Неделя 25 по Пятидесятнице. Святителя Иоанна Златоустого, глас 8. ВСЕНОЩНОЕ БДЕНИЕ. УТРЕНЯ КАНОН
26 ноября́ 2023 гóда. Недéля 25 по Пятидеся́тнице. Святúтеля Iоáнна, архiепíскопа Константíна грáда, Златоýстаго. Глас 8. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
(При пении избранного псалма в воскресные дни заключительное «Слава, и ныне» и «Аллилуия» не поется. Сразу после последнего стиха избранного псалма - величание и тропари воскресные «Ангельский собор...»)
Хор: Величáем Тя,/ святúтелю óтче Iоáнне,/ и чтим святýю пáмять твою́,/ ты бо мóлиши о нас // Хрїстá Бóга нáшего.
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речè:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила есѝ,/ рáдость же Éве/ в печáли мéсто подалá есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 8: Мvронóсицы Жизнодáвца предстоя́ща грóбу,/ Влады́ку искáху в мéртвых, Безсмéртнаго,/ и рáдость благовéщенiя от Áнгела прiéмша, апóстолом возвещáху:/ я́ко воскрéсе Хрїстóс Бог,// подая́й мíрови вéлiю ми́лость.
СЕДАЛЬНЫ ПО ПОЛИЕЛЕИ
Глас 1 (по 1‑м стiхослóвiи): Златообрáзная звездá, земны́м возсiя́л есѝ, Златоýсте, свéтло,/ Iоáнне всеблажéнне,/ просвещáя концы́ заря́ми словéс твои́х./ Тем днесь всесвятýю твою́ пáмять прáзднующе,// грехóв всех прóсим оставлéнiя.
Глас 5 (по 2‑м стiхослóвiи): Цветникá словéс Богодохновéнных писáнiй,/ наставля́ющаго нас к покая́нiю,/ мнóгая искушéнiя претерпéвша,/ Златоýстаго, вéрнiи, я́ко научи́вшеся от негó, почти́м по дóлгу:// мóлится бо Гóсподу спасти́ся душáм нáшим.
Слáва Ѻтцý и Сы́ну и Святóму Дýху.
Седáлен свт. Iоáнна по полiелéе, глас 8: Сокрóвище яви́лся есѝ духóвное Божéственными твои́ми словесы́,/ я́ко вои́стинну мíра, Златоýсте, просiя́в концéм,/ богáтство спаси́тельное всем пóдал есѝ,/ наставля́я, блажéнне, лю́ди к покая́нiю./ Тем и течéнiе соверши́в житiя́,/ Престóлу предстои́ши Вы́шняго, приснопáмятне Iоáнне Златоýсте,/ молѝ Хрїстá Бóга грехóв оставлéнiе даровáти// прáзднующим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из Минéи, глас тóйже: Небéсную дверь, и кiвóт,/ пресвятýю гóру, свéтлый óблак воспои́м, / неопали́мую купинý, словéсный рай,/ Éвы воззвáнiе, вселéнныя всея́ вели́кое сокрóвище,/ я́ко спасéнiе в Ней содéлася мíра и оставлéнiе дрéвних согрешéнiй./ Сегó рáди вопiéм Ей:/ моли́ся Сы́ну Твоемý прегрешéнiй оставлéнiе даровáти// благочéстно покланя́ющимся всесвятóму Рождествý Твоемý.
СТЕПЕННА, ГЛАС 8
1 АНТИФОН
Хор: От ю́ности моея́ враг мя искушáет, сластьмù палúт мя:// аз же надéяся на Тя, Гóсподи, побеждáю сегó. (Двáжды)
Ненави́дящiи Сióна,/ да бýдут ýбо прéжде исторжéнiя я́ко травá:// ссéчет бо Хрїстóс вы́я их, усечéнiем мук. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
И ны́не и прúсно и во вéки векóв. Амúнь.
Святы́м Дýхом, Éже жи́ти вся́ческим:/ Свет от Свéта, Бог Вели́к:// со Отцéм поéм Емý, и с Слóвом.
2 АНТИФОН
Сéрдце моé стрáхом Твоúм да покры́ется смиренномýдрствующее:// да не вознéсшееся отпадéт от Тебé, Всещéдре. (Двáжды)
На Гóспода имéвый надéжду, не устраши́тся тогдá,// егдá огнéм вся суди́ти и҆́мать, и мýкою. (Двáжды)
Слáва Ѻтцý и Сы́ну и Святóму Дýху.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
И ны́не и прúсно и во вéки векóв. Амúнь.
Святы́м Дýхом, всяк кто божéственный ви́дит, и предглагóлет,/ чудодéйствует вы́шняя, в Трiéх Еди́наго Бóга поя́:// áще бо и трисiя́ет, единоначáльствует Божествó.
3 АНТИФОН
Воззвáх Тебé, Гóсподи, вонмù,/ приклонù ми ýхо Твоé вопiю́щу, и очúсти,// прéжде дáже не вóзмеши менé отсю́ду. (Двáжды)
В мáтери своéй землѝ отходя́й всяк, пáки разрешáется,// прiя́ти мýки, илѝ пóчести пожи́вших. (Двáжды)
Слáва Ѻтцý и Сы́ну и Святóму Дýху.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцá спросiя́вшiй.
И ны́не и прúсно и во вéки векóв. Амúнь.
Святы́м Дýхом богослóвiе, Еди́ница Трисвятáя:/ Отéц бо Безначáлен: от Негóже роди́ся Сын безлéтно,// и Дух Сопрестóлен, Сообрáзен, от Отцá спросiя́вшiй.
4 АНТИФОН
Се ны́не что добрó, илù что краснó; но éже жúти брáтiи вкýпе:// в сем бо Госпóдь обещá живóт вéчный. (Двáжды)
О ри́зе своéй, И҆́же кри́ны сéльныя украшáяй,// повелевáет, я́ко не подобáет пещи́ся. (Двáжды)
Слáва Ѻтцý и Сы́ну и Святóму Дýху.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
И ны́не и прúсно и во вéки векóв. Амúнь.
Святы́м Дýхом, Единови́дною винóю,/ вся содержáтся мироподáтельне:// Бог бо Сей есть, Отцý же и Сы́нови Единосýщен Госпóдственне.
ПРОКИМЕН
Чтец: Прокíмен, глас осьмы́й, псалóм Давíдов. Воцари́тся Госпóдь во век, Бог твой, Сióне, в род и род. (Пс.145:10)
Хор: Воцарúтся Госпóдь во век,/ Бог твой, Сióне, в род и род.
Чтец: Хвалѝ, душè моя, Гóспода, восхвалю́ Гóспода в животè моéм. (Пс.145:1-2А)
Хор: Воцарúтся Госпóдь во век,/ Бог твой, Сióне, в род и род.
Чтец: Воцари́тся Госпóдь во век.
Хор: Бог твой, Сióне, в род и род.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.71): Во врéмя óно воскрéс Iисýс заýтра, в пéрвую суббóту, яви́ся прéжде Марíи Магдали́ни, из нея́же изгнá седмь бесóв. Онá же шéдши возвестѝ с Ним бы́вшим, плáчущимся и рыдáющим. И онѝ слы́шавше, яко жив есть, и ви́ден бысть от нея́, не я́ша вéры. По сих же двемá от них грядýщема яви́ся инéм óбразом, идýщема на селó. И та шéдша возвести́ста прóчим: и ни тéма вéры я́ша. Последѝ же возлежáщим им единомунáдесяте яви́ся, и поносѝ невéрствiю их и жестосéрдiю, яко ви́девшим Егó востáвша не я́ша вéры. И речè им: шéдше в мiр весь, проповéдите Евáнгелiе всей твáри. И҆́же вéру имéт и крести́тся, спасéн бýдет, а и҆́же не имéт вéры, осуждéн бýдет. Знáменiя же вéровавшим сiя́ послéдуют: и҆́менем Мои́м бéсы ижденýт; язы́ки возглагóлют нóвы; змiя́ возмýт; áще и что смéртно испiю́т, не вреди́т их; на недýжныя рýки возложáт, и здрáви бýдут. Госпóдь же ýбо, по глагóланiи Егó к ним, вознесéся на нéбо, и сéде одеснýю Бóга. Онѝ же изшéдше проповéдаша всю́ду, Гóсподу поспéшствующу и слóво утвержáющу послéдствующими знáменьми. Ами́нь.
[Синодальный перевод]В то время воскреснув рано в первый день недели, Иисус явился сперва Марии Магдалине, из которой изгнал семь бесов. Она пошла и возвестила бывшим с Ним, плачущим и рыдающим; но они, услышав, что Он жив и она видела Его,- не поверили. После сего явился в ином образе двум из них на дороге, когда они шли в селение. И те, возвратившись, возвестили прочим; но и им не поверили. Наконец, явился самим одиннадцати, возлежавшим на вечери, и упрекал их за неверие и жестокосердие, что видевшим Его воскресшего не поверили. И сказал им: идите по всему миру и проповедуйте Евангелие всей твари. Кто будет веровать и креститься, спасен будет; а кто не будет веровать, осужден будет. Уверовавших же будут сопровождать сии знамения: именем Моим будут изгонять бесов; будут говорить новыми языками; будут брать змей; и если что́ смертоносное выпьют, не повредит им; возложат руки на больных, и они будут здоровы. И так Господь, после беседования с ними, вознесся на небо и воссел одесную Бога. А они пошли и проповедовали везде, при Господнем содействии и подкреплении слова последующими знамениями. Аминь.(Мк.16:9-20)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 8
(совмещéнный с канóном Богорóдицы глас 8 и канóном свт. Iоáнна, архiепíскопа Константíна грáда, Златоýстаго. Глас 8)
ПЕСНЬ 1
Iрмóс: Колесницегонúтеля фараóня погрузù/ чудотворя́й иногдá/ Моисéйскiй жезл, крестообрáзно поразúв,/ и разделúв мóре,/ Iзрáиля же беглецá, пешехóдца спасè,// песнь Бóгови воспевáюща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Всеси́льну Хрїстóву Божествý кáко не диви́мся;/ от страстéй ýбо всем вéрным, безстрáстiе и нетлéнiе точáщу,/ от ребрá же Святáго истóчник безсмéртiя искáпающу,// и Живóт из грóба Присносýщный.
Хор: Слáва, Гóсподи, Святóму Воскресéнiю Твоемý.
Чтец: Я́ко благолéпен женáм Áнгел ны́не яви́ся,/ свéтлыя нося́ óбразы естéственныя невещéственныя чистоты́,// зрáком же возвещáя свет воскресéнiя, зовы́й: воскрéсе Госпóдь.
Хор: Пресвятáя Богорóдице, спасù нас.
Богорóдичен: Преслáвная возглагóлашася о Тебè в родéх родóв,/ Бóга Слóва во чрéве вмéщшая,/ чистá же пребы́вши Богорóдице Марíе.// Тéмже Тя вси почитáем, сýщее по Бóзе заступлéнiе нáше.
Канон Богородицы, глас 8
Хор: Пресвятáя Богорóдице, спасù нас.
Чтец: Пречи́стая Богорóдице,/ воплóщшееся Присносýщное и Пребожéственное Слóво,// пáче естествá рóждши, поéм Тя.
Хор: Пресвятáя Богорóдице, спасù нас.
Чтец: Грозд Тя Живонóсен,/ всемíрнаго искáпающ слáдость спасéнiя,// Дéва, Хрїстé, родѝ.
Канон святителя Иоанна, глас 8
Хор: Святúтелю óтче Iоáнне, молù Бóга о нас.
Чтец: Покая́нiя быв теплéйшiй проповéдник, Златоýсте,/ покáятися мне, óтче, Бóгу моли́ся от всегó сéрдца моегó/ и дрéвних прегрешéнiй исцели́ти я́звы// твои́м страдáтельством умолѝ.(Трúжды)
Хор: Святúтелю óтче Iоáнне, молù Бóга о нас.
Чтец: Всю зарю́ Святáго Дýха, óтче, прiи́м,/ всесвéтел яви́лся есѝ столп, предводи́телен Цéркве, преподóбне,/ свéтел же óблак, всеблажéнне,// осеня́ющ правослáвных собóры. (Двáжды)
Хор: Святúтелю óтче Iоáнне, молù Бóга о нас.
Чтец: От Хрїстá рукоположéн учи́тель,/ Божéственная учéнiя златови́дным язы́ком,/ мы́слiю же Богомýдрою богáтно ты источи́л есѝ:/ Бóжiя бо рекá, вод испóлнен Дýха,// яви́лся есѝ, Богоявлéнне Златоýсте.
Хор: Слáва Ѻтцý и Сы́ну и Святóму Дýху.
Тропáрь: От Хрїстá рукоположéн учи́тель,/ Божéственная учéнiя златови́дным язы́ком,/ мы́слiю же Богомýдрою богáтно ты источи́л есѝ:/ Бóжiя бо рекá, вод испóлнен Дýха,// яви́лся есѝ, Богоявлéнне Златоýсте.
Хор: И ны́не и прúсно и во вéки векóв. Амúнь.
Богорóдичен: Преукрáшена разли́чiем благодáти, Богорáдованная,/ Óтчее Слóво, плоть бы́вшее за благоутрóбiе мнóгое пáче умá и словесè,/ Благословéнная, родилá есѝ,// пребы́вши Дéва несквéрная.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Утверждéй в начáле Небесá рáзумом,/ и зéмлю на водáх основáвый,/ на кáмени мя, Хрїстé, зáповедей Твоúх утвердù,/ я́ко несть свят, пáче Тебé// Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Осуждéна бы́вша Адáма вкушéнiем грехá,/ плóти Твоея́ спаси́тельною стрáстiю оправдáл есѝ, Хрїстè:// Сам бо непови́нен смéртнаго искýса был есѝ, Безгрéшне.
Хор: Слáва, Гóсподи, Святóму Воскресéнiю Твоемý.
Чтец: Воскресéнiя свет возсiя́/ сýщим во тьме, и сéни смéртней седя́щим,/ Бог мой Iисýс,/ и Свои́м Божествóм крéпкаго связáв,// сегó сосýды расхи́тил есть.
Хор: Пресвятáя Богорóдице, спасù нас.
Богорóдичен: Херувíмов и Серафíмов превы́шши яви́лася есѝ, Богорóдице:/ Ты бо Еди́на прiя́ла есѝ Невмести́маго Бóга в Твоéм чрéве, Несквéрная:// тéмже Тя вéрнiи вси пéсньми, Чи́стая, ублажáем.
Глас 8
Хор: Пресвятáя Богорóдице, спасù нас.
Чтец: Даждь нам пóмощь Твои́ми моли́твами, Всечи́стая,// прилóги отражáющи лю́тых обстоя́нiй.
Хор: Пресвятáя Богорóдице, спасù нас.
Чтец: Éве прамáтери Ты исправлéнiе бы́ла есѝ,// Начáльника жи́зни мíрови, Хрїстá Богорóдице, рóждши.
Глас 8
Хор: Святúтелю óтче Iоáнне, молù Бóга о нас.
Чтец: Умóм Ты Хрїстóвым обогáщся,/ твои́м чи́стым житiéм/ человéком спасéнiя был есѝ споспéшник и повествовáтель, дéйствитель, Златоýсте,// учи́тельства точá спаси́тельная, Богодохновéнне.(Трúжды)
Хор: Святúтелю óтче Iоáнне, молù Бóга о нас.
Чтец: От невещéственных сокрóвищ Дýха ты обогати́вся,// от истóчников спасéнiя почéрпл есѝ приснотекýщiй истóчник учéнiй// и напои́л есѝ все Цéркве, преподóбне óтче, лицè. (Двáжды)
Хор: Святúтелю óтче Iоáнне, молù Бóга о нас.
Чтец: Оляденéвшыя душéвныя, Златоýсте, ни́вы,/ премýдрым земледéланiем словéс изчи́стил есѝ, мýдре, и плодонóсны показáл есѝ,// Небéсными тýчами сiя́ напая́я, Богопрiя́тне.
Хор: Слáва Ѻтцý и Сы́ну и Святóму Дýху.
Тропáрь: Оляденéвшыя душéвныя, Златоýсте, ни́вы,/ премýдрым земледéланiем словéс изчи́стил есѝ, мýдре, и плодонóсны показáл есѝ,// Небéсными тýчами сiя́ напая́я, Богопрiя́тне.
Хор: И ны́не и прúсно и во вéки векóв. Амúнь.
Богорóдичен: Порóка в Тебè и сквéрны несть отню́д, Дéво,/ оби́тель же пáче яви́лася есѝ Небéсных блáгостей,// в Тебè бо всели́ся добродéтелей вся святы́ня, Всенепорóчная.
Катавáсiя (глас 4): Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшiя, духóвно утвердù,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк свт. Iоáнна, глас 6: От Небéс прiя́л есѝ Божéственную благодáть,/ и твои́ми устнáми вся учи́ши/ покланя́тися в Трóице еди́ному Бóгу,/ Iоáнне Златоýсте, всеблажéнне преподóбне,/ достóйно хвáлим тя:// есѝ бо настáвник, я́ко Божéственная явля́я.
Íкос: Всех Творцý преклоня́ю колéна,/ превéчному Слóву рýки простирáю,/ слóва ищá даровáнiе, да воспою́ преподóбнаго, егóже Сам возвели́чи,/ глагóлет бо прорóком Живы́й во вéки:/ прослáвлю вéрою слáвящыя Мя./ И́же ýбо в дрéвних Самуи́ла возвы́сивый, прослáви ны́не iерáрха:/ талáнт бо, емýже ввéрися, дóбре кýпльствовав, Царю́ принесè,/ тем и превозвы́шши егó Пресýщественный./ Сегó благодáти прошý недостóйный аз слóво прiя́ти ми,/ да возмогý благочéстно воспéти тогó:// концéй бо той есть настáвник, я́ко Божéственная явля́я.
Седáлен свт. Iоáнна, глас 8: Неизречéнныя мýдрости Богови́дно почéрпл есѝ богáтство рáзума,/ всем сокрóвищствовал есѝ Правослáвiя вóды,/ вéрных ýбо сердцá Божéственне веселя́щыя,/ невéрных же мнéнiя достóйно погружáющыя:/ тем отобою́ду благочéстiя пóтами показáлся есѝ непобéдный Трóицы побóрник, Iоáнне Златоýсте./ Молѝ Хрїстá Бóга грехóв оставлéнiе даровáти// прáзднующим любóвiю святýю пáмять твою́.
Слáва Ѻтцý и Сы́ну и Святóму Дýху.
Ин седáлен свт. Iоáнна, глас 8: Сýщую свы́ше мýдрость познáв/ и благодáть словéс от Бóга всем просiя́л есѝ, я́ко злáто в горни́ле,/ и Святýю Трóицу, Еди́ницу, проповéдал есѝ,/ сребролю́бную лесть устрели́в словесы́ твои́ми./ Тéмже и рéвностiю цари́цу обличи́в,/ Áрiево посрами́л есѝ иноплемéнное кичéнiе, Iоáнне Златоýсте,/ молѝ Хрїстá Бóга грехóв оставлéнiе даровáти// прáзднующим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из минéи, глас 8: Плáмень геéнскiй и сгорéнiе,/ плач, и́же в нем и рыдáнiе,/ зелó окая́ннейшее разлучéнiе и горчáйшее, святы́х наслéдiя/ и собрáнiя рáдостнаго, помышля́ющи, содрогни́ся, душè моя́, и возстенѝ,/ и писа́нiя тми́нных долгóв твои́х истреби́ти потщи́ся умилéнiя слезáми,/ Споспéшницу непосты́дную имýщи, Чи́стую Богомáтерь:/ Тоя́ бо рáди прегрешéнiй даéтся оставлéнiе/ Сiю́ Богорóдицу правослáвно слáвящим.
ПЕСНЬ 4
Iрмóс: Ты моя́ крéпость Гóсподи,/ Ты моя́ и сúла,/ Ты мой Бог, Ты моé рáдованiе,/ не остáвль нéдра Ѻ́тча,/ и нáшу нищетý посетúв./ Тем с прорóком Аввакýмом зовý Ти:// сúле Твоéй слáва, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Ты врагá сýща мя зелó возлюби́л есѝ:/ Ты истощáнiем стрáнным сошéл есѝ на зéмлю, Благоутрóбне Спáсе,/ послéдняго моегó досаждéнiя не отвéргся,/ и пребы́в на высотé пречи́стыя Твоея́ слáвы,// прéжде безчéствованнаго прослáвил есѝ.
Хор: Слáва, Гóсподи, Святóму Воскресéнiю Твоемý.
Чтец: Кто зря, Влады́ко, ны́не не ужасáется,/ стрáстiю смерть разрушáему;/ Крестóм бежáщее тлéнiе,/ и смéртiю ад богáтства истощавáемый,/ Божéственною си́лою Тебè распя́таго;// чýдно дéло, Человеколю́бче!
Хор: Пресвятáя Богорóдице, спасù нас.
Богорóдичен: Ты вéрным похвалá есѝ, Безневéстная, Ты Предстáтельнице,/ Ты и прибéжище хрїстiáн, стенá и пристáнище:/ к Сы́ну бо Твоемý мольбы́ нóсиши, Всенепорóчная, и спасáеши от бед,// вéрою и любóвiю Богорóдицу Чи́стую Тебè знáющих.
Глас 8
Хор: Пресвятáя Богорóдице, спасù нас.
Чтец: Клас возрасти́вшая животвóрный, неорáнная Ни́во,/ подаю́щаго мíрови жизнь, Богорóдице,// спасáй пою́щiя Тя.
Хор: Пресвятáя Богорóдице, спасù нас.
Чтец: Богорóдицу Тя, Всечи́стая, просвéщшiися вси проповéдуем:// Сóлнце бо прáвды родилá есѝ, Приснодéво.
Глас 8
Хор: Святúтелю óтче Iоáнне, молù Бóга о нас.
Чтец: Инáго нам апóстолов единонрáвнаго,/ и́же промышлéнiем всех промышля́я,/ я́ко Благ, дадé Хрїстóс тя, Небéснаго тайновóдства проповéдника/ и Божéственнаго сказáтеля тáин Гóрних,// Iоáнне всеблажéнне Златоýсте. (Двáжды)
Хор: Святúтелю óтче Iоáнне, молù Бóга о нас.
Чтец: Златозáрнаго и златословéснаго, почти́м Златоýстаго Iоáнна,/ вся позлати́вшаго златови́дными сiя́нiи учéнiя/ и мир язы́ком просвети́вша,/ злáта светлéйшим и свéта полнéйшим,// источáющим благодáть Божéственную. (Двáжды)
Хор: Святúтелю óтче Iоáнне, молù Бóга о нас.
Чтец: Весь был есѝ Бóжiе жили́ще,/ весь яви́лся есѝ оргáн Дýха,/ возглашáющ вся́кiя добродéтели Богодохновéнную песнь,/ и спасéнiя винý, и добрóту явля́я Небéснаго Цáрствiя,// Iоáнне всеблажéнне Златоýсте. (Двáжды)
Хор: Слáва Ѻтцý и Сы́ну и Святóму Дýху.
Тропáрь: Ты Бóжiе благоутрóбiе проповéдал есѝ,/ покая́нiя óбразы излагáя,/ и злых отбежáнiя изя́щнейше поучáя,/ преблажéнне и всесовершéннейше,/ и о дéлех изря́дных поучéнiя источáя,// всечéстне óтче Златоýсте.
Хор: И ны́не и прúсно и во вéки векóв. Амúнь.
Богорóдичен: По Бóзе предстáтельницу Тя стяжáхом,/ Ты бо Бóжiя Мáти былá есѝ Творцá и Содéтеля,/ и наш зрак прiéмшаго, Всенепорóчная,/ и сей спáсшаго от тли и смéрти// и слáвою Божéственною прослáвившаго.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, сúле Твоéй.
ПЕСНЬ 5
Iрмóс: Вскýю мя отрúнул есù/ от лицá Твоегó, Свéте Незаходúмый,/ и покры́ла мя есть чуждáя тьма, окая́ннаго;/ но обратù мя,/ и к свéту зáповедей Твоúх// путù моя́ напрáви, молю́ся.
Хор: Слáва, Гóсподи, Святóму Воскресéнiю Твоемý.
Чтец: Одéятися претерпéл еси́ в багряни́цу/ прéжде стрáсти Твоея́, Спáсе, поругáемь,/ первоздáннаго покрывáя безобрáзное обнажéнiе:/ и наг пригвозди́лся еси́ на Крестé плóтiю,// совлачáя, Хрїстé, ри́зу умерщвлéнiя.
Хор: Слáва, Гóсподи, Святóму Воскресéнiю Твоемý.
Чтец: От пéрсти смéртныя,/ Ты пáдшее моè пáки наздáл еси́ существó, воскрéс:/ и нестарéющееся, Хрїстè устрóил еси́,/ яви́в пáки я́коже цáрскiй óбраз,// нетлéнiя жизнь блистáющ.
Хор: Пресвятáя Богорóдице, спасù нас.
Богорóдичен: Мáтернее дерзновéнiе, éже к Сы́ну Твоемý имýщи, Всечи́стая,/ срóднаго промышлéнiя, éже о нас, не прéзри, мóлимся:// я́ко Тебè и Еди́ну хрїстiáне ко Влады́це очищéнiе ми́лостивно предлагáем.
Глас 8
Хор: Пресвятáя Богорóдице, спасù нас.
Чтец: Утоли́ нестерпи́мую бýрю страстéй мои́х,// Я́же Бóга рóждшая, Окорми́теля и Гóспода.
Хор: Пресвятáя Богорóдице, спасù нас.
Чтец: Слýжат рождествý Твоемý, Пречи́стая Богорóдице,// Áнгельстiи чи́нове, и человéков собрáнiе.
Глас 8
Хор: Святúтелю óтче Iоáнне, молù Бóга о нас.
Чтец: Церкóвнаго свети́льника вси тя вéмы светови́днейшаго/ и душáм спаси́тельнаго,/ восхищáющаго сiя́ из гортáни смертонóсныя/ и к жи́зни путеводя́ща вéчней,// óтче приснопевáемый. (Трúжды)
Хор: Святúтелю óтче Iоáнне, молù Бóга о нас.
Чтец: Разрушáеши ополчéнiя ерети́чествующих, треблажéнне,/ огради́вся благочéстiя орýжiи и мýжеством души́, свящéннейше,/ собирáеши же, рáдуяся пресвéтло,// правослáвных ли́ки сою́зом Дýха. (Двáжды)
Хор: Святúтелю óтче Iоáнне, молù Бóга о нас.
Чтец: Испóлнены, я́коже фiáлы, Божéственных аромáт лани́ты твоя́/ и вселéнную ýмными благовóнiи веселя́т/ мировáрным тайновóдством разумéнiй// и добрóтою словéс твои́х, всемýдр.
Хор: Слáва Ѻтцý и Сы́ну и Святóму Дýху.
Тропáрь: Испóлнены, я́коже фiáлы, Божéственных аромáт лани́ты твоя́/ и вселéнную ýмными благовóнiи веселя́т/ мировáрным тайновóдством разумéнiй// и добрóтою словéс твои́х, всемýдр.
Хор: И ны́не и прúсно и во вéки векóв. Амúнь.
Богорóдичен: Я́ко Бóга зачéнши, Содéтеля же, и Зижди́теля, и Гóспода,/ рóди Тя вси человéчестiи, Чи́стая, ублажáют,/ и Безтелéсных разýмная чиноначáлiя// я́ко Мáтерь Бóжiю Тя слáвят.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилá есù Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Очúсти мя, Спáсе,/ мнóга бо беззакóнiя моя́,/ и из глубины́ зол возведù, молю́ся:/ к Тебé бо возопúх, и услы́ши мя,// Бóже спасéнiя моегó.
Хор: Слáва, Гóсподи, Святóму Воскресéнiю Твоемý.
Чтец: Дрéвом крéпко низложи́ мя началозлóбный:/ Ты же, Хрїстè, вознéсся на Крестè,/ крепчáе низложи́л еси́, посрами́в сегó,// пáдшаго же воскреси́л еси́.
Хор: Слáва, Гóсподи, Святóму Воскресéнiю Твоемý.
Чтец: Ты ущéдрил еси́ Сióна, возсiя́вый от грóба,/ нóваго вмéсто вéтхаго соверши́в, я́ко Благоутрóбен, Божéственною Твоéю крóвiю:// и ны́не цáрствуеши в нем во вéки, Хрїстè.
Хор: Пресвятáя Богорóдице, спасù нас.
Богорóдичен: Да избáвимся от лю́тых прегрешéнiй,/ мольбáми Твои́ми, Богороди́тельнице Чи́стая,/ и да улучи́м, Пречи́стая, Божéственное сiя́нiе,// из Тебè неизречéнно воплощéннаго Сы́на Бóжiя.
Глас 8
Хор: Пресвятáя Богорóдице, спасù нас.
Чтец: Храм Тя Бóжiй и Ковчéг,/ и чертóг одушевлéнный, и дверь Небéсную,// Богорóдице, вéрнiи возвещáем.
Хор: Пресвятáя Богорóдице, спасù нас.
Чтец: Трéбищ разруши́тель, я́ко Бог,/ бы́вшее рождествó Твоè, Марíе Богоневéсто,// покланя́емо есть со Отцéм и Дýхом.
Глас 8
Хор: Святúтелю óтче Iоáнне, молù Бóга о нас.
Чтец: Мýдростiю духóвною мир весь обогати́л еси́,/ словесé раздавáтель быв богáтый:/ богáта бо свы́ше, iерáрше,// благодáть излiя́ся твои́м устнáм. (Трúжды)
Хор: Святúтелю óтче Iоáнне, молù Бóга о нас.
Чтец: Во всю, я́ко мóлнiя, зéмлю изы́де вещáнiе твоé,/ и си́ла же твои́х глагóл, Златоýсте,// я́ко трубá велеглáсная, вселéнныя вся́ огласи́ концы́. (Двáжды)
Хор: Святúтелю óтче Iоáнне, молù Бóга о нас.
Чтец: Свы́ше во исткáнную ри́зу одéявся, всеблажéнне, добродéтелей/ и словéс красотóю обложи́вся,// и́стины яви́лся еси́ слáвное утверждéнiе.
Хор: Слáва Ѻтцý и Сы́ну и Святóму Дýху.
Тропáрь: Свы́ше во исткáнную ри́зу одéявся, всеблажéнне, добродéтелей/ и словéс красотóю обложи́вся,// и́стины яви́лся еси́ слáвное утверждéнiе.
Хор: И ны́не и прúсно и во вéки векóв. Амúнь.
Богорóдичен: Вседержи́тельною си́лою нося́й вся́ческая,/ в немощнýю плоть из Тебé одéявся, Дéво Пренепорóчная,// на благодея́нiе человéков Человеколю́бец.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 8: Воскрéс из грóба, умéршыя воздви́гл еси́,/ и Адáма воскреси́л еси́,/ и Éва ликýет во Твоéм Воскресéнiи,/ и мiрстíи концы́ торжествýют// éже из мéртвых востáнiем Твои́м, Многоми́лостиве.
Íкос: Áдова цáрствiя плени́вый, и мéртвыя воскреси́вый, Долготерпели́ве,/ жены́ мvронóсицы срéтил еси́, вмéсто печáли рáдость принесы́й:/ и апóстолом Твои́м возвести́л еси́ победи́тельная Спáсе мой знáменiя Живодáтелю,/ и тварь просвещáеши, Человеколю́бче.// Сегó рáди и мiр срáдуется, éже из мéртвых востáнiю Твоемý, Многоми́лостиве.
ПЕСНЬ 7
Iрмóс: Бóжiя снизхождéнiя/ огнь устыдéся в Вавилóне иногдá./ Сегó рáди óтроцы в пещù рáдованною ногóю,/ я́ко во цвéтнице ликýюще поя́ху:// благословéн есù, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Слáвное истощáнiе,/ Божéственное богáтство Твоея́ нищеты́, Хрїстè, удивля́ет Áнгелы,/ на Крестè зря́щiя Тя пригвождáема,/ за éже спасти́ вéрою зовýщiя:// благословéн еси́ Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Божéственным Твои́м сошéствiем свéта испóлнил еси́ преиспóдняя,/ и тьма прогнáна бысть прéжде гоня́щая./ Отню́дуже воскресóша и҆́же от вéка ю́зницы, зовýще:// благословéн Бог отéц нáших.
Хор: Пресвятáя Трóице, Бóже наш, слáва Тебé.
Трóичен: Всем ýбо Гóспода,/ Еди́наго же еди́ному Единорóдному Сы́ну правослáвно Отцá,/ богослóвяще Тя возвещáем,/ и Еди́наго вéдяще от Тебè исходя́ща Дýха Прáваго,// Соестéственна и Соприсносýщна.
Глас 8
Хор: Пресвятáя Богорóдице, спасù нас.
Чтец: От Дéвственных ложéсн воплóщься,/ яви́лся еси́ на Спасéнiе нáше./ Тéмже Твою́ Мáтерь вéдяще Богорóдицу, правослáвно зовéм:// отцéв Бóже, благословéн еси́.
Хор: Пресвятáя Богорóдице, спасù нас.
Чтец: Жезл прорасти́ла еси́, Дéво,/ от кóрене Iессéова, Всеблажéнная,/ Плод цветонося́щи спаси́тельный,/ вéрою Сы́ну Твоемý зовýщим:// отцéв Бóже, благословéн еси́.
Глас 8
Хор: Святúтелю óтче Iоáнне, молù Бóга о нас.
Чтец: Блáгости бéздну и благоутрóбiя навы́к Бóжiя,/ порýчник яви́лся еси́ спасéнiя кáющимся тéпле/ и вседýшно Гóсподу зовýщим:// благословéн Бог отéц нáших. (Трúжды)
Хор: Святúтелю óтче Iоáнне, молù Бóга о нас.
Чтец: Управля́еши, Златоýсте, учéнiи твои́ми вся́кую мысль,/ и душéвныя врачýеши нéмощи, я́ко сострадáтельнейший,/ и благотекýщим споéши, веселя́ся:// благословéн Бог отéц нáших. (Двáжды)
Хор: Святúтелю óтче Iоáнне, молù Бóга о нас.
Чтец: Возвы́сился еси́, быв избрáн,/ преподóбен, незлóбив, свящéнник Высочáйшаго,/ прáвдою одéян свéтло и весéлiем, зовы́й, всебогáте:// благословéн Бог отéц нáших.
Хор: Слáва Ѻтцý и Сы́ну и Святóму Дýху.
Тропáрь: Возвы́сился еси́, быв избрáн,/ преподóбен, незлóбив, свящéнник Высочáйшаго,/ прáвдою одéян свéтло и весéлiем, зовы́й, всебогáте:// благословéн Бог отéц нáших.
Хор: И ны́не и прúсно и во вéки векóв. Амúнь.
Богорóдичен: Зачалá еси́, Пречи́стая, Сýщаго над всéми Бóга и Гóспода,/ благоволи́вшаго спасти́ человéческiй род от тлéнiя и смéрти./ Егóже, достóйно пою́ще, зовéм:// благословéн Бог отéц нáших.
Катавáсiя (глас 4): Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: Седмерúцею пещь/ халдéйскiй мучúтель Богочестúвым неúстовно разжжé,/ сúлою же лýчшею спасéны сiя́ вúдев,/ Творцý и Избáвителю вопiя́ше:/ óтроцы, благословúте,/ свящéнницы, воспóйте,// лю́дiе, превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Iисýсова Божествá Пребожéственная си́ла,/ в нас боголéпно возсiя́ла есть:/ плóтiю бо вкуш за всех смерть крéстную,/ разруши́ áдову крéпость./ Егóже непрестáнно дéти благослови́те, свящéнницы воспóйте,// лю́дiе превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Распны́йся востá, великовы́йный падé,/ пады́й и сокрушéнный испрáвися,/ тля отвéржена бысть, и нетлéнiе процветé:// Жи́знiю бо мéртвенное пожéрто бысть. Дéти благослови́те, свящéнницы воспóйте, лю́дiе превозноси́те во вся вéки.
Хор: Пресвятáя Богорóдице, спасù нас.
Трóичен: Трисвéтлое Божествó,/ Еди́ну сiя́ющее зарю́ от Еди́наго Трiипостáснаго Естествá, Роди́теля Безначáльна:/ Единоестéственно же Слóво Отцý, и Сцáрствующаго Единосýщнаго Дýха,/ дéти благослови́те, свящéнницы воспóйте,// лю́дiе превозноси́те во вся вéки.
Продолжéнiе здесь