НЕДЕЛЯ 4-я по ПАСХЕ, O РАССЛАБЛЕННОМ. ВСЕНОЩНОЕ БДЕНИЕ. УТРЕНЯ (продолжение). КАНОН. Глас 3.
15 мáя 2022 гóда. Недéля 4 по Пáсхе, о расслáбленном. Глас 3. Послéдованiе Всенóщнаго бдéнiя для домáшнего (келéйнаго) совершéнiя. Вся воскрéсная слýжба прáздника (по Трióди).
Начало зри здесь ( великая вечерня) и здесь ( утреня)
Чтец: Слáва Отцý и Сыну и Святóму Дýху, и ныне и прúсно и во вéки векóв, амúнь.
Аллилýiа, аллилýiа, аллилýiа, слáва Тебé Бóже. (3 раза)
Гóсподи, помилуй. (12 раз)
Хор (по кафíсме седáльны, глас 2): Вся человéческая воспрiи́м, вся на́ша присво́ив,/ на Крестé пригвозди́тися благоволи́л еси́, Тво́рче мой,/ смерть прiи́м претерпéти, я́ко Человéк,/ да человéческое от смéрти изба́виши, я́ко Бог./ Тéмже, я́ко Жизнода́вцу, вопiéм Ти:// сла́ва, Хрiстé, благоутро́бiю Твоемý.
Стих: Исповéмся Тебé Гóсподи всем сéрдцем моúм,/ повéм вся чудесá Твоя.
Непостижи́мое распя́тия, и несказа́нное воста́нiя,/ богосло́вствуем вéрнiи, та́инство неизречéнное:/ днесь бо смерть и ад плени́ся,/ род же человéческiй в нетлéнiе облечéся./ Тем благодаря́ще вопiéм Ти:// сла́ва, Хрiстé, воста́нию Твоемý.
Слáва Отцý и Сыну и Святóму Дýху, и ны́не и прúсно и во вéки векóв, амúнь.
Небéсная любо́вiю веселя́хуся,/ и земна́я трéпетом ужаса́хуся,/ егда́ пречи́стый глас на́йде на Тя, Богоро́дице:/ еди́но бо торжество́ обои́м возсiя́,/ егда́ первозда́ннаго от сме́рти изба́ви./ Тем со А́нгелом вопiéм Ти:// ра́дуйся, Чи́стая Дéво Ма́ти.
Пение Непорочных на воскресной утрене назначается Уставом до отдания Воздвижения (21 сентября), кроме совпадения с воскресным днем полиелейного или бденного праздника. 118-й псалом (17-я кафизма) поется на 5-й глас, независимо от недельного гласа, и сразу после него тропари «Ангельский собор…». В приходской практике вместо Непорочных на воскресных всенощных бдениях обычно поется полиелей.
[НЕПОРОЧНЫ]Избраннии стихи из псалма 118: (глас 5 всегда): Блажéни непорóчнiи в путь, ходящiи в закóне Госпóдни. Блажéни испытáющiи свидéнiя Егó, всем сéрдцем взыщут Егó, не дéлающiи бо беззакóнiя, в путéх Егó ходиша. Ты заповéдал еси зáповеди Твоя сохранити зелó. Дабы испрáвилися путié мои, сохранити оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научити ми ся судьбáм прáвды Твоея. Оправдáнiя Твоя сохраню, не остáви менé до зелá. В чесóм испрáвит юнéйший путь свой? Внегдá сохранити словесá Твоя. Всем сéрдцем моим взыскáх Тебé, не отрини менé от зáповедей Твоих. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи мя оправдáнiем Твоим.
ПОЛИЕЛЕЙ
Хор: Хвали́те Имя Госпóдне, хвали́те, раби́ Гóспода.
Аллилýiа (трúжды)
Благословéн Госпóдь от Сióна, живы́й во Iерусали́ме.
Аллилýiа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýiа (трúжды)
Исповéдайтеся Бóгу Небéсному, я́ко в век ми́лость Егó.
Аллилýiа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есú, Гóсподи,/научú мя оправдáнiем Твоúм.
Áнгельский собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есú, Гóсподи,/научú мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел миронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есú, Гóсподи,/научú мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есú, Гóсподи,/научú мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышляете?/ Яко Бог бо, воскрéсе от грóба.
Слáва Отцý и Сы́ну и Святóму Дýху.
Трóичен: Поклони́мся Отцý/ и Егó Сынови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýiа, аллилýiа, аллилýiа, слáва Тебé Бóже. (3 раза)
Гóсподи, поми́луй. (3 раз)
Слáва Отцý и Сыну и Святóму Дýху, и ныне и при́сно и во вéки векóв. Аминь.
Ипакоú прáздника Триóди (Недéли о расслáбленном), глас 3: Удивля́я видéнiем,/ орошáя глагóланiи,/ блистáяйся Áнгел мvронóсицам глагóлаше:/ что живáго и́щете во грóбе;/ востá истощи́вый грóбы./ Тли Премени́теля разумéйте Непремéннаго./ Рцы́те Бóгови: коль стрáшна делá Твоя́,// я́ко род спасл еси́ человéческiй.
СТЕПЕННА, ГЛАС 3
1 АНТИФОН
Плен Сióнь Ты изъя́л есú от Вавилóна:// и менé от страстéй к животý привлецы́, Слóве. (Дважды)
В юг сéющии слезáми Божéственными,// жнут клáсы рáдостiю присноживóтiя. (Дважды)
Слáва Отцý и Сыну и Святóму Дýху.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
И ныне и прúсно и во вéки векóв. Амúнь.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
2 АНТИФОН
Аще не Госпóдь созúждет дом добродéтелей, всýе труждáемся:// дýшу же покрывáющу, никтóже наш разорúт град. (Дважды)
Плодá чрéвна Дýхом сынотворéное// Тебé, Хрiстý, я́коже и Отцý, святíи всегдá суть. (Дважды)
Слáва Отцý и Сыну и Святóму Дýху.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
И ныне и прúсно и во вéки векóв. Амúнь.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
3 АНТИФОН
Боя́щiися Гóспода блажéни, в путú ходя́ще зáповедей:// снедя́т бо живóтное всеплóдiе. (Дважды)
Ѻ́крест трапéзы Твоея́ возвесели́ся,// зря Твоя́, Пастыреначáльниче, исчáдiя, нося́ща вéтви благодéланiя. (Дважды)
Слáва Отцý и Сыну и Святóму Дýху.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
И ныне и прúсно и во вéки векóв. Амúнь.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
ПРОКИМЕН
Чтец: Прокимен, глас трéтий. Рцы́те во язы́цех, я́ко Госпóдь воцари́ся, и́бо испрáви вселéнную, я́же не подви́жится.
Хор: Рцы́те во язы́цех, я́ко Госпóдь воцарúся,/ úбо испрáви вселéнную, я́же не подвúжится.
Чтец: Воспóйте Гóсподеви песнь нóву, воспóйте Гóсподеви вся земля́.
Хор: Рцы́те во язы́цех, я́ко Госпóдь воцарúся,/ úбо испрáви вселéнную, я́же не подвúжится.
Чтец: Рцы́те во язы́цех, я́ко Госпóдь воцари́ся,
Хор: Ибо испрáви вселéнную, я́же не подвúжится.
Чтец: Гóсподу помóлимся.
Хор: Гóсподи, помúлуй.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Чтец: Вся́кое дыхáние да хвáлит Гóспода.
Хор: Всякое дыхáние да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáние да хвáлит Гóспода.
Чтец:Вся́кое дыхáние.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Лк.зач.112): Во врéмя óно, во еди́ну от суббóт, зелó ра́но, прiидóша жены́ на гроб, нося́ще я́же уготóваша арома́ты, и другíя с ни́ми. Обретóша же ка́мень отвалéн от грóба, и вшéдше, не обретóша телесé Гóспода Iисýса. И бысть не домышля́ющимся им о сем, и се мýжа два ста́ста в них в ри́зах блеща́щихся. Пристра́шным же бы́вшим им, и поклóншим ли́ца на зéмлю, рекóста к ним: что и́щете жива́го с мéртвыми? Несть зде, но воста́. Помяни́те, я́коже глагóла вам, ещé сый в Галилéи, глагóля, я́ко подоба́ет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтiй день воскрéснути. И помянýша глагóлы Егó. И возвра́щшася от грóба, возвести́ша вся сiя́ единомуна́десяте и всем прóчим. Бя́ше же Магдали́на Марíя, и Iоа́нна, и Марíя Iа́ковля, и прóчiя с ни́ми, я́же глагóлаху ко апóстолом сiя́. И яви́шася пред ни́ми я́ко лжа глагóлы их, и не вéроваху им. Петр же воста́в течé ко грóбу, и прини́к ви́де ри́зы еди́ны лежа́ща, и оты́де, в себé дивя́ся бы́вшему.
[Русский синодальный перевод]В то время, в первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем Апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (Лк 24:1-12).
Русский синодальный перевод
Хор: Слáва Тебé, Гóсподи, слáва Тебé.
Воскресéнiе Хрiстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрiстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и́мя Твоé именýем. Прiиди́те вси вéрнiи, поклони́мся Святóму Хрiстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó:/ распя́тiе бо претерпéв, смéртiю смерть разруши́. (трúжды)
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Иерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы.
Слáва Отцý и Сыну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ныне и прúсно и во вéки векóв, амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé.
Стихúра, глас 6: Воскрéс Iисýс от грóба,/ якоже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Отцý и Сыну и Святóму Дýху, и ныне и прúсно и во вéки векóв, амúнь.
КАНОН ПАСХИ, ГЛАС 1
(совмещенный с каноном праздника Трiоди (недели о расслабленном) глас 3)
ПЕСНЬ 1
Iрмóс: Воскресéнiя день,/ просвети́мся, лю́дiе./ Пáсха, Госпóдня Пáсха:/ от смéрти бо к жизни,/ и от землѝ к небесѝ,/ Христóс Бог нас преведé,// побéдную пою́щiя. (Двáжды)
Припéв: Христóс воскрéсе из мéртвых.
Тропáрь: Очи́стим чýвствiя, и ýзрим непристýпным свéтом Воскресéнiя, Хрiстá блистáющася, и рáдуйтеся, рекýща, я́сно да услышим, побéдную поюще. (Двáжды)
Припéв: Христóс воскрéсе из мéртвых.
Тропáрь: Небесá ýбо достóйно да веселя́тся, земля́ же да рáдуется, да прáзднует же мiр, ви́димый же весь и неви́димый: Христóс бо востá, весéлiе вéчное. (Двáжды)
Припéв: Пресвятáя Богорóдице, спасú нас.
Богорóдичен: Умерщвлéнiя предéл сломи́ла еси, вéчную жизнь рóждшая Хрiстá, из грóба возсия́вшаго днесь, Дéво Всенепорóчная, и мiр просветившаго.
Припéв: Пресвятáя Богорóдице, спасú нас.
Богорóдичен: Воскрéсшаго ви́девши Сына Твоегó и Бóга, рáдуйся со апóстолы Богоблагодáтная Чи́стая: и éже рáдуйся пéрвее, яко всех рáдости винá, воспрiя́ла еси, Богомáти Всенепорóчная.
Канон Трióди, глас 3
Припéв: Слáва Тебé, Бóже наш, слáва Тебé.
Тропáрь: Дéйствуяй зна́менiя, творя́й чудеса́ еди́не Царю́,/ распя́тiе во́лею претерпéл есѝ, я́ко Щедр,// и смерть смéртiю умертви́в, оживотвори́л есѝ нас.
Припéв: Слáва Тебé, Бóже наш, слáва Тебé.
Тропáрь: Во Хрiстóве воста́нiи лю́дiе днесь ликýим вéрно,/ пленéн бысть ад,/ ю́зники я́же содержа́ше, отдадé со тща́нiем,// пою́щiя вели́чiя Бóжiя.
Припéв: Слáва Тебé, Бóже наш, слáва Тебé.
Тропáрь: Си́лою Божéственною,/ иногда́ разсла́бленнаго сло́вом Твои́м Хрiстé стягнýвый,/ и повелéвый емý одр взя́ти,// мно́гим врéменем немощствýющую лю́те дýшу мою́ исцели́.
Припéв: Слáва Тебé, Бóже наш, слáва Тебé.
Тропáрь: В купéль иногда́ óвчую А́нгел схожда́ше,/ и еди́наго исцелева́ше на вся́кое лéто:/ крещéнiем же Божéственным ны́не очища́ет// безчи́сленная мнóжества Хрiстóс.
Слáва Отцý и Сыну и Святóму Дýху.
Трóичен: В трiéх Ли́цех, еди́ном же Естествé/ безнача́льнаго Бо́га пои́м непреста́нно со безпло́тными,/ Отца́, Сло́ва и Дýха,// Ца́рство и держа́ву имýща нераздéльную.
И ныне и прúсно и во вéки векóв. Аминь.
Богорóдичен: Чтýщiй сей, Чи́стая, град Твой всегда́ ве́рно,/ спаса́й от бед, плене́нiя ва́рварскаго, междоусо́бныя бра́ни, и меча́,// и вся́каго ино́го преще́нiя.
