Неделя 32 по Пятидесятнице, по Богоявлении, глас 7. ВСЕНОЩНОЕ БДЕНИЕ. УТРЕНЯ.КАНОН. Свт. Филиппа
22 января́ 2023 г. Недéля 32 по Пятидеся́тнице, по Богоявлéнiи. Попрáзднство Богоявлéнiя. Святúтеля Фiлíппа, митрополíта Москóвского и всея́ Россíи, чудотвóрца. Глас 7. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
начало здесь ( великая вечéрня) и здесь ( утреня)
ПСАЛОМ ИЗБРАННЫЙ
Услы́шите сiя́ вси язы́цы, внуши́те вси́, живýщiи по вселéнней. Устá моя́ возглагóлют премýдрость, и поучéнiе сéрдца моегó рáзум./ Прiиди́те, чáда, послýшайте менé, стрáху Госпóдню научý вас./ Благовести́х прáвду в цéркви вели́цей./ И҆́стину Твою́ и спасéнiе Твоé рех./ Повéм И҆́мя Твоé брáтiи моéй, посредé цéркве воспою́ Тя./ Услы́шати ми глас хвалы́ Твоея́ и повéдати вся чудесá Твоя́./ Гóсподи, возлюби́х благолéпiе дóму Твоегó, и мéсто селéнiя слáвы Твоея́./ Возненави́дех цéрковь лукáвнующих, и с нечести́выми не ся́ду./ Я́ко сохрани́х пути́ Госпóдни и не нечéствовах от Бóга моегó./ Устá прáведнаго поучáтся премýдрости, и язы́к егó возглагóлет суд./ Прáвда Егó пребывáет в век вéка./ Свящéнницы Твои́ облекýтся прáвдою, и преподóбнiи Твои́ возрáдуются.// Блажéни живýщiи в домý Твоéм, в вéки векóв восхвáлят Тя.
(При пении избранного псалма в воскресные дни заключительное «Слава, и ныне» и «Аллилуия» не поется. Сразу после последнего стиха избранного псалма - величание и тропари воскресные «Ангельский собор...»)
Хор: Величáем Тя,/ святúтелю óтче Фiлíппе,/ и чтим святýю пáмять твою́,/ ты бо мóлиши о нас // Хрїстá Бóга нáшего.
ТРОПАРИ ВОСКРЕСНЫЕ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 7: И҆́же наш зрак воспрiéмый,/ и претерпéвый Крест плóтски,/ спаси́ мя воскресéнiем Твои́м Хрiстé Бóже,// я́ко Человеколю́бец.
СЕДАЛЬНЫ ПО ПОЛИЕЛЕИ
Глас 1 (по 1‑м стiхослóвiи): Апóстоле Хрiстóв, и самови́дче,/ и мýчениче, Фiлíппе премýдре,/ дрýже Бóжiй блажéнне,/ и́же вéрою прáзднующiя честнýю твою́ пáмять/ свободи́ от обдержáщих прегрешéнiй моли́твами твои́ми// и Небéсное наслéдiе получи́ти сподóби.
Глас 5 (по 2‑м стiхослóвiи): Учени́к Словесé, и́стины проповéдник,/ я́ко стрелá, пóслан был еси́, просвещáя сýщiя во тьме лю́тей, свя́те апóстоле,/ и безбóжiя мглу отгоня́ от земли́,// и вся благовéрующiя сы́ны дне показáл еси́, Хрiстóв ви́дче, свя́те Фiлíппе.
Слáва Отцý и Сыну и Святóму Дýху.
Седáлен свт. Фiлíппа по полiелéе, глас 8: Пропове́дует, о́тче, тебе́ ны́не Росси́йская митропо́лия,/ ю́же от боле́зней и скорбе́й избавля́еши, Богоблаже́нне Фили́ппе,/ А́нгелов собесе́дник яви́вся./ Те́мже со апо́столы и му́ченики лику́я,/ помо́щник быва́еши в ско́рбех, всеизря́дне, пла́чущих утеше́ние,/ па́стырь и наста́вник заблу́ждших, Фили́ппе блаже́нне,/ и нас твои́ми моли́твами изба́ви от бед/ и моли́ся Христу́ Бо́гу, да оставле́ние пода́ст// ве́рою и любо́вию чту́щим святу́ю па́мять твою́.
И ныне и прúсно и во вéки векóв. Амúнь.
Седáлен Попрáзднства по 1‑м стiхослóвiи, глас 4: Щедро́тами Твои́ми, Бо́же, умоле́н,/ заблу́ждшее и поги́бшее взыска́л еси́, за милосе́рдие ми́лости Твоея́, Человеколю́бче./ Темже прише́л еси́ на Иорда́н,/ сказа́в та́инство Святыя Тро́ицы./ И воспева́юще зове́м ве́рно:/ прише́л еси́, и яви́лся еси́, Свет Непристу́пный.
СТЕПЕННА, ГЛАС 7
1 АНТИФОН
Хор: Плен Сióнь от лéсти обрати́в,/ и менé Спáсе, оживи́,// изимáя рабóтныя стрáсти. (Двáжды)
В юг сéяй скóрби пóстныя со слéзами,// сей рáдостныя пóжнет рукоя́ти присноживопитáнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
И ны́не и прúсно и во вéки векóв. Амúнь.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
2 АНТИФОН
Áще не Госпóдь сози́ждет дом душéвный, всýе труждáемся:// рáзве бо Тогó ни дея́нiе, ни слóво совершáется. (Двáжды)
Плодá чрéвна, святíи духодви́жно прозябáют// отéческая предáнiя, сыноположéнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
И ны́не и прúсно и во вéки векóв. Амúнь.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
3 АНТИФОН
Боя́щiися Гóспода, пути́ животá обрéтше,// ны́не и при́сно ублажáются слáвою нетлéнною. (Двáжды)
Óкрест трапéзы твоея́, я́ко стéблiе ви́дя исчáдiя твоя́,// рáдуйся и весели́ся, приводя́ сiя́ Хрiстóви пастыреначáльнику. (Двáжды)
Слáва Ѻтцý и Сы́ну и Святóму Дýху.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
И ны́не и прúсно и во вéки векóв. Амúнь.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
ПРОКИМЕН
Чтец: Прокíмен, глас седьмы́й, псалóм Давíдов: Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Исповéмся Тебé Гóсподи всем сéрдцем мои́м, повéм вся чудесá Твоя́.(Пс.9:2А/Пс.110:1А)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Воскресни́, Гóсподи Бóже мой, да вознесéтся рукá Твоя́.
Хор: Не забýди убóгих Твоúх до концá.
Чтец: Гóсподу помóлимся.
Хор: Гóсподи, поми́луй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
Гóсподи, помилуй. (3раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ЕВАНГЕЛИЕ
От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.66): Во врéмя óно, яви́ся Iисýс ученикóм Свои́м, востáв от мéртвых, на мóри Тiверiáдстем. яви́ся же си́це. Бя́ху вкýпе Сíмон Петр, и Фомá нарицáемый Близнéц, и Нафанáил, и҆́же бе от Кáны Галiлéйскiя, и сы́на Зеведéова, и и҆́на от учени́к Егó два. Глагóла им Сíмон Петр: идý ры́бы лови́ти. Глагóлаша емý: и҆́дем и мы с тобóю. Изыдóша же и вседóша áбiе в корáбль, и в ту нощь не я́ша ничесóже. У́тру же бы́вшу, ста Iисýс при брéзе: не познáша же ученицы́, я́ко Iисýс есть. Глагóла же им Iисýс: дéти, едá что снéдно и҆́мате? Отвещáша Емý: ни. Он же речé им: ввéрзите мрéжу о деснýю странý корабля́ и обря́щете. Ввергóша же, и ктомý не можáху привлещи́ ея́ от мнóжества рыб. Глагóла же учени́к той, егóже любля́ше Iисýс, Петрóви: Госпóдь есть. Сíмон же Петр слы́шав, я́ко Госпóдь есть, епенди́том препоя́сася, бе бо наг, и ввéржеся в мóре. А друзíи ученицы́ кораблецéм прiидóша, [не бéша бо далéче от земли́, но я́ко две сте лактéй,] влекýще мрéжу рыб. Я́коже излезóша на зéмлю, ви́деша огнь лежáщь, и ры́бу на нем лежáщу и хлеб. И глагóла им Iисýс: принеси́те от рыб, я́же я́сте ны́не. Влез же Сíмон Петр, извлечé мрéжу на зéмлю, пóлну вели́ких рыб, сто и пятьдеся́т, и три: и толи́ко сýщим, не протóржеся мрéжа. Глагóла им Iисýс: прiиди́те, обéдуйте. Ни еди́н же смéяше от учени́к истязáти Егó, Ты кто еси́; вéдяще, я́ко Госпóдь есть. Прiи́де же Iисýс, и прiя́т хлеб, и дадé им, и ры́бу тáкожде. Се ужé трéтiе яви́ся Iисýс ученикóм Свои́м, востáв от мéртвых.
В те дни явился Иисус ученикам Своим при море Тивериадском. Явился же так: были вместе Симон Петр, и Фома, называемый Близнец, и Нафанаил из Каны Галилейской, и сыновья Зеведеевы, и двое других из учеников Его. Симон Петр говорит им: иду ловить рыбу. Говорят ему: идем и мы с тобою. Пошли и тотчас вошли в лодку, и не поймали в ту ночь ничего. А когда уже настало утро, Иисус стоял на берегу; но ученики не узнали, что это Иисус. Иисус говорит им: дети! есть ли у вас какая пища? Они отвечали Ему: нет. Он же сказал им: закиньте сеть по правую сторону лодки, и поймаете. Они закинули, и уже не могли вытащить сети от множества рыбы. Тогда ученик, которого любил Иисус, говорит Петру: это Господь. Симон же Петр, услышав, что это Господь, опоясался одеждою, - ибо он был наг, - и бросился в море. А другие ученики приплыли в лодке, - ибо недалеко были от земли, локтей около двухсот, - таща сеть с рыбою. Когда же вышли на землю, видят разложенный огонь и на нем лежащую рыбу и хлеб. Иисус говорит им: принесите рыбы, которую вы теперь поймали. Симон Петр пошел и вытащил на землю сеть, наполненную большими рыбами, которых было сто пятьдесят три; и при таком множестве не прорвалась сеть. Иисус говорит им: придите, обедайте. Из учеников же никто не смел спросить Его: кто Ты? зная, что это Господь. Иисус приходит, берет хлеб и дает им, также и рыбу. Это уже в третий раз явился Иисус ученикам Своим по воскресении Своем из мертвых. (Ин.21:1-14)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 7
(совмещенный с канóном крестовоскрéсным (глас 7), Богорóдицы (глас 7) и канóном Апóстола Фiлíппа, глас 8)
ПЕСНЬ 1
Iрмóс: Мáнiем Твои́м/ на земны́й óбраз преложи́ся/ прéжде удоборазливáемое/ воднóе естествó, Гóсподи./ Тéмже немóкренно пешешéствовав Iзрáиль,// поéт Тебé песнь побéдную.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Осуди́ся смéртное мучи́тельство дрéвом,/ непрáведною смéртiю осуждéну Ти, Гóсподи:/ отню́дуже князь тьмы Тебé не одолéв,// прáведно изгнáн бысть.
Хор: Слáва, Гóсподи, Святóму Воскресéнiю Твоемý.
Чтец: Ад Тебé прибли́жися,/ и зубы́ не возмóг стéрти тéло Твоé,/ челюстьми́ сокруши́ся./ Отню́дуже Спáсе, болéзни разрýш смéртныя,// воскрéсл еси́ триднéвен.
Хор: Пресвятáя Богорóдице, спасù нас.
Богорóдичен: Разреши́шася болéзни прамáтере Éвы:/ болéзни бо избежáвше, неискусомýжно родилá еси́.// Отню́дуже я́ве Богорóдицу, Пречи́стая, вéдуще Тя, вси слáвим.
Канон Богоявления, глас 2 (2)
Хор: Слáва Тебé, Бóже наш, слáва Тебé.
Чтец: У́тру я́вльшуся челове́ком светоно́сну/ ны́не из пусты́ни, к вода́м Иорда́нским преклони́л еси́, Царю́ со́лнца, Твою́ вы́ю,/ ли́ка мра́чна родонача́льника исхи́тити,// скве́рны же вся́кия очи́стити тварь. (Двáжды)
Хор: Слáва Тебé, Бóже наш, слáва Тебé.
Чтец: Безнача́льне, струя́м спогре́бшася Тебе́, Сло́ве,/ но́ваго прево́диши, истле́вшаго ле́стию,/ Сего́ несказа́нно от Отца́ прие́м глас держа́вен:// Сей возлю́бленный, ра́вен же Мне О́трок естество́м. (Двáжды)
Канон святителя, глас 8
Хор: Святúтелю óтче Фiлíппе, молù Бóга о нас.
Чтец: А́гнче Бо́жий и Сло́ве, светозаре́нием Свята́го Твоего́ Ду́ха/ мра́чному уму́ моему́ светоно́сную лучу́ низпосли́/ и сло́во ми вдохни́ восхвали́ти, его́же Сам избра́л и прия́л еси́,// верх страда́льца свяще́ннаго Фили́ппа. (Двáжды)
Хор: Святúтелю óтче Фiлíппе, молù Бóга о нас.
Чтец: Благода́ть, свя́те, Боже́ственную рабу́ твоему́ у Бо́га испроси́/ и разуме́ния мою́ испо́лни ду́шу восхвали́ти житие́ твое́, Фили́ппе святи́телю,/ и́мже вся́ удиви́л еси́, подвиза́вся, Го́споду поя́:// сла́вно бо просла́вися. (Двáжды)
Хор: Слáва Отцý и Сы́ну и Святóму Дýху.
Тропáрь: Вели́ких доброде́телей светозаре́нием сия́юща твоя́ де́тели, преподо́бне,/ удиви́шася бо ца́рие кре́пкому твоему́ му́жеству,/ я́ко в наказа́нии к ним язы́к твой не ослабе́, и Го́споду поя́ше:// сла́вно бо просла́вися.
Хор: И ны́не и прúсно и во вéки векóв. Амúнь.
Богорóдичен: Глаго́лы Богоглаго́ливых пропове́дников о Тебе́, Богома́ти, испо́лнишася:/ се бо родила́ еси́, Де́во, Мла́до Отроча́,/ Ада́ма дре́вняго старее́йшо и сопресто́льна Роди́телю,// ми́ра всего́ на спасе́ние и тле́ния измене́ние.
Катавáсiя Богоявлéнiя (глас 2): Глубины́ откры́л есть дно/ и сýшею Своя́ влечéт,/ в ней покры́в проти́вныя,/ крéпкiй во бранéх Госпóдь,// я́ко прослáвися.
ПЕСНЬ 3
Iрмóс: В начáле Небесá/ всеси́льным Слóвом Твои́м утверждéй Гóсподи Спáсе,/ и Вседéтельным и Бóжiим Дýхом,/ всю си́лу их,/ на недви́жимем мя кáмени// исповéданiя Твоегó утверди́.
Хор: Слáва, Гóсподи, Святóму Воскресéнiю Твоемý.
Чтец: Ты возшéд на дрéво,/ о нас болéзнуеши вóлею, благоутрóбне Спáсе,/ и терпи́ши я́зву, примирéнiя ходáтайственну, и спасéнiя вéрным:// éюже Твоемý, Ми́лостиве, вси примири́хомся Роди́телю.
Хор: Слáва, Гóсподи, Святóму Воскресéнiю Твоемý.
Чтец: Ты мя очи́стив от я́звы,/ душéю уя́звленнаго змíевым угрызéнiем, Хрiстé,/ и показáл еси́ свет, во тьме дрéвле мне слежáщу и во тлéнiи:// Крестóм бо во ад сошéд, менé совоскреси́л еси́.
Хор: Пресвятáя Богорóдице, спасú нас.
Богорóдичен: Неискусомýжныя Твоея́ Мáтере мольбáми/ мир мíрови подáждь, Спáсе,// и несказáнныя Твоея́ слáвы славослóвящiя Тя сподóби.
Глас 2
Хор: Слáва Тебé, Бóже наш, слáва Тебé.
Чтец: Умерщвле́ние пе́рвее насади́вый тва́ри,/ зве́ря злоде́йственнаго вообра́жься в естество́,/ омрача́ется плотски́м прише́ствием:// у́тру я́вльшуся, прирази́вся Влады́це сокруши́ти свою́ вражде́бную главу́.(Двáжды)
Хор: Слáва Тебé, Бóже наш, слáва Тебé.
Чтец: Влече́т к себе́ Богозда́нное естество́, утро́бы мучи́теля, погребе́нное преде́лы;/ ражда́ется па́ки земноро́дных Обновле́ние,/ де́ло держа́вно соверша́я Влады́ка:// прии́де бо, то́е очи́стити хотя́.(Двáжды)
Глас 8
Хор: Святúтелю óтче Фiлíппе, молù Бóга о нас.
Чтец: Доброде́телей на го́ру восте́кл еси́,/ и во мрак виде́ния вшел еси́, святи́телю Фили́ппе,/ и позна́л еси́, ели́ко вме́стно, Непостижи́маго естество́м.// Просвеще́ния испо́лнен быв, о́тче, прия́л еси́ Боже́ственную благода́ть. (Двáжды)
Хор: Святúтелю óтче Фiлíппе, молù Бóга о нас.
Чтец: Еди́наго Бо́га добро́тою ища́/ и еди́ну Его́ получи́ти сла́ву жела́я, блаже́нне,/ сла́ву же и честь земна́го пребыва́ния я́ко преходя́щую оста́вил еси́// и я́ко уго́дник просия́л еси́ всех Влады́ки Христа́. (Двáжды)
Хор: Слáва Отцý и Сы́ну и Святóму Дýху.
Тропáрь: Жела́нием ду́ха пло́ти жела́ние увяди́л еси́/ и себе́, блаже́нне, обручи́л еси́ сожи́тельницу чистоту́,/ от нея́же ча́да тебе́ роди́шася, вся доброде́тели, присносла́вне,// ча́до тя содева́ющия Невеще́ственнаго Све́та.
Хор: И ны́не и прúсно и во вéки векóв. Амúнь.
Богорóдичен: Зми́я мы́сленнаго умертви́ла еси́, умертви́вшаго Ада́ма в раи́/ и Е́ве прама́тери соде́лавшаго печа́ль./ Жизнь прозя́бши, Де́во Чи́стая, от тле́ния нас свободи́:// Бог бо из Твои́х ложе́сн проше́д неизрече́нно.
Катавáсiя Богоявлéнiя (глас 2): Крéпость дая́й царéм нáшим Госпóдь/ и рог помáзанных Свои́х вознося́й/ от Дéвы раждáется, грядéт же ко Крещéнiю./ Томý, вéрнiи, возопiéм:// несть свят, я́ко Бог наш.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Богоявлéнiя, глас 4: Яви́лся еси́ днесь вселéнней, и свет Твой, Гóсподи, знáменася на нас, в рáзуме пою́щих Тя: пришéл еси́ и яви́лся еси́, Свет Непристýпный.
Íкос: Галiле́и язы́честей, Завуло́нстей стране́ и Неффали́мстей земли́,/ я́коже рече́ проро́к, Свет вели́к возсiя́, Хрiсто́с./ Омраче́нным све́тла яви́ся Заря́, из Вифлее́ма облистáющая,/ пáче же из Мари́и Госпо́дь, всей вселе́нней возсiявáет лучи́ Со́лнце прáвды./ Те́мже, и́же от Адáма нази́и, прiиди́те вси, облече́мся в Него́, да согре́емся,/ покрывáет бо наги́я и просвещáет те́мныя.// Прише́л еси́ и яви́лся еси́, Свет Непристу́пный.
Кондáк cвятúтеля, глас 3: Правосла́вiя наста́вника и и́стины провозве́стника,/ Златоу́стаго ревни́теля,/ Росси́йскаго свети́льника, Фiли́ппа прему́драго восхва́лим,/ пи́щею слове́с свои́х разу́мно ча́да своя́ пита́юща,/ той бо язы́ком хвале́нiе поя́ше,/ устна́ма же пе́нiе веща́ше,// я́ко таи́нник Бо́жiя благода́ти.
Íкос: Прiиди́те, любострада́льцы, пе́нием и пе́сньми духо́вными/ па́мять священному́ченика соверша́юще, Боже́ственне возвесели́мся,/ вре́мя на́шего весе́лия и натрижне́нiя наста́,/ в не́же прие́млем страсте́й разреше́ния дар:/ я́ко бо столп о́гнен яви́ся, попаля́ющ беззако́ннующих главы́,/ ве́рных же просвеща́ющ ду́ши уче́ньми Богоразу́мия/ и в Боже́ственный град, Го́рний Iерусали́м, я́ко друга́го Iзра́иля, вводя́щ,// я́ко учени́к Бо́жiя благода́ти.
Седáлен cвятúтеля, глас 8: Я́ко апо́стола избра́ннаго тезоимени́т, о́тче, и подража́тель,/ беды́ претерпе́л еси́ и гоне́ния./ Ре́вность вообража́я проро́ка Илии́ и Крести́теля,/ му́жески обличи́л еси́ беззако́ннующия/ и престо́л, вве́ренный тебе́, до́бре упра́вил еси́,/ ра́вное о́ных тече́ние сконча́в./ Я́ко ми́лоть, те́ло твое́ на земли́ оста́вил еси́,/ испуща́еши, я́ко ми́ро, благоуха́ния арома́т/ и, я́ко дождь, излива́еши благода́ть духо́вну, напоя́я та́йно бразды́ серде́ц на́ших./ Фили́ппе святи́телю, моли́ Христа́ Бо́га грехо́в оставле́ние дарова́ти// чту́щим любо́вию святу́ю па́мять твою́.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Богоявлéнiя, глас 5: Иорда́нскими струя́ми обло́жся, И́же Све́том пресла́вно одева́яйся,/ в ни́хже Ада́мово естество́ обнови́л еси́,/ сокру́шшееся злым преслуша́нiем, Сло́ве Бо́жiй.// Те́мже Тя восхваля́ем и свято́е Твое́ вси славосло́вим явле́нiе.
ПЕСНЬ 4
Iрмóс: Óтча нéдра не остáвль,/ и сошéд на зéмлю, Хрiстé Бóже,/ тáйну услы́шах смотрéнiя Твоегó,// и прослáвих Тя, Еди́не Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Своя́ плещи́ дав, и҆́же от Дéвы воплóщься, на рáны, рабý прегреши́вшу,/ бiéн бывáет Влады́ка непови́нен,// разрешáя моя́ согрешéнiя.
Хор: Слáва, Гóсподи, Святóму Воскресéнiю Твоемý.
Чтец: Предстоя́в суди́щу судíй законопрестýпных,/ я́ко осуди́мый пови́нен бывáет, и заушáется брéнною рукóю,// создáвый человéка я́ко Бог, и судя́й прáведно земли́.
Хор: Пресвятáя Богорóдице, спасù нас.
Богорóдичен: Я́ко вои́стинну Мáти Бóжiя, Творцá Твоегó и Сы́на моли́,// к спаси́тельному напрáвити мя пристáнищу, Всенепорóчная, слáвнаго Егó хотéнiя.
Глас 2
Хор: Слáва Тебé, Бóже наш, слáва Тебé.
Чтец: По́слан от Отца́, всесве́тлое Сло́во, но́щи отгна́ти зломра́чное стремле́ние,/ и искорени́ти гряде́ши челове́ков грехи́,/ сы́ны же привлещи́, Твои́м Креще́нием, Бла́же,// све́тлы от струй Иорда́нских.(Двáжды)
Хор: Слáва Тебé, Бóже наш, слáва Тебé.
Чтец: Са́мое прови́дев нарече́нное Сло́во, я́сно пропове́дник вопие́т тва́ри:/ Сей пре́жде мене́, вторы́й пло́тию сообра́зен,// просия́ Боже́ственною си́лою вражде́бный наш отъя́ти грех.
Хор: Слáва Тебé, Бóже наш, слáва Тебé.
Чтец: Па́жить у Себе́ животво́рну нося́, уловля́ет змие́в,/ гне́здам натека́я мно́гими сетьми́, низлага́я, Бог Сло́во,/ запина́ет же уязви́вшаго всеми́рный род,// сего́ потре́бль, избавля́ет тварь.
Глас 8
Хор: Святúтелю óтче Фiлíппе, молù Бóга о нас.
Чтец: Зло́бою дви́жимии на тя, незло́биваго а́гнца, я́ко ди́вии зве́рие, воста́ша,/ словесы́ твои́ми я́ко остно́м, сре́чеми,// не терпя́ще, я́ростию поощря́хуся, святи́телю Богому́дре. (Двáжды)
Хор: Святúтелю óтче Фiлíппе, молù Бóга о нас.
Чтец: Име́я тя засту́пника мир весь и помо́щника в напа́стех,/ я́ко бо побо́рник ве́рен и ско́рый предста́тель,/ к твое́й па́стве прири́щущия напа́стей и бед изыма́еши// свяще́нными твои́ми моли́твами. (Двáжды)
Хор: Слáва Отцý и Сы́ну и Святóму Дýху.
Тропáрь: Испо́лнив до́брыя по́двиги, тезоимени́те,/ жела́ннаго, Богому́дре, сподо́бился еси́ безсме́ртия,/ иде́же, ра́дуяся, вене́ц побе́ды взял еси́ и вопие́ши:// сла́ва си́ле Твое́й, сла́ва, Христе́, прише́ствию Твоему́.
Хор: И ны́не и прúсно и во вéки векóв. Амúнь.
Богорóдичен: Кре́пость всех враго́в низложи́, Ма́ти Бо́жия,/ оскорбля́ющих воспева́ющия Тя, я́ко ро́ждшая Го́спода сла́вы,/ невреди́мо Твое́ ста́до спаса́й от злых прираже́ний,// я́ко да по до́лгу Тя ублажа́ем.
Катавáсiя Богоявлéнiя (глас 2): Услы́шах, Гóсподи, глас Твой, егóже рекл еси́,/ глас вопiю́щаго в пусты́ни,/ я́ко возгремéл еси́ над водáми мнóгими,/ Твоемý свидéтельствуяй Сы́ну,/ весь быв сошéдшаго Дýха, возопи́:// Ты еси́ Хрiстóс, Бóжiя мýдрость и си́ла.
ПЕСНЬ 5
Iрмóс: Нощь не светлá невéрным Хрiстé,/ вéрным же просвещéнiе в слáдости словéс Твои́х./ Сегó рáди к Тебé ýтренюю,// и воспевáю Твоé Божествó.
Хор: Слáва, Гóсподи, Святóму Воскресéнiю Твоемý.
Чтец: За Твоя́ рабы́ продаéшися, Хрiстé,/ и по лани́те ударéнiе терпи́ши,/ свобóде ходáтайственно пою́щим:// к Тебé ýтренюю, и воспевáю Твоé Божествó.
Хор: Слáва, Гóсподи, Святóму Воскресéнiю Твоемý.
Чтец: Божéственною Твоéю си́лою, Хрiстé,/ нéмощiю плотскóю крéпкаго низложи́л еси́,// и победи́теля мя смéрти, Спáсе, воскресéнiем показáл еси́.
Хор: Пресвятáя Богорóдице, спасù нас.
Богорóдичен: Бóга родилá еси́ Мáти чи́стая,/ воплощéннаго из Тебé боголéпно, Всепéтая:/ понéже не познáла еси́ мýжеска пóла,// но от Святáго раждáеши Дýха.
Глас 2
Хор: Слáва Тебé, Бóже наш, слáва Тебé.
Чтец: Ви́дев Зижди́тель во мра́це прегреше́ний плени́цами неизбе́жными/ его́же вообрази́ персты́, поставля́ет на обою́ ра́му, воздвиг горе́, ны́не во многотеку́щих вода́х омыва́я студа́ дре́вняго// Ада́мова зла́го нра́ва.(Двáжды)
Хор: Слáва Тебé, Бóже наш, слáва Тебé.
Чтец: Со благоче́стием притеце́м приле́жно ко исто́чником пречи́стым тече́ния спаси́тельнаго,/ Сло́во усмотря́юще от Нетле́нныя,/ почерпа́ла принося́ще жа́жди Боже́ственныя,// ми́ра сла́достне исцеля́я неду́г.(Двáжды)
Глас 8
Хор: Святúтелю óтче Фiлíппе, молù Бóга о нас.
