Служба святым Коринфским мученикам
Выкладываю в «Уставные заметки» текст четверичной службы святому мученику Леониду Коринфскому и иже с ним пострадавшим семи святым мученицам. Стихиры, седален и канон, творение преподобного Иосифа Песнописца, были опубликованы по рукописи митрополитом Леонтопольским Софронием: Σωφρόνιος (Εὐστρατιάδης), μητρ. Λεωνίδης ὅσιος ἀρχιεπίσκοπος ᾿Αθηνῶν κα Λεωνίδης μάρτυς ὁ ἐν Τροιζῆνι // Θεολογία. 1935. Τ. 13. Σ. 170-179. Тропарь, кондак и икос заимствованы из восполнения службы, написанного митрополитом Арголидским Хризостомом II (Делияннопулосом; 1916 - 1985): Μητροπολίτου Αργολίδος Χρυσοστόμου Β'. Αγιολογικαί μελέται και Ασματική Ακολουθία εις τον Άγιον Μάρτυρα Λεωνίδην και την συνοδείαν αυτού. Ναύπλιον, 1991. Перевод на церковнославянский Наталии Бахаревой aka ulita_n, редакция перевода преподавателя СПбДА иерея Иоанна Никитина. Устав литургийных чтений и респонсориев, устав молебна, тексты иного тропаря, молитвы и величания составлены иереем Иоанном Никитиным.
Месяца апреля в 16-й день
Свята́го му́ченика Леони́да и святы́х му́чениц Харие́ссы, Ни́ки, Гали́ны, Кали́сы (Га́ли), Нунехи́и, Васили́ссы и Феодо́ры Кори́нфских.
На вечерни
На Го́споди, воззва́х: стихи́ры, глас 1.
Подо́бен: Всехва́льнии му́ченицы:Добропобе́днии му́ченицы, / Го́спода Бога чту́ще, / и Творца́ всея́ тва́ри, / че́сти чужды́я и́долом безду́шным отню́д не принесо́сте, / и смерть непра́ведно претерпе́сте, / и ны́не помоли́теся / дарова́ти душа́м на́шим // мир и ве́лию ми́лость.
Во глубину́ поверга́еми, / ку́пно в ней кончи́ну блаже́нную, / му́ченицы сла́внии, я́ве восприя́сте. / Ре́ки льсти и зло́бы пото́ки / святы́ми стоя́ньми осуши́вше. / Сего́ ра́ди испроси́те / даровати душа́м на́шим // мир и ве́лию ми́лость.
Леони́да вси ве́рнии, / Ни́ку, Харие́ссу и Нунехи́ю, / Васили́ссу и Гали́ну, / Кали́су и Феодо́ру, прииди́те, ублажи́м, / в го́рния всели́вшихся черто́ги, / и возопии́м: / Тех, Христе́, моле́ньми // мир да́руй ми́ру Твоему́.
Сла́ва, и ны́не: Богоро́дичен, глас и подо́бен то́йже:Пречи́стый Хра́м Бо́жий, / небе́с ши́рший / и Херуви́м святе́йший, / Богоблагода́тная Всесвята́я Отрокови́це, / ум мой облагодати́, / и просвети́ серде́чныя о́чи, / подаю́щи ми благоприя́тным Твои́м хода́тайством // прегреше́ний все́х отпуще́ние.
Крестобогоро́дичен, глас и подо́бен то́йже:Де́ва Нескве́рная дре́вле, / на Дре́ве зря́щи Бога, / Его́же из безсе́менна чре́ва роди́, / не терпя́щи утро́бнаго уязвле́ния, / терза́ющися глаго́лаше: / ма́нием содержа́й всю тва́рь, / ка́ко, я́ко осу́жденник, на Кресте́ распя́лся еси́, // хотя́й спасти́ все челове́чество?
Тропа́рь, глас 3:
Подо́бен: Вели́ка побо́рника:Вели́ка побо́рника стяжа́вый тя Епида́вр [ 1], о Леони́де, / не бои́тся велиа́рова лови́тельства. / Я́ко у́бо и́дольская низложи́л еси́ чти́лища, / и Христа́ благодерзнове́нно испове́дал еси́, / с му́дрыми жена́ми, всеблаже́нне: // приле́жно моли́ дарова́ти нам ве́лию ми́лость.
Ин тропа́рь, глас 1.
Подо́бен: Ка́мени запеча́тану:Воспева́юще псалмы́ и пе́сни духо́вныя, / на страда́ния за Христа́ устреми́стеся, / Леони́де, Ни́ко, Харие́ссо и Нунехи́е, / вку́пе с Васили́ссою, Гали́ною, Кали́сою и Феодо́рою, / сквозе́ бо о́гнь и во́ду проидо́сте, / обрели́ есте́ поко́й в Оби́телех Царя́ Небе́снаго. / Сла́ва Да́вшему вам кре́пость, / сла́ва Венча́вшему вас, // сла́ва Де́йствующему ва́ми всем исцеле́ния.
На утрени
Кано́н, его́же краегране́сие: Боже́ственное принесу́ му́чеником сладкопе́ние. Ио́сиф. Глас 1.
Пе́снь 1Ирмо́с: Твоя́ победи́тельная десни́ца / боголе́пно в кре́пости просла́вися: / та бо, Безсме́ртне, / я́ко всемогу́щая, / проти́вныя сотре́, / изра́ильтяном // путь глубины́ новосоде́лавшая.
Боже́ственными заря́ми просвеща́еми, / и трисо́лнечному све́ту предстоя́ще, / му́ченицы всехва́льнии, / честно́е и светоно́сное страда́ние ва́ше соверша́ющыя, // страсте́й мглы изба́вите.
Бо́дрым по́мыслом предстоя́сте / пред суде́йскими седа́лищи суди́ми, / и стра́сти честны́я Христо́вы изобразу́юще, блаже́ннейшии, // пло́тию пострада́вшаго за ны бла́гостию.
Священносло́вяще Христо́во па́че сло́ва, всехва́льнии, воплоще́ние, / предстоя́сте суди́ми, / и нечести́вых беззако́ние все // по́мыслом свобо́дным боголе́пно судя́ще.
Богоро́дичен: Свято́е пребыва́лище Тя обре́т на небесе́х жи́тельствуяй, / во свята́я ложесна́ Твоя́ во́лею всели́ся, и рожде́йся, / мир освяти́л есть, Отрокови́це Пресвята́я, // премно́жеством бла́гости.
Пе́снь 3Ирмо́с: Еди́не ве́дый челове́ческаго существа́ не́мощь / и ми́лостивно в не вообра́жься, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме // неизрече́нныя сла́вы Твоея́, Человеколю́бче.
Зако́ном повину́стеся Христовым, / подвиг благославный скончасте, всехвальнии, / беззако́ния вся́каго уклони́стеся, / и ло́жным бого́м не принесо́сте почита́ния безслове́снаго: // сего́ ра́ди ве́рно вас ублажа́ем.
Огне́м боже́ственныя любве́ душе́ю я́ве возже́нни, / на му́жеския по́двиги дерза́ете, / пло́ти мучи́тельства, страда́льцы, претерпе́вше, / и смерть, я́ко жи́зни пода́тельницу ве́чныя; // сего́ ра́ди ублажа́етеся.
Глаго́лов твои́х стрела́ми, му́дре, / сердца́ уязви́л еси́ нечести́вых, / стре́лы младе́нец вменя́я язвы их [ 2], / Леони́де сла́вне, страда́льче блаже́нне, // святы́х а́нгелов собесе́дниче.
Богоро́дичен: Еди́н неви́димый Бог ви́ден бысть, / из Тебе́ воплоща́ем, премно́жеством бла́гости: / Его́же умоли́ от неви́димых мя враг изба́вити, / неща́дно стужа́ющих се́рдце мое́, // Всенепоро́чная Влады́чице.
Седа́лен, глас 1.
Подо́бен: Ка́мени запеча́тану:Пред мучи́тели Христа́ испове́даша, / де́вы ю́ныя с Леони́дом, ра́дующеся, / и сме́рть претерпе́ша вку́пе, / морски́м глубина́м бесе́дующе, / и в го́рних черто́гах / сла́вно жи́тельствуют, лику́юще: / Сла́ва Укре́пльшему я, / сла́ва Венча́вшему, // сла́ва Де́йствующему те́ми всем исцеле́ния.
Сла́ва, и ны́не: Богоро́дичен, глас и подо́бен то́йже:Ру́це Твоѝ Боже́ственнии, / и́миже Созда́теля понесла́ есѝ, / Де́во Пресвята́я, / вопло́щшагося бла́гостию просте́рши умолѝ Его́, / изба́вити на́с от искуше́ний, и страсте́й, и бе́д, / хва́лящих Тя́ любо́вию, и вопию́щих: / сла́ва Все́льшемуся в Тя́, / сла́ва Проше́дшему из Тебѐ, // сла́ва Изба́вльшему на́с Рождество́м Твои́м.
Крестобогоро́дичен, глас и подо́бен то́йже:А́гнца на Кресте́ А́гница зря́щи, / с разбо́йникома распина́ема Тя́, Долготерпели́ве Сло́ве, / и копие́м в ре́бра пробода́ема, / восклица́ше вопию́щи ма́терски: / что́ стра́нное и ужа́сное, Иису́се Мо́й, та́инство, / несказа́нно соверша́емое? / Ка́ко покрыва́ешися гро́бом Неопи́санный Бо́же; / да Мя́ ро́ждшую Тя́ не оста́виши, // Сы́не Мо́й Сладча́йший.
Пе́снь 4Ирмо́с: Го́ру Тя благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву провозглаша́ше Свято́му, // во спасе́ние на́ше и обновле́ние.
Согла́сно Харие́ссу и Ни́ку почти́м, / и Леони́да с ни́ми, / и Нунехи́ю честну́ю, / Гали́ну и Кали́су благосла́вную, / и Феодо́ру сла́вную, // и свяще́нную боже́ственную Васили́ссу.
Непра́ведно, всеблаже́нне Леони́де, стру́жем, / не отве́рглся еси́ Христа́, Еди́наго всех Соде́теля, / но пребы́л еси́ невра́щен к Тому́ всеце́лыми соу́зами: // сего́ ра́ди по до́лгу почита́ем тя.
Стра́нно тя яви́ боже́ственная благода́ть [ 3], Харие́ссо, / зане́ беззако́нныя нечести́выя ужаси́ла еси́, честна́я, / ве́рныя же просвети́ла еси́, / честно́е стоя́ние твое́ помышля́ющыя // и блаже́нную ре́вность ве́ры.
Богоро́дичен: Я́ко Ма́ти Бо́га Творца́ всея́ тва́ри, / Того́ моли́, Чи́стая, уще́дрити на́ше, Де́во, неможе́ние, / и очище́ние всем прегреше́ний дарова́ти, // и ве́чных красо́т наслажде́ние.
Пе́снь 5Ирмо́с: Просвети́вый сия́нием прише́ствия Твоего́, Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ богоразу́мия, // правосла́вно пою́щих Тя.
Удали́вшися нече́стия, Нунехи́е всечестна́я, / смы́сленно [ 4] Бо́гу прибли́жилася еси́, / от Него́же в боже́ственную си́лу обле́кшися, // могу́тство вся́кое низложи́ла еси́ зми́ево.
Небла́зненну души́ красоту́ соблюла́ еси́, Васили́ссо, / и Бо́гу благоугоди́ла еси́ изря́дно, / Ца́рствия [ 5] тя небе́снаго // насле́дницу соде́лавшему, всечестна́я.
Глаго́лов твои́х, му́ченице Ни́ко, стоя́нием, / побежде́н, беззако́нный, / недоуме́нием безме́рным объя́т бысть: / Иису́с же побе́дными [ 6] украси́вый тя венцы́, // со́нмом му́ченическим сопричи́сли.
Богоро́дичен: Пучи́ну благоутро́бия, Христа́ Заче́ншая, / прегреше́ний мои́х глубину́ неизме́римую осуши́, / ту́чи умиле́ния подаю́щи ми, Де́во, // Твои́ми к Бо́гу предста́тельствы.
Пе́снь 6Ирмо́с: Обы́де нас после́дняя бе́здна, / несть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих // и утвержде́ние.
Преплы́ла еси́, честна́я Гали́но, ра́дующися, / страда́ния пучи́ну, / и прия́ла еси́ ти́хое [ 7] приста́нище Ца́рствия Бо́жия и све́тлости, // о нас, чту́щих тя, моля́щися.
Тя добро́тою [ 8] мы́сленною облиста́ющу, / кра́сный уневе́сти, всепе́тая Кали́со, Изба́витель, / к боже́ственным черто́гом пресели́вый тя, // свяще́нное тече́ние с сострада́лицами сконча́вшая.
Кре́постию боже́ственною дар [ 9] богоприя́тный Го́споду принесла́ еси́, / Феодо́ро, честна́я де́во, / до́бре по́стническое по́прище проте́кши: // тем же тя ны́не велегла́сно, ве́рнии, почита́ем.
Богоро́дичен: Умерщвле́ния нас стра́стнаго изба́вил есть / честны́ми Свои́ми страстьми́ Бог, / во чре́во Твое́ всели́выйся премно́жеством бла́гости, Чи́стая: // те́мже гла́сы благода́рственными при́сно почита́ем Тя.
Конда́к, глас 4.
Подо́бен: Вознесы́йся на Кре́ст:Епида́вра ны́не предста́телей чтем, / и му́чеников сла́ву возвеща́ем, / Леони́да, сла́внаго ору́жника Христо́ва, / и сподви́жницы седмь спра́зднуем: / и́же ны́не благогове́йно престо́лу сла́вы предстоя́ще, / мо́лятся Христу́ // о и́же ве́рою соверша́ющих па́мять их.
Икос:Я́ко отре́би вся, я́же на земли́ презре́вше, / на небе́снем престо́ле ны́не пребыва́ют во сла́ве, / достосла́внии Госпо́дни му́ченицы: / Леони́д бо на дре́ве обе́шен бысть, / и лик сострада́лиц, во глубине́ кончи́ну обре́те. / К Тому́ дости́гше, и́стиннии во́ини Госпо́дни яви́шася, / и небе́сных даро́в сподо́бишася, / и ны́не мо́лятся Христу́ // о и́же ве́рою соверша́ющих па́мять их.
Пе́снь 7Ирмо́с: Тебе́ у́мную, Богоро́дице, пещь, / разсмотря́ем, ве́рнии, / я́коже бо о́троки три Превозноси́мый, / мир обнови́ во чре́ве Твое́м всеце́л, / хва́льный отце́в Бог // и препросла́влен.
Ублаже́ния ра́внаго сподо́бистеся, / ра́вно тече́ние до́брое сконча́вше благосла́вно, / му́ченицы всехва́льнии: / те́мже к невече́рнему све́ту всели́стеся, взыва́юще: / Хва́льный отце́в Бог // и препросла́влен.
Пото́ками Свята́го Ду́ха ороша́еми, му́дрии, / вве́ржени бы́сте во глубину́ морску́ю, ра́дующеся, / во́ды осуши́вше многобо́жия / и пою́ще: / Хва́льный отце́в Бог // и препросла́влен.
Словесы́ честны́ми Леони́да, Ни́ку, / и Нунехи́ю честну́ю, и Харие́ссу с не́ю, / Гали́ну, Кали́су и боже́ственную Феодо́ру / ны́не с Васили́ссою воспои́м, зову́ще: / Хва́льный отце́в Бог // и препросла́влен.
Богоро́дичен: Я́ко дождь на Тя, Всенепоро́чная, / сни́де Сло́во О́тчее, / и напое́ньми духо́вными вся напои́л еси́ / Тя ублажа́ющыя и благоче́стно взыва́ющыя: / Хва́льный отце́в Бог // и препросла́влен.
Пе́снь 8Ирмо́с: В пещи́ о́троцы Изра́илевы, / я́коже в горни́ле, / добро́тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, // по́йте и превозноси́те во вся ве́ки.
Любве́ ра́ди за нас Закла́вшагося, страстоте́рпцы, / приводи́ми умре́ти усе́рднейше, / ра́достно поя́сте согла́сно: // Благослови́те, вся дела́ Госпо́дня, Го́спода.
Врачевство́ яви́ся храм боже́ственных страстоте́рпец, / притека́ющым при́сно чуде́с источа́я в нем дарова́ния / и вопию́щым всегда́: // Вся дела́, благослови́те Го́спода.
Обе́шен, му́чениче Христо́в, всеблаже́нне Леони́де, / и стру́жем, претерпева́л еси́, / вопия́ тебе́ ра́ди Крест Претерпе́вшему: // Благослови́те, вся дела́ Госпо́дня, Го́спода.
Богоро́дичен: Умерщвле́нную страстьми́ мно́гими, Де́во, / ду́шу мою́, Живо́т ми́ру ро́ждшая, / оживотвори́ вопи́ти се́рдца пра́востию: // Благослови́те, вся дела́ Госпо́дня, Го́спода.
Пе́снь 9Ирмо́с: О́браз чи́стаго рождества́ Твоего́, / огнепали́мая купина́ показа́ неопа́льная; / и ны́не на нас напа́стей / свире́пеющую угаси́ти мо́лимся пещь, / да Тя, Богоро́дице, // непреста́нно велича́ем.
Ра́вное тече́ние сконча́вше, / по́честей ра́вных сла́вы сподо́бистеся, / на небесе́х пребыва́ете, / ра́дующеся, со все́ми а́нгелы, / всехва́льнии, Госпо́дни страстоте́рпцы, // о нас Того́ моля́ще.
Яко приноше́ния всесоверше́нная / и же́ртвы свяще́нныя / принесо́стеся Всецарю́ и Творцу́ всея́ тва́ри, / и во стране́ живы́х водвори́стеся, / Госпо́дни страстоте́рпцы, // о нас Тому́ моля́щеся.
Вене́ц пра́вды от Бо́га прия́ша / Ни́ка и Харие́сса, / Боже́ственный Леони́д, и Кали́са, / и Васили́сса, Нунехи́я, / Гали́на всечестна́я, вку́пе и Феодо́ра, // и ны́не во све́те невече́рнем жи́тельствуют.
Ны́не Бо́гу прибли́жившеся, / и просвеще́ния неизрече́ннаго испо́лньшеся, / усыновле́нием бо́зи / всесла́вно бы́вше, / вас на земли́ ублажа́ющыя, / Госпо́дни страстоте́рпцы, // страсте́й но́щи изба́вите.
Богоро́дичен: Но́сиши вся Нося́щаго, / я́ко престо́л херуви́мский, Богоблагода́тная: / Того́ у́бо, Чи́стая, я́ко Благоде́теля, / моли́ на́ша презре́ти согреше́ния, / и живота́ сподо́бити благоче́стно // Тя ублажа́ющыя.
На ЛитургииПроки́мен, глас 4: Святы́м, и́же суть на земли́ Его́, // удиви́ Госпо́дь вся хоте́ния Своя́ в них.
Стих: Предзре́х Го́спода пре́до мно́ю вы́ну, я́ко одесну́ю мене́ есть, да не подви́жуся.
Апо́стол ко Ефесе́ем, зача́ло 233.
Аллилу́иа, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их.
Стих: Мно́ги ско́рби пра́ведным, и от всех их изба́вит я́ Госпо́дь.
Ева́нгелие от Иоа́нна, зача́ло 52.
Прича́стен: Ра́дуйтеся, пра́веднии, о Го́споде, пра́вым подоба́ет похвала́.
На молебнеПрипе́в: Святи́и му́ченицы Кори́нфстии, моли́те Бо́га о нас.
Катава́сия: Моли́те Бо́га о нас, / святи́и му́ченицы Кори́нфстии, / я́ко мы усе́рдно / к вам прибега́ем, // ско́рым помо́щником и моли́твенником о душа́х наших.
Проки́мен, глас 4: Проидо́хом сквозе́ огнь и во́ду, // и изве́л еси́ ны в поко́й.
Стих: Разже́гл ны еси́, я́коже разжиза́ется сребро́.
Ева́нгелие от Луки́, зача́ло 63.
Моли́тва:О святы́й, сла́вный страстоте́рпче Христо́в Леони́де и святы́я достохва́льныя му́ченицы Харие́ссо, Ни́ко, Гали́но, Кали́со, Нунехи́е, Васили́ссо и Феодо́ро, во гра́де Кори́нфе за Христа́ му́жественно пострада́вшии, сквозе́ о́гнь и во́ду проидо́сте и, я́ко дру́зи Христо́ви, в поко́й Небе́снаго Ца́рствия вше́дше, и́мате дерзнове́ние ко Пресвяте́й Тро́ице хода́тайствовати о всех почита́ющих святу́ю па́мять ва́шу и с ве́рою и любо́вию вас призыва́ющих. Испроси́те нам у Го́спода му́жества дар, во еже нам ве́ру святу́ю непоро́чно соблюсти́ и за́поведи Бо́жия благоче́стно сохрани́ти. Бу́дите нам защи́тницы от всех враг, ви́димых и неви́димых, да под кро́вом святы́х ва́ших моли́тв изба́вимся от всех бед, зол и напа́стей до после́дняго дне живота́ на́шего, и та́ко просла́вим Пречестно́е и Великоле́пое И́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Велича́ние:Велича́ем вас, / святи́и му́ченицы Кори́нфстии, / и чтем честна́я страда́ния ва́ша, // я́же за Христа́ претерпе́ли есте́.
[ 1] Епида́вр, Не́а Эпи́даврос - деревня в Греции, где находятся мощи святых мучеников.
[ 2] Ср. Псалом 63:8.
[ 3] Благода́ть - Харие́сса.
[ 4] Смы́сленно - Нунехи́я.
[ 5] Ца́рство - Васили́сса.
[ 6] Побе́да - Ни́ка.
[ 7] Тишина́ - Гали́на.
[ 8] Добро́та - Кали́са.
[ 9] Дар - Феодо́ра.
Месяца апреля в 16-й день
Свята́го му́ченика Леони́да и святы́х му́чениц Харие́ссы, Ни́ки, Гали́ны, Кали́сы (Га́ли), Нунехи́и, Васили́ссы и Феодо́ры Кори́нфских.
На вечерни
На Го́споди, воззва́х: стихи́ры, глас 1.
Подо́бен: Всехва́льнии му́ченицы:Добропобе́днии му́ченицы, / Го́спода Бога чту́ще, / и Творца́ всея́ тва́ри, / че́сти чужды́я и́долом безду́шным отню́д не принесо́сте, / и смерть непра́ведно претерпе́сте, / и ны́не помоли́теся / дарова́ти душа́м на́шим // мир и ве́лию ми́лость.
Во глубину́ поверга́еми, / ку́пно в ней кончи́ну блаже́нную, / му́ченицы сла́внии, я́ве восприя́сте. / Ре́ки льсти и зло́бы пото́ки / святы́ми стоя́ньми осуши́вше. / Сего́ ра́ди испроси́те / даровати душа́м на́шим // мир и ве́лию ми́лость.
Леони́да вси ве́рнии, / Ни́ку, Харие́ссу и Нунехи́ю, / Васили́ссу и Гали́ну, / Кали́су и Феодо́ру, прииди́те, ублажи́м, / в го́рния всели́вшихся черто́ги, / и возопии́м: / Тех, Христе́, моле́ньми // мир да́руй ми́ру Твоему́.
Сла́ва, и ны́не: Богоро́дичен, глас и подо́бен то́йже:Пречи́стый Хра́м Бо́жий, / небе́с ши́рший / и Херуви́м святе́йший, / Богоблагода́тная Всесвята́я Отрокови́це, / ум мой облагодати́, / и просвети́ серде́чныя о́чи, / подаю́щи ми благоприя́тным Твои́м хода́тайством // прегреше́ний все́х отпуще́ние.
Крестобогоро́дичен, глас и подо́бен то́йже:Де́ва Нескве́рная дре́вле, / на Дре́ве зря́щи Бога, / Его́же из безсе́менна чре́ва роди́, / не терпя́щи утро́бнаго уязвле́ния, / терза́ющися глаго́лаше: / ма́нием содержа́й всю тва́рь, / ка́ко, я́ко осу́жденник, на Кресте́ распя́лся еси́, // хотя́й спасти́ все челове́чество?
Тропа́рь, глас 3:
Подо́бен: Вели́ка побо́рника:Вели́ка побо́рника стяжа́вый тя Епида́вр [ 1], о Леони́де, / не бои́тся велиа́рова лови́тельства. / Я́ко у́бо и́дольская низложи́л еси́ чти́лища, / и Христа́ благодерзнове́нно испове́дал еси́, / с му́дрыми жена́ми, всеблаже́нне: // приле́жно моли́ дарова́ти нам ве́лию ми́лость.
Ин тропа́рь, глас 1.
Подо́бен: Ка́мени запеча́тану:Воспева́юще псалмы́ и пе́сни духо́вныя, / на страда́ния за Христа́ устреми́стеся, / Леони́де, Ни́ко, Харие́ссо и Нунехи́е, / вку́пе с Васили́ссою, Гали́ною, Кали́сою и Феодо́рою, / сквозе́ бо о́гнь и во́ду проидо́сте, / обрели́ есте́ поко́й в Оби́телех Царя́ Небе́снаго. / Сла́ва Да́вшему вам кре́пость, / сла́ва Венча́вшему вас, // сла́ва Де́йствующему ва́ми всем исцеле́ния.
На утрени
Кано́н, его́же краегране́сие: Боже́ственное принесу́ му́чеником сладкопе́ние. Ио́сиф. Глас 1.
Пе́снь 1Ирмо́с: Твоя́ победи́тельная десни́ца / боголе́пно в кре́пости просла́вися: / та бо, Безсме́ртне, / я́ко всемогу́щая, / проти́вныя сотре́, / изра́ильтяном // путь глубины́ новосоде́лавшая.
Боже́ственными заря́ми просвеща́еми, / и трисо́лнечному све́ту предстоя́ще, / му́ченицы всехва́льнии, / честно́е и светоно́сное страда́ние ва́ше соверша́ющыя, // страсте́й мглы изба́вите.
Бо́дрым по́мыслом предстоя́сте / пред суде́йскими седа́лищи суди́ми, / и стра́сти честны́я Христо́вы изобразу́юще, блаже́ннейшии, // пло́тию пострада́вшаго за ны бла́гостию.
Священносло́вяще Христо́во па́че сло́ва, всехва́льнии, воплоще́ние, / предстоя́сте суди́ми, / и нечести́вых беззако́ние все // по́мыслом свобо́дным боголе́пно судя́ще.
Богоро́дичен: Свято́е пребыва́лище Тя обре́т на небесе́х жи́тельствуяй, / во свята́я ложесна́ Твоя́ во́лею всели́ся, и рожде́йся, / мир освяти́л есть, Отрокови́це Пресвята́я, // премно́жеством бла́гости.
