Неделя 36 по Пятидесятнице. Перенесение мощей сщмч. Игнатия Богоносца, глас 3. УТРЕНЯ КАНОН
11 февраля́ 2024 гóда. Недéля 36 по Пятидеся́тнице. Перенесéнiе мощéй священномýченика Iгнáтiя Богонóсца. Глас 3. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егò./ Исповéдайтеся Гóсподеви господéй, я́ко в век ми́лость Егò./ Сотвóршему чудесà вéлiя еди́ному, я́ко в век ми́лость Егò./ Сотвóршему небесà рáзумом, я́ко в век ми́лость Егò./ Утверди́вшему зéмлю на водáх, я́ко в век ми́лость Егò./ Сотвóршему свети́ла вéлiя еди́ному, я́ко в век ми́лость Егò./ Сóлнце во óбласть дне, я́ко в век ми́лость Егò./ Лунý и звéзды во óбласть нóщи, я́ко в век ми́лость Егò./ Порази́вшему Еги́пта с пéрвенцы eгò, я́ко в век ми́лость Егò,/ и извéдшему Iзрáиля от среды́ их, я́ко в век ми́лость Егò./ Рукóю крéпкою и мы́шцею высóкою, я́ко в век ми́лость Егò./ Раздéльшему Чермнóе мóре в разделéнiя, я́ко в век ми́лость Егò./ И провéдшему Iзрáиля посредè eгò, я́ко в век ми́лость Егò./ И истря́сшему фараóна и си́лу eгò в мóре Чермнóе, я́ко в век ми́лость Егò./ Провéдшему лю́ди Своя́ в пусты́ни, я́ко в век ми́лость Егò./ Порази́вшему царѝ вéлiя, я́ко в век ми́лость Егò,/ и уби́вшему царѝ крéпкiя, я́ко в век ми́лость Егò:/ Сиóна, царя́ Аморрéйска, я́ко в век ми́лость Егò,/ и Óга, царя́ Васáнска, я́ко в век ми́лость Егò./ И дáвшему зéмлю их достоя́нiе, я́ко в век ми́лость Егò./ Достоя́нiе Iзрáилю, рабý Своемý, я́ко в век ми́лость Егò./ Я́ко во смирéнiи нáшем помянý ны Госпóдь, я́ко в век ми́лость Егò./ И избáвил ны есть от врагóв нáших, я́ко в век ми́лость Егò./ Дая́й пи́щу вся́кой плóти, я́ко в век ми́лость Егò.
Исповéдайтеся Бóгу Небéсному, я́ко в век ми́лость Егò.
Аллилýїа (трúжды)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстà к ним Áнгел и речè:/ рыдáнiя врéмя престà, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены̀ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егò Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят есѝ, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехà, Дéво, Адáма избáвила есѝ,/ рáдость же Éве/ в печáли мéсто подалà есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 3: Удивля́я видéнiем,/ орошáя глагóланiи,/ блистáяйся Áнгел миронóсицам глагóлаше:/ что живáго и́щете во грóбе;/ востá истощи́вый грóбы./ Тли Премени́теля разумéйте Непремéннаго./ Рцы́те Бóгови: коль стрáшна делá Твоя́,// я́ко род спасл есѝ человéческiй!
СТЕПЕННА, ГЛАС 3
1 АНТИФОН
Плен Сióнь Ты изъя́л есù от Вавилóна:// и менè от страстéй к животý привлецы̀, Слóве. (Двáжды)
В юг сéющiи слезáми Божéственными,// жнут клáсы рáдостiю присноживóтiя. (Двáжды)
Слáва Ѻтцý и Сы́ну и Святóму Дýху.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
И ны́не и прúсно и во вéки векóв. Амúнь.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
2 АНТИФОН
Аще не Госпóдь созúждет дом добродéтелей, всýе труждáемся:// дýшу же покрывáющу, никтóже наш разорúт град. (Дважды)
Плодà чрéвна Дýхом сынотворéное// Тебè, Хрїстý, я́коже и Отцý, святíи всегдà суть. (Двáжды)
Слáва Ѻтцý и Сы́ну и Святóму Дýху.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
И ны́не и прúсно и во вéки векóв. Амúнь.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
3 АНТИФОН
Боя́щiися Гóспода блажéни, в путù ходя́ще зáповедей:// снедя́т бо живóтное всеплóдiе. (Двáжды)
Ѻ́крест трапéзы Твоея́ возвесели́ся,// зря Твоя́, Пастыреначáльниче, исчáдiя, нося́ща вéтви благодéланiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
И ны́не и прúсно и во вéки векóв. Амúнь.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
ПРОКИМЕН
Чтец: Прокíмен, глас трéтiй, псалóм Давíдов. Рцы́те во язы́цех, я́ко Госпóдь воцари́ся, и҆́бо испрáви вселéнную, я́же не подви́жится. (Пс.95:10А)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Воспóйте Гóсподеви песнь нóву, воспóйте Гóсподеви вся земля́. (Пс.95:1)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Рцы́те во язы́цех, я́ко Госпóдь воцари́ся,
Хор: И҆́бо испрáви вселéнную, я́же не подвúжится.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егò, хвали́те Егò во утвержéнiи си́лы Егò.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.71): Во врéмя óно воскрéс Iисýс заýтра, в пéрвую суббóту, яви́ся прéжде Марíи Магдали́ни, из нея́же изгнá седмь бесóв. Онá же шéдши возвестѝ с Ним бы́вшим, плáчущимся и рыдáющим. И онѝ слы́шавше, яко жив есть, и ви́ден бысть от нея́, не я́ша вéры. По сих же двемá от них грядýщема яви́ся инéм óбразом, идýщема на селó. И та шéдша возвести́ста прóчим: и ни тéма вéры я́ша. Последѝ же возлежáщим им единомунáдесяте яви́ся, и поносѝ невéрствiю их и жестосéрдiю, яко ви́девшим Егó востáвша не я́ша вéры. И речè им: шéдше в мiр весь, проповéдите Евáнгелiе всей твáри. И҆́же вéру имéт и крести́тся, спасéн бýдет, а и҆́же не имéт вéры, осуждéн бýдет. Знáменiя же вéровавшим сiя́ послéдуют: и҆́менем Мои́м бéсы ижденýт; язы́ки возглагóлют нóвы; змiя́ возмýт; áще и что смéртно испiю́т, не вреди́т их; на недýжныя рýки возложáт, и здрáви бýдут. Госпóдь же ýбо, по глагóланiи Егó к ним, вознесéся на нéбо, и сéде одеснýю Бóга. Онѝ же изшéдше проповéдаша всю́ду, Гóсподу поспéшствующу и слóво утвержáющу послéдствующими знáменьми. Ами́нь.
[Синодальный перевод]В то время воскреснув рано в первый день недели, Иисус явился сперва Марии Магдалине, из которой изгнал семь бесов. Она пошла и возвестила бывшим с Ним, плачущим и рыдающим; но они, услышав, что Он жив и она видела Его,- не поверили. После сего явился в ином образе двум из них на дороге, когда они шли в селение. И те, возвратившись, возвестили прочим; но и им не поверили. Наконец, явился самим одиннадцати, возлежавшим на вечери, и упрекал их за неверие и жестокосердие, что видевшим Его воскресшего не поверили. И сказал им: идите по всему миру и проповедуйте Евангелие всей твари. Кто будет веровать и креститься, спасен будет; а кто не будет веровать, осужден будет. Уверовавших же будут сопровождать сии знамения: именем Моим будут изгонять бесов; будут говорить новыми языками; будут брать змей; и если что́ смертоносное выпьют, не повредит им; возложат руки на больных, и они будут здоровы. И так Господь, после беседования с ними, вознесся на небо и воссел одесную Бога. А они пошли и проповедовали везде, при Господнем содействии и подкреплении слова последующими знамениями. Аминь.(Мк.16:9-20)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоè поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдà благословя́ще Гóспода, поéм Воскресéнiе Егò: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегò, и от грехà моегò очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдà суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелю́ся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицà Твоегò, и Дýха Твоегò Святáго не отымѝ от менè. Воздáждь ми рáдость спасéнiя Твоегò, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегò, возрáдуется язык мой прáвде Твоéй. Гóсподи, устнè мои отвéрзеши, и устà моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдà благоволи́ши жéртву прáвды, возношéнiе и всесожегáемая; тогдà возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 3
(совмещéнный с канóном крестовоскрéсным (глас 3), Богорóдицы (глас 3) и канóном сщмч. Iгнáтiя Богонóсца, глас 4)
ПЕСНЬ 1
Iрмóс: Вóды дрéвле/ мáнiем Божéственным/ во едúно сóнмище совокупúвый/ и разделúвый мóре Iзрáильтеским лю́дем,/ Сей Бог наш/ препрослáвлен есть.// Томý Едúному поúм, я́ко прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же зéмлю осуди́в,/ престýпльшему пóтом изнестѝ плодà тéрнiе,/ от тéрнiя венéц из рукѝ законопрестýпныя,/ Сей Бог наш, плóтски прiéмый,// кля́тву разруши́л есть, я́ко прослáвися.
Хор: Слáва, Гóсподи, Святóму Воскресéнiю Твоемý.
Чтец: Победи́тель и Одолéтель смéрти,/ и҆́же смéрти убоя́вся, яви́ся:/ стрáстную бо плоть одушевлéнную прiéм,/ Сей Бог наш, и брáвся с мучи́телем,// вся совоскресѝ, я́ко прослáвися.
Хор: Пресвятáя Богорóдице, спасù нас.
Богорóдичен: И҆́стинную Богорóдицу вси язы́цы слáвят Тя, без сéмене рóждшую:/ сошéд бо во утрóбу освящéнную Твою́,/ Сей Бог наш, Éже по нам осуществовáся,// Бог же и Человéк из Тебè роди́ся.
Канон крестовоскресный, глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Род человéчь порабощéн мучи́телем грехолю́бным,/ крóвiю Божéственною Хрїстóс искупѝ,// и обоготвори́в обнови́л есть, я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко ýбо смéртен, смéрти хотя́й,/ И́же животý сокрóвищник, Хрїстóс вкусѝ,/ а я́ко безсмéртен сый естествóм,// мéртвыя оживотвори́л есть, я́ко прослáвися.
Канон Богородицы, глас 3
Хор: Пресвятáя Богорóдице, спасù нас.
Чтец: Колéно приклоня́ет вся́ко естествò небéсных, Дéво,/ воплóщшемуся из Тебè,// со земны́ми же достолéпно преиспóдняя, я́ко прослáвися.
Хор: Пресвятáя Богорóдице, спасù нас.
Чтец: О примирéнiй Я́же в Тебè!/ Благи́х бо незави́стно Подáтель,/ я́ко Бог Дýха Божéственнаго подáвый нам,// плоть от Тебè, Отрокови́це, прiя́т, я́ко прослáвися.
Канон сщмч. Игнатия, глас 4
Хор: Священномýчениче Iгнáтiе,/ молù Бóга о нас.
Чтец: Напрáвив к добродéтели житiè моè,/ свéтом озарѝ всели́вшiяся благодáти в тебè, Богонóсе Iгнáтiе,// и страстéй смущéнiе твои́ми моли́твами разорѝ.(Двáжды)
Хор: Священномýчениче Iгнáтiе,/ молù Бóга о нас.
Чтец: Я́коже земля́ рóднейшая, был есѝ,/ стори́чествующи плодонося́й сéмя Хрїстý, Богонóсе Iгнáтiе,// дýши напоя́ющему одождéнiем Дýха.
Хор: Священномýчениче Iгнáтiе,/ молù Бóга о нас.
Чтец: Разумéв прознáтельною си́лою твоея́ благорóдiе душѝ, всех Влады́ка и Бог,/ Богонóсе Iгнáтiе,// сiя́ньми благодáти Богосвéтлыми просветѝ.
Слáва Ѻтцý и Сы́ну и Святóму Дýху.
Тропáрь: Лучáми ýмнаго осiя́емь сóлнца, всемýдре,/ от востóка устреми́лся есѝ свéтло, я́коже чýвственное сóлнце,// мрак зáпадный озаря́я проповéданiем.
И ны́не и прúсно и во вéки векóв. Амúнь.
Богорóдичен: Трóицы Пребожéственныя, Всечи́стая, Еди́наго родилà есѝ,/ из Тебè плóтiю я́вльшагося по нам/ благоволéнiем Роди́теля и содéйством Дýха Всесвятáго,// Богоневéсто.
Катавáсiя Срéтенiя (глас 3): Сýшу глубородúтельную зéмлю/ сóлнце нашéствова иногдà:/ я́ко стенà бо, огустè обапóлы водà/ лю́дем пешомореходя́щим и Богоугóдно пою́щим:// поúм, Гóсподеви, слáвно бо прослáвися.
ПЕСНЬ 3
Iрмóс: И҆́же от не сýщих вся Приведы́й,/ Слóвом созидáемая,/ совершáемая Дýхом,/ Вседержúтелю Вы́шнiй,// в любвù Твоéй утвердù менè.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м постыдéся нечести́вый,/ содéла бо я́му, ю́же ископà, впадè:/ смирéнных же вознесéся, Хрїстè, рог,// во Твоéм воскресéнiи.
Хор: Слáва, Гóсподи, Святóму Воскресéнiю Твоемý.
Чтец: Благочéстiя проповéданiе язы́ком,/ я́ко водà покры̀ моря́, Человеколю́бче:// воскрéс бо от грóба, Трóическiй откры́л есѝ свет.
Хор: Пресвятáя Богорóдице, спасù нас.
Богорóдичен: Преслáвная глагóлана бы́ша о Тебè,/ Грáде Одушевлéнный при́сно Цáрствующаго:// Тобóю бо, Влады́чице, сýщим на землѝ Бог спожи́л есть.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Очищéнiе, Пречи́стый Крéсте, и́дольских яви́лся есѝ Ты нечистóт:// я́ко Iисýс Пребожéственный на Тебè рýце распростéрл есть.
Хор: Слáва, Гóсподи, Крестý Твоемý Честнóму и Воскресéнiю.
Чтец: Да вси вéрнiи,/ живопрiéмный Грóбе, тебè покланя́емся:/ погребéся бо в тебè// и востà Хрiстóс вои́стинну Бог наш.
Глас 3
Хор: Пресвятáя Богорóдице, спасù нас.
Чтец: Жезл из кóрене Iессéова, прорóчески прозя́бши Дéва,/ цвет Тя, Хрїстè, возсiя́ нам:// Свят есѝ, Гóсподи.
Хор: Пресвятáя Богорóдице, спасù нас.
Чтец: Да Божéственному причáстiю земнорóдныя содéлаеши,/ от Дéвы плоть нáшу Ты, обнищáл есѝ, прiéм:// Свят есѝ, Гóсподи.
Глас 4
Хор: Священномýчениче Iгнáтiе,/ молù Бóга о нас.
Чтец: Исцелѝ ум мой, озлóбленный лю́тыми страстьмѝ плотски́ми, Iгнáтiе,// мýчениче Хрiстóв всеприснопáмятне.(Двáжды)
Хор: Священномýчениче Iгнáтiе,/ молù Бóга о нас.
Чтец: Единомýдренна тя Хрїстóс апóстолов дóбре вéдый,// постáви, Божéственным свéтом сiя́юща всем Цéрквам учи́теля.(Двáжды)
Слáва Ѻтцý и Сы́ну и Святóму Дýху.
Тропáрь: Умерщвля́ема тебè рáди Жизнодáвца зря,// потéкл есѝ Тогò рáди смерть любóвiю претерпéти, Iгнáтiе.
И ны́не и прúсно и во вéки векóв. Амúнь.
Богорóдичен: Слóво Óтчее, предочи́стившися, о Чи́стая, Дýхом,// словéснаго естествà на благодея́нiе родилà есѝ.
Катавáсiя Срéтенiя (глас 3): Утверждéнiе на Тя надéющихся,/ утвердù, Гóсподи, Цéрковь,/ ю́же стяжáл есù// честнóю Твоéю Крóвiю.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк сщмч. Iгнáтiя, глас 4: От востóка днесь возсiя́вый/ и тварь всю просвети́вый учéньми,// мýченичеством украси́ся Богонóсный и Божéственный Iгнáтiй.
Íкос: Iеремíю Бог из утрóбы освяти́в,/ и прéжде, éже роди́тися, вéдый, я́ко Провéдец,/ прiя́телище бы́ти тогò Дýха Святáго,/ наполня́ет сегò áбiе от ю́ностна житiя́ и прорóка же сегò и проповéдника/ всем предвозвещáти посылáет святóе на зéмлю Своè пришéствiе:/ рóждся ýбо и Сам Бог от Дéвы, к прóповеди пришéд,/ обрéте от младéнства достóйна Своея́ благодáти ученикà,// Богонóснаго и Божéственнаго Iгнáтiя.
Седáлен сщмч. Iгнáтiя, глас 3: Божéственным Дýхом просвещéн,/ сверéпство мучи́телей дерзновéнiем пáстырским велемýдренно посрами́л есѝ/ и, превéзся прéлести пучи́ну,/ ко пристáнищу Божéственному дости́гл есѝ,// óтче преподóбне, Хрїстà Бóга моли́ даровáти нам вéлiю ми́лость. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 3: Божéственнаго естествà не отлýчся, плоть быв во чрéве Твоéм,/ но Бог, вочеловéчся, пребы́сть,/ и́же по Рождествè Мáтерь Тя Дéву,/ я́ко прéжде Рождествà, сохрани́в Всенепорóчну, Еди́н Госпóдь.// Тогò прилéжно молѝ даровáти нам вéлiю ми́лость.
ПЕСНЬ 4
Iрмóс: Положúл есù к нам твéрдую любóвь, Гóсподи,/ Единорóднаго бо Твоегò Сы́на за ны на смерть дал есù./ Тéмже Ти зовéм, благодаря́ще:// слáва сúле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Я́звы, Хрiстè, и рáны ми́лостивно подъя́л есѝ,/ досáду по лани́тома ударéнiй терпя́, и долготерпели́вне оплевáнiя нося́,/ и҆́миже содéлал есѝ мне Спасéнiе:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Тéлом смéртным, Животè, смéрти причасти́лся есѝ,/ стрáсти рáди ни́щих, и воздыхáнiя убóгих Твои́х,/ и растли́в тлéющаго, Препрослáвленне,// всех совоскреси́л есѝ, я́ко прослáвися.
Хор: Пресвятáя Богорóдице, спасù нас.
Богорóдичен: Помянѝ, Хрїстè, éже стяжáл есѝ стáдо стрáстiю Твоéю:/ Препрослáвленныя Твоея́ Мáтере ми́лостивныя мольбы̀ прiéм,/ и посети́в озлóбленное,// избáви си́лою Твоéю, Гóсподи.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Создáвый по óбразу Твоемý, Человеколю́бче, человéка,/ и умерщвлéна грехóм преступлéнiя рáди,// распéнся на лóбнем, спасл есѝ.
Хор: Слáва, Гóсподи, Крестý Твоемý Честнóму и Воскресéнiю.
Чтец: Мéртвыя ýбо, и́хже пожрè смерть, отдадè,/ разори́ся же и áдово тлетвóрное цáрство,// воскрéсшу Ти из грóба, Гóсподи.
Глас 3
Хор: Пресвятáя Богорóдице, спасù нас.
Чтец: И҆́же постáвивый гóры, Влады́ко, мéрилом Божéственнаго рáзума,/ отсечéн есѝ от Дéвы Кáмень, кромè рук:// си́ле Твоéй слáва, Человеколю́бче.
Хор: Пресвятáя Богорóдице, спасù нас.
Чтец: Недýгующее исцели́л есѝ нáше естествò, Влады́ко,/ скорéйшую из Дéвы сiю́ соедини́в цельбý,// Твоè Пречи́стое, Слóве, Божествò.
Глас 4
Хор: Священномýчениче Iгнáтiе,/ молù Бóга о нас.
Чтец: Богонóсец нарицáемь тезоимéнно, во Хрїстà бо одéяся житiéм,/ вся помазýеши свéтло, мýчеников утверждéнiе,// желáнiем венцы̀ воспрiя́ти.(Двáжды)
Хор: Священномýчениче Iгнáтiе,/ молù Бóга о нас.
Чтец: Вжиля́емь, Iгнáтiе, си́лою на Крестè пригвóждшагося тебè рáди, Богонóсе,// звéри бо извóлил есѝ мíра отлучи́ти тя к твоемý желáемому Рачи́телю.
Хор: Священномýчениче Iгнáтiе,/ молù Бóга о нас.
Чтец: Возжелáв красоты̀ Влады́чни и к Немý рачéнiе неослáбно имéя,/ Сегò страдáнiем усéрдно поревновáл есѝ,// мýчениче Богонóсне Iгнáтiе.
Слáва Ѻтцý и Сы́ну и Святóму Дýху.
Тропáрь: Укрáшен багряни́цею твои́х кровéй, святи́телю,/ и мáстiю свящéнства, таи́нниче, сiя́еши, Хрїстý зовы́й, рáдуяся:// слáва си́ле Твоéй, Гóсподи.
И ны́не и прúсно и во вéки векóв. Амúнь.
Богорóдичен: Из не сýщих вся́ческая Божéственною си́лою содевáя,/ роди́ся из Тебè, Богомáти,// мiр просвещáя свéтлыми лучáми Божествà и Богоразýмiя свéтлостiю.
Катавáсiя Срéтенiя (глас 3): Покры́ла есть небесà добродéтель Твоя́, Хрїстè,/ из кiвóта бо прошéд святы́ни Твоея́ нетлéнныя Мáтере,/ в хрáме слáвы Твоея́ явúлся есù/ я́ко младéнец руконосúмь,// и испóлнишася вся Твоегò хвалéнiя.
ПЕСНЬ 5
Iрмóс: К Тебé ýтреннюю, всех Творцý,/ преимýщему всяк ум мíрови,/ занé свет повелéнiя Твоя́,// в нúхже настáви мя.
Хор: Слáва, Гóсподи, Святóму Воскресéнiю Твоемý.
Чтец: Судiи́ непрáведному,/ еврéйскою зáвистiю прéдан быв, Всеви́дче,/ и всей прáведне судя́й землѝ,// Адáма дрéвняго избáвил есѝ осуждéнiя.
Хор: Слáва, Гóсподи, Святóму Воскресéнiю Твоемý.
Чтец: Твой мир цéрквам Твои́м, Хрїстè,/ непобеди́мою си́лою Крестà Твоегò,// из мéртвых воскресы́й, подáждь, и спасѝ дýши нáша.
Хор: Пресвятáя Богорóдице, спасù нас.
Богорóдичен: Ски́нiя Святáя, и прострáннейши небéс,/ я́ко И҆́же во всей твáри Невмести́маго Слóва Бóжiя прiéмши,// Еди́на яви́лася есѝ, Приснодéво.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Копiéм в ребрò Твоè, о Хрїстè мой, прободéн быв,/ от ребрà человéча создáнную,/ губи́тельства всем человéком бы́вшую ходáтаицу,// кля́твы свободи́л есѝ.
Хор: Слáва, Гóсподи, Крестý Твоемý Честнóму и Воскресéнiю.
Чтец: Рáвен Отцý по Существý сый,/ свящéнный храм Пречи́стаго Твоегò и Всечестнáго телесè,// из мéртвых воскреси́л есѝ, Хрїстè Спáсе наш.
Глас 3
Хор: Пресвятáя Богорóдице, спасù нас.
Чтец: Слóво Бóжiе Сын Твой, Дéво,/ Содéтель Адáма первоздáннаго,/ не создáнiе, áще и плоть одушевлéну// Себè из Тебè создáл есть.
Хор: Пресвятáя Богорóдице, спасù нас.
Чтец: Рáвен Отцý Сын Твой, Дéво,/ Слóво Бóжiе, Ипостáсь совершéнна во двою́ естествý,// Iисýс Госпóдь, Бог совершéн и Человéк.
Глас 4
Хор: Священномýчениче Iгнáтiе,/ молù Бóга о нас.
Чтец: Ны́не ты, лицéм к лицý Хрїстà зря, Iгнáтiе,// зерцáлом вои́стинну разрéшшимся, соедини́лся есѝ твоемý Рачи́телю. (Двáжды)
Хор: Священномýчениче Iгнáтiе,/ молù Бóга о нас.
Чтец: Привлéкл есѝ просвещéнiе от истóчника светодáтельнаго, Iгнáтiе:/ пречи́стыми бо тя Хрїстóс длáньми держáв, освятѝ.(Двáжды)
Слáва Ѻтцý и Сы́ну и Святóму Дýху.
Тропáрь: Ум Дýхом Бóжiим стяжáв просвещéн, Iгнáтiе,// Богопи́санныя посылáеши, я́ко скрижáли, закóны благодáти.
И ны́не и прúсно и во вéки векóв. Амúнь.
Богорóдичен: Свы́ше Тебè глас рáдостно возопѝ Áнгел, Богорóдице,// Влады́ки неизречéнно возвещáя Тебè зачáтiе.
Катавáсiя Срéтенiя (глас 3): Я́ко вúде Исáiа обрáзно/ на Престóле превознесéна Бóга,/ от áнгел слáвы дориносúма,/ о окая́нный, вопiя́ше, аз:/ провúдех бо воплощáема Бóга,// Свéта Невечéрня, и мíром влады́чествующа.
ПЕСНЬ 6
Iрмóс: Бéздна послéдняя грехóв обы́де мя,/ и исчезáет дух мой;/ но простры́й, Влады́ко, высóкую Твою́ мы́шцу,// я́ко Петрà, мя, Упрáвителю, спасù.
Хор: Слáва, Гóсподи, Святóму Воскресéнiю Твоемý.
Чтец: Бéздна ми́лости и щедрóт обы́де мя,/ благоутрóбным сни́тiем Твои́м:/ воплóщься бо, Влады́ко,// и быв в рáбiи зрáце, обожи́л есѝ, с Собóю сопрослáвив.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́т умертви́тель,/ умерщвлéнаго оживлéнно ви́дя:/ Твоегò воскресéнiя сíи суть, Хрїстè, óбразы,// и стрáсти Твоея́ пречи́стыя победи́тельная.
Хор: Пресвятáя Богорóдице, спасù нас.
Богорóдичен: Пречи́стая, я́же Еди́на Создáтелю и человéком, пáче умà исходáтаившая,// Сы́на Твоегò ми́лостива прегрéшшим рабóм Твои́м, и побóрника бы́ти, помоли́ся.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Рáнами Ты искуси́вся, от áда урáненых,/ стрáстiю Крестà совоскреси́л есѝ./ Тéмже Ти зовý:// возведѝ от тли живóт мой, Человеколю́бче.
Хор: Слáва, Гóсподи, Крестý Твоемý Честнóму и Воскресéнiю.
Чтец: Отверзáются Ти Хрїстè стрáхом вратà áдова,/ сосýды же врáжiя восхищáются:/ тéмже Тя жены́ сретóша,// вмéсто печáли рáдость прiи́мша.
Глас 3
Хор: Пресвятáя Богорóдице, спасù нас.
Чтец: Воображáется éже по нам, от Нетлéнныя Дéвы,/ И҆́же óбразом неразлýчный, óбразом быв и вéщiю,// не прелóжся Божествóм Человéк.
Хор: Пресвятáя Богорóдице, спасù нас.
Чтец: Бéздны грехóв, и бýри страстéй, Пречи́стая, избáви мя:/ есѝ бо пристáнище, и бéздна чудéс,// вéрою притекáющим к Тебè.
Глас 4
Хор: Священномýчениче Iгнáтiе,/ молù Бóга о нас.
Чтец: Мýдрости éллинскiя разори́л есѝ догмáты,/ Ипостáсную имéя Бóжiю мýдрость, священнотаи́нниче,// и с шýмом прéлести пáмять погуби́л есѝ. (Двáжды)
Хор: Священномýчениче Iгнáтiе,/ молù Бóга о нас.
Чтец: Не престáй о совершáющих пáмять твою́ моля́ся, всеблажéнне,/ напáстей избáвитися лютéйших и бед,// свящéнник яви́вся Богопрiя́тен.(Двáжды)
Слáва Ѻтцý и Сы́ну и Святóму Дýху.
Тропáрь: Мýжеством и мýдростiю преизя́ществовав, преподóбне,/ прáвды же добрóтою, Богонóсе мýчениче, и целомýдрiя,// и окружéнiем добродéтелей яви́лся есѝ украшáемь.
И ны́не и прúсно и во вéки векóв. Амúнь.
Богорóдичен: Тя еди́ну посредè тéрнiя обрéт,/ я́ко пречи́стый крiн и удóльный цвет, о Богомáти,// Жени́х из утрóбы Твоéй, Слóво, происхóдит.
Катавáсiя Срéтенiя (глас 3): Возопù к Тебè вúдев стáрец очúма спасéнiе,/ éже лю́дем прiúде от Бóга,// Хрїстè, Ты Бог мой.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 3: Воскрéсл есѝ днесь от грóба, Щéдре,/ и нас возвéл есѝ от врат смéртных;/ днесь Адáм ликýет, и рáдуется Éва,/ вкýпе же и прорóцы с патрiáрхи воспевáют непрестáнно// Божéственную держáву влáсти Твоея́.
Íкос: Нéбо и земля́ днесь да ликовствýют,/ и Хрїстà Бóга единомýдренно да воспевáют,/ я́ко ýзники от гробóв воскресѝ./ Срáдуется вся тварь,/ принося́щи достóйныя пéсни Создáтелю всех,/ и Избáвителю нáшему:/ я́ко человéки из áда днесь, я́ко Жизнодáтель, совозвéд,/ на небесà совозвышáет,/ и низлагáет врáжiя возношéнiя,/ и вратà áдова сокрушáет// Божéственною держáвою влáсти Своея́.
ПЕСНЬ 7
Iрмóс: Я́коже дрéвле/ благочестúвыя три óтроки оросúл есù/ в плáмени халдéйстем,/ свéтлым Божествà огнéм/ и нас озарù,/ благословéн есù, взывáющiя,// Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлая катапетáсма, в распя́тiи Содéтеля,/ сокровéнную в Писáнiи явля́ющи вéрным и҆́стину,// благословéн есѝ, зовýщим, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Прободéнным Твои́м рéбром,/ кáплями Боготóчныя Животворя́щiя Крóве, Хрїстè,/ смотри́тельно кáплющiя на зéмлю,/ сýщих от землѝ возсоздáл есѝ,// благословéн есѝ, зовýщих, Бóже отéц нáших.
Хор: Пресвятáя Трóице, Бóже наш, слáва Тебè.
Трóичен: Дýха Благáго со Отцéм прослáвим, и с Сы́ном Единорóдным,/ Еди́но в Трiéх вéрнiи чтýще Начáло, и Еди́но Божествò:// благословéн есѝ, зовýще, Бóже отéц нáших.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Не прóста сóлнце на крестè ви́сяща человéка,/ но Бóга воплощéнна зря помрачáется. Емýже и поéм:// благословéн есѝ, Гóсподи, Бóже отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: Крéпкаго Божествóм прiéм ад страшли́вый, нетлéнiя Подáтеля,/ дýши прáведных вопiю́щiя изблевà:// благословéн есѝ, Гóсподи, Бóже отéц нáших.
Глас 3
Хор: Пресвятáя Богорóдице, спасù нас.
Чтец: И҆́же слáвы Госпóдь, и держáй гóрнiя си́лы,/ И҆́же со Отцéм седя́й, дéвственныма рукáма носи́мь:/ благословéн есѝ, Гóсподи, Бóже отéц нáших.
Хор: Пресвятáя Богорóдице, спасù нас.
Чтец: Я́ра смерть, но сiю́ Тебè бесéдовавшую погуби́л есѝ,/ от Дéвы Богоипостáсная плоть быв:// благословéн есѝ, Гóсподи, Бóже отéц нáших.
Глас 4
Хор: Священномýчениче Iгнáтiе,/ молù Бóга о нас.
Чтец: Свящéнства укрáшен ми́ром, преподóбне, Божéственным/ и мýченическою крóвiю удобрéн,/ во обои́х просiя́л есѝ,// благословéн есѝ в хрáме, зовы́й, слáвы Твоея́, Гóсподи.(Двáжды)
Хор: Священномýчениче Iгнáтiе,/ молù Бóга о нас.
Чтец: Законоположéнiем просвети́в мир весь,/ хлéбом Небéсным напитáл есѝ вéрныя,/ Влады́це твоемý зовýщыя:// благословéн есѝ в хрáме слáвы Твоея́, Гóсподи.
Хор: Священномýчениче Iгнáтiе,/ молù Бóга о нас.
Чтец: Светолýчными заря́ми, всеблажéнне, просвещáемь,/ зарéю светоначáльнаго ли́тiя осiя́вся,/ Небéсное прiя́л есѝ, рáдуяся, наслаждéнiе, Богонóсе,// мýчеников похвалò.
Слáва Ѻтцý и Сы́ну и Святóму Дýху.
Тропáрь: Пшени́ца сый Бóжiя, я́коже рекл есѝ, всеприснопáмятне,/ челюстьмѝ сомлéн был есѝ, мýчениче, зверéй/ и Питáющему вся́ческая Божéственною блáгостiю// чистéйшiй хлеб был есѝ.
И ны́не и прúсно и во вéки векóв. Амúнь.
Богорóдичен: Вы́шняго освящéнное Божéственное селéнiе, рáдуйся,/ Тобóю бо дадéся рáдость, Богорóдице, зовýщым:// благословéна Ты в женáх есѝ, Всенепорóчная Влады́чице.
Катавáсiя Срéтенiя (глас 3): Тебè во огнù оросúвшаго óтроки богослóвившыя,/ и в Дéву Нетлéнну всéльшагося Бóга Слóва поúм,/ благочéстно пою́ще:// благословéн Бог отéц нáших.
ПЕСНЬ 8
Iрмóс: Нестерпúмому огню́ соединúвшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благословúте, вся делà Госпóдня, Гóспода// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлость,/ егдà крест Твой водрузи́ся на лóбнем,/ и тварь преклоня́шеся стрáхом, воспевáющи:/ благослови́те вся делà Госпóдня, Гóспода,// пóйте и превозноси́те Егò во вéки.
Хор: Слáва, Гóсподи, Святóму Воскресéнiю Твоемý.
Чтец: Воскрéсл есѝ Хрїстè из грóба,/ и пáдшаго прельщéнiем, дрéвом испрáвил есѝ Божéственною си́лою, зовýща и глагóлюща:/ благослови́те вся делà Госпóдня, Гóспода,// пóйте и превозноси́те Егò во век.
Хор: Пресвятáя Богорóдице, спасù нас.
Богорóдичен: Храм Бóжiй яви́лася есѝ Вмести́лище одушевлéнное, и Ковчéг:/ Творцà бо человéком, Богороди́тельнице Пречи́стая, примири́ла есѝ,/ и достóйно вся делà поéм Тя,// и превознóсим во вся вéки.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Слóво нестрáстное, безстрáстно ýбо Божествóм,/ стрáждет же плóтiю Бог, Емýже и поéм:/ благослови́те вся делá Госпóдня, Гóспода,// пóйте и превозноси́те Егó во вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Уснýвый ýбо, я́ко смéртен,/ воскрéсл еси́, я́ко Безсмéртен, Спáсе,/ и спасáеши от смéрти пою́щих:/ благослови́те вся делá Госпóдня, Гóспода,// пóйте и превозноси́те Егó во вéки.
Глас 3
Хор: Пресвятáя Богорóдице, спасù нас.
Чтец: Чи́ны ýмныя, я́ко Мáти, превозшлà есѝ,/ и близ Бóга бы́вши:/ благослови́м, Благословéнная Дéво, рождествò Твоè,// и превознóсим во вся вéки.
Хор: Пресвятáя Богорóдице, спасù нас.
Чтец: Добрóту естéственную, краснéйшу/ показáла есѝ, облиставáющую плоть Божествà./ Благослови́м, Благословéнная Дéво, рождествò Твоè,// и превознóсим во вся вéки.
Продолжéнiе здесь