Катавáсiя: Воскресéнiя день,/ просвети́мся, лю́дiе./ Пáсха, Госпóдня Пáсха:/ от смéрти бо к жизни,/ и от землѝ к небесѝ,/ Хрiстóс Бог нас преведé,// побéдную пою́щiя.
ПЕСНЬ 3
Iрмóс: Прiиди́те, пи́во пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одожди́вша Хрiстá,// в Нéмже утверждáемся. (Двáжды)
Припéв: Христóс воскрéсе из мéртвых.
Тропáрь: Ныне вся испóлнишася свéта,/ нéбо же и земля́, и преиспóдняя:/ да прáзднует ýбо вся тварь/ востáнiе Хрiстóво,// в нéмже утверждáется.(Двáжды)
Припéв: Христóс воскрéсе из мéртвых.
Тропáрь: Вчерá спогребóхся Тебé Хрiстé,/ совостаю́ днесь/ воскрéсшу Тебé,/ сраспинáхся Тебé вчерá,// Сам мя спрослáви Спáсе во Цáрствiи Твоéм. (Двáжды)
Припéв: Пресвятáя Богорóдице, спасú нас.
Богорóдичен: На нетлéнную жизнь прихождý днесь/ блáгостiю рóждшагося из Тебé, Чи́стая,// и всем концéм свет облистáвшаго.
Припéв: Пресвятáя Богорóдице, спасú нас.
Богорóдичен: Бóга, Егóже родилá есѝ плóтiю,/ из мéртвых, я́коже речé,/ востáвша ви́девши, Чи́стая, ликýй,// и Сегó я́ко Бóга Пречи́стая возвеличáй.
Глас 3
Припéв: Слáва Тебé, Бóже наш, слáва Тебé.
Тропáрь: Зря Тебе́ иногда́ сóлнце, на дре́ве ви́сяща, Слóве, свет скры,/ и тряса́шеся земля́ вся,/ ме́ртвiи воста́ша,// ме́ртву бы́вшу Тебе́, Всеси́льне.
Припéв: Слáва Тебé, Бóже наш, слáва Тебé.
Тропáрь: С душе́ю прише́дшу Тебе́ во утрóбу земли́,/ дýши, я́же стяжа́ ад, издава́ше со тща́нiем,// вопию́щiя держа́ве Твое́й песнь благода́рную, еди́не Гóсподи.
Припéв: Слáва Тебé, Бóже наш, слáва Тебé.
Тропáрь: В ле́тех мнóгих немощствýющую лю́те дýшу мою́, Преблаги́й,/ исцели́, я́коже разсла́бленнаго пре́жде,/ я́ко да после́дую Твои́м стезя́м,// я́же показа́л еси́ лю́бящим Тя.
Припéв: Святы́й архiстратúже Мiхаúле, молú Бóга о нас.
Тропáрь: С вы́шними чи́нми Бóжiи, арха́нгеле,/ мольбу́ сотвори́ о ве́рою пою́щих тя,/ соблюда́я и храня́ нас,// жите́йскими страстьмѝ напада́емых.
Слáва Отцý и Сыну и Святóму Дýху.
Трóичен: Сла́ва Отцý, возопiи́м, Сы́ну, и Дýху,/ Еди́н бо есть Естествóм Бог,/ Его́же си́лы вся небе́сныя со стра́хом сла́вят,// Свят, Свят, Свят есѝ, зовýще.
И ныне и прúсно и во вéки векóв. Амúнь.
Богорóдичен: Безсе́менное име́ла есѝ зача́тiе,/ и па́че ума́ Рождествó, Де́во Ма́ти Чи́стая:/ де́ло стра́шное, чýдо преве́лiе,// А́нгелы почита́емое и челове́ки сла́вимое, Отрокови́це Влады́чице.
Катавáсiя: Прiиди́те, пи́во пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одожди́вша Хрiстá,// в Нéмже утверждáемся.
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Кондáк Пáсхи, глас 8: Áще и во гроб снизшéл есѝ, Безсмéртне,/ но áдову разруши́л есѝ си́лу,/ и воскрéсл есѝ, я́ко победитель, Хрiстé Бóже,/ женáм мироно́сицам вещáвый: рáдуйтеся,/ и Твои́м апóстолом мир дáруяй,// пáдшим подая́й воскресéнiе.
Икос: Е́же пре́жде сóлнца Сóлнце заше́дшее иногда́ во гроб,/ предвари́ша ко ýтру, и́щущiя я́ко дне миронóсицы де́вы,/ и друга́ ко друзе́й вопия́ху:/ о други́ни! Прiиди́те, воня́ми пома́жем те́ло живонóсное и погребе́ное,/ плоть воскреси́вшаго па́дшаго Ада́ма, лежа́щую во грóбе./ И́дем, потщи́мся я́коже волсви́, и поклони́мся,/ и принесе́м ми́ра я́ко да́ры, не в пелена́х, но в плащани́це обви́тому,/ и пла́чим, и возопiи́м: о Влады́ко, воста́ни,// па́дшим подая́й воскресе́нiе.
Седáлен прáздника Трióди (о расслáбленном), глaс 3: Глагóл разсла́бленнаго тóкмо стягнý,/ я́ко всеми́рное Слóво еди́но,/ нас ра́ди на земли́ я́вльшагося за благоутрóбiе./ Те́мже и одр нося́, мимохожда́ше,/ а́ще и кни́жницы зре́ти соде́янное не терпя́ху,// злóбы содержи́ми за́вистию, дýши разслабля́ющею.
Слáва Отцý и Сыну и Святóму Дýху, и ныне и прúсно и во вéки векóв, амúнь.
Богорóдичен Трióди, глaс 3: Красотé дéвства Твоегó, и пресвéтлой чистотé Твоéй,/ Гаврии́л удиви́вся, вопiя́ше Ти, Богорóдице:/ кýю Ти похвалý принесý достóйную;/ что же возименýю Тя; недоумева́ю и ужаса́юся./ Тéмже я́ко повелéн бых, вопiю́ Ти:// ра́дуйся, Благода́тная.
ПЕСНЬ 4
Iрмóс: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Áнгела,/ я́сно глагóлюща:/ днесь спасéнiе мíру,/ я́ко воскрéсе Хрiстóс,// я́ко всеси́лен. (Двáжды)
Припéв: Христóс воскрéсе из мéртвых.
Тропáрь: Мýжескiй ýбо пол,/ я́ко развéрзый дéвственную утрóбу,/ яви́ся Хрiстóс:/ я́ко человéк же,/ Áгнец наречéся:/ непорóчен же,/ яко невкýсен сквéрны,/ нáша Пáсха,/ и я́ко Бог истинен// совершéн речéся. (Двáжды)
Припéв: Христóс воскрéсе из мéртвых.
Тропáрь: Яко единолéтный áгнец,/ благословéнный нам венéц Хрiстóс,/ вóлею за всех заклáн бысть,/ Пáсха чисти́тельная,/ и пáки из грóба крáсное// прáвды нам возсiя́ Сóлнце. (Двáжды)
Припéв: Пресвятáя Богорóдице, спасú нас.
Богорóдичен: Создáвый Адáма, Твоегó прáотца, Чи́стая,/ зи́ждется от Тебé,/ и смéртное жили́ще разори́ Своéю смéртiю днесь,/ и озари́ вся// божéственными блистáньми воскресéнiя.
Припéв: Пресвятáя Богорóдице, спасú нас.
Богорóдичен: Егóже родилá еси́ Хрiстá,/ прекрáсно из мéртвых возсiя́вша, Чи́стая, зря́щи,/ дóбрая и непорóчная в женáх и крáсная,/ днесь во спасéнiе всех,// со апóстолы рáдующися, Тогó прославля́й.
Глас 3
Припéв: Слáва Тебé, Бóже наш, слáва Тебé.
Тропáрь: Еврéйский собóр, за́вистiю растаява́емь,/ на Дрéве распя́т Тя, Гóсподи:/ и разори́в осуждéнiе сме́рти,/ я́ко си́лен воста́л еси́,// мир с Собóю совоздви́гнув.
Припéв: Слáва Тебé, Бóже наш, слáва Тебé.
Тропáрь: С мѵ́ры жены́, что неистощи́мое мѵ́ро и́щете; воста́л есть, мѷронóсицам речé, сѣдя́й в бѣ́лых ри́зах, поднебéсную испóлнив мы́сленнагo благоуха́нiя.
Припéв: Слáва Тебé, Бóже наш, слáва Тебé.
Тропáрь: Ра́бiй нося́ ѻ́браз, за мнóгое благоутрóбiе ходя́й пришéл еси́, и здра́ва показа́л еси́, во мнóгих лѣ́тѣх лежа́щаго, слóве, повелѣ́в и ѻ́др взя́ти.
Припéв: Слáва Тебé, Бóже наш, слáва Тебé.
Тропáрь: Áнгел ýбo Госпо́день, на вся́кое лѣ́то схожда́я, во́ду въ купѣ́ли возмуща́ше, соверша́я здра́ва еди́наго то́чiю: Хрiсто́с же мно́жество безчи́сленное божéственным крещéнiем спаса́ет.
Слáва Отцý и Сыну и Святóму Дýху.
Трóичен: Соединя́емая естество́м, и раздѣля́емая ли́цы, есть свята́я Трóица, Ѻтéц пресýщный, соприсносýщный же Сын, и святы́й и еди́ный всеси́льный Дух.
И ныне и прúсно и во вéки векóв. Амúнь.
Богорóдичен: Чи́стая, ка́кo дои́ши; ка́кo же родила́ еси́ Младéнца, Ада́ма дрéвнѣйшаго; ка́кo на рукý нóсиши Сы́на, сýщаго на ра́му херувíмску, я́кo зна́етъ, я́коже вѣ́сть, вся oсуществова́вый.
Катавáсия: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Ангела,/ я́сно глагóлюща:/ днесь спасéнiе мíру,/ я́ко воскрéсе Хрiстóс,// я́ко всеси́лен.
ПЕСНЬ 5
Iрмóс: Утренюем ýтреннюю глубокý,/ и вмéсто ми́ра песнь принесéм Владыце,/ и Хрiстá ýзрим/ прáвды Сóлнце,// всем жизнь возсiя́юща. (Двáжды)
Припéв: Христóс воскрéсе из мéртвых.
Тропáрь: Безмéрное Твоé благоутрóбiе,/ áдовыми ýзами содержи́мiи зряще,/ к свéту идяху Хрiстé,/ весéлыми ногáми,// Пáсху хвáляще вéчную.(Двáжды)
Припéв: Христóс воскрéсе из мéртвых.
Тропáрь: Пристýпим свещенóснiи,/ исходя́щу Хрiстý из грóба, я́ко женихý,/ и спрáзднуем любопрáзднственными чи́нми// Пáсху Бóжiю спаси́тельную.(Двáжды)
Припéв: Пресвятáя Богорóдице, спаси нас.
Богорóдичен: Просвещáется божéственными лучáми и живонóсными/ воскресéнiя Сы́на Твоегó,/ Богомáти Пречи́стая,// и рáдости исполня́ется благочести́вых собрáнiе.
Припéв: Пресвятáя Богорóдице, спаси нас.
Богорóдичен: Не развéрзл еси́ вратá дéвства в воплощéнiи,/ грóба не разруши́л еси́ печáтей, Царю́ создáнiя:// отонýдуже воскрéсшаго Тя зря́щи, Мáти, рáдовашеся.
Глас 3
Припéв: Слáва Тебé, Бóже наш, слáва Тебé.
Тропáрь: Вознесы́йся на Дрéве крéстнем, и совознесы́й мир весь,/ и быв в мéртвых Бóже,// от вéка мéртвыя воздвиза́еши.
Припéв: Слáва Тебé, Бóже наш, слáва Тебé.
Тропáрь: Воскрéсе, я́коже рече, Хрiстóс,/ истощи́вый вся а́дова ца́рствiя,/ и явля́ется апóстолом,// ра́дость подава́я вéчнующую.
Припéв: Слáва Тебé, Бóже наш, слáва Тебé.
Тропáрь: Белообра́зен ви́ден бысть жена́м блиста́яйся А́нгел:/ не ктомý пла́чите, Жизнь ва́ша воста́,// сýщiя во гробéх мéртвыя оживи́вшая.
Припéв: Слáва Тебé, Бóже наш, слáва Тебé.
Тропáрь: Разсла́бленнаго я́ко воздви́гл еси́, Хрiстé,/ разсла́бленную мою́ дýшу преступлéньми оздра́ви,// и шéствовати мне Твоя́ пра́выя стези́ споспешествýй.
Слáва Отцý и Сыну и Святóму Дýху.
Трóичен: Равночéстная тричи́сленная Еди́нице,/ разделя́емая ýбо вéрно Ипоста́сьми,/ соединя́емая же Естествóм есть,// Отéц, Сын и Божéственный Дух.
И ныне и прúсно и во вéки векóв. Амúнь.
Богорóдичен: Безсéменное Рождествó Твоé, Чи́стая,/ непостижи́моé поéм рождéнiе,// блажа́ще Тя, я́ко Ма́терь Творца́ всех и Влады́ки.
Катавáсия: Утренюем ýтреннюю глубокý,/ и вмéсто ми́ра песнь принесéм Владыце,/ и Хрiстá ýзрим/ прáвды Сóлнце,// всем жизнь возсiя́юща.
ПЕСНЬ 6
Iрмóс: Снизшéл еси в преиспóдняя земли,/ и сокрушил еси вереи вéчныя,/ содержáщiя свя́занныя, Хрiстé,/ и триднéвен, яко от ки́та Ióна,// воскрéсл еси от грóба. (Двáжды)
Припéв: Христóс воскрéсе из мéртвых.
Тропáрь: Сохрани́в цéла знáменiя Христé,/ воскрéсл еси от грóба,/ ключи Дéвы не вреди́вый в рождествé Твоéм,// и отвéрзл еси нам рáйскiя двéри. (Двáжды)
Припéв: Христóс воскрéсе из мéртвых.
Тропáрь: Спáсе мой,/ живóе же и нежéртвенное заколéнiе,/ яко Бог Сам Себé/ вóлею привéл Отцý,/ совоскреси́л еси всерóднаго Адáма,// воскрéс от грóба. (Двáжды)
Припéв: Пресвятáя Богорóдице, спаси нас.
Богорóдичен: Возведéся дрéвле держи́мое смéртiю и тлéнiем,/ воплоти́вшимся от Твоегó пречи́стаго чрéва,/ к нетлéнней и присносу́щней жи́зни,// Богорóдице Дéво.
Припéв: Пресвятáя Богорóдице, спаси нас.
Богорóдичен: Сни́де в преиспóдняя земли́,/ в ложеснá Твоя́, Чи́стая, сшéдый,/ и всели́выйся и воплоти́выйся пáче умá,/ и воздви́же с Собóю Адáма,// воскрéс от грóба.
Глас 3
Припéв: Слáва Тебé, Бóже наш, слáва Тебé.
Тропáрь: Вознесы́йся вóлею на Дрéво,/ положи́лся еси́ я́ко мертв во грóбе,/ и сýщiя во а́де мéртвыя вся вкýпе оживи́в, Хрiстé,// воскреси́л еси́ Божéственною си́лою.
Припéв: Слáва Тебé, Бóже наш, слáва Тебé.
Тропáрь: Ад срет Тя Щéдре дóле, огорчи́ся,/ свя́занныя отдава́я со тща́нiем,/ Твоé стра́шное пою́щия, Спа́се, Воскресéнiе,// во гла́сех немóлчных.
Припéв: Слáва Тебé, Бóже наш, слáва Тебé.
Тропáрь: Божéственнiи ученицы́,/ ви́девше Жизнь всех из грóба воста́вша, Хрiста́,/ любо́вiю мнóгою, и нра́вом пра́вым,// и весéлiем душéвным покланя́хуся.
Припéв: Слáва Тебé, Бóже наш, слáва Тебé.
Тропáрь: Дрéвле на одрé болéзненном, в лéтех мно́зех слежа́й,/ Твои́м, Хрiстé, повелéнiем исцелéв, сла́вит,// воспева́я благоутрóбiе Твоé, Жизнода́телю.
Слáва Отцý и Сыну и Святóму Дýху.
Трóичен: Трóицу Ли́цы Тя чту,/ Еди́ницу же Существóм проповéдаю,/ безнача́льне О́тче, Сы́не, Дýше Пра́вый: Бóже всех,// с вы́шними стра́шными вóинствы.
И ныне и прúсно и во вéки векóв. Амúнь.
Богорóдичен: Вся Боже́ственным манове́нием нося́й,/ держи́мь есть, Богорóдице Де́во, во объя́тиях Твои́х,// всех нас восхища́я, от руки́ рабóты лука́ваго, я́ко Щедр.
Катавáсія: Снизшéл есѝ в преиспóдняя землѝ,/ и сокрушил еси вереѝ вéчныя,/ содержáщiя свя́занныя, Хрiстé,/ и триднéвен, яко от ки́та Ióна,// воскрéсл есѝ от грóба.
Гóсподи, помилуй. (3 раза)
Слáва Отцý и Сыну и Святóму Дýху, и ныне и присно и во вéки векóв, аминь.
Кондáк прáздника Триóди (о расслáбленном), глас 3: Дýшу мою́, Гóсподи, во гресéх вся́ческих,/ и безмéстными дея́ньми лю́те разслáблену,/ воздви́гни Божéственным Твои́м предстáтельством,/ я́коже и разслáбленнаго воздви́гл еси́ дрéвле,/ да зову́ Ти, спасáемь:// Щéдрый, слáва Хрiстé, держáве Твоéй.
Икос: Руки́ Твоея́ гóрстiю содержа́й концы́, Iисýсе Бóже, Отцý собезнача́льный, и Дýху Святóму совлады́чествуяй всéми, плóтiю яви́лся еси́, недýги исцеля́я, и стра́сти отгна́л еси́: слепцы́ просвети́л еси́, и разсла́бленнаго слóвом Божéственным Ты возста́вил еси́, семý напра́сно ходи́ти повелéв, и сегó носи́вший одр на ра́му взя́ти. Тéмже вси с ним воспева́ем, и возопiи́м: Щéдрый, сла́ва Хрiстé, держа́ве Твоéй.
ПЕСНЬ 7
Iрмóс: Отроки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачит благолéпiе,/ Един благословéн// отцéв Бог, и препрослáвлен. (Двáжды)
Припéв: Хрiстóс воскрéсе из мéртвых.
Тропáрь: Жены с миры богомýдрыя в след Тебé течáху:/ Егóже, яко мéртва, со слезáми искáху,/ поклонишася рáдующiяся Живóму Бóгу,/ и Пáсху тáйную// Твоим, Христé, ученикóм благовестиша.
Припéв: Хрiстóс воскрéсе из мéртвых.
Тропáрь: Смéрти прáзднуем умерщвлéнiе,/ áдово разрушéнiе,/ инóго житiя вéчнаго начáло,/ и игрáюще поéм Винóвнаго,/ Единаго благословéннаго// отцéв Бóга, и препрослáвленнаго.
Припéв: Пресвятáя Богорóдице, спасú нас.
Богорóдичен: Умертви́в Сын Твой смерть, Всенепорóчная, днесь,/ всем смéртным пребывáющiй живóт/ во вéки векóв даровá,/ еди́н благословéнный// отцéв Бог и препрослáвленный.
Припéв: Пресвятáя Богорóдице, спасú нас.
Богорóдичен: Всем цáрствуяй создáнием, быв человéк,/ всели́ся в Твою́, Богоблагодáтная, утрóбу,/ и распя́тие претерпéв и смерть,/ воскрéсе боголéпно,// совозстáвив нас я́ко всеси́лен.
Глас 3
Припéв: Слáва Тебé, Бóже наш, слáва Тебé.
Тропáрь: Просте́рта Тя на Дре́ве я́ко зря́ше,/ свет скры со́лнце, не могу́щее ми́рови свети́ти,// Тебе́ во́лею заше́дшу Всецарю́, на просвеще́ние всех язы́ков.
Припéв: Слáва Тебé, Бóже наш, слáва Тебé.
Тропáрь: Воскре́сл еси́ истощи́вый гро́бы,/ и плени́вый ад си́лою всеси́льною:// те́мже пое́м честно́е Твое́, Хрiсте́, и Боже́ственное воста́ние.
Припéв: Слáва Тебé, Бóже наш, слáва Тебé.
Тропáрь: Я́ко ме́ртва что Жива́го и́щете?/ Воста́, несть во гро́бе, мироно́сицам вопия́ше дре́вле,// блиста́яйся зра́ком боже́ственный Áнгел.
Припéв: Слáва Тебé, Бóже наш, слáва Тебé.
Тропáрь: Слежа́ща в ле́тех мно́зех разсла́бленнаго сло́вом исцели́вый, вопия́л еси́:// возми́ одр твой и ходи́, поя́ вели́чия Бо́жия.
Слáва Отцý и Сыну и Святóму Дýху.
Трóичен: О Тро́ице, ве́рою пою́щия Тя,/ я́ко Бо́га всех и Влады́ку,/ от вся́ких бед спаса́й,// и Твои́х благ прича́стники сотвори́.
И ныне и прúсно и во вéки векóв. Амúнь.
Богорóдичен: Де́вствуеши, ро́ждши па́че сло́ва,/ пре́жде всех век роди́вшагося от безнача́льна Отца́ нетле́нно:// сего́ ра́ди, Чи́стая, Тебе́ ублажа́ем.
Катавáсія: Ѻ́троки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачи́т благолéпiе,/ Еди́н благословéн// отцéв Бог, и препрослáвлен.
ПЕСНЬ 8
Продолжение здесь