Недeля 14 по Пятидесятнице. ВСЕНОЩНОЕ БДЕНИЕ. УТРЕНЯ. Час первый. Прор. Захарии и прав. Елисаветы
18 сентября́ 2022 гóда. Недéля 14 по Пятидеся́тнице. Прор. Захáрiи и прав. Елисавéты, родúтелей Iоáнна Предтéчи. Глас 5. Воскрéсная прáздничная слýжба для домáшнего (келéйнаго) совершéнiя.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
ПЕСНЬ 8
Iрмóс: Тебé, Вседéтелю,/ в пещи́ óтроцы, всеми́рный лик сплéтше, поя́ху:/ делá вся́кая, Гóспода пóйте// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты о вóльней спаси́тельныя стрáсти помоли́лся еси́ чáши, я́коже невóльней:// два хотéнiя, двемá бо по коемýждо нóсиши существóма, Хрiстé, во вéки.
Хор: Слáва, Гóсподи, Святóму Воскресéнiю Твоемý.
Чтец: Твои́м вседéтельным схождéнiем ад, Хрiстé, порýганный/ изблевá вся, я́же дрéвле лéстiю умерщвлéнныя,// Тебé превознося́щiя во вся вéки.
Хор: Пресвятáя Богорóдице, спаси нас.
Богорóдичен: Тя я́же пáче умá/ богомýжне Слóвом Рóждшую Гóспода, и дéвствующую,// вся делá, Дéво, благослови́м, и превознóсим во вся вéки.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на Крéсте вóлею длáни простéршаго,/ и ýзы смéртныя разруши́вшаго Хрiстá Бóга,// свящéнницы пóйте, лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же я́ко Женихá из грóба возсiя́вшаго Хрiстá Бóга,/ и миронóсицам я́вльшагося, и рáдость тем провещáвша,// свящéнницы пóйте, лю́дiе превозноси́те во вся вéки.
Глас 5
Хор: Пресвятáя Богорóдице, спасú нас.
Чтец: Престá ны́не я́же прáотчая печáль,/ рáдость приéмши Ти Богомáтерни./ Тéмже непрестáнно поéм Тя, Дéво,// и превознóсим во вся вéки.
Хор: Пресвятáя Богорóдице, спасú нас.
Чтец: Поéт с нáми безплóтных собóр, Дéво/ Рождествó Твоé непостижи́мое,/ еди́н лик состáвльше любóвiю,// и превознося́ще Егó во вéки.
Глас 8
Хор: Святы́й прорóче Захáрiе, молú Бóга о нас.
Чтец: И҆́стины показáся прорóк,/ Хрiстóвы бо стези́ Iоáнн предгряды́й уготóва Предтéча,/ блажéнне iерáрше,// Егóже превознóсим во вся вéки. (Двáжды)
Хор: Святы́й прорóче Захáрiе, молú Бóга о нас.
Чтец: Витíйствуя, благослови́л еси́ Влады́ку, спасéнiе нам подáвшаго,/ от Давíда возсiя́вшаго нам плóтiю Гóспода слáвы,// Егóже превознóсим во вся вéки. (Двáжды)
Благословúм Отцá, и Сы́на, и Святáго Дýха, Гóспода.
Тропáрь: Даровáнiй вели́ких сподóбися, богоявлéнiе,/ Предтéчу роди́в, прорóков всех вы́шшаго,// Гóспода пою́ща и превознося́ща во вся вéки.
И҆ ны́не и прúсно и во вéки векóв. Амúнь.
Богорóдичен: Iерáрх кýпно и богопроповéдник, Захáрiя/ Дéве и Мáтери, Гóспода нося́щей твáри, рáдуяся, поклони́ся,// Юже превознóсим во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 8): Благослови́те, óтроцы,/ Трóицы равночи́сленнiи,/ Содéтеля Отцá Бóга,/ пóйте снизшéдшее Слóво,/ и огнь в рóсу претвóршее,/ и превозноси́те всем жизнь подавáющаго// Дýха Всесвятáго во вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Исáiе, ликýй,/ Дéва имé во чрéве/ и роди́ Сы́на Емманýила,/ Бóга же и Человéка,/ Востóк и҆́мя Емý,/ Егó же величáюще,// Дéву ублажáем.
Хор: Слáва, Гóсподи, Святóму Воскресéнiю Твоемý.
Чтец: Пáдшаго человéка воспрiя́л еси́, Влады́ко Хрiстé, из ложéсн Деви́ческих/ всемý совокýплься, грехý же ни еди́ному причáщься:// всегó от истлéнiя Ты свободи́л еси́ пречи́стыми Твои́ми страстьми́.
Хор: Слáва, Гóсподи, Святóму Воскресéнiю Твоемý.
Чтец: Боготóчною крóвiю истощéнною, Влады́ко Хрiстé,/ от Твои́х пречи́стых ребр и животворя́щих,/ жéртва ýбо престá и҆́дольская,// вся же земля́ Тебé хвалéнiя жéртву принóсит.
Хор: Пресвятáя Богорóдице, спаси нас.
Богорóдичен: Не Бóга безплóтна, нижé пáки человéка прóста/ произведé Чи́стая Отрокови́ца, и Несквéрная:/ но Человéка совершéнна, и нелóжно совершéнна Бóга.// Егóже величáем со Отцéм же и Дýхом.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé И҆́же на Крестé страсть подъéмшаго,/ и áдову си́лу смéртiю сокруши́вшаго,// вéрнiи правослáвно величáем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé из грóба триднéвно воскрéсша,/ и ад плени́вшаго, и мiр просвети́вшаго,// вéрнiи единомýдренно величáем.
Глас 5
Хор: Пресвятáя Богорóдице, спасú нас.
Чтец: От чи́стых кровéй Твои́х/ усыри́ся плоть преестéственно/ всех Содéтелю, Единорóдному Сы́ну Роди́телеву,// не от мýжа, без сéмене же ýмна и одушевлéнна, Богорóдице Приснодéво.
Хор: Пресвятáя Богорóдице, спасú нас.
Чтец: Обходи́мое устáвила еси́ смéрти неудержи́мое стремлéнiе,/ рóждши плóтiю вои́стинну пáче умá Жизнь вéчную:/ Éйже прилóжься усты́ гóрькими ад упраздни́ся,// Пресвятáя Мáти Дéво.
Глас 8
Хор: Святы́й прорóче Захáрiе, молú Бóга о нас.
Чтец: Испóлнился еси́ вдохновéнiя Утéшителева / и благослови́ти начáт Гóспода,// священнотаи́нниче богомýдре и богоблажéнне. (Двáжды)
Хор: Святы́й прорóче Захáрiе, молú Бóга о нас.
Чтец: Глагóлов исхождéнiя Архáнгеловых узрéв,/ богоглагóливе прехвáльне,// к благословéнiю язы́к áбiе подви́гнул еси́. (Двáжды)
Слáва Ѻтцý и Сы́ну и Святóму Дýху.
Тропáрь: Страдáнiя венцы́ и свящéнства/ и просвещéнiем прорóчества украси́лся еси́,// о Захáрiе преблажéнне и богоглагóливе!
И҆ ны́не и прúсно и во вéки векóв. Амúнь.
Богорóдичен: Свéта сýщи прiя́телище,/ просвети́, Дéво, помрачéнную дýшу мою́ страстьми́// и кромéшнiя мя тьмы избáви моли́твами Твои́ми.
Катавáсiя (глас 8): Тáин еси́, Богорóдице, рай,/ невоздéланно возрасти́вшiй Хрiстá,/ И҆́мже крéстное живонóсное на земли́ насади́ся Дрéво./ Тем, ны́не возноси́му,// покланя́ющеся Емý, Тя величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный трéтiй: Я́ко Хрiстóс воскрéсе, никтóже да не вéрует:/ яви́ся бо Марíи, пото́м же ви́ден бысть на селó идýщима,/ таи́нником же пáки яви́ся возлежáщим единонáдесятим,/ и́хже крещáти послáв,/ на небесá вознесéся, отню́дуже и сни́де,// утверждáя проповéданiе мно́жествы знáменiй.
Слáва Ѻтцý и Сы́ну и Святóму Дýху,
Светúлен Прорóка: Пéрвее глáсом Áнгела умолчáл еси́ в невхóдных/ за хотя́щее бы́ти прозябéнiе из тебé глáса вопiю́щаго/ и ны́не молчи́ши óнаго рáди,// пред невхóдными заколéн быв, Захáрiе.
И҆ ны́не и прúсно и во вéки векóв, амúнь.
Богорóдичен воскрéснаго Ексапостiлáрiя: Возсiя́вшее Сóлнце, я́ко от чертóга жени́х, из грóба днесь,/ и ад плени́в, и смерть упраздни́в,/ Тебé Рóждшiя моли́твами, свет нам низпосли́:/ свет, просвещáющ сердцá и дýши:/ свет, ходи́ти всех наставля́ющ// на стези́ повелéнiй Твои́х, и на путь ми́ра.
ХВАЛИТНЫ
Хор, глас 5: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 5: Гóсподи, запечáтану грóбу от беззакóнников,/ прошéл еси́ из грóба,/ я́коже роди́лся еси́ от Богорóдицы:/ не уразумéша, кáко воплоти́лся еси́, безплóтнiи Твои́ Áнгели:/ не чýвствоваша, когдá воскрéсл еси́, стрегýщiи Тя вóини./ Обоя́ бо запечатлéстася испытýющим,/ яви́шася же чудесá клáняющимся вéрою тáинству:/ éже воспевáющим,// воздáждь нам рáдость и вéлiю ми́лость.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, вереи́ вéчныя сокруши́в,/ и ýзы растерзáв, от грóба воскрéсл еси́,/ остáвль Твоя́ погребáльная,/ во свидéтельство и҆́стиннаго триднéвнаго Твоегó погребéнiя:/ и предвари́л еси́ в Галiлéи, в пещéре стрегóмый./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, жены́ текóша на гроб,/ ви́дети Тя, Хрiстá, нас рáди пострадáвшаго,/ и пришéдша, обретóша Áнгела на кáмени седя́ща,/ стрáхом отвáльшемся,/ и к ним возопи́, глагóля:/ воскрéсе Госпóдь, рцы́те ученикóм,/ я́ко воскрéсе от мéртвых,// спасáяй дýши нáша.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Гóсподи, я́коже изшéл еси́ от запечáтаннаго грóба,/ тáко вшел еси́ и двéрем заключéным ко ученикóм Твои́м,/ показýя им телéсная страдáнiя,/ я́же подъя́л еси́, Спáсе Долготерпели́вый:/ я́ко от сéмене Давíдова я́звы претерпéл еси́,/ я́ко Сын же Бóжiй, мир свободи́л еси́./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 4. Хвалúте Егó в тимпáне и лúце, хвалúте Егó во стрýнах и оргáне.
И҆́ны стiхúры анатóлiевы: Гóсподи, Царю́ векóв и Твóрче всех,/ нас рáди распя́тiе и погребéнiе плóтiю прiи́мый,/ да нас от áда свободи́ши всех:/ Ты еси́ Бог наш,// рáзве Тебé инóго не вéмы.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Гóсподи, пресiя́ющая Твоя́ чудесá кто исповéсть;/ или́ кто возвести́т стрáшная Твоя́ тáинства?/ Вочеловéчивыйся бо нас рáди, я́ко Сам восхотéл еси́,/ держáву яви́л еси́ си́лы Твоея́:/ Крестóм бо Твои́м разбóйнику рай отвéрзл еси́,/ и погребéнiем Твои́м вереи́ áдовы сокруши́л еси́,/ Воскресéнiем же Твои́м вся́ческая обогати́л еси́:// Благоутрóбне Гóсподи, слáва Тебé.
Воскреснú, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Стiхúра: Миронóсицы жены́ грóба Твоегó дости́гша,/ зелó рáно искáху Тебé ми́ры помáзати,/ Безсмéртнаго Слóва и Бóга;/ и Áнгела глагóлы огласи́вшася,/ возвращáхуся рáдостiю апóстолом возвести́ти я́ве,/ я́ко воскре́сл еси́, Животé всех,// и пóдал еси́ мíрови очищéнiе и вéлiю ми́лость.
Исповéмся Тебé Гóсподи всем сéрдцем мoúм,/ повéм вся чудесá Твоя́.
Стiхúра: Богопрiя́тнаго грóба ко iудéом стрáжiе глагóлаху:/ О вáшего суему́дреннаго совéта!/ стрещи́ Неопи́саннаго покуси́вшеся, всýе труди́стеся,/ сокры́ти Воскресéнiе распя́таго хотя́ще, я́сно показáсте./ О вáшего суемýдреннаго собóрища!/ что пáки сокры́ти совéтуете, Éже некры́ется;/ пáче же от нас услы́шите,/ и вéровати восхощи́те бы́вших и́стине:/ Áнгел молнiенóсец с небесé сошéд кáмень отвали́,/ егóже стрáхом мéртвостiю содержи́ми бы́хом,/ и возгласи́в крепкоýмным миронóсицам, глагóлаше женáм:/ не зритé ли стражéй умерщвлéнiя, и печáтей разрешéнiя,/ áдова же истощáнiя;/ почтó побéду áдову Упраздни́вшаго,/ и смéртное жáло Сокруши́вшаго, я́ко мéртва взыскýете?/ Благовести́те же скóро шéдша апóстолом Воскресéнiе,/ без стрáха зовýща:/ вои́стинну воскрéсе Госпóдь,// имéя вéлiю ми́лость.
Слáва Отцý и Сыну и Святóму Дýху.
Стiхúра евáнгельская третiя, глас 3: Магдали́не Марíи/ Спáсово благовествýющей из мéртвых Воскресéнiе и явлéнiе,/ не вéрующе же ученицы́, поноси́ми бы́ша о жестосéрдiи:/ но знáменьми воорýжшеся и чудесы́,/ ко проповéданiю посылáхуся,/ и Ты ýбо, Гóсподи, к начáльному свéту вознéслся еси́ Отцý,/ они́ же проповéдаша всю́ду слóво, чудесы́ уверя́юще./ Тéмже просвети́вшеся тéми,/ слáвим Твоé éже из мéртвых воскресéнiе,// человеколю́бче Гóсподи.
И҆ ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 5: Собезначáльное Слóво Отцý и Дýхови, от Дéвы рóждшееся на Спасéнiе нáше, воспои́м, вéрнiи, и поклони́мся; я́ко благоволи́ Плóтiю взы́ти на Крест, и смерть претерпéти,/ и воскреси́ти умéршiя слáвным воскресéнiем Свои́м.
Слáва Отцý и Сы́ну и Святóму Дýху.
Тропáрь Прор. Захáрiи, глас 4: Свящéнства одéждею обложéн, премýдре, по закóну Бóжiю всесожжéнiя прiя́тна священнолéпно приноси́л еси́, Захáрiе, и был еси́ свети́льник и зри́тель тáйных, знáменiя в тебé благодáти нося́ я́вственно, всемýдре, и, мечéм убiéн быв в хрáме Бóжiи, Хрiстóв прорóче, с Предтéчею моли́ спасти́ся душáм нáшим.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк воскрéсный, глас 5: Ко áду, Спáсе мой, сошéл еси́, и вратá сокруши́вый я́ко всеси́лен, умéрших, я́ко Создáтель, совоскреси́л еси́, и смéрти жáло сокруши́л еси́, и Адáм от кля́твы избáвлен бысть, Человеколю́бче; тéмже вси зовéм: спаси́ нас, Гóсподи.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Хрiстóс, и҆́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу