Неделя 26 по Пятидесятнице. Предпразднство Введения Богородицы во храм. Прп. Григория. УТРЕНЯ КАНОН
3 декабря́ 2023 гóда. Недéля 26 по Пятидеся́тнице. Предпрáзднство Введéнiя Богорóдицы во храм. Прп. Григóрiя Декаполíта. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(И далее хор продолжает чередовать стiхи 135 псалма и Аллилуиа)
[Псалом 135 Аллилуиа]Исповéдайтеся Бóгу богóв, я́ко в век ми́лость Егó./ Исповéдайтеся Гóсподеви господéй, я́ко в век ми́лость Егó./ Сотвóршему чудесá вéлiя еди́ному, я́ко в век ми́лость Егó./ Сотвóршему небесá рáзумом, я́ко в век ми́лость Егó./ Утверди́вшему зéмлю на водáх, я́ко в век ми́лость Егó./ Сотвóршему свети́ла вéлiя еди́ному, я́ко в век ми́лость Егó./ Сóлнце во óбласть дне, я́ко в век ми́лость Егó./ Лунý и звéзды во óбласть нóщи, я́ко в век ми́лость Егó./ Порази́вшему Еги́пта с пéрвенцы eгó, я́ко в век ми́лость Егó,/ и извéдшему Iзрáиля от среды́ их, я́ко в век ми́лость Егó./ Рукóю крéпкою и мы́шцею высóкою, я́ко в век ми́лость Егó./ Раздéльшему Чермнóе мóре в разделéнiя, я́ко в век ми́лость Егó./ И провéдшему Iзрáиля посредé eгó, я́ко в век ми́лость Егó./ И истря́сшему фараóна и си́лу eгó в мóре Чермнóе, я́ко в век ми́лость Егó./ Провéдшему лю́ди Своя́ в пусты́ни, я́ко в век ми́лость Егó./ Порази́вшему царѝ вéлiя, я́ко в век ми́лость Егó,/ и уби́вшему царѝ крéпкiя, я́ко в век ми́лость Егó:/ Сиóна, царя́ Аморрéйска, я́ко в век ми́лость Егó,/ и Óга, царя́ Васáнска, я́ко в век ми́лость Егó./ И дáвшему зéмлю их достоя́нiе, я́ко в век ми́лость Егó./ Достоя́нiе Iзрáилю, рабý Своемý, я́ко в век ми́лость Егó./ Я́ко во смирéнiи нáшем помянý ны Госпóдь, я́ко в век ми́лость Егó./ И избáвил ны есть от врагóв нáших, я́ко в век ми́лость Егó./ Дая́й пи́щу вся́кой плóти, я́ко в век ми́лость Егó.
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм.(Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речè:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила есѝ,/ рáдость же Éве/ в печáли мéсто подалá есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвестѝ,/ я́ко воскрéсл есѝ, Хрїстè Бóже,// подая́й мíрови вéлiю ми́лость.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебè зовý.(Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромè.(Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есù мя закóнов,// добродéтельми просветù, Бóже, да пою́ Тя.(Двáжды)
Деснóю Твоéю рукóю прiи́м Ты, Слóве,/ сохранѝ мя, соблюдѝ,// да не огнь менé опали́т грехóвный.(Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы̀ Госпóдни,// возвеселúся мой дух, срáдуется сéрдце.(Двáжды)
В домý Давíдове страх вели́к:/ тáмо бо престóлом постáвленным,// сýдятся вся племенá земнáя, и язы́цы.(Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Прокíмен, глас пéрвый, псалóм Давíдов. Ны́не воскреснý, глагóлет Госпóдь, положýся во Спасéнiе, не обиню́ся о нем.(Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Лукѝ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.112): Во врéмя óно, во еди́ну от суббóт, зелó рáно, прiидóша жены̀ на гроб, нося́ще я́же уготóваша аромáты, и другíя с ни́ми. Обретóша же кáмень отвалéн от грóба, и вшéдше, не обретóша телесè Гóспода Iисýса. И бысть не домышля́ющимся им о сем, и се мýжа два стáста в них в ри́зах блещáщихся. Пристрáшным же бы́вшим им, и поклóншим ли́ца на зéмлю, рекóста к ним: что и́щете живáго с мéртвыми? Несть зде, но востá. Помяни́те, я́коже глагóла вам, ещè сый в Галiлéи, глагóля, я́ко подобáет Сы́ну Человéческому прéдану бы́ти в рýце человéк грéшник, и прóпяту бы́ти, и в трéтiй день воскрéснути. И помянýша глагóлы Егó. И возврáщшася от грóба, возвести́ша вся сiя́ единомунáдесяте и всем прóчим. Бя́ше же Магдали́на Марíя, и Iоáнна, и Марíя Iáковля, и прóчiя с ни́ми, я́же глагóлаху ко апóстолом сiя́. И яви́шася пред ни́ми я́ко лжа глагóлы их, и не вéроваху им. Петр же востáв течè ко грóбу, и прини́к ви́де ри́зы еди́ны лежáща, и оты́де, в себè дивя́ся бы́вшему.
