Неделя 8 по Пятидесятнице. ВСЕНОЩНОЕ БДЕНИЕ.УТРЕНЯ (окон.) ЧАС ПЕРВЫЙ. Успение святой праведной Анны
7 áвгуста 2022 гóда. Недéля 8 по Пятидеся́тнице. Успéнiе св. прав. Áнны, мáтери Пресвятóй Богорóдицы. Глас 7. Всeнóщное бдéнiе для домáшнего (келéйнаго) совершéнiя. Слýжба мiрскúм чúном.
Окончáние всенóщного бдéния. Начáло здесь ( великая вечéрня), здесь ( ýтреня) здесь ( продолжéние ýтрени с канóном)
ПЕСНЬ 8
Iрмóс: Неопáльная огню́ в Сiнáи причáщшаяся Купинá,/ Бóга яви́ медленоязы́чному и гугни́вому Моисéови,/ и óтроки рéвность Бóжiя/ три непребори́мыя во огни́ певцы́ показá:/ вся делá Госпóдня Гóспода пóйте,// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Пречи́стый Áгнец словéсный за мiр заклáн быв,/ престáви я́же по закóну приноси́мая,/ очи́стив сегó кромé прегрешéнiй я́ко Бог, при́сно зовýща:// вся делá Госпóдня, Гóспода пóйте, и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Нетлéнна не сýщи прéжде стрáсти,/ воспрiя́тая от Создáтеля плоть нáша,/ по стрáсти и воскресéнiи неприкосновéнна тлéнiю устрóися,/ и смéртныя обновля́ет, зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасú нас.
Богорóдичен: Твоé чистóтное и всенепорóчное, Дéво,/ сквéрное и мéрзское вселéнныя очи́сти,/ и былá еси́ нáшего примирéнiя к Бóгу винá, Пречи́стая:/ тéмже Тя, Дéво, вся делá благослови́м,// и превознóсим во вся вéки.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Претерпéвшаго стрáсти вóлею,/ и на крестé пригвождéна хотéнiем,/ и разрýшшаго си́лы áдовы,// пóйте свящéнницы, лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Упраздни́вшаго смéрти держáву,/ и от грóба воскрéсшаго со слáвою,/ и спáсшаго человéческiй род,// пóйте свящéнницы, лю́дiе превозноси́те во вся вéки.
Глас 7
Хор: Пресвятáя Богорóдице, спасú нас.
Чтец: Свéтом рождествá Твоегó,/ страннолéпно вселéнную просвети́ла еси́, Богороди́тельнице,/ сýща бо вои́стинну Бóга на объя́тiях нóсиши Твои́х,/ просвещáюща вéрныя при́сно зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасú нас.
Чтец: Поéм, Чи́стая, благочéстно Твоé чрéво,/ Бóга вмести́вшее несказáнно воплощáема,/ дáвшаго всем вéрным богоразýмiя просвещéнiе, при́сно зовýщим:/ вся делá Госпóдня Гóспода пóйте,// и превозноси́те во вся вéки.
Глас 4
Припéв: Святáя прáведная Áнно, молù Бóга о нас.
Тропáрь: Мáти еди́ныя Богорóдицы, я́же неплóды прéжде, ны́не же прамáти Хрiстóва,/ я́коже неплóдства, си́це и мéртвости, совлéкши одéжду, во странé живýщих вопiéт:// Гóспода пóйте, делá, и превозноси́те Егó во вся вéки. (Двáжды)
Припéв: Святáя прáведная Áнно, молù Бóга о нас.
Тропáрь: Хрiстóс тебé двéри Вы́шнiя отвéрзе, рáдостно тя прiя́т,/ я́ко дверь родилá еси́, éюже Сам прóйде и затворéну яви́ по исхождéнiи,/ Богомýдрая достойнопéтая Áнно,// тéмже тя почитáем, вéрнiи, во вéки. (Двáжды)
Благословúм Ѻтцá, и Сы́на, и Святáго Дýха, Гóспода.
Тропáрь: Свя́то житié скончáвши, Святы́я Приснодéвы мáти былá еси́,/ Я́же Пресвятóе Слóво породи́, освящéнiе и избавлéнiе нам подаю́ща,/ Богомýдрая и досточýдная Áнно,// тéмже тя поéм при́сно, вéрнiи, во вéки.
И҆ ны́не и прúсно и во вéки векóв. Амúнь.
Богорóдичен: Мнóгими мя содержи́ма бедáми и бýрею грехóвною бéдствующаго,/ ко пристáнищу невлáемому дыхáнiй Дýха, Богороди́тельнице Влады́чице, ны́не настáви:/ пристáнище бо еси́ хрiстiáн.// Тéмже Тя поéм во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Ѻ́троки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Возглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стих)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нетлéнiя искушéнiем рóждшая,/ и всехитрецý Слóву плоть взаимодáвшая,/ Мáти неискусомýжная Дéво Богорóдице,/ Прiя́телище Нестерпи́маго,/ Селó Невмести́маго Зижди́теля Твоегó,// Тя величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же божествý страсть прилагáющiи,/ заусти́теся вси чуждемýдреннiи:/ Гóспода бо слáвы плóтiю распя́та,/ не распя́та же естествóм божéственным,// я́ко во двою́ естествý Еди́наго величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же телесéм востáнiю невéрующiи,/ ко Хрiстóву шéдше грóбу, научи́теся:/ я́ко умерщвлéна бысть, и воскрéсе пáки плоть Жизнодáвца,// во уверéнiе послéдняго воскресéнiя, на нéже уповáем.
Хор: Пресвятáя Богорóдице, спасú нас.
Богорóдичен: Не божéств Трóицу, но Ипостáсей,/ нижé еди́ницу Лиц, но Божествá чтýще,/ ссецáем же Сiю́ деля́щих:// сливáем же пáки, слiя́нiе дерзáющих на Сiю́, Ю́же величáем.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Свет от Свéта, Ѻ́тчее сiя́нiе слáвы безлéтно осiя́вый,/ я́коже во тьме человéческому житiю́ Хрiстóс возсiя́,/ и гоня́щую прогнá тьму:// егóже непрестáнно вéрнiи величáем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Стрáсти плотскíя, и крéпость божествá, во Хрiстé ви́дяще,/ мýдрствующiи еди́но слóжное естествó, да посрáмятся:/ той бо я́ко человéк ýбо умирáет,// я́коже всегó Содéтель востаéт.
Глас 7
Хор: Пресвятáя Богорóдице, спасù нас.
Чтец: Рáдости нам вéчныя ходáтаица и весéлiя яви́лася еси́/ Приснодéво Отрокови́це, Избáвителя рóждши,/ и҆́стиною и Дýхом божéственным Тогó чтущих,// я́ко Бóга избавляющаго.
Хор: Пресвятáя Богорóдице, спасù нас.
Чтец: Поя́ Давíд, Твой прáотец, Пречи́стая, Тя/ ковчéг именýет Святы́ни божéственныя,/ преестéственне Бóга вмести́вшую,/ во Отéческих Седя́щаго нéдрех,// Егóже непрестáнно вéрнiи величáем.
Глас 4
Припéв: Святáя прáведная Áнно, молù Бóга о нас.
Тропáрь: От земли́ чрéва твоегó вои́стинну роди́ся земля́ святáя,/ недéланен клас прозя́бши безсéменно, мíрови Питáтеля и Гóспода,// тебé к пи́щи неиждивáемой, Áнно, премýдро престáвльшаго. (Двáжды)
Припéв: Святáя прáведная Áнно, молù Бóга о нас.
Тропáрь: Пáмять твоя́ днесь нам возсiя́, сóлнца светлéйши,/ сiя́нiем богáтых дарóв нас просвещáющи, всечестнáя, и мрак страстéй изымáющи,// ю́же совершáющих сохрани́. (Двáжды)
Слáва Ѻтцý и Сы́ну и Святóму Дýху.
Тропáрь: Божéственный нас Iоаки́м и Áнна Богомýдрая и всеслáвная,/ супрýг честны́й и светонóсный, созывáют божéственне весели́тися сих прáздником,// егóже уясни́ Светодáвец всех Госпóдь.
И҆ ны́не и прúсно и во вéки векóв. Амúнь.
Богорóдичен: Марíе Госпожé всех, вся́кими мя порабощéна согрешéнiи ны́не свободи́:/ Самá бо Свободи́теля родилá еси́ всех,// рабóты нас избáвльшаго грехóвныя, Божéственным мановéнiем.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный oсьмы́й: Два Áнгела ви́девши внутрь грóба, Марíя удивля́шеся,/ и Хрiстá не знáющи, я́ко вертогрáдаря вопрошáше:/ гóсподи, где положи́л еси́ тéло Iисýса моегó?/ Звáнiем же Тогó познáвши бы́ти Самогó Спáса,/ слы́ша: не прикасáйся Мне, ко Отцý отхождý,// рцы брáтiи Моéй.
Светúлен св. прав. Áнны: Достодóлжно воспоéм Богозвáнную Áнну:/ Богорóдицу бо та Дéву Марíю рóждши пáче надéжды,/ срóдница по плóти Хрiстá, Избáвителя нáшего, яви́ся,// сiю́ боголéпно прiéмшаго днесь в Вы́шних, о нас моля́щуюся и о умирéнiи мíра.
Слáва Ѻтцý и Сы́ну и Святóму Дýху.
Ин светúлен св. прав. Áнны: Нéбо рóждши, Áнно, нóвое, Марíю, Éюже возсiя́ слáвы Сóлнце,/ днесь от земли́ к Небéсным прехóдиши,// Хрiстý срáдующися, преслáвная.
И҆ ны́не и прúсно и во вéки векóв. Амúнь.
Богорóдичен воскрéсного Ексапостилáрiя: От Трóицы родилá еси́, Отрокови́це,/ еди́наго неизречéнно, во двою́ естествý сýща,/ и сугýба дéйством и еди́наго ипостáсiю./ Тогó ýбо моли́ при́сно, о и́же вéрою покланя́ющихся,/ от вся́каго навéта врáжiя избáвитися:/ я́ко вси к Тебé ны́не прибегáем,// Влады́чице Богорóдице.
ХВАЛИТНЫ
Хор, глас 2: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 7: Воскрéсе Хрiстóс из мéртвых,/ разрýш смéртныя ýзы:/ благовести́ землé, рáдость вéлiю,// пóйте Небесá Бóжiю слáву.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Воскресéнiе Хрiстóво ви́девше,/ поклони́мся святóму Гóсподу Iисýсу:// еди́ному безгрéшному.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Хрiстóву воскресéнiю клáняющеся не престáем:/ Той бо спасл есть нас от беззакóнiй нáших,/ Святы́й Госпóдь Iисýс,// явлéй воскресéнiе.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Что воздáмы Гóсподеви о всех, я́же воздадé нам?/ Нас рáди Бог в человéцех,/ за истлéвшее естествó Слóво плоть бысть,/ и всели́ся в ны, к неблагодáрным, Благодéтель:/ к плéнником, Свободи́тель:/ ко и҆́же во тьме седя́щим, Сóлнце Прáвды:/ на Крестé, безстрáстный: во áде, свет:/ в смéрти, живóт: воскресéнiе, пáдших рáди./ К Немýже возопiи́м:// Бóже наш, слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры св. прав. Áнны, глас 8: Пáмять совершáюще честнýю,/ Тебé воспевáем, Хрiстé,/ преслáвно Áнну от жи́зни приврéменныя/ к непрестаю́щей слáве престáвльшаго ны́не,/ я́ко мáтерь сýщую без сéмене рóждшiя Тя пáче естествá// Богорóдицы и Приснодéвы Мáтере.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Пáмять святýю совершáюще прáотец Хрiстóвых/ Iоаки́ма и Áнны, честны́х и непорóчных,/ прославля́ем непрестáнно Избáвителя/ и Щéдраго Гóспода,/ сих престáвльшаго к жи́зни// нестарéемей и нетлéнней.
Рáдуйтеся, прáведнiи, о Гóсподе,/ прáвым подобáет похвалá.
Стiхúра: К невещéственным ликóм и прáведных селéнiем,/ идéже áнгельстiи чи́ни,/ идéже святы́х собóр,/ рáдость прáзднующих совершáется,/ и ны́не дýхи прáведных Iоаки́ма и Áнны всели́,// и́хже благочéстно восхваля́юще, ублажи́м.
Блажéни вси, боя́щiися Гóспода,/ ходя́щiи в путéх Егó.
Глас 2: Прiиди́те, любодéвственнiи вси/ и чистоты́ рачи́телiе,/ прiиди́те, прáзднуем Áннино честнóе успéнiе:/ и҆́бо та породи́ пáче естествá истóчника жи́зни,/ Марíю Богоотрокови́цу,/ из Нея́же роди́ся Избáвитель,// просвещáяй и освящáяй дýши нáша.
Слáва Ѻтцý и Сы́ну и Святóму Дýху.
Стiхúра евáнгельская, глас 8: Марíины слéзы не всýе проливáются тéпле,/ се бо сподóбися и учáщих Áнгелов,/ и видéнiя Самогó Iисýса./ Но ещé земнáя мýдрствует, я́ко женá немощнáя:/ тéмже и отсылáется не прикасáтися Хрiстý./ Но обáче проповéдница посылáется Твои́м ученикóм,/ и҆́мже благовествовáнiе нося́щи,/ éже ко Отéческому жрéбiю восхóд возвещáющи.// С нéюже сподóби и нас явлéнiя Твоегó, Влады́ко Гóсподи.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрiстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Хрiстóс, и҆́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрiстý, Царéви нáшему Бóгу.
Прiиди́те, поклони́мся и припадéм Самомý Хрiстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 7: Разруши́л еси́ Крестóм Твои́м смерть, отвéрзл еси́ разбóйнику рай; мvронóсицам плач преложи́л еси́ и Апóстолом проповéдати повелéл еси́, я́ко воскрéсл еси́, Хрїстé Бóже, дáруяй мíрови вéлiю ми́лость.
Слáва Отцý и Сы́ну и Святóму Дýху.
Тропáрь св. прав. Áнны, глас 4: Жизнь рóждшую во чрéве носи́ла еси́, Чи́стую Богомáтерь, Богомýдрая А́нно. Тéмже к прiя́тiю Небéсному, идéже веселя́щихся жили́ще, в слáве рáдующися, ны́не престáвилася еси́, чтýщим тя любóвiю прегрешéнiй прося́щи очищéнiе, присноблажéнная.
И҆ ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрiстé, Сыне Бóжiй, поми́луй нас. Ами́нь.
КОНДАК
Кондáк св. прав. Áнны, глас 2: Прароди́телей Хрїстóвых пáмять прáзднуем, тех вéрно прося́ще пóмощи избáвитися всем от вся́кiя скóрби, зовýщим: Бог наш с нáми, сих прославлéй, я́коже благоволи́.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрiстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрiстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Отцý и Сыну и Святóму Дýху, и ны́не и при́сно и во вéки векóв, аминь.
Гóсподи, поми́луй. (3 раза)
Гóсподи, благословᴎ́.
Хрiстóс, и҆́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу