Неделя 36 по Пятидесятнице. Перенесение мощей сщмч. Игнатия Богоносца. УТРЕНЯ (окончание) первый час
11 февраля́ 2024 гóда. Недéля 36 по Пятидеся́тнице. Перенесéнiе мощéй священномýченика Iгнáтiя Богонóсца. Глас 3. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 4
Хор: Священномýчениче Iгнáтiе,/ молù Бóга о нас.
Чтец: Стоя́ на суди́щи, мýдре,/ Трóицу несоздáнную богослóвил есѝ умà чистотóю, свя́те,/ мы́сленною же свéтлостiю не устраши́вся мучи́тельских престóлов суровствà,/ но вопiя́л есѝ:// благослови́те, вся делà Госпóдня, Гóспода.(Двáжды)
Хор: Священномýчениче Iгнáтiе,/ молù Бóга о нас.
Чтец: Упрáвив разýмне твой ум Божéственными догмáты, блажéнне Iгнáтiе,/ злодéмона томи́теля, прéлести предстáтеля,/ мýдрости тóки весьмà потопи́л есѝ, вопiя́:// благослови́те, вся делà Госпóдня, Гóспода.
Хор: Священномýчениче Iгнáтiе,/ молù Бóга о нас.
Чтец: Безмéрным сiя́я свéтом Божествà, мýчениче непобеди́ме,/ безбóжiя непостоя́нную прогнáл есѝ тьму,/ послáнiя светови́дная посылáя пою́щим:// благослови́те, вся делà Госпóдня, Гóспода.
Благословúм Отцà, и Сы́на, и Святáго Дýха, Гóспода.
Тропáрь: Неи́стовства и зiя́нiя зверéй не устраши́лся есѝ, Божéственный Iгнáтiе,/ Высочáйшаго бо си́ла, из Дéвы возсiя́вши,/ всеорýжiем Крестà тя обложѝ, пою́ща:// благослови́те, вся делà Госпóдня, Гóспода.
И ны́не и прúсно и во вéки векóв. Амúнь.
Богорóдичен: Ты Еди́на во всех рóдех, Дéва Пречи́стая,/ Мáти яви́лася есѝ Бóжiя,/ Ты Божествà былà есѝ жили́ще, Всенепорóчная,/ не опали́вшися огнéм Непристýпнаго Свéта./ Тéмже вси Тя благослови́м,// Марíе Богоневéстная.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя Срéтенiя (глас 3): Нестерпúмому огню́ соединúвшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благословúте, вся делà Госпóдня, Гóспода// и превозносúте во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душà Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На кáждый стiх)
Я́ко призрè на смирéнiе рабы̀ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егò, и ми́лость Егò в рóды родóв боя́щимся Егò.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегò, помянýти ми́лости,/ я́коже глагóла ко отцéм нáшим, Авраáму и сéмени егò, дáже до вéка.
ПЕСНЬ 9
Iрмóс: Нóвое чýдо и Боголéпное:/ девúческую бо дверь затворéнную/ я́ве прохóдит Госпóдь,/ наг во вхóде,/ и плотонóсец явúся во исхóде Бог,/ и пребывáет дверь затворéна./ Сiю́ неизречéнно// я́ко Богомáтерь, величáем.
Хор: Слáва, Гóсподи, Святóму Воскресéнiю Твоемý.
Чтец: Стрáшно есть зрéти Тебè, Творцà/ на дрéве воздви́жена, Слóве Бóжiй,/ плóтски же стрáждуща Бóга за рабы̀,/ и во грóбе бездыхáнна лежáща,/ мéртвыя же из áда разреши́вша:// тéмже Тя, Хрїстè, я́ко Всеси́льна, величáем.
Хор: Слáва, Гóсподи, Святóму Воскресéнiю Твоемý.
Чтец: Из тли смéртныя спасл есѝ, Хрїстè, прáотцы,/ положéн быв во грóбе мертв,/ и живóт процвéл есѝ, мéртвыя воскреси́в,/ руководи́в естествò человéческое ко свéту,/ и в Божéственное облéк нетлéнiе.// Тéмже истóчника Тя свéта при́сно живáго величáем.
Хор: Пресвятáя Богорóдице, спасù нас.
Богорóдичен: Храм и Престóл яви́лася есѝ Бóжiй,/ вóньже всели́ся И҆́же в вы́шних сый,/ рождéйся неискусомýжно, Всечи́стая,/ плóти Твоея́ не отвéрз вся́чески вратà./ Тéмже непрестáнными, Чи́стая, моли́твами Твои́ми,// язы́ки вáрварскiя скóро до концà покорѝ.
Глас 3
Хор: Слáва, Гóсподи, Крестý Твоемý Честнóму и Воскресéнiю.
Чтец: Честь человéком от безчéстныя смéрти всем источи́л есѝ:/ ея́же распя́тiем Твои́м, Спáсе, вкуси́в,// существóм смéртным нетлéнiе мне даровáл есѝ, Хрїстè, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Спасл мя есѝ воскрéс из грóба, Хрїстè:/ воскрéсл же есѝ, и Отцý привéл есѝ Твоемý Роди́телю:/ одеснýю же Егò спосади́л есѝ// за благоутрóбiе ми́лости Твоея́, Гóсподи.
Глас 3
Хор: Пресвятáя Богорóдице, спасù нас.
Чтец: Сы́тость Твои́х похвáл, Дéво,/ благочести́вым вéрным отню́д не бывáет:/ желáнiем бо желáнiе при́сно Божéственное, и Духóвное прiéмлюще,// я́ко Мáтерь Бóжiю, величáем.
Хор: Пресвятáя Богорóдице, спасù нас.
Чтец: Положи́л есѝ нам непосты́дную Моли́твенницу,/ Тебè рóждшую, Хрїстè./ Тоя́ мольбáми Ми́лостива подаéши нам Дýха, Подáтеля блáгости,// от Отцà Тобóю происходя́ща.
Глас 4
Хор: Священномýчениче Iгнáтiе,/ молù Бóга о нас.
Чтец: Рачéнiе Божéственнейшее, блажéнне, удержáв душѝ твоéй,/ ми́ра вещéственныя печáли огнéм невещéственным вся попалѝ// и желáнiй крáю венценóсца тя предстáви.(Двáжды)
Хор: Священномýчениче Iгнáтiе,/ молù Бóга о нас.
Чтец: В пристáнище свéтло устреми́лся есѝ тишáйшее, Богонóсе, бýри волнéнiй избéг,/ стремлéнiя сверéпых и словéсных зверéй,// и ны́не наслаждáешися, прiи́м вéчное наслаждéнiе.
Хор: Священномýчениче Iгнáтiе,/ молù Бóга о нас.
Чтец: Испещрéнным украшáемь венцéм, священнотаи́нниче, преизя́ществуеши:/ свящéнства бо в тебè в еди́но сни́деся и свидéтельства слáва,// и обои́ми я́ко причáстник твоемý Влады́це спрослáвился есѝ.
Слáва Ѻтцý и Сы́ну и Святóму Дýху.
Тропáрь: Я́ко священноявлéн сый, дерзновéнiе имéя к твоемý Влады́це и Бóгу,/ совершáющим вéрою пáмять твою́// от напáстей, Iгнáтiе, ны́не избáвитися моли́ся.
И ны́не и прúсно и во вéки векóв. Амúнь.
Богорóдичен: Угасѝ страстéй мои́х плáмень росолýчною Твоéю моли́твою,/ я́же во утрóбе прiéмши огнь Божéственный неопáльно, Всечи́стая:// Тя бо надéжду и́мам спасéнiя моегò, Богоневéсто.
Катавáсiя Срéтенiя (глас 3): В закóне сéни и писáнiй/ óбраз вúдим, вéрнiи:/ всяк мýжескiй пол, ложеснà разверзáя, свят Бóгу./ Тем перворождéнное Слóво,/ Отцà Безначáльна,/ Сы́на Первородя́щася Мáтерiю неискусомýжно,// величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный трéтiй: Я́ко Хрїстóс воскрéсе, никтóже да не вéрует:/ яви́ся бо Марíи, потóм же ви́ден бысть на селó идýщима,/ таи́нником же пáки яви́ся возлежáщим единонáдесятим,/ и́хже крещáти послáв,/ на небесá вознесéся, отню́дуже и сни́де,// утверждáя проповéданiе мнóжествы знáменiй.
Слáва Ѻтцý и Сы́ну и Святóму Дýху.
Светúлен сщмч. Iгнáтiя: И́мать свéтлый прáздник твой Хрiстóва Цéрковь,/ я́ко неотъéмлемое богáтство, твоя́ прiéмши Божéственныя мóщи,// идéже и ми́ро источáют всем, Iгнáтiе Богонóсе.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Возсiя́вшее Сóлнце, я́ко от чертóга жени́х, из грóба днесь,/ и ад плени́в, и смерть упраздни́в,/ Тебè Рóждшiя моли́твами, свет нам низпослѝ:/ свет, просвещáющ сердцà и дýши:/ свет, ходи́ти всех наставля́ющ// на стезѝ повелéнiй Твои́х, и на путь ми́ра.
ХВАЛИТНЫ
Хор, глас 3: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егò в вы́шних.// Тебè подобáет песнь Бóгу.
Хвали́те Егò вси áнгели Егò,/ хвалите Егò вся си́лы Егò.// Тебè подобáет песнь Бóгу.
[В приходской практике пропускается до стихир]Хвали́те Егò, сóлнце и лунà, хвали́те Егò, вся звéзды и свет. Хвали́те Егò Небесà небéс и водà, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положѝ, и не ми́мо и҆́дет. Хвали́те Гóспода от землѝ, змíеве и вся бéздны: огнь, град, снег, гóлоть, дух бýрен, творя́щая слóво Егò, гóры и вси хóлми, древà плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiѝ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогò Еди́наго, исповéданiе Егò на землѝ и на небесѝ. И вознесéт рог людéй Свои́х, песнь всем преподóбным Егò, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егò в цéркви преподóбных. Да возвеселится Iзрáиль о сотвóршем Егò, и сы́нове Сióни возрáдуются о Царè своéм. Да восхвáлят и҆́мя Егò в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечѝ обою́ду острѝ в рукáх их: сотвори́ти отмщéнiе во языцех, обличéнiя в лю́дех, связáти царѝ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егò.
Стiхúры воскрéсные, глас 3: Прiиди́те вси язы́цы,/ уразумéйте стрáшныя тáйны си́лу:/ Хрїстóс бо Спас наш, Éже в начáле Слóво,/ распя́тся нас рáди, и вóлею погребéся,/ и воскрéсе из мéртвых, éже спастѝ вся́ческая:// Томý поклони́мся.
Хвалúте Бóга во святых Егò,/ хвалúте Егò в утвержéнiи сúлы Егò.
Стiхúра: Повéдаша вся чудесà/ стрáжiе Твоѝ, Гóсподи,/ но собóр суеты̀ испóлни мздóю десни́цу их,/ скры́ти мня́ше воскресéнiе Твоé,// éже мiр слáвит: поми́луй нас.
На 6: Хвалúте Егò на сúлах Егò, хвалúте Егò по мнóжеству велúчествiя Егò.
Стiхúра: Рáдости вся испóлнишася/ воскресéнiя искýс прiи́мша:/ Марíя бо Магдали́на ко грóбу прiи́де,/ обрéте Áнгела на кáмени седя́ща,/ ри́зами блистáющася и глагóлюща:/ что и҆́щете живáго с мéртвыми?/ Несть зде, но востà, я́коже речé,// предваря́я вы в Галiлéи.
Хвалúте Егò во глáсе трýбнем, хвалúте Егò во псалтúри и гýслех.
Стiхúра: Во свéте Твоéм, Влады́ко,/ ýзрим свет, Человеколю́бче:/ воскрéсл бо есѝ из мéртвых,/ Спасéнiе рóду человéческому дáруя:/ да Тя вся тварь славослóвит Еди́наго Безгрéшнаго,// поми́луй нас.
На 4. Хвалúте Егò в тимпáне и лúце, хвалúте Егò во стрýнах и оргáне.
И҆́ны стiхúры анатóлiевы: Песнь ýтреннюю миронóсицы жены̀/ со слезáми приношáху Тебè, Гóсподи,/ благоухáнiя бо аромáты имýща,/ грóба Твоегò достигóша,/ пречи́стое тéло Твоè помáзати тщáщася./ Áнгел седя́й на кáмени тем благовести́:/ что и́щете живáго с мéртвыми?/ Смерть бо попрáв воскрéсе я́ко Бог,// подая́ всем вéлiю ми́лость.
Хвалúте Егò в кимвáлех доброглáсных, хвалúте Егò в кимвáлех восклицáнiя. Всякое дыхáнiе да хвáлит Гóспода.
Стiхúра: Блистáяся áнгел на грóбе Твоéм животвóрнем,/ миронóсицам глагóлаше:/ истощи́в грóбы Избáвитель, пленѝ áда,/ и воскрéсе триднéвен,// я́ко Еди́н Бог и Всеси́лен.
Воскреснù Гóсподи Бóже мой, да вознесéтся рукá Твоя́,/ не забýди убóгих Твоúх до концá.(Пс.9:33)
Стiхира: Во грóбе Тя искáше,/ пришéдши во еди́ну от суббóт Марíя Магдали́на,/ не обрéтши же рыдáше с плáчем вопiю́щи:/ увы̀ мне, Спáсе мой!/ Укрáден был есѝ, всех Царю́./ Супрýг же живонóсных áнгел внутрь грóба вопiя́ше:/ что плáчеши о жéно?/ Плáчу, глагóлет, я́ко взя́ша Гóспода моегò от грóба,/ и не вем, где положи́ша Егò./ Сiя́ же обрáщшися вспять,/ я́ко ви́де Тя, áбiе возопѝ:// Госпóдь мой и Бог мой, слáва Тебè.
Исповéмся Тебè Гóсподи всем сéрдцем моúм,/ повéм вся чудесá Твоя́.(Пс.9:2)
Стiхира: Еврéи затвори́ша во грóбе Живóт,/ разбóйник же отвéрзе язы́ком наслаждéнiе,/ зовы́й и глагóля:/ И́же со мнóю менè рáди распны́йся:/ сообéси ми ся на дрéве,/ и яви́ся мне на престóле со Отцéм седя́:/ Той бо есть Хрїстóс Бог наш,// имéяй вéлiю ми́лость.
Слáва Отцý и Сы́ну и Святóму Дýху.
Стiхúра евáнгельская трéтiя, глас 3: Магдали́не Марíи/ Спáсово благовествýющей из мéртвых Воскресéнiе и явлéнiе,/ не вéрующе же ученицы̀, поноси́ми бы́ша о жестосéрдiи:/ но знáменьми воорýжшеся и чудесы̀,/ ко проповéданiю посылáхуся,/ и Ты ýбо, Гóсподи, к начáльному свéту вознéслся есѝ Отцý,/ они́ же проповéдаша всю́ду слóво, чудесы̀ уверя́юще./ Тéмже просвети́вшеся тéми,/ слáвим Твоè же из мéртвых воскресéнiе,// человеколю́бче Гóсподи.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцà, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцà, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехà сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животà, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадè нам и вéлiю ми́лость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегò, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травà мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицà Твоегò. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегò, и от стрáха Твоегò, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы̀ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы̀ Твоя́, и на делà Твоя́, и настáви сы́ны их. И бýди свéтлость Гóспода Бóга нáшего на нас, и делà рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдà прiи́деши ко мне? Прехождáх в незлóбiи сéрдца моегò посредè дóму моегò. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегò, сегò изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегò творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 3: Да веселя́тся небéсная,/ да рáдуются земнáя;/ я́ко сотворѝ держáву мы́шцею Своéю Госпóдь,/ попрà смéртiю смерть,/пéрвенец мéртвых бысть;/ из чрéва áдова избáви нас,// и подадè мíрови вéлiю ми́лость.
Слáва Отцý и Сы́ну и Святóму Дýху.
Тропáрь сщмч. Iгнáтiя, глас 4: И нрáвом причáстник,/ и престóлом намéстник апóстолом быв,/ дея́iе обрéл есѝ, Богодохновéнне,/ в видéнiя восхóд,/ сегò рáди слóво и́стины исправля́я,/ и вéры рáди пострадáл есѝ дáже до крóве,/ священномýчениче Iгнáтiе./ Молѝ Хрїстà Бóга// спасти́ся душáм нáшим.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблà есѝ цвет нетлéнiя. Дéву, я́ко пребылà есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогò молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы̀ человéческiя, и сохраню́ зáповеди Твоя́. Лицè Твоè просветѝ на рабà Твоегò и научѝ мя оправдáнiем Твои́м.
Да испóлнятся устà моя хвалéнiя Твоегò, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегò рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк воскрéсный, глас 3: Воскрéсл есѝ днесь от грóба, Щéдре,/ и нас возвéл есѝ от врат смéртных;/ днесь Адáм ликýет, и рáдуется Éва,/ вкýпе же и прорóцы с патрiáрхи воспевáют непрестáнно// Божéственную держáву влáсти Твоея́.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесà очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицà Твоегò, да в нем ýзрим Свет Непристýпный: и испрáви стопы̀ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
И глаголи часы и обéдницу