[Синодальный перевод]В то время, в первый же день недели, очень рано, неся приготовленные ароматы, пришли они ко гробу, и вместе с ними некоторые другие; но нашли камень отваленным от гроба. И, войдя, не нашли тела Господа Иисуса. Когда же недоумевали они о сем, вдруг предстали перед ними два мужа в одеждах блистающих. И когда они были в страхе и наклонили лица свои к земле, сказали им: что вы ищете живого между мертвыми? Его нет здесь: Он воскрес; вспомните, как Он говорил вам, когда был еще в Галилее, сказывая, что Сыну Человеческому надлежит быть предану в руки человеков грешников, и быть распяту, и в третий день воскреснуть. И вспомнили они слова Его; и, возвратившись от гроба, возвестили всё это одиннадцати и всем прочим. То были Магдалина Мария, и Иоанна, и Мария, мать Иакова, и другие с ними, которые сказали о сем Апостолам. И показались им слова их пустыми, и не поверили им. Но Петр, встав, побежал ко гробу и, наклонившись, увидел только пелены лежащие, и пошел назад, дивясь сам в себе происшедшему. (Лк 24:1-12).
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы̀.
Слáва Ѻтцý и Сы́ну и Святóму Дýху.
Глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè.(Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещéнный с канóном Богорóдицы глас 1, канóном Предпрáзднства Введéнiя Богорóдицы, глас 4 и канóном прп. Григóрiя Декаполíта. Глас 8)
ПЕСНЬ 1
Iрмóс: Твоя́ победúтельная деснúца/ Боголéпно в крéпости прослáвися:/ та бо, Безсмéртне,/ я́ко всемогýщая, протúвныя сотрè,// Iзрáильтяном путь глубины́ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл есѝ на крестè,/ от землѝ взывáя тлéнное моè тéло,// éже от Дéвы прiя́л есѝ.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́л есѝ менè рáди,/ и дýшу смéрти прéдал есѝ,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил есѝ.
Хор: Пресвятáя Богорóдице, спасù нас.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горó несекóмая,// Я́же Жизнодáвца Хрїстá мíрови рóждшая.
Канон Богородицы, глас 1
Хор: Пресвятáя Богорóдице, спасù нас.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасù нас.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон Предпразднства, глас 4
Хор: Пресвятáя Богорóдице, спасù нас.
Чтец: Святы́х во святáя Всесвятáя и Непорóчная всели́тися происхóдит,/ Пресвятáго Бóга я́ко да бýдет храм освящéн,// и Той предтекýт дéвы отрокови́цы.
Хор: Пресвятáя Богорóдице, спасù нас.
Чтец: Совéт превéчный Превéчнаго Бóга нáшего во исполнéнiе грядéт/ предгрядýщей Ти воспитáтися во святáя святы́х,// Слóва в жили́ще, Отрокови́це Всенепорóчная.
Хор: Пресвятáя Богорóдице, спасù нас.
Чтец: Роди́телiе Божéственнiи Тя, Бóжiю Роди́тельницу хотя́щу бы́ти,/ ввóдят воспитáтися во святáя святы́х:// моли́тву, éюже моля́хуся, обещáнiе исполня́ют, Пречи́стая.
Хор: Пресвятáя Богорóдице, спасù нас.
Чтец: Укрепѝ, Влады́чице, нéмощь сéрдца моегó/ и утвердѝ, страстьмѝ колéблемое,// я́ко да вéрою Тя и любóвiю ублажáю, Присноблажéнную и Всенепорóчную.
