Неделя 26 по Пятидесятнице. Предпразднство Введения Богородицы. Прп. Григория. УТРЕНЯ(ок) ЧАС ПЕРВЫЙ
3 декабря́ 2023 гóда. Недéля 26 по Пятидеся́тнице. Предпрáзднство Введéнiя Богорóдицы во храм. Прп. Григóрiя Декаполíта. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 8
Хор: Преподóбне óтче Григóрiе, молù Бóга о нас.
Чтец: Слез пролiя́ньми грехá огнь погаси́л есѝ,/ безстрáстiя же вóду и врачевáнiй чи́стое пи́во песнопою́щим тóчиши, Григóрiе:// благословéн Бог отéц нáших.
Хор: Преподóбне óтче Григóрiе, молù Бóга о нас.
Чтец: Плáменною колесни́цею, честны́я любвè совершéнiем носи́мь,/ к высотè возшéл есѝ,/ в нéйже стяжáл есѝ твоè, Богомýдре, житiè, зовы́й:// благословéн Бог отéц нáших.
Слáва Ѻтцý и Сы́ну и Святóму Дýху.
Тропáрь: Страстéй успи́л есѝ треволнéнiя бóдренными стоя́нiи:/ уснýв же сном, прáведным подóбно,/ к свéту прешéл есѝ невечéрнему, зовы́й:// благословéн Бог отéц нáших.
И ны́не и прúсно и во вéки векóв. Амúнь.
Богорóдичен: Мéртва бы́вша грехóм и погибáюща,/ Жизнь рóждшая, Чи́стая Дéво,/ оживѝ и спасѝ мя и геéнны исхи́ти, пою́щаго:// благословéн Бог отéц нáших.
Катавáсiя (глас 4): Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: В пещù óтроцы Iзрáилевы,/ я́коже в горнúле,/ добрóтою благочéстiя чистéе злáта блещáхуся, глагóлюще:/ благословúте, вся делá Госпóдня, Гóспода,// пóйте и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: И҆́же вóлею вся творя́й, и претворя́яй,/ обращáяй сень смéртную в вéчную жизнь,/ стрáстiю Твоéю, Слóве Бóжiй,/ Тебè непрестáнно вся делá Госпóдня,// Гóспода пои́м, и превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты разори́л есѝ сокрушéнiе, Хрїстè, и окая́нство,/ во вратéх и тверды́нях áдовых,/ воскрéс из грóба триднéвен./ Тебè непрестáнно вся делá, я́ко Гóспода, пою́т,// и превознóсят во вся вéки.
Хор: Пресвятáя Богорóдице, спасù нас.
Богорóдичен: Я́же без сéмене и преестéственне от облистáнiя Божéственнаго/ Рóждшую би́сера многоцéннаго Хрїстá, воспои́м глагóлюще:/ благослови́те вся делá Госпóдня, Гóспода,// пóйте и превозноси́те Егó во вся вéки.
Глас 1
Хор: Пресвятáя Богорóдице, спасù нас.
Чтец: Чертóг светови́дный, из негóже всех Влады́ка,/ я́ко Жени́х произы́де Хрїстóс,/ воспои́м вси вопiю́ще:/ вся делá Госпóдня, Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Чтец: Рáдуйся, Престóле слáвный Бóжiй,/ рáдуйся, вéрных стенó,/ Éюже сýщим во тьме возсiя́ свет Хрїстóс,/ Тебé блажáщим, и вопiю́щим:/ вся делá Госпóдня, Гóспода пóйте,// и превозноси́те во вся вéки.
Глас 4
Хор: Пресвятáя Богорóдице, спасù нас.
Чтец: Слы́ши и разумéй, стáрче мýдрый,/ - Захáрiи Áнна глагóлет,/ - совéтом Божéственным, Ю́же и́мам Отрокови́цу Чи́стую дóблественною душéю прiимѝ,/ Тоя́ бо рáди бýдет избавлéнiе,/ и в храм святы́й введѝ Сiю́, вопiя́:// благослови́те, вся делá Госпóдня, Гóспода.
Хор: Пресвятáя Богорóдице, спасù нас.
Чтец: Благословéн еди́н Госпóдь, возопи́ свящéнник:/ жи́зни вхóды ны́не указýют я́ве, нам объяви́вше,/ в ню́же хóщет всели́тися, Боговмести́мую палáту, Хрїстóс, Царь вся́ческих,/ Емýже вопiéт вся земля́:// благослови́те, вся делá Госпóдня, Гóспода.
Хор: Пресвятáя Богорóдице, спасù нас.
Чтец: Се, стáрче мудрéйше,/ - Áнна речè благоговéйно,/ - дóбрейшую Отрокови́цу, Ю́же дадè мне Бог,/ свéтло прiимѝ и прорóчествуй еди́ну, хотя́щую в вéщи произнестѝ проповéданiя,/ с ни́миже вопiéши прорóчески:// благослови́те, вся делá Госпóдня, Гóспода.
Хор: Пресвятáя Богорóдице, спасù нас.
Чтец: Ны́не познáх, жéно, я́вственнейше,/ - разýмно речè стáрец,/ - дрéво возрастáет посредè хрáма,/ éже процветéт сýщо Божéственный плод, в рай вводя́щiй/ снéдiю изгнáнныя тлéнiя, вопiю́щыя рáдостiю:// благослови́те, вся делá Госпóдня, Гóспода.
Глас 8
Хор: Преподóбне óтче Григóрiе, молù Бóга о нас.
Чтец: Твои́ми к Бóгу мольбáми терпели́вно дéя,/ прiя́л есѝ, всеблажéнне, вéрою проси́мое:/ нóщiю бо спя́щу, яви́вся тебè, Áнгел/ меч плáменный вдадè, стрáсти сéрдца отсекáющ,// и огнéм тя невещéственным очищáющ, и слáвою просвещáющ неизречéнно.
Хор: Преподóбне óтче Григóрiе, молù Бóга о нас.
Чтец: Всесвéтлое я́ко сóлнце,/ разýмно возсiя́л есѝ свéтом добродéтелей светозáрно, Григóрiе,/ чудéс же сiя́ньми озаря́я всю зéмлю и просвещáя благочéстно песнопою́щыя:/ дéти, благослови́те,/ свящéнницы, воспóйте,// лю́дiе, превозноси́те Хрїстá во вéки.
Хор: Благословúм Отцá, и Сы́на, и Святáго Дýха, Гóспода.
Тропáрь: Áнгельскаго песнопéнiя слы́шав, Григóрiе,/ ещè ходя́ в мéртвеннем твоéм телесѝ,/ от негóже чýвствiя твоя́ душéвная я́ве наслади́в, / и Богови́ден, и светозáрен познáлся есѝ, зовя́ Влады́це:/ дéти, благослови́те,/ свящéнницы, воспóйте,// лю́дiе, превозноси́те Егó во вéки.
И ны́не и прúсно и во вéки векóв. Амúнь.
Богорóдичен: Судiю́ и Гóспода пáче слóва рóждшая,/ Тогó я́ко Сы́на Твоегó, Всесвятáя, умолѝ в час судá,/ осуждéнiя, и огня́, и тьмы несвéтлыя,/ и скрéжета зубóв избáвити вéрою благочéстно песнопою́щыя:/ свящéнницы, воспóйте,// лю́дiе, превозноси́те Егó во вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочестúвыя в пещù/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делá,// и превозносúте Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы́ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Óбраз чúстаго рождествá Твоегó,/ огнепалúмая купинá/ показá неопáльная;/ и ны́не на нас/ напáстей свирéпеющую угасúти, мóлимся, пещь,/ да Тя, Богорóдице,// непрестáнно величáем.
Хор: Слáва, Гóсподи, Святóму Воскресéнiю Твоемý.
Чтец: О кáко, лю́дiе беззакóннiи и непокори́вiи,/ лукáвая совещáвше,/ гóрдаго и нечести́ваго оправди́ша:/ Прáведнаго же на дрéве осуди́ша Гóспода слáвы,// Егóже достóйно величáем!
Хор: Слáва, Гóсподи, Святóму Воскресéнiю Твоемý.
Чтец: Спáсе Áгнче Непорóчне,/ И҆́же мíра грехѝ взéмый,/ Тебè слáвим воскрéсшаго триднéвно,/ со Отцéм и Божéственным Твои́м Дýхом,/ и Гóспода слáвы:// Егóже богослóвяще, величáем.
Хор: Пресвятáя Богорóдице, спасù нас.
Богорóдичен: Спасѝ лю́ди Твоя́, Гóсподи,/ и҆́хже стяжáл есѝ честнóю Твоéю крóвiю,/ цéрквам Твои́м подая́ мир, Человеколю́бче,// Богорóдицы моли́твами.
Глас 1
Хор: Пресвятáя Богорóдице, спасù нас.
Чтец: Из кóрене Давíдова прозяблá есѝ прорóческаго, Дéво, и богоотéческаго:/ но и Давíда я́ко вои́стинну Ты прослáвила есѝ,/ я́ко рóждши прорóчествованнаго Гóспода слáвы:// Егóже достóйно величáем.
Хор: Пресвятáя Богорóдице, спасù нас.
Чтец: Всяк похвáльный, Пречи́стая, закóн/ побеждáется вели́чеством слáвы Твоея́./ Но о, Влады́чице, от раб Твои́х недостóйных,/ от любвè Тебè приноси́мое прiимѝ, Богорóдице,// со усéрдiем пéнiе похвáльное.
Глас 4
Хор: Пресвятáя Богорóдице, спасù нас.
Чтец: Се Бóжiя горá святáя со свещáми свéтлыми внутрь во святáя шéствует,/ от Нея́же Кáмень отсечéтся и трéбища и куми́ры дéмонскiя истни́т,// человéки же сáмыя содéлает хрáмы и честнáя оби́телища.
Хор: Пресвятáя Богорóдице, спасù нас.
Чтец: Кля́тся Бог и ны́не испóлни,/ от колéна Iýдова нам дав Приснодéву,/ Ея́же чрéво дрéво возрасти́т Жи́зни,/ смертонóсный снéди избавля́ющее, падéнiю пи́щею подни́кшыя// и укрáденыя прéлестiю змiи́ною.
Хор: Пресвятáя Богорóдице, спасù нас.
Чтец: Усты́ свéтлыми Áнна возопи́ в хрáме Бóжiи:/ Тебè привозлагáю, Ю́же мне дал еси́, Отрокови́цу, о Влады́ко!/ Из Нея́же за милосéрдiе неизглагóланное, Плотонóсец яви́вся, спасéши мир,// егóже создáл есѝ, возвели́чив Ю́ я́ко Мáтерь Твою́.
Хор: Пресвятáя Богорóдице, спасù нас.
Чтец: Се озари́ся день спасéнiя сýщим в нощи́ лю́тых:/ дверь Небéсная, хрáма двéри отвéрзши, со свещáми вхóдит внутрь во святáя// от святы́я питáтися си́лы, святóе Бóга вселéнiе.
Глас 8
Хор: Преподóбне óтче Григóрiе, молù Бóга о нас.
Чтец: Пóты пóстническими грехá угаси́л есѝ ýглiе/ и с Небесè я́ве огня́ в ви́де благодáть прiя́л есѝ,/ не попаля́ющую, мýдре, но пáче орошáющую// и крéпостiю тя си́льна на стрáсти показýющую.
Хор: Преподóбне óтче Григóрiе, молù Бóга о нас.
Чтец: Я́ко ши́пок, в по́стнических, óтче, процвéл есѝ удóлiих, Григóрiе,/ и я́ко крiн благовóнный./ Сегó рáди тóчиши ми́ро благовóнное, твоя́ кóсти оби́льно ухáют жизнь:// пóлны бо лани́ты твоя́, я́ко чáши, аромáт показáшася.
Слáва Ѻтцý и Сы́ну и Святóму Дýху.
Тропáрь: Рáка, идéже честнóе и многострадáльное тéло твоè лежи́т,/ чудéс благодáть нам источáет, óтче Григóрiе,/ освящáющи нáша дýши и телесá,// обогати́вшихся тобóю и предстáтеля и тéпла тя застýпника имýщих.
И ны́не и прúсно и во вéки векóв. Амúнь.
Богорóдичен: Глас Тебè Гаврiи́лов, вéрнiи, рáдостно привещавáем:/ рáдуйся, раю́, Жи́зни дрéво прозя́бшiй,/ рáдуйся, решéнiе кля́твы,// мýчеников венчáнiе, преподóбных похвалó и человéков благочести́вых утверждéнiе.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чúстая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный четвéртый: Добродéтельми блистáвшеся,/ ви́дим предстоя́ща в живонóснем грóбе/ мýжа в блещáщихся ри́зах:/ миронóсицам преклóньшим ли́ца на зéмлю,/ небесы́ Влады́чествующаго воскресéнiю да научи́мся,/ и к Животá грóбу с Петрóм притецéм,/ и содéянному уди́вльшеся,// пребýдем Хрїстá ви́дети.
Слáва Ѻтцý и Сы́ну и Святóму Дýху.
Светúлен Прп. Григóрiя Декаполíта: Святы́ни храм был есѝ, iерáрше,/ по Божéственному же причáстiю ны́не благ бывáеши и рая́ граждани́н,/ в нéмже напитавáешися невозбрáнно дрéва знáнiя и нетлéнныя слáвы,// пáмять творя́, Григóрiе мýдре, о и́же от любвè вéрою хвáлящих тя, свящéнный óтче.
И ны́не и прúсно и во вéки векóв. Амúнь.
Светúлен Предпрáзднства: День предпрáзднственный/ храм привóдит ны́не пречи́стым введéнiем Богорóдицы Марíи,/ Ю́же пою́т Áнгели, и человéцы ублажáют,// дéвы же провождáют, свещѝ нося́ще и игрáюще, в храм Госпóдень.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебè подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебè подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 1: Поéм Твою́, Хрїстè, спаси́тельную страсть,// и слáвим Твоè Воскресéнiе.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Крест претерпéвый, и смерть упраздни́вый,/ и воскресы́й из мéртвых,/ умири́ нáшу жизнь, Гóсподи,// я́ко еди́н Всеси́лен.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Áда плени́вый, и человéка воскреси́вый,/ Воскресéнiем Твои́м, Хрiстè,/ сподóби нас чи́стым сéрдцем// Тебè пéти и слáвити.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Боголéпное Твоè снисхождéнiе слáвяще,/ поéм Тя, Хрїстè./ Роди́лся еси́ от Дéвы,/ и не разлучéн был еси́ от Отцá,/ пострадáл еси́, я́ко человéк,/ и вóлею претерпéл еси́ Крест,/ воскрéсл еси́ от грóба, я́ко от чертóга произшéд,/ да спасéши мiр,// Гóсподи слáва Тебè.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхиры Предпрáзднства, глас 1, самоглáсны: Прiиди́те, вéрнiи, сошéдшеся, пéсньми почти́м/ от мáтере неплóдныя преслáвно рóждшуюся/ Богоневéстную Мáтерь Творцá,/ и с дéвами же и свещáми предусря́щем Ю́,// в храм входя́щу во святáя.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Я́коже цвéты разли́чныя собрáвше/ от разýмных цветникóв Дýха словéс,/ похвáльныя венцы́ рáдостно Дéве исплетéм/ и предпрáзднственный дар Ей// достóйно принесéм.
Приведýтся Царю́ дéвы в след Ея́,/ úскреннiя Ея́ приведýтся Тебè. (Пс.44:15)
Стiхúра: Да уготóвятся двéри хрáма Госпóдня и да отвéрзутся:/ и дом слáвы, и еди́ну, Превы́шшую Небéс,/ пáче умá бы́вшую,/ да прiéмлют, рáдующеся,// и Хрїстá Спáса да воспою́т.
Приведýтся в весéлiи и рáдованiи,/ введýтся в храм Царéв.(Пс.44:16)
Глас 1, Геóргiя Никомiдíйскаго: Да рáдуется днесь Нéбо свы́ше,/ и óблацы весéлiе да кропя́т/ о зелó преслáвных вели́чiих Бóга нáшего:/ се бо Дверь, на востóки зря́щая,/ рóждшися от неплóдове безплóдныя по обетовáнiю/ и Бóгу освящéна бы́вши в жили́ще,/ днесь в храм я́ко непорóчное приношéнiе привóдится,/ да рáдуется Давíд, бряцáя в гýсли:/ приведýтся, речé, Царю́ дéвы в след Eя́,/ бли́жнiя Eя́ приведýтся внутрь ски́нiи Бóжiя,/ внутрь очисти́лища Eгó,/ воспитáтися в жили́ще/ прéжде век от Oтцá нетлéнно Рóждшагося// во спасéнiе душ нáших.
Слáва Отцý и Сыну и Святóму Дýху.
Стiхúра евáнгельская четвéртая, глас 4: У́тро бе глубокó,/ и жены́ прiидóша на гроб Твой, Хрїстé,/ но Тéло не обрéтеся желáемое и́ми./ Тéмже недоумевáющимся,/ и́же в ри́зах блещáщихся предстáвшiи глагóлаху:/ что живáго с мéртвыми и́щете;/ востá, я́коже предречé,/ что не пóмните глагóл Егó?/ И́мже вéровавша, ви́денная проповéдаху,/ но мня́хуся лжа благовéщенiя:/ тáко бы́ша ещé кóсни ученицы́./ Но Петр течé, и ви́дев// прослáви Твоя́ в себé чудесá.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, помúлуй нас. (3 рáза)
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помúлуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегó, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл есѝ нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты есѝ. Не отвратѝ человéка во смирéнiе, и рекл есѝ: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л есѝ беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя́. Испóлнихомся заýтра ми́лости Твоея́, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны есѝ, лéта в ня́же ви́дехом злáя. И при́зри на рабы́ Твоя́, и на делá Твоя́, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредè дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 1: Кáмени запечáтану от iудéй и вóином стрегýщим Пречи́стое Тéло Твоè, воскрéсл еси триднéвный, Спáсе, дáруяй мíрови жизнь. Сегó рáди си́лы небéсныя вопiя́ху Ти, Жизнодáвче: слáва Воскресéнiю Твоемý, Хрїстè, слáва Цáрствiю Твоемý, слáва смотрéнiю Твоемý, еди́не Человеколю́бче.
Слáва Отцý и Сы́ну и Святóму Дýху.
Тропáрь Предпрáзднства, глас 4: Рáдость предобручáет всем Áнна ны́не, печáли сопроти́вный плод прозя́бши, еди́ну Приснодéву, Ю́же и привóдит, моли́твы исполня́ющи, днесь веселя́щися, в храм Госпóдень, я́ко сýщiй храм Бóга Слóва и Мáтерь чи́стую.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Предпрáзднства, глас 4: Весéлiя днесь вселéнная испóлнися вся в благознамени́том прáзднице Богорóдицы, зовýщи: Та есть сень Небéсная.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу