Неделя вторая Великoго поста. Святителя Григория Паламы. Глас 6. УТРЕНЯ (окончание) ЧАС ПЕРВЫЙ
12 мáрта 2023 гóда. Недéля вторáя Велúкaго постá. Святúтеля Григóрiя Палáмы. Глас 6. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 8
Хор: Помúлуй мя, Бóже, помúлуй мя.
Чтец: Безмéрнаго Влады́ко, и мнóгаго милосéрдiя Твоегó,/ вéмы богáтство в Тя вéровавшiи./ Тéмже Ти припáдаем с блýдным вси тéпле:/ прiими́ согреши́вшiя, и к Тебé прибéгшiя:/ несть бо, несть грех Щéдре,// Твоé человеколю́бiе победи́ти могíй.
Хор: Помúлуй мя, Бóже, помúлуй мя.
Чтец: Милосéрдiя рáди Влады́ко Себé смири́в,/ пáдшим Твои́м сынóм прибли́жился еси́:/ Сам бо Человеколю́бче срел еси́ пáдших,/ и облобызáеши, и спасéнiе дáруеши:/ áще кто и дóлу пáднет,// ми́лостив сый не гнéваешися, я́ко Человеколю́бец.
Хор: Помúлуй мя, Бóже, помúлуй мя.
Чтец: Стрáшнейшiй суд менé усря́щет о Влады́ко,/ я́ко Тя человеколю́бца и незлóбива зря,/ не притекáю к Тебé, блýднаго зовы́й глáсом,/ но в лéности житié препровождáю:/ Ты ýбо ми́лостив бýди ми,// и осуждéнiя óнаго исхити́ Щéдре, покая́нiя рáди.
Хор: Пресвятáя Богорóдице, спасú нас.
Чтец: От мнóгих мя Всенепорóчная напáстей преклонéна,/ и печáлей бýрею потопля́ема/ пристáнище спасéнiя, Твоéю моли́твою Пречи́стая избáви,/ и от всех исхити́вши спаси́:/ да Тя достóйно я́ко тéплую предстáтельницу,// слáвлю Богорóдицу во вся вéки.
Глас 4
Хор: Святúтелю óтче Григóрiе, молú Бóга о нас.
Чтец: Предстои́ши ны́не престóлу Всещéдраго,/ я́ко богослóвов подóбный,/ и сим единонрáвный всемýдре Григóрiе,/ Фессалонíтскiй председáтелю, iерáрхов добрóто,/ свéтло украси́вся слáвою священноначáлiя,// Бóгу и ны́не служá. (двáжды)
Хор: Святúтелю óтче Григóрiе, молú Бóга о нас.
Чтец: Вéдый чи́стое твоегó помышлéнiя Бог,/ и прéжде чрéва, и прéжде зачáтiя,/ вéрному возглагóла божéственному царю́ я́ве,/ Цéркве необори́маго бы́ти тя побóрника:/ тéмже прáвильным извéством,// ми́ром запечатлéн еси́ священноначáльства. (двáжды)
Благословúм Отцá, и Сы́на, и Святáго Дýха, Гóспода.
Тропáрь: Побеждáется я́ве и бéдствует/ собрáнiе Поликiнди́на длáнiю твоéю,/ и мýдрыми твои́ми глагóлы,/ преслáвне Григóрiе, Фессалонíтскiй председáтелю:/ и я́ко исчезáет дым, исчезé гнилóе безýмiе,// твои́м громоглáсным и Богослóвным язы́ком.
И ныне и прúсно и во вéки векóв, амúнь.
Богорóдичен: Слóво Бóжiе в Тебé Дéво,/ человéческое естествó погружáемое страстьми́,/ возобрази́ крáйнею благосты́нею:/ и все обнови́ и посвяти́:/ тéмже Тобóю спасéни,// Тя славослóвим во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Бóга/ человéком невозмóжно ви́дети,/ на Негóже не смéют чи́ни Áнгельстiи взирáти;/ Тобóю бо, Всечи́стая, яви́ся человéком/ Слóво воплощéнно,/ Егóже величáюще,// с Небéсными вóи Тя ублажáем.
Хор: Слáва, Гóсподи, Святóму Воскресéнiю Твоемý.
Чтец: Страстéй непричáстен Ты пребы́л еси́, Слóве Бóжiй,/ плóтiю прiобщи́вся страстéм:/ но реши́ши от страстéй человéка,/ страстéм быв страсть, Спáсе наш:// еди́н бо еси́ безстрáстен, и всеси́лен.
Хор: Слáва, Гóсподи, Святóму Воскресéнiю Твоемý.
Чтец: Тлю смéртную прiéм, тлéнiя соблю́л еси́ тéло Твоé невкýсно,/ Твоя́ же животворя́щая и божéственная, Влады́ко, душá, во áде не остáвлена бысть:// но я́коже от сна воскрéс, нас совоздви́гл еси́.
Хор: Пресвятáя Богорóдице, спасú нас.
Богорóдичен: Бóга Отцá, Сы́на собезначáльна,/ вси человéцы устнáми ýбо чистыми слáвим,/ неизречéнную же и преслáвную Дýха Всесвятáго силу чтим:// едина бо еси́ всесильная Трóица неразлýчная.
Глас 8
Хор: Помúлуй мя, Бóже, помúлуй мя.
Чтец: Рáдости и весéлiя ны́не,/ менé рáди заклáвшемуся Твоемý тельцý,/ испóлни сегó от Тебé/ чáющую мою́ дýшу Бóже:/ заблуждéна прiими́ мя,/ и умерщвлéна к жи́зни возведи́,/ и в Божéственную одéжду спасéнiя,// в нетлéнiе мя облецы́.
Хор: Помúлуй мя, Бóже, помúлуй мя.
Чтец: Дýши удалéныя от Бóга,/ и Божéственных даровáнiй лишéныя,/ прiиди́те тéпле,/ и блýднаго обращéнiе воспрiи́мше зовéм:/ Óтче Благíй, И́же на Небесéх,/ согреши́хом Ти вси, очи́сти и спаси́// прибегáющiя к ми́лости Твоéй.
Хор: Помúлуй мя, Бóже, помúлуй мя.
Чтец: Я́ко имы́й милосéрдiя мнóжество мнóгое,/ не гнушáйся менé Гóсподи Гóсподи,/ во мнóгих сластéх богáтство ижди́вша,/ и прибегáюща ны́не, и зовýща блýднаго глáсом:/ согреши́х Ти, спаси́// прибегáющаго к ми́лости Твоéй.
Хор: Пресвятáя Богорóдице, спасú нас.
Чтец: Спасéнiя пристáнище и наставлéнiе,/ и предстáтельницу Тя и́мам раб Твой,/ лю́тых всех препя́тiй,/ я́ко благáя к Бóгу мольбáми Твои́ми Влады́чице да избáвлюся,/ я́ко на Тя всю мою́ надéжду возложи́х любóвiю,// да вéрою величáю Тя.
Глас 4
Хор: Святúтелю óтче Григóрiе, молú Бóга о нас.
Чтец: Зерцáло Бóжiе был еси Григóрiе:/ éже бо по óбразу несквéрное соблю́л еси́,/ ум же влады́ку на стрáсти плотскíя мýжески постáвив,/ éже по подóбiю воспрiя́л еси́.// Отонýдуже дом был еси́ Святы́я Трóицы светлéйшiй. (двáжды)
Хор: Святúтелю óтче Григóрiе, молú Бóга о нас.
Чтец: Царь благочести́вый крилáтаго тя воздухохóдна показýет, семý спобóрствующа,/ я́ко всегó испóлнена Божéственнаго Дýха,/ на суемýдреннаго неи́стовствующаго Варлаáма,/ глагóлющаго на высотý непрáведная Бóгу,// егóже прáведно победи́л еси́. (двáжды)
Слáва Отцý и Сыну и Святóму Дýху.
Тропáрь: Весь быв премýдрости лýчшiя испóлнен преслáвне,/ свет мíрови просвети́л еси́,/ правослáвiя источи́в догмáты:/ дрýжеством бо изря́днаго любомýдрiя премýдре,/ Божéственный страх во чрéве зачáл еси́,// и словесá Дýха породи́л еси́.
И ныне и прúсно и во вéки векóв, амúнь.
Богорóдичен: Песнь Тебé вéрнiи соглáсно принóсим благодарéнiя:/ Ты бо дрéвнюю разруши́ла еси́ нáшу кля́тву Богороди́тельнице,/ и благословéнiе вси Божéственное прiéмлем,/ спасéнiе, просвещéнiе, и ми́лость Тобóю,// и рáдость вéчную.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный шесты́й: Показýя, я́ко человéк еси́ Спáсе, по существý,/ посредé став воскрéс от грóба,/ и брáшна сопричасти́лся еси́,/ учи́л еси́ крещéнiю покая́нiя./ Áбiе же к Небéсному вознéслся еси́ Ѻтцý,/ и ученикóм Утéшителя послáти обещáл еси́, Пребожéственный Богочеловéче.// Слáва Твоемý востáнiю.
Слáва Ѻтцý и Сы́ну и Святóму Дýху.
Светúлен Трióди: Рáдуйся oтцéв пoхвалó, бoгoслóвoв устá,/ безмóлвiя селéнiе, премýдрoсти дóме,/ учи́телей крáйнoсть, пучи́нo слóва./ Рáдуйся дея́нiя oргáне, видéнiя крáйнoсть,/ и исцели́телю недýгoв челoвéческих.// Рáдуйся Дýха хрáме, и умéрый и живы́й óтче.
И ны́не и прúсно и во вéки векóв. Амúнь.
Богорóдичен Трióди: Влады́чице, всех Влады́чице, и всех вы́шшая,/ всех же превoсхoдя́щая гóрних вóинств,/ прoстри́ рукý держáвну, и сoхрани́ мир,/ свящéнники благoслoви́ Тебé священнoдéйствующiя,/ мoнáхи же прoсти́, мoля́щiя Тебé./ Лю́ди вся умири́, и сýщiя в палáте:/ вóинствo же укрепи́ вo врéмя брáни:/ сей град сoблюди́, святáя Бoгoрóдице./ И ны́не нас спoдóби ви́дети Небéснoе Цáрствo, и рáйскую дверь,/ егдá ся́дет Судiя́ суди́ти вселéнней,// вo втoрóм и стрáшнoм суди́лищи, Влады́чице Áнгелoв.
ХВАЛИТНЫ
Хор, глас 6: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 6: Крест Твой, Гóсподи,/ жизнь и воскресéнiе лю́дем Твои́м есть,/ и надéющеся нань,// Тебé воскрéсшаго Бóга нáшего поéм: поми́луй нас.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Погребéнiе Твоé, Влады́ко,/ рай отвéрзе рóду человéческому:/ и от истлéнiя избáвльшеся,// Тебé воскрéсшаго Бóга нáшего поéм: поми́луй нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Со Отцéм и Дýхом Хрїстá воспои́м,/ воскрéсшаго из мéртвых,/ и к Немý вопiи́м:// Ты Живóт еси́ наш и Воскресéнiе, поми́луй нас.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Триднéвен воскрéсл еси́, Хрїстé, от грóба/ я́коже есть пи́сано,/ совоздви́гнувый прáотца нáшего./ Тéмже Тя и слáвит род человéческiй,// и воспевáет Твоé воскресéнiе.
На 4. Хвалúте Егó в тимпáне и лúце, хвалúте Егó во стрýнах и оргáне.
И҆́ны стiхúры анатóлiевы: Гóсподи, вéлiе и стрáшно есть/ Твоегó воскресéнiя тáинство:/ тáко бо произшéл еси́ от грóба,/ я́ко жени́х от чертóга,/ смéртiю смерть разруши́вый,/ да Адáма свободи́ши./ Тéмже на Небесéх Áнгели ликовствýют,/ и на земли́ человéцы слáвят,// éже на нас бы́вшее благоутрóбiе Твоé, Человеколю́бче.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúры Трióди, глас 1: Блажéнную в мíре жизнь сoверши́в,/ и ны́не блажéнных срáдуешися сoбóрoм,/ и на земли́ крóтких, я́кo крóткiй живéши iерáрше Григóрiе:/ благoдáтiю же чудéс бoгатéеши oт Бóга,// ю́же пoдаéши чтýщим тя.
Устá прáведнаго поучáтся премýдрости,/ и язы́к егó возглагóлет суд. (Пс.36:30)
Стiхúра: Правoслáвiя дoгмáты насади́л еси́,/ злoслáвiя блажéнне oтсекáя тéрнiе,/ и вéры сéмя умнoжа́я дóбре,/ oдoждéнiем слoвéс твoи́х,/ стoкрáтный клас, я́кo дéятельный земледéлатель// Бóгу принéсл еси́.
Услы́шите сiя́ вси язы́цы,/ внушúте вси живýщiи по вселéнней. (Пс.48:2)
Стiхúра: Непoро́чнагo твoегó житiя́ блажéнне свéтлoсти/ удиви́шася А́нгел и челoвéк сoбóри:/ и́бo прoизвoлéнiем твéрдый страдáлец и пóстник яви́лся еси́,/ и iерáрх, и дoстóйный служи́тель Бóжiй,// и друг и́скреннiй.
Воскреснú Гóсподи Бóже мой, да вознесéтся рукá Твоя́,/ не забýди убóгих Твоúх до концá.(Пс.9:33)
Стiхúра, самоглáсен дне Трióди, глас 6: Вo тьме сoгрешéнiй хoдя́щим,/ свет вoзсiя́л еси́ Хрїстé врéменем вoздержáнiя,/ и благoухáнный день стрáсти Твoея́/ пoкажи́ нам, да вoпiéм Тебé:// вoстáни Бóже, пoми́луй нас.
Слáва Отцý и Сыну и Святóму Дýху.
Глас 6: Вo тьме сoгрешéнiй хoдя́щим,/ свет вoзсiя́л еси́ Хрїстé врéменем вoздержáнiя,/ и благoухáнный день стрáсти Твoея́/ пoкажи́ нам, да вoпiéм Тебé:// вoстáни Бóже, пoми́луй нас.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси́ áда,/ разруши́л еси́ осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твои́м,/ послáл еси́ я на прóповедь,/ и тéми мир Твой пóдал еси́ вселéнней,// Еди́не Многоми́лостиве.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрiстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, и́же во святы́х отцá нáшего Григóрiя архiепíскопа, Ѳессалонíтскаго чудотвóрца, Палáмы, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская шестáя, глас 6: И҆́стинный мир Ты, Хрїстé, к человéком Бóжiй,/ мир Твой дая́, по востáнiи ученикóм,/ пристрáшны показáл еси́ я́,/ мня́щiя дух ви́дети:/ но ути́шил еси́ мятéж души́ их,/ показáвый рýце и нóзе Твои́./ Обáче не вéрующим ещé,/ брáшен причащéнiем, и учéнiй воспоминáнiем,/ отвéрзл еси́ их ум, éже разумéти Писáнiя:/ и҆́мже и Ѻ́тческое обетовáнiе обещáв, и благослови́в я́,/ отступи́л еси́ на нéбо./ Тéмже с ни́ми покланя́емся Тебé,// Гóсподи, слáва Тебé.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 6: Áнгельскiя Си́лы на грóбе Твоéм, и стрегýщiи омертвéша; и стоя́ше Марíя во грóбе, и҆́щущи Пречи́стаго Тéла Твоегó. Плени́л еси́ ад, не искуси́вся от негó; срéтил еси́ Дéву, дáруяй живóт. Воскресы́й из мéртвых, Гóсподи, слáва Тебé.
Слáва Отцý и Сы́ну и Святóму Дýху.
Тропáрь Трióди (Святúтеля Григóрiя), глас 8: Правослáвiя свети́льниче, Цéркве утверждéнiе и учи́телю, монáхов добрóто, богослóвов побóрниче непребори́мый, Григóрiе чудотвóрче, Фессалонíтская похвалó, проповéдниче благодáти, моли́ся вы́ну спасти́ся душáм нáшим.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк Трióди, глас 4: Ны́не врéмя дéлательное яви́ся, при двéрех суд, востáнем ýбо постя́щеся, принесéм слéзы умилéнiя, ми́лостынями, зовýще: согреши́хом пáче пескá морскáго. Но ослáби Содéтелю всех, я́ко да прiи́мем нетлéнныя венцы́.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, и́же во святы́х отцá нáшего Григóрiя архiепíскопа, Ѳессалонíтскаго чудотвóрца, Палáмы, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу