Неделя 32 по Пятидесятнице, по Богоявлении, глас 7. ВСЕНОЩНОЕ БДЕНИЕ ВЕЛИКАЯ ВЕЧЕРНЯ. Свт. Филиппа
22 января́ 2023 г. Недéля 32 по Пятидеся́тнице, по Богоявлéнiи. Попрáзднство Богоявлéнiя. Святúтеля Фiлíппа, митрополíта Москóвского и всея́ Россíи, чудотвóрца. Глас 7. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáкже канóна и пéрваго чáса. Вся слýжба прáздника по Октóиху и Минéе.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Слáва Тебé, Бóже наш, слáва Тебé.
Царю́ Небéсный, Утéшителю, Дýше И҆́стины, И҆́же вездé сый и вся исполня́яй, Сокрóвище благи́х и жи́зни Подáтелю, прiиди́ и всели́ся в ны, и очи́сти ны от вся́кiя сквéрны, и спаси́, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Прїиди́те, поклони́мся Царéви нáшему Бóгу.
Прїиди́те, поклони́мся и припадéм Хрїстý, Царéви нáшему Бóгу.
Прїиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем лúбо кафíсму 1-ю (1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгó, и в закóне Егó поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своé, и лист eгó не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицá землѝ. Сегó рáди не воскрéснут нечести́вiи на суд, нижé грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрiстá Егó. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдá возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негó над Сióном, горóю святóю Егó, возвещáяй повелéнiе Госпóдне. Госпóдь речé ко Мне: Сын Мой еси Ты, Аз днесь роди́х Тя. Просѝ от Менé, и дам Ти язы́ки достоя́нiе Твоé, и одержáнiе Твоé концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдá прогнéвается Госпóдь и поги́бнете от путѝ прáведнаго, егдá возгори́тся вскóре я́рость Егó. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгó. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы́ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоé.
Лúбо поéм стiхú избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоé.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 7
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведù из темнúцы дýшу мою́,// исповéдатися и҆́мени Твоемý.
Стiхиры воскрéсные, глас 7: Пpiиди́те, возpáдуемся Гóсподеви,/ сокpуши́вшему смépти деpжáву,/ и пpосвети́вшему человéческий pод,/ со безплóтными зовýще:// Содéтелю и Спáсе наш, слáва Тебé.
Менé ждут прáведницы,// дóндеже воздáси мне.
Стiхúра: Кpест пpетеpпéл еси́ Спáсе,/ и погpебéнiе нас páди,/ смépтiю же я́ко Бог смеpть умеpтви́л еси́./ Тéмже покланя́емся тpиднéвному воскpесéнiю Твоемý:// Гóсподи, слáва Тебé.
На 8. Стiх: Из глубины́ воззвáх к Тебе, Гóсподи,// Гóсподи, услы́ши глас мой.
Стiхúра: Апóстоли ви́девше воскpесéнiе Содéтеля, чудя́хуся,/ пою́ще хвалý Áнгельскую:/ сiя́ слáва есть цеpкóвная,/ сié богáтство Цápствiя:/ постpадáвый нас páди, Гóсподи, слáва Тебé.
Да бýдут ýши Твоù// внéмлюще глáсу молéнiя моегó.
Стiхúры Попрáзднства, глас 8 (Іоáнна Дамаскúна): Го́споди,/ áще и Iоáнну предстáл еси́/ на Iордáне, я́ко Человéк,/ но не отступи́л еси́ от престо́ла,/ со Отцéм седя́й:/ и крéщся нас рáди,/ мiр свободи́л еси́/ от рабо́ты чуждáго,// я́ко Щедр и Человеколю́бец.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебé очищéнiе есть.
Стiхúра: Го́споди,/ áще и Iордáнскими водáми/ обложи́лся еси́, я́ко Человéк,/ но свидéтельствовался еси́/ свы́ше сни́тiем Духа,/ и глас Отéчь Сы́на Тя свидéтельствова:/ но яви́ся,/ и подáждь нетлéнiе// душáм нáшим.
И҆́мене рáди Твоегó потерпéх Тя, Гóсподи, потерпé душá моя́ в слóво Твоé,// уповá душá моя на Гóспода.
Стiхúра: Го́споди,/ Ты от Отцá прéжде веко́в/ рождéйся непремéнный,/ пришéл еси́ в послéдняя лéта,/ и зрак рабá прiя́л еси́,/ и о́браз Твой/ я́ко Зижди́тель обнови́л еси́:/ крести́вся бо даровáл еси́ нетлéнiе// душáм нáшим.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры свт Фiлíппа, глас 5: Рáдуйся, свящéнная главо́,/ чи́стый сосу́де Святáго Духа,/ святи́телю Фiли́ппе,/ Богодухновéнный оргáне,/ благочéстiя пучи́но неисчерпáемая,/ церко́вное украшéнiе,/ грáда Москвы́ вели́кое удобрéнiе,/ Росси́йское утверждéнiе,/ оби́димых засту́пниче: апо́столов ревни́телю,/ нрáвы подо́бниче Златоу́стому,/ му́жественно положи́л еси́ ду́шу твою́ за пáству твою́,/ Хрiстá и́стиннаго Архiпáстыря подражáя./ Его́же моли́, даровáти душáм нáшим// мир и вéлiю ми́лость.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Рáдуйся, златозáрная устá,/ Богопéснивая лáстовице преподо́бне,/ сто́лпе правослáвiя непоколеби́мый/ и грáда нáшего стенá необори́мая,/ прибéжище скорбя́щих,/ обуревáемых пристáнище ти́хое,/ всех притекáющих к тебé защи́тниче от бед и скорбéй/ и подущáтелю к рéвности пéнiй Боголéпных: му́чеником и исповéдником подо́бниче,/ равностоя́телю святы́х А́нгел,/ апо́столов единонрáвне./ Хрiстá непрестáнно моли́, даровáти душáм нáшим// мир и вéлiю ми́лость.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра: Рáдуйся, свящéнная главо́,/ святи́телю Фiли́ппе,/ я́ко многосвéтлое со́лнце озаря́еши всю́ду учéнiи твои́ми/ и упáсл еси́ стáдо твоé на пáжитех духо́вных,/ незы́блен, я́ко на кáмени основáн твéрдем./ Тéмже и му́жеством твои́м царя́ удиви́л еси́,/ я́рость его́ на кро́тость преложи́ти моля́, ку́пно и претя́,/ за éже непрáведно престо́ла и пáствы тя лиши́в он,/ послá Твери́ грáда в монасты́рь, нарицáемый О́трочь,/ идéже непрáведно смерть прiя́л еси́,/ моля́ся о убивáющих тя, и глаго́ля:/ Го́споди, не постáви им в грех сего́./ Тéмже от Хрiстá Бо́га венéц тебé даровáся, блажéнне,/ Его́же моли́ даровáти душáм нáшим// мир и вéлiю ми́лость.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Рáдуйся, по́стнических подвиго́в носи́вый лéгкiй ярéм,/ Тро́ицы чи́стый до́ме,/ благово́нный сосу́де, церко́вное утверждéнiе,/ апо́столов сопресто́льниче, святи́телем удобрéнiе,/ слáва му́чеников,/ и преподо́бных украшéнiе,/ прáвило добродéтелей извéстное,/ смирéнiя свéтлая высото́,/ оби́димых засту́пниче, ни́щих питáтелю./ Хрiстá низпослáти, блажéнне, моли́, даровáти душáм нáшим// мир и вéлiю ми́лость.
Слáва Отцý и Сыну и Святóму Дýху.
Глас 8: Рáдуйся и весели́ся, слáвнейшiй грáде Москвá,/ свéтло торжеству́й Хрiсто́ве Цéркви совоку́пльшися,/ лику́й Богосо́бранная пáство:/ днесь созывáет нас архiпáстыря всеми́рное торжество́./ Прiиди́те у́бо свéтло прáзднуем в пáмять его́ глаго́люще:/ рáдуйся, святи́телю Богому́дре,/ и́же я́ко бронéю му́жеством духо́вным вооружи́л еси́ себé/ и не послу́шающiя тя обличи́л еси́ необиновéнно/ дáнною тебé от Еди́наго Бо́га влáстiю./ Рáдуйся, скорбя́щим душéю Божéственное утешéнiе,/ и оби́димым защи́тниче,/ и всем вéрным благоути́шное пристáнище./ Тéмже обстоя́ще всечестну́ю твою́ рáку,/ любéзно облобызáем, святи́телю Фiли́ппе,/ тобо́ю про́сим получи́ти Божéственнаго человеколю́бiя,/ и твои́ми моли́твами ми́ру мир даровáти,// и душáм нáшим вéлiю ми́лость.
И ныне и прúсно и во вéки векóв, амúнь.
Догмáтик. Глас 7: Мáти ýбо познáлася еси́,/ пáче естествá, Богоpóдице,/ пpебылá же еси́ Дéва,/ пáче слóва и páзума:/ и чудесé Рождествá Твоегó сказáти язы́к не мóжет./ Пpеслáвну бо сýщу зачáтiю Чи́стая,/ непости́жен есть óбpаз pождéнiя:/ идéже бо хóщет Бог, побеждáется естествá чин./ Тéмже Тя вси, Мáтеpь Бóжiю вéдуще,/ мóлим Ти ся пpилéжно,// моли́ спасти́ся душáм нáшим.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святaго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утверди́ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
ПАРЕМИИ
Чтец: При́тчей чтéнiе.
(Из глав 10, 3 и 8) Пáмять прáведнаго с похвалáми, и благословéнiе Госпóдне на главé егó. Блажéн человéк, и́же обрéте премýдрость, и смéртен, и́же увéде рáзум. Лýчше бо сiю́ куповáти, нéжели злáта и сребрá сокрóвища. Честнéйшая же есть кáменiй многоцéнных, все же честнóе недостóйно ея́ есть. Долготá бо дней и лéта животá в десни́це ея́, в шýйце же ея́ богáтство и слáва. От уст ея́ исхóдит прáвда, закóн же и ми́лость на язы́це нóсит. Послýшайте ýбо менé, о чáда, честнáя бо рекý, и блажéн человéк, и́же пути моя́ сохрани́т. Исхóди бо мои́ - исхóди животá, и уготовля́ется хотéнiе от Гóспода. Сегó рáди молю́ вас и предлагáю мой глас сыновóм человéческим: я́ко аз, премýдрость, устрóих совéт, и рáзум и смысл аз призвáх. Мой совéт и утверждéнiе, мой рáзум, моя́ же крéпость. Аз менé лю́бящiя люблю́, и́щущiи же менé обря́щут благодáть. Разумéйте ýбо, незлóбивiи, ковáрство, ненакáзаннiи же, прилагáйте сердцá. Послýшайте менé и пáки, честнáя бо рекý, и отвéрзу от устéн прáвая, я́ко и́стине поучи́тся гортáнь мой, мéрзки же предо мнóю устны́ лжи́выя. С прáвдою вси глагóлы уст мои́х, ничтóже в них стрóпотно, нижé развращéнно. Вся прáва суть разумевáющим и прóста обретáющим рáзум. Научáю бо вас и́стине, да бýдет о Гóсподе надéжда вáша, и испóлнитеся Дýха.
[Русский синодальный перевод]Память праведника пребудет благословенна, и благословения - на голове его. Блажен человек, который снискал мудрость, и человек, который приобрел разум, - потому что приобретение её лучше приобретения серебра, и прибыли от неё больше, нежели от золота: она дороже драгоценных камней, и ничто из желаемого тобою не сравнится с нею. Долгоденствие - в правой руке её, а в левой у неё - богатство и слава; из уст её выходит правда; закон и милость она на языке носит. Слушайте меня, дети, потому что я буду говорить важное: Блажен человек, который слушает меня, потому что, кто нашел меня, тот нашел жизнь, и получит благодать от Господа. К вам, люди, взываю я, и к сынам человеческим голос мой! Я, премудрость, обитаю с разумом и ищу рассудительного знания. У меня совет и правда; я разум, у меня сила. Любящих меня я люблю, и ищущие меня найдут меня. Научитесь, неразумные, благоразумию, и глупые - разуму. Слушайте, потому что я буду говорить важное, и изречение уст моих - правда; ибо истину произнесет язык мой, и нечестие - мерзость для уст моих; все слова уст моих справедливы; нет в них коварства и лукавства; все они ясны для разумного и справедливы для приобретших знание. Ибо я учу вас истинному, чтобы была в Господе надежда ваша, и вы исполнились Духа.(10:7А, 5 А; 3:13-16; 8:6, 34А, 35, 4, 12, 14, 17, 5-9)
Чтец: Премýдрости Соломóни чтéнiе.
(Из глав 4 и 5): Прáведник, áще пости́гнет скончáтися, в покóи бýдет. Осýдит же прáведник умирáяй живýщiя нечести́выя. У́зрят бо кончи́ну прáведнаго и не разумéют, что совещáша о нем, я́ко повéржет Госпóдь нечести́выя безглáсны ниц и поколéблет их от основáнiй, и до послéдняго исчéзнут в болéзни, и пáмять их поги́бнет. Прiи́дут бо в помышлéнiе согрешéнiй свои́х ужáсни, и обличи́т их сопроти́в беззакóнiя их. Тогдá стáнет в дерзновéнiи мнóзе прaведник пред лицéм оскорби́вших егó и отметáющих труды́ егó. Ви́девше же егó, смятýтся стрáхом мнóгим и ужáснутся о преслáвнем спасéнiи егó. Рекýт бо в себé, кáющеся, и в теснотé дýха воздóхнут и рекýт: сей бе, егóже имéхом нéкогда в посмéх и в при́тчу поношéнiя, безýмнiи, житié егó вмени́хом неи́стово и кончи́ну егó безчéстну. Кáко вмени́ся в сынéх Бóжiих, и во святы́х жрéбiй егó есть? У́бо заблуди́хом от пути́ и҆́стиннаго, и прáвды свет не облистá нам, и сóлнце не возсiя́ нам. Беззакóнных испóлнихомся стезь и поги́бели, и ходи́хом стези́ непрохóдны, пути́ же Госпóдня не разумéхом.
[Русский синодальный перевод]Праведник, если и рановременно умрёт, будет в покое. Умирая же, он осудит живых нечестивых; ибо они увидят кончину мудрого и не поймут, что Господь определил о нём. Ибо Он повергнет их ниц безгласными и сдвинет их с оснований, и они вконец запустеют и будут в скорби, и память их погибнет; в сознании грехов своих они предстанут со страхом, и беззакония их осудят их в лицо их. Тогда праведник с великим дерзновением станет пред лицом тех, которые оскорбляли его и презирали подвиги его; они же, увидев, смутятся великим страхом и изумятся неожиданности спасения его и, раскаиваясь и воздыхая от стеснения духа, будут говорить сами в себе: "это тот самый, который был у нас некогда в посмеянии и притчею поругания. Безумные, мы почитали жизнь его сумасшествием и кончину его бесчестною! Как же он причислен к сынам Божиим, и жребий его - со святыми? Итак, мы заблудились от пути истины, и свет правды не светил нам, и солнце не озаряло нас. Мы преисполнились делами беззакония и погибели и ходили по непроходимым пустыням, а пути Господня не познали".(Прем 4:7, 16А, 17, 19-20; 5:1-7)
Чтец: Премýдрости Соломóни чтéнiе.
(Из глав 10,6,8 и 9): Устá прáведнаго кáплют премýдрость, устнé же мужéй мýдрых вéдят благодáть. Устá мýдрых поучáтся премýдрости, прáвда же избавля́ет их от смéрти. Скончáвшуся мýжу прáведну, не поги́бнет надéжда. Сын бо прáведен раждáется в живóт и во благи́х свои́х плод прáвды обы́мет. Свет прáведным всегдá, и от Гóспода обря́щут благодáть и слáву. Язы́к мýдрых дóбрая свесть, и в сéрдце их почи́ет мýдрость. Лю́бит Госпóдь преподóбная сердцá, прiя́тни же Емý вси, непорóчнiи в пути́. Мýдрость Госпóдня просвещáет лицé разýмнаго. Постигáет бо желáющiя ю́, прéжде дáже разумéти ю́, и удóбь ýзрится от лю́бящих ю́. У́треневавый к ней не утруди́тся, и бдяй ея́ рáди вскóре без печáли бýдет. Я́ко достóйных ея́ самá обхóдит и́щущи, и во стезя́х ея́ явля́ется им благопрiéмне. Мýдрости никогдáже одолéет злóба. Сих рáди и рачи́тель бых добрóты ея́, и возлюби́х ю́, и поискáх от ю́ности моея́. И взыскáх невéсту привести́ себé, я́ко всех Влады́ка возлюби́ ю́. Таи́нница бо есть Бóжiя хи́трости и обретáтельница дел Егó. Труды́ ея́, суть добродéтели, целомýдрiю же и рáзуму та учи́т, прáвде и мýжеству, и́хже потрéбнее ничтóже есть в житiи́ человéком. А́ще же и многоискýсства желáет кто, весть дрéвняя, и бы́ти хотя́щая разсмóтрит. Свесть изви́тiя словéс и разрешéнiя гадáнiй, знáменiя и чудесá проразумéет и сбытiя́ времéн и лет, и всем совéтник есть благ, я́ко безсмéртiе есть в ней и благослáвiе во общéнiи словéс ея́. Сегó рáди бесéдовах ко Гóсподу, и помоли́хся Емý, и рех от всегó сéрдца моегó: Бóже отцéв и Гóсподи ми́лости, сотвори́вый вся слóвом Твои́м, и мýдростiю Твоéю устрóивый человéка, да владéет бы́вшими от Тебé тварьми́ и да управля́ет мир в преподóбiи и прáвде. Даждь ми Твои́х престóлов приседя́щую премýдрость и не отлучи́ менé от óтрок Твои́х, я́ко аз раб Твой и сын рабы́ни Твоея́. Посли́ ю́ с Небéс, от святáго жили́ща Твоегó и от Престóла слáвы Твоея́, да, сýщи со мнóю, научи́т мя, что благоугóдно есть пред Тобóю. И настáвит мя в рáзум, и сохрани́т мя в слáве своéй. Помышлéнiя бо смéртных вся боязли́ва и погреши́тельна умышлéнiя их.
[Русский синодальный перевод]Уста праведника источают мудрость, а губы мужей мудрых знают благодать. Уста мудрых обучаются премудрости, правда же избавляет их от смерти. По кончине мужа праведного не гибнет надежда: ибо сын праведный рождается для жизни, и во благах своих плод правды соберет. Свет праведным - всегда, и от Господа они обретут благодать и славу. Язык мудрых доброе знает, и в сердце их почивает мудрость. Любит Господь благоговейные сердца, и приятны Ему все непорочные в пути. Мудрость Господня просветит лицо разумного: ведь Она опережает жаждущих её, прежде, чем те уразумеют ее и легко созерцается любящими её. С рассвета ищущий её не утомится, и бодрствующий ради неё вскоре беззаботен будет. Ибо она сама ходит кругом, ища её достойных, и на путях своих показывается им благосклонно. Мудрости никогда не одолеет злоба. Потому я и стал ревнителем красоты её, и возлюбил ее, и взыскал с юности моей. И постарался привести её в невесту себе, ибо всех Владыка возлюбил её. Ведь она - вводит в тайны ведения Божия и избирает дела Его. Труды ее - добродетели, целомудрию и разуму она учит, правде и мужеству, полезнее которых ничего нет в жизни для людей. Если же кто и большого опыта желает, то ей известно древнее, и что должно произойти. Знает она повороты слов и разрешение загадок, предугадывает знамения и чудеса и исходы событий и времен, и для всех - советник благой. Ибо бессмертие пребывает в ней, и слава в общении слов ее. Потому я обратился к Господу, и помолился Ему, и сказал Ему от всего сердца моего: "Боже отцов и Господи милости, сотворивший всё словом Твоим и мудростью Твоею устроивший человека, чтобы он властвовал над созданными Тобой творениями и управлял миром в святости и правде! Дай мне у Твоих престолов сидящую Премудрость и не отвергни меня из числа отроков Твоих: ибо я раб Твой и сын рабы Твоей. Пошли её с небес, от святого жилища Твоего и от престола славы Твоей, чтобы она пребывая со мною научила меня, что благоугодно пред Тобою, и руководила мной в познании, и сохранила меня в славе своей: ибо все помышления смертных боязливы, и нетверды намерения их".(Премсол.10,6,8 и 9)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Попрáзднства, глас 6: Предстáл еси́ на водáх всем, Непостижи́мый,/ Предте́чи преклони́л еси́ главу́./ Мир освяти́в, рабóты избáвил еси́// Креще́нiем Твои́м, Безгре́шне.
