ОБЕДНИЦА (Изобразительные) Святых славных и всехвальных первоверховных апостолов ПЕТРА И ПАВЛА.

[mirskim]

12 ию́ля 2021 гóда. Святы́х слáвных и всехвáльных первоверхóвных апóстолов Петрá и Пáвла. Служба прáздника для домáшнего (келéйного) совершéния. Служба мирским чином.

Прéжде глагóли часы.

Часы и обéдницу скачáть в формáте doc, в формáте pdf

ЧИН ОБЕДНИЦЫ

Глагóли сице: Благослови, душе моя, Гóспода,/ благословен еси Гóсподи.

Псалом 102



Благослови, душе моя, Гóспода,/ и вся внутренняя моя имя святое Егó./ Благослови, душе моя, Гóспода,/ и не забывай всех воздаяний Егó,/ очищающаго вся беззакóния твоя,/ исцеляющаго вся недуги твоя,/ избавляющаго от истления живóт твой,/ венчающаго тя милостию и щедрóтами,/ исполняющаго во благих желание твое:/ обновится яко óрля юность твоя./ Творяй милостыни Господь,/ и судьбу всем обидимым./ Сказа пути Своя Моисеови,/ сыновóм Израилевым хотения Своя:/ Щедр и Милостив Госпóдь,/ Долготерпелив и Многомилостив./ Не до конца прогневается,/ ниже во век враждует,/ не по беззаконием нашим сотворил есть нам,/ ниже по грехом нашым воздал есть нам./ Яко по высоте небесней от земли,/ утвердил есть Госпóдь милость Свою на боящихся Егó./ Елико отстоят востóцы от запад,/ удалил есть от нас беззакóния наша./ Якоже щедрит отец сыны,/ ущедри Госпóдь боящихся Егó./ Яко Той позна создание наше,/ помяну, яко персть есмы./ Человек, яко трава дние eгó,/ яко цвет сельный, тако оцветет,/ яко дух прóйде в нем,/ и не будет, и не познает ктому места своегó./ Милость же Госпóдня от века и до века на боящихся Егó,/ и правда Его на сынéх сынóв, хранящих завéт Егó, и пóмнящих заповеди Егó творити я./ Госпóдь на Небеси уготóва Престóл Свой,/ и Царство Егó всеми обладает./ Благословите Гóспода вси Ангели Егó,/ сильнии крепостию, творящии слóво Егó, услышати глас словес Егó./ Благословите Гóспода вся Силы Егó,/ слуги Егó, творящии вóлю Егó./ Благословите Гóспода вся дела Егó,/ на всяком месте владычества Егó.

Слáва Отцу и Сыну и Святóму Духу, и ныне и присно и во вéки векóв. Аминь.

Благослови, душе моя, Гóспода,/ и вся внутренняя моя имя святóе Егó./ Благословен еси, Гóсподи.

Слáва Отцу и Сыну и Святóму Духу.

Псалом 145

Хвали, душе моя, Гóспода./ Восхвалю Гóспода в животé моéм,/ пою Бóгу моему, дóндеже есмь./ Не надéйтеся на князи, на сыны человéческия,/ в нихже несть спасéния./ Изыдет дух eгó/ и возвратится в землю свою./ В той день погибнут вся помышлéния eгó./ Блажен, eмуже Бог Иáковль Помóщник егó,/ упование eгó на Гóспода Бóга своегó,/ сотвóршаго нéбо и зéмлю,/ мóре и вся, яже в них,/ хранящаго истину в век,/ творящаго суд обидимым,/ дающаго пищу áлчущим./ Госпóдь решит оковáнныя./ Госпóдь умудряет слепцы./ Госпóдь возвóдит низвéрженныя./ Госпóдь любит прáведники./ Госпóдь хранит пришéльцы,/ сира и вдову приимет/ и путь грéшных погубит./ Воцарится Госпóдь во век,/ Бог твой, Сиóне, в род и род.

И ныне и присно и во вéки векóв. Аминь.

Единорóдный Сыне и Слóве Бóжий, Безсмéртен Сый/ и извóливый спасéния нáшего рáди/ воплотитися от Святыя Богорóдицы и Приснодéвы Марии,/ непрелóжно вочеловéчивыйся,/ распныйся же, Христé Бóже, смéртию смерть попрáвый,/ Един Сый Святыя Трóицы,/ спрославляемый Отцу и Святóму Духу, спаси нас.

И поем Блаженны с тропарями из Октоиха

Хор: Во Царствии Твоем помяни нас, Господи,/ егда приидеши, во Царствии Твоем.

Хор: Блажени нищии духом,/ яко тех есть Царство Небесное.

Хор: Блажени плачущии,/ яко тии утешатся.

На 10. Хор: Блажени кротции,/ яко тии наследят землю.

Хор: Блажени алчущии и жаждущии правды,/ яко тии насытятся.

На 8. Хор: Блажени милостивии,/ яко тии помиловани будут.

Чтец (апóстола Пéтра, глас 4): Тя, блаже́нна, сла́дкая уста́ Христа́ Бо́га и сокро́вище тве́рдо Ца́рствия показа́ша.// Те́мже воспева́ем тя, Пе́тре апо́столе.

Хор: Блажени чистии сердцем,/ яко тии Бога узрят.

Чтец:  На ка́мени твоего́ Богосло́вия водрузи́ Влады́ка Иису́с Це́рковь непрекло́нну,// в не́йже тя, апо́столе Пе́тре, сла́вим.

Хор: Блажени миротворцы,/ яко тии сынове Божии нарекутся.

На 6. Чтец: Я́ко пребо́льши А́нгел Петр в телеси́:/ во све́тлом бо прише́ствии сего́// Христо́с Бог судию́ же и соседа́теля бы́ти рече́.

Хор: Блажени изгнани правды ради,/ яко тех есть Царство Небесное.

Чтец: Неискусобра́чная, Бо́га пло́тию ро́ждшая,/ страстны́ми прило́ги преклоне́нна мя утверди́:// несть бо, Чи́стая, ра́зве Тебе́, помо́щницы.

Хор: Блажени есте, егда поносят вам,/ и изженут, и рекут всяк зол глагол на вы лжуще Мене ради.

На 4.Чтец (апóстола Па́вла, глас 8): Вся пренебре́г кра́сная ми́ра,/ уя́звлен Влады́чнею любо́вию и о́бщаго спасе́ния жела́нием,/ свиде́тельствовати тому́ изво́лив, о Па́вле блаже́нне,// и ны́не о вселе́нней моли́ся.

Хор: Радуйтеся и веселитеся,/ яко мзда ваша многа на небесех.

Чтец: Я́ко изря́дный Влады́це подо́бник/ и в Того́ оде́ян, Па́вле, вои́стинну всем был еси́ всяк,/ да вся приобря́щеши и спасе́ши лю́ди,// и спасл еси́ я́ко вои́стинну, Христу́ улови́в концы́.

Хор: Слáва Отцу и Сыну и Святóму Духу.

Чтец: Досто́йно тебе́ дарова́ Христо́с житие́, апо́столе Па́вле, на Небесе́х:/ пребыва́ющаго бо зде не возжела́л еси́ гра́да, блаже́нне,// ве́рен служи́тель быв и строи́тель та́ин Его́.

Хор: И ныне и присно и во вéки векóв. Аминь.

Чтец (Богорóдичен): Призре́ на Тя Госпо́дь, мое́ обновля́я существо́, я́ко Си́лен,/ вели́чия сотво́рь, Богороди́тельнице, я́коже рекла́ еси́, Всенепоро́чная,// и спасе́ мя Тобо́ю из тли Бог мой, я́ко Милосе́рд.

Тропари и кондаки

Тропáрь апóстолов, глас 4: Апóстолов первопрестóльницы/ и вселéнныя учи́телие,/ Влады́ку всех моли́те/ мир вселéнней даровáти// и душáм нáшим вéлию ми́лость.

Слáва Отцу и Сыну и Святóму Духу.

Кондáк апóстолов, глас 2: Твéрдыя и Боговещáнныя проповéдатели,/ верх апóстолов Твои́х, Гóсподи,/ прия́л еси́ в наслаждéние благи́х Твои́х и покóй:/ болéзни бо óнех и смерть прия́л еси́ пáче вся́каго всеплóдия,// Еди́не, свéдый сердéчная.

И ныне и присно и во вéки векóв. Аминь.

Кондáк Богорóдицы , глас 6: Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́, я́ко Блага́я,/ на по́мощь нас, ве́рно зову́щих Ти;/ ускори́ на моли́тву и потщи́ся на умоле́ние,// предста́тельствующи при́сно, Богоро́дице, чту́щих Тя.

Трисвятое

Хор: Святый Бóже,/ Святый Крéпкий,/ Святый Безсмéртный, помилуй нас. (3 раза)

Хор: Слáва Отцу и Сыну и Святóму Духу, и ныне и присно и во вéки векóв, аминь.

Хор: Святый Безсмéртный, помилуй нас.

Хор: Святый Бóже,/ Святый Крéпкий,/ Святый Безсмéртный, помилуй нас.

Прокимен апо́столов, глас 8

Чтец: Проки́мен, глас осьмы́й. Во всю зéмлю изы́де вещáние их и в концы́ вселéнныя глагóлы их.

Хор: Во всю зéмлю изы́де вещáние их/ и в концы́ вселéнныя глагóлы их.

Чтец: Вéдом во Иуде́и Бог, во Изрáили вéлие И́мя Егó.

Хор: Во всю зéмлю изы́де вещáние их/ и в концы́ вселéнныя глагóлы их.

Чтец: Во всю зéмлю изы́де вещáние их.

Хор: И в концы́ вселéнныя глагóлы их.

АПОСТОЛ

Чтец: К Кори́нфяном послáния святáго апóстола Пáвла чтéние.

(2Кор.зач.193): Брáтие, о не́мже áще дерза́ет кто, [несмы́сленно глаго́лю:] дерза́ю и аз. Евре́и ли суть? И аз. Изра́ильте ли суть? И аз. Се́мя Авраа́мле ли суть? И аз. Служи́телие ли Христо́вы суть? [Не в му́дрости глаго́лю,] па́че аз. В труде́х мно́жае, в ра́нах пребо́ле, в темни́цах и́злиха, в сме́ртех мно́гащи. От иуде́й пятькра́ты четы́ридесять, ра́зве еди́ныя, прия́х. Три́щи па́лицами бие́н бых, еди́ною ка́меньми наме́тан бых; трикра́ты кора́бль опрове́ржеся со мно́ю; нощь и день во глубине́ сотвори́х. В пу́тных ше́ствиих мно́жицею; беды́ в река́х, беды́ от разбо́йник, беды́ от сро́дник, беды́ от язы́к, беды́ во граде́х, беды́ в пусты́ни, беды́ в мо́ри, беды́ во лжебра́тии. В труде́ и по́двизе, во бде́ниих мно́жицею, во а́лчбе и жа́жди, в поще́ниих мно́гащи, в зиме́ и наготе́. Кроме́ вне́шних, нападе́ние е́же по вся дни, и попече́ние всех церкве́й. Кто изнемога́ет, и не изнемога́ю; кто соблазня́ется, и аз не разжиза́юся? А́ще хвали́тися ми подоба́ет, я́же о не́мощи мое́й похвалю́ся. Бог и Оте́ц Го́спода на́шего Иису́са Христа́ весть, Сый благослове́н во ве́ки, я́ко не лгу. В Дама́сце язы́ческий князь Аре́фы царя́ стрежа́ше Дама́ск град, я́ти мя хотя́, и око́нцем в ко́шнице све́шен бых по стене́, и избего́х из руку́ его́. Похвали́тися же не по́льзует ми: прииду́ бо в виде́ния и открове́ния Госпо́дня. Вем челове́ка о Христе́, пре́жде лет четырина́десяти, [а́ще в те́ле, не вем, а́ще ли кроме́ те́ла, не ве́м, Бог весть,] восхище́на бы́вша такова́го до тре́тияго Небесе́. И вем такова́ челове́ка, [а́ще в те́ле, или́ кроме́ те́ла, не вем, Бог весть,] я́ко восхище́н бысть в рай, и слы́ша неизрече́нны глаго́лы, и́хже не леть есть челове́ку глаго́лати. О такове́м похвалю́ся, о себе́ же не похвалю́ся, то́кмо о не́мощех мои́х. А́ще бо восхощу́ похвали́тися, не бу́ду безу́мен, и́стину бо реку́, щажду́ же, да не ка́ко кто вознепщу́ет о мне па́че, е́же ви́дит мя, или́ слы́шит что от мене́. И за премно́гая открове́ния да не превозношу́ся, даде́ся ми па́костник пло́ти, а́ггел сатани́н, да ми па́кости де́ет, да не превозношу́ся. О сем трикра́ты Го́спода моли́х, да отсту́пит от мене́. И рече́ ми: довле́ет ти благода́ть Моя́: си́ла бо Моя́ в не́мощи соверша́ется. Сла́дце у́бо похвалю́ся па́че в не́мощех мои́х, да всели́тся в мя си́ла Христо́ва.

[русский синодальный перевод](Братья, если кто смеет хвалиться чем-либо, то (скажу по неразумию) смею и я. Они Евреи? и я. Израильтяне? и я. Семя Авраамово? и я. Христовы служители? (в безумии говорю:) я больше. Я гораздо более был в трудах, безмерно в ранах, более в темницах и многократно при смерти. От Иудеев пять раз дано мне было по сорока ударов без одного; три раза меня били палками, однажды камнями побивали, три раза я терпел кораблекрушение, ночь и день пробыл во глубине морской; много раз был в путешествиях, в опасностях на реках, в опасностях от разбойников, в опасностях от единоплеменников, в опасностях от язычников, в опасностях в городе, в опасностях в пустыне, в опасностях на море, в опасностях между лжебратиями, в труде и в изнурении, часто в бдении, в голоде и жажде, часто в посте, на стуже и в наготе. Кроме посторонних приключений, у меня ежедневно стечение людей, забота о всех церквах. Кто изнемогает, с кем бы и я не изнемогал? Кто соблазняется, за кого бы я не воспламенялся? Если должно мне хвалиться, то буду хвалиться немощью моею. Бог и Отец Господа нашего Иисуса Христа, благословенный во веки, знает, что я не лгу. В Дамаске областной правитель царя Ареты стерег город Дамаск, чтобы схватить меня;*и я в корзине был спущен из окна по стене и избежал его рук. Не полезно хвалиться мне, ибо я приду к видениям и откровениям Господним. Знаю человека во Христе, который назад тому четырнадцать лет (в теле ли - не знаю, вне ли тела - не знаю: Бог знает) восхищен был до третьего неба. И знаю о таком человеке (только не знаю - в теле, или вне тела: Бог знает), что он был восхищен в рай и слышал неизреченные слова, которых человеку нельзя пересказать. Таким человеком могу хвалиться; собою же не похвалюсь, разве только немощами моими. Впрочем, если захочу хвалиться, не буду неразумен, потому что скажу истину; но я удерживаюсь, чтобы кто не подумал о мне более, нежели сколько во мне видит или слышит от меня. И чтобы я не превозносился чрезвычайностью откровений, дано мне жало в плоть, ангел сатаны, удручать меня, чтобы я не превозносился. Трижды молил я Господа о том, чтобы удалил его от меня. Но Господь сказал мне: «довольно для тебя благодати Моей, ибо сила Моя совершается в немощи». И потому я гораздо охотнее буду хвалиться своими немощами, чтобы обитала во мне сила Христова.11:21-12:9)

Аллилуа́рий воскре́сный, глас 2

Чтец: Аллилу́иа, аллилу́иа, аллилу́иа, Глас пе́рвый.

Хор: Аллилу́иа, аллилу́иа, аллилу́иа.

Чтец: Испове́дят Небеса́ чудеса́ Твоя́, Го́споди.

Хор: Аллилу́иа, аллилу́иа, аллилу́иа.

Чтец: Бог прославля́емь в сове́те святы́х.

Хор: Аллилу́иа, аллилу́иа, аллилу́иа.

ЕВАНГЕЛИЕ

От Матфéя Святáго Евáнгелия чтéние.

Хор: Слáва Тебé, Гóсподи, слáва Тебé.

(Мф.зач.67.16:13-19): Во врéмя óно, пришéд Иису́с во страны́ Кесари́и Фили́пповы, вопрошáше ученики́ Своя́, глагóля: кого́ Мя глагóлют человéцы бы́ти, Сы́на Человéческаго? Они́ же рéша: óви у́бо Иоáнна Крести́теля, ини́и же Илию́, друзи́и же Иереми́ю, или́ еди́наго от прорóк. Глагóла им Иису́с: вы же когó Мя глагóлете бы́ти? Отвещáв же Си́мон Петр речé: Ты еси́ Христóс, Сын Бóга живáго. И отвещáв Иису́с речé ему́: блажéн еси́, Си́моне, вар Иóна, я́ко плоть и кровь не яви́ тебé, но Отéц Мой, и́же на Небесéх. И Аз же тебé глагóлю, я́ко ты еси́ Петр, и на сем кáмени сози́жду Цéрковь Мою́, и вратá áдова не одолéют ей. И дам ти ключи́ Цáрства Небéснаго, и éже áще свя́жеши на земли́, бу́дет свя́зано на Небесéх, и éже áще разреши́ши на земли́, бу́дет разрешéно на Небесéх.

[русский синодальный перевод](Придя же в страны Кесарии Филипповой, Иисус спрашивал учеников Своих: за кого люди почитают Меня, Сына Человеческого? Они сказали: одни за Иоанна Крестителя, другие за Илию, а иные за Иеремию, или за одного из пророков. Он говорит им: а вы за кого почитаете Меня? Симон же Петр, отвечая, сказал: Ты - Христос, Сын Бога живаго. и Я говорю тебе: ты - Петр*, и на сем камне Я создам Церковь Мою, и врата ада не одолеют ее; (*Камень) и дам тебе ключи Царства Небесного: и что́ свяжешь на земле, то́ будет связано на небесах, и что́ разрешишь на земле, то́ будет разрешено на небесах.(16:13-19)

Хор: Слáва Тебé, Гóсподи, слáва Тебé.

Помяни нас, Гóсподи, егда приидеши во Цáрствии Твоéм.

Помяни нас, Владыко, егда приидеши во Цáрствии Твоéм.

Помяни нас, Святый, егда приидеши во Цáрствии Твоéм.

Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.

Стих: Приступите к Нему и просветитеся, и лицá вáша не постыдятся.

Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.

Слáва Отцу и Сыну и Святóму Духу.

Лик святых Ангел и Архáнгел со всéми Небéсными силами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля слáвы Твоея.

И ныне и присно и во вéки векóв. Аминь.

Символ веры

Верую во Единаго Бога Отца, Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца Рожденнаго прежде всех век; Света от Света, Бога Истинна от Бога Истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилáте, и страдáвша и погребенна. И воскресшаго в третий день по Писáнием, и возшедшаго на небесá и седяща одесную Отцá. И пáки грядущаго со слáвою судити живым и мертвым, Егоже Цáрствию не будет концá. И в Духа Святáго, Господа, Животворящаго, Иже от Отцá исходящаго, Иже со Отцем и Сыном спокланяема и сслáвима, Глаголавшего пророки. Во едину Святую, Соборную и Апостольскую Церковь. Исповедую едино крещение во оставление грехов. Чáю воскресения мертвых, и жизни будущаго века. Аминь.

Ослáби, остáви, прости Боже, прегрешения наша, вольная, и невольная, яже в слове и в деле, яже в ведении и не в ведении, яже во дни и в нощи, яже во уме и помышлении, вся нам прости, яко Благ и Человеколюбец.

Отче наш, Иже еси на небесéх. Да святится Имя Твоé, да приидет Цáрствие Твоé, да будет вóля Твоя, яко на небеси и на земли. Хлеб наш насущный даждь нам днесь, и остáви нам дóлги нáша, якоже и мы оставляем должникóм нáшим. И не введи нас во искушéние, но избáви нас от лукáваго.

Гóсподи, Иисусе Христé, Сыне Бóжий, помилуй нас. Аминь.

КОНДАК

Кондáк апóстолов, глас 2: Твéрдыя и Боговещáнныя проповéдатели,/ верх апóстолов Твои́х, Гóсподи,/ прия́л еси́ в наслаждéние благи́х Твои́х и покóй:/ болéзни бо óнех и смерть прия́л еси́ пáче вся́каго всеплóдия,// Еди́не, свéдый сердéчная.

Гóсподи, помилуй. (12 раз)

И молитву: Всесвятая Троице, Единосущная Держáво, Нераздельное Цáрство, всех благих Винá, благоволи же и о мне грéшнем, утверди, вразуми сéрдце моé, и всю мою отыми сквéрну, просвети мою мысль, да выну слáвлю, пою, покланяюся и глаголю: Един Свят, Един Господь, Иисус Христос, во слáву Бога Отца, аминь.

Буди имя Господне благословено от ныне и до века. (3 раза)

Слáва Отцу и Сыну и Святому Духу, и ныне и присно и во вéки векóв, аминь.

Псалом 33

Благословлю Гóспода на всякое врéмя,/ выну хвалá Его во устéх моих./ О Гóсподе похвáлится душá моя,/ да услышат крóтцыи и возвеселятся./ Возвеличите Гóспода со мнóю,/ и вознесéм имя Егó вкупе./ Взыскáх Гóспода и услыша мя,/ и от всех скорбéй моих избáви мя./ Приступите к Нему и просветитеся,/ и лицá вáша не постыдятся./ Сей нищий воззвá, и Госпóдь услыша и,/ и от всех скорбéй его спасé и./ Ополчится Ангел Госпóдень óкрест боящихся Егó,/ и избáвит их./ Вкусите и видите, яко благ Госпóдь;/ блажéн муж, иже уповáет нань./ Бóйтеся Гóспода, вси святии Егó,/ яко несть лишéния боящымся Его./ Богáтии обнищáша и взалкáша,/ взыскáющии же Гóспода не лишáтся всякаго блáга./ Приидите, чáда, послушайте менé,/ стрáху Госпóдню научу вас./ Кто есть человéк хотяй живóт,/ любяй дни видети блáги;/ Удержи язык твой от зла,/ и устнé твои, éже не глагóлати льсти./ Уклонися от зла и сотвори блáго,/ взыщи мира, и пожени и./ Очи Госпóдни на прáведныя,/ и уши Егó в молитву их./ Лицé же Госпóдне на творящия злáя,/ еже потребити от земли пáмять их./ Воззвáша прáведнии, и Госпóдь услыша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя духом спасéт./ Мнóги скóрби прáведным,/ и от всех их избáвит я Госпóдь./ Хранит Госпóдь вся кóсти их,/ ни едина от них сокрушится./ Смерть грéшников лютá,/ и ненавидящии прáведнаго прегрешáт./ Избáвит Госпóдь души раб Своих,/ и не прегрешáт вси уповáющии на Негó.

Достойно есть

Достойно есть яко воистинну блажити Тя, Богородицу, / Присноблаженную и Пренепорочную и Матерь Бога нашего. / Честнейшую Херувим / и славнейшую без сравнения Серафим, / без истления Бога Слова рождшую, / сущую Богородицу, Тя величаем.

Слáва Отцу и Сыну и Святóму Духу, и ныне и присно и во вéки векóв, аминь.

Гóсподи, помилуй. (3 раза)

Гóсподи, благослови.

ОТПУСТ

Воскресый из мéртвых, Христé, истинный Бог наш, молитвами Пречистыя Своея Мáтере, святых слáвных и всехвáльных Апóстол Петрá и Пáвла, святых и прáведных богоотéц Иоакима и Анны, и всех святых, помилуй и спаси нас, яко Благ и Человеколюбец. Аминь.

Таже, поем многолетие

Благочестивейшаго, Самодержáвнейшаго, Великаго грядущаго Госудáря нáшего Имперáтора (его имя Ты вем) святéйшыя вселéнския патриáрхи преосвящéнныя митрополиты, архиепископы и епископы православныя, иерéи и дьяконы и весь причет церкóвный и вся правослáвныя христиáны, Гóсподи, сохрани их на мнóгая лéта!