Неделя вторая Великoго поста. Святителя Григория Паламы. Глас 6. ВСЕНОЩНОЕ БДЕНИЕ. УТРЕНЯ. КАНОН
12 мáрта 2023 гóда. Недéля вторáя Велúкaго постá. Святúтеля Григóрiя Палáмы. Глас 6. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
[НЕПОРОЧНЫ]Избрáннiи стiхи из псалмá 118: (глас 5 всегдá): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 6: Вóльною и животворя́щею Твоéю смéртiю, Хрїстé,/ вратá áдова сокруши́в, я́ко Бог,/ отвéрзл еси́ нам дрéвнiй рай, и воскрéс из мéртвых,// избáвил еси́ от тлéнiя живóт наш.
СТЕПЕННА, ГЛАС 6
1 АНТИФОН
Хор: На нéбо óчи моú возвожý, к Тебé, Слóве:// ущéдри мя, да живý Тебé. (Двáжды)
Поми́луй нас уничижéнных,// устроя́я благопотрéбныя Твоя́ сосýды, Слóве. (Двáжды)
Слáва Ѻтцý и Сы́ну и Святóму Дýху.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
И ны́не и прúсно и во вéки векóв. Амúнь.
Святóму Дýху, вся́кая всеспаси́тельная винá,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горé.
2 АНТИФОН
Áще не Госпóдь бы был в нас,/ никтóже от нас протúву возмóгл бы врáжiим брáнем одолéти:// побеждáющiи бо от зде вознóсятся. (Двáжды)
Зубы́ их да не я́та бýдет душá моя́ я́ко птенéц, Слóве:// увы́ мне, кáко и҆́мам от врагá избы́ти, грехолюби́в сый! (Двáжды)
Слáва Ѻтцý и Сы́ну и Святóму Дýху.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
3 АНТИФОН
Надéющiися на Гóспода врагóм стрáшни, и всем дúвни:// горé бо зрят. (Двáжды)
В беззакóнiя рук свои́х, прáведных жрéбiй,// помóщника Тя имéя Спáсе, не простирáет. (Двáжды)
Слáва Ѻтцý и Сы́ну и Святóму Дýху.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
И ны́не и прúсно и во вéки векóв. Амúнь.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
ПРОКИМЕН
Чтец: Прокíмен, глас шесты́й: Гóсподи, воздви́гни си́лу Твою́, и прiиди́ во éже спасти́ нас. (Пс.79:3Б)
Хор: Гóсподи, воздвúгни сúлу Твою́,/ и прiидú во éже спастú нас.
Чтец: Пасы́й Iзрáиля вонми́, наставля́яй я́ко овчá Ióсифа. (Пс.79:2А)
Хор: Гóсподи, воздвúгни сúлу Твою́,/ и прiидú во éже спастú нас.
Чтец: Гóсподи, воздви́гни си́лу Твою́.
Хор: И прiидú во éже спастú нас.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.114): Во врéмя óно, воскрéс Iисýс от мéртвых, ста посредé учени́к свои́х, и глагóла им: мир вам. Убоя́вшеся же и пристрáшни бы́вше, мня́ху дух ви́дети. И речé им: что смущéни естé? И почтó помышлéнiя вхóдят в сердцá вáша? Ви́дите рýце Моѝ и нóзе Моѝ, я́ко Сам Аз есмь: осяжи́те Мя и ви́дите: я́ко дух плóти и кóсти не и҆́мать, я́коже Менé ви́дите имýща. И сié рек, показá им рýце и нóзе. Ещé же не вéрующим им от рáдости и чудя́щимся, речé им: и҆́мате ли что снéдно зде? Онѝ же дáша Емý ры́бы печены́ часть и от пчел сот. И взем пред ни́ми ядé. Речé же им: сiя́ суть словесá, я́же глагóлах к вам ещé сый с вáми, я́ко подобáет скончáтися всем напи́санным в закóне Моисéове и прорóцех и псалмéх о Мне. Тогдá отвéрзе им ум разумéти Писáнiя. И речé им, я́ко тáко пи́сано есть, и тáко подобáше пострадáти Хрїстý, и воскрéснути от мéртвых в трéтiй день, и проповéдатися во и҆́мя Егó покая́нiю и отпущéнiю грехóв во всех язы́цех, начéнше от Iерусали́ма. Вы же естé свидéтелiе сим. И се Аз послю́ обетовáнiе Ѻтцá Моегó на вы: вы же седи́те во грáде Iерусали́мсте, дóндеже облечéтеся си́лою свы́ше. Извéд же их вон до Вифáнiи, и воздви́г рýце Своѝ, и благословѝ их. И҆ бысть егдá благословля́ше их, отступѝ от них, и возношáшеся на нéбо. И тíи поклони́шася Емý, и возврати́шася во Iерусали́м с рáдостiю вели́кою: и бя́ху вы́ну в цéркви, хвáляще и благословя́ще Бóга. Ами́нь.
[Русский синодальный перевод]Когда они говорили о сем, Сам Иисус стал посреди них и сказал им: мир вам. Они, смутившись и испугавшись, подумали, что видят духа. Но Он сказал им: что смущаетесь, и для чего такие мысли входят в сердца ваши? Посмотрите на руки Мои и на ноги Мои; это Я Сам; осяжите Меня и рассмотри́те; ибо дух плоти и костей не имеет, как видите у Меня. И, сказав это, показал им руки и ноги. Когда же они от радости еще не верили и дивились, Он сказал им: есть ли у вас здесь какая пища? Они подали Ему часть печеной рыбы и сотового меда. И, взяв, ел пред ними. И сказал им: вот то, о чем Я вам говорил, еще быв с вами, что надлежит исполниться всему, написанному о Мне в законе Моисеевом и в пророках и псалмах. Тогда отверз им ум к уразумению Писаний. И сказал им: так написано, и так надлежало пострадать Христу, и воскреснуть из мертвых в третий день, и проповедану быть во имя Его покаянию и прощению грехов во всех народах, начиная с Иерусалима. Вы же свидетели сему. И Я пошлю обетование Отца Моего на вас; вы же оставайтесь в городе Иерусалиме, доколе не облечетесь силою свыше. И вывел их вон из города до Вифании и, подняв руки Свои, благословил их. И, когда благословлял их, стал отдаляться от них и возноситься на небо. Они поклонились Ему и возвратились в Иерусалим с великою радостью. И пребывали всегда в храме, прославляя и благословляя Бога. Аминь.(Лк.24:36-53)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И҆ ны́не и прúсно и во вéки векóв. Амúнь.
Богорóдичен (Трióди): На спасéнiя стези́ настáви мя Богорóдице,/ стýдными бо окаля́х дýшу грехми́,/ и в лéности все житié моé ижди́х:/ но Твои́ми моли́твами/ избáви мя от вся́кiя нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегó,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 6
(совмещéнный с канóном Трióди о блудном сыне, глас 8 и канóном Трióди, свт. Григóрiя, глас 4)
ПЕСНЬ 1
Iрмóс: Я́ко по сýху пешешéствовав Iзрáиль,/ по бéздне стопáми,/ гони́теля фараóна/ ви́дя потопля́ема,// Бóгу побéдную песнь пои́м, вопiя́ше.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Распростéртыма длáньма на крестé,/ отéческаго испóлнил еси́ благоволéнiя, благíй Iисýсе, вся́ческая.// тéмже побéдную песнь Тебé вси пои́м.
Хор: Слáва, Гóсподи, Святóму Воскресéнiю Твоемý.
Чтец: Стрáхом к Тебé, я́ко рабы́ня, смерть/ повелéна приступи́ Влады́це животá,// тóю подаю́щему нам безконéчный живóт и воскресéнiе.
Хор: Пресвятáя Богорóдице, спасú нас.
Богорóдичен: Своегó прiéмши Содéтеля, я́ко Сам восхотé,/ от безсéменнаго Твоегó чрéва, пáче умá воплощáема, Чи́стая,// твáрей вои́стинну яви́лася еси́, Влады́чица.
Канон Триоди (о блудном сыне), глас 8
Хор: Помúлуй мя, Бóже, помúлуй мя.
Чтец: Воспрiéмше тéплыми слезáми, блýднаго глас,/ Тебé Отцý всех и Бóгу припáдаем, вопiю́ще:/ я́ко согреши́хом от Тебé удали́вшеся, и блудý рабóтавше,// прiими́ нáше покая́нiе.
Хор: Помúлуй мя, Бóже, помúлуй мя.
Чтец: Цáрское преоби́дев благорóдiе,/ éже даровáл еси́ мне, менé рáди Слóве, Человéк бы́вый:/ лю́те осуди́хся угоди́ти свинiя́м, грехóвным вкýсом,// но пощади́ мя Спáсе, милосéрдiем Твои́м.
Хор: Помúлуй мя, Бóже, помúлуй мя.
Чтец: На колéну пáдающа мя,/ я́коже пéрвее блýднаго Влады́ко Гóсподи,/ Ты притéк прiими́, и рукáма объéм,/ подáждь ми óбразы Твоегó спасéнiя,/ вмéсто наéмника Человеколю́бче,// пáки Твоегó сы́на сотворя́я.
Хор: Пресвятáя Богорóдице, спасú нас.
Богорóдичен: Богоявлéнiя Тобóю сподóбися Богорáдованная, человéческое естествó:/ еди́на бо ходáтаица Дéво, былá еси́ Бóгу и человéком./ Тем я́ко Бóжiю Тя Роди́тельницу вси достóйно слáвим.
Канон Триоди (свт. Григóрия), глас 4
Хор: Святúтелю óтче Григóрiе, молú Бóга о нас.
Чтец: Ри́торов божéственнiи, и богослóвов изря́днiи, и язы́цы боговещáннiи,/ прiиди́те сни́дитеся в соединéнiе,// воспéти по достоя́нiю духори́тора, божéственнаго Григóрiя. (двáжды)
Хор: Святúтелю óтче Григóрiе, молú Бóга о нас.
Чтец: Столп вéры, Цéркве побóрник,/ вели́кiй Григóрiй да восхвáлится мнóю,/ всеизря́дный пáстырь Фессалонíтскiй,// красотá чи́на iерáршескаго вои́стинну. (двáжды)
Слáва Ѻтцý и Сы́ну и Святóму Дýху.
Тропáрь: От младéнства возжелáл еси́ лýчшее житié,/ и совершéнное óтче от ю́ности возлюби́л еси́ мудровáнiе,/ и купнонрáвен, и единомýдрен показáлся еси́// тезоимéнствующаго тебé óтче Григóрiе.
И ны́не и прúсно и во вéки векóв, амúнь.
Богорóдичен: Бýди ми Всенепорóчная животá путь,/ наставля́ющiй мя к Божéственным селéнiем:/ прельсти́хся бо, и к прóпастем злóбы поползнýхся,// от ни́хже мя возведи́ ходáтайством Твои́м.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Несть свят,/ я́коже Ты, Гóсподи Бóже мой,/ вознесы́й рог вéрных Твои́х, Блáже,/ и утверди́вый нас на кáмени// исповéданiя Твоегó.
Хор: Слáва, Гóсподи, Святóму Воскресéнiю Твоемý.
Чтец: Бóга распинáема плóтiю зря́щи тварь, растаявáшеся стрáхом:// но содержи́тельною длáнiю нас рáди Распя́таго, крéпко держи́ма бе.
Хор: Слáва, Гóсподи, Святóму Воскресéнiю Твоемý.
Чтец: Смéртiю смерть разорéна лежи́т окая́нная без дыхáнiя:/ Животá бо не терпя́щи божéственнаго приражéнiя,// умерщвля́ется крéпкiй, и дáруется всем воскресéнiе.
Хор: Пресвятáя Богорóдице, спасú нас.
Богорóдичен: Божéственнаго рождествá Твоегó, Чи́стая,/ вся́кiй естествá чин превосхóдит чýдо:/ Бóга бо преестéственне зачалá еси́ во чрéве,// и рóждши пребывáеши при́сно Дéва.
Глас 8
Хор: Помúлуй мя, Бóже, помúлуй мя.
Чтец: Убоя́вся мои́х дел, и далéчнаго отшéствiя,/ и расточéннаго Твоегó богáтства,/ егóже ижди́х в блýдных стремлéнiих,/ в покая́нiи к Тебé зовý, Отцý и Бóгу моемý:// согреши́х, спаси́ мя.
Хор: Помúлуй мя, Бóже, помúлуй мя.
Чтец: На земли́ согрешáя, небесé убоя́хся:/ си́це бо ми бýдет суд тогдá препирáяй,/ егдá вся́ческая предстáнут Слóве,// прáведным судóм Твои́м суди́мая.
Хор: Помúлуй мя, Бóже, помúлуй мя.
Чтец: Мрáчная и сквéрная мя помышлéнiя питáху,/ егдá от Тебé Спáсе, далéче бых блýдный,/ ны́не же зовý Ти: согреши́х, согреши́х, спаси́// тéпле прибегáющаго милосéрдiю Твоемý.
Хор: Пресвятáя Богорóдице, спасú нас.
Чтец: Обожи́ся Дéво Адáмово смешéнiе:/ из чрéва бо Твоегó Бог плотонóсец яви́ся,/ И́мже воззвáни бы́хом от дрéвняго осуждéнiя,// солгáни надéждею дрéвле обожéнiя.
Глас 4
Хор: Святúтелю óтче Григóрiе, молú Бóга о нас.
Чтец: Струи́ Божéственных учéнiй твои́х сохраня́ющiи,/ вся́кiя кóзни злослáвных избегáем,/ и вся избивáем твои́ми свящéнными списáньми// полки́ сих Григóрiе. (двáжды)
Хор: Святúтелю óтче Григóрiе, молú Бóга о нас.
Чтец: Премýдрости бýiя злослáвных разруши́л еси́ блажéнне,/ премýдрость Бóжiю ипостáсную имéя в сéрдце твоéм,// éюже с шýмом порази́л еси́ гнилáя сих шатáнiя. (двáжды)
Слáва Ѻтцý и Сы́ну и Святóму Дýху.
Тропáрь: Умертви́в плóти тлéемыя вся́кое сладострáстiе премýдре,/ пóстнически оживи́л еси́ души́ твоея́ движéнiя,// и сiю́ Божéственный оргáн Богослóвiя показáл еси́.
И ны́не и прúсно и во вéки векóв, амúнь.
Богорóдичен: В рáзуме умá и произволéнiи,/ стýдное же и блýдное житié прилéжно возлюби́х,/ но любóвiю Божéственною мя свяжи́,// моли́твами Твои́ми, Дéво Богоневéстная.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (3 рáза)
Кондáк Трióди, глaс 4: Ны́не врéмя дéлательное яви́ся, при двéрех суд,/ востáнем ýбо постя́щеся,/ принесéм слéзы умилéнiя,/ ми́лостынями, зовýще:/ согреши́хом пáче пескá морскáго./ Но ослáби Содéтелю всех,// я́ко да прiи́мем нетлéнныя венцы́.
Седáлен Трióди, глaс 4: Прéлесть попали́л еси́ злослáвных премýдре,/ вéру изъясни́л еси́ правослáвных дóбре,/ и мiр просвети́л еси́./ Отонýдуже победонóсный победи́тель показáлся еси́,/ столп Цéркве, и́стинный iерáрх,/ моля́ся не престáй Хрїстý,// спасти́ся всем нам. (двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен Трióди, глас 4: Скóро прiими́ Влады́чице молéнiя нáша,/ и сiя́ принеси́ Сы́ну Твоемý и Бóгу,/ Госпожé Всенепорóчная:/ погаси́ обстоя́нiя злослáвных языковрéдных,/ укроти́ кóзни, и низложи́ дéрзость/ вооружáющихся безбóжных// Пречи́стая, на рабы́ Твоя́.
ПЕСНЬ 4
Iрмóс:Хрїстóс моя́ си́ла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чи́ста, о Гóсподе прáзднующи.
Хор: Слáва, Гóсподи, Святóму Воскресéнiю Твоемý.
Чтец: Дрéво процвелó есть, Хрїстé, и҆́стинныя жи́зни:/ крест бо водрузи́ся,/ и напоéн быв крóвiю и водóю от нетлéннаго Твоегó ребрá,// живóт нам прозябé.
Хор: Слáва, Гóсподи, Святóму Воскресéнiю Твоемý.
Чтец: Не ктомý змiй мне лóжне обожéнiе подлагáет:/ Хрїстóс бо богодéлатель человéческаго естествá,// ны́не невозбрáнно стезю́ животá мне отвéрзе.
Хор: Пресвятáя Богорóдице, спасú нас.
Богорóдичен: Я́ко вои́стинну неизвещáнна и непостижи́ма,/ я́же Твоегó боголéпнаго, Богорóдице, суть рождествá,// сýщим на земли́ и на небеси́, Приснодéво, тáинства.
Глас 8
Хор: Помúлуй мя, Бóже, помúлуй мя.
Чтец: Отметáтельное отéческих ми повелéнiй богáтство,/ éже ми даровáл еси́, в сладострáстiи ижди́в,/ бых Божéственных даровáнiй нищ окая́нный./ Тéмже кáющася со исповéданiем// не омерзи́ менé Влады́ко Гóсподи.
Хор: Помúлуй мя, Бóже, помúлуй мя.
Чтец: Боголéпно воспрiи́м нищетý менé,/ далéче Тебé дрéвле бы́вшаго,/ Собóю к Себé присвоя́еши,/ и освящáеши мя к весéлiю Человеколю́бче:/ тéло Твоé Божéственное Слóве,// воззвáнiе моé, весéлия творя́.
Хор: Помúлуй мя, Бóже, помúлуй мя.
Чтец: Да далéче слезáми непрестáнными,/ вéчныя мýки избáвимся,/ ю́же уготóва Бог лукáвым духовóм,/ я́ко блýдный, вопiéм: согреши́хом Ти Óтче,// но прiими́ вся прибегáющiя ны к Твоéй ми́лости.
Хор: Пресвятáя Богорóдице, спасú нас.
Чтец: Собезначáльное Отцý Слóво сый и Дýху,/ от Неискусомýжныя Дéвы раждáется кромé закóна:/ пребы́в ýбо éже бе, пребы́в же пáки éже от нас прiя́т./ Во двою́ бо естествý еди́н Сын есть,// во обою́ храня́ естéственное.
Глас 4
Хор: Святúтелю óтче Григóрiе, молú Бóга о нас.
Чтец: Отвéрз устá твоя́ óтче премýдре,/ Божéственную премýдрость проповéдал еси́,/ éйже поучáлся еси́ в сéрдце твоéм при́сно,// и Варлаáма сýетнаго несмы́сленна и безýмна показáл еси́. (двáжды)
Хор: Святúтелю óтче Григóрiе, молú Бóга о нас.
Чтец: Зашéл еси́ сладчáйшiй в зéмлю, сóлнце закóном естествá,/ возсiя́еши же ýтро со Хрїстóм сóлнце невечéрнее,// вся назирáя моли́твами твои́ми. (двáжды)
Слáва Ѻтцý и Сы́ну и Святóму Дýху.
Тропáрь: Яви́ благодáть тебé блажéнне Бóжiй,/ похвалý и утверждéнiе превéлiе правослáвных,/ и пáстыря благáго, и богослóва вторáго,// и стáда бóдраго храни́теля.
И ны́не и прúсно и во вéки векóв, амúнь.
Богорóдичен: Ушесá мне отвéрзи душéвныя Мáти Бóжiя,/ роди́вшая прéжде ушесá Отвéрзшаго глухóму,// и Божéственным внимáти словесéм, и исполня́ти сподóби.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Бóжiим свéтом Твои́м, Блáже,/ ýтренюющих Ти дýши любóвiю озари́, молю́ся,/ Тя вéдети, Слóве Бóжiй,/ и́стиннаго Бóга,// от мрáка грехóвнаго взывáюща.
Хор: Слáва, Гóсподи, Святóму Воскресéнiю Твоемý.
Чтец: Уступáют мне херувíми ны́не,/ и плáменное орýжiе, Влады́ко, плещи́ мне даéт,/ Тя ви́девше, Слóве Бóжiй, и҆́стиннаго Бóга,// разбóйнику путь сотвóршаго в рай.
Хор: Слáва, Гóсподи, Святóму Воскресéнiю Твоемý.
Чтец: Не ктомý бою́ся, éже в зéмлю, Влады́ко Хрїстé, возвращéнiя:/ Ты бо от земли́ мя возвéл еси́ забвéнна,/ благоутрóбiя рáди мнóгаго,// к высотé нетлéнiя воскресéнiем Твои́м.
Хор: Пресвятáя Богорóдице, спасú нас.
Богорóдичен: И҆́же Богорóдицу Тя от души́, Влады́чице мíра благáя,/ исповéдающих спаси́:/ Тебé бо предстáтельство непобори́мое и҆́мамы,// и҆́стинную Богороди́тельницу.
Глас 8
Хор: Помúлуй мя, Бóже, помúлуй мя.
Чтец: Богáтства и даровáнiй Божéственных лиши́хся,/ и в странý прiидóх благи́х живóтных глáдом тáя,/ но Ты мя Óтче я́ко Благíй,/ дрéвнiя слáвы и слáдости,// благосéрдiя рáди Твоегó, испóлни.
Хор: Помúлуй мя, Бóже, помúлуй мя.
Чтец: Пóмысл блýднаго, в блудé житié ижди́вша прiи́мше,/ Отцý ми́лостивому притецéм,/ несумнéнною вéрою, и сокрушéнiем сéрдца,// я́ко да согрешéнiй оставлéнiе прiи́мем.
Хор: Помúлуй мя, Бóже, помúлуй мя.
Чтец: Не косни́ душé моя́, в дáльней странé пребывáющи,/ но тецы́ вскóре, Бóгу и Отцý исповéдающися,/ да прiи́меши разрешéнiе,// и́хже зле содéлала еси́ житié изнури́вши.
Хор: Пресвятáя Богорóдице, спасú нас.
Чтец: Свéтлый Тя óблак, нося́й Сóлнце прáвды,/ в Тебé носи́мое, Пречи́стая Дéво вéмы,/ неразýмiя тьму íдольскую отгоня́ющее,// и рáзумом и́стинным просвещáющее.
Глас 4
Хор: Святúтелю óтче Григóрiе, молú Бóга о нас.
Чтец: Серпóм словéс твои́х, и свящéнными списáньми/ посéкл еси́ éреси тернови́дныя,/ и плéвел лóжная прозябéнiя,/ правослáвiя же благочести́вая положи́л еси́ сéмена,// священноначáльне Григóрiе. (двáжды)
Хор: Святúтелю óтче Григóрiе, молú Бóга о нас.
Чтец: Словесá твоя́ всемýдре, и честнáя списáнiя/ суть росá Небéсная,/ мед кáменный, хлеб áнгельскiй притекáющим,/ питié, брáшно, слáдость,// наслаждéнiе, Григóрiе, и истóчник живы́я воды́. (двáжды)
Слáва Ѻтцý и Сы́ну и Святóму Дýху.
Тропáрь: Óбщаго тя учи́теля познавáет земля́ и мóре,/ столп свящéнный правослáвiя,/ и оружеполóжницу Божéственных догмáт честнýю,/ премýдраго богослóва свящéннаго,// сожи́теля, сопричáстника, апóстолом единонрáвнаго.
И ны́не и прúсно и во вéки векóв, амúнь.
Богорóдичен: Струя́ми умилéнiя,/ сквéрны сéрдца моегó Непорóчная отмы́й Дéво,/ и покая́нiя óбразы мне дáруй,/ Твои́ми к щéдрому Бóгу свящéнными молéнiи,// Егóже неизречéнно родилá еси́.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Житéйское мóре,/ воздвизáемое зря напáстей бýрею,/ к ти́хому пристáнищу Твоемý притéк, вопiю́ Ти:/ возведи́ от тли живóт мой,// Многоми́лостиве.
Хор: Слáва, Гóсподи, Святóму Воскресéнiю Твоемý.
Чтец: Распинáемь, Влады́ко, гвоздьми́ ýбо,/ кля́тву ю́же на нас потреби́л еси́:/ копiéм же прободáемь в ребрó,// адáмово рукописáнiе растерзáв, мíр свободи́л еси́.
Хор: Слáва, Гóсподи, Святóму Воскресéнiю Твоемý.
Чтец: Адáм низведéся, лéстiю запя́т быв, ко áдове прóпасти:/ но и҆́же естествóм Бог же и ми́лостив,/ сшел еси́ на взыскáнiе,// и на рáму понéс, совоскреси́л еси́.
Хор: Пресвятáя Богорóдице, спасú нас.
Богорóдичен: Пречи́стая Влады́чице,/ рóждшая человéком кóрмчiю Гóспода,/ страстéй мои́х непостоя́нное и лю́тое утоли́ смущéнiе,// и тишинý подáждь сéрдцу моемý.
Глас 8
Хор: Помúлуй мя, Бóже, помúлуй мя.
Чтец: Юнéйший бых сын Твой,/ и богáтство Твоé зле ижди́х,/ удалéнiем злáго житiя́,/ и благи́х Твои́х лишáяся Человеколю́бче,/ прихождý Тебé Отцý и Бóгу моемý,// и прошý прощéнiя.
Хор: Помúлуй мя, Бóже, помúлуй мя.
Чтец: Стрáнничество безчеловéчное получи́х,/ и пасти́ свинiи́ осуждéн бых,/ я́ко моé расточи́х богáтство,/ éже ми́лостивно вскóре подáл еси́,/ и бых от всех наг,// но Ты я́ко Бог мой ущéдри.
Хор: Помúлуй мя, Бóже, помúлуй мя.
Чтец: Не и́мам дерзновéнiя Человеколю́бче, воззрéти и ви́дети,/ согреши́в на Нéбо, безмéрную высотý,/ ни нарещи́ся сын Твой, блýдный,// но ущéдри мя тýне, имéяй безмéрную ми́лость.
Хор: Пресвятáя Богорóдице, спасú нас.
Чтец: Несказáнное Твоé Рождествó,/ и неизречéнный рождествá Твоегó óбраз Деви́це,/ я́ко Бóга вы́ше умá раждáеши,/ дéвство несквéрное имýщи:// тем Тя вси и́стинную Богорóдицу достóйно слáвим.
Глас 4
Хор: Святúтелю óтче Григóрiе, молú Бóга о нас.
Чтец: Растерзáся сýетное шатáнiе,/ и язы́к Варлаáма безýмнаго,/ словесы́ и велéнiи, и рáзума остротóю// премýдраго царя́, и твоéю, Григóрiе. (двáжды)
Хор: Святúтелю óтче Григóрiе, молú Бóга о нас.
Чтец: Божéственную цевни́цу Дýха,/ трубý я́ве проповéдающую Божéственныя тáйны,// Фессалонíтскаго председáтеля, Богослóвскiй язы́к, пéсньми почти́м. (двáжды)
Слáва Ѻтцý и Сы́ну и Святóму Дýху.
Тропáрь: Лю́дем иногдá предводи́тель,/ я́ко столп óгненный, вéры враги́ попали́л еси́,/ вéрных же состоя́нiя просвети́л еси́,// богомýдре óтче Григóрiе.
И ны́не и прúсно и во вéки векóв, амúнь.
Богорóдичен: Бýди ми Всечи́стая Влады́чице,/ тишинá и пристáнище утешéнiя,/ преводя́щее к Божéственному пристáнищу невлáемому,// бýрю страстéй мои́х укроти́вши.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трижды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Кондáк Трióди (свт. Григóрiя), глас 8: Премýдрости свящéнный и Божéственный оргáн,/ богослóвiя свéтлую соглáсно трубý,/ воспевáем тя Григóрiе богоглагóльниче,/ но я́ко ум Умý пéрвому предстоя́й,/ к Немý ум наш óтче настáви, да зовéм:// рáдуйся проповéдниче благодáти.
Íкос: Áнгел яви́лся еси́ на земли́, неизречéнная Бóжiя человéком возвещáя./ Безплóтных бо глáсы, от человéческих сый, и плóтiю употребля́яся, удиви́л еси́ нас,/ и вопи́ти тебé богоглагóливе увещáл еси́ сiя́:/ рáдуйся, и́мже тьма сокры́ся; рáдуйся, и́мже свет взы́де./ Рáдуйся, несоздáннаго Божествá áнгеле;/ рáдуйся, создáннаго и бýяго вои́стинну обличи́телю./ Рáдуйся, высотý невосходи́мую, Божéственное естество́ рекíй;/ рáдуйся, глубинý неудóбь ви́димую, дéйство рекíй;/ рáдуйся, я́ко слáву Бóжiю дóбре рекл еси́;/ рáдуйся, я́ко мнéнiя злодéев отрéкл еси́./ Рáдуйся свети́льниче, показáвый Сóлнце;/ рáдуйся чáше, питiя́ Божéственнаго подáтельнице./ Рáдуйся, и́мже и́стина просiявáет;/ рáдуйся, и́мже помрачи́ся лжа.// Рáдуйся, проповéдниче благодáти.
ПЕСНЬ 7
Iрмóс: Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéнiе Бóжiе мучи́теля увещá вопи́ти:// благословéн еси́, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Рыдáющее во стрáсти Твоéй сóлнце, во мрак облечéся,/ и во дни по всей, Влады́ко, земли́ свет помéрче, вопiя́:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Облекóшася Хрїстé схождéнiем Твои́м во свет преиспóдняя,/ прáотец же весéлiя испóлнь, яви́ся ликовствýя, взыгрáся, вопiя́:// благословéн еси́, Бóже отéц нáших.
Хор: Пресвятáя Богорóдице, спасú нас.
Богорóдичен: Тобóю, Мáти Дéво,/ свет возсiя́ всей вселéнней свéтлый:/ Зижди́теля бо Ты всех родилá еси́ Бóга,/ Егóже проси́, Всечи́стая,// нам низпослáти вéрным вéлiю ми́лость.
Глас 8
Хор: Помúлуй мя, Бóже, помúлуй мя.
Чтец: Дерзновéнiя не и́мам,/ éже нарещи́ся сын Твой, Óтче Человеколю́бче,/ я́ко еди́наго от наéмник Твои́х бы́ти молю́ся,/ не гнушáйся менé зовýща:// отéц нáших Бóже благословéн еси́.
Хор: Помúлуй мя, Бóже, помúлуй мя.
Чтец: Оскверни́вше пéрвым житiéм жизнь,/ и погуби́вше благорóдiе пéрвое,/ притецéм Еди́ному Отцý и Бóгу нáшему,// покая́нiем тéплым прiя́ти спасéнiе.
Хор: Помúлуй мя, Бóже, помúлуй мя.
Чтец: Жéсток граждани́н, емýже рабóтати окая́нный осуди́хся:/ глад же, егóже подъя́х, свинiя́м угождáя, крéпок и нестерпи́мь,// но обрáщься прошý, Спáсе, поми́луй мя.
Хор: Пресвятáя Богорóдице, спасú нас.
Чтец: Умерщвлéнное естествó оживи́ла еси́,/ еди́на Живóт рóждшая Дéво Богорóдице:/ тéмже Тя спасéнiе вéрнiи свéмы,// отéц нáших Бóга плóтiю рóждшую.
Глас 4
Хор: Святúтелю óтче Григóрiе, молú Бóга о нас.
Чтец: Словесéм бесéдующiи, и списáнiем твои́м Григóрiе,/ рáзуму поучáются Бóжiю,/ и пóлны явля́ются премýдрости Бóжiя духóвныя,// и несоздáнную благодáть, и дéйство Бóжiе богослóвствуют. (двáжды)
Хор: Святúтелю óтче Григóрiе, молú Бóга о нас.
Чтец: Меч и стрéлы злослáвных сокруши́л еси́,/ и гóрдость Варлаáмову, и вся́кую си́лу ерети́ческую,/ я́ко ткáнiе паучи́ны расточи́л еси́,// áки кáмень превели́кiй iерáрше. (двáжды)
Слáва Отцý и Сыну и Святóму Дýху.
Тропáрь: Запечатлéся твои́ми словесы́ и догмáты вéра благочести́вых,/ и дéрзость éреси ста Григóрiе,// и низложéнiе правослáвiя престá, и крéпость злослáвных.
И ныне и прúсно и во вéки векóв, амúнь.
Богорóдичен: Струи́ Тя истóчника, усóхшiи страстéй болéзньми, вéдуще вои́стинну,/ почерпáем спасéнiе, и Божéственныя струи́, и взывáем:// благословéн Всечи́стая, плод Твоегó чрéва.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Из плáмене преподóбным рóсу источи́л еси́/ и прáведнаго жéртву водóю попали́л еси́:/ вся бо твори́ши, Хрїстé, тóкмо éже хотéти.// Тя превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iудéйскiя дрéвле пророкоубíйцы лю́ди,/ богоубíйцы зáвисть ны́не содéла,/ Тебé на крест вознéсшiя, Слóве Бóжiй:// Егóже превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Небéснаго крýга не остáвил еси́,/ и во ад сошéд, всегó совоздви́гл еси́/ лежáщаго во гнóищи, Хрїстé, человéка,// Тя превознося́ща во вся вéки.
Хор: Пресвятáя Богорóдице, спасú нас.
Богорóдичен: От Свéта Светодáвца Слóва зачалá еси́,/ и рóждши неизречéнно Сегó, прослáвилася еси́:/ Дух бо в Тя, Отрокови́це, Бóжiй всели́ся.// Тéмже Тя поéм во вся вéки.
Продолженiе здесь