НИКОЛА ЛЕТНИЙ. Перенесение мощей святителя и чудотворца Николая. ВСЕНОЩНОЕ БДЕНИЕ. УТРЕНЯ. КАНОН
22 мáя 2024 гóда. Средà 3-й седмúцы по Пáсхе. Перенесéнiе мощéй святúтеля и чудотвóрца Нiколáя из Мир Ликíйских в Бар. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
[Псалом 83]Коль возлюбленна селéнiя Твоя́, Гóсподи сил! Желáет и скончавáется душá моя́ во дворы́ Госпóдни, сéрдце моé и плоть моя́ возрáдовастася о Бóзе живе. И҆́бо птица обрéте себé хрáмину, и гóрлица гнездó себé, идéже положи́т птенцы своя́, олтарѝ Твоя, Гóсподи сил, Царю мой и Бóже мой. Блажéни живýщiи в домý Твоéм, в вéки векóв восхвáлят Тя. Блажéн муж, eмýже есть заступлéнiе eго у Тебé; восхождéнiя в сéрдце своéм положѝ, во юдóль плачéвную, в мéсто éже положѝ, и҆́бо благословéнiе даст законополагáяй. Пóйдут от си́лы в си́лу: яви́тся Бог богóв в Сióне. Гóсподи Бóже сил, услыши моли́тву мою, внушѝ, Бóже Iáковль. Защи́тниче наш, виждь, Бóже, и при́зри на лицé хрiстá Твоегó. Яко лýчше день еди́н во двóрех Твои́х пáче тысящ: извóлих приметáтися в домý Бóга моегó пáче, нéже жи́ти ми в селéнiих грéшничих. Яко ми́лость и и҆́стину любит Госпóдь, Бог благодáть и слáву даст, Госпóдь не лиши́т благих ходящих незлóбiем. Гóсподи Бóже сил, Блажéн человéк уповáяй на Тя.
[Псалом 84]Благоволил есѝ, Гóсподи, зéмлю Твою, возврати́л есѝ плен Iáковль: остáвил есѝ беззакóнiя людéй Твоих, покрыл есѝ вся грехи и҆́х. Укротил есѝ весь гнев Твой, возвратился есѝ от гнéва я́рости Твоея́. Возвратѝ нас, Бóже спасéнiй нáших, и҆ отвратѝ я́рость Твою от нас. Едá во вéки прогнéваешися на ны? Илѝ прострéши гнев Твой от рóда в род? Бóже, Ты обрáщься оживи́ши ны, и҆ людiе Твои возвеселя́тся о Тебé. Явѝ нам, Гóсподи, ми́лость Твою, и҆ спасéнiе Твоé даждь нам. Услышу, что речéт о мне Госпóдь Бог: яко речéт мир на люди Своя́, и҆ на преподóбныя Своя́, и҆ на обращáющыя сердцá к Немý. Обáче близ боя́щихся Егó спасéнiе Егó, всели́ти слáву в зéмлю нáшу. Ми́лость и҆ и҆́стина сретóстеся, прáвда и҆ мир облобызáстася. И҆́стина от земли возсiя́, и҆ прáвда с Небесé прини́че, и҆́бо Госпóдь даст блáгость, и҆ земля́ нáша даст плод свой. Прáвда пред Ним предъи́дет, и҆ положи́т в путь стопы своя́.
Чтец: Слáва Отцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Хор (по кафíсме седáльны святúтеля, глас 4): Удиви́л еси́, Влады́ко, святи́теля Твоегó во странáх,/ подáв емý чудéс благодáть недýги разли́чныя от человéк отгоня́ти/ и сýщiя во ýзах избавля́ти,/ оби́димыя же от лю́тых изымáти./ Емýже молéбно вопiéм:// святы́й Никóлае, избáви нас от враг нáших.
Слáва Отцý и Сыну и Святóму Дýху, и ны́не и прúсно и во вéки векóв, амúнь.
Хор (по кафíсме седáлен Трióди, глас 5): Прéжде Крестá Твоегó Щéдре, и Востáнiя,/ идýщу Ти, слепы́й от рождéнiя взывáше тéпле:/ Сы́не Давíдов поми́луй,/ даждь ми́ свет очесéм,/ да узрю́ Тя и аз:/ егóже зéницы помáзав брéнiем от плюновéнiя Слóве,// томý свет свéтло дал еси́.
ПОЛИЕЛЕЙ
Хор: Хвали́те И҆́мя Госпóдне, хвали́те, рабѝ Гóспода.
