Недeля 14 по Пятидесятнице. ВСЕНОЩНОЕ БДЕНИЕ. УТРЕНЯ. КАНОН Прор. Захарии и прав. Елисаветы, глас 5
18 сентября́ 2022 гóда. Недéля 14 по Пятидеся́тнице. Прор. Захáрiи и прав. Елисавéты, родúтелей Iоáнна Предтéчи. Глас 5. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени.
Начало зри здесь ( великая вечéрня) и здесь ( ýтреня)
[НЕПОРОЧНЫ]Избраннiи стiхи из псалма 118: (глас 5 всегда): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Аллилýiа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есú, Гóсподи,/научú мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И҆ ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 5: Áнгельским зрáком ум смущáюща,/ и Божéственным востáнiем душéю просвещáемы,/ мvроно́сицы апóстолом благовествовáху:/ возвести́те во язы́цех Воскресéнiе,/ Гóсподу содéйствующу чудесы́,// подаю́щему нам вéлiю ми́лость.
СТЕПЕННА, ГЛАС 5
1 АНТИФОН
Хор: Внегдá скорбéти мне,/ Дави́дски пою́ Тебé, Спáсе мой:// избáви дýшу мою́ от язы́ка льсти́ваго. (Двáжды)
Пусты́нным живóт блажéн есть,// Божéственным рачéнiем воскриля́ющимся. (Двáжды)
Слáва Ѻтцý и Сы́ну и Святóму Дýху.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
И ны́не и прúсно и во вéки векóв. Амúнь.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
2 АНТИФОН
На гóры душé, воздви́гнемся,// гряди́ тáмо, отню́дуже пóмощь и҆́дет. (Двáжды)
Деснáя Твоя́ рукá, и менé, Хрiстé, касáющися,// от лéсти вся́кiя да сохрани́т. (Двáжды)
Слáва Ѻтцý и Сы́ну и Святóму Дýху.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
И ны́не и прúсно и во вéки векóв. Амúнь.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
3 АНТИФОН
О рéкших мне: во дворы́ вни́дем Госпóдня:// рáдости мнóгiя испóлнен быв, моли́твы возсылáю. (Двáжды)
В домý Дави́дове стрáшная совершáются:// огнь бо тáмо паля́ всяк срáмный ум. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
И ны́не и прúсно и во вéки векóв. Амúнь.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
ПРОКИМЕН
Чтец: Прокíмен, глас пя́тый. Воскресни́, Гóсподи Бóже мой, да вознесéтся рукá Твоя́, я́ко Ты цáрствуеши во вéки. (Пс.9:33)
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Исповéмся Тебé, Гóсподи, всем сéрдцем мои́м, повéм вся чудесá Твоя́. (Пс.9:2)
Хор: Воскреснú, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Воскресни́, Гóсподи Бóже мой, да вознесéтся рукá Твоя́.
Хор: Я́ко Ты цáрствуеши во вéки.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Мк.зач.71): Во врéмя óно воскрéс Iисýс заýтра, в пéрвую суббóту, яви́ся прéжде Марíи Магдали́ни, из нея́же изгнá седмь бесóв. Онá же шéдши возвестѝ с Ним бы́вшим, плáчущимся и рыдáющим. И҆ онѝ слы́шавше, яко жив есть, и ви́ден бысть от нея́, не я́ша вéры. По сих же двемá от них грядýщема яви́ся инéм óбразом, идýщема на селó. И҆ та шéдша возвести́ста прóчим: и ни тéма вéры я́ша. Последѝ же возлежáщим им единомунáдесяте яви́ся, и поносѝ невéрствiю их и жестосéрдiю, яко ви́девшим Егó востáвша не я́ша вéры. И҆ речé им: шéдше в мiр весь, проповéдите Евáнгелiе всей твáри. И҆́же вéру имéт и крести́тся, спасéн бýдет, а и́же не имéт вéры, осуждéн бýдет. Знáменiя же вéровавшим сiя́ послéдуют: и́менем Мои́м бéсы ижденýт; язы́ки возглагóлют нóвы; змiя возмýт; áще и что смéртно испiю́т, не вреди́т их; на недýжныя рýки возложáт, и здрáви бýдут. Госпóдь же ýбо, по глагóланiи Егó к ним, вознесéся на нéбо, и сéде одеснýю Бóга. Онѝ же изшéдше проповéдаша всю́ду, Гóсподу поспéшствующу и слóво утвержáющу послéдствующими знáменьми. Ами́нь.
[Русский синодальный перевод]В то время воскреснув рано в первый день недели, Иисус явился сперва Марии Магдалине, из которой изгнал семь бесов. Она пошла и возвестила бывшим с Ним, плачущим и рыдающим; но они, услышав, что Он жив и она видела Его,- не поверили. После сего явился в ином образе двум из них на дороге, когда они шли в селение. И те, возвратившись, возвестили прочим; но и им не поверили. Наконец, явился самим одиннадцати, возлежавшим на вечери, и упрекал их за неверие и жестокосердие, что видевшим Его воскресшего не поверили. И сказал им: идите по всему миру и проповедуйте Евангелие всей твари. Кто будет веровать и креститься, спасен будет; а кто не будет веровать, осужден будет. Уверовавших же будут сопровождать сии знамения: именем Моим будут изгонять бесов; будут говорить новыми языками; будут брать змей; и если что́ смертоносное выпьют, не повредит им; возложат руки на больных, и они будут здоровы. И так Господь, после беседования с ними, вознесся на небо и воссел одесную Бога. А они пошли и проповедовали везде, при Господнем содействии и подкреплении слова последующими знамениями. Аминь.(Мк.16:9-20)
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó:/ распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Отцý и Сыну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ныне и прúсно и во вéки векóв, амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé.
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 5
(совмещенный с канóном крестовоскрéсным (глас 5), Борóдицы (глас 5) и канóном прорóка Захáрiи, (глас 8)
ПЕСНЬ 1
Iрмóс: Коня́ и всáдника в мóре Чермнóе,/ сокрушáяй брáни/ мы́шцею высóкою,/ Хрiстóс истрясé,/ Iзрáиля же спасé,// побéдную песнь пою́ща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Тебé тернонóсный еврéйскiй сонм,/ любвé, Благодéтелю, к Тебé не сохрáнь мáтернiя, Хрiстé, венчá,// родоначáльника разрешáюща тернóвное запрещéнiе.
Хор: Слáва, Гóсподи, Святóму Воскресéнiю Твоемý.
Чтец: Воздви́гл еси́ мя пáдшаго в ров,/ преклóнься, Жизнодáвче Безгрéшне:/ и моея́ злосмрáдныя тли, Хрiстé, претерпéв неискушéнно,// Божéственнаго Существá ми́ром мя облагоухáл еси́.
Хор: Пресвятáя Богорóдице, спасú нас.
Богорóдичен: Разреши́ся кля́тва, печáль престá:/ Благословéнная бо и Благодáтная,/ вéрным рáдость возсiя́,// благословéнiе всем концéм цветонося́щи Хрiстá.
Канон крестовоскресный, глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же вóлею на крестé пригвождéнному плóтiю,/ и дрéвняго от изречéнiя дрéвом пáдшаго свобóждшему,// Томý Еди́ному воспои́м: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же из грóба мертвецý воскрéсшу Христý, и пáдшаго совозстáвившу,/ и соседéнием Отéческим украси́вшему,// Томý Еди́ному воспои́м: я́ко прослáвися.
Канон Богородицы, глас 5
Хор: Пресвятáя Богорóдице, спасú нас.
Чтец: Свéта всéльшагося в Тя, Пречи́стая,/ и просвéщшаго мир лучáми Божествá,/ Хрiстá моли́,// просвети́ти вся пою́щiя Тя, Мáти Дéво.
Хор: Пресвятáя Богорóдице, спасú нас.
Чтец: Я́ко украшáема добрóтою добродéтелей, Благодáтная,/ добротвóрное благолéпiе лучéю Дýха,// подъя́ла еси́, Всечи́стая, вся́ческая удобри́вшаго.
Канон прорoка Захaрии, глас 8
Хор: Святы́й прорóче Захáрiе, молú Бóга о нас.
Чтец: Пáмять, прорóче, твою́ восхвали́ти/ Дýха благодáть молю́ помощи́ мне твои́м ходáтайством, взывáя:// Избáвителю Бóгу нáшему воспои́м. (Двáжды)
Хор: Святы́й прорóче Захáрiе, молú Бóга о нас.
Чтец: Житié твоé непорóчно обрéтеся,/ свящéнства украси́ся одéждею и прорóчества светонóсными сiя́нiи,// богоглагóливе, блажéнне. (Двáжды)
Слáва Ѻтцý и Сы́ну и Святóму Дýху.
Тропáрь: Зако́нным венцéм главý украси́в, Захáрiе,/ яви́лся еси́ священноявлéнен, вопiя́:// Избáвителю Бóгу нáшему пои́м.
И҆ ны́не и прúсно и во вéки векóв. Амúнь.
Богорóдичен: Поди́ра одéждею, я́ко Аарóн, одéян,/ ю́же от кóрене Иессéева прозя́бшую Отрокови́цу прiя́л есй,// Избáвителя во чрéве носи́вшую.
Катавáсiя (глас 8): Крест начертáв, Моисéй/ впря́мо жезлóм Чермнóе пресечé,/ Iзрáилю пешеходя́щу;/ тóже обрáтно фараóновым колесни́цам, удáрив, совокупи́,/ вопреки́ написáв непобеди́мое орýжiе.// Тем Хрiстý пои́м, Бóгу нáшему, я́ко прослáвися.
ПЕСНЬ 3
Iрмóс: Водрузи́вый на ничесóмже зéмлю повелéнiем Твои́м,/ и повéсивый неодержи́мо тяготéющую/ на недви́жимем, Хрiстé, кáмени зáповедей Твои́х,// Цéрковь Твою́ утверди́, Еди́не Блáже и Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Желчь ýбо и҆́же из кáмене мед ссáвшiи,/ в пусты́ни чудодéйствовавшему Тебé принесóша, Хрiстé:/ óцет же за мáнну воз благодея́нiе Ти воздáша// óтроцы Iзрáилевы неблагодáрнiи.
Хор: Слáва, Гóсподи, Святóму Воскресéнiю Твоемý.
Чтец: И҆́же дрéвле светови́дным óблаком покрывáеми,/ Живóт во грóбе Хрiстá положи́ша:/ но самовлáстно воскрéс, всем вéрным подадé// тáйно осеня́ющее свы́ше Дýха сiя́нiе.
Хор: Пресвятáя Богорóдице, спасú нас.
Богорóдичен: Ты Мáти Бóжiя несочетáнно родилá еси́,/ И҆́же от Нетлéнна Отцá возсiя́вшаго, кромé болéзней мáтерних:/ тéмже Тя, Богорóдицу, воплощéнна бо родилá еси́ Слóва,// правослáвно проповéдуем.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскрéсл еси́ от грóба, Хрiстé,/ тли смéртныя избáвль// воспевáющих, Жизнодáвче, вóльное Твоé распя́тiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Помáзати ми́ром тéло Твоé миронóсицы, Хрiстé, тщáхуся,/ и не обрéтша возврати́шася,// воспевáюща Твоé Востáнiе.
Глас 5
Хор: Пресвятáя Богорóдице, спасú нас.
Чтец:Лéствица, Éюже к нам сни́де Вы́шнiй,/ истлéвшее естествó испрáвити,/ Ты я́вственно, Чи́стая, всем ны́не ви́дена былá еси́:// Тобóю бо Преблагíй ми́рови бесéдовати благоволи́.
Хор: Пресвятáя Богорóдице, спасú нас.
Чтец: Éже дрéвле предустáвленное, Дéво, тáинство,/ и прéжде век прови́димое вся вéдущему Бóгу,/ лéтом ны́не напослéдок в ложеснáх Твои́х, Всенепорóчная,// конéц прiéм яви́ся.
Глас 8
Хор: Святы́й прорóче Захáрiе, молú Бóга о нас.
Чтец: Егдá кади́ло сложéнiя приноси́л еси́, архiерéе,// тогдá Предтéчи прiя́л еси́ провозвещéнiе. (Двáжды)
Хор: Святы́й прорóче Захáрiе, молú Бóга о нас.
Чтец: Ми́ром свящéнiя свящéнствовати тя помáза, я́ко Аарóна,// тем видéнiя А́нгелова сподóбился еси́. (Двáжды)
Слáва Ѻтцý и Сы́ну и Святóму Дýху.
Тропáрь: У́тро, провозвещáющее вселéнней Тя, Сóлнца Разýмнаго, Спáсе,// Захáрiя Iоáнна роди́л есть.
И҆ ны́не и прúсно и во вéки векóв. Амúнь.
Богорóдичен: Упрáви житié моé, Богороди́тельнице Всечи́стая и жизнь,// я́же Захáрiин дом уясни́вшая.
Катавáсiя (глас 8): Жезл во óбраз тáйны прiéмлется,/ прозябéнiем бо предразсуждáет свящéнника;/ неплодя́щей же прéжде Цéркви/ ны́не процветé Дрéво Крестá// в держáву и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Прорóка, глас 3: Прорóк днесь и свящéнник Вы́шняго,/ Захáрiя предложи́, Предтéчев роди́тель,/ трапéзу своея́ пáмяти,/ вéрныя питáя, питié бо прáвды всем раствори́в,/ сегó рáди скончавáется,// я́ко божéственный таи́нник Бóжiя благодáти.
И҆́кос: Закóна молчáнiем iерáрх связáся Áнгела глáсом,/ Áнгела прiéм Хрiстóва пришéствiя, прорóка и таи́нника,/ с Елiсавéтiю неплóдною и целому́дренною,/ и Тогó Рождествóм обнови́ся благодáть и избавлéнiе/ и примирéнiе нáше всемíрное./ Сегó проповéда Áгнца, и Содéтеля,/ и естеству́ Обнови́теля, от неплодныя утрóбы плод подаю́ща,/ Сы́на же, я́вльшася из Дéвы,/ я́ко божéственный таи́нник Бóжiя благодáти.
Седáлен Прорóка, глас 8: Свящéнствовав Бóгу по закóну/ и прорóчествовав Хрiстá из Дéвы, Захáрiе, воплощéнна от Ду́ха Свя́та,/ яви́лся еси́ вселéнней столп свéтел,/ с высоты́ Прáвды Востóка, весь мiр осiя́юща и в путь ми́рен направля́юща нóги нáша,/ рéкл еси́, спасáюща род наш. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен из Минéи, глас 8: Я́же Непремéннаго Бóга порóждшая,/ пременя́емое при́сно сéрдце моé грехóм и лéностiю, прилóгми льсти́ваго,/ утверди́, Благáя, моли́твами Мéтерними Твои́ми,/ я́ко да и аз благодáрно слáвлю Тя, Богороди́тельнице Марíе,/ поми́луй стáдо Твоé, éже стяжáла еси́, Всенепорóчная.
ПЕСНЬ 4
Iрмóс: Божéственное Твоé разумéв истощáнiе/ прозорли́во, Аввакýм, Хрiстé, со трéпетом вопiя́ше Тебé:/ во Спасéнiе людéй Твои́х// спасти́ помáзанныя Твоя́ пришéл еси́.
Хор: Слáва, Гóсподи, Святóму Воскресéнiю Твоемý.
Чтец: Я́же от Мéрры горчáйшыя вóды,/ я́ко во óбразе проначертáя Пречи́стый Крест Твой, Блáже,/ грехóвное умерщвля́ющ вкушéнiе,// дрéвом услади́л еси́.
Хор: Слáва, Гóсподи, Святóму Воскресéнiю Твоемý.
Чтец: Крест за дрéво разýмное,/ за слáдкую же пи́щу желчь, Спáсе мой, прiя́л еси́,// за тлéнiе же смéрти кровь Твою́ Божéственную излiя́л еси́.
Хор: Пресвятáя Богорóдице, спасú нас.
Богорóдичен: Кромé ýбо сочетáнiя зачалá еси́ нетлéнно во чрéве,/ и без болéзни родилá еси́,// и по Рождествé, Дéва, Бóга плóтiю рóждши, сохрани́лася еси́.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко водрузи́ся на земли́ на лóбнем Крест,/ сокруши́шася вереи́ и врáтницы вéчнiи,// и возопи́ша: слáва си́ле Твоéй, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко сни́де Спас к свя́занным я́ко мертв,/ совоскресóша с Ним и҆́же от вéка умéршiи,// и возопи́ша: слáва си́ле Твоéй, Гóсподи.
Глас 5
Хор: Пресвятáя Богорóдице, спасú нас.