Пе́снь 3Ирмо́с: Еди́не ве́дый челове́ческаго существа́ не́мощь / и ми́лостивно в не вообра́жься, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме // неизрече́нныя сла́вы Твоея́, Человеколю́бче.
Зако́ном повину́стеся Христовым, / подвиг благославный скончасте, всехвальнии, / беззако́ния вся́каго уклони́стеся, / и ло́жным бого́м не принесо́сте почита́ния безслове́снаго: // сего́ ра́ди ве́рно вас ублажа́ем.
Огне́м боже́ственныя любве́ душе́ю я́ве возже́нни, / на му́жеския по́двиги дерза́ете, / пло́ти мучи́тельства, страда́льцы, претерпе́вше, / и смерть, я́ко жи́зни пода́тельницу ве́чныя; // сего́ ра́ди ублажа́етеся.
Глаго́лов твои́х стрела́ми, му́дре, / сердца́ уязви́л еси́ нечести́вых, / стре́лы младе́нец вменя́я язвы их [ 2], / Леони́де сла́вне, страда́льче блаже́нне, // святы́х а́нгелов собесе́дниче.
Богоро́дичен: Еди́н неви́димый Бог ви́ден бысть, / из Тебе́ воплоща́ем, премно́жеством бла́гости: / Его́же умоли́ от неви́димых мя враг изба́вити, / неща́дно стужа́ющих се́рдце мое́, // Всенепоро́чная Влады́чице.
Седа́лен, глас 1.
Подо́бен: Ка́мени запеча́тану:Пред мучи́тели Христа́ испове́даша, / де́вы ю́ныя с Леони́дом, ра́дующеся, / и сме́рть претерпе́ша вку́пе, / морски́м глубина́м бесе́дующе, / и в го́рних черто́гах / сла́вно жи́тельствуют, лику́юще: / Сла́ва Укре́пльшему я, / сла́ва Венча́вшему, // сла́ва Де́йствующему те́ми всем исцеле́ния.
Сла́ва, и ны́не: Богоро́дичен, глас и подо́бен то́йже:Ру́це Твоѝ Боже́ственнии, / и́миже Созда́теля понесла́ есѝ, / Де́во Пресвята́я, / вопло́щшагося бла́гостию просте́рши умолѝ Его́, / изба́вити на́с от искуше́ний, и страсте́й, и бе́д, / хва́лящих Тя́ любо́вию, и вопию́щих: / сла́ва Все́льшемуся в Тя́, / сла́ва Проше́дшему из Тебѐ, // сла́ва Изба́вльшему на́с Рождество́м Твои́м.
Крестобогоро́дичен, глас и подо́бен то́йже:А́гнца на Кресте́ А́гница зря́щи, / с разбо́йникома распина́ема Тя́, Долготерпели́ве Сло́ве, / и копие́м в ре́бра пробода́ема, / восклица́ше вопию́щи ма́терски: / что́ стра́нное и ужа́сное, Иису́се Мо́й, та́инство, / несказа́нно соверша́емое? / Ка́ко покрыва́ешися гро́бом Неопи́санный Бо́же; / да Мя́ ро́ждшую Тя́ не оста́виши, // Сы́не Мо́й Сладча́йший.
Пе́снь 4Ирмо́с: Го́ру Тя благода́тию Бо́жиею приосене́нную, / прозорли́выма Авваку́м усмотри́в очи́ма, / из Тебе́ изы́ти Изра́илеву провозглаша́ше Свято́му, // во спасе́ние на́ше и обновле́ние.
Согла́сно Харие́ссу и Ни́ку почти́м, / и Леони́да с ни́ми, / и Нунехи́ю честну́ю, / Гали́ну и Кали́су благосла́вную, / и Феодо́ру сла́вную, // и свяще́нную боже́ственную Васили́ссу.
Непра́ведно, всеблаже́нне Леони́де, стру́жем, / не отве́рглся еси́ Христа́, Еди́наго всех Соде́теля, / но пребы́л еси́ невра́щен к Тому́ всеце́лыми соу́зами: // сего́ ра́ди по до́лгу почита́ем тя.
Стра́нно тя яви́ боже́ственная благода́ть [ 3], Харие́ссо, / зане́ беззако́нныя нечести́выя ужаси́ла еси́, честна́я, / ве́рныя же просвети́ла еси́, / честно́е стоя́ние твое́ помышля́ющыя // и блаже́нную ре́вность ве́ры.
Богоро́дичен: Я́ко Ма́ти Бо́га Творца́ всея́ тва́ри, / Того́ моли́, Чи́стая, уще́дрити на́ше, Де́во, неможе́ние, / и очище́ние всем прегреше́ний дарова́ти, // и ве́чных красо́т наслажде́ние.
Пе́снь 5Ирмо́с: Просвети́вый сия́нием прише́ствия Твоего́, Христе́, / и освети́вый Кресто́м Твои́м ми́ра концы́, / сердца́ просвети́ све́том Твоего́ богоразу́мия, // правосла́вно пою́щих Тя.
Удали́вшися нече́стия, Нунехи́е всечестна́я, / смы́сленно [ 4] Бо́гу прибли́жилася еси́, / от Него́же в боже́ственную си́лу обле́кшися, // могу́тство вся́кое низложи́ла еси́ зми́ево.
Небла́зненну души́ красоту́ соблюла́ еси́, Васили́ссо, / и Бо́гу благоугоди́ла еси́ изря́дно, / Ца́рствия [ 5] тя небе́снаго // насле́дницу соде́лавшему, всечестна́я.
Глаго́лов твои́х, му́ченице Ни́ко, стоя́нием, / побежде́н, беззако́нный, / недоуме́нием безме́рным объя́т бысть: / Иису́с же побе́дными [ 6] украси́вый тя венцы́, // со́нмом му́ченическим сопричи́сли.
Богоро́дичен: Пучи́ну благоутро́бия, Христа́ Заче́ншая, / прегреше́ний мои́х глубину́ неизме́римую осуши́, / ту́чи умиле́ния подаю́щи ми, Де́во, // Твои́ми к Бо́гу предста́тельствы.
Пе́снь 6Ирмо́с: Обы́де нас после́дняя бе́здна, / несть избавля́яй, / вмени́хомся, я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих // и утвержде́ние.
Преплы́ла еси́, честна́я Гали́но, ра́дующися, / страда́ния пучи́ну, / и прия́ла еси́ ти́хое [ 7] приста́нище Ца́рствия Бо́жия и све́тлости, // о нас, чту́щих тя, моля́щися.
Тя добро́тою [ 8] мы́сленною облиста́ющу, / кра́сный уневе́сти, всепе́тая Кали́со, Изба́витель, / к боже́ственным черто́гом пресели́вый тя, // свяще́нное тече́ние с сострада́лицами сконча́вшая.
Кре́постию боже́ственною дар [ 9] богоприя́тный Го́споду принесла́ еси́, / Феодо́ро, честна́я де́во, / до́бре по́стническое по́прище проте́кши: // тем же тя ны́не велегла́сно, ве́рнии, почита́ем.
Богоро́дичен: Умерщвле́ния нас стра́стнаго изба́вил есть / честны́ми Свои́ми страстьми́ Бог, / во чре́во Твое́ всели́выйся премно́жеством бла́гости, Чи́стая: // те́мже гла́сы благода́рственными при́сно почита́ем Тя.
Конда́к, глас 4.
Подо́бен: Вознесы́йся на Кре́ст:Епида́вра ны́не предста́телей чтем, / и му́чеников сла́ву возвеща́ем, / Леони́да, сла́внаго ору́жника Христо́ва, / и сподви́жницы седмь спра́зднуем: / и́же ны́не благогове́йно престо́лу сла́вы предстоя́ще, / мо́лятся Христу́ // о и́же ве́рою соверша́ющих па́мять их.
Икос:Я́ко отре́би вся, я́же на земли́ презре́вше, / на небе́снем престо́ле ны́не пребыва́ют во сла́ве, / достосла́внии Госпо́дни му́ченицы: / Леони́д бо на дре́ве обе́шен бысть, / и лик сострада́лиц, во глубине́ кончи́ну обре́те. / К Тому́ дости́гше, и́стиннии во́ини Госпо́дни яви́шася, / и небе́сных даро́в сподо́бишася, / и ны́не мо́лятся Христу́ // о и́же ве́рою соверша́ющих па́мять их.
Пе́снь 7Ирмо́с: Тебе́ у́мную, Богоро́дице, пещь, / разсмотря́ем, ве́рнии, / я́коже бо о́троки три Превозноси́мый, / мир обнови́ во чре́ве Твое́м всеце́л, / хва́льный отце́в Бог // и препросла́влен.
Ублаже́ния ра́внаго сподо́бистеся, / ра́вно тече́ние до́брое сконча́вше благосла́вно, / му́ченицы всехва́льнии: / те́мже к невече́рнему све́ту всели́стеся, взыва́юще: / Хва́льный отце́в Бог // и препросла́влен.
Пото́ками Свята́го Ду́ха ороша́еми, му́дрии, / вве́ржени бы́сте во глубину́ морску́ю, ра́дующеся, / во́ды осуши́вше многобо́жия / и пою́ще: / Хва́льный отце́в Бог // и препросла́влен.
Словесы́ честны́ми Леони́да, Ни́ку, / и Нунехи́ю честну́ю, и Харие́ссу с не́ю, / Гали́ну, Кали́су и боже́ственную Феодо́ру / ны́не с Васили́ссою воспои́м, зову́ще: / Хва́льный отце́в Бог // и препросла́влен.
Богоро́дичен: Я́ко дождь на Тя, Всенепоро́чная, / сни́де Сло́во О́тчее, / и напое́ньми духо́вными вся напои́л еси́ / Тя ублажа́ющыя и благоче́стно взыва́ющыя: / Хва́льный отце́в Бог // и препросла́влен.
Пе́снь 8Ирмо́с: В пещи́ о́троцы Изра́илевы, / я́коже в горни́ле, / добро́тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, // по́йте и превозноси́те во вся ве́ки.
Любве́ ра́ди за нас Закла́вшагося, страстоте́рпцы, / приводи́ми умре́ти усе́рднейше, / ра́достно поя́сте согла́сно: // Благослови́те, вся дела́ Госпо́дня, Го́спода.
Врачевство́ яви́ся храм боже́ственных страстоте́рпец, / притека́ющым при́сно чуде́с источа́я в нем дарова́ния / и вопию́щым всегда́: // Вся дела́, благослови́те Го́спода.
Обе́шен, му́чениче Христо́в, всеблаже́нне Леони́де, / и стру́жем, претерпева́л еси́, / вопия́ тебе́ ра́ди Крест Претерпе́вшему: // Благослови́те, вся дела́ Госпо́дня, Го́спода.
Богоро́дичен: Умерщвле́нную страстьми́ мно́гими, Де́во, / ду́шу мою́, Живо́т ми́ру ро́ждшая, / оживотвори́ вопи́ти се́рдца пра́востию: // Благослови́те, вся дела́ Госпо́дня, Го́спода.
Пе́снь 9Ирмо́с: О́браз чи́стаго рождества́ Твоего́, / огнепали́мая купина́ показа́ неопа́льная; / и ны́не на нас напа́стей / свире́пеющую угаси́ти мо́лимся пещь, / да Тя, Богоро́дице, // непреста́нно велича́ем.
Ра́вное тече́ние сконча́вше, / по́честей ра́вных сла́вы сподо́бистеся, / на небесе́х пребыва́ете, / ра́дующеся, со все́ми а́нгелы, / всехва́льнии, Госпо́дни страстоте́рпцы, // о нас Того́ моля́ще.
Яко приноше́ния всесоверше́нная / и же́ртвы свяще́нныя / принесо́стеся Всецарю́ и Творцу́ всея́ тва́ри, / и во стране́ живы́х водвори́стеся, / Госпо́дни страстоте́рпцы, // о нас Тому́ моля́щеся.
Вене́ц пра́вды от Бо́га прия́ша / Ни́ка и Харие́сса, / Боже́ственный Леони́д, и Кали́са, / и Васили́сса, Нунехи́я, / Гали́на всечестна́я, вку́пе и Феодо́ра, // и ны́не во све́те невече́рнем жи́тельствуют.
Ны́не Бо́гу прибли́жившеся, / и просвеще́ния неизрече́ннаго испо́лньшеся, / усыновле́нием бо́зи / всесла́вно бы́вше, / вас на земли́ ублажа́ющыя, / Госпо́дни страстоте́рпцы, // страсте́й но́щи изба́вите.
Богоро́дичен: Но́сиши вся Нося́щаго, / я́ко престо́л херуви́мский, Богоблагода́тная: / Того́ у́бо, Чи́стая, я́ко Благоде́теля, / моли́ на́ша презре́ти согреше́ния, / и живота́ сподо́бити благоче́стно // Тя ублажа́ющыя.
На ЛитургииПроки́мен, глас 4: Святы́м, и́же суть на земли́ Его́, // удиви́ Госпо́дь вся хоте́ния Своя́ в них.
Стих: Предзре́х Го́спода пре́до мно́ю вы́ну, я́ко одесну́ю мене́ есть, да не подви́жуся.
Апо́стол ко Ефесе́ем, зача́ло 233.
Аллилу́иа, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их.
Стих: Мно́ги ско́рби пра́ведным, и от всех их изба́вит я́ Госпо́дь.
Ева́нгелие от Иоа́нна, зача́ло 52.
Прича́стен: Ра́дуйтеся, пра́веднии, о Го́споде, пра́вым подоба́ет похвала́.
На молебнеПрипе́в: Святи́и му́ченицы Кори́нфстии, моли́те Бо́га о нас.
Катава́сия: Моли́те Бо́га о нас, / святи́и му́ченицы Кори́нфстии, / я́ко мы усе́рдно / к вам прибега́ем, // ско́рым помо́щником и моли́твенником о душа́х наших.
Проки́мен, глас 4: Проидо́хом сквозе́ огнь и во́ду, // и изве́л еси́ ны в поко́й.
Стих: Разже́гл ны еси́, я́коже разжиза́ется сребро́.
Ева́нгелие от Луки́, зача́ло 63.
Моли́тва:О святы́й, сла́вный страстоте́рпче Христо́в Леони́де и святы́я достохва́льныя му́ченицы Харие́ссо, Ни́ко, Гали́но, Кали́со, Нунехи́е, Васили́ссо и Феодо́ро, во гра́де Кори́нфе за Христа́ му́жественно пострада́вшии, сквозе́ о́гнь и во́ду проидо́сте и, я́ко дру́зи Христо́ви, в поко́й Небе́снаго Ца́рствия вше́дше, и́мате дерзнове́ние ко Пресвяте́й Тро́ице хода́тайствовати о всех почита́ющих святу́ю па́мять ва́шу и с ве́рою и любо́вию вас призыва́ющих. Испроси́те нам у Го́спода му́жества дар, во еже нам ве́ру святу́ю непоро́чно соблюсти́ и за́поведи Бо́жия благоче́стно сохрани́ти. Бу́дите нам защи́тницы от всех враг, ви́димых и неви́димых, да под кро́вом святы́х ва́ших моли́тв изба́вимся от всех бед, зол и напа́стей до после́дняго дне живота́ на́шего, и та́ко просла́вим Пречестно́е и Великоле́пое И́мя Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Велича́ние:Велича́ем вас, / святи́и му́ченицы Кори́нфстии, / и чтем честна́я страда́ния ва́ша, // я́же за Христа́ претерпе́ли есте́.
[ 1] Епида́вр, Не́а Эпи́даврос - деревня в Греции, где находятся мощи святых мучеников.
[ 2] Ср. Псалом 63:8.
[ 3] Благода́ть - Харие́сса.
[ 4] Смы́сленно - Нунехи́я.
[ 5] Ца́рство - Васили́сса.
[ 6] Побе́да - Ни́ка.
[ 7] Тишина́ - Гали́на.
[ 8] Добро́та - Кали́са.
[ 9] Дар - Феодо́ра.