Неделя четвертая Великаго поста, прп. Иоанна лествичника, глас 8 ВСЕНОЩНОЕ БДЕНИЕ. УТРЕНЯ. КАНОН
26 мáрта 2023 гóда. Недéля четвéртая Велúкaго постá. Прп. Iоáнна Лéствичника. Глас 8. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
[НЕПОРОЧНЫ]Избрáннiи стiхи из псалмá 118: (глас 5 всегдá): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 8: Мvронóсицы Жизнодáвца предстоя́ща грóбу,/ Влады́ку искáху в мéртвых, Безсмéртнаго,/ и рáдость благовéщенiя от Áнгела прiéмша, апóстолом возвещáху:/ я́ко воскрéсе Хрiстóс Бог,// подая́й мíрови вéлiю ми́лость.
СТЕПЕННА, ГЛАС 8
1 АНТИФОН
Хор: От ю́ности моея́ враг мя искушáет, сластьмù палúт мя:// аз же надéяся на Тя, Гóсподи, побеждáю сегó. (Двáжды)
Ненави́дящiи Сióна,/ да бýдут ýбо прéжде исторжéнiя я́ко травá:// ссéчет бо Хрiстóс вы́я их, усечéнiем мук. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
И ны́не и прúсно и во вéки векóв. Амúнь.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
2 АНТИФОН
Сéрдце моé стрáхом Твоúм да покры́ется смиренномýдрствующее:// да не вознéсшееся отпадéт от Тебé, Всещéдре. (Двáжды)
На Гóспода имéвый надéжду, не устраши́тся тогдá,// егдá огнéм вся суди́ти и҆́мать, и мýкою. (Двáжды)
Слáва Ѻтцý и Сы́ну и Святóму Дýху.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
И ны́не и прúсно и во вéки векóв. Амúнь.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
3 АНТИФОН
Воззвáх Тебé, Гóсподи, вонмù,/ приклонù ми ýхо Твоé вопiю́щу, и очúсти,// прéжде дáже не вóзмеши менé отсю́ду. (Двáжды)
В мáтери своéй земли́ отходя́й всяк, пáки разрешáется,// прiя́ти мýки, или́ пóчести пожи́вших. (Двáжды)
Слáва Ѻтцý и Сы́ну и Святóму Дýху.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцá спросiя́вшiй.
И ны́не и прúсно и во вéки векóв. Амúнь.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцá спросiя́вшiй.
4 АНТИФОН
Се ны́не что добрó, илù что краснó; но éже жúти брáтiи вкýпе:// в сем бо Госпóдь обещá живóт вéчный. (Двáжды)
О ри́зе своéй, И҆́же кри́ны сéльныя украшáяй,// повелевáет, я́ко не подобáет пещи́ся. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
И ны́не и прúсно и во вéки векóв. Амúнь.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
ПРОКИМЕН
Чтец: Прокíмен, глас осьмы́й, псалóм Давíдов. Воцари́тся Госпóдь во век, Бог твой, Сióне, в род и род. (Пс.145:10)
Хор: Воцарúтся Госпóдь во век,/ Бог твой, Сióне, в род и род.
Чтец: Хвали́, душé моя, Гóспода, восхвалю́ Гóспода в животé моéм. (Пс.145:1-2А)
Хор: Воцарúтся Госпóдь во век,/ Бог твой, Сióне, в род и род.
Чтец: Воцари́тся Госпóдь во век.
Хор: Бог твой, Сióне, в род и род.
Чтец: Гóсподу помóлимся.
Хор: Гóсподи, поми́луй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.64): Во врéмя óно, Марíя стоя́ше у грóба вне плáчущи. Я́коже плáкашеся, прини́че во гроб и ви́де два Áнгела в бéлых ри́зах седя́ща, еди́наго у главы́ и еди́наго у ногý, идéже бе лежáло тéло Iисýсово. И глагóласта ей óна: жéно, что плáчешися? Глагóла и҆́ма: я́ко взя́ша Гóспода моегó, и не вем, где положи́ша Егó. И сiя́ рéкши обрати́ся вспять и ви́де Iисýса стоя́ща, и не вéдяше, я́ко Iисýс есть. Глагóла ей Iисýс: жéно, что плáчеши, когó и҆́щеши? Онá же мня́щи, я́ко вертогрáдарь есть, глагóла Емý: гóсподи, áще ты еси́ взял Егó, повéждь ми, где еси́ положи́л Егó, и аз возмý Егó. Глагóла ей Iисýс: Марíе. Онá же обрáщшися глагóла Емý: Раввуни́, éже глагóлется, Учи́телю. Глагóла ей Iисýс: не прикасáйся Мне, не у бо взыдóх ко Отцý Моемý: иди́ же ко брáтiи Моéй и рцы им: восхождý ко Отцý Моемý и Отцý вáшему, и Бóгу Моемý и Бóгу вáшему. Прiи́де же Марíя Магдали́на повéдающи ученикóм, я́ко ви́де Гóспода, и сiя́ речé ей.
[Русский синодальный перевод]В те дни, Мария стояла у гроба и плакала. И, когда плакала, наклонилась во гроб, и видит двух Ангелов, в белом одеянии сидящих, одного у главы и другого у ног, где лежало тело Иисуса. И они говорят ей: жена! Что ты плачешь? Говорит им: унесли Господа моего, и не знаю, где положили Его. Сказав сие, обратилась назад и увидела Иисуса стоящего; но не узнала, что это Иисус. Иисус говорит ей: жена! что ты плачешь? кого ищешь? Она, думая, что это садовник, говорит Ему: господин! если ты вынес Его, скажи мне, где ты положил Его, и я возьму Его. Иисус говорит ей: Мария! Она, обратившись, говорит Ему: Раввунù! - что значит: Учитель! Иисус говорит ей: не прикасайся ко Мне, ибо Я еще не восшел к Отцу Моему; а иди к братьям Моим и скажи им: восхожу к Отцу Моему и Отцу вашему, и к Богу Моему и Богу вашему. Мария Магдалина идет и возвещает ученикам, что видела Господа и что Он это сказал ей. (Ин.20:11-18)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И҆ ны́не и прúсно и во вéки векóв. Амúнь.
Богорóдичен (Трióди): На спасéнiя стези́ настáви мя Богорóдице,/ стýдными бо окаля́х дýшу грехми́,/ и в лéности все житié моé ижди́х:/ но Твои́ми моли́твами/ избáви мя от вся́кiя нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегó,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 8
(совмещéнный с канóном Богорóдицы, глас 8, с канóном Трióди пéрвым (о впáдшем в руки разбóйников) глас 5 и с канóном Трióди вторым (прп. Iоáнна) глас 8)
ПЕСНЬ 1
Iрмóс: Колесницегони́теля фараóня погрузи́/ чудотворя́й иногдá/ Моисéйскiй жезл, крестообрáзно порази́в,/ и раздели́в мóре,/ Iзрáиля же беглецá, пешехóдца спасé,// песнь Бóгови воспевáюща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Всеси́льну Хрїстóву Божествý кáко не диви́мся;/ от страстéй ýбо всем вéрным, безстрáстiе и нетлéнiе точáщу,/ от ребрá же Святáго истóчник безсмéртiя искáпающу,// и Живóт из грóба Присносýщный.
Хор: Слáва, Гóсподи, Святóму Воскресéнiю Твоемý.
Чтец: Я́ко благолéпен женáм Áнгел ны́не яви́ся,/ свéтлыя нося́ óбразы естéственныя невещéственныя чистоты́,// зрáком же возвещáя свет воскресéнiя, зовы́й: воскрéсе Госпóдь.
Хор: Пресвятáя Богорóдице, спасù нас.
Богорóдичен: Преслáвная возглагóлашася о Тебé в родéх родóв,/ Бóга Слóва во чрéве вмéщшая,/ чистá же пребы́вши Богорóдице Марíе.// Тéмже Тя вси почитáем, сýщее по Бóзе заступлéнiе нáше.
Канон Богородицы, глас 8
Хор: Пресвятáя Богорóдице, спасù нас.
Чтец: Пречи́стая Богорóдице,/ воплóщшееся Присносýщное и Пребожéственное Слóво,// пáче естествá рóждши, поéм Тя.
Хор: Пресвятáя Богорóдице, спасù нас.
Чтец: Грозд Тя Живонóсен,/ всемíрнаго искáпающ слáдость спасéнiя,// Дéва, Хрїстé, роди́.
Канон Триоди первый (о впавшем в руки разбойников), глас 5
Хор: Помúлуй мя, Бóже, помúлуй мя.
Чтец: Уподóбихся Хрїстé в рýце разбóйников впáдшему,/ и бiéньми éле жи́ву от сих остáвленному Спáсе:// и аз си́це уя́звлен есмь грехи́ мои́ми.
Хор: Помúлуй мя, Бóже, помúлуй мя.
Чтец: Не прéзри менé недýгующа лю́то,/ вопiя́ше Спáсе рыдáя,/ на разбóйники богáтство изнури́вый Твоé./ И аз си́це молю́ся:// ущéдри и спаси́ мя.
Хор: Помúлуй мя, Бóже, помúлуй мя.
Чтец: Уврачевáвый мя убiéн имýща ум грехи́ в я́звах,/ от разбóйников непрáведных и лукáвых помышлéнiй, Хрїстé Спáсе,// спаси́ мя я́ко многоми́лостивый.
Хор: Пресвятáя Богорóдице, спасú нас.
Богорóдичен: Пречи́стая Мáти Хрїстóва,/ воплóщшагося из Тебé, и от недр Роди́теля не отлýчшася Бóга, непрестáнно моли́,// от вся́каго обстоя́нiя спасти́, я́же создá.
Канон Триоди второй (прп. Иоанна), глас 8
Хор: Преподóбне óтче Iоáнне, молù Бóга о нас.
Чтец: Во свет невещéственный и ýмный,/ от печáли вещéственных востéк Iоáнне преподóбне,// моли́твами твои́ми ко Гóсподу просвети́ мя.
Хор: Преподóбне óтче Iоáнне, молù Бóга о нас.
Чтец: Я́ко воздержáнiя слáдость ссав,/ отри́нул еси́ гóресть сластéй:// тéмже пáче мéда и сóта услаждáеши óтче, чýвства нáша.
Слáва Отцý и Сы́ну и Святóму Дýху.
Тропáрь: Возшéд на высотý добродéтелей,/ дóле плéжущiя поплевáв слáсти,// слáдость яви́лся еси́ спасéнiя, преподóбне óтче, стáду твоемý.
И ны́не и прúсно и во вéки векóв, амúнь.
Богорóдичен: Премýдрость и Слóво Óтчее несказáнно рóждшая,/ души́ моея́ лю́тую уврачýй я́зву,// и сéрдца болéзнь укроти́.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Утверждéй в начáле Небесá рáзумом,/ и зéмлю на водáх основáвый,/ на кáмени мя, Хрїстé, зáповедей Твои́х утверди́,/ я́ко несть свят, пáче Тебé// Еди́не Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Осуждéна бы́вша Адáма вкушéнiем грехá,/ плóти Твоея́ спаси́тельною стрáстiю оправдáл еси́, Хрїстé:// Сам бо непови́нен смéртнаго искýса был еси́, Безгрéшне.
Хор: Слáва, Гóсподи, Святóму Воскресéнiю Твоемý.
Чтец: Воскресéнiя свет возсiя́/ сýщим во тьме, и сéни смéртней седя́щим,/ Бог мой Iисýс,/ и Свои́м Божествóм крéпкаго связáв,// сегó сосýды расхи́тил есть.
Хор: Пресвятáя Богорóдице, спасù нас.
Богорóдичен: Херувíмов и Серафíмов превы́шши яви́лася еси́, Богорóдице:/ Ты бо Еди́на прiя́ла еси́ Невмести́маго Бóга в Твоéм чрéве, Несквéрная:// тéмже Тя вéрнiи вси пéсньми, Чи́стая, ублажáем.
Глас 8
Хор: Пресвятáя Богорóдице, спасù нас.
Чтец: Даждь нам пóмощь Твои́ми моли́твами, Всечи́стая,// прилóги отражáющи лю́тых обстоя́нiй.
Хор: Пресвятáя Богорóдице, спасù нас.
Чтец: Éве прамáтери Ты исправлéнiе бы́ла еси́,// Начáльника жи́зни мíрови, Хрїстá Богорóдице, рóждши.
Глас 5
Хор: Помúлуй мя, Бóже, помúлуй мя.
Чтец: Путéм житiя́ Хрїстé, лю́те путешéствуя,/ уя́звлен есмь от разбóйник в страстéх,// но возстáви мя молю́ся.
Хор: Помúлуй мя, Бóже, помúлуй мя.
Чтец: Разби́ша ум мой разбóйницы,/ и остáвиша мя в я́звах éле жи́ва прегрешéнiй мои́х,// но исцели́ мя Гóсподи.
Хор: Помúлуй мя, Бóже, помúлуй мя.
