НЕДЕЛЯ О БЛУДНОМ СЫНЕ, глас 6. ВСЕНОЩНОЕ БДЕНИЕ ВЕЛИКАЯ ВЕЧЕРНЯ. Служба мирским чином
3 мáрта 2024 гóда. Недéля о блýдном сы́не. Глас 6. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Вся слýжба прáздника по Октóиху и Трióди. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстè, Бóже наш, поми́луй нас, ами́нь.
Слáва Тебè, Бóже наш, слáва Тебè.
Царю́ Небéсный, Утéшителю, Дýше И҆́стины, И҆́же вездè сый и вся исполня́яй, Сокрóвище благи́х и жи́зни Подáтелю, прiидѝ и всели́ся в ны, и очи́сти ны от вся́кiя сквéрны, и спасѝ, Блáже, Дýши нáша.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинaтельный
Стiхù избрáннiи: Благословѝ, душè моя́, Гóспода./ Благословéн есѝ, Гóсподи./ Гóсподи, Бóже мой, возвели́чился есѝ зелò./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредè гор прóйдут вóды./ Ди́вна делà Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благословѝ, душè моя, Гóспода. Гóсподи, Бóже мой, возвеличился есѝ зелò. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своè, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегò побéгнут, от глáса грóма Твоегò убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижè обратя́тся покры́ти зéмлю. Посылáяй истóчники в дéбрех, посредè гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды̀ кáменiя дадя́т глас. Напая́яй гóры от превы́спренних Свои́х, от плодà дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винò весели́т сéрдце человéка, умáстити лицè елéем, и хлеб сéрдце человéка укрепи́т. Насы́тятся древà польскáя, кéдри Лiвáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временà, сóлнце познà зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себè. Возсiя́ сóлнце и собрáшася и в лóжах свои́х ля́гут. Изы́дет человéк на дéло своè и на дéланiе своè до вéчера. Яко возвели́чишася делà Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сiè мóре вели́кое и прострáнное, тáмо гáди, и҆́мже несть числà, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебè чáют, дáти пи́щу им во блáго врéмя. Дáвшу Тебè им соберýт, отвéрзшу Тебè рýку вся́ческая испóлнятся блáгости, отврáщшу же Тебè лицè, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегò, и сози́ждутся, и обнови́ши лицè землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животè моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душè моя́, Гóспода. Сóлнце познà зáпад свой. Положи́л еси тму, и бысть нощь. Яко возвели́чишася делà Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Первая кафизма
Читáем кафíсму 1-ю лúбо 1-ю cтатiю(«Блажéн муж» - 1-й антiфóн.)
[Псалом 1]Блажéн муж, и҆́же не и҆́де на совéт нечести́вых и на путѝ грéшных не ста, и на седáлищи губи́телей не сéде, но в закóне Госпóдни вóля eгò, и в закóне Егò поучи́тся день и нощь. И бýдет яко дрéво насаждéнное при исхóдищих вод, éже плод свой даст во врéмя своè, и лист eгò не отпадéт, и вся, ели́ка áще твори́т, успéет. Не тáко нечести́вiи, не тáко, но яко прах, eгóже возметáет ветр от лицà землѝ. Сегò рáди не воскрéснут нечести́вiи на суд, нижè грéшницы в совéт прáведных. Яко весть Госпóдь путь прáведных, и путь нечести́вых поги́бнет.
[Псалом 2]Вскýю шатáшася язы́цы, и лю́дiе поучи́шася тщéтным? Предстáша цáрiе зéмстiи, и кня́зи собрáшася вкýпе на Гóспода и на Хрїстà Егò. Растóргнем ýзы их и отвéржем от нас и҆́го их. Живы́й на Небесéх посмеéтся им, и Госпóдь поругáется им. Тогдà возглагóлет к ним гнéвом свои́м и я́ростiю Своéю смятéт я́. Аз же постáвлен есмь Царь от Негò над Сióном, горóю святóю Егò, возвещáяй повелéнiе Госпóдне. Госпóдь речè ко Мне: Сын Мой еси Ты, Аз днесь роди́х Тя. Просѝ от Менè, и дам Ти язы́ки достоя́нiе Твоè, и одержáнiе Твоè концы́ землѝ. Упасéши я́ жезлóм желéзным, я́ко сосýды скудéльничи сокруши́ши я́. И ны́не, цáрiе, разумéйте, накажи́теся вси судя́щiи землѝ. Рабóтайте Гóсподеви со стрáхом и рáдуйтеся Емý с трéпетом. Прiими́те наказáнiе, да не когдà прогнéвается Госпóдь и поги́бнете от путѝ прáведнаго, егдà возгори́тся вскóре я́рость Егò. Блажéни вси надéющiися Нань.
[Псалом 3]Гóсподи, что ся умнóжиша стужáющiи ми? Мнóзи востаю́т на мя, мнóзи глагóлют душѝ моéй: несть спасéнiя eмý в Бóзе eгò. Ты же, Гóсподи, Застýпник мой есѝ, слáва моя́ и вознося́й главý мою́. Глáсом мои́м ко Гóсподу воззвáх, и услы́ша мя от горы̀ святы́я Своея́. Аз уснýх, и спах, востáх, я́ко Госпóдь застýпит мя. Не убою́ся от тем людéй, óкрест напáдающих на мя. Воскреснѝ, Гóсподи, спасѝ мя, Бóже мой, я́ко Ты порази́л есѝ вся враждýющыя ми всýе: зýбы грéшников сокруши́л есѝ. Госпóдне есть спасéнiе, и на лю́дех Твои́х благословéнiе Твоè.
Лúбо поéм стiхù избрáннiи
БЛАЖЕН МУЖ
Чтец (или хор): Блажéн муж, и҆́же не и҆́де на совéт нечести́вых.
Хор: Аллилýїа, аллилýїа, аллилýїа.
Чтец (или хор): Яко весть Госпóдь путь прáведных, и путь нечести́вых поги́бнет.
Хор: Аллилýїа, аллилýїа, аллилýїа.
Чтец (или хор): Рабóтайте Гóсподеви со стрáхом и рáдуйтеся Емý с трéпетом.
Хор: Аллилýїа, аллилýїа, аллилýїа.
Чтец (или хор): Блажéни вси надéющiися Нань.
Хор: Аллилýїа, аллилýїа, аллилýїа.
Чтец (или хор): Воскреснѝ, Гóсподи, спасѝ мя, Бóже мой.
Хор: Аллилýїа, аллилýїа, аллилýїа.
Чтец (или хор): Госпóдне есть спасéнiе, и на лю́дех Твои́х благословéнiе Твоè.
Хор: Аллилýїа, аллилýїа, аллилýїа.
Чтец: Слáва Ѻтцý и Сы́ну и Святóму Дýху.
Хор: Аллилýїа, аллилýїа, аллилýїа.
Хор: И ны́не и при́сно и во вéки векóв, ами́нь.
Хор: Аллилýїа, аллилýїа, аллилýїа.
Аллилýїа, аллилýїа, аллилýїа, слáва Тебè Бóже. (трúжды)
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 6
Хор: Гóсподи, воззвáх к Тебè, услы́ши мя./ Услы́ши мя, Гóсподи./ Гóсподи, воззвáх к Тебè, услы́ши мя:/ вонмѝ глáсу молéнія моегò,/ внегдà воззвáти ми к Тебè./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моè в словесà лукáвствiя, непщевáти вины̀ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы̀ моея́, я́ко ещè и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебè, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моè, печáль мою́ пред Ним возвещý. Внегдà исчезáти от менè дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менè: поги́бе бéгство от менè, и несть взыскáяй дýшу мою́. Воззвáх к Тебè, Гóсподи, рех: Ты есѝ уповáнiе моè, часть моя́ есѝ на землѝ живы́х. Вонмѝ молéнiю моемý, я́ко смири́хся зелò, избáви мя от гоня́щих мя, я́ко укрепи́шася пáче менè.
На 10 Чтец: Изведù из темнúцы дýшу мою́,// исповéдатися úмени Твоемý.
Стiхúры воскрéсные, глас 6: Побéду имéя, Хрїстè, ю́же на áда,/ на Крест возшéл есѝ:/ да во тьме смéрти седя́щiя воскреси́ши с Собóю,/ И҆́же в мéртвых Свобóдь,/ Источáяй живóт от Своегò свéта,// Всеси́льне Спáсе, поми́луй нас.
Менè ждут прáведницы,// дóндеже воздáси мне.
Стiхúра: Днесь Хрїстóс смерть попрáв,/ я́коже речè, воскрéсе,/ и рáдованiе мíрови даровà,/ да вси взывáюще, песнь тáко рцем:/ Истóчниче жи́зни, Непристýпный Свéте,// Всеси́льне Спáсе, поми́луй нас.
На 8. Стiх: Из глубины̀ воззвáх к Тебè, Гóсподи,// Гóсподи, услы́ши глас мой.
Стiхúра: Тебè, Гóсподи, Сýщаго по всей твáри,/ грéшнiи кáмо бежи́м;/ на Небесѝ Сам живéши,/ во áде попрáл есѝ смерть./ Во глубины̀ морскíя;/ тáмо рукà Твоя́, Влады́ко./ К Тебè прибегáем,/ Тебè припáдающе мóлимся:// Воскресы́й из мéртвых, поми́луй нас.
Да бýдут ýши Твоù// внéмлюще глáсу молéнiя моегò.
И҆́ны стiхúры анатóлiевы: Крестóм Твои́м, Хрїстè, хвáлимся,/ и воскресéнiе Твоè поéм и слáвим:/ Ты бо есѝ Бог наш,// рáзве Тебè инáго не вéмы.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: Вы́ну благословя́ще Гóспода, / поéм воскресéнiе Егò: / Крест бо Претерпéв, // смéртiю смерть погубѝ.
И҆́мене рáди Твоегò потерпéх Тя, Гóсподи, потерпè душà моя́ в слóво Твоè,// уповà душà моя на Гóспода.
Стiхúра: Слáва си́ле Твоéй, Гóсподи, / я́ко упраздни́л есѝ держáву имýщаго смéрти: / обнови́л есѝ нас Крестóм Твои́м, // дáруя нам живóт и нетлéнiе.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúры Трióди, глас 1: В безгрéшную странý и живóтную ввéрихся,/ посéяв грех, серпóм пожáв клáсы лéности,/ и рукоя́тiем связáв дея́нiй мои́х снопы̀,/ я́же и постлáх не на гумнè покая́нiя:/ но молю́ Тя превéчнаго дéлателя нáшего Бóга,/ вéтром Твоегò любоблагоутрóбiя развéй плéву дел мои́х,/ и пшени́цу даждь душѝ моéй оставлéнiе,// в небéсную Твою́ затворя́я мя жи́тницу, и спасѝ мя.
Яко у Гóспода мúлость, и мнóгое у Негò избавлéнiе,// и Той избáвит Iзрáиля от всех беззакóнiй eгò.
Стiхúры: В безгрéшную странý и живóтную ввéрихся,/ посéяв грех, серпóм пожáв клáсы лéности,/ и рукоя́тiем связáв дея́нiй мои́х снопы̀,/ я́же и постлáх не на гумнè покая́нiя:/ но молю́ Тя превéчнаго дéлателя нáшего Бóга,/ вéтром Твоегò любоблагоутрóбiя развéй плéву дел мои́х,/ и пшени́цу даждь душѝ моéй оставлéнiе,// в небéсную Твою́ затворя́я мя жи́тницу, и спасѝ мя.
На 2. Стiх: Хвалúте Гóспода вси язы́цы, похвалúте Егò вси лю́дiе.
Стiхúра: Познáим брáтiе, тáинства си́лу,/ от грехà бо ко отéческому дóму востéкшаго блýднаго сы́на/ преблагíй отéц предустрéт лобзáет,/ и пáки своея́ слáвы познáнiе дáрует:/ и тáинственное вы́шним совершáет весéлiе,/ закалáя тельцà упитáннаго,/ да мы достóйно сожи́тельствуем,/ заклáвшему же человеколю́бному Отцý и слáвному заколéнiю,// Спáсу душ нáших.
Яко утвердúся мúлость Егò на нас,// и и҆́стина Госпóдня пребывáет во век.
Стiхúра: Познáим брáтiе, тáинства си́лу,/ от грехà бо ко отéческому дóму востéкшаго блýднаго сы́на/ преблагíй отéц предустрéт лобзáет,/ и пáки своея́ слáвы познáнiе дáрует:/ и тáинственное вы́шним совершáет весéлiе,/ закалáя тельцà упитáннаго,/ да мы достóйно сожи́тельствуем,/ заклáвшему же человеколю́бному Отцý и слáвному заколéнiю,// Спáсу душ нáших.
Слáва Отцý и Сы́ну и Святóму Дýху.
Стiхúра Трióди, глас 2: О, коли́ких благ окая́нный себè лиши́х!/ О, каковà Цáрствiя отпадóх стрáстный аз!/ Богáтство изнури́в, éже прiя́х зáповедь преступи́х./ Увы̀ мне, стрáстная душè!/ Огню́ вéчному прóчее осýдишися./ Тéмже прéжде концà возопíй Хрїстý Бóгу// я́ко блýднаго прiимѝ мя сы́на, Бóже, и поми́луй мя.
И ны́не и прúсно и во вéки векóв, амúнь.
Догмáтик. Глас 6: Кто Тебè не ублажи́т, Пресвятáя Дéво?/ Кто ли не воспоéт Твоегò Пречи́стаго Рождествà?/ Безлéтно бо от Отцà возсiя́вый Сын Единорóдный,/ Тóйже от Тебè Чи́стыя прóйде,/ неизречéнно воплóщься,/ естествóм Бог сый,/ и естествóм быв Человéк нас рáди,/ не во двою́ лицý разделя́емый,/ но во двою́ естествý/ несли́тно познавáемый./ Тогò молѝ Чи́стая Всеблажéнная,// поми́ловатися душáм нáшим.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцà Небéснаго, Святáго, Блажéннаго, Iисýсе Хрїстè! Пришéдше на зáпад сóлнца, ви́девше свет вечéрнiй, поéм Ѻтцà, Сы́на и Святáго Дýха, Бóга. Достóин есѝ во вся временà пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ВОСКРЕСНЫЙ
Чтец: Прокíмен, глас шесты́й: Госпóдь воцари́ся, в лéпоту облечéся.
Хор: Госпóдь воцарúся,/ в лéпоту облечéся. (Пс.92:1А)
Чтец: Облечéся Госпóдь в си́лу и препоя́сася. (Пс.92:1Б)
Хор: Госпóдь воцарúся,/ в лéпоту облечéся.
Чтец: И҆́бо утвердѝ вселéнную, я́же не подви́жится. (Пс.92:1В)
Хор: Госпóдь воцарúся,/ в лéпоту облечéся.
Чтец: Дóму Твоемý подобáет святы́ня, Гóсподи, в долготý днiй.(Пс.92:2Б)
Хор: Госпóдь воцарúся,/ в лéпоту облечéся.
Чтец: Госпóдь воцари́ся.
Хор: В лéпоту облечéся.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехà сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоè во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебè подобáет хвалà. Тебè подобáет пéнiе,/ Тебè слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Трióди, глас 2: Блýднаго глас приношáю Ти, Гóсподи:/ согреши́х пред очи́ма Твои́ма Благíй,/ расточи́х богáтство Твои́х даровáнiй.// Но прiими́ мя кáющася Спáсе, и спаси́ мя.
Глас 8: Ижди́х блýдно/ Отéческаго имéнiя богáтство, и расточи́в, пуст бых,/ в странý всели́вся лукáвых грáждан,/ и ктомý не терпя́ с ни́ми сожи́тельства,/ обрáщься вопiю́ Ти щéдрому Отцý:/ согреши́х на нéбо и пред Тобóю,/ и несмь достóин нарещи́ся сын Твой./ Сотвори́ мя я́ко еди́наго от наéмник Твои́х Бóже,// и поми́луй мя.
Слáва Ѻтцý и Сы́ну и Святóму Дýху.
Стiхúра Трióди, глас 4: Я́ко блýдный сын прiидóх и аз Щéдре,/ житiе́ все ижди́вый во отшéствiи./ Расточи́х богáтство, éже дал еси́ мне Óтче:// прiими́ мя кáющася Бóже, и поми́луй мя.
И ны́не и прúсно и во вéки векóв, амúнь.
Богорóдичен воскрéсен, глас 4 (по глáсу «Слáвы»): При́зри на молéнiя Твои́х раб, Всенепорóчная,/ утоля́ющи лю́тая на ны востáнiя,/ вся́кiя скóрби нас изменя́ющи./ Тя бо, Еди́ну, твéрдое и извéстное Утверждéнiе и́мамы,/ и Твоé предстáтельство стяжáхом./ Да не постыди́мся, Влады́чице, Тя призывáющiи,/ потщи́ся на умолéнiе, Тебé вéрно вопiю́щих:/ рáдуйся, Влады́чице, всех Пóмоще,// Рáдосте и Покрóве, и Спасéнiе душ нáших.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры воскрéсные, глас 6): Воскресéнiе Твоè, Хрїстè Спáсе,/ Áнгели пою́т на Небесéх,/ и нас на землѝ сподóби,/ чи́стым сéрдцем// Тебè слáвити.
Стiх: Госпóдь воцарúся, в лéпоту облечéся.
И҆́ны по алфавúту, глас 6: Вратà сокруши́в мéдная,/ и вереѝ áдовы сотры́й,/ я́ко Бог всеси́лен,/ род человéческiй пáдшiй воскреси́л есѝ./ Сегò рáди и мы соглáсно вопiéм:// Воскресы́й из мéртвых, Гóсподи, слáва Тебè.
Стiх: И҆́бо утвердù вселéнную,/ я́же не подвúжется.
Тлéнiя нас дрéвняго Хрїстóс испрáвити хотя́,/ на Крестè пригвождáется,/ и во грóбе полагáется./ Егóже мvронóсицы жены́ со слезáми искáху, плáчуща глагóлаху:/ увы̀ нам, Спáсе всех,/ кáко извóлил есѝ во грóбе всели́тися;/ Всели́выйся же хотя́, кáко укрáден был есѝ;/ кáко преложи́лся есѝ;/ кóе же мéсто Твоè Живонóсное сокры̀ Тéло;/ но, Влады́ко, я́ко обещáлся есѝ нам яви́ся,/ и утолѝ от нас рыдáнiе слез./ Плáчущимся же им, Áнгел к ним возопѝ:/ от плáча престáвша Апóстолом рцы́те, я́ко воскрéсе Госпóдь,// мíрови дáруя очищéнiе и вéлiю ми́лость.
Стiх: Дóму Твоемý подобáет святы́ня, Гóсподи,/ в долготý днiй.
Распны́йся я́ко восхотéл есѝ, Хрїстè,/ и смерть погребéнiем Твои́м Плени́вый,/ триднéвен воскрéсл есѝ, я́ко Бог, со слáвою,/ мíрови дáруя безконéчную жизнь,// и вéлiю ми́лость.
Слáва Ѻтцý и Сы́ну и Святóму Дýху.
Стiхúра Трióди, глас 6 (самоглáсна): Отéческаго дáра расточи́в богáтство,/ с безсловéсными скоты̀ пасóхся окая́нный,/ и тех желáя пи́щи, глáдом тáях не насыщáяся,/ но возврати́вся к благоутрóбному Отцý,/ взывáю со слезáми:/ прiимѝ мя я́ко наéмника// припáдающа человеколю́бiю Твоемý и спасѝ мя.
И ны́не и прúсно и во вéки векóв, амúнь.
Богорóдичен воскрéсен, глас 6 (по глáсу «Слáвы»): Творéц и Избáвитель мой Пречи́стая,/ Хрїстóс Госпóдь из Твои́х ложeсн прошéд,/ в мя оболкíйся,/ пéрвыя кля́твы Адáма свободѝ./ Тéмже Ти Всечи́стая,/ я́ко Бóжiи Мáтери же и Дéве,/ вои́стинну вопiéм немóлчно:/ рáдуйся áнгельски, рáдуйся Влады́чице,/ предстáтельство и покрóве,// и спасéнiе душ нáших.
Молитва святаго Симеона Богоприимца
Ны́не отпущáеши рабà Твоегò, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоè,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь, глас 4: Богорóдице Дéво, рáдуйся,/ Благодáтная Марíе, Госпóдь с Тобóю:/ благословéна Ты в женáх/ и благословéн Плод чрéва Твоегò,// яко Спáса родилà есù душ нáших. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалà Егò во устéх мои́х./ О Гóсподе похвáлится душà моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицà вáша не постыдя́тся./ Сей ни́щiй воззвà, и Госпóдь услы́ша и҆̀,/ и от всех скорбéй егò спасè и҆̀./ Ополчи́тся Áнгел Госпóдень óкрест боя́щихся Егò,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егò,/ яко несть лишéнiя боя́щымся Егò./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[В приходской практитке пропускается]/ Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егò в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютà,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негò.
И глаголи ýтреню