Канон преподобного Григория Декаполита, глас 2
Хор: Преподóбне óтче Григóрiе, молù Бóга о нас.
Чтец: Умерщвлéнную сластьмѝ телесè, смирéнную мою́ дýшу/ твои́ми моли́твами оживѝ, блажéнне Григóрiе:/ жизнь бо ны́не прiя́л есѝ нестарéющуюся,// умертви́в я́же на землѝ ýды, преподóбне, пóстническими пóдвиги.
Хор: Преподóбне óтче Григóрiе, молù Бóга о нас.
Чтец: Удержáв слáсти телéсныя умá чистотóю,/ из младáго, óтче, вóзраста оргáн Дýха был есѝ,// Тогó дéйства свéтло прiéмля и Богови́ден познавáяся.
Слáва Ѻтцý и Сы́ну и Святóму Дýху.
Тропáрь: Желáнiем Божéственным плóти желáнiя увяди́л есѝ,/ и тебè самомý, блажéнне, обручи́л есѝ супрýжницу чистотý,/ из нея́же чáда тебè роди́шася вся добродéтели, приснослáвне,// чáдо тя Бóжiе содéловающыя.
И ны́не и прúсно и во вéки векóв. Амúнь.
Богорóдичен: От землѝ до Небéс дося́жущи лéствица Небéсная,/ éюже Бог Слóво земны́м сни́де,/ Благословéнная Пречи́стая, несказáнное чýдо, недомы́сленное видéнiе,// спасѝ к Тебè прибегáющыя.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Едúне вéдый человéческаго существá нéмощь/ и мúлостивно в не вообрáжся,/ препоя́ши мя с высоты̀ сúлою,/ éже вопúти Тебè, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил есѝ,/ и сни́ти ко мне благоволи́в, вознéсл мя есѝ распя́тiем,/ éже вопи́ти Тебè, Святы́й:// Хрáме одушевлéнный неизречéнныя Твоея́ слáвы, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Живóт ипостáсный Хрїстè сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л есѝ,/ и мертв триднéвен воскрéс,// в нетлéнiе мя облéкл есѝ.
Хор: Пресвятáя Богорóдице, спасù нас.
Богорóдичен: Бóга зачéнши во чрéве, Дéво, Дýхом Пресвяты́м,/ пребылá есѝ неопали́ма,/ понéже Тя купинá законополóжнику Моисéю,/ пали́мую нежегóмо, я́ве предвозвестѝ,// огнь нестерпи́мый прiéмшую.
Глас 1
Хор: Пресвятáя Богорóдице, спасù нас.
Чтец: Óблак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебè Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Пресвятáя Богорóдице, спасù нас.
Чтец: Тя запечáтанный вои́стинну лик прорóческiй истóчник,/ и заключéнную дверь именовá, дéвства Твоегó, Всепéтая,/ я́вственне знáменiя нам пи́шуще:// éже сохрани́ла есѝ и по рождествè.
Глас 4
Хор: Пресвятáя Богорóдице, спасù нас.
Чтец: Начинáющыя отрокови́цы дéвы,/ свещи́ нося́щыя свéтло, бýдущее подписýют:/ из Нея́ бо роди́тся просвещéнiе знáнiя,// решáщее прéлести омрачéнiе.
Хор: Пресвятáя Богорóдице, спасù нас.
Чтец: Ревнýющи дрéвле Богомýдренно, Áнна моли́тву исполня́ет/ и Тебè привозлагáет святи́лищу, Всенепорóчная,// свящéннейшее зачáтiе имéти хотя́щу и рождествó.
Хор: Пресвятáя Богорóдице, спасù нас.
Чтец: Сóлнце прострè лучѝ, зря óблак свéтлый, простирáемь/ мáнiем Божéственным внутрь во святáя,// из Нея́же одожди́т оставлéнiе оляденéвшим страстьмѝ.
Хор: Пресвятáя Богорóдице, спасù нас.
Чтец: Обожáет мя Бог, всели́вся в Тя за милосéрдiе, Всенепорóчная, Чи́стая,/ укрáдена снéдiю прéжде лéстiю змiи́ною,// и тли нетлéнiя пáки пи́щу воздаéт.
Глас 8
Хор: Преподóбне óтче Григóрiе, молù Бóга о нас.
Чтец: Добродéтелей на гóру востéк, преподóбне,/ во мрак видéнiя вшел есѝ/ и, разумéв, ели́ко вмести́л есѝ Непости́жнаго естествóм,// просвещéнiя испóлнен, óтче, быв.
Хор: Преподóбне óтче Григóрiе, молù Бóга о нас.
Чтец: Рождéнный в вертéпе за земны́х избавлéнiе,/ дрéвле тя, в вертéпе, всеблажéнне, живýща,/ свéтом озарѝ Небéсным, я́ко Пáвла,// светозáрна показýя тя, óтче Григóрiе.
Слáва Ѻтцý и Сы́ну и Святóму Дýху.
Тропáрь: Небéсная дверь, Хрїстóва Пречи́стая Мáти,/ прилóги тя дéмонскими окружáема, óтче, вперѝ// и мóщна крéпостiю на них содéла Дýха благодáтiю.
И ны́не и прúсно и во вéки векóв. Амúнь.
Богорóдичен: Рáдуйся, еди́на, рóждшая вся́ческих Гóспода,/ рáдуйся, жизнь человéком исходáтаившая,/ рáдуйся, осенéнная и несекóмая горó, вéрных утверждéнiе,// рáдуйся, Всенепорóчная.
Катавáсiя (глас 4): Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшiя, духóвно утвердù,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Предпрáзднства, глас 4: Весéлiя днесь вселéнная испóлнися вся/ в благознамени́том прáзднице Богорóдицы, зовýщи:// Та есть сень Небéсная.
Íкос: И́же всех Творéц, Создáтель и Влады́ка,/ неизречéнным благоутрóбiем приклони́выйся, еди́нем человеколю́бiем Свои́м,/ егóже Свои́ма устрóи рукáма, ви́дев пáдша, ущéдри/ и возстáвити сегó благоволѝ, здáнiе Божéственнейшее,/ и истощéнiем Свои́м, я́ко благ естествóм и ми́лостив./ Тем Марíю Ходáтаицу прiéмлет и я́ко Дéву и чи́стую тáинства,/ из Нея́ нáше естествó носи́ти восхотè:// Та есть сень Небéсная.
Кондáк прп. Григóрiя, глас 3: Свéтлое тя сóлнце Цéрковь познавáет,/ добродéтелей красотáми и исцелéнiй лучáми/ всех просвещáя, Хрїстóв угóдниче:/ тéмже прáзднуем честнýю пáмять твою́/ и почитáем пóдвиги твоя́,// всеблажéнне óтче премýдре Григóрiе.
Слáва Ѻтцý и Сы́ну и Святóму Дýху.
Седáлен прп. Григóрiя, глас 4: Божéственною свéтлостiю озаря́емь,/ мрак изгнáл есѝ душетлéнных страстéй, Григóрiе премýдре,/ взя́тся к безстрáстiя чистéйшей высотè,/ возсiя́л есѝ преслáвно врачевáнiй зарѝ,// всели́вся в незаходи́мый свет Цáрствiя Хрїстóва.
И ны́не и прúсно и во вéки векóв. Амúнь.
Седáлен Предпрáзднства, глас 1: Восхвали́те, дéвы, мáтери, предпрáзднуйте,/ лю́дiе, славослóвите, свящéнницы, благослови́те Пречи́стую Мáтерь Бóжiю:/ плóтiю бо младéнствующи прéжде,/ во храм принесéся, я́ко храм Бóжiй святéйшiй./ Тéмже прáздник совершáюще духóвный, воспоéм Ю́,// я́ко Предстáтельницу рóда человéческаго.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорлúвыма Аввакýм/ усмотрúв очúма,/ из Тебè изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознестѝ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Пресвятáя Богорóдице, спасù нас.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебè прозябè,/ но животá присносýщнаго наслаждéнiе,// во Спасéнiе нас пою́щих Тя.
Глас 1
Хор: Пресвятáя Богорóдице, спасù нас.
Чтец: Слы́ши чудéс нéбо, и внушáй землè,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Пресвятáя Богорóдице, спасù нас.
Чтец: Поéм вели́кое и стрáшное Твоè тáинство,/ премéрных бо утаи́вся чиноначáлiй,/ на Тя И҆́же сый сни́де я́ко дождь на рунó, Всепéтая,// на Спасéнiе нас пою́щих Тя.
Глас 4
Хор: Пресвятáя Богорóдице, спасù нас.
Чтец: Свящéннiи провозвести́ша язы́цы Тебè, Чи́стая,/ бы́ти селó невмести́маго Естествá,// сегó рáди Тя ли́цы дéвственнiи провождáют, свещѝ нося́ще во святáя.
Хор: Пресвятáя Богорóдице, спасù нас.
Чтец: Слáву взят Iоакíм со Áнною,/ ходя́ще и нося́ще Тя с весéлiем во святы́й храм, хрáме Бóжiй пресвяты́й,// Чистая и Всенепорóчная Влады́чице.
Хор: Пресвятáя Богорóдице, спасù нас.
Чтец: Разрешáется изречéнiе прароди́тельное:/ се бо процветè Лозá, Я́же Грозд нетлéнный нам плодонóсит,// винó нося́щiй весéлiя концéм.
Хор: Пресвятáя Богорóдице, спасù нас.
Чтец: Еди́ну Тя Всенепорóчную Содéтель Слóво обрéт,/ всели́ся во Твоè чрéво, содевáя нáше спасéнiе благодáтiю, Пречи́стая,// за неизглагóланную милость.
Глас 8
Хор: Преподóбне óтче Григóрiе, молù Бóга о нас.
Чтец: Нас рáди стрáнным сошéствiем быв, Григóрiе, стрáнен благосты́нею,/ тебè Егó рáди стрáнна ви́дев, от отéчества бы́вша прiя́т// и Божéственна наслéдника Своегó Цáрства, добродéтельми укрáшена, содéла.
Хор: Преподóбне óтче Григóрiе, молù Бóга о нас.
Чтец: За Хрїстá, нас рáди младéнствовавшаго, и Óтрока, преподóбне, бы́вша,/ отрокóв учи́лищу вдал есѝ тебè самáго, младéнец злóбою, Богомýдре óтче, быв,// и Божéственным смирéнiем врáжiю злóбу смири́л еси́, блажéнне Григóрiе.
Слáва Ѻтцý и Сы́ну и Святóму Дýху.
Тропáрь: Тýчами твои́х слез, óтче Григóрiе, я́коже росóю Божéственною, напая́емь,/ вся́ку возрасти́л есѝ добродéтель, вся́кое благоплóдiе прáвды процвéл есѝ,// я́ко дрéво плодонóсное, при исхóдищах вод насаждéн совершéннаго пóстничества.
И ны́не и прúсно и во вéки векóв. Амúнь.
Богорóдичен: Мáти Бóжiя, Благословéнная, Всенепорóчная,/ душѝ моея́ я́звы исцелѝ, слáсти утоли́ плотскíя,/ омрачéнное сéрдце моè просветѝ, умирѝ ум мой// и вся́каго врéда, и врáжiих мя напáстей избáви.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, сúле Твоéй.
ПЕСНЬ 5
Iрмóс: Просветúвый сiя́нiем пришéствiя Твоегó, Хрїстè,/ и осветúвый Крестóм Твоúм/ мíра концы̀,/ сердцá просветù/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л есѝ, Хрїстè:// нáга, обнищáвша показáвый Божéственным востáнiем Твои́м.
Хор: Пресвятáя Богорóдице, спасù нас.
Богорóдичен: Прошéнiя вéрно прося́щих, Всепéтая, не прéзри:/ но прiимѝ, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебè бо Предстáтельницу стяжáхом.
Глас 1
Хор: Пресвятáя Богорóдице, спасù нас.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Пресвятáя Богорóдице, спасù нас.
Чтец: Да дви́жатся вси язы́цы человéчестiи и мы́сли,/ к похвалè человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесá.
Глас 4
Хор: Пресвятáя Богорóдице, спасù нас.
Чтец: Óблацы да воскáплют прáвду днесь,/ я́ко на Небесѝ бо простирáется Божéственный óблак во хрáме Бóжiи,// и́же кáплет слáдость, всю гóресть душ нáших изъéмлющу.
Хор: Пресвятáя Богорóдице, спасù нас.
Чтец: Стрáнно Твоè зачáтiе, стрáнно Твоè и рождествó, стрáнно твоè происхождéнiе, Дéво,/ éже внутрь святи́лища введéнiе,// стрáнна и преслáвна Твоя́, слóво превосходя́щя и помышлéнiе, Пречи́стая.
Хор: Пресвятáя Богорóдице, спасù нас.
Чтец: Всю Тебè освяти́ Дух Всесвяты́й, внутрь хрáма пребывáющу/ и питáему пи́щею небéсною, Невéсто Óтча прекрáсная,// сегó рáди былá есѝ и Слóва Роди́тельница.
Хор: Пресвятáя Богорóдице, спасù нас.
Чтец: К Тебè мою́ всю надéжду, Отрокови́це, полагáя,/ к щедрóтам твои́м прибегáю:/ врéда дéмонскаго явѝ непричáстну пáдшую дýшу мою́// и изнемóгшую сластéй потоплéнми.
Глас 8
Хор: Преподóбне óтче Григóрiе, молù Бóга о нас.
Чтец: Дéланiем словесè лозá показáлся есѝ плодонóсна, преподóбне,/ добродéтелей зрéлыя и величáйшыя принося́щая грóзды,/ спасéнiя винó духóвное точáщыя, óтче,// и вéрных сердцá веселя́щее.
Хор: Преподóбне óтче Григóрiе, молù Бóга о нас.
Чтец: Слáвный Рим, óтче, от востóка тя свети́льника незаходи́ма прiéм вéрою,/ просвети́ся честны́ми твои́ми даровáнiи:/ Хрїстá бо имéл есѝ в душѝ я́ко свет,// ви́дящыя тя, óтче, озаря́юща.
Слáва Ѻтцý и Сы́ну и Святóму Дýху.
Тропáрь: Ползя́щаго змíя и наблюдáющаго твою́ пя́ту, Григóрiе,/ бóдростiю Божéственною в путéх жи́зни ходя́ я́ко Бóжiй угóдник,// я́ко зáповедей Хрїстóвых дéлатель, умертви́л есѝ си́лою Дýха.
И ны́не и прúсно и во вéки векóв. Амúнь.
Богорóдичен: Предстáтельнице мíра, Мáти Приснодéво, Ты мя окормѝ,/ и путевóдстви мя на прáвый путь,/ и напрáви к прáвды стезя́м прáвым помышлéнiе моè,// душѝ шéствiя исправля́ющи.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилá есù Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вменúхомся,/ я́ко óвцы заколéнiя,/ спасù лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся есѝ, Хрїстè:// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Возвéл ны есѝ из áда, Гóсподи,/ ки́та уби́в всея́дца, Всеси́льне,/ Твоéю держáвою низложи́в тогó си́лу:// Ты бо Живóт, и Свет есѝ, и Воскресéнiе.
Хор: Пресвятáя Богорóдице, спасù нас.
Богорóдичен: Веселя́тся о Тебè, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествá, и по Рождествè есѝ.
Глас 1
Хор: Пресвятáя Богорóдице, спасù нас.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествá, и по Рождествè есѝ.
Хор: Пресвятáя Богорóдице, спасù нас.
Чтец: Воплоти́ся прéжде сый Безплóтен, Слóво из Тебè, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 4
Хор: Пресвятáя Богорóдице, спасù нас.
Чтец: Укрéпльшеся Божéственно благодáтiю, Божéственныя Дéвы роди́телiе// Сiю́ я́ко непорóчную голуби́цу во святáя воспитáтися любóвiю возлагáют.
Хор: Пресвятáя Богорóдице, спасù нас.
Чтец: Тебè, хотя́щей прiимáти Свет, из Свéта происходя́щiй,/ свещы̀ вжига́юще, отрокови́цы, Чи́стая,/ предхóдят светови́дно к Божéственному хрáму, ликовствýюще.
Хор: Пресвятáя Богорóдице, спасù нас.
Чтец: Полнá слáвы Палáта,/ вели́кое прорóков оглашéнiе, Престóл Святы́й внутрь святáя ввóдится,// Царю́ всех готóвящися.
Хор: Пресвятáя Богорóдице, спасù нас.
Чтец: Пою́ Твоè, Отрокови́це, зачáтiе, пою́ Твоè и неизречéнное рождествó,/ пою́ и покрóв Твой, и́мже врéда вся́каго избавля́емся,// к Твоемý оти́шiю прибегáющiй.
Глас 8
Хор: Преподóбне óтче Григóрiе, молù Бóга о нас.
Чтец: Мáнiем éже к Бóгу обожáемь, свящéннейше,/ видéнiи тáинственными и Божéственными осiя́нiи// я́ко прорóк Божéственный, я́ко Бóжiй угóдник сподóбился есѝ Бóжiя благодáти.
Хор: Преподóбне óтче Григóрiе, молù Бóга о нас.
Чтец: Молчали́во твою́ жизнь соверши́л есѝ, Богодухновéнне,/ мятéжей житéйских яви́лся есѝ бóльшiй, и страстéй вы́шшiй,// и землѝ всея́ стрáнен же и пришлéц.
Слáва Ѻтцý и Сы́ну и Святóму Дýху.
Тропáрь: Я́ко зерцáло чи́стое, Божéственною зарéю обогати́лся есѝ,/ я́ко сосýд свящéнный, храм украси́л есѝ, гóрнюю, Григóрiе,// и перворóдных Цéрковь просвети́л есѝ.
И ны́не и прúсно и во вéки векóв. Амúнь.
Богорóдичен: Марíе, чи́стая палáта Царéва,/ бы́вша мя разбóйником нечи́стый вертéп моли́твами Твои́ми очи́стивши,// из Тебè рóждшемуся храм свят покажѝ.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк воскрéсный, глас 1: Воскрéсл есѝ, я́ко Бог, из грóба во слáве,/ и мiр совоскреси́л есѝ;/ и естествó человéческое я́ко Бóга воспевáет Тя, и смерть исчезè;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты есѝ, И҆́же всем подая́, Хрїстè, воскресéнiе.
Íкос: Воскрéсшаго триднéвно воспои́м я́ко Бóга Всеси́льна,/ и вратá áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, рекíй:/ и апóстолом рáдость возвещáя, я́ко Еди́н Жизнодáвец./ Тéмже вéрою жены̀ ученикóм знáменiя побéды благовествýют,/ и ад стенéт, и смерть рыдáет:/ мiр же весели́тся, и вси с ним рáдуются.// Ты бо пóдал есѝ, Хрїстè, всем Воскресéнiе.
ПЕСНЬ 7
Iрмóс: Тебè ýмную, Богорóдице, пещь/ разсмотря́ем, вéрнiи,/ я́коже бо óтроки спасè три Превозносúмый,/ мiр обновù,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестè бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л есѝ,/ и держáвною рукóю совоскреси́л есѝ,// хвáльный отцéв Бог, и препрослáвлен.
Хор: Пресвятáя Богорóдице, спасù нас.
Богорóдичен: Рáдуйся, истóчниче присноживы́я воды́./ Рáдуйся, раю́ пи́щный./ Рáдуйся, стенó вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Глас 1
Хор: Пресвятáя Богорóдице, спасù нас.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на землѝ яви́ся,/ и с человéки поживè, я́ко благоволѝ,// Хвáльный отцéв Бог и Препрослáвлен.
Хор: Пресвятáя Богорóдице, спасù нас.
Чтец: Рáдуйся, Чи́стая, из Тебè прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 4
Хор: Пресвятáя Богорóдице, спасù нас.
Чтец: Светонóсное Тя я́ко сóлнце, прiéмлет храм святы́й,/ внутрь сiя́ющу зарю́ концéм спасéнiя, Чи́стая,// храм бы́ти имýщую Сы́на Бóжiя, Дéво.
Хор: Пресвятáя Богорóдице, спасù нас.
Чтец: Руками вси восплéщем,/ избавлéнiя нося́щую óбразы Неискусобрáчную ви́дяще:/ рукóю бо Áнгеловою питáется,// Небéсный Хлеб нам я́ко хотя́щу неизречéнно породи́ти.
Хор: Пресвятáя Богорóдице, спасù нас.
Чтец: Дýши вся прáведных подзéмныя благовести́ша Тя, голуби́це златáя,/ покóй нося́щу потóпа разýмнаго проявля́ют,// и во святы́х святáя благочéстно ликовствýющу.
Хор: Пресвятáя Богорóдице, спасù нас.
Чтец: Я́ко краснá, Крáснаго родилá есѝ, нелéпоту нáшу возвращáющаго в пéрвый óбраз, Отрокови́це Всенепорочная,/ Емýже и поéм:// отцéв Госпóдь и Бог, благословéн есѝ.
Продолжéнiе здесь