Неделя 12 по Пятидесятнице. Попразднство Успения Пресвятой Богородицы. УТРЕНЯ (окончание) Час первый
4 сентября́ 2022 гóда. Недéля 12 по Пятидеся́тнице. Попрáзднство Успéнiя Пресвятóй Богорóдицы. Мч. Агафонúка и úже с ним. Глас 3. Воскрéсная прáздничная слýжба для домáшнего (келéйнаго) совершéнiя. совершéнiя.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
ПЕСНЬ 8
Iрмóс: Нестерпи́мому огню́ соедини́вшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благослови́те, вся делá Госпóдня, Гóспода// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлость,/ егдá крест Твой водрузи́ся на лóбнем,/ и тварь преклоня́шеся стрáхом, воспевáющи:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Святóму Воскресéнiю Твоемý.
Чтец: Воскрéсл еси́ Хрiстé из грóба,/ и пáдшаго прельщéнiем, дрéвом испрáвил еси́ Божéственною си́лою, зовýща и глагóлюща:/ благослови́те вся делá Госпóдня, Гóспода,// пóйте и превозноси́те Егó во век.
Хор: Пресвятáя Богорóдице, спасú нас.
Богорóдичен: Храм Бóжiй яви́лася еси́ Вмести́лище одушевлéнное, и Ковчéг:/ Творцá бо человéком, Богороди́тельнице Пречи́стая, примири́ла еси́,/ и достóйно вся делá поéм Тя,// и превознóсим во вся вéки.
Глас 3
Хор: Пресвятáя Богорóдице, спасú нас.
Чтец: Чи́ны ýмныя, я́ко Мáти, превозшлá еси́,/ и близ Бóга бы́вши:/ благослови́м, Благословéнная Дéво, рождествó Твоé,// и превознóсим во вся вéки.
Хор: Пресвятáя Богорóдице, спасú нас.
Чтец: Добрóту естéственную, краснéйшу/ показáла еси́, облиставáющую плоть Божествá./ Благослови́м, Благословéнная Дéво, рождествó Твоé,// и превознóсим во вся вéки.
Глас 1
Хор: Пресвятáя Богорóдице, спасú нас.
Чтец: Глагóлы послéдоваху Божéственному Ковчéгу свящéнному/ все мнóжество Богослóвов в Сióне:/ кáмо и҆́деши ны́не, Ски́нiе, - зовýще, - Бóга Живáго?/ Не престáй призирáющи вéрою пою́щiя:// Содéтеля еди́наго поéм, избáвленнiи, и превознóсим во вся вéки. (Двáжды)
Хор: Пресвятáя Богорóдице, спасú нас.
Чтец: Я́коже, воздéвши рýце, исхóдиши, Всенепорóчная,/ рýце, и҆́миже Бóга носи́ла еси́ плóтiю,/ со дерзновéнiем, я́ко Мáти, реклá еси́ к Рождéнному:/ я́же Ми дал еси́, во вéки сохрани́, вопiю́щiя Тебé:// Содéтеля еди́наго поéм, избáвленнiи, и превознóсим во вся вéки. (Двáжды)
Глас 1
Хор: Святы́й мýчениче Агафонúче, молúте Бóга о нас.
Чтец: От мéста влачи́м на мéсто, страдáльче,/ зéмлю освяти́л еси́ стопáми твои́ми,/ и, преклóнь вы́ю мечý секýщему,// плóти отлучи́лся еси́ и Бóгу соеди́нился еси́.
Хор: Святы́й мýчениче Агафонúче, молúте Бóга о нас.
Чтец: Бiéнiя вся́кая и мýки плотски́я преоби́дел еси́, желáнiем опаля́емь Бóжiим,// и, рáдуяся, совокупи́лся еси́, пóдвиг дóбрый твой скончáв, Вы́шним тьмам.
Благословúм Отцá, и Сы́на, и Святáго Дýха, Гóспода.
Тропáрь: Крéпость низложи́ся безплóтнаго врагá,/ плотскóю нéмощiю мýченицы Хрiстóвы победи́ша сегó,// укрепля́еми всеси́льною крéпостiю Влады́ки.
И҆ ны́не и прúсно и во вéки векóв. Амúнь.
Богорóдичен: Ски́нiю Тя, и Трапéзу, и Божéственный Кiвóт,/ и Стáмну, вмести́вшую Мáнну жи́зни, и святýю Гóру именýем,// Дéво Мари́е, при́сно благословéнная.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 1): Плáмень, орошáющ преподóбныя,/ злочести́выя же попаля́ющ,/ Áнгел Бóжiй всемóщный показá отрокóм,/ живоначáльный же истóчник содéла Богорóдицу,/ тлю смéрти и живóт точáщу пою́щим:/ Содéтеля еди́наго пои́м, избáвленнiи,// и превознóсим во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нóвое чýдо и Боголéпное:/ деви́ческую бо дверь затворéнную/ я́ве прохóдит Госпóдь,/ наг во вхóде,/ и плотонóсец яви́ся во исхóде Бог,/ и пребывáет дверь затворéна./ Сiю́ неизречéнно// я́ко Богомáтерь, величáем.
Хор: Слáва, Гóсподи, Святóму Воскресéнiю Твоемý.
Чтец: Стрáшно есть зрéти Тебé, Творцá/ на дрéве воздви́жена, Слóве Бóжiй,/ плóтски же стрáждуща Бóга за рабы́,/ и во грóбе бездыхáнна лежáща,/ мéртвыя же из áда разреши́вша:// тéмже Тя, Хрiстé, я́ко Всеси́льна, величáем.
Хор: Слáва, Гóсподи, Святóму Воскресéнiю Твоемý.
Чтец: Из тли смéртныя спасл еси́, Хрiстé, прáотцы,/ положéн быв во грóбе мертв,/ и живóт процвéл еси́, мéртвыя воскреси́в,/ руководи́в естествó человéческое ко свéту,/ и в Божéственное облéк нетлéнiе.// Тéмже истóчника Тя свéта при́сно живáго величáем.
Хор: Пресвятáя Богорóдице, спасú нас.
Богорóдичен: Храм и Престóл яви́лася еси́ Бóжiй,/ вóньже всели́ся И҆́же в вы́шних сый,/ рождéйся неискусомýжно, Всечи́стая,/ плóти Твоея́ не отвéрз вся́чески вратá./ Тéмже непрестáнными, Чи́стая, моли́твами Твои́ми,// язы́ки вáрварскiя скóро до концá покори́.
Глас 3
Хор: Пресвятáя Богорóдице, спасú нас.
Чтец:Сы́тость Твои́х похва́л, Дéво,/ благочести́вым вéрным отню́д не бывáет:/ желáнiем бо желáнiе при́сно Божéственное, и Духóвное прiéмлюще,// я́ко Мáтерь Бóжiю, величáем.
Хор: Пресвятáя Богорóдице, спасú нас.
Чтец: Положи́л еси́ нам непосты́дную Моли́твенницу,/ Тебé рóждшую, Хрiстé./ Тоя́ мольбáми Ми́лостива подаéши нам Дýха, Подáтеля блáгости,// от Отца́ Тобóю происходя́ща.
Глас 1
Хор: Пресвятáя Богорóдице, спасú нас.
Чтец: Дивля́хуся Áнгельскiя си́лы, в Сióне смотря́юще своегó Влады́ку,/ жéнскую дýшу рукáми нося́щаго,/ пречи́сто бо Рóждшей сынолéпно провозглашáше:// гряди́, Чи́стая, с Сы́ном и Бóгом прослáвлена бýди.(Двáжды)
Хор: Пресвятáя Богорóдице, спасú нас.
Чтец: Опря́та лик апóстольский богопрiя́тное тéло Твоé,/ со стрáхом зря́ще и глáсом вéлiим вещáюще:// в Небéсныя дóмы к Сы́ну восходя́щи, спасáеши при́сно, Богорóдице, наслéдiе Твоé. (Двáжды)
Глас 1
Хор: Святы́й мýчениче Агафонúче, молúте Бóга о нас.
Чтец: Во святы́х ли́цех свящéнных апóстол, и во дворéх страдáльцев,/ и преподóбных стáдех, и со прорóки причтéн, мýдре Агафони́че,// рáдуяся с ни́ми, Трóице венценóсец ны́не предстои́ши свéтло.
Хор: Святы́й мýчениче Агафонúче, молúте Бóга о нас.
Чтец: Я́ко чýдна рéвность твоя́, я́ко твердá твоя́ вéра,/ я́ко благá я́же к Бóгу твоя́ надéжда, мýчениче,/ я́ко светозáрна твоя́ жизнь,/ я́ко благодáти испóлнена смерть,// безсмéртныя тя слáвы, страстонóсче, сотвори́ причáстника.
Слáва Ѻтцý и Сы́ну и Святóму Дýху.
Тропáрь: Тя, Хрiстóва áгнца, свящéнное заколéнiе, страдáлец добрóту,/ чудéс истóчника, Цéркви крáсное, Богомýдре, украшéнiе,// утверждéнiе вéрных, восхваля́ем по дóлгу, Агафони́че мýдре.
И҆ ны́не и прúсно и во вéки векóв. Амúнь.
Богорóдичен: Грехолюби́вый нрав, и неиспрáвлено житié,/ и грéшну дýшу, и сéрдце осквернéно имéя, блýдный аз,/ припáдаю Тебé, Влады́чице:/ помози́ ми, и исправлéнiе даждь,// прéжде дáже не пости́гнет менé смéртное посечéнiе.
Катавáсiя (глас 1): Побеждáются естествá устáвы/ в Тебé, Дéво Чи́стая:/ дéвствует бо рождествó и живóт предобручáет смерть;/ по рождествé Дéва и по смéрти живá,// спасáеши при́сно, Богорóдице, наслéдiе Твоé.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный пéрвый: Со ученики́ взы́дем на гóру Галiлéйскую,/ вéрою Хрiстá ви́дети/ глагóлюща власть прiя́ти вы́шних и ни́жних, научи́мся:/ кáко учи́т крещáти во и҆́мя Отцá, и Сы́на, и Святáго Дýха, язы́ки вся,// и пребывáти с таи́нники, я́коже обещáся, до скончáнiя вéка.
