НЕДЕЛЯ 4-я по ПАСХЕ, O РАССЛАБЛЕННОМ. ВСЕНОЩНОЕ БДЕНИЕ. (Завершение утрени). ЧАС ПЕРВЫЙ. Глас 3.
15 мáя 2022 гóда. Недéля 4 по Пáсхе, о расслáбленном. Глас 3. Послéдованiе Всенóщнаго бдéнiя для домáшнего (келéйнаго) совершéнiя. Вся воскрéсная слýжба прáздника (по Трióди).
Окончáние всенóщного бдéния. Начáло здесь ( великая вечерня) и здесь ( утреня) здесь ( канóн)
ПЕСНЬ 8
Iрмóс: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки. (Двáжды)
Припéв: Христóс воскрéсе из мéртвых.
Тропáрь: Прiиди́те, нóваго виногрáда рождéнiя,/ Божéственнаго весéлiя,/ в нарóчитом дни Воскресéнiя,/ Цáрствiя Христóва приобщи́мся,/ пою́ще Егó// яко Бóга во вéки. (Двáжды)
Припéв: Христóс воскрéсе из мéртвых.
Тропáрь: Возведи óкрест óчи твои, Сióне, и виждь:/ се бо прiидóша к тебé,/ яко богосвéтлая свети́ла,/ от зáпада, и сéвера, и мóря,/ и востóка чáда твоя,// в тебé благословящая Хрiстá во вéки. (Двáжды)
Припéв: Пресвятáя Богорóдице, спаси нас.
Богорóдичен: Прiи́де Тобóю в мiр Госпóдь, Дéво Богорóдице,/ и чрéво áдово растóрг,/ смéртным нам воскресéнiе даровá:// Тéмже благослови́м Егó во вéки.
Припéв: Пресвятáя Богорóдице, спаси нас.
Богорóдичен: Всю низложи́в смéрти держáву Сын Твой, Дéво,/ Свои́м воскресéнiем,/ я́ко Бог крéпкiй совознесé нас и обожи́:// тéмже воспевáем Егó во вéки.
Глас 3
Припéв: Слáва Тебé, Бóже наш, слáва Тебé.
Тропáрь: Заве́са раздра́ся, распе́ншуся Тебе́, Спа́се наш,/ и отдава́ше ме́ртвыя, я́же пожре́, смерть:// и ад обнажи́ся, Тебе́ зря в преиспо́дних земли́ бы́вша.
Припéв: Слáва Тебé, Бóже наш, слáва Тебé.
Тропáрь: Где твое́ жа́ло есть, сме́рте;/ где твоя́, а́де, ны́не побе́да?/ Воскре́сшу Царю́, умертви́лся еси́ и поги́бл, не ктомý ца́рствуеши:// Кре́пкий бо взят, я́же име́л еси́ свя́занныя.
Припéв: Слáва Тебé, Бóже наш, слáва Тебé.
Тропáрь: Тецы́те ско́ро, возвести́те апо́столом Воскресе́нiе,/ мvроно́сицам явле́йся ю́ноша веща́ше:/ воскре́се Влады́ка,// и с Ним и́же от ве́ка ме́ртвiи пресла́вно.
Припéв: Слáва Тебé, Бóже наш, слáва Тебé.
Тропáрь: Ле́ты мно́гими слежа́й разсла́бленный, взыва́ше:/ поми́луй мя, Изба́вителю, недоуме́нием содержи́ма.// Сей же повелева́ет емý взя́ти тща́тельно одр, и пра́во ступа́ти.
Благословúм Отцá, и Сы́на, и Святáго Дýха, Гóспода.
Трóичен: Несозда́нное, непресеко́мое Существо́, Триипоста́сное Божество́,/ Отца́ безнача́льна Бо́га, и Сы́на, и Дýха Свята́го// воспои́м согла́сно, серафи́мскую зовýще стра́шную песнь.
И ныне и прúсно и во вéки векóв, амúнь.
Богорóдичен: Сви́ток Тя дре́вле зря́ше Иса́иа, Присноде́во,/ в не́мже пе́рстом О́тчим Сло́во безле́тное написа́ся,/ от вся́каго безслове́сiя спаса́ющее нас,// словесы́ Тя свяще́нными воспева́ющих.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсія: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки.
ПЕСНЬ 9
Iрмóс: Свети́ся, свети́ся,/ нóвый Iерусали́ме:/ слáва бо Госпóдня/ на тебé возсiя́./ Ликýй ны́не/ и весели́ся, Сióне./ Ты же, Чи́стая, красýйся, Богорóдице,// о востáнiи Рождествá Твоегó. (Двáжды)
Припéв: Хрiстóс воскрéсе из мéртвых.
Тропáрь: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси бы́ти,/ до скончáнiя вéка Хрiстé:/ Егóже, вéрнiи,// утверждéнiе надéжди имýще, рáдуемся.(Двáжды)
Припéв: Хрiстóс воскрéсе из мéртвых.
Тропáрь: О Пáсха вéлiя и свящéннейшая, Хрiстé!/ О мýдросте, и Слóве Бóжiй, и сило!/ Подавáй нам истее Тебé причащáтися,// в невечéрнем дни Цáрствiя Твоегó.(Двáжды)
Припéв: Пресвятáя Богорóдице, спаси нас.
Богорóдичен: Соглáсно, Дéво, Тебé блажи́м вéрнiи:/ рáдуйся, двéре Госпóдня:/ рáдуйся, грáде одушевлéнный:/ рáдуйся, Ея́же рáди нам ны́не возсiя́ свет,// из Тебé Рождéннаго из мéртвых Воскресéнiя.
Припéв: Пресвятáя Богорóдице, спаси нас.
Богорóдичен: Весели́ся и рáдуйся божéственная двéре Свéта:/ зашéдый бо Iисýс во гроб возсiя́,/ просiя́в сóлнца светлéе,/ и вéрныя вся озари́в,// Богорáдованная Влады́чице.
Глас 3
Припéв: Слáва Тебé, Бóже наш, слáва Тебé.
Тропáрь: Iису́се, на Дре́ве возвыша́емь, совозне́сл еси́ нас,/ и положи́вся во́лею во гро́бе,/ из гробо́в ме́ртвыя воскреси́л еси́ вся,/ пою́щия держа́ву Твою́ непостижи́мую,// и си́лу Твою́ непобеди́мую.
Припéв: Слáва Тебé, Бóже наш, слáва Тебé.
Тропáрь: Красне́йший от гро́ба возсия́л еси́,/ я́ко жени́х от черто́га, красне́йший Сло́ве,/ и разруши́л еси́ а́да мра́чное,/ и ю́зники изве́л еси́, согла́сно зовýщия:/ сла́ва сла́ве Твое́й,// сла́ва, Иисýсе Бо́же, воста́нию Твоемý.
Припéв: Слáва Тебé, Бóже наш, слáва Тебé.
Тропáрь: Воздыха́нiя же и сле́зы нося́ща,/ с ми́ры во тща́нии всесвяты́й гроб достиго́ша жены́,/ и Христо́ву учи́ми бя́ху ве́рою сла́вному воста́нiю,// е́же пра́зднуем в ра́дости душе́вной веселя́щеся.
Припéв: Слáва Тебé, Бóже наш, слáва Тебé.
Тропáрь: После́доваше здра́вiе те́ла,/ повеле́нiю Твоемý, Хрiсте́/ и ви́димь бя́ше пре́жде разсла́бленный,/ теки́й со тща́нiем, и одр нося́й,/ на не́мже возлежа́ше ле́ты мно́гими,// песносло́вя мно́гую си́лу Твою́.
Слáва Отцý и Сыну и Святóму Дýху.
Трóичен: Свет и Све́тове, Жизнь же и Жи́зни, сла́влю Тя всеблагоче́стно,/ О́тче, Сло́ве и Дýше Святы́й,/ Триипоста́сная Еди́нице, нераздели́мая держа́во, Божество́ несли́тное,// Свят, Свят, Свят, вопия́ с вы́шними си́лами.
