Неделя 7 по Пятидесятнице. Рождество святителя Николая, глас 6 ВСЕНОЩНОЕ БДЕНИЕ УТРЕНЯ КАНОН
11 áвгуста 2024 гóда. Недéля 7 по Пятидеся́тнице. Рождествò велúкаго святúтеля и чудотвóрца Нiколáя. Глас 6. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ СВЯТИТЕЛЮ
Хор: Величáем Тя,/ святúтелю óтче Нiкóлaе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Услы́шите сiя́ вси язы́цы, внуши́те вси, живýщiи по вселéнней./ Устà моя́ возглагóлют премýдрость, и поучéнiе сéрдца моегò рáзум./ Прiиди́те, чáда, послýшайте менé, стрáху Госпóдню научý вас./ Благовести́х прáвду в цéркви вели́цей./ И҆́стину Твою́ и спасéнiе Твоé рех./ Повéм И҆́мя Твоé брáтiи моéй, посредé цéркве воспою́ Тя./ Услы́шати ми глас хвалы́ Твоея́ и повéдати вся чудесà Твоя́./ Гóсподи, возлюби́х благолéпiе дóму Твоегò, и мéсто селéнiя слáвы Твоея́./ Возненави́дех цéрковь лукáвнующих, и с нечести́выми не ся́ду./ Я́ко сохрани́х путѝ Госпóдни и не нечéствовах от Бóга моегò./ Устà прáведнаго поучáтся премýдрости, и язы́к егò возглагóлет суд./ Прáвда Егò пребывáет в век вéка./ Свящéнницы Твоѝ облекýтся прáвдою, и преподóбнiи Твоѝ возрáдуются.// Блажéни живýщiи в домý Твоéм, в вéки векóв восхвáлят Тя.
Хор: Величáем Тя,/ святúтелю óтче Нiкóлaе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтò ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелò рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 6: Вóльною и животворя́щею Твоéю смéртiю, Хрїстè,/ вратà áдова сокруши́в, я́ко Бог,/ отвéрзл есѝ нам дрéвнiй рай, и воскрéс из мéртвых,// избáвил есѝ от тлéнiя живóт наш.
СЕДАЛЬНЫ ПО ПОЛИЕЛЕИ
Глас 1 (Свт. Нiколáя, по 1‑м стiхослóвiи):В Ми́рех рóждься, святи́телю,/ ми́ром разýмно духóвным яви́лся есѝ помáзан, óтче Нiкóлае./ Тéмже ми́ры чудéс твои́х мiр облагоухáл есѝ,/ ми́ро приснотекýщее проливáя,/ и́же мѵ́рными твои́ми благоухáемыми чудесы́ почитáющих торжествò твоè и нас, раб твои́х, обогатѝ.
Глас 8 (по 2‑м стiхослóвiи): Истóчник чудéс от Бóга яви́лся есѝ, мýдре Нiкóлае, тѣ́мже, óтче, въ рождествѣ́ твоéм ди́вен я́влься, всѣм бо вѣ́рным источáеши спасéнныя вóды, от Бóга благодáть пріéм, тѣ́мже дерзновéніе имѣ́я к Немý, молѝ о чтýщих вѣ́рою и любóвію пáмять рождествà твоегò, всеблажéнне Нiкóлае.
Слáва Ѻтцý и Сы́ну и Святóму Дýху.
Глас 5 (седáлен свт. Нiколáя по полiелéи): Ны́нѣ, óтче святи́телю Нiкóлае, отéчество твоè, град Ликíя, свѣ́тло рáдуется, и вся вселéнная день рождéнія твоегò чéстно прáзднует. Тѣ́мже и мы днесь во хрáмѣ твоéм, сошéдшеся вкýпѣ с ни́ми, похвáльная принóсим ти, глагóлюще: рáдуйся, óтче Нiкóлае, всѣх покрóве и заступлéніе.
И ны́не и прúсно и во вéки векóв, амúнь.
Богорóдичен: Неискусобрáчная Невѣ́сто, Приснодѣ́во, со святи́тели непрестáнно восхваля́ем Тя, я́ко Тобóю нам вели́чія сотворѝ Сын Твой и Бог Превѣ́чный от Отцà, Иже в ложеснáх Твои́х вмѣсти́тися извóливый, да от лéсти свободи́т род наш.
СТЕПЕННА, ГЛАС 6
1 АНТИФОН
Хор: На нéбо óчи моù возвожý, к Тебè, Слóве:// ущéдри мя, да живý Тебè. (Двáжды)
Поми́луй нас уничижéнных,// устроя́я благопотрéбныя Твоя́ сосýды, Слóве. (Двáжды)
Слáва Ѻтцý и Сы́ну и Святóму Дýху.
Святóму Дýху, вся́кая всеспаси́тельная винà,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горè.
И ны́не и прúсно и во вéки векóв. Амúнь.
Святóму Дýху, вся́кая всеспаси́тельная винà,/ áще кóему сей по достоя́нiю дхнет,// скóро взéмлет от земны́х: восперя́ет, возращáет, устроя́ет горè.
2 АНТИФОН
Áще не Госпóдь бы был в нас,/ никтóже от нас протúву возмóгл бы врáжiим брáнем одолéти:// побеждáющiи бо от зде вознóсятся. (Двáжды)
Зубы́ их да не я́та бýдет душà моя́ я́ко птенéц, Слóве:// увы́ мне, кáко и҆́мам от врагà избы́ти, грехолюби́в сый! (Двáжды)
Слáва Ѻтцý и Сы́ну и Святóму Дýху.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом обожéнiе всем,/ благоволéнiе, рáзум, мир и благословéнiе:// равнодéтелен бо есть Отцý и Слóву.
3 АНТИФОН
Надéющiися на Гóспода врагóм стрáшни, и всем дúвни:// горè бо зрят. (Двáжды)
В беззакóнiя рук свои́х, прáведных жрéбiй,// помóщника Тя имéя Спáсе, не простирáет. (Двáжды)
Слáва Ѻтцý и Сы́ну и Святóму Дýху.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
И ны́не и прúсно и во вéки векóв. Амúнь.
Святáго Дýха держáва на всех:/ Емýже Вы́шняя вóинства покланя́ются,// со вся́ким дыхáнiем дóльным.
ПРОКИМЕН
Чтец: Прокíмен, глас шесты́й: Гóсподи, воздви́гни си́лу Твою́, и прiидѝ во éже спастѝ нас. (Пс.79:3Б)
Хор: Гóсподи, воздвúгни сúлу Твою́,/ и прiидù во éже спастù нас.
Чтец: Пасы́й Iзрáиля вонмѝ, наставля́яй я́ко овчà Ióсифа. (Пс.79:2А)
Хор: Гóсподи, воздвúгни сúлу Твою́,/ и прiидù во éже спастù нас.
Чтец: Гóсподи, воздви́гни си́лу Твою́.
Хор: И прiидù во éже спастù нас.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.63): Во врéмя óно, во еди́ну от суббóт, Марíя Магдали́на прiи́де заýтра, ещè сýщи тме, на гроб, и ви́де кáмень взят от грóба. Течè ýбо и прiи́де к Сíмону Петрý, и к другóму ученикý, егóже любля́ше Iисýс, и глагóла и́ма: взя́ша Гóспода от грóба, и не вем, где положи́ша Егò. Изы́де же Петр и другíй учени́к, и идя́ста ко грóбу. Течáста же óба вкýпе: и другíй учени́к течè скорéе Петрà, и прiи́де прéжде ко грóбу. И прини́к ви́де ри́зы лежáща, обáче не вни́де. Прiи́де же Сíмон Петр в след егò, и вни́де во гроб, и ви́де ри́зы еди́ны лежáща. И судáрь, и́же бе на главè Егò, не с ри́зами лежáщь, но осóбь свит на еди́ном мéсте. Тогдà ýбо вни́де и другíй учени́к, пришéдый прéжде ко грóбу, и ви́де, и вéрова. Не у бо вéдяху Писáнiя, я́ко подобáет Емý из мéртвых воскрéснути. Идóста же пáки к себè ученикà.
В то время, в первый же день недели, Мария Магдалина приходит ко гробу рано, когда было еще темно, и видит, что камень отвален от гроба. Итак, бежит и приходит к Симону Петру и к другому ученику, которого любил Иисус, и говорит им: унесли Господа из гроба, и не знаем, где положили Его. Тотчас вышел Петр и другой ученик, и пошли ко гробу. Они побежали оба вместе; но другой ученик бежал скорее Петра, и пришел ко гробу первый. И, наклонившись, увидел лежащие пелены; но не вошел во гроб. Вслед за ним приходит Симон Петр, и входит во гроб, и видит одни пелены лежащие, и плат, который был на главе Его, не с пеленами лежащий, но особо свитый на другом месте. Тогда вошел и другой ученик, прежде пришедший ко гробу, и увидел, и уверовал. Ибо они еще не знали из Писания, что Ему надлежало воскреснуть из мертвых. Итак ученики опять возвратились к себе.(Ин.20:1-10)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 6
(совмещéнный с канóном крестовоскрéсным (глас 6), Богорóдицы (глас 6) и с каноном Свят. Николая, гласы 3)
ПЕСНЬ 1
Iрмóс: Я́ко по сýху пешешéствовав Iзрáиль,/ по бéздне стопáми,/ гонúтеля фараóна/ вúдя потопля́ема,// Бóгу побéдную песнь поúм, вопiя́ше.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Распростéртыма длáньма на крестè,/ отéческаго испóлнил есѝ благоволéнiя, благíй Iисýсе, вся́ческая.// тéмже побéдную песнь Тебè вси пои́м.
Хор: Слáва, Гóсподи, Святóму Воскресéнiю Твоемý.
Чтец: Стрáхом к Тебè, я́ко рабы́ня, смерть/ повелéна приступѝ Влады́це животà,// тóю подаю́щему нам безконéчный живóт и воскресéнiе.
Хор: Пресвятáя Богорóдице, спасù нас.
Богорóдичен: Своегò прiéмши Содéтеля, я́ко Сам восхотè,/ от безсéменнаго Твоегò чрéва, пáче умà воплощáема, Чи́стая,// твáрей вои́стинну яви́лася есѝ, Влады́чица.
Канон крестовоскресный, глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Суди́лищу Пiлáтову предстои́т хотя́/ беззакóнному судý, я́ко суди́мь, Судiя́,/ и от рукѝ непрáвды по лицý заушáется Бог,// егóже трепéщут земля́, и небéсная.
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ Божéственнеи длáни Твоѝ, Спáсе,/ на пречи́стем Твоéм и живонóснем Крестè:/ и собрáл есѝ язы́ки в познáнiе Твоè, Влады́ко,// покланя́ющыяся, Гóсподи, слáвному Твоемý распя́тiю.
Канон Богородицы, глас 6
Хор: Пресвятáя Богорóдице, спасù нас.
Чтец: Причáщшися Éва садý, преслушáннаго брáшна, кля́тву введè:/ но сiю́ разреши́ла есѝ, Чи́стая,// благословéнiя начáток Хрїстà рóждши.
Хор: Пресвятáя Богорóдице, спасù нас.
Чтец: Я́же би́сера от божéственныя мóлнiи Хрїстà рóждши,/ страстéй мои́х мглу, и прегрешéнiй смущéнiе, Чи́стая,// разжени́ свéтом Твоея́ свéтлости.
Канон свт. Николáя, глас 3
Хор: Святúтелю óтче Нiкóлае, молù Бóга о нас.
Чтец: Ди́вен и слáвен есѝ, Гóсподи, творя́й чудесà, раздѣли́вый мóре, и вóду из кáмене источи́вый жáждущим лю́дем. Напоѝ ýбо, Блáже, и менè росóю Твоея́ благодáти, да возмогý воспѣ́ти угóдника Твоегò преслáвное рождествò. (Двáжды)
Хор: Святúтелю óтче Нiкóлае, молù Бóга о нас.
Чтец: Ди́вное и слáвное рождествò твоè, свя́те Нiкóлае, отъ любвè душéвныя хощý похвали́ти, но недоумѣ́ніем содержи́мь, бою́ся трепéща, занè вѣм, я́ко не краснà похвалà во устѣ́х грѣ́шников. Но обáче дерзáя на благоутрóбіе твоè, слáвлю святóе твоè рождествò.
Хор: Святúтелю óтче Нiкóлае, молù Бóга о нас.
Чтец: Ди́вна вои́стину и слáвна, святи́телю, пáмять рождествà твоегò, я́ко звѣздà ýтренняя посредѝ óблак, и я́ко сóлнце сія́я на Цéрковь Вы́шняго, и я́ко дугà на óблацѣх слáвы, тáко сія́ет хвалà твоя́ на твéрди церкóвнѣй, óтче Нiкóлае.
Слáва Ѻтцý и Сы́ну и Святóму Дýху.
Чтец: Ди́внаго и преслáвнаго святи́теля на преслáвное рождествò, хрiстоимени́тіи, стéкшеся, усéрдно собери́теся и слáву Гóсподеви воздади́те, я́ко даровà нам таковà пáстыря и учи́теля нелéстна, и путеводи́теля, и отъ бѣд свободи́теля, еретикóм же посрами́теля.
И ны́не и прúсно и во вéки векóв. Амúнь.
Богорóдичен: Ди́вна и преестéственна тáйна рождествà Твоегò, Богорóдице! Кíй бо слух слы́ша не удиви́тся богорождéнію Твоемý, я́ко во утрóбѣ Своéй Создáтеля всѣх нетѣ́сно вмѣсти́ла есѝ, и пáки Дѣ́ва пребылà есѝ?
Катавáсiя (глас 4): Отвéрзу устà моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ чудесà.
ПЕСНЬ 3
Iрмóс: Несть свят,/ я́коже Ты, Гóсподи Бóже мой,/ вознесы́й рог вéрных Твоúх, Блáже,/ и утвердúвый нас на кáмени// исповéданiя Твоегò.
Хор: Слáва, Гóсподи, Святóму Воскресéнiю Твоемý.
Чтец: Бóга распинáема плóтiю зря́щи тварь, растаявáшеся стрáхом:// но содержи́тельною длáнiю нас рáди Распя́таго, крéпко держи́ма бе.
Хор: Слáва, Гóсподи, Святóму Воскресéнiю Твоемý.
Чтец: Смéртiю смерть разорéна лежи́т окая́нная без дыхáнiя:/ Животà бо не терпя́щи божéственнаго приражéнiя,// умерщвля́ется крéпкiй, и дáруется всем воскресéнiе.
Хор: Пресвятáя Богорóдице, спасù нас.
Богорóдичен: Божéственнаго рождествà Твоегò, Чи́стая,/ вся́кiй естествà чин превосхóдит чýдо:/ Бóга бо преестéственне зачалà есѝ во чрéве,// и рóждши пребывáеши при́сно Дéва.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Во грóбе триднéвствовавый/ воскреси́л есѝ животворя́щим востáнiем Твои́м прéжде умерщвлéнныя,/ и осуждéнiя разреши́вшеся, рáдостно веселя́хуся,// се избавлéнiе пришéл есѝ, Гóсподи, взывáюще.
Хор: Слáва, Гóсподи, Крестý Твоемý Честнóму и Воскресéнiю.
Чтец: Слáва Твоемý востáнiю, Спáсе наш,/ я́ко нас от áда тлéнiя, и смéрти избáвил есѝ, я́ко Всеси́лен,/ и пою́ще глагóлем:// несть свят рáзве Тебè, Гóсподи Человеколю́бче.
Глас 6
Хор: Пресвятáя Богорóдице, спасù нас.
Чтец: Тлéнную мою́ плоть и смéртную, Всечи́стая Богомáти,/ из чрéва Твоегó несказáнно прiéм Благíй,// и обезтлéнив сiю́, вéчне Себè связáл есть.
Хор: Пресвятáя Богорóдице, спасù нас.
Чтец: Бóга воплощáема из Тебè зря́ще, Дéво,/ ужасáхуся стрáхом ли́цы Áнгельстiи,// и я́ко Мáтерь Бóжiю немóлчными пéсньми Тя почитáют.
Глас 3
Хор: Святúтелю óтче Нiкóлае, молù Бóга о нас.
Чтец: Неплóдну и́мам дýшу аз окая́нный, кáко тя могý похвали́ти, святи́телю? Вои́стину ты, óтче, плод благохвáльный, дýшу мою́ плодонóсну покажѝ, да возмогý воспѣ́ти святóе твоè рождествò. (Двáжды)
Хор: Святúтелю óтче Нiкóлае, молù Бóга о нас.
Чтец: Неплóдна бы́ста роди́теля твоя́ по рождествѣ́ твоéм, святи́телю Нiкóлае. Естествý ýбо повѣ́дающу, я́ко не мóгут другáго таковà роди́ти, добродѣ́тельми же я́ко Авраáм плóдна и вѣ́рна бы́ста, тогò рáди и мзду о вѣ́рѣ своéй от Бóга тебè прія́ста.(Двáжды)
Слáва Ѻтцý и Сы́ну и Святóму Дýху.
Чтец: Неплóдных чресл честнóе прозябéніе, святи́телю, слы́ша, кто не удиви́тся, рóждшуся бо тебѣ́, свя́те? Вои́стину ди́вная о тебѣ́ явѝ Госпóдь: трем бо часóм неуклóнно тебѣ́ стоя́щу на землѝ, идѣ́же хотя́ше омы́тися, чýдне Нiкóлае.
И ны́не и прúсно и во вéки векóв. Амúнь.
Богорóдичен: Неплóдных ложéсн рождéніе, Пресвятáя Влады́чице, но рóждьши нам Хрїстà, Плодà Безсмéртнаго, питáющаго вся́ко создáніе и смотря́щаго всю тварь, Богороди́тельнице.
Катавáсiя (глас 4): Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшыя, духóвно утвердù,/ в Божéственней Твоéй слáве// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк cвт. Нiколáя, глас 3: В Ми́рех рóждься, свя́те Нiкóлае,/ от благорóдна кóрене,/ я́ко благоплóдна вѣтвь прозя́бл есѝ,/ испóлнь бо бых божéственных дарóв,/ я́ко сóлнце заря́ми весь мíр чудесы̀ просвѣти́л есѝ,/ сегò рáди прославля́ем тя//, я́ко ученикà и таи́нника Бóжія благодáти.