Сы́на возлю́бленна Оте́ц от Вы́шних дре́вле/ и Дух свиде́тельствова, Христе́, И́мже Трóйческое тáинство познáся,// во Iордáне кре́щшуся Тебе́.
Освяти́л еси́ вóды, Спáсе, Iордáнскiя вся/ и естествó воднóе, я́ко Бог./ Те́мже и слáвит явле́нiе Твое́// род челове́ческiй и воспевáет.
Стiхúры святúтеля, глас 1: Ле́потно оте́чества твоегó не остáвил еси́, óтче Фiли́ппе,/ но возврати́лся еси́ в град Москвý,/ в не́мже, Дýхом Святы́м освяти́вся,/ был еси́ архiере́й/ и пасл еси́ пáству твою́ многотрýдно,/ за ю́же мнóгая озлобле́нiя,/ и безче́ствованiя, и изгнáнiе претерпе́л еси́,/ и пострадáл еси́ ея́ рáди дáже до сме́рти,/ и ко Хрiстý пресели́лся еси́, рáдуяся./ Ныне же паки Це́рковь, ви́девши тя в себе́,/ возвесели́ся в возвраще́нiи твое́м,/ я́ко бо дар многоце́нен, прiе́мши остáнки твоя́,/ зове́т Влады́це:/ моли́твами, Хрiсте́, архiере́я Твоегó,/ дáруй лю́дем Твои́м прегреше́нiй проще́нiе// и ве́лiю ми́лость.
Глас 2: А́нгел земны́й, Небе́сный челове́к,/ рачи́тель Боже́ственныя слáвы,/ земны́х же презирáтель яви́лся еси́,/ стрáсти покори́в и плоть порабóтив ду́ху./ Апóстолов сострадáльче, страстоте́рпцев единонрáвне,/ благоре́вностно, Фiли́ппе, Хрiсто́в закóн исполня́я,/ ду́шу твою́ за лю́ди положи́л еси́./ И ны́не предстоя́ Хрiстóву престóлу,// моли́ся о нас, чáдех твои́х.
Столп непоколеби́м Хрiстóвы Це́ркве, óтче, был еси́,/ Боже́ственною бо ре́вностiю разже́гся,/ дерзнове́нно непрáведное начинáнiе прáведно разоря́еши,/ царя́ же и лю́ди научáеши/ апóстольским и оте́ческим предáнiем после́довати,/ и от разделе́нiя цáрства/ и злáго начинáнiя престáти повелевáеши,/ и преще́ньми по влáсти, от Бóга дáнней тебе́, мýжественне запрещáеши,/ непокаря́ющiя же ся твоемý прáвому уче́нiю,/ судý Бóжiю предае́ши./ Тогó рáди я́ко и́стинный пáстырь/ положи́л еси́ дýшу твою́ за пáству твою́,/ подражáтелю и́стиннаго Пáстыря, Хрiстá./ И ны́не, архiере́е Фiли́ппе,/ моли́ спасти́ся всем,// любóвiю чтýщим свяще́нную пáмять твою́.
Слáва Отцý и Сыну и Святóму Дýху.
Глас 4: Подобáет грáду Москве́/ Фiли́ппа везде́ име́ти архiере́я,/ я́ко не́кую ýтварь цáрскую/ и сокрóвище некрáдомо,/ всем подаю́ща богáтство спаси́тельное испове́данiя/ и вся собирáюща к соедине́нiю пе́сней Боголе́пных./ К Немýже возопiи́м:/ святи́телю и испове́дниче,// моли́ Хрiстá Бóга о душáх нáших.
И ныне и прúсно и во вéки векóв, амúнь.
Стiхúра Попрáзднства, глас 6: Я́ко вредя́щих земны́х отве́дшеся,/ прiиди́те мы́сленно, очи́стим чувства,/ и Хрiстá видевше,/ плóтiю крещáема от Iоáнна Предте́чи,/ вси с ним песнослóвяще ве́рно возопiе́м:// благослове́н, явле́йся Бóже наш, слáва Тебе́.
Гóсподи, поми́луй. (40 раз)
Слáва Отцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 7): Воскpéсл еси́ из гpóба Спáсе мípа,/ и совоздви́гл еси́ человéки с плóтiю Твоéю:// Гóсподи, слáва Тебé.
Стих: Госпóдь воцарúся, в лéпоту облечéся.
И҆́ны по алфавúту, глас 7: Воскpéсшему из мépтвых, и пpосвети́вшему вся,/ пpiиди́те поклони́мся:/ от áдова бо мучи́тельства нас свободи́л есть,/ Свои́м тpиднéвным Воскpесéнiем живóт нам даpовавый,// и вéлiю ми́лость.
Стих: И҆́бо утвердú вселéнную, я́же не подвúжется.
Во ад сошéд Хpiстé, смеpть плени́л еси́,/ и тpиднéвен воскpéс, нас совоскpеси́л еси́,/ слáвящих Твоé всеси́льное востáнiе,// Гóсподи Человеколю́бче.
Стих: Дóму Твоемý подобáет святы́ня, Гóсподи, в долготý днiй.
Стpáшен яви́лся еси́ Гóсподи, во гpóбе лежá я́ко спя,/ воскpéс же тpиднéвен я́ко си́лен,/ Адáма совоскpеси́л еси́ зовýща:/ слáва Воскpесéнiю Твоемý,// Еди́не Человеколю́бче.
Слáва Отцý и Сыну и Святóму Дýху.
Стiхúра святúтеля, глас 6: Я́ко светоза́рная звезда́,/ во гра́де на́шем Москве́ возсия́л еси́ уче́ньми слове́с твои́х,/ всеблаже́нне Фiли́ппе приснопа́мятне./ Ты бо премýдрый пропове́датель показа́лся еси́/ и прее́мник благоче́стiя яви́лся еси́,/ царя́ и лю́ди твоя́, пасо́мыя тобо́ю,/ утвержда́я и́стинным уче́нiем Хрiсто́вым/ е́же в любви́ и соедине́нiи неразде́льнем пребыва́ти./ По преставле́нии же твое́м чи́стое и нетле́нное те́ло твое́/ в честне́й и многословýщей оби́тели,/ в не́йже духо́вно породи́лся еси́,/ я́ко у́тварь многоце́нну, пре́дал еси́./ Оттýду же по мно́гих ле́тех в сто́льный град возврати́вшася ублажа́ем тя со псалмы́ и пе́сньми// и святýю и всечестнýю пра́зднуем па́мять твою́.
И ны́не и прúсно и во вéки векóв, амúнь.
Стiхúра Попрáзднства, глас 4: Одева́яйся све́том, я́ко ри́зою,/ нас ра́ди по нам бы́ти сподóбился есть,/ во струи́ одева́ется днесь Iорда́нскiя,/ не Сам сiя́ ко очище́нiю тре́буя,/ но нам Собóю устроя́яй порожде́нiе. О, чудесе́!/ Без огня́ изваря́ет,/ и назида́ет без сокруше́нiя,/ и спаса́ет в Негó просвеща́емыя// Хрiстóс Бог и Спас душ на́ших.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сы́не Бóжїй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегó,// яко Спáса родилá есѝ душ нáших. (Двáжды)
Тропáрь Богоявлéнiя, глас 1: Во Ioрдáне крещáющуся Тебé, Гóсподи,/ Трóйческое яви́ся поклонéнiе:/ Роди́телев бо глас свидéтельствоваше Тебé,/ возлю́бленнаго Тя Сы́на именýя,/ и Дух в ви́де голуби́не/ извéствоваше словесé утверждéнiе./ Явлéйся Хрїстé Бóже// и мiр просвещéй, слáва Тебé.
Бýди и҆́мя Госпóдне благословéно от ны́не и до вéка. (3 раза)
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.
И чти утреню