Аллилýїа (трúжды)
(И далее хор продолжает чередовать стiхи 134 псалма и Аллилуиа)
стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
(И далее хор продолжает чередовать стiхи 135 псалма и Аллилуиа)
Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды̀ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ВЕЛИЧАНИЕ АПОСТОЛА
Хор: Величáем Тя,/ святúтелю óтче Нiкóлaе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Услы́шите сiя́ вси язы́цы, внуши́те вси, живýщiи по вселéнней. Устà моя́ возглагóлют премýдрость, и поучéнiе сéрдца моегò рáзум./ Прiиди́те, чáда, послýшайте менé, стрáху Госпóдню научý вас./ Благовести́х прáвду в цéркви вели́цей./ И҆́стину Твою́ и спасéнiе Твоé рех./ Повéм И҆́мя Твоé брáтiи моéй, посредé цéркве воспою́ Тя./ Услы́шати ми глас хвалы́ Твоея́ и повéдати вся чудесà Твоя́./ Гóсподи, возлюби́х благолéпiе дóму Твоегò, и мéсто селéнiя слáвы Твоея́./ Возненави́дех цéрковь лукáвнующих, и с нечести́выми не ся́ду./ Я́ко сохрани́х путѝ Госпóдни и не нечéствовах от Бóга моегò./ Устà прáведнаго поучáтся премýдрости, и язы́к егò возглагóлет суд./ Прáвда Егò пребывáет в век вéка./ Свящéнницы Твоѝ облекýтся прáвдою, и преподóбнiи Твоѝ возрáдуются.// Блажéни живýщiи в домý Твоéм, в вéки векóв восхвáлят Тя.
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (Трúжды)
Хор: Величáем Тя,/ святúтелю óтче Нiкóлaе,/ и чтим святýю пáмять твою́,/ ты бо мóлиши о нас // Хрїстà Бóга нáшего.
Гóсподи, поми́луй. (12 раз)
Седáльны прáздника по полiелéи, глас 5: Освя́щ себé житiéм совершéнным, яви́лся еси́ святи́тель Бóга Вы́шнего,/ от Негóже укрепля́емь, ерети́чествующих устá загради́л еси́.// Тем твоé пренесéнiе свéтло прáзднуем, Хрiстá Бóга величáюще. (Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор (по кафíсме седáлен Трióди, глас 5): Прéжде Крестá Твоегó Щéдре, и Востáнiя,/ идýщу Ти, слепы́й от рождéнiя взывáше тéпле:/ Сы́не Давíдов поми́луй,/ даждь ми́ свет очесéм,/ да узрю́ Тя и аз:/ егóже зéницы помáзав брéнiем от плюновéнiя Слóве,// томý свет свéтло дал еси́.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступù// и спасù, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травà бо огнéм// бýдете изсóхше.(Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душà живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв. Амúнь.
Святы́м Дýхом/ вся́ка душà живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый, псалóм Давíдов: Честнà пред Гóсподем смерть преподóбных Егò.(Пс.115:6)
Хор: Честнà пред Гóсподем/ смерть преподóбных Егò.
Чтец: Что воздáм Гóсподеви о всех, я́же воздадé ми?(Пс.115:3)
Хор: Честнà пред Гóсподем/ смерть преподóбных Егò.
Чтец: Честнà пред Гóсподем.
Хор: Смерть преподóбных Егò.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.35Б(от полý): Речé Госпóдь ко пришéдшим к Немý Iудéем: ами́нь, ами́нь глагóлю вам, не входя́й двéрьми во двор óвчiй, но прелáзя и́нуде, той тать есть и разбóйник. А входя́й двéрьми пáстырь есть овцáм. Сему́ двéрник отверзáет, и óвцы глас егó слы́шат, и своя́ óвцы глашáет по и́мени, и изгóнит их. И егдá своя́ óвцы ижденéт, пред ни́ми хóдит, и óвцы по нем и́дут, я́ко вéдят глас егó. По чуждéм же не и́дут, но бежáт от негó, я́ко не знáют чуждáго глáса. Сiю́ при́тчу речé им Iису́с, они́ же не разумéша, что бя́ше, я́же глагóлаше им. Речé же пáки им Iису́с: ами́нь, ами́нь глагóлю вам, я́ко Аз есмь дверь овцáм. Вси, ели́ко их прiи́де прéжде Менé, тáтiе суть и разбóйницы, но не послу́шаша их óвцы. Аз есмь дверь, Мнóю áще кто вни́дет, спасéтся, и вни́дет и изы́дет, и пáжить обря́щет.