Íкос: Пріиди́те ны́нѣ съ нáми, брáтіе, и кýпно духóвнѣ возвесели́мся во святѣ́м торжествѣ́ богонóснаго отцà нáшего святи́теля Нiколáя, и прослáвим преслáвно рóждшагося, и от утрóбы освящéннаго, и Божéственнаго Дýха пріи́мшаго, и Святýю Трóицу въ час рождéнія своегò стоя́ніем ног свои́х проповѣ́давшаго, и всѣх человѣ́к уди́вльшаго, и, хвáляще святóе и чýдное рождествò егò, любóвію и прáвостію сердéчною благодáрная къ немý си́це рцем: рáдуйся, от мáтерних ложéсн Бóгу возложéнная и от Негò усвоéнная и освящéнная главò, сокруши́вый прокля́тому сатанѣ́ главý; рáдуйся, предъизбрáнный и освящéнный сосýде и Бóгу возложéнный и возлю́бленный; рáдуйся, царéм правовѣ́рным пóмоще и окормлéніе, и на врагѝ побѣ́да и одолѣ́ніе, и правослáвію утверждéніе; рáдуйся, в Дýха Святáго облечéнный и на благодѣя́ніе благочести́вым подáнный; рáдуйся, нечести́вых потреби́телю и на страх их явлéнный; рáдуйся, бѣсóм прогони́телю и еретикóм обличи́телю; рáдуйся, я́ко во святѣ́м рождествѣ́ твоéм ди́венъ всѣм познáнный, я́ко и́маши бы́ти вели́кій таи́нник Бóжія благодáти.
Ин кондáк cвт. Нiколáя, глас 3: Яко звѣздà пресвѣ́тлая просія́л есѝ, блажéнне Нiкóлае: посредѝ Ликíи грáда от прáведнику роди́лся есѝ, óтче, и в честнѣ́м рождествѣ́ твоéм чýдна и слáвна тя показà Госпóдь, и во святѣ́м младéнствѣ твоéм ди́вная явлéна бы́ша о тебѣ́. Трóицу бо проповѣ́дал есѝ трех часóв стоя́ніем честны́х ног твои́х на землѝ в час рождéнія твоегò; и отъ сосцà деснáго питáшеся, от лѣ́ваго же никáкоже; в срéду же и в пятóк еди́ною, и то во врéмя вечéрнее, и оттогò, óтче, познáн был есѝ воздержáнія нелéстное прáвило, и я́ко и́маши бы́ти вéлій таи́нник Бóжія благодáти.
Седáлен свт. Нiколáя, глaс 5: О, блажéнная верстò и благословéнное супрýжество прекрáснаго душéю Ѳеофáна и боголюби́выя Нóнны! Божéственным бо желáніем совокýплени бы́ста, и израсти́вша нам прекрáснаго плодà, чýднаго Нiколáя, не тóкмо бо я́ко цвѣт шипкà, илѝ крíна при исхождéніи воды̀, илѝ стéбло Лiвáново во дни жáтвы, но и́стиннаго плодà рѣкý, отцà си́рым и вдови́цам застýпника, богáтство ни́щим и боля́щим здрáвіе и утѣшéніе, и сýщим в богáтствѣ окормлéніе, стáрости подпóр и ю́ности обучи́теля, благочéстія окорми́теля, еретикóм же и бѣсóм губи́теля. К немýже мы ны́нѣ возопіéм: óтче святи́телю Нiкóлае, молѝ спасти́ся пою́щим тя.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Богорóдичен минéи, глас 5: Блажéнна ложеснà твоя́, Богороди́тельнице Дѣ́во, я́ко ши́рши небéс я́вльшася, слóвом бо Состáвльшаго тварь во утрóбѣ Своéй безсѣ́менно имѣ́ла есѝ, и во объя́тіих Свои́х нетрýдно носи́ла есѝ, тѣм мóлим Тя, Всеблажéнная, éже моли́ти от Тебè рождéннаго Хрїстà, Бóга нáшего, во éже спасти́ся пою́щим Тя.
ПЕСНЬ 4
Iрмóс: Хрїстóс моя́ сúла,/ Бог и Госпóдь,/ честнáя Цéрковь/ боголéпно поéт, взывáющи,// от смы́сла чúста, о Гóсподе прáзднующи.
Хор: Слáва, Гóсподи, Святóму Воскресéнiю Твоемý.
Чтец: Дрéво процвелò есть, Хрїстè, и҆́стинныя жи́зни:/ крест бо водрузи́ся,/ и напоéн быв крóвiю и водóю от нетлéннаго Твоегò ребрà,// живóт нам прозябè.