Чтец: Обнажи́ша мя Спáсе Хрїстé, зáповедей Твои́х стрáсти,/ и сластьми́ уязви́хся,// но излéй на мя ми́лость.
Хор: Пресвятáя Богорóдице, спасú нас.
Богорóдичен: Моли́ непрестáнно Чи́стая, Прошéдшаго из чресл Твои́х,/ избáвитися лéсти дiáволи,// пою́щим Тя Мáтерь Бóжiю.
Глас 8
Хор: Преподóбне óтче Iоáнне, молù Бóга о нас.
Чтец: Попали́л еси́ ýглем обучéнiя преслáвно страстéй тéрнiе,// и согревáеши монáшествующих состоя́нiя.
Хор: Преподóбне óтче Iоáнне, молù Бóга о нас.
Чтец: Ми́ро освящéнiя от пóстнических преподóбне аромáт,// весь сложи́лся еси́ в воню́ благоухáнiя Бóжiя.
Слáва Отцý и Сы́ну и Святóму Дýху.
Тропáрь: В закóнех обучéнiя поучáяся, стрáсти потопи́л еси́,// я́коже ины́я ны́не фараони́ты, течéнiем слез твои́х.
И ны́не и прúсно и во вéки векóв, амúнь.
Богорóдичен: Устáви моé непостоя́нное/ помышлéнiй, Чи́стая, смущéнiе,/ Мáти Бóжiя,// к Сы́ну Твоемý направля́ющи движéнiе.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, помилуй. (3 раза)
Кондáк Трióди (прп. Iоáнна), глaс 4: На высотé Госпóдь воздержáнiя и́стинна тя положи́,/ я́коже звездý нелéстную, световодя́щую концы́,// настáвниче Iоáнне óтче наш.
Íкос: Дом Бóжiй я́ко вои́стинну,/ самагó себé содéлал еси́ óтче,/ Божéственными твои́ми добродéтельми:/ я́ве украси́в я́ко злáто свéтлое,/ вéру, надéжду, и любóвь и́стинную:/ Божéственныя закóны излагáя,/ воздержáнiем обучи́вся я́ко безплóтный:/ рáзум, мýжество, целомýдрiе стяжáв,/ смирéнiе, и́мже вознéслся еси́./ Тéмже и просвети́лся еси́/ моли́твами непрестáнными,/ и небéсная прiя́л еси́ селéнiя,// настáвниче Iоáнне óтче наш.
Седáлен Трióди, глaс 5: Пречи́стый Крест Твой, Спáсе наш,/ я́ко орýжiе спасéнiя содержáще,/ тем Тебé вопiéм:/ спаси́ ны пострадáвый вóлею о нас, всех Бóже,// я́ко многоми́лостивый.
Слáва Отцý и Сы́ну и Святóму Дýху.
Другой седáлен Трióди (прп. Iоáнна), глaс 4: Добродéтельми к Небеси́ возсiя́вый, водружéн я́ве,/ возшéл еси́ к Боговидéнiя неизмéримой глубинé благочéстно:/ вся ýбо победи́в дéмонскiя кóзни,/ покрывáеши же человéки от врéда сих,/ Iоáнне, лéствице добродéтелей:// и ны́не мóлишися спасти́ся рабóм твои́м.
И ны́не и прúсно и во вéки векóв, амúнь.
Богорóдичен Трióди, глас 4: На престóле херувíмском седя́й,/ и в нéдрех Óтчих водворя́яйся,/ я́ко на престóле седи́т святéм Своéм Влады́чице,/ в нéдрех Твои́х плóтски:/ Бог бо воцари́выйся тáко над всéми язы́ки,/ и разýмно ны́не поéм Емý:/ Егóже и Ты Чи́стая моли́,// спасти́ся рабóм Твои́м.
ПЕСНЬ 4
Iрмóс: Ты моя́ крéпость Гóсподи,/ Ты моя́ и си́ла,/ Ты мой Бог, Ты моé рáдованiе,/ не остáвль нéдра Ѻ́тча,/ и нáшу нищетý посети́в./ Тем с прорóком Аввакýмом зовý Ти:// си́ле Твоéй слáва, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Ты врагá сýща мя зелó возлюби́л еси́:/ Ты истощáнiем стрáнным сошéл еси́ на зéмлю, Благоутрóбне Спáсе,/ послéдняго моегó досаждéнiя не отвéргся,/ и пребы́в на высотé пречи́стыя Твоея́ слáвы,// прéжде безчéствованнаго прослáвил еси́.
Хор: Слáва, Гóсподи, Святóму Воскресéнiю Твоемý.
Чтец: Кто зря, Влады́ко, ны́не не ужасáется,/ стрáстiю смерть разрушáему;/ Крестóм бежáщее тлéнiе,/ и смéртiю ад богáтства истощавáемый,/ Божéственною си́лою Тебé распя́таго;// чýдно дéло, Человеколю́бче!
Хор: Пресвятáя Богорóдице, спасù нас.
Богорóдичен: Ты вéрным похвалá еси́, Безневéстная, Ты Предстáтельнице,/ Ты и прибéжище хрїстiáн, стенá и пристáнище:/ к Сы́ну бо Твоемý мольбы́ нóсиши, Всенепорóчная, и спасáеши от бед,// вéрою и любóвiю Богорóдицу Чи́стую Тебé знáющих.
Глас 8
Хор: Пресвятáя Богорóдице, спасù нас.
Чтец: Клас возрасти́вшая животвóрный, неорáнная Ни́во,/ подаю́щаго мíрови жизнь, Богорóдице,// спасáй пою́щiя Тя.
Хор: Пресвятáя Богорóдице, спасù нас.
Чтец: Богорóдицу Тя, Всечи́стая, просвéщшiися вси проповéдуем:// Сóлнце бо прáвды родилá еси́, Приснодéво.
Глас 5
Хор: Помúлуй мя, Бóже, помúлуй мя.
Чтец: Разбóйницы окрадóша моé дея́нiе Божéственное,// и остáвиша мя я́звами мýчима.
Хор: Помúлуй мя, Бóже, помúлуй мя.
Чтец: Извлекóша мя Спáсе зáповедей Твои́х,/ непостоя́нная помышлéнiя моя́,// отонýдуже уя́звлен есмь прегрешéньми.
Хор: Помúлуй мя, Бóже, помúлуй мя.
Чтец: Левíт рáнами уя́звленна, я́ко ви́де мя,/ ми́мо и́де, Спáсе мой,// но Ты мя спаси́.
Хор: Пресвятáя Богорóдице, спасú нас.
Богорóдичен: Госпóдственно прославля́ем Тя/ Богорóдице Безневéстная,// и к Твоемý пристáнищу вéрнiи прибегáем.
Глас 8
Хор: Преподóбне óтче Iоáнне, молù Бóга о нас.
Чтец: Я́ко цвéтник благовóннейшiй,/ и добродéтелей рай одушевлéнный,/ воздержáнiе процвéл еси́,// и́мже вся напитáл еси́ чтýщiя тя.
Хор: Преподóбне óтче Iоáнне, молù Бóга о нас.
Чтец: Законоположи́теля обучéнiя,/ и монáхов прáвило кротчáйшее,/ я́ко Моисéа тя и Давíда вои́стинну,// стяжáвше óтче, ублажáем.
Слáва Отцý и Сы́ну и Святóму Дýху.
Тропáрь: Насаждéн на водáх воздержáнiя,/ яви́лся еси́ блажéнне, розгá óтче благоцветýщая,// благочéстiя грóзды произнося́щая.
И ны́не и прúсно и во вéки векóв, амúнь.
Богорóдичен: Под лéтом бывáема,/ от Отцá безлéтно возсiя́вша,/ Богомáти нам родилá еси́:// Егóже моли́ спасти́ пою́щiя Тя.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Вскýю мя отри́нул еси́/ от лицá Твоегó, Свéте Незаходи́мый,/ и покры́ла мя есть чуждáя тьма, окая́ннаго;/ но обрати́ мя,/ и к свéту зáповедей Твои́х// пути́ моя́ напрáви, молю́ся.
Хор: Слáва, Гóсподи, Святóму Воскресéнiю Твоемý.
Чтец: Одéятися претерпéл еси́ в багряни́цу/ прéжде стрáсти Твоея́, Спáсе, поругáемь,/ первоздáннаго покрывáя безобрáзное обнажéнiе:/ и наг пригвозди́лся еси́ на Крестé плóтiю,// совлачáя, Хрїстé, ри́зу умерщвлéнiя.
Хор: Слáва, Гóсподи, Святóму Воскресéнiю Твоемý.
Чтец: От пéрсти смéртныя,/ Ты пáдшее моé пáки наздáл еси́ существó, воскрéс:/ и нестарéющееся, Хрїстé устрóил еси́,/ яви́в пáки я́коже цáрскiй óбраз,// нетлéнiя жизнь блистáющ.
Хор: Пресвятáя Богорóдице, спасù нас.
Богорóдичен: Мáтернее дерзновéнiе, éже к Сы́ну Твоемý имýщи, Всечи́стая,/ срóднаго промышлéнiя, éже о нас, не прéзри, мóлимся:// я́ко Тебé и Еди́ну хрїстiáне ко Влады́це очищéнiе ми́лостивно предлагáем.
Глас 8
Хор: Пресвятáя Богорóдице, спасù нас.
Чтец: Утоли́ нестерпи́мую бýрю страстéй мои́х,// Я́же Бóга рóждшая, Окорми́теля и Гóспода.
Хор: Пресвятáя Богорóдице, спасù нас.
Чтец: Слýжат рождествý Твоемý, Пречи́стая Богорóдице,// Áнгельстiи чи́нове, и человéков собрáнiе.
Глас 5
Хор: Помúлуй мя, Бóже, помúлуй мя.
Чтец: Iисýсе, посети́ рáны души́ моея́,/ я́коже дрéвле в рýце впáдшаго разбóйничи,// и уврачýй болéзнь мою́ Хрїстé, молю́ся.
Хор: Помúлуй мя, Бóже, помúлуй мя.
Чтец: Болéзненно я́звами изнемогóх, Хрїстé мой, прегрешéнiй,/ и оттýду наг лежý добродéтелей Божéственных:// молю́, спаси́ мя.
Хор: Помúлуй мя, Бóже, помúлуй мя.
Чтец: Iерéй я́коже ви́де мя, и леви́т не возмóже я́ве,/ мимоидóша бо мя,/ но Сам я́ко благоутрóбен,// ны́не спасéнiе пóдал, и спасл еси́.
Хор: Пресвятáя Богорóдице, спасú нас.
Богорóдичен: Не прéзри Влады́ко окая́ннаго менé, молю́ся,/ уя́звленнаго умóм болéзненно от разбóйник,// но ущéдри моли́твами Спáсе, Рóждшiя тя.
Глас 8
Хор: Преподóбне óтче Iоáнне, молù Бóга о нас.
Чтец: Погаси́в вся стрáсти,/ росóю подвигóв твои́х óтче блажéнне,/ оби́льно возжéг огнéм любвé и вéры,/ воздержáнiя свети́льник, и просвещéнiе безстрáстiя,// и дне сын был еси́.
Хор: Преподóбне óтче Iоáнне, молù Бóга о нас.
Чтец: Вéры грозд, Божéственным земледéлiем твои́м óтче воспитáл еси́,/ и в точи́ла вложи́л еси́,/ и воздéлал еси́ труды́ обучéнiя,/ и чáшу испóлнь духóвную воздержáнiя:// весели́ши сердцá стáда твоегó.
Слáва Отцý и Сы́ну и Святóму Дýху.
Тропáрь: Претерпéв дóбре прилóги и я́звы проти́вных врагóв,/ яви́лся еси́ столп терпéнiя,/ утверждáя стáдо твоé пáлицею Божéственною,/ на пáжити воздержáнiя,// и на водé воспитовáя блажéнне.
И ны́не и прúсно и во вéки векóв, амúнь.
Богорóдичен: Рéчем Твои́х устéн Всечи́стая послéдующе, Тя ублажáем:/ с Тобóю бо вои́стинну/ вели́чiя сотвори́вый Госпóдь возвели́чи Тя,/ и и́стинную Бóжiю Мáтерь,// рождéйся из чрéва Твоегó показá.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Очи́сти мя, Спáсе,/ мнóга бо беззакóнiя моя́,/ и из глубины́ зол возведи́, молю́ся:/ к Тебé бо возопи́х, и услы́ши мя,// Бóже спасéнiя моегó.
Хор: Слáва, Гóсподи, Святóму Воскресéнiю Твоемý.
Чтец: Дрéвом крéпко низложи́ мя началозлóбный:/ Ты же, Хрїстé, вознéсся на Крестé,/ крепчáе низложи́л еси́, посрами́в сегó,// пáдшаго же воскреси́л еси́.
Хор: Слáва, Гóсподи, Святóму Воскресéнiю Твоемý.
