Неделя первая Великого поста ТОРЖЕСТВО ПРАВОСЛАВИЯ. ВСЕНОЩНОЕ БДЕНИЕ. УТРЕНЯ (окончание) ЧАС ПЕРВЫЙ
24 мáрта 2024 гóда. Недéля пéрвая Велúкaго постà. Торжествò Правослáвiя. Глас 1. Воскрéсная прáздничная слýжба для домáшнего (келéйнаго) совершéнiя. Вся слýжба прáздника по Октóиху и Трióди. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 1
На 10: И вси судù Твоù úстинни,/ и судьбы̀ úстинны сотворúл есù.
Чтец: Дрéвле ýбо проклятá бысть земля́/ Áвелевою очервлени́вшися крóвiю, братоубíйственною рукóю:/ боготóчною же Твоéю крóвiю благослови́ся окроплéна,/ и взыгрáющи вопiéт:// отцéв Бóже, благословéн есѝ.
Хор: И на град святы́й отéц нáших Iерусалúм.
Чтец: Да рыдáют iудéйстiи богопроти́внiи лю́дiе,/ дéрзости убiéнiя Хрiстóва:/ язы́цы же да веселя́тся,/ и рукáми да восплéщут, и вопiю́т:// отцéв Бóже, благословéн есѝ.
Глас 1
На 8.Хор: Благословéн есù, Гóсподи Бóже отéц нáших,/ и препéтый и превозносúмый во вéки.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на землѝ яви́ся,/ и с человéки поживè, я́ко благоволѝ,// Хвáльный отцéв Бог и Препрослáвлен.
Хор: И благословéно И́мя слáвы Твоея́ святóе,/ препéтое и превозносúмое во вéки.
Чтец: Рáдуйся, Чи́стая, из Тебè прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 4
На 6.Хор: Благословéн есù в хрáме святы́я слáвы Твоея́,/ препéтый и превозносúмый во вéки.
Благословéн есù вúдяй бéздны, седя́й на Херувíмех,/ препéтый и превозносúмый во вéки.
Чтец: Да сликовствýет церкóвней свéтлости/ любóвiю Божéственною áнгельское вóинство,/ Богомýдренно воспевáющее:// благословéн есѝ в хрáме слáвы Твоея́, Гóсподи. (двáжды)
На 4: Благословéн есù на престóле слáвы Цáрствiя Твоегò,/ препéтый и превозносúмый во вéки.
Благословéн есù на твéрди Небéсней,/ препéтый и превозносúмый во вéки.
Чтец: Цéрковь перворождéнных, и торжествò рáдуется,/ зря́ще ны́не божéственныя лю́ди, единомýдренно воспевáющiя:// благословéн есѝ в хрáме слáвы Твоея́, Гóсподи. (двáжды)
Слáва Ѻтцý и Сы́ну и Святóму Дýху.
Тропáрь: Избáвлени прéжде мрáчныя éреси,/ мáнiем Феодóры достолéпныя цари́цы, воспевáем:// благословéн есѝ в хрáме слáвы Твоея́, Гóсподи.
И ны́не и прúсно и во вéки векóв, амúнь.
Богорóдичен: Пáче вы́шних ликостоя́нiй, вознеслáся есѝ Всечи́стая,/ еди́на бы́вши Мáти Вседéтеля./ Рáдующеся ýбо взывáем:// благословéнна Ты есѝ в женáх, всенепорóчная Влады́чице.
Катавáсiя Трióди (глас 4): В пещù Авраáмстiи óтроцы персúдстей,/ любóвiю благочéстiя пáче,/ нéжели плáменем, опаля́еми, взывáху:// благословéн есù в хрáме слáвы Твоея́, Гóсподи.
ПЕСНЬ 8
Iрмóс: В пещù óтроцы Iзрáилевы,/ я́коже в горнúле,/ добрóтою благочéстiя чистéе злáта блещáхуся, глагóлюще:/ благословúте, вся делà Госпóдня, Гóспода,// пóйте и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: И҆́же вóлею вся творя́й, и претворя́яй,/ обращáяй сень смéртную в вéчную жизнь,/ стрáстiю Твоéю, Слóве Бóжiй,/ Тебè непрестáнно вся делà Госпóдня,// Гóспода пои́м, и превознóсим во вся вéки.
На 12.Хор: Благословúте, вся делà Госпóдня, Гóспода,/ пóйте и превозносúте Егò во вéки.
Чтец: Ты разори́л есѝ сокрушéнiе, Хрїстè, и окая́нство,/ во вратéх и тверды́нях áдовых,/ воскрéс из грóба триднéвен./ Тебè непрестáнно вся делà, я́ко Гóспода, пою́т,// и превознóсят во вся вéки.
Хор: Благословúте, Áнгели Госпóдни, Небесà Госпóдня, Гóспода,/ пóйте и превозносúте Егò во вéки.
Богорóдичен: Я́же без сéмене и преестéственне от облистáнiя Божéственнаго/ Рóждшую би́сера многоцéннаго Хрїстà, воспои́м глагóлюще:/ благослови́те вся делà Госпóдня, Гóспода,// пóйте и превозноси́те Егò во вся вéки.
Глас 1
На 10: Благословúте, вóды вся, я́же превы́ше Небéс, вся сúлы Госпóдни, Гóспода,/ пóйте и превозносúте Егò во вéки.
Чтец: Прiиди́те, лю́дiе, поклони́мся мéсту,/ на нéмже стоя́сте пречи́стеи нóзе,/ и на дрéве божéственнеи Хрїстóве длáни животворя́щiи прострóстеся,/ на Спасéнiе всех человéков,/ и гроб живóтный обстоя́ще, пои́м:/ да благослови́т тварь вся́кая Гóспода,// и превознóсит во вся вéки.
Хор: Благословúте, сóлнце и мéсяц, звéзды небéсныя, Гóспода,/ пóйте и превозносúте Егò во вéки.
Чтец: Обличи́ся богоубíйц iудéов пребеззакóнное оклеветáнiе:/ Егóже бо лестцà нарекóша, востà, я́ко Си́лен,/ наругáвся безýмным печáтем./ Тéмже рáдующеся, воспои́м:/ да благослови́т тварь вся́кая Гóспода,// и превознóсит во вся вéки.
Глас 1
На 8.Хор: Благословúте, вся птúцы небéсныя, звéрiе и вси скóти, Гóспода,/ пóйте и превозносúте Егò во вéки.
Чтец: Чертóг светови́дный, из негóже всех Влады́ка,/ я́ко Жени́х произы́де Хрїстóс,/ воспои́м вси вопiю́ще:/ вся делà Госпóдня, Гóспода пóйте,// и превозноси́те во вся вéки.
Хор: Благословúте, сы́нове человéчестiи, да благословúт Iзрáиль Гóспода,/ пóйте и превозносúте Егò во вéки.
Чтец: Рáдуйся, Престóле слáвный Бóжiй,/ рáдуйся, вéрных стенó,/ Éюже сýщим во тьме возсiя́ свет Хрїстóс,/ Тебè блажáщим, и вопiю́щим:/ вся делà Госпóдня, Гóспода пóйте,// и превозноси́те во вся вéки.
Глас 4
На 6: Благословúте, свящéнницы Госпóдни, рабù Госпóдни, Гóспода,/ пóйте и превозносúте Егò во вéки.
Благословúте, дýси и дýши прáведных,/ преподóбнiи и смирéннiи сéрдцем, Гóспода,/ пóйте и превозносúте Егò во вéки.
Чтец: Закóны Цéркве отéческiя сохраня́юще, óбразы пи́шем,/ и лобзáим усты̀, и сéрдцем, и хотéнiем/ Хрїстóвы, и Егó святы́х, зовýще:// благослови́те вся делà Госпóдня Гóспода. (двáжды)
На 4.Хор: Благословúте Анáнiя, Азáрiя, Мiсаúл, Гóспода,/ пóйте и превозносúте Егò во вéки.
Благословúте, апóстоли, прорóцы и мýченицы Госпóдни, Гóспода,/ пóйте и превозносúте Егò во вéки.
Чтец: На первообрáзное я́ве óбраза,/ пóчесть и поклонéнiе вознося́ще,/ чтим, Богоглагóливых учéнiем послéдующе,/ и Хрїстý вéрою зовéм:// благослови́те вся делà Госпóдня Гóспода. (двáжды)
Благословúм Отцà, и Сы́на, и Святáго Дýха, Гóспода.
Тропáрь: Ум озари́вши просвещéнiем Божéственнаго Дýха,/ честнáя цари́ца, плоды̀ Богомýдренныя имýщи,/ благолéпiе возлюби́ Цéркве Хрїстóвы, и красотý,// благословя́щи кýпно с вéрными Iисýса Богочеловéка.
И ны́не и прúсно и во вéки векóв, амúнь.
Богорóдичен: Лучáми свéта ýмнаго, освещáемый Божéственный дом Твой,/ осеня́ет ны́не всех óблаком Дýха,/ и освящáет вéрныя соглáсно пою́щiя:// благослови́те вся делá Госпóдня Гóспода.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Трióди (глас 4): Рýце распростéр Данiúл,/ львов зiя́нiя в рóве затчè:/ óгненную же сúлу угасúша,/ добродéтелiю препоя́савшеся,/ благочéстiя рачúтели óтроцы, взывáюще:// благословúте вся делà Госпóдня Гóспода.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Óбраз чúстаго рождествà Твоегò,/ огнепалúмая купинà/ показà неопáльная;/ и ны́не на нас/ напáстей свирéпеющую угасúти, мóлимся, пещь,/ да Тя, Богорóдице,// непрестáнно величáем.
Хор: Слáва, Гóсподи, Святóму Воскресéнiю Твоемý.
Чтец: О кáко, лю́дiе беззакóннiи и непокори́вiи,/ лукáвая совещáвше,/ гóрдаго и нечести́ваго оправди́ша:/ Прáведнаго же на дрéве осуди́ша Гóспода слáвы,// Егóже достóйно величáем!
На 12.Хор: Благословéн Госпóдь, Бог Iзрáилев,/ я́ко посетù и сотворù избавлéнiе лю́дем Своúм.
Чтец: Спáсе Áгнче Непорóчне,/ И҆́же мíра грехѝ взéмый,/ Тебè слáвим воскрéсшаго триднéвно,/ со Отцéм и Божéственным Твои́м Дýхом,/ и Гóспода слáвы:// Егóже богослóвяще, величáем.
Хор: И воздвúже рог спасéнiя нам/ в домý Давíдове, óтрока Своегò.
Богорóдичен: Спасѝ лю́ди Твоя́, Гóсподи,/ и҆́хже стяжáл есѝ честнóю Твоéю крóвiю,/ цéрквам Твои́м подая́ мир, Человеколю́бче,// Богорóдицы моли́твами.
Глас 1
На 10: Я́коже глагóла усты̀ святы́х, сýщих от вéка прорóк Егò,/ спасéнiе от враг нáших/ и из рукù всех, ненавúдящих нас.
Чтец: Прослáвися неизречéнною си́лою Твоéю/ крест Твой, Гóсподи,/ немощнóе бо Твоè пáче си́лы всем яви́ся:/ и҆́мже си́льнiи ýбо низложéни бы́ша на зéмлю,// и ни́щiи к небесѝ возводи́ми бывáют.
Хор: Сотворúти мúлость со отцы̀ нáшими/ и помянýти Завéт Святы́й Свой.
Чтец: Умертви́ся мéрзкая нáша смерть, из мéртвых Воскресéнiем:/ Ты бо яви́вся сýщим во áде Хрїстè,/ живóт даровáл есѝ.// Тéмже Тя, я́ко жизнь и воскресéнiе и свет Ипостáсный пою́ще, величáем.
Глас 1
На 8.Хор: Кля́тву, éюже кля́тся ко Авраáму, отцý нáшему,/ дáти нам без стрáха, из рукù враг нáших избáвльшимся.
Чтец: Из кóрене Давíдова прозяблá есѝ прорóческаго, Дéво, и богоотéческаго:/ но и Давíда я́ко вои́стинну Ты прослáвила есѝ,/ я́ко рóждши прорóчествованнаго Гóспода слáвы:// Егóже достóйно величáем.
Хор: Служúти Емý преподóбiем и прáвдою/ пред Ним вся дни животà нáшего.
Чтец: Всяк похвáльный, Пречи́стая, закóн/ побеждáется вели́чеством слáвы Твоея́./ Но о, Влады́чице, от раб Твои́х недостóйных,/ от любвè Тебè приноси́мое прiимѝ, Богорóдице,// со усéрдiем пéнiе похвáльное.
Глас 4
На 6.Хор: И ты, отрочà, прорóк Вы́шняго наречéшися,/ преды́деши бо пред лицéм Госпóдним, уготóвати путù Егò.
Дáти рáзум спасéнiя лю́дем Егò/ во оставлéнiе грех их/ милосéрдiя рáди мúлости Бóга нáшего.
Чтец: Священнописáньми образóв укрáшеную,/ зря́ще пáки честнýю Цéрковь,/ со благоговéнiем вси притецéм и Бóгу возопiи́м:// Тебè величáем, Трисвяты́й. (двáжды)
На 4: В нúхже посетù нас Востóк с высоты̀,/ явúтися во тьме и сéни смéртней седя́щим.
Хор: Напрáвити нóги нáша на путь мúрен.
Чтец: Честь и слáву стяжáвши Цéрковь,/ Крест Твой и честны́я iкóны, и святы́х изображéнiя,// с весéлiем, Влады́ко, и рáдостiю величáет Тя. (двáжды)
Слáва Ѻтцý и Сы́ну и Святóму Дýху.
Тропáрь: Освети́ Божéственною Твоéю слáвою лю́ди нáши Щéдрый,/ и ополчéньми áнгельскими, и всеорýжествы сiя́ огради́,// язы́ков свирéпство покаря́я им, Влады́ко.
И ны́не и прúсно и во вéки векóв, амúнь.
Богорóдичен: Взя́тся прамáтере Éвы осуждéнiе, Богорóдице,/ я́ко Ты всех Влады́ку несказáнно, Чи́стая, родилá еси́.// Егóже и ны́не подóбiе на iкóнах целýем.
Катавáсiя Трióди (глас 4): Кáмень нерукосéчный/ от несекóмыя горы̀ Тебè, Дéво,/ краеугóльный отсечéся,/ Хрїстóс, совокупúвый разстоя́щаяся естествà.// Тем веселя́щеся Тя, Богорóдице, величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный девя́тый: Заключéнным Влады́ко двéрем, я́ко вшел есѝ,/ Апóстолы испóлнил есѝ Дýха Пресвятáго, ми́рно дýнув,/ и҆́мже вязáти же и решáти грехѝ рекл есѝ:/ и по осмѝ днех Твоя́ рéбра Фомè показáл есѝ, и рýце./ С ни́мже вопiéм:// Госпóдь и Бог Ты есѝ.
Слáва Ѻтцý и Сы́ну и Святóму Дýху.
Светúлен Трióди: Взыгрáйте, восплещи́те, с весéлiем воспóйте:/ коль чýдная и стрáнная Твоя́, Хрїстè, вопiю́ще, делá!/ И кто возмóжет изрещѝ, Спáсе, могýтства Тебè,/ нáше единомы́слiе и соглáсiе// во еди́ну соедини́вшаго цéрковь?
И ны́не и прúсно и во вéки векóв. Амúнь.
Богорóдичен Трióди: Орýжiя ны́не оскудéша враждéбныя éреси,/ и пáмять ея́ исчезè с шýмом:/ храм бо Твой, Всечи́стая, всеблаголéпно зря́ще,/ укрáшенный благодáтьми честны́х iкóн,// рáдости исполня́емся вси.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 1: Поéм Твою́, Хрїстè, спаси́тельную страсть,// и слáвим Твоè Воскресéнiе.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Крест претерпéвый, и смерть упраздни́вый,/ и воскресы́й из мéртвых,/ умирѝ нáшу жизнь, Гóсподи,// я́ко еди́н Всеси́лен.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Áда плени́вый, и человéка воскреси́вый,/ Воскресéнiем Твои́м, Хрiстè,/ сподóби нас чи́стым сéрдцем// Тебè пéти и слáвити.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Егдà пригвозди́лся есѝ на дрéве крéстнем,/ тогдà умертви́ся держáва врáжiя:/ тварь поколебáся стрáхом Твои́м:/ и ад пленéн бысть держáвою Твоéю:/ мéртвыя от гроб воскреси́л есѝ,/ и разбóйнику рай отвéрзл есѝ:// Хрiстè Бóже наш, слáва Тебè.
На 4. Хвалúте Егò в тимпáне и лúце, хвалúте Егò во стрýнах и оргáне.
И҆́ны стiхúры анатóлiевы: Пострадáл есѝ Крестóм, Безстрáстный Божествóм,/ погребéнiе прiя́л есѝ триднéвное,/ да нас свободи́ши от рабóты врáжiя,/ и обезсмéртив оживотвори́ши нас Хрiстè Бóже,// воскресéнiем Твои́м, Человеколю́бче.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúры Трióди, глас 4: В Тебè ны́не рáдуется Цéрковь, Человеколю́бче,/ Женисé и Создáтеле своéм,/ сiю́ вóлею Боголéпною/ от и́дольскiя лéсти избáвльшем,/ и Себé обручи́вшем честнóю крóвiю,/ свéтло прiéмлющи свящéнное возставлéнiе iкóн,// и рáдующися Тя поéт, и слáвит вéрно.
Исповéмся Тебè Гóсподи всем сéрдцем моúм,/ повéм вся чудесà Твоя́.(Пс.9:2)
Стiхúра: Плóти изображéнiе Твоè возставля́юще, Гóсподи,/ любéзно лобызáем,/ вели́кое тáинство смотрéнiя Твоегó изъясня́юще:/ не мнéнiем бо, я́коже глагóлют богобóрнiи дéти Мáнентовы,/ нам яви́лся есѝ, Человеколю́бче,/ но и́стиною и естествóм плóти,// Тобóю возводи́ми к Твоéй любвѝ, и желáнiю.
Возвеселю́ся и возрáдуюся о Тебè,/ пою́ úмени Твоемý, Вы́шнiй.(Пс.9:3)
Стiхúра: День рáдостный, и весéлiя испóлненный яви́ся днесь:/ свéтлость бо догмáт и́стиннейших блистáет,/ и сiя́ет Цéрковь Хрiстóва/ укрáшена возставлéньми iкóн святы́х ны́не,/ и изображéнiй сiя́ньми,// и единомы́слiе бывáет вéрных Богопочтéнное.
Воскреснù Гóсподи Бóже мой, да вознесéтся рукà Твоя́,/ не забýди убóгих Твоúх до концà.(Пс.9:33)
Стiхúра, самоглáсен дне Трióди, глас 6: Моисéй во врéмя воздержáнiя/ закóн прiя́т, и лю́ди привлечè;/ Илiя́ пости́вся небесá заключѝ;/ трiè же óтроцы Авраáмстiи,/ мучи́теля беззакóннующа пощéнiем победи́ша./ И́мже и нас, Спáсе, сподóби/ Воскресéнiе улучи́ти, си́це вопiю́щих:// Святы́й Бóже, Святы́й Крéпкiй, Святы́й Безсмéртный, поми́луй нас.
Слáва Отцý и Сы́ну и Святóму Дýху.
Моисéй во врéмя воздержáнiя/ закóн прiя́т, и лю́ди привлечè;/ Илiя́ пости́вся небесá заключѝ;/ трiè же óтроцы Авраáмстiи,/ мучи́теля беззакóннующа пощéнiем победи́ша./ И́мже и нас, Спáсе, сподóби/ Воскресéнiе улучи́ти, си́це вопiю́щих:// Святы́й Бóже, Святы́й Крéпкiй, Святы́й Безсмéртный, поми́луй нас.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадè нам и вéлiю ми́лость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская девя́тая, глас 5: Я́ко в послéдняя лéта,/ сýщу пóзде от суббóт,/ предстáл есѝ другóм Хрiстé,/ и чудесéм чýдо извествýеши,/ заключéным вхóдом двéрным,/ éже из мéртвых Твоé воскресéнiе./ Но испóлнил есѝ рáдости ученикѝ,/ и Дýха Святáго преподáл есѝ им,/ и власть пóдал есѝ оставлéнiя грехóв/ и Фомы̀ не остáвил есѝ в невéрствiя погружáтися бýри./ Тéмже подáждь и нам рáзум и҆́стинный и оставлéнiе прегрешéнiй,// благоутрóбне Гóсподи.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 1: Кáмени запечáтану от iудéй и вóином стрегýщим Пречи́стое Тéло Твоè, воскрéсл еси триднéвный, Спáсе, дáруяй мíрови жизнь. Сегò рáди си́лы небéсныя вопiя́ху Ти, Жизнодáвче: слáва Воскресéнiю Твоемý, Хрїстè, слáва Цáрствiю Твоемý, слáва смотрéнiю Твоемý, еди́не Человеколю́бче.
Слáва Отцý и Сы́ну и Святóму Дýху.
Тропáрь торжествà Правослáвiя, глас 2: Пречи́стому óбразу Твоемý покланя́емся, Благíй, прося́ще прощéнiя прегрешéнiй нáших, Хрїстè Бóже, вóлею бо благоволи́л еси плóтiю взы́ти на Крест, да избáвиши, я́же создáл есѝ, от рабóты врáжiя. Тем благодáрственно вопiéм Ти:/ рáдости испóлнил есѝ вся, Спáсе наш, пришéдый спастѝ мiр.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшым.
Стопы̀ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Трióди, глас 2: Неопи́санное Слóво Óтчее, из Тебè, Богорóдице, описáся воплощáемь, и осквéрншiйся óбраз в дрéвнее вообрази́в, Божéственною добрóтою смесѝ, но исповéдающе спасéнiе, дéлом и слóвом, сiè вообрáжаем.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýшы нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
И глаголи часы и обéдницу