Неделя первая Великого поста ТОРЖЕСТВО ПРАВОСЛАВИЯ. ВСЕНОЩНОЕ БДЕНИЕ. УТРЕНЯ. КАНОН Глас 1
24 мáрта 2024 гóда. Недéля пéрвая Велúкaго постà. Торжествò Правослáвiя. Глас 1. Воскрéсная прáздничная слýжба для домáшнего (келéйнаго) совершéнiя. Вся слýжба прáздника по Октóиху и Трióди. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 134 псалма и Аллилуиа)
[Псалом 134 Аллилуиа]стоя́щiи во хрáме Госпóдни, во двóрех дóму Бóга нáшего./ Хвали́те Гóспода, я́ко Благ Госпóдь, пóйте и҆́мени Егò, я́ко добрò:/ я́ко Iáкова избрà Себè Госпóдь, Iзрáиля в достоя́нiе Себè./ Я́ко аз познáх, я́ко Вéлiй Госпóдь, и Госпóдь наш над всéми бóги./ Вся ели́ка восхотè Госпóдь, сотворѝ на небесѝ и на землѝ, в моря́х и во всех бéзднах./ Возводя́ óблаки от послéдних землѝ, мóлнiи в дождь сотворѝ, изводя́й вéтры от сокрóвищ Свои́х./ И҆́же поразѝ пéрвенцы Еги́петскiя, от человéка до скотà./ Послà знáменiя и чудесà посредè Тебè, Еги́пте, на фараóна и на вся рабы̀ eгò./ И҆́же поразѝ язы́ки мнóги и избѝ царѝ крéпки:/ Сиóна, царя Аморрéйска, и Óга, царя́ Васáнска, и вся цáрствiя Ханаáнска,/ и дадè зéмлю их достоя́нiе, достоя́нiе Iзрáилю, лю́дем Свои́м./ Гóсподи, и҆́мя Твоè в век и пáмять Твоя́ в род и род:/ я́ко суди́ти и҆́мать Госпóдь лю́дем Свои́м, и о рабéх Свои́х умóлится./ Íдоли язы́к, сребрò и злáто, делá рук человéческих/ Устà и҆́мут, и не возлагóлют, óчи и҆́мут, и не ýзрят,/ ýши и҆́мут, и не услы́шат, нижè бо есть дух во устéх их./ Подóбни им да бýдут творя́щiи я́, и вси надéющiися на ня./ Дóме Iзрáилев, благослови́те Гóспода, дóме Аарóнь, благослови́те Гóспода, дóме Левíин, благослови́те Гóспода./ Боя́щiися Гóспода, благослови́те Гóспода.
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егò.
Аллилýїа (трúжды)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды́ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвестѝ,/ я́ко воскрéсл есѝ, Хрїстè Бóже,// подая́й мíрови вéлiю ми́лость.
СТЕПЕННА, ГЛАС 1
1 АНТИФОН
Хор: Внегдà скорбéти ми, услы́ши моя́ болéзни,// Гóсподи, Тебè зовý.(Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромè.(Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегò рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегò рáди да поéм Трóице Единодержáвiе.
2 АНТИФОН
На гóры Твоúх вознéсл есù мя закóнов,// добродéтельми просветù, Бóже, да пою́ Тя.(Двáжды)
Деснóю Твоéю рукóю прiи́м Ты, Слóве,/ сохранѝ мя, соблюдѝ,// да не огнь менé опали́т грехóвный.(Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы̀ Госпóдни,// возвеселúся мой дух, срáдуется сéрдце.(Двáжды)
В домý Давíдове страх вели́к:/ тáмо бо престóлом постáвленным,// сýдятся вся племенà земнáя, и язы́цы.(Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Прокíмен, глас пéрвый, псалóм Давíдов. Ны́не воскреснý, глагóлет Госпóдь, положýся во Спасéнiе, не обиню́ся о нем.(Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесà Госпóдня, словесà чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.65А): Сýщу пóзде в день той, во еди́ну от суббóт, и двéрем затворéнным, идéже бя́ху ученицы́ Егò сóбрани, стрáха рáди iудéйска, прiи́де Iисýс и ста посредè, и глагóла им: мир вам. И сiè рек, показà им рýце и нóзе и рéбра Своя. Возрáдовашася же ученицы́, ви́девше Гóспода. Речè же им Iисýс пáки: мир вам. Якоже послà Мя Отéц, и Аз посылáю вы. И сiè рек, дýну и глагóла им: прiими́те Дух Свят. Имже отпуститè грехи́, отпýстятся им: и и́мже держитè, держáтся. Фомà же, еди́н от обоюнáдесяте, глагóлемый Близнéц, не бе ту с ни́ми, егдà прiи́де Iисýс. Глагóлаху же емý друзíи ученицы́: ви́дехом Гóспода. Он же речè им: áще не ви́жу на рукý Егò я́звы гвозди́нныя, и вложý пéрста моегò в я́звы гвозди́нныя, и вложý рýку мою́ в рéбра Егò, не имý вéры. И по днех осми́х пáки бя́ху внутрь ученицы́ Егò, и Фомà с ни́ми. Прiи́де Iисýс двéрем затворéнным, и ста посредè их и речè: мир вам. Потóм глагóла Фомè: принеси́ перст твой сéмо, и виждь рýце Мои́, и принеси́ рýку твою́, и вложи́ в рéбра Моя, и не бýди невéрен, но вéрен. И отвещà Фомà и речè Емý: Госпóдь мой и Бог мой. Глагóла емý Iисýс: яко ви́дев Мя, вéрова: блажéни не ви́девшiи и вéровавше. Мнóга же и и́на знáменiя сотвори Iисýс пред ученики́ Свои́ми, я́же не суть пи́сана в кни́гах сих. Сiя же пи́сана бы́ша, да вéруете, я́ко Iисýс есть Хрїстóс Сын Бóжiй, и да вéрующе животà и́мате во и́мя Егò.
[Cинодальный перевод]В тот первый день недели вечером, когда двери дома, где собирались ученики Его, были заперты из опасения от Иудеев, пришел Иисус, и стал посреди, и говорит им: мир вам! Сказав это, Он показал им руки и ноги и ребра Свои. Ученики обрадовались, увидев Господа. Иисус же сказал им вторично: мир вам! как послал Меня Отец, так и Я посылаю вас. Сказав это, дунул, и говорит им: примите Духа Святого. Кому простите грехи, тому простятся; на ком оставите, на том останутся. Фома же, один из двенадцати, называемый Близнец, не был тут с ними, когда приходил Иисус. Другие ученики сказали ему: мы видели Господа. Но он сказал им: если не увижу на руках Его ран от гвоздей, и не вложу перста моего в раны от гвоздей, и не вложу руки моей в ребра Его, не поверю. После восьми дней опять были в доме ученики Его, и Фома с ними. Пришел Иисус, когда двери были заперты, стал посреди них и сказал: мир вам! Потом говорит Фоме: подай перст твой сюда и посмотри руки Мои; подай руку твою и вложи в ребра Мои; и не будь неверующим, но верующим. Фома сказал Ему в ответ: Господь мой и Бог мой! Иисус говорит ему: ты поверил, потому что увидел Меня; блаженны невидевшие и уверовавшие. Много сотворил Иисус пред учениками Своими и других чудес, о которых не писано в книге сей. Это же написано, дабы вы уверовали, что Иисус есть Христос, Сын Божий, и, веруя, имели жизнь во имя Его.(20:19-31)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И ны́не и прúсно и во вéки векóв. Амúнь.
Богорóдичен (Трióди): На спасéнiя стезѝ настáви мя Богорóдице,/ стýдными бо окаля́х дýшу грехмѝ,/ и в лéности все житiè моè ижди́х:/ но Твои́ми моли́твами/ избáви мя от вся́кiя нечистоты̀.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегò,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещéнный с канóном крестовоскрéсным (глас 1), Богорóдицы (глас 1) и канóном Трióди, глас 4)
ПЕСНЬ 1
Iрмóс: Твоя́ победúтельная деснúца/ Боголéпно в крéпости прослáвися:/ та бо, Безсмéртне,/ я́ко всемогýщая, протúвныя сотрè,// Iзрáильтяном путь глубины̀ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл есѝ на крестè,/ от землѝ взывáя тлéнное моè тéло,// éже от Дéвы прiя́л есѝ.
На 12.Хор: Поéм Гóсподеви, слáвно бо прослáвися./ Коня́ и всáдника вéрже в мóре.
Чтец: Умерщвлéнiе подъя́л есѝ менè рáди,/ и дýшу смéрти прéдал есѝ,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил есѝ.
Хор: Помóщник и Покровúтель бысть мне во спасéнiе,/ Сей мой Бог, и прослáвлю Егò,/ Бог отцà моегò, и вознесý Егò.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горò несекóмая,// Я́же Жизнодáвца Хрїстà мíрови рóждшая.
Канон крестовоскресный, глас 1
На 10: Госпóдь, сокрушáяй брáни, Госпóдь И́мя Емý,/ колеснúцы фараóновы и сúлу егò вéрже в мóре.
Чтец: Хрїстóс обожáет мя, воплощáяся,/ Хрїстóс мя вознóсит, смиря́яся,/ Хрїстóс безстрáстна мя содéловает,/ страждá Жизнодáвец естествóм плóти.// Тéмже воспевáю благодáрственную песнь: я́ко прослáвися.
Хор: Пучúною покры̀ я́,/ погрязóша во глубинè я́ко кáмень.
Чтец: Хрїстóс вознóсит мя, распинáемь,/ Хрїстóс совоскрешáет мя, умерщвля́емь,/ Хрїстóс жизнь мне дáрует./ Тéмже с весéлiем рукáма плещáя,// пою́ Спаси́телю побéдную песнь: я́ко прослáвися.
Канон Богородицы, глас 1
На 8.Хор: Тогдà потщáшася влады́ки Едóмстiи, и князéй Моавíтских,/ прiя́т я́ трéпет, растáяша вси живýщiи в Ханаáне.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Нападéт на ня́ страх и трéпет,/ велúчiем мы́шцы Твоея́ да окáменятся.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон постной Триоди, глас 4
На 6: Дóндеже прóйдут лю́дiе Твоù, Гóсподи,/ дóндеже прóйдут лю́дiе Твоù сíи, я́же стяжáл есù.
Содéлал есù, Гóсподи, святы́ню,/ ю́же уготóвасте рýце Твоù.
Чтец: Плéщуще с весéлiем днесь вéрнiи возопiи́м:/ коль чýдна делà Твоя́ Хрїстé, и вели́ка си́ла,// нáше единомы́слiе и соглáсiе содéлавый! (двáжды)
На 4.Хор: Госпóдь цáрствуяй вéки и на век, и ещè,/ егдà внúде конь фараóнов с колеснúцами и всáдники в мóре.
Чтец: День рáдостный богомýдреннiи/ прiиди́те соверши́м,/ ны́не нéбо и земля́ весели́тся, и áнгелов чи́ни,// и человéков собрáнiя изря́дно прáзднующе.
Хор: Сы́нове же Iзрáилевы проидóша сýшею/ посредè мóря.
Чтец: Превéлiе благодея́нiе ви́дяще, рукáми восплéщим,/ разстоя́щiяся ýды Хрїстóвы, совокýплены во еди́нство,// и Бóга похвáлим мир подáвшаго.
Слáва Ѻтцý и Сы́ну и Святóму Дýху.
Тропáрь: Дáшася Цéркви днесь победи́тельная,/ Богодви́жным мановéнiем и совéтом,/ Мiхаи́ла же и Феодóры,// благочéстно вéру содержáщих царéй нáших.
И ны́не и прúсно и во вéки векóв. Амúнь.
Богорóдичен: Орýжiя злочести́вых исчезóша я́ве ересéй,/ храм бо Твой Пречи́стая Чи́стая,/ во образéх украшáемый всеблаголéпно зря́ще,// ны́не всесвящéнно рáдуемся
Катавáсiя Трióди (глас 4): Мóря чермнýю пучúну/ невлáжными стопáми/ дрéвнiй пешешéствовав Iзрáиль,/ крестообрáзныма Моисéовыма рукáма// Амалúкову сúлу в пусты́ни победúл есть.
ПЕСНЬ 3
Iрмóс: Едúне вéдый человéческаго существà нéмощь/ и мúлостивно в не вообрáжся,/ препоя́ши мя с высоты̀ сúлою,/ éже вопúти Тебè, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил есѝ,/ и сни́ти ко мне благоволи́в, вознéсл мя есѝ распя́тiем,/ éже вопи́ти Тебè, Святы́й:// Хрáме одушевлéнный неизречéнныя Твоея́ слáвы, Человеколю́бче.
На 12.Хор: Утвердúся сéрдце моè во Гóсподе,/ вознесéся рог мой о Бóзе моéм,/ разширúшася устà моя́ на врагù моя́,/ возвеселúхся о спасéнiи Твоéм.
Чтец: Живóт ипостáсный Хрїстè сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л есѝ,/ и мертв триднéвен воскрéс,// в нетлéнiе мя облéкл есѝ.
Хор: Я́ко несть свят, я́ко Госпóдь,/ и несть прáведен я́ко Бог наш,/ и несть свят пáче Тебè.
Богорóдичен: Бóга зачéнши во чрéве, Дéво, Дýхом Пресвяты́м,/ пребылà есѝ неопали́ма,/ понéже Тя купинà законополóжнику Моисéю,/ пали́мую нежегóмо, я́ве предвозвестѝ,// огнь нестерпи́мый прiéмшую.
Глас 1
На 10: Не хвалúтеся и не глагóлите высóкая в горды́ни,/ нижè да изы́дет велерéчiе из уст вáших.
Чтец: И҆́же на своé рáмо заблуждáемое овчà взéмшему,/ и низложи́вшему дрéвом егò грех,/ Хрiстý Бóгу возопiи́м:// воздви́гнувый рог наш, свят еси́, Гóсподи.
Хор: Я́ко Бог рáзумов Госпóдь,/ и Бог, уготовля́яй начинáнiя Своя́.
Чтец: Возвéдшему Пáстыря Вели́каго из áда Хрiстà,/ и священноначáлiем Егó апóстолы я́ве язы́ки упáсшему,// и҆́стиною и Божéственным вéрнiи Дýхом да послýжим.
Глас 1
На 8.Хор: Дая́й молúтву моля́щемуся,/ и благословù лéта прáведнаго.
Чтец: Óблак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебè Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Госпóдь нéмощна сотворù супостáта Егò,/ Госпóдь Свят.
Чтец: Тя запечáтанный вои́стинну лик прорóческiй истóчник,/ и заключéнную дверь именовà, дéвства Твоегò, Всепéтая,/ я́вственне знáменiя нам пи́шуще:// éже сохрани́ла есѝ и по рождествè.
Глас 4
На 6.Хор: Да не хвáлится премýдрый премýдростiю своéю,/ и да не хвáлится сúльный сúлою своéю,/ и да не хвáлится богáтый богáтством своúм.
Но о сем да хвáлится хваля́йся,/ éже разумéти и знáти Гóспода/ и творúти суд и прáвду посредè землù.
Чтец: Не ктомý нечести́вых еретикóв ны́не бровь взéмлется:// Бóжiя бо си́ла правослáвiе удержáла есть. (двáжды)
На 4: Госпóдь взы́де на Небесà и возгремè,/ Той сýдит концéм землù, прáведен Сый.
Чтец: Óблацы прорóчестiи,/ животворя́щую с небесé днесь рóсу нам да кропя́т,// на востáнiе вéры.
Хор: И даст крéпость царю́ нáшему,/ и вознесéт рог Хрiстà Своегò.
Чтец: Благоглáсно тáйныя апóстолов Хрiстóвых трубы́,/ пáче естествà да вопiю́т,// честны́х образóв исправлéнiе.
Слáва Ѻтцý и Сы́ну и Святóму Дýху.
Тропáрь: Воспои́м Хрiстà, показáвшаго нам/ цари́цу благочести́вую, хрiстолюби́вую,// с Боговенчáнною óтраслiю.
И ны́не и прúсно и во вéки векóв. Амúнь.
Богорóдичен: Селéнiе Твоé свящéнное/ дости́гше вéрнiи, Пречи́стая,// светови́дною благодáтiю ны́не озари́тися, мóлимся.
Катавáсiя Трióди (глас 4): Веселúтся о Тебè Цéрковь Твоя́, Хрїстè, зовýщи:/ Ты моя́ крéпость, Гóсподи,// и прибéжище, и утверждéнiе.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Седáлен Трióди, глaс 1: Божéственный Твой зрак, во óбразе образýюще, Хрiстé,/ я́сно вопiéм Рождествò,/ чудесà неизглагóланная, вóльное распя́тiе./ Отонýдуже бéсове отгóнятся стрáхом,/ и злослáвнiи в посуплéнiи рыдáют,// я́ко сих сопричáстницы.
Слáва Ѻтцý и Сы́ну и Святóму Дýху.
Зрáками прорóков, апóстолов ви́дами,/ мýчеников свящéнных, и святы́х всех iкóнами,/ и изображéньми свящéнно красýется,/ Женихà же мы́сленнаго и Невéсты украшáется ýмными красовáньми,// мáти вы́шнiй Сióн.
И ны́не и прúсно и во вéки векóв, амúнь.
Богорóдичен Трióди, глас 1: Любóвiю, Чи́стая, Твою́ святýю iкóну почитáющым,/ и Бóжiю Тя и́стинную Мáтерь соглáсно возвещáющым,/ и вéрно покланя́ющымся Ти,/ храни́тельница яви́лася есѝ, и держáвное предстáтельство,/ отвращáющи вся́кое лю́тое далéче сих,// я́ко вся могýщая.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорлúвыма Аввакýм/ усмотрúв очúма,/ из Тебè изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
На 12.Хор: Гóсподи, услы́шах слух Твой и убоя́хся;/ Гóсподи, разумéх делà Твоя́ и ужасóхся.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознестѝ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Внегдà смутúтися душù моéй во гнéве,/ мúлость Твою́ помянéши.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебè прозябè,/ но животà присносýщнаго наслаждéнiе,// во Спасéнiе нас пою́щих Тя.
Глас 1
На 10: Бог от ю́га прiúдет,/ и Святы́й из горы̀ приосенéнныя чáщи.
Чтец: Кто Сей красéн из Едóма,/ и Сегò очервлéнiе ри́зное, от виногрáда восóрска,/ красéн я́ко Бог,/ я́ко человéк же, крóвiю плóти ри́зу очервлéну нося́;/ Емýже поéм вéрнiи:// слáва си́ле Твоéй, Гóсподи.
Хор: Покры̀ Небесà добродéтель Егò,/ и хвалы̀ Егò испóлнь земля́.
Чтец: Хрiстóс бýдущих благ я́влься Архiерéй,/ грех наш разори́л есть:/ и показáв стрáнен путь Своéю крóвiю,/ в лýчшую и совершéннейшую вни́де ски́нiю,// Предтéча наш во святáя.
Глас 1
На 8.Хор: Занè смоквь не плодопринесéт,/ и не бýдет рóда в лозáх.
Чтец: Слы́ши чудéс нéбо, и внушáй землè,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Солжéт дéло мáслинное,/ и поля́ не сотворя́т я́ди.
Чтец: Поéм вели́кое и стрáшное Твоè тáинство,/ премéрных бо утаи́вся чиноначáлiй,/ на Тя И҆́же сый сни́де я́ко дождь на рунò, Всепéтая,// на Спасéнiе нас пою́щих Тя.
Глас 4
На 6: Оскудéша óвцы от пúщи,/ и не бýдет волóв при я́слех.
Аз же о Гóсподе возрáдуюся,/ возвеселю́ся о Бóзе, Спáсе моéм.
Чтец: Наи́тiем Божéственным Утéшителя, Твой храм освяти́,/ и пришéствiем Сегò ерети́ческую прéлесть отжени́,// Слóве Бóжiй многоми́лостиве. (двáжды)
На 4: Госпóдь Бог мой сúла моя́/ и учинúт нóзе моù на совершéнiе.
Чтец: Нýжднейшаго избáвивый злочéстiя Твоя́ лю́ди,/ покажи́ благочéстiя рéвностiю разжжéны,/ и вéрою взывáющiя:// слáва си́ле Твоéй, Гóсподи.
Хор: И на высóкая возвóдит мя́,/ победúти ми в пéсни Егò.
Чтец: Священнообрáзными изображéньми,/ образóв Хрiстóвых зря́ще и Богорóдицы,/ сiя́ющая Божéственная селéнiя,// священнолéпно рáдуемся.
Слáва Отцý и Сы́ну и Святóму Дýху.
Тропáрь: Цари́ца по обоемý укрáшена,/ и́стиннаго возжелéвши Хрiстóва Цáрства,/ Сегó написà óбраз пречи́стый,// и святы́х изображéнiя.
И ны́не и прúсно и во вéки векóв, амúнь.
Богорóдичен: Воплощéнна роди́вши Божéственнаго Слóва,/ Боголéпное освящéнiе Благодáтная, Сегò показáла еси́,// тéмже Твой храм светови́дный обновля́ем.
Катавáсiя Трióди (глас 4): Вознесéна Тя вúдевши Цéрковь на Крестè,/ Сóлнце Прáведное,/ ста в чúне своéм,/ достóйно взывáющи:// слáва сúле Твоéй, Гóсподи.
ПЕСНЬ 5
Iрмóс: Просветúвый сiя́нiем пришéствiя Твоегò, Хрїстè,/ и осветúвый Крестóм Твоúм/ мíра концы̀,/ сердцà просветù/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
На 12.Хор: От нóщи ýтренюет дух мой к Тебè, Бóже,/ занè свет повелéнiя Твоя́ на землù.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л есѝ, Хрїстè:// нáга, обнищáвша показáвый Божéственным востáнiем Твои́м.
Хор: Прáвде научúтеся, живýщiи на землù.
Богорóдичен: Прошéнiя вéрно прося́щих, Всепéтая, не прéзри:/ но прiимѝ, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебè бо Предстáтельницу стяжáхом.
Глас 1
На 10: Да вóзмется нечестúвый, да не вúдит слáвы Госпóдни./ Гóсподи, высокà Твоя́ мы́шца, и не вéдеша, разумéвше же постыдя́тся.
Чтец: О богáтство, и глубинò премýдрости Бóжiя!/ Премýдрыя объéмляй Госпóдь,/ от сих ковáрства избáвил есть нас:/ пострадáв бо вóлею нéмощiю плотскóю,/ Своéю крéпостiю, животворя́й мéртвыя воскреси́л есть.
Хор: Зáвисть прiúмет лю́ди ненакáзанныя,/ и ны́не огнь супостáты поя́ст.
Чтец: Бог сый соединя́ется плóти нас рáди:/ и распинáется, и умирáет: погребáется, и пáки воскресáет,/ и восхóдит свéтло с плóтiю Своéю Хрiстóс ко Отцý:// с нéюже прiи́дет, и спасéт благочéстно Томý служáщiя.
Глас 1
На 8.Хор: Приложù им зла, Гóсподи,/ приложù зла слáвным землù.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Гóсподи, в скóрби помянýхом Тя,/ в скóрби мáле наказáнiе Твоè нам.
Чтец: Да дви́жатся вси язы́цы человéчестiи и мы́сли,/ к похвалè человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесà.
Глас 4
На 6.Хор: И я́ко боля́щая приближáется родúти, и в болéзни своéй вопiя́ше, тáко бы́хом Возлю́бленному Твоемý.
Не падéм, но падýт живýщiи на землù.
Чтец: Положи́, Гóсподи, Твоéй Цéркви утверждéнiе,/ непреклóнней пребы́ти в век вéка// от смятéнiй ересéй. (двáжды)
На 4.Хор: Воскрéснут мéртвiи, и востáнут, úже во гробéх,/ и возвеселя́тся, úже на землù.
Чтец: Во всю зéмлю свéтлость возсiя́ свы́ше,/ дáннаго вéрным весéлiя,// и Божéственнаго заступлéнiя.
Хор: Росà бо, я́же от Тебè, исцелéнiе им есть,/ земля́ же нечестúвых падéт.
Чтец: Еди́не Благíй, и истóчниче блáгости,/ Ты возвы́си правослáвных рог,// чтýщих óбраз Твой.
Слáва Отцý и Сы́ну и Святóму Дýху.
Тропáрь: Свет незаходи́мый нам благочéстiя возсiя́,/ велéнiем Богодухновéнным вéрных пáстырей,// и мáнiем Богомýдрым.
И ны́не и прúсно и во вéки векóв, амúнь.
Богорóдичен: Обнови́ нам дрéвнее благолéпiе,/ Пречи́стая Богомáти,/ и дом Твой сей освяти́// Твоéю благодáтiю.
Катавáсiя Трióди (глас 4): Ты, Гóсподи мой,/ Свет в мiр пришéл есù,/ Свет Святы́й, обращáяй из мрáчна невéденiя// вéрою воспевáющiя Тя.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вменúхомся,/ я́ко óвцы заколéнiя,/ спасù лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся есѝ, Хрїстè:// Ты бо крéпость немощствýющих и исправлéнiе.
На 12.Хор: Возопúх в скóрби моéй ко Гóсподу Бóгу моемý,/ и услы́ша мя́.
Чтец: Возвéл ны есѝ из áда, Гóсподи,/ ки́та уби́в всея́дца, Всеси́льне,/ Твоéю держáвою низложи́в тогò си́лу:// Ты бо Живóт, и Свет есѝ, и Воскресéнiе.
Хор: Отвéргл мя́ есù во глубины́ сéрдца морскáго,/ и рéки обыдóша мя́.
Богорóдичен: Веселя́тся о Тебè, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествà, и по Рождествè есѝ.
Глас 1
На 10: Вся высоты̀ Твоя́ и вóлны Твоя́ на мне преидóша.
Чтец: Ум сый безстрáстен и невещéствен,/ примешáется Хрiстóс Бог человéческому умý,/ ходáтайствующему Божéственным естествóм, плóти же дебельствóм,/ и всемý мне непрелóжен весьмà соедини́ся:// да Спасéнiе всемý мне пáдшему подáст распинáемь.
Хор: Едà приложý призрéти ми ко хрáму святóму Твоемý?
Чтец: Пáдает прельсти́вся Адáм, и запя́выйся сокрушáется,/ надéждою обóлган сый дрéвле обожéнiя:/ но востаéт соединéнiем Слóва обожáемь,/ и стрáстiю безстрáстiе прiéмлет,/ на престóле я́ко Сын слáвится,// седя́й со Отцéм же и Дýхом.
Глас 1
На 8.Хор: Возлiя́ся водà до душù моея́,/ бéздна обы́де мя́ послéдняя.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествà, и по Рождествè есѝ.
Хор: Понрè главà моя́ в разсéли гор,/ снидóх в зéмлю, ея́же вереù ея́ заклéпи вéчнiи.
Чтец: Воплоти́ся прéжде сый Безплóтен, Слóво из Тебè, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 4
На 6: И да взы́дет из истлéнiя живóт мой к Тебè, Гóсподи, Бóже мой.
И да прiúдет к Тебè молúтва моя́, ко хрáму святóму Твоемý.
Чтец: Пи́шется и почитáется вéрно/ покланя́емый óбраз Влады́ки,/ и прiéмлет пáки Цéрковь дерзновéнiе,// благочéстно Спáса прославля́ющи. (двáжды)
На 4: Храня́щiи сýетная и лóжная, мúлость свою́ остáвиша.
Елúка обещáх, воздáм Тебè во спасéнiе моè, Гóсподеви.
Чтец: Обнажáется сéтованiя, и тьмы ересéй Хрiстóва Цéрковь,/ и нóсит ри́зу весéлiя,// и Божéственною и светонóсною покрывáется благодáтiю. (двáжды)
Слáва Ѻтцý и Сы́ну и Святóму Дýху.
Тропáрь: Благослáвiя дрéвняго осiя́нiя получи́ правослáвных собóр,/ Феодóры мановéнiем цари́цы,// и ея́ сы́на благочести́ваго Мiхаи́ла самодéржца.
И ны́не и прúсно и во вéки векóв, амúнь.
Богорóдичен: Дрéвле свидéнiя повелéвый бы́ти ски́нiи,/ я́ко в ски́нiи словéсней, в Тебè живéт Еди́н Препрослáвленный,// прославля́яй храм Твой, Дéво, чудесы̀.
Катавáсiя Трióди (глас 4): Пожрý Ти со глáсом хвалéнiя, Гóсподи,/ Цéрковь вопiéт Ти,/ от бесóвскiя крóве очúщшися/ рáди мúлости от ребр Твоúх// истéкшею Крóвiю.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Трióди, глас 2: Неопи́санное Слóво Óтчее,/ из Тебè, Богорóдице, описáся воплощáемь,/ и осквéрншiйся óбраз в дрéвнее вообрази́в,/ Божéственною добрóтою смесѝ,/ но исповéдающе спасéнiе,// дéлом и слóвом, сiè вообрáжаем.
Íкос: Сiè смотрéнiя тáинство,/ дрéвле прорóцы Богови́дно вдохновéни бы́вше,/ нас рáди в концы̀ векóв дости́гших предвозвести́ша,/ получи́вше сегò сiя́нiя./ Рáзум ýбо Божéственный от негò взéмше,/ Еди́наго Гóспода Бóга знáем,/ в трiéх Ипостáсех покланя́емаго,/ и Томý еди́ному служáще,/ еди́ну вéру, и еди́но крещéнiе имýще,/ во Хрiстà облекóхомся,/ но исповéдающе спасéнiе, дéлом и слóвом,// сiè воображáем.
ПЕСНЬ 7
Iрмóс: Тебè ýмную, Богорóдице, пещь/ разсмотря́ем, вéрнiи,/ я́коже бо óтроки спасè три Превозносúмый,/ мiр обновù,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестè бо ви́сит Прáведный,// Хвáльный отцéв Бог, и препрослáвлен.
На 12.Хор: Благословéн есù, Гóсподи, Бóже отéц нáших,/ и хвáльно и прослáвлено И́мя Твоè во вéки.
Чтец: Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л есѝ,/ и держáвною рукóю совоскреси́л есѝ,// хвáльный отцéв Бог, и препрослáвлен.
Хор: И вся делà Твоя́ úстинна, и прáви путiè Твоù.
Богорóдичен: Рáдуйся, истóчниче присноживы́я воды̀./ Рáдуйся, раю́ пи́щный./ Рáдуйся, стенò вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Продолжéнiе здесь