[Синодальный перевод]Сказал Господь пришедшим к Нему Иудеям: истинно, истинно говорю вам: кто не дверью входит во двор овчий, но перелазит иным путем, тот вор и разбойник; а входящий дверью есть пастырь овцам. Ему придверник отворяет, и овцы слушаются голоса его, и он зовет своих овец по имени и выводит их. И когда выведет своих овец, идет перед ними; а овцы за ним идут, потому что знают голос его. За чужим же не идут, но бегут от него, потому что не знают чужого голоса. Сию притчу сказал им Иисус; но они не поняли, что такое Он говорил им. Итак, опять Иисус сказал им: истинно, истинно говорю вам, что Я дверь овцам. Все, сколько их ни приходило предо Мною, суть воры и разбойники; но овцы не послушали их. Я - дверь: кто войдет Мною, тот спасется, и войдет, и выйдет, и пажить найдет. (Ин.10:1-9)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ. (3 раза)
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами святи́теля,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра cвятúтеля, глас 6: Наслéдниче Бóжiй,/ сопричáстниче Хрiстóв,/ служи́телю Госпóдень, свя́те Нiкóлае,/ по и́мени твоемý тáко и житié твоé:/ спросiя́ бо седи́не рáзум,/ свидéтельствоваше свéтлость лицá твоегó душéвное незлóбiе,/ извéствоваше крóтость слóва молчали́вое./ Жизнь твоя́ слáвна и успéнiе со святы́ми,// моли́ о душáх нáших.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН Праздника Триоди, ГЛАС 2
(Канóн Трióди, совмещéнный с канóнами свт. Нiколáя, глас 8 (пéрвый), и, глас 4 (вторóй)
ПЕСНЬ 1
Iрмóс: Моисéйскую песнь воспрiúмши возопíй душè:/ Помóщник и Покровúтель бысть мне во спасéнiе,/ сей мой Бог, и прослáвлю Егò.(2 раза)
Хор.Припéв: Слáва Тебè, Бóже наш, слáва Тебè.
Тропáрь: Распя́лся еси плóтiю, безстрáстный естествóм Ѻ́тчим:/ прободéн был еси в рéбра, источивый ми́рови кровь и вóду:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Крест Твой почитаю, и погребéнiе слáвлю Блáже,/ и пою́, и покланя́юся востáнiю Твоемý, и взывáю:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Áще и вкуси́л еси жéлчи, слáдосте церкóвная,/ но источи́л еси́ нам нетлéнiе от ребр Твои́х:// Ты Бог наш, и прославля́ем Тя.
Хор: Слáва Тебè, Бóже наш, слáва Тебè.
Чтец: Вмени́лся еси́, Спáсе, с мéртвыми, мéртвыя воздви́гнувый,/ вкуси́л еси тли:/ истлéнiя бо вся́ко не познáл еси:// Ты Бог наш, и прославля́ем Тя.
Канон свт. Николáя, глас 8 (первый)
Хор: Святúтелю óтче Нiкóлае, молù Бóга о нас.
Чтец: Песнь устéн мои́х прiими́, Благодáтелю Хрiстé,/ и уясни́ ми язы́к, не поминáя мнóгих мои́х грехóв,/ да воспою́ честнóе житié Твоегó святи́теля/ в пáмять пренесéнiя мощéй егó.
Хор: Святúтелю óтче Нiкóлае, молù Бóга о нас.
Чтец: Чудотвóрный дар прiéм и терпéнiя венцы́, святи́тельством украшáяся,/ Бóгу помоли́ся, óтче, прегрешéнiй прощéнiе даровáти нам,/ слáвящим твоé пренесéнiе.
Хор: Святúтелю óтче Нiкóлае, молù Бóга о нас.
Чтец: Пáстырь Хрiстóва стáда, óтче, ины́м овцáм посылáешися, к лати́нскому язы́ку,/ да вся удиви́ши чудесы́ твои́ми и ко Хрiстý приведéши, блажéнне,/ Емýже и о нас моли́ся непрестáнно.
Хор: Пресвятáя Богорóдице, спасù нас.
Богорóдичен: Далéче бы́вше иногдá,/ язы́честiи нарóди Рождествóм Твои́м, Богорóдице, к Бóгу прибли́жихомся:/ Ты бо мене Обожи́вшаго породилá еси́ и дрéвнiя кля́твы Свобóждшаго Своéю крóвiю.
Канон свт. Николáя, глас 4 (второй)
Хор: Святúтелю óтче Нiкóлае, молù Бóга о нас.
Чтец: Просвети́ дýшу и сéрдце, молю́ Ти ся, Светодáвче, твáри Содéтелю,/ дар подáждь ми воспевáнiем пéти Твоегó угóдника пречестнáго,// и́мже мир от скóрби избáви. (Двáжды)
Слáва Ѻтцý и Сы́ну и Святóму Дýху.
Чтец: Небéсную ты обрéт премýдрость,/ я́ко талáнта вручéннаго, благоупотреби́л еси́:/ тóю бо, разори́в противобóжную лесть,// умудри́л еси́ лю́ди Божéственным учéнiем.
И ны́не и прúсно и во вéки векóв. Амúнь.
Богорóдичен: Зачинáется Превéчный, и совершéнный обновля́ется,/ из Отрокови́цы Дéтищ раждáется,/ Егóже проповéдал еси́ во двою́ существý,// во еди́ной же Ипостáси, Богоблажéнне.
Катавáсiя Пáсхи, глас 1: Воскресéнiя день,/ просветúмся, лю́дiе./ Пáсха, Госпóдня Пáсха:/ от смéрти бо к жúзни,/ и от землù к небесù,/ Хрїстóс Бог нас преведè,// побéдную пою́щiя.
ПЕСНЬ 3
Iрмóс: Неплóдствоваший мой ум,/ плодонóсен Бóже покажù ми,/ дéлателю дóбрых, насадúтелю благúх,// благоутрóбiем Твоúм.(2 раза)
Хор: Слáва Тебè, Бóже наш, слáва Тебè.
Чтец: Длáни на Крестé простéрл еси́ Iисýсе,/ язы́ки вся от прéлести собрáв,// к познáнiю Твоемý созвáл еси́ Спáсе.
Хор: Слáва Тебè, Бóже наш, слáва Тебè.
Чтец: Iудéйстiи лю́дiе Пiлáту вопiю́т:/ отпусти́ нам злодéйственнаго разбóйника,// возми́, возми́, распни́ Безгрéшнаго.
Хор: Слáва Тебè, Бóже наш, слáва Тебè.
Чтец: Распéншуся Тебé, Хрiстé, помрачи́ся свет, земля́ потрясéся,// и из гробóв мéртвiи востáша мнóзи, стрáхом держáвы Твоея́.
Хор: Слáва Тебè, Бóже наш, слáва Тебè.
Чтец: Предстоя́щи Крестý Áгница Твоя́, Iисýсе, плáчем вопiя́ше:/ кáмо и́деши, Сы́не;// кáмо грядéши, Áгнче, за всех заклáвыйся?
Глас 8
Хор: Святúтелю óтче Нiкóлае, молù Бóга о нас.
Чтец: Незлóбивый нрáвом и крóткiй óбразом,/ житié имéя áнгельское, Богоблажéнне Нiкóлае,// не престáй о нас моля́ся еди́ному Человеколю́бцу.
Хор: Святúтелю óтче Нiкóлае, молù Бóга о нас.
Чтец: Кiй град, блажéнне, не имéет тебé помóщника?/ Кáя ли душá не призывáет твоегó и́мене?// Или́ кóего мéста не присещáеши дýхом, твои́ми чудесы́ удивля́я вся, Нiкóлае?
Хор: Святúтелю óтче Нiкóлае, молù Бóга о нас.
Чтец: Бáрскiй ýбо град прiя́т тéло твоé, но дух твой в Вы́шнем Iерусали́ме,/ идéже ликýеши со прорóки, и апóстолы, и святи́тели кýпно,// моля́ся о нас еди́ному Человеколю́бцу.
Хор: Пресвятáя Богорóдице, спасù нас.
Богорóдичен: Просвещéнiе ми испроси́, Пречи́стая Влады́чице,/ омрачéнному грехи́ мнóгими, порóждшая Свет всемý ми́ру,// и страстнýю мглу далéче отжени́, еди́на Богоблажéнная.
Глас 4
Хор: Святúтелю óтче Нiкóлае, молù Бóга о нас.
Чтец: Печáльнiи тя обретóхом крéпкое утешéнiе,/ помрачéнiи - свет, и злых изменéнiе и́же скорбьми́ одержи́мии,// свящéннейшiй óтче. (Двáжды)
Слáва Ѻтцý и Сы́ну и Святóму Дýху.
Чтец: Святи́телю Нiкóлае, Бóжiя устá быв,/ из уст вóлка непрiя́зненна лю́ди избáвил еси́, слáвне,// и привéл еси́ Творцý дар, дая́й исцелéнiе всем.
И ны́не и прúсно и во вéки векóв. Амúнь.
Богорóдичен: Еди́н роди́тися извóли плóтiю из Тебé,/ вы́ше слóва сый Слóво, Богомáти Пречи́стая,// избрáвый слугý Себé и учи́теля нарóдом iерáрха Нiколáя.
Катавáсiя Пáсхи, глас 1: Прiидúте, пúво пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одождúвша Хрїстà,// в Нéмже утверждáемся.
Гóсподи, поми́луй. (3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Кондáк прáздника Тріóди, глас 2: Рáдоватися миронóсицам повелéл есù,/ плачь прамáтере Éвы утолúл есù/ воскресéнiем Твоúм, Хрїстè Бóже,/ апóстолом же Твоúм проповéдати повелéл есù:// Спас воскрéсе от грóба.
Íкос: На гроб Твой, Спáсе, миронóсицы идýщiя,/ к себé недоумевáхуся умóм, и вещáху:/ кто нам кáмень отвали́т грóбный?/ И воззрéвша ви́дят, я́ко кáмень отвалéн бе,/ зрáку же áнгелову со одея́нiем дивля́хуся:/ содержи́ми же бя́ху трéпетом, и бежáти помышля́ху./ И к ним ю́ноша возопѝ:/ не бóйтеся вы, Егóже и́щете, востá,/ прiиди́те, ви́дите мéсто, идéже лежáше тéло Iисýсово,/ и скóро шéдшiя возвести́те ученикóм:// Спас воскрéсе от грóба.
Седáлен свт. Нiколáя, глaс 1: Пренесéнiе твои́х честны́х мощéй положéнiе нам бысть прáзднества свéтла,/ святи́телю Госпóдень прехвáльный,/ éже хвáлим благочéстно, и рáдостно чту́ще тя свéта незаходи́маго Сóлнца,// вéрным добрóто, Нiкóлае. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Трióди (жен-миронóсиц), глас 2: Ученикóв Твои́х лик с миронóсицами женáми рáдуется соглáсно:/ óбщiй бо прáздник с ни́ми прáзднуют,/ в слáву и честь Твоегó Воскресéнiя./ И тéми вопiéм Ти, Человеколю́бче Гóсподи:// лю́дем Твои́м подáждь вéлiю ми́лость.
ПЕСНЬ 4
Iрмóс: Éже от Дéвы Твоè Рождествò прорóк предзря́,/ возпроповéдаше вопiя́:/ слух Твой услы́шах и убоя́хся:/ я́ко от ю́га, и из горы̀ святы́я, приосенéнныя// пришéл есù Хрїстè.(2 раза)
Хор: Слáва Тебè, Бóже наш, слáва Тебè.
Чтец: Крестóм плени́л еси́ áдово чрéво,/ и совоздви́гл еси́ мéртвыя,/ и смéрти разруши́л еси́ мучи́тельство:/ тéмже и́же от Адáма покланя́ющiися,// поéм погребéнiе Твоé и востáнiе Хрiстé.
Хор: Слáва Тебè, Бóже наш, слáва Тебè.
Чтец: Благоволи́вый, Спáсе наш,/ за благоутрóбiе ми́лости пригвозди́тися на Крестé,/ и от прáотчiя избáвити ны кля́твы,/ разреши́ ýзы мнóгих мои́х согрешéнiй:// мóжеши бо, ели́ка хóщеши, твори́ти.
Хор: Слáва Тебè, Бóже наш, слáва Тебè.
Чтец: На Крестé пригвозди́вый мою́ дрéвнюю кля́тву,/ и источи́вый мне, Спáсе, благословéнiе крóвiю от ребр Твои́х,/ разреши́ ýзы мнóгих мои́х согрешéнiй:// мóжеши бо, ели́ка хóщеши, твори́ти.
Хор: Слáва Тебè, Бóже наш, слáва Тебè.
Чтец: Ад Спáсе, срет Тя в преиспóдних, огорчи́ся/ помышля́я, я́ко я́же дрéвле пожрéти возмогíй,/ ны́не невóлею отдáв, истязýется в дóльних,// и пленя́емь и обнажáемь бывáет мéртвых.
Глас 8
Хор: Святúтелю óтче Нiкóлае, молù Бóга о нас.
Чтец: Свéтом Вы́шнего озаря́емь, святи́телю,/ моé сéрдце просвети́ и тьму грехóвную отжени́,// да, рáдуяся, пою́ твоé святóе пренесéнiе.
Хор: Святúтелю óтче Нiкóлае, молù Бóга о нас.
Чтец: Возстýпль на лéствицу добродéтелей, блажéнне,/ чудотвóрец яви́лся еси́ по всей земли́, Нiкóлае,// и сегó рáди от Мир бáрстiи лю́дiе прiéмлют святы́я мóщи твоя́.
Хор: Святúтелю óтче Нiкóлае, молù Бóга о нас.
Чтец: Iерéи вéрнiи о тебé хвáлятся,/ и лю́дiе христолюби́вiи призывáют тя, во бранéх помóщника,// и мы, недостóйнiи, подвизáем тя к Бóгу за ны моли́тися, Нiкóлае.
Хор: Пресвятáя Богорóдице, спасù нас.
Богорóдичен: Чи́ны áнгельскiя удивля́ет, Богорóдице, тáйны Твоея́ глубинá,/ бéсы же смущáет Твоя́ iкóна.// Е́йже мы клáняемся, чтýще Тя, Бóжiю Мáтерь.
Глас 4
Хор: Святúтелю óтче Нiкóлае, молù Бóга о нас.
Чтец: Начáльна, Богоглáсе, Свéта Бóжiя причáстiем вторы́й яви́лся еси́,/ сiя́нiем просвещáющ мрáчный,// я́ко рачи́тель добродетéли, преизя́щен слáвою. (Двáжды)
Слáва Ѻтцý и Сы́ну и Святóму Дýху.
Чтец: Начáльна, Богоглáсе, Свéта Бóжiя причáстiем вторы́й яви́лся еси́,/ сiя́нiем просвещáющ мрáчный,// я́ко рачи́тель добродетéли, преизя́щен слáвою.
И ны́не и прúсно и во вéки векóв. Амúнь.
Богорóдичен: Естествóм несказáнно Вы́шнего Свéта,/ милосéрдiем пребогáтаго рóждшая неизречéнно,// обнищáвшiя ны, Пречи́стая, Бóжiими дáры обогати́.
Катавáсiя Пáсхи, глас 1: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Áнгела,/ я́сно глагóлюща:/ днесь спасéнiе мíру,/ я́ко воскрéсе Хрїстóс,// я́ко всесúлен.
ПЕСНЬ 5
Iрмóс: Мглу душù моея́, Спáсе мой, разгнáв/ свéтом зáповедей Твоúх озарù мя,// я́ко едúн Царь мúра.(2 раза)
Хор: Слáва Тебè, Бóже наш, слáва Тебè.
Чтец: Ты пéрвую одéжду мою́,/ ю́же ми исткá, увы́ мне, сéятель грехá,// совлéкл еси́, Спáсе мой, облéкся в мя.
Хор: Слáва Тебè, Бóже наш, слáва Тебè.
Чтец: Ли́ствiе смокóвное сши мне грех мой, увы мне,/ не сохрáншему, Спáсе мой, пречи́стую зáповедь Твою́,// змiи́ным совéтом.
Хор: Слáва Тебè, Бóже наш, слáва Тебè.
Чтец: Уязви́вшуюся дýшу мою́ разбóйническими помышлéньми мои́ми,// предстáвый и́же от Марíи, и елéй возлiя́в, исцели́ Хрiстóс.
Хор: Слáва Тебè, Бóже наш, слáва Тебè.
Чтец: У Крестá предстоя́щи Пречи́стая Богорóдица, мáтерски взывáше:// остáвил Мя еси́ еди́ну, о Сы́не Мой и Бóже!
Глас 8
Хор: Святúтелю óтче Нiкóлае, молù Бóга о нас.
Чтец: В Ми́рех престóл имéл еси́, в Бар тéло пресели́л еси́,/ и ду́хом на Небеси́ пребывáеши, святи́телю Нiкóлае, со апóстолы, я́ко преéмник,// с ни́миже о нас моли́, пою́щих твоé пренесéнiе.
Хор: Святúтелю óтче Нiкóлае, молù Бóга о нас.
Чтец: Всех хрiстiáн надéждо, и оби́димых вéлiй застýпниче, и боля́щих цели́телю,/ печáльных утéшителю и к Бóгу от человéк ходáтаю,// отéчеству нáшему мир испроси́ и спасáй ны от погáных нахождéнiя.
Хор: Святúтелю óтче Нiкóлае, молù Бóга о нас.
Чтец: Погружéнную дýшу мою́ мнóгими страстьми́, Нiкóлае, умерщвлéнную грехопадéнiем,/ оживи́ твои́ми моли́твами и напрáви на покая́нiе,// да с вéрными всéми твоé слáвлю пренесéнiе.
Хор: Пресвятáя Богорóдице, спасù нас.
Богорóдичен: Егóже тьмы áнгельскiя и серафи́мская мнóжества ужасáются/ и разýмная тварь трепéщет,/ Тогó я́ко Младéнца, Дéво, питáеши,// Егóже обрáзно на рукý Твоéю ви́дяще, всегдá покланя́емся.
Глас 4
Хор: Святúтелю óтче Нiкóлае, молù Бóга о нас.
Чтец: Мнóгим чудотворéнiем крáсне нóзе стяжáв,/ всем благáя благовести́л еси́,/ от вражды́ вéтхiя свобóдны творя́ Божéственным учéнiем,// спаси́ ны, священноначáльниче. (Двáжды)
Слáва Ѻтцý и Сы́ну и Святóму Дýху.
Чтец: Бóга благоволéнiем на хребéт морски́й всед/ и со благоговéйными мýжи мнóгу пучи́ну прешéд,// ко грáду Бáрску пришéл еси́, блажéнне Нiкóлае.
И ны́не и прúсно и во вéки векóв. Амúнь.
Богорóдичен: Щит вéрным, Бóжiя Мáти Дéво, Тя вои́стинну слáвим, áнгельски зову́ще Ти:/ рáдуйся, Благословéнная и Благодáтная, слы́шанiе и глагóланiе стрáшно// и ди́вно покóище Влады́це твáри вся́кiя.
Катавáсiя Пáсхи, глас 1: У́тренюем ýтреннюю глубокý,/ и вмéсто мúра песнь принесéм Влады́це,/ и Хрїстà ýзрим/ прáвды Сóлнце,// всем жизнь возсiя́юща.
ПЕСНЬ 6
Iрмóс: Во глубинè грехóвней содержúмь есмь Спáсе,/ и в пучúне житéйстей обуревáемь,/ но я́коже Ióну от звéря,// и менè от страстéй возведù, и спасù мя.(2 раза)
Хор: Слáва Тебè, Бóже наш, слáва Тебè.
Чтец: Мертв есть ад, дерзáйте земнорóднiи,/ Хрiстóс бо на Дрéве ви́сяй,/ вéрже орýжiе нань, и лежи́т мертв:// я́же бо имя́ше, плени́ся обнажи́вся.
Хор: Слáва Тебè, Бóже наш, слáва Тебè.
Чтец: Плени́ся ад, дерзáйте мéртвiи, и грóби отверзóшася,/ востáните от áда, вопiéт вам Хрiстóс,// вся пришéдый избáвити от смéрти и тли.
Хор: Слáва Тебè, Бóже наш, слáва Тебè.
Чтец: Мéртвыя я́коже возмóг пожéрл еси́ иногдá, ны́не истязýемь/ áде, отдáждь Ми, вопiéт тебé Жизнодáвец и Бог,// вся пришéдый избáвити от несы́таго твоегó чрéва.
Хор: Слáва Тебè, Бóже наш, слáва Тебè.
Чтец: Жены́ миронóсицы, что тщитéся прóчее;/ что же живóму ми́ра принóсите,/ воскрéсе Хрiстóс, я́коже предречé.// Да престáнут вáша слéзы, прешéдшiя на рáдость.
Глас 8
Хор: Святúтелю óтче Нiкóлае, молù Бóга о нас.
Чтец: Я́ко от окри́на, от Божéственныя твоея́ цéркве нескýдно прiéмлем здрáвiе телесéм/ и душáм очищéнiе, святи́телю Нiкóлае,// чудесá бо тóчиши благодáтiю несомнéнною вéрою уповáющим на тя.
Хор: Святúтелю óтче Нiкóлае, молù Бóга о нас.
Чтец: От напáстей разли́чных, и бед лю́тых, и скорбéй, одержáщих ны,/ и от разли́чных злых, óтче, я́ко Хрiстóв угóдник преслáвный, избáви рабы́ твоя́,// достодóлжно чтýщiя твоé святóе пренесéнiе.
Хор: Святúтелю óтче Нiкóлае, молù Бóга о нас.
Чтец: Грехóвным мрáзом истéрп и житéйским вéтром поревáемь,/ я́ко другóе сóлнце, óтче, подóбiе твоегó óбраза ви́дев,// твои́ми моли́твами да согрéюся, служи́телю Хрiстóв Нiкóлае.
Хор: Пресвятáя Богорóдице, спасù нас.
Богорóдичен: Земны́х ум Небéсныя тáйны не увéсть, ни тварь Творцá рáзума домы́слится:/ прехóдит бо ум человéч от Дéвы рождествó Госпóдне.// Е́йже моля́щеся вéрою, грехóв прощéнiе прiи́мем.
Глас 4
Хор: Святúтелю óтче Нiкóлае, молù Бóга о нас.
Чтец: Лю́ди Бóжiя ко спасéнiю устрóивый во плóти Я́вльшагося мнóгiя рáди блáгости,/ проповéдниче Нiкóлае и язы́к учи́телю,// спаси́ ны наставлéнiем твои́м. (Двáжды)
Слáва Ѻтцý и Сы́ну и Святóму Дýху.
Чтец: Имéвый путь мóре и стези́ вóды,/ умоли́ у Гóспода, éже нам мóре житéйское преплы́ти без врéда// и стезéю вод слéзных дости́гнути Цáрствiе Небéсное.
И ны́не и прúсно и во вéки векóв. Амúнь.
Богорóдичен: Ты дверь Царя́ Небéс и храм слáвы Егó, Дéво Всепéтая,/ отвéрзи нам двéри милосéрдiя// и введи́ ны моли́твами Твои́ми в жили́ща Небéсныя слáвы.
Катавáсiя Пáсхи, глас 1: Снизшéл есù в преиспóдняя землù,/ и сокрушúл есù вереù вéчныя,/ содержáщiя свя́занныя, Хрїстè,/ и триднéвен, я́ко от кúта Ióна,// воскрéсл есù от грóба.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Святúтеля Нiколáя, глас 3: Взы́де, я́ко звездá, от востóка до зáпада/ твоя́ мóщи, святи́телю Нiкóлае,/ мóре же освяти́ся шéствiем твои́м,/ и град Бáрскiй прiéмлет тобóю благодáть:/ нас бо дéля яви́лся еси́ чудотвóрец изя́щный,// преди́вный и ми́лостивый.
Íкос: Воспои́м ны́не святи́теля пéсньми, Ми́рским лю́дем пáстыря и учи́теля,/ да моли́твами егó просвети́мся:/ сей бо яви́ся чист весь, нетлéнен дýхом,/ Хрiстý принося́ жéртву непорóчну, чи́сту, Бóгу благопрiя́тну,/ я́ко святи́тель, очищéн и душéю и тéлом./ Тéмже сый и́стинно Цéркви предстáтель и побóрник сея́// и чудотвóрец изя́щен, преди́вен и ми́лостив.
ПЕСНЬ 7
Iрмóс: Херувíмы подражáюще óтроцы/ в пещù ликовствовáху вопiю́ще:/ благословéн есù Бóже,/ я́ко úстиною и судóм навéл есù сiя́ вся грех рáди нáших,// препéтый, и препрослáвленный во вся вéки.(2 раза)
Хор: Слáва Тебé, Бóже наш, слáва Тебé.
Чтец: Ты, я́ко Человеколю́бец, хотя́й вся спасти́ от прéлести, я́же создáл еси́,/ претерпéл еси́ пригвозди́тися на Крестé:/ да погребéнный óбраз страстьми́, сей плóтiю Твоéю обнови́ши, Спáсе,// и ад низложи́в, воскреси́л еси́ и умéршiя с Собóю.
Хор: Слáва Тебé, Бóже наш, слáва Тебé.
Чтец: На Крестé возвышáемь, вся призвáл еси́/ к Себé Щéдре, я́коже обещáл еси́ Блáже:/ я́ко вои́стинну вся сiя́ грехóв рáди нáших пострадáти благоволи́л еси́.// Тéмже и разбóйнику рáйская вратá отвéрзл еси́, Спáсе.
Хор: Слáва Тебé, Бóже наш, слáва Тебé.
Чтец: Ты храм телéсный воздви́гл есѝ разорéнный,/ триднéвно из грóба, я́коже обещáл есѝ Блáже:/ да вои́стинну скáжеши слáву Твою́,/ ю́же нам источáеши вéрою,// ýзы разреши́в, и́хже держáше дрéвле ад свя́занных.
Хор: Слáва Тебé, Бóже наш, слáва Тебé.
Чтец: О iудéйское безýмiе! О неи́стовство беззакóнных!/ Что невéрное ви́девше, не вéровасте Хрiстý;/ я́ко немощны́я, не слóвом ли воздви́же?/ Или я́ко весь мiр Той не спасé ли,// да уверя́ют вас понé вóини, или́ воскрéсшiе из мéртвых.
Глас 8
Хор: Святúтелю óтче Нiкóлае, молù Бóга о нас.
Чтец: Днесь рáдуются Áнгели Бóжiи, рыдáет же дéмонское мнóжество:/ спасл бо еси́ лю́ди от напáсти и отгнáл еси́ дýхи тéмныя./ Тем достóйно одолéвый нарицáешися./ Сегó рáди вопiéм Гóсподеви:// отéц нáших Бóже, благословéн еси́.
Хор: Святúтелю óтче Нiкóлае, молù Бóга о нас.
Чтец: Одержи́мiи печáлiю нéмощи, разли́чными недýги утруждéни,/ с вéрою к рáце твоéй влекýтся/ и, получи́вше твою́ ми́лость, быстрообрáзно отхóдят, рáдостно Гóсподеви пою́ще:// отéц нáших Бóже, благословéн еси́.
Хор: Святúтелю óтче Нiкóлае, молù Бóга о нас.
Чтец: Предстоя́т ти, блажéнне, собóри правовéрных людéй,/ и хвáлятся о тебé церкóвнiи учи́тели,/ прославля́ют же тя цари́, я́ко застýпника./ Мы же ти мóлимся, спаси́ ны, Нiкóлае, пою́щiя Гóсподеви:// отéц нáших Бóже, благословéн еси́.
Хор: Пресвятáя Богорóдице, спасù нас.
Богорóдичен: О, кáко, Спáса моегó воспою́, Егóже трéпетно хвáлят Áнгели?/ Но Ты, Мáти, настáви мя и милосéрдiе Сынóвнее благоутрóбiем Твои́м понýди/ поми́ловати ны, на Тя уповáющiя,// я́ко Ты, за ны моля́щи Егó, от мýки избáвиши.
Глас 4
Хор: Святúтелю óтче Нiкóлае, молù Бóга о нас.
Чтец: Вещéй сýетством всемý умý человéческому обуя́вшу,/ я́ко сóлiю, даждь цельбý слóвом твои́м и пéти Гóсподеви научи́:// препéтый отцéв Госпóдь и Бог, благословéн еси́. (Двáжды)
Продолжéнiе здесь