Чтец: Ты ущéдрил еси́ Сióна, возсiя́вый от грóба,/ нóваго вмéсто вéтхаго соверши́в, я́ко Благоутрóбен, Божéственною Твоéю крóвiю:// и ны́не цáрствуеши в нем во вéки, Хрїстé.
Хор: Пресвятáя Богорóдице, спасù нас.
Богорóдичен: Да избáвимся от лю́тых прегрешéнiй,/ мольбáми Твои́ми, Богороди́тельнице Чи́стая,/ и да улучи́м, Пречи́стая, Божéственное сiя́нiе,// из Тебé неизречéнно воплощéннаго Сы́на Бóжiя.
Глас 8
Хор: Пресвятáя Богорóдице, спасù нас.
Чтец: Храм Тя Бóжiй и Ковчéг,/ и чертóг одушевлéнный, и дверь Небéсную,// Богорóдице, вéрнiи возвещáем.
Хор: Пресвятáя Богорóдице, спасù нас.
Чтец: Трéбищ разруши́тель, я́ко Бог,/ бы́вшее рождествó Твоé, Марíé Богоневéсто,// покланя́емо есть со Отцéм и Дýхом.
Глас 5
Хор: Помúлуй мя, Бóже, помúлуй мя.
Чтец: Страстьми́ ижди́х житié Божéственное Влады́ко,/ и вся́ко прегрешéньми лю́те уя́звен, прибегóх к Тебé:// ущéдри мя, молю́ся.
Хор: Помúлуй мя, Бóже, помúлуй мя.
Чтец: Расхи́тиша богáтство моé,/ и я́коже мéртва мя остáвиша разбóйницы,/ страстьми́ ум мой уязви́вше,// но ущéдрив спаси́ мя Гóсподи.
Хор: Помúлуй мя, Бóже, помúлуй мя.
Чтец: Я́ко ви́де левíт мою́ ран болéзнь,/ язв не терпя́, мимои́де мя:/ Сам же Человеколю́бче,// излiя́л ми еси́ богáтую Твою́ ми́лость.
Хор: Пресвятáя Богорóдице, спасù нас.
Богорóдичен: Купинý Тя неопали́мую, и гóру,/ и лéствицу одушевлéнную,/ и дверь небéсную, достóйно слáвим,// Марíе преслáвная, правослáвных похвалó.
Глас 8
Хор: Преподóбне óтче Iоáнне, молù Бóга о нас.
Чтец: Прiя́л еси́ в души́ Божéственное богáтство Дýха,/ непорóчную моли́тву, чистотý,/ чéстность, бдéнiе всегдáшнее, воздержáнiя труды́,// и́миже дом познáлся еси́ Бóжiй.
Хор: Преподóбне óтче Iоáнне, молù Бóга о нас.
Чтец: Веществá éже дóле, премýдре, претéкл еси́ хýдость,/ невещéственною же моли́твою ум воспери́в,/ и вы́шняго упокоéнiя яви́лся еси́ наслéдник,// совершéнства рáди житiя́.
Слáва Отцý и Сы́ну и Святóму Дýху.
Тропáрь: Пóтами пóстническими/ ýглiе стрел врáжiих угаси́л еси́ вои́стинну,/ и огнь вéры возсiя́в,// попали́л еси́ невéрiя, ересéй шатáнiя.
И ны́не и прúсно и во вéки векóв, амúнь.
Богорóдичен: Возсiя́ от Сióна вы́шняго благолéпiе,/ предложéнiем плóти по соединéнiю неизречéнному,// из Тебé Неискусобрáчная обложéнное, и мiр просвети́.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Кондáк воскрéсный, глас 8: Воскрéс из грóба, умéршыя воздви́гл еси́,/ и Адáма воскреси́л еси́,/ и Éва ликýет во Твоéм Воскресéнiи,/ и мiрстíи концы́ торжествýют// éже из мéртвых востáнiем Твои́м, Многоми́лостиве.
Íкос: Áдова цáрствiя плени́вый, и мéртвыя воскреси́вый, Долготерпели́ве,/ жены́ мvронóсицы срéтил еси́, вмéсто печáли рáдость принесы́й:/ и апóстолом Твои́м возвести́л еси́ победи́тельная Спáсе мой знáменiя Живодáтелю,/ и тварь просвещáеши, Человеколю́бче.// Сегó рáди и мiр срáдуется, éже из мéртвых востáнiю Твоемý, Многоми́лостиве.
ПЕСНЬ 7
Iрмóс: Бóжiя снизхождéнiя/ огнь устыдéся в Вавилóне иногдá./ Сегó рáди óтроцы в пещи́ рáдованною ногóю,/ я́ко во цвéтнице ликýюще поя́ху:// благословéн еси́, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Слáвное истощáнiе,/ Божéственное богáтство Твоея́ нищеты́, Хрїстé, удивля́ет Áнгелы,/ на Крестé зря́щiя Тя пригвождáема,/ за éже спасти́ вéрою зовýщiя:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Божéственным Твои́м сошéствiем свéта испóлнил еси́ преиспóдняя,/ и тьма прогнáна бысть прéжде гоня́щая./ Отню́дуже воскресóша и҆́же от вéка ю́зницы, зовýще:// благословéн Бог отéц нáших.
Хор: Пресвятáя Трóице, Бóже наш, слáва Тебé.
Трóичен: Всем ýбо Гóспода,/ Еди́наго же еди́ному Единорóдному Сы́ну правослáвно Отцá,/ богослóвяще Тя возвещáем,/ и Еди́наго вéдяще от Тебé исходя́ща Дýха Прáваго,// Соестéственна и Соприсносýщна.
Глас 8
Хор: Пресвятáя Богорóдице, спасù нас.
Чтец: От Дéвственных ложéсн воплóщься,/ яви́лся еси́ на Спасéнiе нáше./ Тéмже Твою́ Мáтерь вéдяще Богорóдицу, правослáвно зовéм:// отцéв Бóже, благословéн еси́.
Хор: Пресвятáя Богорóдице, спасù нас.
Чтец: Жезл прорасти́ла еси́, Дéво,/ от кóрене Iессéова, Всеблажéнная,/ Плод цветонося́щи спаси́тельный,/ вéрою Сы́ну Твоемý зовýщим:// отцéв Бóже, благословéн еси́.
Глас 5
Хор: Помúлуй мя, Бóже, помúлуй мя.
Чтец: Разбóйницы обпадóша на мя окая́ннаго,/ и я́звами остáвиша мéртва, я́коже бездыхáнна мя.// Тéмже молю́ся Ти: Бóже, посети́ мя.
Хор: Помúлуй мя, Бóже, помúлуй мя.
Чтец: Ум мой плени́ша помышлéнiя непостоя́нная, и уязви́вше страстьми́,/ мéртва мя остáвиша, мнóжеством прегрешéнiй,// но Спáсе, исцели́ мя.
Хор: Помúлуй мя, Бóже, помúлуй мя.
Чтец: Я́ко ви́де левíт мя рáнами боля́ща,/ не терпя́ язв неисцéльнаго рáди,/ мимои́де мя, Спáсе мой,// но Сам уврачýй мя.
Хор: Пресвятáя Богорóдице, спасù нас.
Богорóдичен: Ты от Дéвы воплоти́выйся, спасл мя еси́,/ я́звам мои́м возливáя богáтую ми́лость, Хрїстé щедрóт Твои́х:// сегó рáди Тя слáвлю.
Глас 8
Хор: Преподóбне óтче Iоáнне, молù Бóга о нас.
Чтец: На злáце вы́шняго цáрствiя,/ стáдо óтче воспитáл еси́/ и жезлóм догмáт звéри отгнáв ересéй, воспéл еси́:// отéц нáших Бóже благословéн еси́.
Хор: Преподóбне óтче Iоáнне, молù Бóга о нас.
Чтец: В гóрнiй вшел еси́ и невéстническiй чертóг Цáрства Хрїстóва,/ одéждею облечéн достóйною звáвшаго,/ в нéмже и возлéгл еси́, вопiя́:// отéц нáших Бóже благословéн еси́.
Слáва Отцý и Сы́ну и Святóму Дýху.
Тропáрь: Невлáжная грехми́, рекá яви́лся еси́ воздержáнiя óтче,/ пóмыслы потопля́я, и сквéрну очищáя, вопiю́щих вéрою:// отéц нáших Бóже благословéн еси́.
И ны́не и прúсно и во вéки векóв, амúнь.
Богорóдичен: Из чрéва Твоегó прóйде воплоти́выйся Дéво, всех Госпóдь:/ тéмже Тя Богорóдицу мýдрствующе правослáвно, Сы́ну Твоемý зовéм:// отéц нáших Бóже благословéн еси́.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
Продолженiе здесь