Чтец: Я́ко луча́ пра́вды Со́лнца, яви́ся ми́ру/ светлостьми́ доброде́телей предста́тельство твое́, святи́телю Фили́ппе,/ разоря́ющи о́блак наше́дших бед./ Тя и ны́не пою́щия в ми́ре сохрани́,/ и просла́ви я красото́ю, и просвети́. (Двáжды)
Хор: Святúтелю óтче Фiлíппе, молù Бóга о нас.
Чтец: Мечь обоюдуо́стр язы́к твой показа́ся,/ в Христо́в страх вооружи́вся, блаже́нне, разу́мно изобличи́в нача́льствующия// во свиде́тельство Христа́ Всецаря́, вино́вна на среду́ приводя́, и Боже́ственныя Его́ ученики́. (Двáжды)
Хор: Слáва Отцý и Сы́ну и Святóму Дýху.
Тропáрь: Нов яви́лся еси́ ре́вностию, я́коже вторы́й Моисе́й,/ не зна́мении стра́шными удивля́я, но Боже́ственных слове́с уче́нии наставля́я,// к ти́хому приста́нищу но́ваго Изра́иля от страсте́й Еги́пта изводя́.
Хор: И ны́не и прúсно и во вéки векóв. Амúнь.
Богорóдичен: О́блак разу́мный Тя имену́ем,/ из Тебе́ бо Христо́с возсия́, Всенепоро́чная,/ и простра́ннейшу Тя Небе́с показа́:/ Того́ бо неискусому́жно родила́ еси́, Чи́стая,// воплоще́нна за милосе́рдие неисповеди́мое.
Катавáсiя Богоявлéнiя (глас 2): Iисýс, животá Начáльник,/ разреши́ти осуждéнiе грядéт Адáма первоздáннаго,/ очищéнiй же, я́ко Бог, не трéбуя,/ пáдшаго очищáет во Iордáне,/ в нéмже враждý уби́в,// преимýщ всяк ум мир дáрует.
ПЕСНЬ 6
Iрмóс: Плáвающаго в молвé житéйских попечéнiй,/ с кораблéм потопля́ема грехи́,/ и душетлéнному звéрю приметáема,/ я́ко Ióна, Хрiстé, вопiю́ Ти:// из смертонóсныя глубины́ возведи́ мя.
Хор: Слáва, Гóсподи, Святóму Воскресéнiю Твоемý.
Чтец: Воспоминáху Тя заключéнныя во áде дýши, и остáвльшiяся прáведных,/ и от Тебé спасéнiя моля́хуся:/ éже Крестóм, Хрiстé, пóдал еси́ преиспóдним,// пришéд я́ко благоутрóбен.
Хор: Слáва, Гóсподи, Святóму Воскресéнiю Твоемý.
Чтец: Ко одушевлéнному Твоемý и нерукотворéнному хрáму,/ разрушéну бы́вшу страдáньми,/ воззрéти пáки лик апóстольскiй отчáяся:/ но пáче надéжды поклóнься,// воскрéсша повсю́ду проповéда.
Хор: Пресвятáя Богорóдице, спасù нас.
Богорóдичен: Неизречéннаго рождествá Твоегó всенепорóчнаго óбраз,/ Дéво богоневéстная, и҆́же нас рáди,/ кто от человéк сказáти возмóжет?/ Я́ко Бог неопи́санне, Слóво соедини́вся Тебé,// плоть из Тебé бысть.
Глас 2
Хор: Слáва Тебé, Бóже наш, слáва Тебé.
Чтец: От глуби́ннаго льва, тревече́рний стра́нне проро́к во вну́тренних валя́яся,/ а́бие произы́де, пакибытия́ спасе́ние// от зми́я человекоуби́йцы всем предъявля́я в после́дняя ле́та.(Двáжды)
Хор: Слáва Тебé, Бóже наш, слáва Тебé.
Чтец: Отве́рсту Не́бу всесве́тлых писа́ний, учени́к зрит от Отца́ посыла́емый,/ пребыва́ющ же Дух на Пречи́стем Сло́ве,/ наше́д я́ко го́лубь неизрече́нным о́бразом,// лю́дем же явля́ется, прише́дшим ко Влады́це.(Двáжды)
Глас 8
Хор: Святúтелю óтче Фiлíппе, молù Бóга о нас.
Чтец: Промышле́ние о́бщее творя́ о пасо́мых тобо́ю,/ е́же бы́ти им душе́ю и се́рдцем еди́но, сла́вне, во Христо́ве еди́ней ве́ре пребыва́ющим,/ язы́ческия же отрева́л еси́ обы́чаи// и разделе́ния бежа́ти, му́дре, научи́л еси́. (Двáжды)
Хор: Святúтелю óтче Фiлíппе, молù Бóга о нас.
Чтец: Ре́вностию Христо́вою поостри́вся,/ я́рость самодержа́внаго на кро́тость преложи́ти тща́лся еси́/ и к преще́нием царе́вым непрекло́нен отню́д был еси́,/ я́ко Христо́вых за́поведей де́латель,/ и показа́лся еси́ я́ко кре́пок хра́брник,// за па́ству твою́ пострада́в да́же до сме́рти, ра́дуяся. (Двáжды)
Хор: Слáва Отцý и Сы́ну и Святóму Дýху.
Тропáрь: Светоно́сную лучу́,/ сия́ющу во мра́це жития́ су́щим, святи́телю Фили́ппе, ви́дим тя,/ и я́ко свещу́ неугаси́мую, Невеще́ственному приобщи́вшагося Све́ту,// и вся освеща́юща концы́, и тьму неразу́мия отъе́млюща.
Хор: И ны́не и прúсно и во вéки векóв. Амúнь.
Богорóдичен: Тя иногда́ написа́ скрижа́ль, Богообра́зне во проро́цех Моисе́й,/ све́щник же Све́та, и сень, и же́зл процве́тший, Всенепоро́чная,/ и ста́мну, ма́нну нося́щую,// и ле́ствицу, е́юже возведо́хомся от земли́ к Высоте́.
Катавáсiя Богоявлéнiя (глас 2): Глас Словесé, свети́льник Свéта,/ денни́ца Сóлнца, Предтéча в пусты́ни, -/ покáйтеся! - всем вопiéт лю́дем, - и предочи́ститеся:/ се бо предстои́т Хрiстóс,// от тли мiр избавля́яй.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 7: Не ктомý держáва смéртная/ возмóжет держáти человéки:/ Хрiстóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнiи, в воскресéнiе.
Íкос: Вострепетáша дóле преиспóдняя днесь,/ ад и смерть Еди́наго от Трóицы:/ земля́ поколебáся, врáтницы же áдовы ви́девше Тя, ужасóшася:/ вся же тварь со прорóки рáдующися поéт Тебé побéдную песнь,/ избáвителю Бóгу нáшему,/ разруши́вшему ны́не смéртную си́лу./ Да воскли́кнем и возопiи́м ко Адáму, и к сýщим из Адáма:/ дрéво сегó пáки введé.// Изыди́те, вéрнiи, в воскресéнiе.
ПЕСНЬ 7
Iрмóс: Пещь óтроцы огнепáльну/ дрéвле росоточáщу показáша,/ Еди́наго Бóга воспевáюще и глагóлюще:/ превозноси́мый отцéв Бог// и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Дрéвом умерщвля́ется Адáм, вóлею преслушáнiе содéлав:/ послушáнiем же Хрiстóвым пáки обновля́емь есть.// Менé бо рáди распинáется Сын Бóжiй, препрослáвленный.
Хор: Слáва, Гóсподи, Святóму Воскресéнiю Твоемý.
Чтец: Тебé воскрéсшаго, Хрiстé, из грóба, тварь вся воспé:/ Ты бо жизнь сýщим во áде процвéл еси́,/ мéртвым воскресéнiе,// и́же во тьме, свет препрослáвленный.
Хор: Пресвятáя Богорóдице, спасù нас.
Богорóдичен: Рáдуйся, Дщи Адáма тлéннаго./ Рáдуйся, еди́на Богоневéсто./ Рáдуйся, éюже тля изгнáна бысть, я́же Бóга рóждши:// Егóже моли́, Чи́стая, спасти́ся всем нам.
Глас 2
Хор: Слáва Тебé, Бóже наш, слáва Тебé.
Чтец: Тебе́ живопису́ющий ассири́йский пла́мень ужа́сен поставля́еши, в ро́су преведе́н;/ те́мже вода́ ны́не, я́коже пла́мень, одева́яй, вре́дную зло́бу, Христе́, прикрове́нную опаля́ет,// от поползнове́нныя стези́ призыва́ющи.(Двáжды)
Хор: Слáва Тебé, Бóже наш, слáва Тебé.
Чтец: Разде́льшуся Иорда́ну дре́вле, по су́ху прехо́дят лю́дие Изра́ильтестии,/ Тебе́, Держа́внейшаго, содержа́ща тварь некосни́тельне,// ны́не в вода́х напису́ющии, к нетле́нней и поле́зней стези́.
Хор: Слáва Тебé, Бóже наш, слáва Тебé.
Чтец: Ве́мы, пе́рвее всепа́губный пото́п/ ми́лостивно Тя всех во тлю привести́,/ о, тревели́кая сотворя́я и стра́нная!// Ны́не же пото́пльша, Христе́, грех за благосе́рдие и челове́ческое спасе́ние.
Продолжение здесь