Чтец: Сéрдцем и умóм, душéю же и усты́/ исповéдую всеблагочéстно Тя, Богорóдицу вои́стинну, Чи́стая,/ спасéнiя плод объéмля,// и спасáюся Дéво, моли́твами Твои́ми.
Хор: Пресвятáя Богорóдице, спасú нас.
Чтец: Создáвый от не сýщих вся́ческая,/ от Тебé, Чи́стыя, создáтися я́ко Благодéтель, благоволи́,// на Спасéнiе вéрою и любóвiю Тя пою́щих, Всенепорóчная.
Глас 8
Хор: Святы́й прорóче Захáрiе, молú Бóга о нас.
Чтец: Прорóк Твой, Влады́ко, óбразы закóнными вéрно служáше Тебé// и благодáти сподóбися усмотри́ти Твою́ и҆́стину. (Двáжды)
Хор: Святы́й прорóче Захáрiе, молú Бóга о нас.
Чтец: Свéтом Свет прiя́л еси́, мрáчнейшим ты яснéйшiй, преблажéнне:// закóном бо и благодáть ны́не тебé приложи́ся. (Двáжды)
Слáва Ѻтцý и Сы́ну и Святóму Дýху.
Тропáрь: Бóгу предстоя́й, божéственный Гаврiи́л,// благовествýя, яви́ тебé, блажéнне, глас Слóва и Предтéчу.
И҆ ны́не и прúсно и во вéки векóв. Амúнь.
Богорóдичен: Чи́стое жили́ще Содéтель, Дéво, твáри обрéт Тя, всели́ся,/ Елiсавéтино разреши́вый неплóдство.
Катавáсiя (глас 8): Услы́шах, Гóсподи,/ смотрéнiя Твоегó тáинство,/ разумéх делá Твоя́// и прослáвих Твоé Божествó.
ПЕСНЬ 5
Iрмóс: Одея́йся Свéтом, я́ко ри́зою,/ к Тебé ýтреннюю, и Тебé зовý:/ дýшу мою́ просвети́ омрачéнную, Хрiстé,// я́ко Еди́н Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: И҆́же слáвы Госпóдь в неслáвне зрáце,/ на дрéве обезчéщен вóлею ви́сит,// о божéственней мне слáве несказáнно промышля́я.
Хор: Слáва, Гóсподи, Святóму Воскресéнiю Твоемý.
Чтец: Ты мя преоблéкл еси́ в нетлéнiе, Хрiстé,/ тли смéртныя неистлéнно плóтiю вкуш,// и возсiя́в из грóба триднéвен.
Хор: Пресвятáя Богорóдице, спасú нас.
Богорóдичен: Ты прáвду же и избавлéнiе нам рóждши Хрiстá без сéмене,// свобóдно содéяла еси́ от кля́твы, Богорóдице, естествó прáотца.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ длáни, Спáсе наш, на дрéве,// вся призывáя к Себé, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л еси́ ад, Спáсе мой, Твои́м погребéнiем,// и Твои́м Воскресéнiем рáдости вся испóлнил еси́.
Глас 5
Хор: Пресвятáя Богорóдице, спасú нас.
Чтец: Вси прорóцы Тя я́ве предвозвести́ша/ хотя́щую бы́ти Бóжiю Мáтерь, Богорóдице Чи́стая:// еди́на бо обрелáся еси́, Чи́стая, совершéнна Непорóчная.
Хор: Пресвятáя Богорóдице, спасú нас.
Чтец: Свéтел óблак Тя живóтныя вóды,/ нам тýчу нетлéнiя Хрiстá одожди́вшiй отчáянным,// Чи́стая, познавáем.
Глас 8
Хор: Святы́й прорóче Захáрiе, молú Бóга о нас.
Чтец: Кiдáрь положи́ся на главé твоéй, о прорóче,// в начертáнiи имущь и҆́стинное Божéственное свящéнiе. (Двáжды)
Хор: Святы́й прорóче Захáрiе, молú Бóга о нас.
Чтец: Рáдуется тварь рождествóм твои́м, архiерéе,// ты бо прозя́бл еси́ покая́нiя проповéдника. (Двáжды)
Слáва Ѻтцý и Сы́ну и Святóму Дýху.
Тропáрь: Укрáшено твоé житié препроводи́в,// зáповеди бо вся Госпóдня с Елiсавéтою соверши́л еси́.
И҆ ны́не и прúсно и во вéки векóв. Амúнь.
Богорóдичен: Направля́ется к пéнiю язы́к твой, богоглагóливе,// Неискусобрáчную бо во чрéве нося́щу ви́дел еси́.
Катавáсiя (глас 8): О треблажéнное Дрéво,/ на нéмже распя́ся Хрiстóс, Царь и Госпóдь!/ И҆́мже падé дрéвом прельсти́вый,/ тобóю прельсти́вся,/ Бóгу пригвозди́вшуся плóтiю,// подаю́щему мир душáм нáшим.
ПЕСНЬ 6
Iрмóс: Неи́стовствующееся бýрею душетлéнною,/ Влады́ко Хрiстé, страстéй мóре укроти́,// и от тли возведи́ мя, я́ко Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: В тлéнiе попóлзся родоначáльник, Влады́ко Хрiстé,/ преслýшаннаго брáшна вкуш,// и к животý возведéн бысть стрáстiю Твоéю.
Хор: Слáва, Гóсподи, Святóму Воскресéнiю Твоемý.
Чтец: Живóт низшéл еси́ ко áду, Влады́ко Хрiстé,/ и тлéнiе растлéвшему быв,// тлéнiем источи́л еси́ Воскресéнiе.
Хор: Пресвятáя Богорóдице, спасú нас.
Богорóдичен: Дéва роди́, и рóждши пребы́сть чистá,/ на рукý нося́щаго вся́ческая,// я́ко вои́стинну Дéва Мáти понéсшая.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ длáни Твои́, собирáя далéче расточéнная/ язы́к Твои́х собрáнiя, Хрiстé Бóже наш,// живонóсным Крестóм Твои́м, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л еси́ смерть, и вратá áдова сокруши́л еси́,/ Адáм же свя́занный разрешéн быв, вопiя́ше Тебé:// Спасé мя десни́ца Твоя́, Гóсподи.
Глас 5
Хор: Пресвятáя Богорóдице, спасú нас.
Чтец: И҆́же всемý винóвный, и éже бы́ти всем подáвый,/ я́ко винóвну имя́ше воплощáемь, éже по нам,// Тя, Богомáти Всенепорóчная.
Хор: Пресвятáя Богорóдице, спасú нас.
Чтец: Исцелéнiй, Влады́чице, душепитáтельный точáщiй истóчник/ вéрно притекáющим к покрóву Твоемý благослáвному,// вéмы Тя, Всенепорóчная.
Глас 8
Хор: Святы́й прорóче Захáрiе, молú Бóга о нас.
Чтец: Закóна служáй сéни,/ яви́ся и благодáти проповéдник,// Спáсе наш, сподóбися бо ви́дети Твоé воплощéнiе. (Двáжды)
Хор: Святы́й прорóче Захáрiе, молú Бóга о нас.
Чтец: Сýдными словесы́ укрáшься,/ Слóво присносýщное, Плоть нося́що,// Захáрiе свящéнне, прiя́л есѝ. (Двáжды)
Слáва Ѻтцý и Сы́ну и Святóму Дýху.
Тропáрь: Яви́лся есѝ внутрь хрáма, служá Бóгу,/ таи́нниче богодухновéнне,// iерéй быв досточýден.
И҆ ны́не и прúсно и во вéки векóв. Амúнь.
Богорóдичен: Спáса, Богомáти, во утрóбе, Дéво, нося́щи, Слóва Безначáльнаго,// Елiсавéти познáлася есѝ прорóчице.
Катавáсiя (глас 8): Вóднаго звéря во утрóбе/ длáни Ióна крестови́дно распростéр,/ спаси́тельную Страсть проображáше я́ве./ Тем, триднéвен изшéд,/ премíрное Воскресéнiе прописáше/ Плóтiю пригвождéннаго Хрiстá Бóга// и триднéвным Воскресéнiем мiр просвéщшаго.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 5: Ко áду, Спáсе мой, сошéл есѝ,/ и вратá сокруши́вый я́ко всеси́лен,/ умéрших, я́ко Создáтель, совоскреси́л есѝ,/ и смéрти жáло сокруши́л есѝ,/ и Адáм от кля́твы избáвлен бысть, Человеколю́бче;/ тéмже вси зовéм:// спаси́ нас, Гóсподи.
И҆́кос: Услы́шавша жены́ Áнгеловы глагóлы, отложи́ша рыдáнiе,/ рáдостны бы́вша и трéпетны, ýжас бо ви́деша,/ и се Хрiстóс прибли́жися к ним, глагóля: éже, рáдуйтеся,/ дерзáйте, Аз мíра победи́х, и ýзники свободи́х,/ потщи́теся ýбо ко ученикóм, возвещáюща им:/ я́ко варя́ю вы во грáде Галилéйстем, éже проповéдати.// Тéмже вси Тебé зовéм: спасѝ нас, Гóсподи.
ПЕСНЬ 7
Iрмóс: Превозноси́мый отцéв Госпóдь/ плáмень угаси́, óтроки ороси́, соглáсно пою́щiя:// Бóже, благословéн еси́.
Хор: Слáва, Гóсподи, Святóму Воскресéнiю Твоемý.
Чтец: Плóтiю облóжься я́коже на ýдице льщéнiя,/ Божéственною Твоéю си́лою змíя низвлéкл еси́// возводя́ вопiю́щiя: Бóже, благословéн еси́.
Хор: Слáва, Гóсподи, Святóму Воскресéнiю Твоемý.
Чтец: Земли́ непрохóдное осуществовáвый составлéнiе,/ во грóбе покрывáется плóтiю Невмести́мый.// Емýже вси поéм: Бóже, благословéн еси́.
Хор: Пресвятáя Богорóдице, спасú нас.
Богорóдичен: Еди́ну ýбо Ипостáсь во Двою́ Естествý, Всенепорóчная/ родилá еси́ Воплощéннаго Бóга.// Емýже вси поéм: Бóже, благословéн еси́.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же дрéвом крéстным и҆́дольскую прéлесть разреши́вый,// благословéн Бог отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскресы́й из мéртвых, и сýщiя во áде совоздви́гнувый,// благословéн Бог отéц нáших.
Глас 5
Хор: Пресвятáя Богорóдице, спасú нас.
Чтец: Неопределéнный пребы́в Непрелóжен,/ плóти по Ипостáси соедини́ся, я́ко Благоутрóбен, в Тебé Пресвятéй:// И҆́же Еди́н благословéн Бог отéц нáших.
Хор: Пресвятáя Богорóдице, спасú нас.
Чтец: Невéсту Тя Всенепорóчную, Богорóдице Влады́чице, соглáсно слáвим и Престóл Зижди́теля Твоегó.// Емýже вси поéм: Бóже, благословéн еси́.
Глас 8
Хор: Святы́й прорóче Захáрiе, молú Бóга о нас.
Чтец: Егдá глас вопiю́щаго прiи́де от неплóдныя,/ пáче естествá твоегó язы́ка ýзы разреши́, звáти:// благословéн еси́, Гóсподи Бóже, во вéки. (Двáжды)
Хор: Святы́й прорóче Захáрiе, молú Бóга о нас.
Чтец: Люби́мичь роди́ся Женихóв от неплóдове,/ Рождествó Дéвы провозвещáя я́ве Предтéча вéрою зовýщим:// благословéн еси́, Гóсподи Бóже, во вéки. (Двáжды)
Слáва Ѻтцý и Сы́ну и Святóму Дýху.
Тропáрь: Весь был еси́, Захáрiе, божéственный оргáн Дýха, треблажéнне,/ и прорóка твоé провозвещáше отрочá,// благословéн еси́, зовýща, Гóсподи Бóже, во вéки.
И҆ ны́не и прúсно и во вéки векóв. Амúнь.
Богорóдичен: Закóна исполнéнiе Тя, Отрокови́це,/ глави́зну всегó прорóчествiя Захáрiя зря, познáше, вопiя́:// благословéн, Пречи́стая, Плод Твоегó чрéва.
Катавáсiя (глас 8): Безýмное велéнiе мучи́теля злочести́ваго лю́ди поколебá,/ ды́шущее прещéнiе и злохулéнiе богомéрзкое,/ обáче три óтроки не устраши́ я́рость звéрская,/ ни огнь снедáяй,/ но противоды́шущу росонóсному Дýху,/ со огнéм сýще, поя́ху:// препéтый отцéв и нас Бóже, благословéн еси́.
Продолжение здесь