Неделя третья Великого поста Крестопоклонная БЛАГОВЕЩЕНИЕ ПРЕСВЯТОЙ БОГОРОДИЦЫ. УТРЕНЯ (окончание)
7 апрéля 2024 гóда. Недéля трéтiя Велúкaго постà. Крестопоклóнная. Глас 3. Благовéщенiе Пресвяты́я Влады́чицы нáшея Богорóдицы и Приснодéвы Марíи. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлая катапетáсма, в распя́тiи Содéтеля,/ сокровéнную в Писáнiи явля́ющи вéрным и҆́стину,// благословéн есѝ, зовýщим, Бóже отéц нáших.
На 12.Хор: Благословéн есù, Гóсподи, Бóже отéц нáших,/ и хвáльно и прослáвлено И́мя Твоè во вéки.
Чтец: Прободéнным Твои́м рéбром,/ кáплями Боготóчныя Животворя́щiя Крóве, Хрїстè,/ смотри́тельно кáплющiя на зéмлю,/ сýщих от землѝ возсоздáл есѝ,// благословéн есѝ, зовýщих, Бóже отéц нáших.
Хор: И вся делà Твоя́ úстинна, и прáви путiè Твоù.
Трóичен: Дýха Благáго со Отцéм прослáвим, и с Сы́ном Единорóдным,/ Еди́но в Трiéх вéрнiи чтýще Начáло, и Еди́но Божествò:// благословéн есѝ, зовýще, Бóже отéц нáших.
Глас 1
На 10: И вси судù Твоù úстинни,/ и судьбы̀ úстинны сотворúл есù.
Чтец: Воскрéсл еси́ из грóба триднéвно, я́ко спяй Гóсподи,/ áдовы врáтари порази́в Божéственною си́лою,/ и дрéвнiя воздви́г прáотцы/ еди́не благословéнный// отцéв Бóже, и препрослáвленный.(двáжды)
Хор: И на град святы́й отéц нáших Iерусалúм.
Чтец: Цевни́цею пéсней ликýюще/ возрáдуемся днесь лю́дiе Крéстным поклонéнiем/ на сем пригвозди́вшагося Хрiстà слáвяще,/ еди́наго благословéннаго// отцéв Бóга, и препрослáвленнаго.(двáжды)
На 8.Хор: Благословéн есù, Гóсподи Бóже отéц нáших,/ и препéтый и превозносúмый во вéки.
Чтец: Показáвый умерщвлéнiя оргáн, жи́зни дéлателище,/ мíру облобызáтельное, Твой Крест Всещéдре,/ томý покланя́ющiяся освяти́,/ еди́не благословéнный// отцéв Бóже и препрослáвленный.
Хор: И благословéно И́мя слáвы Твоея́ святóе,/ препéтое и превозносúмое во вéки.
Чтец: Еди́не ми́лостиве и благоутрóбне, просвети́,/ освяти́ еди́не Iисýсе,/ покланя́ющiяся вéрно Твоемý Крестý,/ и Божéственным страдáнiем,/ еди́не благословéнный// отцéв Бóже, и препрослáвленный.
Глас 4
На 6.Хор: Благословéн есù в хрáме святы́я слáвы Твоея́,/ препéтый и превозносúмый во вéки.
Благословéн есù вúдяй бéздны, седя́й на Херувíмех,/ препéтый и превозносúмый во вéки.
Богорóдица речè: Свет невещéственный повéдая, в вещéственне телеси́ совокупля́емь за милосéрдiе мнóгое,/ свéтлое благовéщенiе, Божéственная проповéданiя, ны́не взывáеши Ми:// благословéн, Всечи́стая, Плод Твоегò чрéва.(двáжды)
На 4: Благословéн есù на престóле слáвы Цáрствiя Твоегò,/ препéтый и превозносúмый во вéки.
Благословéн есù на твéрди Небéсней,/ препéтый и превозносúмый во вéки.
Áнгел возопù: Рáдуйся, Влады́чице Дéво,/ рáдуйся, Пречи́стая,/ рáдуйся, прiя́телище Бóжiе,/ рáдуйся, свéщниче Свéта, Адáмово воззвáнiе,/ Éвы избавлéнiе, горò святáя,// прея́вственное свящéнiе и чертóг безсмéртiя. (двáжды)
Слáва Ѻтцý и Сы́ну и Святóму Дýху.
Богорóдица речè: Дýшу очи́сти, тéло освяти́,/ цéрковь сотвори́ Мя вмести́тельну Бóга,/ ски́нiю Богоукрáшену, одушевлéн храм наи́тiем Пресвятáго Дýха// и Жи́зни чи́стую Мáтерь.
И ны́не и прúсно и во вéки векóв, амúнь.
Áнгел возопù: Я́ко многосвéтлую свещý и Богодéланен чертóг,/ ви́жу Тя ны́не, я́ко злат кiвóт,/ закóна Подáтеля прiими́, Богоневéсто,// благоизвóлившаго человéческое избáвити Тобóю тлéнное существò.
Катавáсiя Благовéщенiя, глас 4: Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: Нестерпúмому огню́ соединúвшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благословúте, вся делà Госпóдня, Гóспода// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлость,/ егдà крест Твой водрузи́ся на лóбнем,/ и тварь преклоня́шеся стрáхом, воспевáющи:/ благослови́те вся делà Госпóдня, Гóспода,// пóйте и превозноси́те Егò во вéки.
На 12.Хор: Благословúте, вся делà Госпóдня, Гóспода,/ пóйте и превозносúте Егò во вéки.
Чтец: Воскрéсл есѝ Хрїстè из грóба,/ и пáдшаго прельщéнiем, дрéвом испрáвил есѝ Божéственною си́лою, зовýща и глагóлюща:/ благослови́те вся делà Госпóдня, Гóспода,// пóйте и превозноси́те Егò во век.
Хор: Благословúте, Áнгели Госпóдни, Небесà Госпóдня, Гóспода,/ пóйте и превозносúте Егò во вéки.
Богорóдичен: Храм Бóжiй яви́лася есѝ Вмести́лище одушевлéнное, и Ковчéг:/ Творцà бо человéком, Богороди́тельнице Пречи́стая, примири́ла есѝ,/ и достóйно вся делà поéм Тя,// и превознóсим во вся вéки.
Глас 1
На 10: Благословúте, вóды вся, я́же превы́ше Небéс, вся сúлы Госпóдни, Гóспода,/ пóйте и превозносúте Егò во вéки.
Чтец: Ми́ро в рукáх что держитé вся́ко?/ Когò же взыскýете?/ Ны́не явлéйся ю́ноша во грóбе, вопiя́:/ воскрéсе Хрiстóс и Бог наш,// возстáвивый естествò человéков от áдовых сокрóвищ.
Хор: Благословúте, сóлнце и мéсяц, звéзды небéсныя, Гóспода,/ пóйте и превозносúте Егò во вéки.
Чтец: Рáдуйся требогáтое дрéво и Божéственное, Крéсте,/ свéте сýщим во тьме,/ четвероконéчный мiр сiя́нiем твои́м,/ востáнiя Хрiстóва проявлéй зари́,// сподóби вся вéрныя дости́гнути Пáсху.
На 8.Хор: Благословúте, вся птúцы небéсныя, звéрiе и вси скóти, Гóспода,/ пóйте и превозносúте Егò во вéки.
Чтец: В сiй день благоухáют ми́ра божéственныя мирополóжницы,/ живоми́рственное дрéво Крест Хрiстóв:/ обоня́им егò Богодухновéнныя вони́,// томý покланя́ющеся вéрно во вéки.
Хор: Благословúте, сы́нове человéчестiи, да благословúт Iзрáиль Гóспода,/ пóйте и превозносúте Егò во вéки.
Чтец: Гряди́ Елiссéе прорóче,/ рцы я́ве, что дрéво óное,/ éже в вóду вложи́л еси́?/ Крест Хрiстóв, и́мже от глубины́ тли извлекóхомся,// томý покланя́ющеся вéрно во вéки.
Глас 4
На 6: Благословúте, свящéнницы Госпóдни, рабù Госпóдни, Гóспода,/ пóйте и превозносúте Егò во вéки.
Благословúте, дýси и дýши прáведных,/ преподóбнiи и смирéннiи сéрдцем, Гóспода,/ пóйте и превозносúте Егò во вéки.
Богорóдица речè: Ум всяк побеждáется земны́х, - отвещà Деви́ца, -/ и́щущи, я́же Мне вещáеши, преслáвная:/ слы́шах твоя́ словесà, но бою́ся, ужасáющися,/ да не лéстiю Мя, я́ко Éву, далéче пóслеши от Бóга./ Но обáче се вопiю́// благослови́те, вся делà Госпóдня, Гóспода и превозноси́те Егò во вéки.(двáжды)
На 4.Хор: Благословúте Анáнiя, Азáрiя, Мiсаúл, Гóспода,/ пóйте и превозносúте Егò во вéки.
Áнгел возопù: Се Тебè недоумéнное разреши́ся, - глагóлет к сим Гаврiи́л, - дóбре бо реклà, еси́, вещь неудобопости́жна./ Словесéм Твои́х устéн повинýющися прóчее,/ не сумни́ся, я́ко лéсти, я́коже вéщи, вéруй./ Аз бо, рáдуяся, вопiю́:// благослови́те, вся делà Госпóдня, Гóспода и превозноси́те Егò во вéки.
Благословúте, апóстоли, прорóцы и мýченицы Госпóдни, Гóспода,/ пóйте и превозносúте Егò во вéки.
Богорóдица речè: Закóн сей от Бóга есть человéком, - Непорóчная áбiе глагóлет, -/ от óбщiя любвè рождествò происхóдит./ Не вем супрýжника слáсти всеконéчно,/ кáко, ýбо глагóлеши, я́ко рождý?/ Бою́ся, едà лесть глагóлеши?/ Но обáче се вопiю́:// благослови́те, вся делà Госпóдня, Гóспода и превозноси́те Егò во вéки.
Благословúм Отцà, и Сы́на, и Святáго Дýха, Гóспода.
Áнгел возопù: Глагóлы, я́же мне вещáеши, Чи́стая, -/ А́нгел пáки глагóлет, -/ обы́чая есть рождествà человéков смéртных,/ и́стинно Бóга Тебè обещавáю,/ пáче слóва же и смы́сла воплощáема, я́ко весть, из Тебè./ Тéмже и, рáдуяся, вопiю́:// благослови́те, вся делà Госпóдня, Гóспода и превозноси́те Егò во вéки.
И ны́не и прúсно и во вéки векóв, амúнь.
Богорóдица речè: Явля́ешися Мне и́стины вещáтель, - речè Дéва, -/ рáдости бо óбщiя пришéл еси́ благовéстник./ Дýшу ýбо очи́стих с тéлом, и по глагóлу твоемý бýди Мне,/ да всели́тся Бог в Мя, к Немýже вопiю́ с тобóю:/ благослови́те, вся делà Госпóдня, Гóспода и превозноси́те Егò во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Благовéщенiя, глас 4: Слы́ши, Отроковúце, Дéво чúстая,/ да речéт ýбо Гаврiúл/ совéт Вы́шняго дрéвнiй úстинный:/ бýди к прiя́тiю готóва Бóжiю,/ Тобóю бо Невместúмый с человéки поживè./ Тем и, рáдуяся вопiю́:// благословúте, вся делà Госпóдня, Гóспода.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Нóвое чýдо и Боголéпное:/ девúческую бо дверь затворéнную/ я́ве прохóдит Госпóдь,/ наг во вхóде,/ и плотонóсец явúся во исхóде Бог,/ и пребывáет дверь затворéна./ Сiю́ неизречéнно// я́ко Богомáтерь, величáем.
Хор: Слáва, Гóсподи, Святóму Воскресéнiю Твоемý.
Чтец: Стрáшно есть зрéти Тебè, Творцà/ на дрéве воздви́жена, Слóве Бóжiй,/ плóтски же стрáждуща Бóга за рабы̀,/ и во грóбе бездыхáнна лежáща,/ мéртвыя же из áда разреши́вша:// тéмже Тя, Хрїстè, я́ко Всеси́льна, величáем.
На 12.Хор: Благословéн Госпóдь, Бог Iзрáилев,/ я́ко посетù и сотворù избавлéнiе лю́дем Своúм.
Чтец: Из тли смéртныя спасл есѝ, Хрїстè, прáотцы,/ положéн быв во грóбе мертв,/ и живóт процвéл есѝ, мéртвыя воскреси́в,/ руководи́в естествò человéческое ко свéту,/ и в Божéственное облéк нетлéнiе.// Тéмже истóчника Тя свéта при́сно живáго величáем.
Хор: И воздвúже рог спасéнiя нам/ в домý Давíдове, óтрока Своегò.
Богорóдичен: Храм и Престóл яви́лася есѝ Бóжiй,/ вóньже всели́ся И҆́же в вы́шних сый,/ рождéйся неискусомýжно, Всечи́стая,/ плóти Твоея́ не отвéрз вся́чески вратà./ Тéмже непрестáнными, Чи́стая, моли́твами Твои́ми,// язы́ки вáрварскiя скóро до концà покорѝ.
Глас 1
На 10: Я́коже глагóла усты̀ святы́х, сýщих от вéка прорóк Егò,/ спасéнiе от враг нáших/ и из рукù всех, ненавúдящих нас.
Чтец: Во гроб сошéл еси́ Жизнодáвче и Бóже,/ и сокруши́л еси́ вся заклéпы же и вереи́,/ и мéртвыя воскреси́л еси́,/ слáва востáнiю Твоемý, вопiю́щiя,// Хрiстè Спáсе всеси́льне.(двáжды)
Хор: Сотворúти мúлость со отцы̀ нáшими/ и помянýти Завéт Святы́й Свой.
Чтец: Гроб Твой жизнь мне Хрiстè источи́, содержáй бо жизнь,/ предстáв возопи́л еси́ живýщим во гробéх:/ сýщiи во ýзах разреши́теся,// Аз бо мíра избавлéнiе прiидóх.
На 8.Хор: Кля́тву, éюже кля́тся ко Авраáму, отцý нáшему,/ дáти нам без стрáха, из рукù враг нáших избáвльшимся.
Чтец: Пéсньми да взыгрáют вся древà дубрáвная,/ тезоимени́тое дрéво Крестà зря́ще облобызáемое днесь:/ на нéмже Хрiстóс вознесè главý,// я́коже прорóчествует божéственный Давíд.
Хор: Служúти Емý преподóбiем и прáвдою/ пред Ним вся дни животà нáшего.
Чтец: Дрéвом умéрый, дрéво тя обретóх жи́зни Хрiстонóсне Крестè мой,/ храни́телю мой неруши́мый,/ на дéмоны крéпкая держáво,/ тебè покланя́яйся днесь зовý:// освяти́ мя слáвою твоéю.
Глас 4
На 6.Хор: И ты, отрочà, прорóк Вы́шняго наречéшися,/ преды́деши бо пред лицéм Госпóдним, уготóвати путù Егò.
Дáти рáзум спасéнiя лю́дем Егò/ во оставлéнiе грех их/ милосéрдiя рáди мúлости Бóга нáшего.
Богорóдица речè: Ум всяк побеждáется земны́х, - отвещà Деви́ца, -/ и́щущи, я́же Мне вещáеши, преслáвная:/ слы́шах твоя́ словесà, но бою́ся, ужасáющися,/ да не лéстiю Мя, я́ко Éву, далéче пóслеши от Бóга./ Но обáче се вопiю́// благослови́те, вся делà Госпóдня, Гóспода и превозноси́те Егò во вéки.
На 4: В нúхже посетù нас Востóк с высоты̀,/ явúтися во тьме и сéни смéртней седя́щим.
Áнгел возопù: Се Тебè недоумéнное разреши́ся, - глагóлет к сим Гаврiи́л, - дóбре бо реклà, еси́, вещь неудобопости́жна./ Словесéм Твои́х устéн повинýющися прóчее,/ не сумни́ся, я́ко лéсти, я́коже вéщи, вéруй./ Аз бо, рáдуяся, вопiю́:// благослови́те, вся делà Госпóдня, Гóспода и превозноси́те Егò во вéки.
Хор: Напрáвити нóги нáша на путь мúрен.
Богорóдица речè: Закóн сей от Бóга есть человéком, - Непорóчная áбiе глагóлет, -/ от óбщiя любвè рождествó происхóдит./ Не вем супрýжника слáсти всеконéчно,/ кáко, ýбо глагóлеши, я́ко рождý?/ Бою́ся, едà лесть глагóлеши?/ Но обáче се вопiю́:// благослови́те, вся делà Госпóдня, Гóспода и превозноси́те Егò во вéки.
Слáва Ѻтцý и Сы́ну и Святóму Дýху.
Áнгел возопù: Глагóлы, я́же мне вещáеши, Чи́стая, -/ Áнгел пáки глагóлет, -/ обы́чая есть рождествà человéков смéртных,/ и́стинно Бóга Тебè обещавáю,/ пáче слóва же и смы́сла воплощáема, я́ко весть, из Тебè./ Тéмже и, рáдуяся, вопiю́:// благослови́те, вся делà Госпóдня, Гóспода и превозноси́те Егò во вéки.
И ны́не и прúсно и во вéки векóв, амúнь.
Богорóдица речè: Явля́ешися Мне и́стины вещáтель, - речè Дéва, -/ рáдости бо óбщiя пришéл еси́ благовéстник./ Дýшу ýбо очи́стих с тéлом, и по глагóлу твоемý бýди Мне,/ да всели́тся Бог в Мя, к Немýже вопiю́ с тобóю:/ благослови́те, вся делà Госпóдня, Гóспода и превозноси́те Егò во вéки.
Катавáсiя Благовéщенiя, глас 4: Я́ко одушевлéнному Бóжiю кiвóту,/ да никáкоже кóснется рукà сквéрных./ Устнè же вéрных, Богорóдице, немóлчно,/ глас Áнгела воспевáюще,/ с рáдостiю да вопiю́т:/ рáдуйся, Благодáтная,// Госпóдь с Тобóю.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный одúннадцатый: По Божéственнем востáнiи,/ три́жды Петрà, лю́биши ли Мя, вопрошáя Госпóдь,/ Свои́х овéц предлагáет пастыреначáльника:/ и҆́же ви́дя, егóже любля́ше Iисýс, во след грядýща,/ вопрошáше Влады́ку: сей же что?/ Áще хощý, речè, пребывáти семý,/ дóндеже и пáки прiидý,/ что к тебè, дрýже Пéтре?
Светúлен Трióди: Крест Хрiстóв честны́й/ днесь предложéнный ви́девше поклони́мся,/ и вéрно возвесели́мся, облобызáюще любóвiю,/ на сем вóлею распéншагося прося́ще Гóспода, сподóбити всех нас,/ и Крестý Честнóму поклони́тися,// и дости́гнути Воскресéнiе неосуждéнно.
Слáва Ѻтцý и Сы́ну и Святóму Дýху.
Светúлен Благовéщенiя: А́нгельских сил Архiстрати́г/ пóслан бысть от Бóга Вседержи́теля к Чи́стей и Дéве/ благовести́ти стрáнное и неизречéнное чýдо:/ занè Бог, я́ко Человéк, из Нея́ младодéйствуется без сéмене,/ назидáяй весь человéческiй род.// Лю́дiе, благовести́те обновлéнiе мíра.
И ны́не и прúсно и во вéки векóв. Амúнь.
Ин светúлен Благовéщенiя: Éже от вéка днесь познавáется тáинство Бóжiе:/ Бог Слóво Сын Дéвы Марíи за милосéрдiе бывáет,/ и рáдость благовéщенiя Гаврiи́л провещавáет./ С ни́мже возопiéм Ей:// рáдуйся, Мáти Госпóдня.
ХВАЛИТНЫ
Хор, глас 3: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 3: Прiиди́те вси язы́цы,/ уразумéйте стрáшныя тáйны си́лу:/ Хрїстóс бо Спас наш, Éже в начáле Слóво,/ распя́тся нас рáди, и вóлею погребéся,/ и воскрéсе из мéртвых, éже спастѝ вся́ческая:// Томý поклони́мся.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Повéдаша вся чудесà/ стрáжiе Твоѝ, Гóсподи,/ но собóр суеты̀ испóлни мздóю десни́цу их,/ скры́ти мня́ше воскресéнiе Твоè,// éже мiр слáвит: поми́луй нас.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Рáдости вся испóлнишася/ воскресéнiя искýс прiи́мша:/ Марíя бо Магдали́на ко грóбу прiи́де,/ обрéте Áнгела на кáмени седя́ща,/ ри́зами блистáющася и глагóлюща:/ что и҆́щете живáго с мéртвыми?/ Несть зде, но востà, я́коже речè,// предваря́я вы в Галiлéи.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Во свéте Твоéм, Влады́ко,/ ýзрим свет, Человеколю́бче:/ воскрéсл бо есѝ из мéртвых,/ Спасéнiе рóду человéческому дáруя:/ да Тя вся тварь славослóвит Еди́наго Безгрéшнаго,// поми́луй нас.
На 4. Хвалúте Егò в тимпáне и лúце, хвалúте Егò во стрýнах и оргáне.
Стiхúры Благовéщенiя, глас 1: С Небéсных кругóв слетéв Гаврiи́л в Назарéт,/ прiи́де к Дéве Марíи,/ вопiя́ Ей: рáдуйся!/ Зачнéши Сы́на, Адáма дрéвнейшаго,/ Творцà векóв и Избáвителя/ вопiю́щих Тебè:// рáдуйся, Чи́стая.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúра: Соприсносýщное Слóво Пребезначáльного Отцà,/ не разлучи́вся Гóрних,/ ны́не предстà дóльным, рáди крáйняго благоутрóбiя,/ ми́лость прiéм, éже на ны поползновéнiя,/ и, Адáмову нищетý воспрiéм,// вообрази́ся в чуждéе.
Благовестúте день от дне// спасéнiе Бóга нáшего. (Пс.95:2Б)
Стiхúра: Гаврiи́л, Дéве благовéстiе с Небесè принéс,/ вопiя́ше: рáдуйся!/ Зачнéши во чрéве Твоéм/ Тобóю вмести́маго,/ Невмести́маго же всéми,/ и раждáющая яви́шися// от Отцà прèжде денни́цы возсiя́вшаго.
Воспóйте Гóсподеви песнь нóву, воспóйте Гóсподеви вся земля́. (Пс.95:1)
Глас 2: Éже от вéка тáинство открывáется днесь,/ и Сын Бóжiй Сын человéчь бывáет,/ да, хýждшее воспрiéм, подáст ми лýчшее./ Солгáся дрéвле Адáм,/ и Бог, возжелéв бы́ти, не бысть:/ Человéк бывáет Бог,/ да бóга Адáма содéлает./ Да весели́тся тварь, да ликовствýет естествò,/ я́ко Архáнгел Дéве со стрáхом предстои́т/ и - éже рáдуйся - принóсит, печáли сопроти́вное./ За милосéрдiе ми́лости вочеловéчивыйся,// Бóже наш, слáва Тебè.
Воскреснù Гóсподи Бóже мой, да вознесéтся рукà Твоя́,/ не забýди убóгих Твоúх до концà.(Пс.9:33)
Стiхúра, самоглáсен дне Трióди, глас 8: Высокомýдраго рáзума злых фарiсéев,/ всех Госпóдь при́тчею убежáти сегò научи́:/ и не высокомýдрствовати пáче,/ éже подобáет мýдрствовати,/ всех наказà, прописáнiе и óбраз Сам быв,/ дáже до распя́тiя и смéрти,/ Сам Себè излiя́в./ Благодаря́ще ýбо с мытарéм рцем:/ пострадáвый за ны, и безстрáстен пребы́вый Бóже,/ от страстéй нас избáви,// и спаси́ дýши нáша.
Слáва Отцý и Сы́ну и Святóму Дýху.
Глас 8: Высокомýдраго рáзума злых фарiсéев,/ всех Госпóдь при́тчею убежáти сегò научи́:/ и не высокомýдрствовати пáче,/ éже подобáет мýдрствовати,/ всех наказà, прописáнiе и óбраз Сам быв,/ дáже до распя́тiя и смéрти,/ Сам Себè излiя́в./ Благодаря́ще ýбо с мытарéм рцем:/ пострадáвый за ны, и безстрáстен пребы́вый Бóже,/ от страстéй нас избáви,// и спаси́ дýши нáша.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есù, Гóсподи, научù мя оправдáнiем Твои́м.(3 рáза)
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь Трióди (Крестà), глас 1: Спасù, Гóсподи, лю́ди Твоя́ и благословù достоя́нiе Твоè, побéды правослáвным хрїстiáнам на сопротúвныя дáруя и Твоè сохраня́я Крестóм Твоúм жúтельство.
[ц.ч.]Спасѝ, Гóсподи, лю́ди Твоя́ и благослови́ достоя́нiе Твоè, побéды грядýщему рýсскому Царю́ и правослáвным хрїстiáнам на сопроти́вныя дáруя и Твоè сохраня́я Крестóм Твои́м жи́тельство.
Хор: Крестý Твоемý покланя́емся Влады́ко,/ и святóе Воскресéнiе Твоè слáвим. (Трúжды, после каждого раза один земной поклон)
СТИХИРЫ ТРИОДИ НА ПОКЛОНЕНИЕ КРЕСТУ
Самоглáсны Трióди (Крестá) глас 2: Прiиди́те вéрнiи,/ животворя́щему Дрéву поклони́мся,/ на нéмже Хрiстóс Царь слáвы вóлею рýце распростéр,/ вознесè нас на пéрвое блажéнство,/ и́хже прéжде слáстiю укрáд враг,/ изгнáны от Бóга сотвори́./ Прiиди́те вéрнiи, Дрéву поклони́мся,/ и́мже сподóбихомся неви́димых враг сокруши́ти главы́./ Прiиди́те вся отéчествiя язы́к,/ Крест Госпóдень пéсньми почти́м:/ рáдуйся Крéсте, пáдшаго Адáма совершéнное избавлéнiе!/ О тебè вéрнiи хвáлятся,/ я́ко твоéю си́лою iсмáильтескiя лю́ди держáвно покаря́ющiи./ Тебè ны́не со стрáхом хрiстiáне целýем:/ на тебè пригвозди́вшагося Бóга слáвим, глагóлюще:/ Гóсподи на том пригвозди́выйся поми́луй нас,// я́ко Благ и Человеколю́бец.
Глас 8: Днесь Влады́ка твáри, и Госпóдь слáвы,/ на Крестè пригвождáется и в рéбра прободáется,/ жéлчи и óцта вкушáет, слáдость церкóвная:/ венцéм от тéрнiя облагáется:/ покрывáяй нéбо óблаки,/ одéждею облачи́тся поругáнiя:/ и заушáется брéнною рукóю,/ рукóю создáвый человéка./ По плещéма бiéн бывáет,/ одевáяй нéбо óблаки./ Заплевáнiя и рáны прiéмлет,/ поношéнiя и заушéнiя:/ и вся терпи́т менè рáди осуждéннаго,/ Избáвитель мой и Бог,// да спасéт мiр от прéлести, я́ко благоутрóбен.
Слáва Отцý и Сыну и Святóму Дýху.
Днесь неприкосновéнный существóм,/ прикосновéн мне бывáет,/ и стрáждет стрáсти,/ свобождáяй мя от страстéй./ Свет подавáяй слепы́м,/ от беззакóнных устéн оплевáется,/ и даéт плещи́ за пленéнныя на рáны./ Сегò Чи́стая Дéва и Мáти на Крестè зря́щи,/ болéзненно вещáше:/ увы́ мне Чáдо Моè,/ что сiè сотвори́л еси́?/ Крáсный добрóтою пáче всех человéк,/ бездыхáнный, беззрáчный явля́ешися,/ не имéя ви́да, нижè добрóты./ Увы́ Мне Мой Свéте!/ Не могý спя́ща зрéти Тя,/ утрóбою уязвля́юся,/ и лю́тое орýжiе сéрдце Моè прохóдит./ Воспевáю Твоя́ стрáсти,/ покланя́юся благоутрóбiю Твоемý,/ долготерпели́ве слáва Тебè.
И ныне и прúсно и во вéки векóв. Амúнь.
Днесь прорóческое испóлнися слóво:/ се бо покланя́емся на мéсто,/ идéже стоя́ша нóги Твоя́, Гóсподи./ И, Дрéво спасéнiя прiéмше,/ грехóвных страстéй свобóду получи́хом// моли́твами Богорóдицы, Еди́не Человеколю́бче.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская одúннадцатая, глас 8: Явля́я Себè ученикóм Твои́м, Спáсе,/ по воскресéнiи Сíмону дал еси́ овéц пáству,/ за любвè воздая́нiе,/ я́же о пáстве попечéнiя ищя́./ Тéмже и глагóлал еси́:/ áще лю́биши Мя, Пéтре,/ паси́ áгнцы Моя́, паси́ óвцы Моя́./ Он же áбiе показýя друголю́бное,/ о друзéм ученицé вопрошáше./ И҆́хже моли́твами, Хрїстè, стáдо Твоè сохраня́й,// от волкóв губя́щих è.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 3: Да веселя́тся небéсная, да рáдуются земнáя; я́ко сотворѝ держáву мы́шцею Своéю Госпóдь, попрà смéртiю смерть, пéрвенец мéртвых бысть; из чрéва áдова избáви нас, и подадè мíрови вéлiю ми́лость.
Слáва Отцý и Сы́ну и Святóму Дýху.
Тропáрь Трióди (Крестà), глас 1: Спасѝ, Гóсподи, лю́ди Твоя́ и благословѝ достоя́нiе Твоè, побéды правослáвным хрїстiáнам на сопроти́вныя дáруя и Твоè сохраня́я Крестóм Твои́м жи́тельство.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшым.
Стопы̀ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Трióди, глас 7: Не ктомý плáменное орýжiе храни́т врат Едéмских: на ты́я бо нáйде преслáвный соýз Дрéво крéстное, смéртное жáло, и áдова побéда прогнáся. Предстáл бо еси́ Спáсе мой, вопiя́ сýщим во áде: вни́дите пáки в рай.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýшы нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
И глаголи часы и обéдницу