Святых славных и всехвальных первоверховных апостолов ПЕТРА И ПАВЛА.ЧАСЫ ТРЕТИЙ, ШЕСТЫЙ И ДЕВЯТЫЙ.
12 ию́ля 2021 гóда. Святы́х слáвных и всехвáльных первоверхóвных апóстолов Петрá и Пáвла. Служба прáздника для домáшнего (келéйного) совершéния. Служба мирским чином.
Часы и обе́дницу скачать в формате doc, в формате pdf
ЧАС ТРЕТИЙ
Молитвами святых отéц нáших, Гóсподи Иисусе Христé, Бóже наш, помилуй нас, аминь.
Слáва Тебе, Бóже наш, слáва Тебé.
Царю Небéсный, Утéшителю, Душе Истины, Иже вездé сый и вся исполняяй, Сокрóвище благих и жизни Подáтелю, прииди и вселися в ны, и очисти ны от всякия сквéрны, и спаси, Блáже, Души нáша.
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во веки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
Гóсподи, помилуй, (12 раз.)
Слáва Отцу и Сыну и Святóму Духу, и ныне и присно и во вéки векóв, аминь.
Приидите, поклонимся Царéви нáшему Бóгу.
Приидите, поклонимся и припадéм Христу, Царéви нáшему Бóгу.
Приидите, поклонимся и припадéм Самому Христу, Царéви и Бóгу нáшему.
Псалом 16
Услыши, Гóсподи, прáвду мою, вонми молéнию моему, внуши молитву мою не во устнáх льстивых. От лицá Твоегó судьбá моя изыдет, óчи мои да видита правоты. Искусил еси сéрдце моé, посетил еси нóщию, искусил мя еси и не обрéтеся во мне непрáвда. Яко да не возглагóлют устá моя дел человéческих, за словесá устéн Твоих аз сохраних пути жéстоки. Соверши стопы моя во стезях Твоих, да не подвижутся стопы моя. Аз воззвáх, яко услышал мя еси, Бóже, приклони ухо Твоé мне, и услыши глагóлы моя. Удиви милости Твоя, спасáяй уповáющия на Тя от противящихся деснице Твоéй. Сохрани мя, Гóсподи, яко зéницу ока, в крóве крилу Твоéю покрыеши мя. От лицá нечестивых острáстших мя, врази мои душу мою одержáша. Тук свой затвориша, устá их глагóлаше гордыню. Изгонящии мя ныне обыдóша мя, óчи свои возложиша уклонити на зéмлю. Объяша мя яко лев готóв на лов, и яко скимен обитáяй в тáйных. Воскресни, Гóсподи, предвари я и запни им, избáви душу мою от нечестиваго, оружие Твоé от враг руки Твоея. Гóсподи, от мáлых от земли раздели я в животé их, и сокровéнных Твоих испóлнися чрéво их, насытишася сынóв, и остáвиша остáнки младéнцем своим. Аз же прáвдою явлюся лицу Твоему, насыщуся, внегдá явити ми ся слáве Твоéй.
Псалом 24
К Тебé, Гóсподи, воздвигóх душу мою, Бóже мой, на Тя уповáх, да не постыжуся во век, ниже да посмеют ми ся врази мои; Ибо вси терпящии Тя не постыдятся. Да постыдятся беззакóннующии вотщé. Пути Твоя, Гóсподи, скажи ми, и стезям Твоим научи мя. Настáви мя на истину Твою и научи мя, яко Ты еси Бог Спас мой, и Тебé терпéх весь день. Помяни щедрóты Твоя, Гóсподи, и милости Твоя, яко от вéка суть. Грех юности моея и невéдения моегó не помяни, по милости Твоéй помяни мя Ты рáди блáгости Твоея, Гóсподи. Благ и прав Госпóдь, сегó рáди законоположит согрешáющим на пути. Настáвит крóткия на суд, научит крóткия путéм Своим. Вси путиé Госпóдни милость и истина, взыскáющым завéта Егó и свидéния Егó. Рáди имене Твоегó, Гóсподи, и очисти грех мой, мног бо есть. Кто есть человéк бояйся Гóспода; законоположит ему на пути, егóже извóли. Душá его во благих водворится, и сéмя егó наслéдит зéмлю. Держáва Госпóдь боящихся Егó и завéт Егó явит им. Очи мои выну ко Гóсподу, яко Той истóргнет от сéти нóзе мои. Призри на мя и помилуй мя, яко единорóд и нищ есмь аз. Скóрби сéрдца моегó умнóжишася, от нужд моих изведи мя. Виждь смирéние моé и труд мой, и остáви вся грехи моя. Виждь враги моя, яко умнóжишася, и ненавидéнием непрáведным возненавидеша мя. Сохрани душу мою и избáви мя, да не постыжуся, яко уповáх на Тя. Незлóбивии и прáвии прилепляхуся мне, яко потерпéх Тя, Гóсподи. Избáви, Бóже, Изрáиля от всех скорбéй егó.
Псалом 50
Помилуй мя, Боже, по велицей милости Твоéй, и по множеству щедрот Твоих очисти беззаконие моé. Наипаче омый мя от беззакония моего, и от греха моего очисти мя. Яко беззаконие мое аз знаю и грех мой предо мною есть выну. Тебé Единому согреших, и лукавая пред Тобою сотворих; яко да оправдишися во словесéх Твоих и победиши, внегда судити Ти. Се бо в беззакониих зачат есмь, и во гресéх роди мя мати моя. Се бо истину возлюбил еси, безвéстная и тайная премудрости Твоея явил ми еси. Окропиши мя иссопом и очищуся, омыеши мя, и паче снéга убелюся. Слуху моему даси радость и весéлие, возрадуются кости смирéнныя. Отврати лице Твоé от грех моих, и вся беззакония моя очисти. Сéрдце чисто созижди во мне, Боже, и дух прав обнови во утробе моéй. Не отвéржи мене от лица Твоего, и Духа Твоего Святаго не отыми от менé. Воздаждь ми радость спасéния Твоего, и Духом Владычним утверди мя. Научу беззаконныя путéм Твоим, и нечестивии к Тебе обратятся. Избави мя от кровéй, Боже, Боже спасéния моего, возрадуется язык мой правде Твоéй. Господи, устнé мои отвéрзеши, и уста моя возвестят хвалу Твою. Яко аще бы восхотéл еси жéртвы, дал бых убо, всесожжéния не благоволиши. Жéртва Бóгу дух сокрушéн, сéрдце сокрушéнно и смирéнно Бог не уничижит. Ублажи, Господи, благоволéнием Твоим Сиóна, и да созиждутся стéны Иерусалимския. Тогда благоволиши жéртву правды, возношéние и всесожегáемая; тогда возложáт на олтáрь Твой тельцы.
Слáва Отцу и Сыну и Святóму Духу, и ныне и присно и во вéки векóв. Аминь.
Аллилуиа, аллилуиа, аллилуиа, слáва Тебé Бóже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Тропáрь апóстолов, глас 4: Апóстолов первопрестóльницы/ и вселéнныя учи́телие,/ Влады́ку всех моли́те/ мир вселéнней даровáти// и душáм нáшим вéлию ми́лость.
И ныне и присно и во веки векóв. Аминь.
Богорóдичен: Богорóдице, Ты еси Лозá истинная, возрастившая нам Плод Животá, Тебе мóлимся, молися Владычице, со святыми Апóстолы, помиловати души нáша.
Госпóдь Бог благословéн, благословéн Госпóдь день дне, поспешит нам Бог спасéний нáших, Бог наш, Бог спасáти.(Пс.67:20-21)
Посем Трисвятое по Отче наш
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДAК
Кондáк апóстолов, глас 2: Твéрдыя и Боговещáнныя проповéдатели,/ верх апóстолов Твои́х, Гóсподи,/ прия́л еси́ в наслаждéние благи́х Твои́х и покóй:/ болéзни бо óнех и смерть прия́л еси́ пáче вся́каго всеплóдия,// Еди́не, свéдый сердéчная.
Гóсподи, помилуй. (40 раз)
Иже на всякое врéмя и на всякий час, на небеси и на земли покланяемый и слáвимый Христе Бóже, долготерпеливе, многомилостиве, многоблагоутрóбне, Иже прáведныя любяй, и грéшныя милуяй, Иже вся зовый ко спасéнию обещáния рáди будущих благ; Сам, Гóсподи, приими и нáша в час сей молитвы, и испрáви живóт наш к зáповедем Твоим; души нáша освяти, телесá очисти, помышлéния испрáви, мысли очисти, и избáви нас от всякия скóрби, зол и болéзней; огради нас святыми Твоими Ангелы, да ополчéнием их соблюдáеми и наставляеми, достигнем в соединéние вéры, и в рáзум неприступныя Твоея слáвы, яко благословéн еси во вéки векóв, аминь.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв. Аминь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Именем Госпóдним Гóсподи, благослови.
Молитвами святых отéц нáших, Гóсподи Иисусе Христé, Бóже наш, помилуй нас, аминь.
Молитва святаго Мардария
Владыко Бóже Отче Вседержителю, Гóсподи Сыне Единородный Иисусе Христе, и Святый Душе, Едино Божествó, Едина Сила, помилуй мя грешнаго, и имиже веси судьбами спаси мя недостóйнаго раба Твоегó, яко благословен еси во веки векóв, аминь.
ЧАС ШЕСТЫЙ
Приидите, поклонимся Царéви нáшему Бóгу.
Приидите, поклонимся и припадéм Христу, Царéви нáшему Бóгу.
Приидите, поклонимся и припадéм Самому Христу, Царéви и Бóгу нáшему.
Псалом 53
Боже, во имя Твое спаси мя, и в силе Твоей суди ми. Боже, услыши молитву мою, внуши глаголы уст моих. Яко чуждии востáша на мя и крепцыи взыскáша душу мою, и не предложиша Бога пред собою. Се бо Бог помогает ми, и Господь заступник души моей. Отвратит злая врагом моим, истиною Твоею потреби их. Волею пожру Тебе, исповемся имени Твоему, Господи, яко блáго; Яко от всякия печáли избáвил мя еси, и на враги моя воззре око мое.
Псалом 54
Внуши, Боже, молитву мою и не презри моления моего. Вонми ми и услыши мя: возскорбех печáлию моею и смятохся. От глáса врáжия и от стужения грешнича, яко уклониша на мя беззаконие и во гневе враждовáху ми. Сердце мое смятеся во мне и боязнь смерти нападе на мя. Страх и трепет прииде на мя и покры мя тьма. И рех: кто даст ми криле, яко голубине, и полещу, и почию; Се удалихся бегая и водворихся в пустыни. Чаях Бога спасáющаго мя от малодушия и от бури. Потопи Господи, и раздели языки их: яко видех беззаконие и пререкание во граде. Днем и нощию обыдет и по стенам его: беззаконие и труд посреде его и неправда. И не оскуде от стогн его лихва и лесть. Яко аще бы враг поносил ми, претерпел бых убо, и аще бы ненавидяй мя на мя велеречевал, укрыл бых ся от него. Ты же человече равнодушне, владыко мой и знаемый мой; Иже купно наслаждался еси со мною брáшен, в дому Божии ходихом единомышлением. Да приидет же смерть на ня, и да снидут во ад живи, яко лукавство в жилищах их, посреде их. Аз к Богу воззвах, и Господь услыша мя. Вечер и заутра, и полудне повем, и возвещу, и услышит глас мой. Избавит миром душу мою от приближающихся мне, яко во мнозе бяху со мною. Услышит Бог и смирит я, Сый прежде век. Несть бо им изменения, яко не убояшася Бога. Простре руку свою на воздаяние, оскверниша завет Его. Разделишася от гнева лица Его, и приближишася сердца их, умякнуша словеса их паче елеа, и та суть стрелы. Возверзи на Господа печаль твою, и Той тя препитает, не даст в век молвы праведнику. Ты же, Боже, низведеши их во студенец истления, мужие кровей и льсти не преполовят дней своих. Аз же, Господи, уповаю на Тя.
Псалом 90
Живый в помощи Вышняго, в крове Бога Небеснаго водворится. Речет Господеви: заступник мой еси и прибежище мое, Бог мой, и уповаю на Него. Яко Той избавит тя от сети ловчи, и от словесе мятежна; Плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни; От вещи во тме преходяшия, от сряща и беса полуденнаго. Падет от страны твоея тысяща, и тма одесную тебе, к тебе же не приближится; Обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло, и рана не приближится телеси твоему; Яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою; На аспида и василиска наступиши, и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его; Долготою дней исполню его, и явлю ему спасение Мое.
Слáва Отцу и Сыну и Святóму Духу, и ныне и присно и во вéки векóв. Аминь.
Аллилуиа, аллилуиа, аллилуиа, слава Тебе Боже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Тропáрь апóстолов, глас 4: Апóстолов первопрестóльницы и вселéнныя учи́телие, Влады́ку всех моли́те мир вселéнней даровáти и душáм нáшим вéлию ми́лость.
И ныне и присно и во вéки векóв. Аминь.
Богорóдичен: Яко не имамы дерзновения за премнóгия грехи наша, Ты Иже от Тебе Рождшагося моли, Богорóдице Дево: мнóго бо мóжет моление Матернее ко благосердию Владыки: не презри грешных мольбы, Всечистая, яко милостив есть и спасти могий, Иже и страдати о нас извóливый.
Скоро да предварят ны щедроты Твоя, Господи, яко обнищахом зело: помози нам, Боже Спасе наш, славы ради имене Твоего; Господи, избави нас, и очисти грехи наша, имене ради Твоего.
Посем Трисвятое по Отче наш
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святому Духу, и ныне и присно и во веки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДAК
Кондáк апóстолов, глас 2: Твéрдыя и Боговещáнныя проповéдатели, верх апóстолов Твои́х, Гóсподи, прия́л еси́ в наслаждéние благи́х Твои́х и покóй: болéзни бо óнех и смерть прия́л еси́ пáче вся́каго всеплóдия, Еди́не, свéдый сердéчная.
Гóсподи, помилуй. (40 раз)
Иже на всякое врéмя и на всякий час, на небеси и на земли покланяемый и слáвимый Христе Бóже, долготерпеливе, многомилостиве, многоблагоутрóбне, Иже прáведныя любяй, и грéшныя милуяй, Иже вся зовый ко спасéнию обещáния рáди будущих благ; Сам, Гóсподи, приими и нáша в час сей молитвы, и испрáви живóт наш к зáповедем Твоим; души нáша освяти, телесá очисти, помышлéния испрáви, мысли очисти, и избáви нас от всякия скóрби, зол и болéзней; огради нас святыми Твоими Ангелы, да ополчéнием их соблюдáеми и наставляеми, достигнем в соединéние вéры, и в рáзум неприступныя Твоея слáвы, яко благословéн еси во вéки векóв, аминь.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв. Аминь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Именем Госпóдним Гóсподи, благослови.
Молитвами святых отéц нáших, Гóсподи Иисусе Христé, Бóже наш, помилуй нас, аминь.
Таже молитва святаго Великаго Василия
Бóже и Гóсподи сил и всея твáри Содéтелю, Иже за милосéрдие безприклáдныя милости Твоея Единорóднаго Сына Твоегó, Гóспода нáшего Иисуса Христá, низпослáвый на спасéние рóда нáшего, и честным Егó Крестóм рукописáние грех нáших растерзáвый, и победивый тем начáла и влáсти тьмы. Сам, Владыко Человеколюбче, приими и нас, грéшных, благодáрственныя сия и молéбныя молитвы и избáви нас от всякаго всегубительнаго и мрáчнаго прегрешéния и всех озлóбити нас ищущих видимых и невидимых враг. Пригвозди стрáху Твоему плóти нáша и не уклони сердéц нáших в словесá или помышлéния лукáвствия, но любóвию Твоéю уязви души нáша, да, к Тебé всегдá взирáюще и éже от Тебé свéтом наставляеми, Тебé, неприступнаго и присносущнаго зряще Свéта, непрестáнное Тебé исповéдание и благодарéние возсылáем, Безначáльному Отцу со Единорóдным Твоим Сыном и Всесвятым, и Благим, и Животворящим Твоим Духом ныне, и присно, и во вéки векóв, аминь.
И глаголем зде изобразительные. Аще кто хощет глаголет прежде и девятый час.
ЧАС ДЕВЯТЫЙ
Приидите, поклонимся Царéви нáшему Бóгу.
Приидите, поклонимся и припадéм Христу, Царéви нáшему Бóгу.
Приидите, поклонимся и припадéм Самому Христу, Царéви и Бóгу нáшему.
Псалом 83
Коль возлюбленна селения Твоя, Господи сил! Желает и скончавается душа моя во дворы Господни, сердце мое и плоть моя возрадовастася о Бозе живе. Ибо птица обрете себе храмину, и горлица гнездо себе, идеже положит птенцы своя, олтари Твоя, Господи сил, Царю мой и Боже мой. Блажени живущии в дому Твоем, в веки веков восхвалят Тя. Блажен муж, eмуже есть заступление eго у Тебе; восхождения в сердце своем положи, во юдоль плачевную, в место еже положи, ибо благословение даст законополагаяй. Пойдут от силы в силу: явится Бог богов в Сионе. Господи Боже сил, услыши молитву мою, внуши, Боже Иаковль. Защитниче наш, виждь, Боже, и призри на лице христа Твоего. Яко лучше день един во дворех Твоих паче тысящ: изволих приметатися в дому Бога моего паче, неже жити ми в селениих грешничих. Яко милость и истину любит Господь, Бог благодать и славу даст, Господь не лишит благих ходящих незлобием. Господи Боже сил, Блажен человек уповаяй на Тя.
Псалом 84
Благоволил еси, Господи, землю Твою, возвратил еси плен Иаковль: оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны? Или простреши гнев Твой от рода в род? Боже, Ты обращься оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающыя сердца к Нему. Обаче близ боящихся Его спасение Его, вселити славу в землю нашу. Милость и истина сретостеся, правда и мир облобызастася. Истина от земли возсия, и правда с Небесе приниче, ибо Господь даст благость, и земля наша даст плод свой. Правда пред Ним предъидет, и положит в путь стопы своя.
Псалом 85
Приклони, Господи, ухо Твое, и услыши мя, яко нищ и убог есмь аз. Сохрани душу мою, яко преподобен есмь: спаси раба Твоего, Боже мой, уповающаго на Тя. Помилуй мя, Господи, яко к Тебе воззову весь день. Возвесели душу раба Твоего, яко к Тебе взях душу мою. Яко Ты, Господи, Благ и Кроток, и Многомилостив всем призывающым Тя. Внуши, Господи, молитву мою, и вонми гласу моления моего. В день скорби моея воззвах к Тебе, яко услышал мя еси. Несть подобен Тебе в бозех, Господи, и несть по делом Твоим. Вси языцы, елики сотворил еси, приидут и поклонятся пред Тобою, Господи, и прославят имя Твое, яко Велий еси Ты, и творяй чудеса, Ты еси Бог един. Настави мя, Господи, на путь Твой, и пойду во истине Твоей; да возвеселится сердце мое боятися имене Твоего. Исповемся Тебе, Господи Боже мой, всем сердцем моим, и прославлю имя Твое в век: яко милость Твоя велия на мне, и избавил еси душу мою от ада преисподнейшаго. Боже, законопреступницы восташа на мя, и сонм державных взыскаша душу мою, и не предложиша Тебе пред собою. И Ты, Господи Боже мой, Щедрый и Милостивый, Долготерпеливый, и Многомилостивый и истинный, призри на мя и помилуй мя, даждь державу Твою отроку Твоему, и спаси сына рабы Твоея. Сотвори со мною знамение во благо, и да видят ненавидящии мя, и постыдятся, яко Ты, Господи, помогл ми и утешил мя еси.
И паки: Сотвори со мною знамение во благо, и да видят ненавидящии мя, и постыдятся, яко Ты, Господи, помогл ми и утешил мя еси.
Слáва Отцу и Сыну и Святóму Духу, и ныне и присно и во вéки векóв. Аминь.
Аллилуиа, аллилуиа, аллилуиа, слава Тебе Боже. (3 раза)
Гóсподи, помилуй. (3 раза)
Слáва Отцу и Сыну и Святóму Духу.
Тропáрь апóстолов, глас 4: Апóстолов первопрестóльницы и вселéнныя учи́телие, Влады́ку всех моли́те мир вселéнней даровáти и душáм нáшим вéлию ми́лость.
И ныне и присно и во вéки векóв. Аминь.
Богорóдичен: Иже нас рáди рождéйся от Дéвы и распятие претерпéв, Благий, испровéргий смéртию смерть и воскресéние явлéй яко Бог, не прéзри, яже создáл еси рукóю Твоéю. Яви человеколюбие Твоé, Милостиве. Приими рóждшую Тя Богорóдицу, молящуюся за ны. И спаси, Спáсе наш, люди отчáянныя.
Не предáждь нас до концá Имене Твоегó рáди, и не разори завéта Твоегó, и не отстáви милости Твоея от нас Авраáма рáди, возлюбленнаго от Тебé, и за Исаáка, рабá Твоегó, и Изрáиля, святáго Твоегó.
Посем Трисвятое по Отче наш
Святый Бóже, Святый Крéпкий, Святый Безсмéртный, помилуй нас. (3 раза)
Слáва Отцу и Сыну и Святому Духу, и ныне и присно и во веки векóв, аминь.
Пресвятая Трóице, помилуй нас, Гóсподи, очисти грехи нáша, Владыко, прости беззакóния нáша, Святый, посети и исцели нéмощи нáша имене Твоегó рáди.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв, аминь.
Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.
Гóсподи, Иисусе Христé, Сыне Бóжий, помилуй нас. Аминь.
КОНДAК
Кондáк апóстолов, глас 2: Твéрдыя и Боговещáнныя проповéдатели, верх апóстолов Твои́х, Гóсподи, прия́л еси́ в наслаждéние благи́х Твои́х и покóй: болéзни бо óнех и смерть прия́л еси́ пáче вся́каго всеплóдия, Еди́не, свéдый сердéчная.
Гóсподи, помилуй. (40 раз)
Иже на всякое врéмя и на всякий час, на небеси и на земли покланяемый и слáвимый Христе Бóже, долготерпеливе, многомилостиве, многоблагоутрóбне, Иже прáведныя любяй, и грéшныя милуяй, Иже вся зовый ко спасéнию обещáния рáди будущих благ; Сам, Гóсподи, приими и нáша в час сей молитвы, и испрáви живóт наш к зáповедем Твоим; души нáша освяти, телесá очисти, помышлéния испрáви, мысли очисти, и избáви нас от всякия скóрби, зол и болéзней; огради нас святыми Твоими Ангелы, да ополчéнием их соблюдáеми и наставляеми, достигнем в соединéние вéры, и в рáзум неприступныя Твоея слáвы, яко благословéн еси во вéки векóв, аминь.
Гóсподи, помилуй. (3 раза)
Слáва Отцу и Сыну и Святóму Духу, и ныне и присно и во вéки векóв. Аминь.
Честнéйшую Херувим и слáвнейшую без сравнéния Серафим, без истлéния Бóга Слóва рóждшую, сущую Богорóдицу, Тя величáем.
Именем Госпóдним Гóсподи, благослови.
Молитвами святых отéц нáших, Гóсподи Иисусе Христé, Бóже наш, помилуй нас, аминь.
И молитву сию Великаго Василия
Владыко Гóсподи, Иисусе Христé, Бóже наш, долготерпéвый о нáших согрешéниих и дáже до нынешняго часá привeдый нас, вóньже, на Животворящем Дрéве вися, благоразумному разбóйнику иже в рай путесотворил еси вход и смéртию смерть разрушил еси: очисти нас, грéшных и недостóйных раб Твоих, согрешихом бо и беззаконновахом и нéсмы достóйни возвести очесá нáша и воззрéти на высоту Небéсную, занé остáвихом путь прáвды Твоея и ходихом в вóлях сердéц нáших. Но мóлим Твою безмéрную блáгость: пощади нас, Гóсподи, по мнóжеству милости Твоея, и спаси нас Имене Твоегó рáди святáго, яко исчезóша в суетé дние нáши, изми нас из руки сопротивнаго, и остáви нам грехи нáша, и умертви плотскóе нáше мудровáние, да, вéтхаго отложивше человéка, в нóваго облецéмся и Тебе поживéм, нáшему Владыце и Благодéтелю. И тáко, Твоим послéдующе повелéнием, в вéчный покóй достигнем, идéже есть всех веселящихся жилище. Ты бо еси воистинну истинное весéлие и рáдость любящих Тя, Христé Бóже наш, и Тебé славу возсылáем со Безначáльным Твоим Отцéм, и Пресвятым, и Благим, и Животворящим Твоим Духом, ныне, и присно, и во вéки векóв, аминь.
И глаголи обедницу