Хор: Слáва, Гóсподи, Святóму Воскресéнiю Твоемý.
Чтец: Не ктомý змiй мне лóжне обожéнiе подлагáет:/ Хрїстóс бо богодéлатель человéческаго естествà,// ны́не невозбрáнно стезю́ животà мне отвéрзе.
Хор: Пресвятáя Богорóдице, спасù нас.
Богорóдичен: Я́ко вои́стинну неизвещáнна и непостижи́ма,/ я́же Твоегò боголéпнаго, Богорóдице, суть рождествà,// сýщым на землѝ и на небесѝ, Приснодéво, тáинства.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Честны́й крест Твой почитáем, и гвóзди, Хрїстè,/ и святóе копiè с трóстiю, венéц и́же от тéрнiй,// и́миже от áдова истлéнiя избáвихомся.
Хор: Слáва, Гóсподи, Крестý Твоемý Честнóму и Воскресéнiю.
Чтец: Гроб, Спáсе, Тя подъя́т вóлею мéртва о нас я́вльшагося,/ но никáкоже возмóже, Слóве, удержáти:// я́ко Бог бо воскрéсл есѝ, спасáя род наш.
Глас 6
Хор: Пресвятáя Богорóдице, спасù нас.
Чтец: Поéм, Пречи́стая, Тебè Всенепорóчную,/ и҆́же Тобóю спáсшiися,/ и благочéстно пою́ще взывáем:// благословéнна, я́же Бóга, Приснодéво, рóждшая.
Хор: Пресвятáя Богорóдице, спасù нас.
Чтец: Свет незаходи́мый, Дéво, родилà есѝ,/ сýщым во тьме житiя́,/ плóтiю светя́щ, Всеблажéнная, и пою́щым Тя,// рáдость, Приснодéво, источи́ла есѝ.
Глас 3
Хор: Святúтелю óтче Нiкóлае, молù Бóга о нас.
Чтец: Покры́ла есть я́ко óблак любы̀ твоя́ и благодáть твоя́, ю́же и́маши отъ Бóга, святи́телю Нiкóлае, всѣх призывáющих и́мя твоè святóе, всю́ду бо неоскýдно подавáеши и коегóждо прошéнія исполня́еши. Пріидѝ и ны́нѣ посредѝ нас неви́димо и посѣтѝ нас, озлóбленных грѣхмѝ, любóвію прáзднующих пречестнóе твоè рождествò. (Двáжды)
Хор: Святúтелю óтче Нiкóлае, молù Бóга о нас.
Чтец: Прáзднуется и украшáется рождествóм твои́м, святи́телю, я́ко мони́сты Цéрковь Хрiстóва, и невѣ́стски свѣ́тло одѣвáется и красýется, веселя́ся и вопія́ рáдостно, глагóля: пріиди́те и ви́дите желáемаго мнóю небéснаго граждани́на и служи́теля Хрiстóва, днесь рóждшася от благовѣ́рну роди́телю.
Хор: Святúтелю óтче Нiкóлае, молù Бóга о нас.
Чтец: Пáмять рождествà твоегò, óтче святи́телю, всѣм человѣ́ком бысть весéліе. Покры́й нас, óтче всечéстне, призывáющих тя с вѣ́рою и прáзднующих чéстно торжествò прáздника твоегò, святи́телю Нiкóлае.
Слáва Ѻтцý и Сы́ну и Святóму Дýху.
Чтец: Похваля́ему бо прáведнику возвеселя́тся лю́діе, я́коже речè писáніе. Днесь ны́нѣ мы, грѣ́шніи, в рождествѣ́ твоéм, óтче Нiкóлае, рáдуемся и весели́мся духóвнѣ, Хрiстà слáвяще, и́же тебѣ́ таковýю благодáть даровáвшаго, я́ко Тогò хвалéнія испóлнь земля́.
И ны́не и прúсно и во вéки векóв. Амúнь.
Богорóдичен: Пресвятáя Богоневѣ́сто, рóждшая Хрiстà, Прави́теля и Содѣ́теля всѣм, немощствýющую дýшу мою́ исцѣлѝ и настáви мя на дѣя́нія благáя, да всегдà слáвлю Тя Преблагословéнную.
Катавáсiя (глас 4): Седя́й в Слáве/ на Престóле Божествà/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасè зовýщыя:// слáва, Хрїстè, сúле Твоéй.
ПЕСНЬ 5
Iрмóс: Бóжiим свéтом Твоúм, Блáже,/ ýтренюющих Ти дýши любóвiю озарù, молю́ся,/ Тя вéдети, Слóве Бóжiй,/ úстиннаго Бóга,// от мрáка грехóвнаго взывáюща.
Хор: Слáва, Гóсподи, Святóму Воскресéнiю Твоемý.
Чтец: Уступáют мне херувíми ны́не,/ и плáменное орýжiе, Влады́ко, плещѝ мне даéт,/ Тя ви́девше, Слóве Бóжiй, и҆́стиннаго Бóга,// разбóйнику путь сотвóршаго в рай.
Хор: Слáва, Гóсподи, Святóму Воскресéнiю Твоемý.
Чтец: Не ктомý бою́ся, éже в зéмлю, Влады́ко Хрїстè, возвращéнiя:/ Ты бо от землѝ мя возвéл есѝ забвéнна,/ благоутрóбiя рáди мнóгаго,// к высотè нетлéнiя воскресéнiем Твои́м.
Хор: Пресвятáя Богорóдице, спасù нас.
Богорóдичен: И҆́же Богорóдицу Тя от душѝ, Влады́чице мíра благáя,/ исповéдающих спасѝ:/ Тебè бо предстáтельство непобори́мое и҆́мамы,// и҆́стинную Богороди́тельницу.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Снéдiю дрéва во Едéме прельсти́выйся, в тлю поползè родоначáльник,/ преслýшавый, Гóсподи, зáповеди Твоя́, Преблагíй:/ но сегò Крестóм пáки возвéл есѝ в пéрвую добрóту,// послушли́в Отцý, Спáсе, бы́вый.
Хор: Слáва, Гóсподи, Крестý Твоемý Честнóму и Воскресéнiю.
Чтец: Твоéю смéртiю, Блáже, смéрти потреби́ся держáва,/ истóчник жи́зни нам источѝ, и безсмéртiе даровáся:/ сегò рáди погребéнiю Твоемý и воскресéнiю вéрою покланя́емся,// и́мже, я́ко Бог, мiр весь просвети́л есѝ.
Глас 6
Хор: Пресвятáя Богорóдице, спасù нас.
Чтец: Чистотóю возсiя́вши свéтло,/ Божéственное пребывáнiе Влады́ки, Всепéтая, былà есѝ./ Ты бо еди́на Мáти Бóжiя яви́лася есѝ,// во объя́тiих, я́ко младéнца, Сегò носи́вши.
Хор: Пресвятáя Богорóдице, спасù нас.
Чтец: Нося́щи добрóту ýмную, краснéйшiя Твоея́ душѝ,/ Невéста Бóжiя былà есѝ,/ запечáтствована дéвством, Чи́стая,// и свéтом чистоты́ мiр просвещáющи.
Глас 3
Хор: Святúтелю óтче Нiкóлае, молù Бóга о нас.
Чтец: На землѝ, óтче святи́телю, яви́ся вѣ́рнымъ твоè святóе рождествò, вои́стину любéзное торжествò, я́коже бо ливáн в кади́льницѣ илѝ я́ко мáслина износя́щи плод, тáко нам пáмять рождествà твоегò, óтче милосéрде Нiкóлае. (Двáжды)
Хор: Святúтелю óтче Нiкóлае, молù Бóга о нас.
Чтец: На землѝ днесь ны́нѣ, святи́телю, познáн бысть, и я́ко от Бóга познáн был есѝ: прослáви бо тя Госпóдь въ рождествѣ́ твоéм, и́бо стоя́ніем честны́х ног твои́х, явля́я хотя́щее бы́ти на тебѣ́ даровáніе.(Двáжды)
Слáва Ѻтцý и Сы́ну и Святóму Дýху.
Чтец: На землѝ ны́нѣ Цéрковь правослáвных весели́тся, святи́телю Нiкóлае, и ликýет с чáды свои́ми в пáмяти рождествà твоегò, милосéрде, и, вопія́, глагóлет: уясни́ся ны́нѣ добрóта прекрáсно и никогдà же угáснет.
И ны́не и прúсно и во вéки векóв. Амúнь.
Богорóдичен: На зéмлю во чрéво Твоè, Чи́стая, я́ко дождь на рунò сни́де Госпóдь и Бог наш, и от Твои́х пречи́стых дѣви́ческих кровéй плоть пріéмь и чудодѣ́йствова, и пострадà, и взы́де на небесà, с Собóю возвышáя прáотца.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилà есù Безлéтнаго Сы́на,/ всем, воспевáющым Тя,// мир подавáющая.
ПЕСНЬ 6
Iрмóс: Житéйское мóре,/ воздвизáемое зря напáстей бýрею,/ к тúхому пристáнищу Твоемý притéк, вопiю́ Ти:/ возведù от тли живóт мой,// Многомúлостиве.
Хор: Слáва, Гóсподи, Святóму Воскресéнiю Твоемý.
Чтец: Распинáемь, Влады́ко, гвоздьмѝ ýбо,/ кля́тву ю́же на нас потреби́л есѝ:/ копiéм же прободáемь в ребрò,// адáмово рукописáнiе растерзáв, мíр свободи́л есѝ.
Хор: Слáва, Гóсподи, Святóму Воскресéнiю Твоемý.
Чтец: Адáм низведéся, лéстiю запя́т быв, ко áдове прóпасти:/ но и҆́же естествóм Бог же и ми́лостив,/ сшел есѝ на взыскáнiе,// и на рáму понéс, совоскреси́л есѝ.
Хор: Пресвятáя Богорóдице, спасù нас.
Богорóдичен: Пречи́стая Влады́чице,/ рóждшая человéком кóрмчiю Гóспода,/ страстéй мои́х непостоя́нное и лю́тое утолѝ смущéнiе,// и тишинý подáждь сéрдцу моемý.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Хрїстоубíйца и пророкоубíйца бысть еврéйское мнóжество:/ я́ко бо прорóки дрéвле, и́стины сýщiя тáйныя лучѝ, уби́ти не убоя́ся:/ си́це и ны́не Гóспода, егóже проповéдаху онѝ тогдà,/ зáвистiю влекóми уби́ша,// но нам бысть живóт умерщвлéнiе Егò.
Хор: Слáва, Гóсподи, Крестý Твоемý Честнóму и Воскресéнiю.
Чтец: Ят был есѝ, но не удержáн, Спáсе, во грóбе,/ áще бо и вóлею вкуси́л есѝ смéрти, Слóве,/ но воскрéсл есѝ, я́ко Бог безсмéртен,/ совоздви́гнувый ýзники сýщiя во áде,// и рáдость женáм вмéсто печáли прéжнiя, пáки премени́вый.
Глас 6
Хор: Пресвятáя Богорóдице, спасù нас.
Чтец: Вели́кiй преднаписà во прорóцех Моисéй Тя,/ ковчéг, и трапéзу, и свéщник, и рýчку,/ обрáзно назнáменуя воплощéнiе,// éже из Тебè Вы́шняго, Мáти Дéво.
Хор: Пресвятáя Богорóдице, спасù нас.
Чтец: Умерщвля́ется смерть, и тлéнiе упражня́ется/ Адáмова осуждéнiя, о Влады́чице!/ Плодý Твоемý прирази́вшееся:/ Жизнь бо родилà есѝ,// от истлéнiя избавля́ющую пою́щих Тя.
Глас 3
Хор: Святúтелю óтче Нiкóлае, молù Бóга о нас.
Чтец: Глубинà страстéй востà на ны и бýря проти́вных вѣ́тров, но, предвари́в нас, óтче святи́телю, и разори́ сопротиволежáщій на нас совѣ́т лукáваго, и лукáвых человѣ́к стремлéнія, хвáлящихся о злóбѣ своéй, спаси́ ны от них, милосéрде Нiкóлае. (Двáжды)
Хор: Святúтелю óтче Нiкóлае, молù Бóга о нас.
Чтец: Глубинѣ́ богáтства Бóжія диви́тися суть дóлжно, дѣлà же Бóжіи слáвити зѣлò есть лѣ́по, пáмяти же святы́х чти́ти велми́ есть полéзно. Почти́м ýбо и мы, брáтіе, и возлю́бим возлю́бленнаго Бóгом святи́теля Нiколáя, кáко во святѣ́м младéнствѣ егò ди́вная о нем показà Бог. Питáше бо ся, но не тáко, я́коже обы́чай дѣ́тем: в срéду же и пятóк еди́ною касáшеся, и то к вéчеру, от лѣ́ваго же сосцà отню́д не ссáше, прознáменуя деснóе житія́ егò.(Двáжды)
Слáва Ѻтцý и Сы́ну и Святóму Дýху.
Чтец: Глубинóю мýдрости помышля́яй о всѣх Госпóдь, прéжде проти́вных вѣ́тров тишинý уготовля́ет, на Аріев ýбо плéвел огнь вжигáет, сегò ди́внаго рѣкý и преслáвнаго святи́теля Нiколáя рождествò явля́ет, по речéнному от апóстола Пáвла: егóже предувѣ́де Бог, сегò и предъизбрà, и оправдà, и прослáви.
И ны́не и прúсно и во вéки векóв. Амúнь.
Богорóдичен: Глубинѣ́ тáинства богорождéнія Твоегò, кто не удиви́тся, Пресвятáя Дѣ́во, Влады́чице? Вѣкóв бо Творéц всели́ся в Тя и плоть от Тебе́ пріи́м у́мну и словéсну, вся человѣ́ки обожи́.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Продолжéнiе здесь