Неделя 7 по Пятидесятнице. Рождество святителя Николая, глас 6 УТРЕНЯ (окончание) ЧАС ПЕРВЫЙ
11 áвгуста 2024 гóда. Недéля 7 по Пятидеся́тнице. Рождествò велúкаго святúтеля и чудотвóрца Нiколáя. Глас 6. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь (продолжéнiе ýтрени с канóном)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 6: Живоначáльною длáнiю/ умéршiя от мрáчных удóлiй,/ Жизнодáвец воскресúв всех Хрїстóс Бог,/ воскресéнiе подадè человéческому рóду:/ есть бо всех Спасúтель,// Воскресéнiе и Живóт, и Бог всех.
Íкос: Крест и погребéнiе Твоè, Жизнодáвче, воспевáем вéрнiи, и покланя́емся,/ я́ко ад связáл есѝ, Безсмéртне, я́ко Бог всеси́льный:/ и мéртвыя совоскреси́л есѝ, и вратá смéртная сокруши́л есѝ,/ и держáву áдову низложи́л есѝ, я́ко Бог./ Тéмже земнорóднiи славослóвим Тя любóвiю, воскрéсшаго,/ и низложи́вшаго врáжiю держáву всепáгубную,/ и всех воскреси́вшаго в Тя вéровавших,/ и мiр избáвльшаго от стрел змiи́ных,// и от прéлести врáжiя, я́ко Бог всех.
ПЕСНЬ 7
Iрмóс: Росодáтельну ýбо пещь/ содéла Áнгел/ преподóбным отрокóм,/ халдéи же опаля́ющее/ велéнiе Бóжiе мучúтеля увещà вопúти:// благословéн есù, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Рыдáющее во стрáсти Твоéй сóлнце, во мрак облечéся,/ и во дни по всей, Влады́ко, землѝ свет помéрче, вопiя́:// благословéн есѝ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Облекóшася Хрїстè схождéнiем Твои́м во свет преиспóдняя,/ прáотец же весéлiя испóлнь, яви́ся ликовствýя, взыгрáся, вопiя́:// благословéн есѝ, Бóже отéц нáших.
Хор: Пресвятáя Богорóдице, спасù нас.
Богорóдичен: Тобóю, Мáти Дéво,/ свет возсiя́ всей вселéнней свéтлый:/ Зижди́теля бо Ты всех родилà есѝ Бóга,/ Егóже просѝ, Всечи́стая,// нам низпослáти вéрным вéлiю ми́лость.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: О стрáннаго óбраза!/ Iзрáиля Избавлéй от рабóты фараóнскiя,/ распинáется вóлею от негò,/ и разрешáет вери́ги согрешéнiй./ Емýже вéрою поéм:// избáвителю Бóже, благословéн есѝ.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебè, Спáса, на лóбнем распя́ша пребеззакóнных óтроцы нечести́вiи,/ вратà мéдная и вереи́ сломи́вшаго,/ во спасéнiе нас, пою́щих:// избáвителю Бóже, благословéн, еси́.
Глас 6
Хор: Пресвятáя Богорóдице, спасù нас.
Чтец: Ю́нош трiéх пещь не опалѝ, рождествò прообразýющих Твоè:/ божéственный бо огнь Тебè не опали́в, всели́ся в Тя,/ и вся научѝ вопи́ти:// благословéн есѝ, Бóже отéц нáших.
Хор: Пресвятáя Богорóдице, спасù нас.
Чтец: Блажáт концы̀ Тя, Всечи́стая Мáти, я́коже прореклà есѝ,/ просвещáеми светолýчными сiя́ньми Твои́ми,/ и благодáтiю пою́ще, вопiю́т:// благословéн есѝ, Бóже отéц нáших.
Глас 3
Хор: Святúтелю óтче Нiкóлае, молù Бóга о нас.
Чтец: От Трóицы Бóга проповѣ́далъ есѝ, чýдне Нiкóлае, тѣ́мже и пóчести от Негò вѣнéц прія́л есѝ, блажéнне, и ны́нѣ въ торжествѣ́ твоéм усéрдно призывáющих тя, не забýди нас, раб свои́х, но свы́ше назирáй, тя бо и́мамы крѣ́пка моли́твенника. (Двáжды)
Хор: Святúтелю óтче Нiкóлае, молù Бóга о нас.
Чтец: Скрижáль в сéрдцы своéм от младéнства, óтче Нiкóлае, стяжáв ди́вных добродѣ́телей, напи́санну безсмéртным пречи́стым пéрстом Хрiстà Бóга нáшего; молѝ Егò о нас, во éже написáнным нам бы́ти в кни́зѣ живóтнѣй, святи́телю óтче Нiкóлае, досточýдне.(Двáжды)
Слáва Ѻтцý и Сы́ну и Святóму Дýху.
Чтец: Во святѣ́м рождествѣ́ твоéм, святи́телю óтче, Бóгом познáн был есѝ и Бóга познáл есѝ, и весь бысть Бóжіе жили́ще, весь яви́ся оргáн духóвный, возглашáющь вся́ку добродѣ́тель богодохновéнных пѣ́ній спасéнія сказáнія и добрóту явля́я небéснаго Цáрствія, святи́телю Нiкóлае.
И ны́не и прúсно и во вéки векóв. Амúнь.
Богорóдичен: С Бóгом Застýпницу Тя стяжáхом, Ты бо Бóжія Мáти бысть Творцà и Содѣ́теля. И нáше воображéніе пріéмша Всенепорóчная, и сіè спáсша от тли и смéрти и слáвою божéственною прослáвльшаго.
Катавáсiя (глас 4): Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: Из плáмене преподóбным рóсу источúл есù/ и прáведнаго жéртву водóю попалúл есù:/ вся бо творúши, Хрїстè, тóкмо éже хотéти.// Тя превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iудéйскiя дрéвле пророкоубíйцы лю́ди,/ богоубíйцы зáвисть ны́не содéла,/ Тебè на крест вознéсшiя, Слóве Бóжiй:// Егóже превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Небéснаго крýга не остáвил есѝ,/ и во ад сошéд, всегó совоздви́гл есѝ/ лежáщаго во гнóищи, Хрїстè, человéка,// Тя превознося́ща во вся вéки.
Хор: Пресвятáя Богорóдице, спасù нас.
Богорóдичен: От Свéта Светодáвца Слóва зачалà есѝ,/ и рóждши неизречéнно Сегò, прослáвилася есѝ:/ Дух бо в Тя, Отрокови́це, Бóжiй всели́ся.// Тéмже Тя поéм во вся вéки.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Ужасéся всяк слух,/ кáко Вы́шнiй вóлею прiи́де на зéмлю,/ áдову крéпость разруши́ти крестóм и погребéнiем,/ и вся воздви́гнути звáти:/ óтроцы благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Престà áдово мучи́тельство,/ и цáрство уничижи́ся прóчее,/ на крестè бо на землѝ водрузи́вся, и́же над всéми Бог,/ сегò могýтство низложѝ./ Егóже óтроцы благослови́те, свящéнницы воспóйте,// лю́дiе превозноси́те во вся вéки.
Глас 6
Хор: Пресвятáя Богорóдице, спасù нас.
Чтец: Позлащéною ри́зою, я́коже Цари́цу, Сын Твой просвети́в зарéю Дýха,/ Тебè одеснýю Себè постáви, Пречи́стая:// Егóже превознóсим во вся вéки.
Хор: Пресвятáя Богорóдице, спасù нас.
Чтец: И҆́же хотéнiем еди́ным мiр водрузи́вый,/ от пречи́стыя Твоея́ утрóбы плоть взéмлет,/ свы́ше сiю́ наздáти хотя́:// Егóже превознóсим во вся вéки.
Глас 3
Хор: Святúтелю óтче Нiкóлае, молù Бóга о нас.
Чтец: Ангели дивя́тся, ви́дяще преслáвная в час рождéнія твоегò, óтче Нiкóлае; человѣ́цы же рáдуются, пріéмлюще тя я́ко своегò благодѣ́теля и к Бóгу моли́твенника неуклóнна, всѣм бо яви́лся еси́ рáдость спасéнія, милосéрде Нiкóлае. (Двáжды)
Хор: Святúтелю óтче Нiкóлае, молù Бóга о нас.
Чтец: Кто не почуди́тся или́ кто не прослáвит и́мене твоегò, óтче святи́телю, слы́ша на тебѣ́ вы́ше закóна естéственнаго бы́вшая знáменія в рождествѣ́ твоéм? И тѣм яви́ тя Госпóдь свѣти́льника всемý мíру; во святѣ́м же младéнствѣ твоéм у мáтерних сосéц показà тя изря́дна и искýсна; тѣм вои́стинну воздержáнію нелéстный учи́тель яви́лся еси́, свя́тителю Нiкóлае.(Двáжды)
Благословúм Отцà, и Сы́на, и Святáго Дýха, Гóспода.
Чтец: Вторы́й Предтéча на земли́ яви́лся еси́ на обличéніе беззакóнія, óтче Нiкóлае: óв бо обличи́ Ирода беззакóнновавшаго, ты же, óтче, вся éреси далéче от Цéркве отгнáл еси́ и вся соблáзны и беззакóнія, я́ко хврáстія, огнéм рéвности своея́ попали́л еси́, вѣ́рных же утверди́л еси́, милосéрде Нiкóлае.
И ны́не и прúсно и во вéки векóв. Амúнь.
Богорóдичен: Дивлю́ся, Святáя Богоневѣ́сто, Влады́чице, тáинству богорождéнія Твоегò: всѣх бо Содѣ́тель в Тя всели́ся, и все человѣ́ческое естествò на небесà вознесè; прибѣгáющих под кров Твой пріими́ и спаси́ ны, Богоблагодáтная Влады́чице.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочестúвыя в пéщи/ Рождествò Богорóдичо спаслò есть;/ тогдà ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делà,// и превозносúте Егò во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Бóга/ человéком невозмóжно вúдети,/ на Негóже не смéют чúни Áнгельстiи взирáти;/ Тобóю бо, Всечúстая, явúся человéком/ Слóво воплощéнно,/ Егóже величáюще,// с Небéсными вóи Тя ублажáем.
Хор: Слáва, Гóсподи, Святóму Воскресéнiю Твоемý.
Чтец: Страстéй непричáстен Ты пребы́л есѝ, Слóве Бóжiй,/ плóтiю прiобщи́вся страстéм:/ но реши́ши от страстéй человéка,/ страстéм быв страсть, Спáсе наш:// еди́н бо есѝ безстрáстен, и всеси́лен.
Хор: Слáва, Гóсподи, Святóму Воскресéнiю Твоемý.
Чтец: Тлю смéртную прiéм, тлéнiя соблю́л есѝ тéло Твоè невкýсно,/ Твоя́ же животворя́щая и божéственная, Влады́ко, душà, во áде не остáвлена бысть:// но я́коже от сна воскрéс, нас совоздви́гл есѝ.
Хор: Пресвятáя Трóице, Бóже наш, слáва Тебè.
Трóичен: Бóга Отцà, Сы́на собезначáльна,/ вси человéцы устнáми ýбо чистыми слáвим,/ неизречéнную же и преслáвную Дýха Всесвятáго силу чтим:// едина бо есѝ всесильная Трóица неразлýчная.
Глас 6
Хор: Слáва, Гóсподи, Крестý Твоемý Честнóму и Воскресéнiю.
Чтец: Áще и во гроб сошéл есѝ я́ко мертв, Жизнодáвче,/ но áдову крéпость разруши́л есѝ, Хрїстè,/ совоздви́гнув мéртвыя, я́же и поглотѝ,/ и воскресéнiе всем пóдал есѝ, я́ко Бог,// вéрою и любóвiю Тя величáющим.
Хор: Слáва, Гóсподи, Крестý Твоемý Честнóму и Воскресéнiю.
Чтец: Да рáдуется тварь, и да процветéт я́ко крiн:/ Хрїстóс бо от мéртвых востà, я́ко Бог./ Где Твоè, смéрте, ны́не жáло, воззовéм?/ Где Твоя́, áде, побéда?/ Низложѝ Тя в зéмлю,// Возвы́сивый рог наш, я́ко благоутрóбен.
Глас 6
Хор: Пресвятáя Богорóдице, спасù нас.
Чтец: Звездá сiя́ющи заря́ми Божествà от Iáкова,/ от мрáка содержи́мым возсiя́:/ Тобóю бо, Всечи́стая, Хрїстóс Бог Слóво воплощéнно:// И́мже просвещáеми, с небéсными вóи Тя ублажáем.
Хор: Пресвятáя Богорóдице, спасù нас.
Чтец: Укрéплься си́лою Твоéю и благодáтiю,/ Тебè песнь усéрдно от сéрдца возложи́х:/ но сiю́ прiимѝ, Дéво Чи́стая,/ благодáть воздаю́щи Твою́ многосвéтлую,// от нетлéнных сокрóвищ, богоблажéнная.
Глас 3
Хор: Святúтелю óтче Нiкóлае, молù Бóга о нас.
Чтец: Благословéн есѝ Бóже о всѣх, я́же твори́ши, идѣ́же бо хóщеши, тáмо побѣждáется естествà чин, я́коже и ны́нѣ въ рождествѣ́ святи́теля Твоегò вы́ше закóна естéственнаго вѣ́рным твои́м ди́вная и пречýдная яви́л есѝ; тогò моли́твами, Хрїстè, напрáви на путь ми́ра.(Двáжды)
Хор: Святúтелю óтче Нiкóлае, молù Бóга о нас.
Чтец: Благословéнна тя Бóгом, всѣм, óтче Нiкóлае, благослови́ ýбо и менè, пою́щаго святóе рождествò твоè, и рукáми пóмощи прострѝ, и приведи́ к ти́хому пристáнищу покая́нія, я́ко да всегдà слáвлю тя, óтче Нiкóлае.
Хор: Святúтелю óтче Нiкóлае, молù Бóга о нас.
Чтец: Аще и мнóго беззакóнновах аз окая́нный, не отступáю надéжди, покрóва твоегò, óтче Нiкóлае, всегдà прибѣгáю и на тя надéжду мою́ полагáю. Тѣм в ны́нѣшнем настоя́щем торжествѣ́, во святѣ́м твоéм рождествѣ́, рáдостно вопію́ ти: ты мя, óтче, избáви отъ вся́кія скóрби, и бѣд, и печáлей, ели́ка бо хóщеши и мóжеши.
Слáва Ѻтцý и Сы́ну и Святóму Дýху.
Чтец: Блажéнне и богонóсе Нiкóлае, виждь тѣснотý душѝ моея́, кáко враг мой подви́же на мя брань на всяк день и не мóжет истощи́ти тýла стрел свои́х, но при́сно ураня́ет мя и почи́ти ми не даéт. Аз же изнемогóх, но ты, óтче, сокруши́ кóзни егò моли́твами свои́ми, я́ко да пріéм пóмощь твою́ святýю, непрестáнно слáвлю тя.
И ны́не и прúсно и во вéки векóв. Амúнь.
Богорóдичен: Никтóже прибѣгáяй подъ кров надéжды Твоея́, Пресвятáя Богоневѣ́сто, тощ исхóдит, но всяк прося́й пріéмлет скóрую Твою́ пóмощь, ю́же и мнѣ подáждь, Отрокови́це, пою́щему пресвятóе Твоè Рождествò.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествò,/ почитáющее свящéнное торжествò Богомáтере,/ и да вопiéт:/ рáдуйся, Всеблажéнная,// Богорóдице, Чúстая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный седьмы́й: Я́ко взя́ша Гóспода, Марíи рéкшей,/ на гроб течáста, Сíмон Петр,/ и другíй таи́нник Хрїстóв, егóже любля́ше:/ течáста же óба, и обретóста плащани́цы еди́ны внутрь лежáща,/ и главны́й же бе судáрь кромè их./ Тéмже пáки умолчáста,/ дóндеже Хрїстà ви́деста.
Вои́стину шлем и ору́жіе на діáвола непобѣди́мое, ты еси́, óтче Нiкóлае, от Бóга явлéн еси́. Хрїстіáном же поможéніе и утверждéніе, іерáрхом удобрéніе, в бѣдáх же притекáющим к тебѣ́ скóрая пóмощь и заступлéніе, святи́телю Госпóдень.(Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Вéлiя и преслáвная менè рáди содéял есѝ,/ Хрїстè мой многоми́лостиве:/ от Дéвы бо Отрокови́цы роди́лся есѝ несказáнно,/ и Крест подъя́л еси́, и смерть претерпéв,/ воскрéсл есѝ во слáве,/ и нáше естествò от смéрти свободи́л есѝ./ Слáва, Хрїстè, слáве Твоéй,// слáва си́ле Твоéй.
ХВАЛИТНЫ
Хор, глас 5: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 6: Крест Твой, Гóсподи,/ жизнь и воскресéнiе лю́дем Твои́м есть,/ и надéющеся нань,// Тебè воскрéсшаго Бóга нáшего поéм: поми́луй нас.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Погребéнiе Твоè, Влады́ко,/ рай отвéрзе рóду человéческому:/ и от истлéнiя избáвльшеся,// Тебé воскрéсшаго Бóга нáшего поéм: поми́луй нас.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Со Отцéм и Дýхом Хрїстà воспои́м,/ воскрéсшаго из мéртвых,/ и к Немý вопiи́м:// Ты Живóт есѝ наш и Воскресéнiе, поми́луй нас.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Триднéвен воскрéсл есѝ, Хрїстè, от грóба/ я́коже есть пи́сано,/ совоздви́гнувый прáотца нáшего./ Тéмже Тя и слáвит род человéческiй,// и воспевáет Твоé воскресéнiе.
На 4. Хвалúте Егò в тимпáне и лúце, хвалúте Егò во стрýнах и оргáне.
Стiхúры свт. Нiколáя, глас 4: Дар благопрія́тен, от роди́тельных рук Бóгу возложéнный, и от Негò усвоéнный, и на пóльзу вѣ́рным подáнный, святи́телю Нiкóлае, тѣ́мже в тебѣ́ упокóися, благодáть Пресвятáго Дýха, слáвне, беззлóбіем возрасти́вши тя и мýдростію украси́вши.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúра: Днесь пáмять рождествà твоегò, святи́телю óтче Нiкóлае, я́ко сóлнце нам богонóсно возсія́ лучѝ богáтых даровáній, просвѣщáющи чтýщих тя и вѣ́рою блажáщих, мглу же лю́тых отгоня́ющи, и прошéнія вѣ́рным исполня́ющи, тѣм тя, досточýдне, почитáем.
На 2.Честнà пред Гóсподем/ смерть преподóбных Егò.(Пс.115:6)
Стiхúра: Божéственную благодáть от Бóга прія́л есѝ, святи́телю Нiкóлае, ю́же пріéм свы́ше, и нас назирáй, прáзднующих любóвію честнóе твоè рождествò, и подáждь от Бóга цéрквам единомы́сліе, и царéм нáшим побѣ́ды на врагѝ, и мíру умирéніе, и землѝ нáшей благоплóдіе, и душáм нáшым вéлію ми́лость.
Стiх: Свящéнницы Твоù облекýтся прáвдою, и преподóбнiи Твоù возрáдуются.(Пс.131:9)
Глас 2: От кóрене благáго благíй прозябè плод, и́же отъ младéнчества освящéнный, и я́коже Самуи́л в дар Бóгу возложéнный, óтче святи́телю Нiкóлае, Бóжіею бо благодáтію пáче, нéжели млекóм воспитáнный, тѣм и на гóру добродѣ́телей взы́де, преочищéнну дýшу стяжáв, и рáзум имѣ́я при́сно к Бóгу, небéсное бысть жили́ще Дýха, Хрїстóва оби́тель яви́ся. Тогò, блажéнне, молѝ о нас, éже спасти́ся душáм нáшым.
Слáва Отцý и Сыну и Святóму Дýху.
Стiхúра евáнгельская седьмáя, глас 7: Се тьма, и рáно, и что у грóба, Марíе, стои́ши,/ мнóгую тьму имéющи в рáзуме,/ в нéйже, где положéн бысть вопрошáеши, Iисýс?/ Но виждь сри́щущася ученикѝ,/ кáко плащани́цами и сударéм воскресéнiе обретóша,/ и помянýша я́же о сих Писáнiя./ С ни́миже и и́миже и мы вéровавше,// воспевáем Тя жизнодáвца Хрїстà.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагà избáвивый;/ яви́вый же Себè апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сы́не Бóжій, моли́твами пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́луй и спасѝ нас, яко Благ и Человеколю́бец. Ами́нь.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 6: Áнгельскiя Си́лы на грóбе Твоéм,/ и стрегýщiи омертвéша;/ и стоя́ше Марíя во грóбе,/ и҆́щущи Пречи́стаго Тéла Твоегó./ Плени́л есѝ ад, не искуси́вся от негó;/ срéтил есѝ Дéву, дáруяй живóт.// Воскресы́й из мéртвых, Гóсподи, слáва Тебè.
Слáва Отцý и Сы́ну и Святóму Дýху.
Тропáрь свт. Нiколáя, глас 4: Чýдное и слáвное рождествò твоè, святи́телю Нiкóлае,/ Цéрковь днесь правослáвных свéтло прáзднует,/ и́бо стоя́нiем ногý твоéю/ явѝ тя Госпóдь и провозвестѝ бы́ти свети́льника и учи́теля ми́ряном,/ весь мiр обогащáюща и просвещáюща чудесы̀./ Тем вопiéм ти:/ молѝ Хрїстà Бóга спасти́ся душáм нáшим.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшым.
Стопы̀ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáшя, Влады́ко, простѝ беззакóнiя нáша, Святы́й, посетѝ и исцелѝ нéмощи нáшя и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáшя, я́коже и мы оставля́ем должникóм нáшым. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк cвт. Нiколáя, глас 3: В Ми́рех рóждься, свя́те Нiкóлае,/ от благорóдна кóрене,/ я́ко благоплóдна вѣтвь прозя́бл есѝ,/ испóлнь бо бых божéственных дарóв,/ я́ко сóлнце заря́ми весь мíр чудесы̀ просвѣти́л есѝ,/ сегò рáди прославля́ем тя//, я́ко ученикà и таи́нника Бóжія благодáти.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýшы нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, яко Благ и Человеколю́бец. Ами́нь.
И глаголи часы и обéдницу