Слáва Ѻтцý и Сы́ну и Святóму Дýху,
Светúлен Агафонúка: Я́ко благи́х тезоимени́т и побéды вкýпе, / благáго моли́, Агафони́че мýчениче, и щедролюби́ваго Бóга, / благи́х бы́ти ми причáстнику вéчных // и пою́щим вéрно свéтлую твою́ и достохвáльную пáмять.
И҆ ны́не и прúсно и во вéки векóв, амúнь.
Светúлен попрáзднства Успéнiя: Апóстоли, собери́теся погребсти́ тéло еди́ныя Богоневéсты и мáтере Госпóдни. / Рáдуйся, ны́не, Гефсимани́и град весь, / и надгрóбная пóйте на Небесá возлтéвшей // и со áнгелы ликýющей в безконéчней слáве.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 3: Прiиди́те вси язы́цы,/ уразумéйте стрáшныя тáйны си́лу:/ Хрiстóс бо Спас наш, Éже в начáле Слóво,/ распя́тся нас рáди, и вóлею погребéся,/ и воскрéсе из мéртвых, éже спасти́ вся́ческая:// Томý поклони́мся.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Повéдаша вся чудесá/ стрáжiе Твои́, Гóсподи,/ но собóр суеты́ испóлни мздóю десни́цу их,/ скры́ти мня́ше воскресéнiе Твоé,// éже мiр слáвит: поми́луй нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Рáдости вся испóлнишася/ воскресéнiя искýс прiи́мша:/ Марíя бо Магдали́на ко грóбу прiи́де,/ обрéте Áнгела на кáмени седя́ща,/ ри́зами блистáющася и глагóлюща:/ что и҆́щете живáго с мéртвыми?/ Несть зде, но востá, я́коже речé,// предваря́я вы в Галiлéи.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Во свéте Твоéм, Влады́ко,/ ýзрим свет, Человеколю́бче:/ воскрéсл бо еси́ из мéртвых,/ Спасéнiе рóду человéческому дáруя:/ да Тя вся тварь славослóвит Еди́наго Безгрéшнаго,// поми́луй нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры попрáзднства Успéнiя, глас 4: Пéсньми Твоé/ честнóе и богопрiя́тное тéло/ провождáюще,/ Божéственнiи апóстоли вопiя́ху:// камо ны́не и҆́деши, Влады́чице?
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Прiиди́те, земнорóднiи,/ состáвим лик,/ исхóдная вопiю́ще/ в преставлéнiи// Богорóдице днесь.
Воскреснú, Гóсподи, в покóй Твой,/ Ты и Кiвóт святы́ни Твоея́.(Пс.131:18)
Стiхúра: Земля ýбо Твои́м погребéнiем/ благослови́ся, Дéво,/ воздýх же восхождéнiем/ освяти́ся стрáнным,// закóном умирáющи естествá.
Кля́тся Госпóдь Давíду и҆́стиною,/ и не отвéржется eя́.(Пс.131:11А)
Глас 6: Вси земнорóднiи,/ стецéмся усéрдно/ со Безплóтными/ погребсти́ рóждшую// Творцá твáри.
Слáва Отцý и Сы́ну и Святóму Дýху.
Стiхúра евáнгельская пéрвая, глас 1: На гóру ученикóм идýщим за земнóе вознесéнiе,/ предстá Госпóдь, и поклони́вшеся Емý,/ и дáнныя влáсти вездé научи́вшеся,/ в поднебéсную посылáхуся/ проповéдати éже из мéртвых воскресéнiе,/ и éже на небесá возшéствiе:/ и҆́мже и во вéки спребывáти нелóжный обещáся Хрiстóс Бог,/ и Спас душ нáших.
И҆ ны́не и прúсно и во вéки векóв, амúнь.
Богорóдичен, глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 3: Да веселя́тся небéсная, да рáдуются земнáя; я́ко сотворѝ держáву мы́шцею Своéю Госпóдь, попрá смéртiю смерть,пéрвенец мéртвых бысть; из чрéва áдова избáви нас, и҆ подадé мíрови вéлiю ми́лость.
Слáва Отцý и Сы́ну и Святóму Дýху.
Тропáрь Успéнiя, глас 1: В рождествé дéвство сохрани́ла eси́, во успéнiи ми́ра не остáвила eси́, Богорóдице, престáвилася eси́ к животý, Мáти сýщи Животá, и моли́твами Твои́ми избавля́еши от смéрти дýши нáша.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк Успéнiя, глас 2: В моли́твах Неусыпáющую Богорóдицу и в предстáтельствах непрелóжное уповáнiе гроб и умерщвлéнiе не удержáста: я́коже бо Животá Мáтерь к животý престáви во утрóбу Всели́выйся приснодéвственную.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословѝ.
Хрiстóс, и҆́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу