́кое чýдо в Тебé яви́ся несквéрная Áгнице,/ взéмлющаго бо мíра грех, Áгнца родилá еси́:// Егóже моли́ прилéжно о пою́щих Тя.
Тропари и кондаки
Тропáрь воскрéсный, глас 7: Разруши́л еси́ Крестóм Твои́м смерть,/ отвéрзл еси́ разбóйнику рай;/ мvронóсицам плач преложи́л еси́/ и Апóстолом проповéдати повелéл еси́/, я́ко воскрéсл еси́, Хрїстé Бóже,/ дáруяй мíрови// вéлiю ми́лость.
Тропáрь Трióди (Крестá), глас 1: Спаси́, Гóсподи, лю́ди Твоя́/ и благослови́ достоя́нiе Твоé,/ побéды правослáвным хрїстiáнам на сопроти́вныя дáруя// и Твоé сохраня́я Крестóм Твои́м жи́тельство.
[Тропарь Креста ц.ч.]Спаси́, Гóсподи, лю́ди Твоя́/ и благослови́ достоя́нiе Твоé,/ побéды грядýщему рýсскому Царю́ и правослáвным хрїстiáнам на сопроти́вныя дáруя// и Твоé сохраня́я Крестóм Твои́м жи́тельство.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Кондáк Трióди (Крестá, самоглáсен), глас 7: Не ктомý плáменное орýжiе/ храни́т врат Едéмских:/ на ты́я бо нáйде преслáвный соýз Дрéво крéстное,/ смéртное жáло, и áдова побéда прогнáся./ Предстáл бо еси́ Спáсе мой,/ вопiя́ сýщим во áде:// вни́дите пáки в рай.
Вместо Трисвятого
Хор: Крестý Твоемý покланя́емся Влады́ко,/ и святóе Воскресéнiе Твоé слáвим. (Трúжды)
Хор: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Хор: И святóе Воскресéнiе Твоé слáвим.
Хор: Крестý Твоемý покланя́емся Влады́ко,/ и святóе Воскресéнiе Твоé слáвим.
Прокимен Недели Крестопоклонной, глас 6
Чтец: Прокíмен, глас шесты́й, псалóм Давíдов: Спаси́, Гóсподи, лю́ди Твоя́ и благослови́ достоя́нiе Твоé. (Пс.27:9А)
Хор: Спасú, Гóсподи, лю́ди Твоя́/ и благословú достоя́нiе Твоé.
Чтец: К Тебé, Гóсподи, воззовý, Бóже мой, да не премолчи́ши от менé.(Пс.27:1А)
Хор: Спасú, Гóсподи, лю́ди Твоя́/ и благословú достоя́нiе Твоé.
Чтец: Спаси́, Гóсподи, лю́ди Твоя́.
Хор: И благословú достоя́нiе Твоé.
Апостол
Чтец: Ко Еврéем послáнiя святáго апóстола Пáвла чтéнiе.
(Евр.зач.311А): Брáтiе, имýще ýбо Архiерéа вели́ка, прошéдшаго небесá, Iисýса Сы́на Бóжiя, да держи́мся исповéданiя. Не и́мамы бо архиерéа не могýща спострадáти нéмощем нáшим, но искушéна по вся́ческим по подóбiю, рáзве грехá. Да приступáем ýбо с дерзновéнiем к престóлу благодáти, я́ко да прiи́мем ми́лость и благодáть обря́щем во благоврéменну пóмощь. Всяк бо первосвящéнник, от человéк приéмлемь, за человéки поставля́ется на слýжбы я́же к Бóгу, да принóсит дáры же и жéртвы о гресéх. Спострадáти моги́й невéжствующим и заблуждáющим: понéже и той нéмощию обложéн eсть. И сегó рáди дóлжен eсть я́коже о лю́дех, тáкоже и о себé приноси́ти за грехи́. И никтóже сам о себé приéмлет честь, но звáнный от Бóга, я́коже и Аарóн. Тáко и Хрiстóс не Себе прослáви бы́ти первосвящéнника, но Глагóлавый к Немý: Сын Мой eси́ Ты, Аз днесь роди́х Тя. Якоже и и́нде глагóлет: Ты eси́ свящéнник во век по чи́ну Мелхиседéкову.
[Русский синодальный перевод]Братия, имея Первосвященника великого, прошедшего небеса, Иисуса Сына Божия, будем твердо держаться исповедания нашего. Ибо мы имеем не такого первосвященника, который не может сострадать нам в немощах наших, но Который, подобно нам, искушен во всем, кроме греха. Посему да приступаем с дерзновением к престолу благодати, чтобы получить милость и обрести благодать для благовременной помощи. Ибо всякий первосвященник, из людей избираемый, для людей поставляется на служение Богу, чтобы приносить дары и жертвы за грехи, могущий снисходить незнающим и заблудшим, потому что и сам обложен немощью, и посему он должен как за народ, так и за себя приносить жертвы о грехах. И никто сам собою не приемлет этой чести, но призываемый Богом, как и Аарон. Так и Христос не Сам Себе присвоил славу быть первосвященником, но Тот, Кто сказал Ему: Ты Сын Мой, Я ныне родил Тебя; как и в другом месте говорит: Ты священник вовек по чину Мелхиседека. (Евр.4:14-5:6)
Аллилуиарий Недели Крестопоклонной, глас 1
Чтец: Аллилýїа, аллилýїа, аллилýїа, глас глас пéрвый.
Хор: Аллилýїа, аллилýїа, аллилýїа.
Чтец: Помяни́ сонм Твой, егóже стяжáл еси́ испéрва. (Пс.73:2А)
Хор: Аллилýїа, аллилýїа, аллилýїа.
Чтец: Бог же Царь наш прéжде вéка, содéла спасéнiе посредé земли́. (Пс.73:12)
Хор: Аллилýїа, аллилýїа, аллилýїа.
ЕВАНГЕЛИЕ
От Мáрка Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мк.зач.37): Речé Госпóдь: и҆́же хóщет по Мне ити́, да отвéржется себé, и вóзмет крест свой, и по Мне грядéт. И҆́же бо áще хóщет дýшу свою́ спасти́, погуби́т ю, а и҆́же погуби́т дýшу свою́ Менé рáди и Евáнгелiя, той спасéт ю. Кáя бо пóльза человéку, áще прiобря́щет мiр весь, и отщети́т дýшу свою́? Или́ что даст человéк измéну на души́ своéй? И҆́же бо áще постыди́тся Менé и Мои́х словéс в рóде сем прелюбодéйнем и грéшнем, и Сын Человéческiй постыди́тся eгó, eгдá прiи́дет во слáве Oтцá Своегó со áнгелы святы́ми. И глагóлаше им: ами́нь глагóлю вам, я́ко суть нéцыи от зде стоя́щих, и҆́же не и҆́мут вкуси́ти смéрти, дóндеже ви́дят Цáрствiе Бóжiе пришéдшее в си́ле.
[Русский синодальный перевод]Сказал Господь: кто хочет идти за Мною, отвергнись себя, и возьми крест свой, и следуй за Мною. Ибо кто хочет душу свою сберечь, тот потеряет ее, а кто потеряет душу свою ради Меня и Евангелия, тот сбережет ее. Ибо какая польза человеку, если он приобретет весь мир, а душе своей повредит? Или какой выкуп даст человек за душу свою? Ибо кто постыдится Меня и Моих слов в роде сем прелюбодейном и грешном, того постыдится и Сын Человеческий, когда приидет в славе Отца Своего со святыми Ангелами. И сказал им: истинно говорю вам: есть некоторые из стоящих здесь, которые не вкусят смерти, как уже увидят Царствие Божие, пришедшее в силе. (8:34-9:1)
Хор: Слáва Тебé, Гóсподи, слáва Тебé.
Помяни́ нас, Гóсподи, егдá прїи́деши во Цáрствiи Твоéм.
Помяни́ нас, Влады́ко, егдá прїи́деши во Цáрствiи Твоéм.
Помяни́ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умé и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжiй, поми́луй нас. Ами́нь.
КОНДАК
Кондáк Трióди (самоглáсен), глас 7: Не ктомý плáменное орýжiе/ храни́т врат Едéмских:/ на ты́я бо нáйде преслáвный соýз Дрéво крéстное,/ смéртное жáло, и áдова побéда прогнáся./ Предстáл бо еси́ Спáсе мой,/ вопiя́ сýщим во áде:// вни́дите пáки в рай.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволи́ же и о мне грéшнем, утвердѝ, вразумѝ сéрдце моé, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 раза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Вместо Достойно есть (задостойник)
Хор: О Тебé рáдуется, Благодáтная вся́кая тварь,/ Áнгельскiй собóр и человéческiй род,/ освящéнный хрáме и раю́ словéсный,/ дéвственная похвалó,/ из Нея́же Бог воплоти́ся,/ и Младéнец бысть, прéжде век Сый Бог наш:/ ложеснá бо Твоя престóл сотвори́/ и чрéво Твоé прострáннее Небéс содéла.// О Тебé рáдуется, Благодáтная, вся́кая тварь, слáва Тебé.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, си́лою Честнáго и Животворя́щаго Крестá, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.