И ныне и прúсно и во вéки векóв. Амúнь.
Богорóдичен: От светоно́сных про́йде ложе́сн Твои́х вели́кое Со́лнце Хрiсто́с,/ и мiр просвети́, Пречи́стая, осия́ньми све́тлыми, и тму отъя́т преступле́нiя:// те́мже пое́м Тя, я́ко винý всех до́брых, Богоневе́сто.
Катавáсiя: Свети́ся, свети́ся,/ нóвый Iерусали́ме:/ слáва бо Госпóдня/ на тебé возсiя́./ Ликýй ны́не/ и весели́ся, Сióне./ Ты же, Чи́стая, красýйся, Богорóдице,// о востáнiи Рождествá Твоегó.
Гóсподи, помилуй. (3 раза)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Светилен Пáсхи, самоглáсен: Плóтiю уснýв,/ я́ко мертв,/ Царю́ и Гóсподи,/ триднéвен воскрéсл есѝ,/ Адáма воздви́г от тли,/ и упраздни́в смерть:/ Пáсха нетлéнiя,// мíра спасéнiе.
Слáва Отцу и Сыну и Святóму Духу.
Светúлен Трióди (Недéли о расслáбленном): Предстá Человеколю́бец и всеще́дрый Госпо́дь О́вчей купе́ли, е́же исцели́ти неду́ги:/ обре́те же челове́ка слежáща мно́гими ле́ты, и к нему́ возопи́:// возми́ одр, и иди́ на пути́ прáвыя.
И ныне и присно и во вéки векóв. Аминь.
Светúлен Трióди тойже: Предстá Человеколю́бец и всеще́дрый Госпо́дь О́вчей купе́ли, е́же исцели́ти неду́ги:/ обре́те же челове́ка слежáща мно́гими ле́ты, и к нему́ возопи́:// возми́ одр, и иди́ на пути́ прáвыя.
ХВАЛИТНЫ
Хор, глас 4: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике ропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и́мя Госпóдне, я́ко вознесéся и́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике ропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сынове Сióни возрáдуются о Царé своéм. Да восхвáлят и́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обоюду остри́ в рукáх их: сотвори́ти отмщéнiе во языцех, обличéнiя в людех, связáти цари́ их пýты, и слáвныя их ручными окóвы желéзными,
На 8.Чтец, стих: Сотворúти в них суд напúсан:/ слáва сíя бýдет всем преподóбным Егó.
Стихúры воскрéсные, глас 3: Прiиди́те вси язы́цы,/ уразуме́йте стрáшныя тáйны си́лу:/ Хрiстóс бо Спас наш, Е́же в начáле Слóво,/ распя́тся нас рáди, и во́лею погребе́ся,/ и воскре́се из ме́ртвых, е́же спасти́ вся́ческая:// Томý поклони́мся.
Хвалúте Бóга во святых Егó,/ хвалúте Егó в утвержéнiи сúлы Егó.
Стихúра: Пове́даша вся чудесá/ стрáжiе Твои́, Гóсподи,/ но собóр суеты́ испóлни мздóю десни́цу их,/ скры́ти мня́ше воскресе́нiе Твое́,// е́же мир слáвит: поми́луй нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стихúра: Рáдости вся испóлнишася/ воскресе́нiя искýс прiи́мша:/ Мари́я бо Магдали́на ко грóбу прiи́де,/ обре́те Áнгела на кáмени седя́ща,/ ри́зами блистáющася и глагóлюща:/ что и́щете жива́го с ме́ртвыми?/ Несть зде, но востá, я́коже рече́,// предваря́я вы в Галиле́и.
Хвалúте Егó во глáсе трýбнем, хвалúте Егó во псалтúри и гýслех.
Стихúра: Во све́те Твое́м, Влады́ко,/ ýзрим свет, Человеколю́бче:/ воскре́сл бо еси́ из ме́ртвых,/ Спасе́нiе рóду челове́ческому дáруя:/ да Тя вся тварь славослóвит Еди́наго Безгре́шнаго,// поми́луй нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стихúры: Песнь ýтреннюю мvронóсицы жены́/ со слезáми приношáху Тебе́, Гóсподи,/ благоухáнiя бо аромáты имýща,/ грóба Твоегó достигóша,/ пречи́стое те́ло Твое́ помáзати тщáщася./ Áнгел седя́й на кáмени тем благовести́:/ что и́щете живáго с ме́ртвыми;/ смерть бо попрáвый воскре́се я́ко Бог,// подая́ всем ве́лiю ми́лость.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стихúра: Блистáяся Áнгел на грóбе Твое́м животвóрном,/ мvронóсицам глагóлаше:/ истощи́вый грóбы Избáвитель, плени́ áда,/ и воскре́се тридне́вен,// я́ко Еди́н Бог и Всеси́лен.
Воскреснú, Гóсподи Бóже мой, да вознесéтся рукá Твоя́,/ не забýди убóгих Твоúх до концá.
Во грóбе Тя искáше,/ прише́дши во еди́ну от суббóт Мари́я Магдали́на,/ не обре́тши же рыдáше с плáчем вопiю́щи:/ увы́ мне, Спáсе мой!/ Укрáден был еси́, всех Цáрю./ Супрýг же живонóсных Áнгел внутрь грóба вопiя́ше:/ что плáчеши о же́но;/ плáчу, глагóлет, я́ко взя́ша Гóспода моегó от грóба,/ и не вем, где положи́ша Егó./ Сiя́ же обрати́вшися вспять,/ я́ко ви́де Тя, áбiе возопи́:// Госпóдь мой и Бог мой, слáва Тебе́.
Исповéмся Тебé, Гóсподи, всем сéрдцем моúм,/ повéм вся чудесá Твоя́.
Глас 6: Евре́и затвори́ша во грóбе Живóт,/ разбóйник же отве́рзе язы́ком наслажде́нiе,/ зовы́й и глагóля:/ со мнóю мене́ рáди распны́йся:/ сообе́сися ми на дре́ве,/ и яви́ся мне на престóле со Отце́м седя́:/ Той бо есть Хрiстóс Бог наш,// име́яй ве́лiю ми́лость.
Слáва Отцý и Сыну и Святóму Дýху.
Стихира евангельская, глас 8: Гóсподи, разслáбленнаго не купе́ль исцели́,/ но Твое́ слóво обнови́,/ и ниже́ многоле́тный запя́т емý недýг:/ я́ко глáса Твоегó скоре́йшее де́йство показáся,/ и неудобоноси́мую тя́жесть отве́рже,/ и бре́мя одрá понесе́, во свиде́тельство// мнóжества щедрóт Твои́х, слáва Тебе́.
И ныне и прúсно и во вéки векóв, амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смeрть умертви́ся, и мы ожи́хом./ Тем воспевáюще вопiéм:/ благословéн Христóс Бог,// благоволи́вши тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Óтче Вседержи́телю, Гóсподи Сы́не Единорóдный, Iисýсе Хрiстé, и Святы́й Дýше. Гóсподи Бóже, Áгнче Бóжiй, Сы́не Отéчь, взéмляй грех мíра, помилуй нас. Взéмляй грехѝ мíра, прiимѝ молитву нáшу. Седя́й одеснýю Отцá, помилуй нас. Яко Ты есѝ Един Свят; Ты есѝ Един Госпóдь, Iисýс Хрiстóс, в слáву Бóга Отцá, ами́нь.
На всяк день благословлю́ Тя и восхвалю́ имя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено имя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Отцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь спасе́ние ми́ру бысть,/ пое́м Воскре́сшему из гро́ба,/ и Нача́льнику жи́зни на́шея:/ разруши́в бо сме́ртию сме́рть,// побе́ду даде́ нам и ве́лию ми́лость.
Гóсподи помилуй (40 раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Гóсподи помилуй (12раз)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных христiáн во век вéка.
Честнéйшую Херувíм и слáвнейшую без сравнéния Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Воскресы́й из мéртвых, Христé, истинный Бог наш, молитвами Пречистыя Своея Мáтере, святы́х слáвных и всехвáльных Апóстол, святых и прáведных богоотéц Iоакима и Анны, и всех святых, помилуй и спасѝ нас, яко Благ и Человеколюбец. Аминь.
[МНОГОЛЕТИЕ]Благочести́вейшаго, Самодержáвнейшаго, Вели́каго грядýщаго Госудáря нáшего Имперáтора (его имя Ты вем) святéйшыя вселéнския патриáрхи преосвящéнныя митрополи́ты, архиепи́скопы и епи́скопы правослáвныя, иерéи и дьяконы и весь причет церкóвный и вся правослáвныя христиáны, Гóсподи, сохрани их на мнóгая лéта!
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Стихира Евангельская первая, глас 3
Магдали́не Мари́и/ Спа́сово благовеству́ющей из ме́ртвых Воскресе́ние и явле́ние,/ не ве́рующе же ученицы́, поноси́ми бы́ша о жестосе́рдии:/ но зна́меньми воору́жшеся и чудесы́,/ ко пропове́данию посыла́хуся,/ и Ты у́бо, Го́споди, к нача́льному све́ту возне́слся еси́ Отцу́,/ они́ же пропове́даша всю́ду сло́во, чудесы́ уверя́юще./ Те́мже просвети́вшеся те́ми,/ сла́вим Твое́ е́же из ме́ртвых воскресе́ние,// человеколю́бче Го́споди.
ПЕРВЫЙ ЧАС
Христóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшний, и́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Óчи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Аллилýиа, аллилýиа, аллилýиа, слáва Тебé Бóже. (3 раза)
Гóсподи, помúлуй. (3 раза)
Слáва Отцý и Сыну и Святóму Дýху.
Тропáрь воскрéсный, глас 3: Да веселя́тся небéсная, да рáдуются земнáя; я́ко сотвори́ держáву мы́шцею Своéю Госпóдь, попрá смéртию смерть, пéрвенец мéртвых бысть; из чрéва áдова избáви нас, и подадé ми́рови вéлию ми́лость.
И ныне и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, прости́ беззакóнiя нáша, Святы́й, посетѝ и исцелѝ нéмощи нáша и́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Óтче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Христé, Сыне Бóжiй, поми́луй нас. Ами́нь.
КОНДАК
Кондáк прáздника Триóди (о расслáбленном), глас 3: Дýшу мою́, Гóсподи, во гресéх вся́ческих,/ и безмéстными дея́ньми лю́те разслáблену,/ воздви́гни Божéственным Твои́м предстáтельством,/ я́коже и разслáбленнаго воздви́гл еси́ дрéвле,/ да зовý Ти, спасáемь:// Щéдрый, слáва Хрiстé, держáве Твоéй.
Гóсподи, помилуй. (40 раз)
И҆́же на вся́кое врéмя и на вся́кий час, на небесѝ и на землѝ покланя́емый и слáвимый Христé Бóже, долготерпели́ве, многоми́лостиве, многоблагоутрóбне, Иже прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Отцý и Сыну и Святóму Дýху, и ныне и прúсно и во вéки векóв. Амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Именем Госпóдним Гóсподи, благословѝ.
Хрiстé, Свéте Истинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланию зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
КОНДАК, ПАСХИ ГЛАС 8
Хор: Áще и во гроб снизшéл есѝ, Безсмéртне,/ но áдову разруши́л есѝ си́лу,/ и воскрéсл есѝ, я́ко победитель, Христé Бóже,/ женáм мироно́сицам вещáвый: рáдуйтеся,/ и Твои́м апóстолом мир дáруяй,// пáдшим подая́й воскресéнiе.
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
Христóс, и́стинный Бог наш, моли́твами пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу