НИКОЛА ЛЕТНИЙ. Перенесение мощей святителя и чудотворца Николая. УТРЕНЯ (окончание) ЧАС ПЕРВЫЙ
22 мáя 2024 гóда. Средà 3-й седмúцы по Пáсхе. Перенесéнiе мощéй святúтеля и чудотвóрца Нiколáя из Мир Ликíйских в Бар. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Слáва Ѻтцý и Сы́ну и Святóму Дýху.
Чтец: О, преслáвная твоя́ чудесà, я́же сотвори́л есѝ!/ Недýги бо исцеля́еши и бед избавля́еши, всем вопи́ти повелевáя Гóсподеви:// препéтый отéц нáших Бóже, благословéн есѝ.
И ны́не и прúсно и во вéки векóв. Амúнь.
Богорóдичен: Нáшему смирéнiю Застýпница и стенà, Богороди́тельнице Чи́стая, Ты есѝ./ И́же рабѝ Твоѝ сýще, всегдà вопiéм Гóсподеви:// препéтый отéц нáших Бóже, благословéн есѝ.
Катавáсiя Пáсхи, глас 1: Óтроки от пéщи избáвивый,/ быв Человéк,/ стрáждет я́ко смéртен,/ и стрáстiю смéртное,/ в нетлéнiя облачúт благолéпiе,/ Едúн благословéн// отцéв Бог, и препрослáвлен.
ПЕСНЬ 8
Iрмóс: В купинè Моисéю Дéвы чýдо,/ на Синáйстей горè, прообразúвшаго иногдà,/ пóйте, благословúте// и превозносúте во вся вéки.(2 раза)
Хор: Слáва Тебè, Бóже наш, слáва Тебè.
Чтец: Сóлнечныя зарѝ спря́тахуся стрáхом Хрїстóвых страдáнiй,/ и востая́ху мéртвiи, и гóры прекланя́хуся,// и колебáшеся земля́, и ад обнажáшеся.
Хор: Слáва Тебè, Бóже наш, слáва Тебè.
Чтец: В пещѝ сýщiи иногдà треблажéннiи óтроцы/ возвышáюще рýки, проображáху, Блáже, пречестны́й Крест Твой,// и́мже низложи́л есѝ, Хрїстè, врáжiю си́лу.
Хор: Слáва Тебè, Бóже наш, слáва Тебè.
Чтец: О iудéе слепíи прелéстницы и престýпницы,/ Хрїстóву Воскресéнiю невéрующiи, я́ко лóжному:// что невéрное ви́дите, я́ко воскрéсе Хрїстóс, мéртвыя воздви́гiй?
Хор: Слáва Тебè, Бóже наш, слáва Тебè.
Чтец: О iудéе вразѝ, áще и нам не вéруете,/ вáша вóины вы вопроси́те, что пострадáша онѝ?// Кто отвали́вый рукáми кáмень от грóба?
Глас 8
Хор: Святúтелю óтче Нiкóлае, молù Бóга о нас.
Чтец: Áнгели Небéс я́ко служи́теля тя воспрiéмлют,/ прорóцы и апóстоли я́ко клеврéта сретáют,/ Сам Госпóдь тебé воспрiéмлет,// мы же, грéшнiи, ми́лости прóсим.
Хор: Святúтелю óтче Нiкóлае, молù Бóга о нас.
Чтец: Вели́ка власть от Бóга вданá ти есть, Нiкóлае:/ мóре повинýется, воздýх слýшает, и язы́цы покаря́ются,// ви́дяще преслáвная твоя́ чудесá.
Хор: Святúтелю óтче Нiкóлае, молù Бóга о нас.
Чтец: Нóвому Iзрáилю, хрiстiáнскому нарóду, Спáсе,/ славнéйши Моисéя показáл еси́ Твоегó святи́теля Нiколáя,// от всех зол нас избавля́юща.
Хор: Пресвятáя Богорóдице, спасù нас.
Богорóдичен: Очищéнiе грехóв я́ко Мáти Бóжiя испроси́/ и рýку ми простри́, Госпожé, погружéнному во глубинé нечáянiя,// да, надéждею востáв, превозношáю Тя во вéки вся.
Глас 4
Хор: Святúтелю óтче Нiкóлае, молù Бóга о нас.
Чтец: Возрáсл еси́, я́ко цвет благоухáнен, ми́рскiя земли́, слáвне,/ всем принося́ благоухáнныя вони́, целéбныя дáры хвáлящим тя и пою́щим:// Гóспода воспевáйте, делá, и превозноси́те Егó во вся вéки. (Двáжды)
Благословúм Отцá, и Сы́на, и Святáго Дýха, Гóспода.
Чтец: Искáпавый Бóжiя благодáти слáдость, я́ко горá мáсличная елéй,/ мóре имéл еси́ путь, безбéдствен благодáтiю Гóспода, Ему́же слáдце зовéм:// Гóспода воспевáйте, делá, и превозноси́те Егó во вся вéки.
И ны́не и прúсно и во вéки векóв. Амúнь.
Богорóдичен: Ликóв преми́рных со удивлéнiем раждáеши и пребывáеши при́сно Дéва:/ Слóво бо родилá еси́, Человéка бы́вша непрелóжна Божествóм,/ Ему́же вси поéм:// Гóспода воспевáйте, делá, и превозноси́те Егó во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Пáсхи, глас 1: Сей наречéнный и святы́й день,/ Едúн суббóт Царь и Госпóдь,/ прáздников прáздник/ и торжествò есть торжéств,// вóньже благословúм Хрїстà во вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Преестéственно плóтiю зачéншую во чрéве,/ от Отцà безлéтно предвозсiя́вшее Слóво,/ в пéснех немóлчных// величáем вéрнiи.
Хор: Слáва Тебé, Бóже наш, слáва Тебé.
Чтец: И́же на Кресте́ разбо́йника, позна́вша Тя Бо́га,/ насле́дника соде́лал еси́ мы́сленному раю́,// е́же помяни́ мя, вопию́ща, Всеси́льне Спа́се.
Хор: Слáва Тебé, Бóже наш, слáва Тебé.
Чтец: Зауше́н нас ра́ди,/ и оплева́н был еси́, Иису́се, от беззако́нников,// скрижа́ли зако́на начерта́вый в Сина́и, уго́днику Моисе́ю.
Хор: Слáва Тебé, Бóже наш, слáва Тебé.
Чтец: О́цта и же́лчи, Спа́се, напое́н был еси́ нас ра́ди,/ да́вый нам те́ло и честну́ю кровь,// в снедь же и питие́ ве́чныя Твоея́ жи́зни.
Хор: Слáва Тебé, Бóже наш, слáва Тебé.
Чтец: В животво́рная ре́бра копие́м прободе́н быв, Христе́,/ пречи́стую Твою́ кровь, и честну́ю во́ду// источи́л еси́ ми́рови, я́ко присноживо́тный исто́чник.
Глас 8
Хор: Святúтелю óтче Нiкóлае, молù Бóга о нас.
Чтец: Благословéн Госпóдь Бог наш, я́ко прослáви святи́теля во странáх,/ чудéс струи́ испущáюща, в Ми́рех и в лати́нех вся исцеля́юща// и в Россíи ми́лостивно посещáюща.
Хор: Святúтелю óтче Нiкóлае, молù Бóга о нас.
Чтец: Честны́м сном уснýл еси́ и тéло в Бар пóльзы рáди пусти́л еси́,/ неусы́пный быв застýпник всем, вéрою призывáющим тя,// моли́твами твои́ми, Нiкóлае.
Хор: Святúтелю óтче Нiкóлае, молù Бóга о нас.
Чтец: Благословéн Небесé и земли́ Творéц,/ Бог Вседержи́тель, Отéц Безначáльный и Всеси́льный,/ и Сын прéжде век, от недр отрыгновéнное Слóво,/ И́мже вся бы́ша, я́же о нас,// и Дух исходя́й Святы́й, Трóице Святáя, слáва Тебé.
Хор: Пресвятáя Богорóдице, спасù нас.
Богорóдичен: Изви́тiем словéс по достоя́нiю Тя похвали́ти не достизáю,/ Небéсных сил пребóльшу и твáри всея́ Честнéйшу, Бóга и Творцá порóждшую плóтiю.// Егóже моли́, Богорóдице, да поми́лует ны в День сýдный.
Глас 4
Хор: Святúтелю óтче Нiкóлае, молù Бóга о нас.
Чтец: Па́мять твоя́ днесь прино́сит пра́зднество,/ апо́стольский лик и му́ченический собо́р ра́дуется и пра́веднии ду́си,/ ве́рнии же тя пе́сньми сла́вим, вопию́ще:// от всех скорбе́й, святи́телю Христо́в, изба́ви ны. (Двáжды)
Слáва Ѻтцý и Сы́ну и Святóму Дýху.
Чтец: Пресла́вная па́мять твоя́ нам возсия́,/ све́тло просвеща́ющи ве́рныя, святи́телю Христо́в Нико́лае му́дре./ Те́мже мо́лим тя: помяни́ всех нас// и от проти́вныя напа́сти вся́кия моли́твами твои́ми изба́ви.
И ны́не и прúсно и во вéки векóв. Амúнь.
Богорóдичен: Умертви́ на́ша плотски́я стра́сти и по́хоти, Богороди́тельнице Чи́стая,/ уста́ви и страсте́й на́ших бу́рю, утоли́ волне́ние помысло́в,// укрепи́, Благослове́нная Пречи́стая, сердца́ ве́рно чту́щих Тя, Засту́пницу.
Катавáсiя Пáсхи, глас 1: Светúся, светúся,/ нóвый Iерусалúме:/ слáва бо Госпóдня/ на тебè возсiя́./ Ликýй ны́не/ и веселúся, Сióне./ Ты же, Чúстая, красýйся, Богорóдице,// о востáнiи Рождествà Твоегò.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен святúтеля: Вели́ка чудесá твоя́, пресвяты́й Нiкóлае,/ я́ко яви́лся еси́ во сне богому́дрому Константíну/ и три вóины спасл еси́, без вины́ на смерть осуждéнныя./ Тáко и нас спаси́ от напрáсныя и вéчныя смéрти,// пресвяты́й Никóлае, святи́телю Госпóдень. (Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен Трióди (миронóсицам): Жены́ услы́шите глас рáдованiя:/ мучи́теля áда попрáвый, от тли мiр воздви́же,/ тецы́те, другóм рцы́те Мои́м благовéстiя:/ хощý бо создáнiе Своé рáдостiю озари́ти,// отонýдуже прiи́де печáль.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры Трióди, глас 2: Убо в мéртвых ли Избáвитель? рыдáньми миронóсицы вопiя́ху, Хрїстóвы учени́цы. Сóлнце же превéлiе дáже и до днесь под землéю ли, илѝ воскрéсе, я́коже речè? и си́це плáчущым, от грóба áнгел Божéственную вои́стинну рáдость речè: Хрїстóс воскрéсе, тецы́те, проповéдите всем, Егò из грóба Божéственное Воскресéнiе.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Ми́ра уготóваша честнáя, ещè тме сýщей во еди́ну от суббóт, прiидóша на гроб Твой миронóсицы Хрїстè, éже помáзати пречи́стое и Божéственное Твоè тéло. Тéмже Воскресéнiе увéдевшя Твоè, потщáхуся возвести́ти и таи́нником: и́хже предсрéт из грóба, рáдуйтеся, возопи́л есѝ человеколю́бнейше.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Вы́шняго Бóга на землѝ погребéна, я́ко мéртва помáзати тщáтся Егò учени́цы, аромáты честны́ми: и во грóбе седя́ща нóва ю́ношу, ви́девшя в блистáющем зрáце, ужасóшася. Тéмже Слóва из грóба востáнiе триднéвное увéдевшя, и апóстолом возвещáху.
Хвалúте Егò во глáсе трýбнем, хвалúте Егò во псалтúри и гýслех.
Стiхúры святúтеля, самоглáсны, глас 1: Воззрéв неуклóнно на высотý рáзума/ и узрéв неявлéнно премýдрости глубинý,/ твои́ми учéньми мiр обогати́л еси́, óтче.// О нас при́сно моли́ся Хрїстý, святи́телю Нiкóлае.
На 4. Хвалúте Егò в тимпáне и лúце, хвалúте Егò во стрýнах и оргáне.
Стiхúра: Человéче Бóжий, и вéрный угóдниче,/ и строи́телю Тогó тáин, и мýжу желáний духóвных,/ стóлпе одушевлéнный, и вдохновéнный óбраз,/ я́ко Божéственное бо сокрóвище тя Ми́рская Цéрковь, чудя́щися, прия́ла есть// и моли́твенника о душáх нáших.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
И҆́на стiхúра святúтеля, глас 2: Прáвило вéры и óбраз крóтости/ яви́ тебé стáду твоемý Хрiстóс Бог,/ святи́телю Никóлае,/ в Ми́рех ýбо благоухáющу ти/ всю́ду сiя́ют свéтло Божéственная твоя́ исправлéнiя,/ си́рых и вдови́ц предстáтелю./ Тéмже моли́ся непрестáнно// спасти́ дýши нáша.
Слáва Отцý и Сыну и Святóму Дýху.
Глас 5: Воструби́м трубóю пéсней,/ взыгрáем прáзднственная и ликовствýем, рáдующеся,/ в молéбное торжествó Богонóснаго отцá,/ цари́ и кня́зи да стекýтся,/ и́же сóнным стрáшным явлéнiем царя́ препирáюща/ непови́нно держи́мыя три отпусти́ти воевóды да воспою́т;/ пáстыри и учи́тели,/ Дóброму Пáстырю подобноревни́тельна пáстыря,/ сошéдшеся, восхвáлим;/ и́же в недýзех - врачà, в бедáх - избáвителя,/ грéшнiи - застýпника, ни́щiи - сокрóвище/ и и́же в скóрбех - утéшителя,/ спýтника - путешéствующiи,/ на мóри сýщiи - прави́теля/ и вси вездé тéпле предваря́юща./ Вели́каго святи́теля/ восхваля́юще, си́це рцем:/ пресвяты́й Никóлае, предвари́, и избáви нас от настоя́щiя беды́,// и спаси́ стáдо твоé моли́твами твои́ми.
И ныне и прúсно и во вéки векóв, амúнь.
Стiхúра Трióди, глас 1: Со стрáхом прiидóша жены̀ на гроб,/ аромáты тéло Твоè помáзати тщáщiяся,/ и сiè не обрéтше,/ недоумевáхуся другà ко друзéй,/ не вéдуще Воскресéнiя,/ но предстà им áнгел, и речè:// воскрéсе Хрїстóс, дáруяй нам вéлiю ми́лость.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 2: Егдà снизшéл есù к смéрти, Животè Безсмéртный,/ тогдà ад умертвúл есù блистáнiем Божествà./ Егдà же и умéршыя от преиспóдних воскресúл есù,/ вся Сúлы Небéсныя взывáху:// Жизнодáвче, Хрїстè Бóже наш, слáва Тебè.
Слáва Ѻтцý и Сы́ну и Святóму Дýху.
Тропáрь Святúтеля Нiколáя, глас 4: Приспè день свéтлаго торжествà,/ град Бáрскiй рáдуется,/ и с ним вселéнная вся ликовствýет/ пéсньми и пéньми духóвными:/ днесь бо свящéнное торжествò/ в пренесéнiе честны́х и многоцелéбных мощéй/ святúтеля и чудотвóрца Нiколáя,/ я́коже сóлнце незаходúмое, возсiя́ светозáрными лучáми,/ разгоня́я тьму искушéнiй же и бед/ от вопiю́щих вéрно:// спасáй нас, я́ко предстáтель наш велúкiй, Нiкóлае.
И ны́не и прúсно и во вéки векóв, амúнь.
Ин тропáрь прáздника Трióди (Недéли Миронóсиц), глас 2: Миронóсицам женáм, при грóбе предстáв Áнгел, вопiя́ше:/ мúра мéртвым суть прилúчна,/ Хрїстóс же истлéнiя явúся чуждь./ Но возопíйте: воскрéсе Госпóдь,// подая́й мíрови вéлiю мúлость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Воскресы́й из мéртвых, Хрїстè, и҆́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трижды)
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь прáздника Трióди (Недéли Миронóсиц), глас 2: Благообрáзный Ióсиф, с Дрéва снем Пречи́стое Тéло Твоè, плащани́цею чи́стою обви́в, и благоухáньми, во грóбе нóве, закры́в, положѝ, но триднéвен воскрéсл есѝ, Гóсподи, подая́й мíрови вéлiю ми́лость.
Слáва Отцý и Сы́ну и Святóму Дýху.
Тропáрь Святителя Нiколáя, глас 4: Приспè день свéтлаго торжествà,/ град Бáрскiй рáдуется,/ и с ним вселéнная вся ликовствýет/ пéсньми и пéньми духóвными:/ днесь бо свящéнное торжествò/ в пренесéнiе честны́х и многоцелéбных мощéй/ святи́теля и чудотвóрца Нiколáя,/ я́коже сóлнце незаходи́мое, возсiя́ светозáрными лучáми,/ разгоня́я тьму искушéнiй же и бед/ от вопiю́щих вéрно:// спасáй нас, я́ко предстáтель наш вели́кiй, Нiкóлае.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшым.
Стопы̀ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк прáздника Тріóди (Недéли Миронóсиц), глас 2: Рáдоватися миронóсицам повелéл есѝ,/ плачь прамáтере Éвы утоли́л есѝ/ воскресéнiем Твои́м, Хрiстé Бóже,/ апóстолом же Твои́м проповéдати повелéл есѝ:// Спас воскрéсе от грóба.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýшы нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк Пáсхи, глас 8: Áще и во гроб снизшéл есù, Безсмéртне,/ но áдову разрушúл есù сúлу,/ и воскрéсл есù, я́ко победúтель, Хрїстè Бóже,/ женáм миронóсицам вещáвый: рáдуйтеся,/ и Твоúм апóстолом мир дáруяй,// пáдшим подая́й воскресéнiе.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, преподóбных и Богонóсных отéц нáших и всех святы́х, поми́лует и спасéт нас, яко Благ и Человеколю́бец. Ами́нь.
Хор: Гóсподи, помúлуй. (3 рáза)
И глаголи часы и обéдницу