Неделя 24 по Пятидесятнице. Прп. Варлаама Хутынского, глас 7 ВСЕНОЩНОЕ БДЕНИЕ. УТРЕНЯ КАНОН
19 ноября́ 2023 гóда. Недéля 24 по Пятидеся́тнице. Преподóбнаго отцá нáшего Варлаáма Новгорóдскаго чудотвóрца, игýмена Хýтыня монастыря́. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 7: И҆́же наш зрак воспрiéмый,/ и претерпéвый Крест плóтски,/ спаси́ мя воскресéнiем Твои́м Хрїстè Бóже,// я́ко Человеколю́бец.
СТЕПЕННА, ГЛАС 7
1 АНТИФОН
Хор: Плен Сióнь от лéсти обратúв,/ и менè Спáсе, оживù,// изимáя рабóтныя стрáсти. (Двáжды)
В юг сéяй скóрби пóстныя со слéзами,// сей рáдостныя пóжнет рукоя́ти присноживопитáнiя. (Двáжды)
Слáва Отцý и Сы́ну и Святóму Дýху.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
И ны́не и прúсно и во вéки векóв. Амúнь.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
2 АНТИФОН
Áще не Госпóдь созúждет дом душéвный, всýе труждáемся:// рáзве бо Тогó ни дея́нiе, ни слóво совершáется. (Двáжды)
Плодá чрéвна, святíи духодви́жно прозябáют// отéческая предáнiя, сыноположéнiя. (Двáжды)
Слáва Отцý и Сы́ну и Святóму Дýху.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
И ны́не и прúсно и во вéки векóв. Амúнь.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
3 АНТИФОН
Боя́щiися Гóспода, путù животá обрéтше,// ны́не и прúсно ублажáются слáвою нетлéнною. (Двáжды)
Óкрест трапéзы твоея́, я́ко стéблiе ви́дя исчáдiя твоя́,// рáдуйся и весели́ся, приводя́ сiя́ Хрїстóви пастыреначáльнику. (Двáжды)
Слáва Отцý и Сы́ну и Святóму Дýху.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
И ны́не и прúсно и во вéки векóв. Амúнь.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
ПРОКИМЕН
Чтец: Прокíмен, глас седьмы́й, псалóм Давíдов: Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Исповéмся Тебé Гóсподи всем сéрдцем мои́м, повéм вся чудесá Твоя́.(Пс.9:2)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Воскресни́, Гóсподи Бóже мой, да вознесéтся рукá Твоя́.
Хор: Не забýди убóгих Твоúх до концá.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.70): Во врéмя óно, минýвши суббóте, Марíа Магдали́на и Марíа Iáковля и Саломíа купи́ша аромáты, да пришéдша помáжут Iисýса. И зелó заýтра во еди́ну от суббóт прiидóша на гроб, возсiя́вшу сóлнцу, и глагóлаху к себé: кто отвали́т нам кáмень от двéрiй грóба? И воззрéвша ви́деша, я́ко отвалéн бе кáмень: бе бо вéлiй зелó. И вшéдша во гроб, ви́деша ю́ношу седя́ща в десны́х, одéяна во одéжду белý: и ужасóшася. Он же глагóла им: не ужасáйтеся: Iисýса и҆́щете Назаряни́на распя́таго: востá, несть зде: се, мéсто, и҆дéже положи́ша Егó: но иди́те, рцы́те ученикóм Егó и Петрóви, я́ко варя́ет вы в Галiлéи: тáмо Егó ви́дите, я́коже речé вам. И изшéдша бежáша от грóба: имя́ше же их трéпет и ýжас: и ни комýже ничтóже рéша: боя́хубося.
[Русский синодальный перевод]В те дни, по прошествии субботы Мария Магдалина и Мария Иаковлева и Саломия купили ароматы, чтобы идти помазать Его. И весьма рано, в первый день недели, приходят ко гробу, при восходе солнца, и говорят между собою: кто отвалит нам камень от двери гроба? И, взглянув, видят, что камень отвален; а он был весьма велик. И, войдя во гроб, увидели юношу, сидящего на правой стороне, облеченного в белую одежду; и ужаснулись. Он же говорит им: не ужасайтесь. Иисуса ищете Назарянина, распятого; Он воскрес, Его нет здесь. Вот место, где Он был положен. Но идите, скажите ученикам Его и Петру, что Он предваряет вас в Галилее; там Его увидите, как Он сказал вам. И, выйдя, побежали от гроба; их объял трепет и ужас, и никому ничего не сказали, потому что боялись.(Мк.16:1-8)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо есѝ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 7
(совмещéнный с канóном крестовоскрéсным, глас 7; Богорóдицы глас 7 и канóном прп. отцá нáшего Варлаáма Хýтынскаго, глас 2)
ПЕСНЬ 1
Iрмóс: Мáнiем Твоúм/ на земны́й óбраз преложúся/ прéжде удоборазливáемое/ воднóе естествó, Гóсподи./ Тéмже немóкренно пешешéствовав Iзрáиль,// поéт Тебè песнь побéдную.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Осуди́ся смéртное мучи́тельство дрéвом,/ непрáведною смéртiю осуждéну Ти, Гóсподи:/ отню́дуже князь тьмы Тебè не одолéв,// прáведно изгнáн бысть.
Хор: Слáва, Гóсподи, Святóму Воскресéнiю Твоемý.
Чтец: Ад Тебè прибли́жися,/ и зубы́ не возмóг стéрти тéло Твоè,/ челюстьмѝ сокруши́ся./ Отню́дуже Спáсе, болéзни разрýш смéртныя,// воскрéсл есѝ триднéвен.
Хор: Пресвятáя Богорóдице, спасù нас.
Богорóдичен: Разреши́шася болéзни прамáтере Éвы:/ болéзни бо избежáвше, неискусомýжно родилá есѝ.// Отню́дуже я́ве Богорóдицу, Пречи́стая, вéдуще Тя, вси слáвим.
Канон крестовоскресный, глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Два истóчника нам на крестè источѝ Спас живонóсная/ от Своегó прободéннаго ребрá.// Пои́м Емý: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: Во гроб всели́вся, и воскрéс триднéвен,/ нетлéнiе подадè, чáянiе Хрїстóс смéртным.// Пои́м Емý: я́ко прослáвися.
Канон Богородицы, глас 7
Хор: Пресвятáя Богорóдице, спасù нас.
Чтец: Бéздну рóждшая благоутрóбiя, Дéво,/ дýшу мою́ озарѝ светонóсным Твои́м сiя́нiем,// я́ко да достóйно воспою́ твои́х чудéс бéздну.
Хор: Пресвятáя Богорóдице, спасù нас.
Чтец: Стрелóю грехóвною уя́звлены нас Слóво ви́дев,/ я́ко Благодéтель ущéдри:/ отню́дуже несказáнно соедини́ся, Всечи́стая, плóтiю,// и҆́же из Тебè Пребожéственный.
Канон преподобного Варлаама, глас 2
Хор: Преподóбне óтче Варлаáме, молù Бóга о нас.
Чтец: От Свéта Свет, Хрїстè мой,/ от Отцá прéжде век рождéйся, сый в начáле со Отцéм и Дýхом,/ согрешéнiй мрак душѝ моея́ отгнáв, озарѝ ум мой, молю́ся,// да возмогý пéти Варлаáма, Твоегó угóдника. (Двáжды)
Хор: Преподóбне óтче Варлаáме, молù Бóга о нас.
Чтец: От кóрене благáго блажáйшая óтрасль прозя́бл есѝ,/ земны́х маловрéменнаго житiя́ избéгл есѝ./ Тем, ны́не чистоты́ венéц прiéмля, со áнгелы Хрїстý воспевáеши:// пои́м Гóсподеви, я́ко прослáвися. (Двáжды)
Слáва Ѻтцý и Сы́ну и Святóму Дýху.
Тропáрь: Земнáя и мимотекýщая, я́ко умéты, вмени́в, Хрїстá Еди́наго приобрéл есѝ,/ Егóже сою́зом любвè уязви́в дýшу твою́,// и Тогó потщáлся есѝ обрестѝ ненасыщáемыя добрóты.
И ны́не и прúсно и во вéки векóв. Амúнь.
Богорóдичен: Услы́ша Éва прамáти: в печáлех роди́ши чáда./ Ты же, чи́стая Дéво, услы́шала есѝ:/ Госпóдь с Тобóю, рáдуйся,// и рáдованным глáсом, Богоневéсто, печáль прамáтере потреби́ла есѝ.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: В начáле Небесá/ всесúльным Слóвом Твоúм утверждéй Гóсподи Спáсе,/ и Вседéтельным и Бóжiим Дýхом,/ всю сúлу их,/ на недвúжимем мя кáмени// исповéданiя Твоегó утвердù.
Хор: Слáва, Гóсподи, Святóму Воскресéнiю Твоемý.
Чтец: Ты возшéд на дрéво,/ о нас болéзнуеши вóлею, благоутрóбне Спáсе,/ и терпи́ши я́зву, примирéнiя ходáтайственну, и спасéнiя вéрным:// éюже Твоемý, Ми́лостиве, вси примири́хомся Роди́телю.
Хор: Слáва, Гóсподи, Святóму Воскресéнiю Твоемý.
Чтец: Ты мя очи́стив от я́звы,/ душéю уя́звленнаго змíевым угрызéнiем, Хрїстè,/ и показáл еси́ свет, во тьме дрéвле мне слежáщу и во тлéнiи:// Крестóм бо во ад сошéд, менè совоскреси́л есѝ.
Хор: Пресвятáя Богорóдице, спасù нас.
Богорóдичен: Неискусомýжныя Твоея́ Мáтере мольбáми/ мир мíрови подáждь, Спáсе,// и несказáнныя Твоея́ слáвы славослóвящiя Тя сподóби.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на крестè стрáсти претерпéвый,/ и разбóйнику рай отвéрзый, я́ко благодéтель и Бог,// утвердѝ мой ум в вóлю Твою́, еди́не Человеколю́бче.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскресы́й триднéвен из грóба,/ и живóт мíрови возсiявый, я́ко Жизнодáвец и Бог,// утвердѝ мой ум в вóлю Твою́, еди́не Человеколю́бче.
Глас 7
Хор: Пресвятáя Богорóдице, спасù нас.
Чтец: Змiй поползы́й из Едéма,/ менè обожéнiя желáнiем прельсти́в, вéрже в зéмлю:/ но И҆́же ми́лостив, и естествóм благоутрóбен, ущéдрив богосодéла,// во чрéво Твоé всéлься, и подóбен мне быв, Мáти Дéво.
Хор: Пресвятáя Богорóдице, спасù нас.
Чтец: Благословéн плод Твоегó чрéва, Дéво Богорóдице, всех рáдосте,/ рáдость бо всемý мíру родилá есѝ, и весéлiе вои́стинну// разгоня́ющее печáль грехóвную, Богоневéсто.
Глас 2
Хор: Преподóбне óтче Варлаáме, молù Бóга о нас.
Чтец: По апóстолу, óтче, Вы́шних ищá, и мудровáнiе имéя éже к Бóгу,/ вся, я́же на землѝ, остáвил есѝ// и пáче естествá добрóты сподóбился есѝ. (Двáжды)
Хор: Преподóбне óтче Варлаáме, молù Бóга о нас.
Чтец: Свéтом Божéственным осiя́емь о нем,/ и путь, к жи́зни ведýщ, познáл есѝ, óтче наш Варлаáме,// и равноáнгельнаго рáди житiя́ чудотвóрец нарéклся есѝ. (Двáжды)
Слáва Ѻтцý и Сы́ну и Святóму Дýху.
Тропáрь: Закóны питáяся всех Творцá и Влады́ки,/ тéмже и невечéрним облиставáемь Свéтом,// свéтлое сóлнце яви́лся есѝ и премýдрости сокрóвищем, мір обогащáя.
И ны́не и прúсно и во вéки векóв. Амúнь.
Богорóдичен: Во ины́х женáх мáти, дóндеже дéва, не познáся,/ ни мáти по рождествè дéвствовати сподóбися,/ на Тебè же, Дéво Богомáти, обоè сбы́стся./ Тем весéлiем дýха воспевáю:// несть непорóчны, пáче Тебè, Влады́чице.
Катавáсiя (глас 4): Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшiя, духóвно утвердù,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Варлаáма Хýтынскаго, глас 8: Я́коже другíй Илiя́, óтче, дождь с небесè свел есѝ,/ он ýбо огнь сведè и царя́ удивѝ,/ ты же лю́ди твоя́ возвесели́л есѝ/ и торжествовáти устрóил есѝ./ Вели́кiй бо Новгрáд вельмѝ тобóю хвáлится,/ имéя мóщи твоя́ в себè,/ егóже сохраня́й от враг непоколеби́ма, да зовéм ти:/ рáдуйся, преподóбне Варлаáме, óтче наш.
Íкос: Áще и человéк естествóм был есѝ, преподóбне óтче,/ но вы́шняго Iерусали́ма яви́лся есѝ согрáжданин/ и, человéк ýбо естествóм, Безплóтных чéсти сподóбился есѝ./ Тéмже и сáмая, зря́ще, чудесá похвáльная удивля́ют нас/ и научáют звáти тебè таковáя:/ рáдуйся, благочести́ва отцá óтрасле;/ рáдуйся, мáтере благоговéйныя вéтве;/ рáдуйся, смирéнiя высотó;/ рáдуйся, я́ко к познáнiю Бóга вся приводя́;/ рáдуйся, я́ко мнóга чудесá о Хрїстè сотвори́л есѝ;/ рáдуйся, целомýдрiя стóлпе, и́мже дéмонская свирéпства искорени́шася;/ рáдуйся, свети́льниче многосвéтлый;/ рáдуйся, я́ко увяди́л есѝ плотскáя мудровáнiя;/ рáдуйся, я́ко дождь моли́твою свел есѝ/ и, пáки наводнéнiю бы́вшу, моли́твою водотóчныя óблаки востя́гл есѝ;/ рáдуйся, Вели́каго Новáгрáда похвалá и утверждéнiе,/ егóже и сохранѝ от враг непоколеби́ма до концá, да зовéм ти:/ рáдуйся, преподóбне Варлаáме, óтче наш.
Седáлен Варлаáма Хýтынскаго, глас 8: Красоты́ мiрскíя от млады́х ногтéй, преподóбне, возненави́дев,/ еди́наго же Хрїстá от сéрдца возлюби́л есѝ/ и Томý всéю душéю прилепи́лся есѝ;/ я́ко безплóтен, на землѝ пожи́в с плóтiю,/ слáву же мимотекýщую и богáтство в ничтóже вмени́в,/ Небéсное богáтство воспрiя́л есѝ и слáву вéчную./ Тéмже ублажáем святóе твоè успéнiе и, в нем торжествýюще, вопiéм ти:/ Богомýдре óтче наш Варлаáме,/ молѝ Хрїстá Бóга грехóв оставлéнiе даровáти чтýщим любóвiю святýю пáмять твою́.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 8: Я́ко Всенепорóчная Невéсто Творцá,/ я́ко неискусомýжная Мáти Избáвителя,/ прiя́телище я́ко сýщи Утéшителя, Всепéтая,/ беззакóнiю мя сýща сквéрное оби́телище и дéмоном игрáлище в рáзуме бы́вша,/ потщи́ся от тех злодéйства мя избáвити и свéтлое жили́ще добродéтелей совершѝ./ Светонóсная, Нетлéнная, отженѝ óблак страстéй/ и вы́шняго причáстiя сподóби, и Свéта невечéрняго моли́твами Твои́ми.
ПЕСНЬ 4
Iрмóс: Óтча нéдра не остáвль,/ и сошéд на зéмлю, Хрїстè Бóже,/ тáйну услы́шах смотрéнiя Твоегó,// и прослáвих Тя, Едúне Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Своя́ плещи́ дав, и҆́же от Дéвы воплóщься, на рáны, рабý прегреши́вшу,/ бiéн бывáет Влады́ка непови́нен,// разрешáя моя́ согрешéнiя.
Хор: Слáва, Гóсподи, Святóму Воскресéнiю Твоемý.
Чтец: Предстоя́в суди́щу судíй законопрестýпных,/ я́ко осуди́мый пови́нен бывáет, и заушáется брéнною рукóю,// создáвый человéка я́ко Бог, и судя́й прáведно земли́.
Хор: Пресвятáя Богорóдице, спасù нас.
Богорóдичен: Я́ко вои́стинну Мáти Бóжiя, Творцá Твоегó и Сы́на моли́,// к спаси́тельному напрáвити мя пристáнищу, Всенепорóчная, слáвнаго Егó хотéнiя.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Не вéдый грехá, и егó рáди быв Гóсподи, éже не был еси́ воображáешися,/ прiéм чýждее, да спасéши мiр,// и убiéши прельсти́в мучи́теля.
Хор: Слáва, Гóсподи, Крестý Твоемý Честнóму и Воскресéнiю.
Чтец: На Крестè воздви́жен был еси́,/ и прáотца Адáма разреши́л еси́ грех/ [егóже рáди Твою́ услы́шах си́лу:]// я́ко вся спасти́ помáзанныя Твоя́ пришéл еси́.
Глас 7
Хор: Пресвятáя Богорóдице, спасù нас.
Чтец: Избрáнная вся и дóбрая,/ я́вльшися Бóгу прéжде создáнiя свéтлостiю, Всепéтая,// светоли́тiем Твои́м пою́щiя Тя просвети́.
Хор: Пресвятáя Богорóдице, спасù нас.
Чтец: Бóга человéком родилá еси́, Чи́стая,/ воплощéнна от чи́стых кровéй Твои́х,/ избавля́юща согрешéнiй мнóгих,// любóвiю слáвящiя и почитáющiя Тя, Мáти Дéво.
Глас 2
Хор: Преподóбне óтче Варлаáме, молù Бóга о нас.
Чтец: Я́ко в порфи́ру, и виссóн, и в цáрскую багряни́цу одéяся тобóю вели́кая Росси́йская земля́:/ днесь ýбо, свéтло торжествýющи, весели́тся, Варлаáме,// имéющи тя в себè, я́ко неистощи́мое сокрóвище. (Двáжды)
Хор: Преподóбне óтче Варлаáме, молù Бóга о нас.
Чтец: Ми́ра любвè отрéкся, дости́гл еси́ гóрнiй Iерусали́м,/ идéже Хрiстóс со Отцéм и Дýхом,// и, венцéв от Негó сподóбився, со Безплóтными ли́ки поéши, прiéмля Егó сiя́нiе. (Двáжды)
Слáва Ѻтцý и Сы́ну и Святóму Дýху.
Тропáрь: Áще ýбо, óтче, тéсный и болéзненный путь шéствовал еси́ в житiи́,/ но обáче нетлéнную жизнь наслéдовал еси́,// отонýдными светлостьми́ богáтно просвещáяся, богоблажéнне Варлаáме.
И ны́не и прúсно и во вéки векóв. Амúнь.
Богорóдичен: И́стинно Тя сень свидéтельствова многоразли́чными óбразы,/ я́ве показýющи Воплощéннаго из Тебè, еди́наго Трóицы, Пречи́стая, неизмéнно, Богомáти Влады́чице,// и мíр обнови́вша.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, сúле Твоéй.
ПЕСНЬ 5
Iрмóс: Нощь не светлá невéрным Хрїстè,/ вéрным же просвещéнiе в слáдости словéс Твоúх./ Сегó рáди к Тебè ýтренюю,// и воспевáю Твоè Божествó.
Хор: Слáва, Гóсподи, Святóму Воскресéнiю Твоемý.
Чтец: За Твоя́ рабы́ продаéшися, Хрїстè,/ и по лани́те ударéнiе терпи́ши,/ свобóде ходáтайственно пою́щим:// к Тебè ýтренюю, и воспевáю Твоè Божествó.
Хор: Слáва, Гóсподи, Святóму Воскресéнiю Твоемý.
Чтец: Божéственною Твоéю си́лою, Хрїстè,/ нéмощiю плотскóю крéпкаго низложи́л еси́,// и победи́теля мя смéрти, Спáсе, воскресéнiем показáл еси́.
Хор: Пресвятáя Богорóдице, спасù нас.
Богорóдичен: Бóга родилá еси́ Мáти чи́стая,/ воплощéннаго из Тебè боголéпно, Всепéтая:/ понéже не познáла еси́ мýжеска пóла,// но от Святáго раждáеши Дýха.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Егдá со беззакóнными вмени́вся, вознéслся еси́ на лóбнем,/ свети́ла сокрывáхуся, и земля́ колебáшеся, и церкóвная свéтлость раздрáся,// еврéйское явля́ющи отпадéнiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé разруши́вшаго мучи́телеву всю си́лу/ крéпостiю непостижи́маго Твоегó Божествá,// и мéртвыя Твои́м воскресéнiем воздви́гшаго пéсньми слáвим.
Глас 7
Хор: Пресвятáя Богорóдице, спасù нас.
Чтец: Лéствицу узрéв Iáков, к высотè утверждéну,/ óбразу научи́ся, неискусобрáчная Тебè:// Тобóю бо Бог человéком прiобщи́ся, Всечи́стая Влады́чице.
Хор: Пресвятáя Богорóдице, спасù нас.
Чтец: Избавлéнiе вéчное Тобóю, Дéво, ны́не обрéтше/ усéрдно зовéм Ти: éже рáдуйся, Богоневéстная:// и Твои́м свéтом возрáдовавшеся, Всепéтая, пéсньми Тя поéм.
Глас 2
Хор: Преподóбне óтче Варлаáме, молù Бóга о нас.
Чтец: Ярéм Госпóдень от ю́ности, мýдре, взем,/ послéдовал еси́ Хрiстý скорбьми́ и слезáми, преподóбне,/ мы́сленно óко к Немý имéя,// дóндеже и святы́х селéнiй дости́гл еси́, обрéт покóище Гóрняго грáда. (Двáжды)
Хор: Преподóбне óтче Варлаáме, молù Бóга о нас.
Чтец: Страстéй отгнáв мглу я́ве заря́ми, óтче, добродéтелей,/ просвещéнiе Дýха в сéрдцы прiéм, Варлаáме,// и́мже попали́л еси́ вся дéмонская ополчéнiя и пóстническим ликóм причтáлся еси́. (Двáжды)
Слáва Ѻтцý и Сы́ну и Святóму Дýху.
Тропáрь: Насаждéн во двóрех Госпóдних и в домý Бóга нáшего процвéл еси́./ Прiéм Небéсное сéмя, богодухновéнне, сердéчною браздóю клас стори́чествующь принéсл еси́,// тéмже обогати́лся еси́ венцéм чудéс.
И ны́не и прúсно и во вéки векóв. Амúнь.
Богорóдичен: Упрáви ум мой, Влады́чице, труждáющiйся в пучи́не скорбéй/ и потопля́емь нашéствiем тлетвóрных страстéй,/ и спаси́, Богорóдице, к Тебè прибегáющыя:// ины́я бо Помóщницы, Чи́стая, рáзве Тебè, не знáем.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилá есù Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Плáвающаго в молвè житéйских попечéнiй,/ с кораблéм потопля́ема грехù,/ и душетлéнному звéрю приметáема,/ я́ко Ióна, Хрїстè, вопiю́ Ти:// из смертонóсныя глубины́ возведù мя.
Хор: Слáва, Гóсподи, Святóму Воскресéнiю Твоемý.
Чтец: Воспоминáху Тя заключéнныя во áде дýши, и остáвльшiяся прáведных,/ и от Тебè спасéнiя моля́хуся:/ éже Крестóм, Хрїстè, пóдал еси́ преиспóдним,// пришéд я́ко благоутрóбен.
Хор: Слáва, Гóсподи, Святóму Воскресéнiю Твоемý.
Чтец: Ко одушевлéнному Твоемý и нерукотворéнному хрáму,/ разрушéну бы́вшу страдáньми,/ воззрéти пáки лик апóстольскiй отчáяся:/ но пáче надéжды поклóнься,// воскрéсша повсю́ду проповéда.
Хор: Пресвятáя Богорóдице, спасù нас.
Богорóдичен: Неизречéннаго рождествá Твоегó всенепорóчнаго óбраз,/ Дéво богоневéстная, и҆́же нас рáди,/ кто от человéк сказáти возмóжет?/ Я́ко Бог неопи́санне, Слóво соедини́вся Тебè,// плоть из Тебè бысть.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: На крестè вознéсся, Спáсе вóлею,/ врáжiю плени́л еси́ держáву,// на сем пригвозди́в грехóвное, Блáже, рукописáнiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Из мéртвых воскрéс Спáсе влáстiю,/ совоздви́гл еси́ человéческiй род,// живóт и нетлéнiе даровáвый нам, я́ко Человеколюбец.
Глас 7
Хор: Пресвятáя Богорóдице, спасù нас.
Чтец: Закóннiи Тя óбразы, и прорóческая проречéнiя я́ве предвозвещáху,/ хотя́щую роди́ти Благодéтеля, Чи́стая, всея́ твáри,/ многочáстне и многообрáзне благодéйствовавшаго// вéрно воспевáющих Тя.
Хор: Пресвятáя Богорóдице, спасù нас.
Чтец: Устрáншагося дрéвле навéтом человекоубíйцы, Адáма первоздáннаго/ рáйскiя божéственныя слáдости,/ Неискусобрáчная, пáки возвелá еси́,// рóждши и҆́же от преступлéнiя нас избáвившаго.
Глас 2
Хор: Преподóбне óтче Варлаáме, молù Бóга о нас.
Чтец: Мóре житéйское, любомýдрiем испытáв и разумéв сýетно сýщо/ и я́ко вскóре погибáющо, отвéргл еси́,/ еди́ному прилепи́лся еси́ Хрiстý./ Егóже рáди и тяготý дневнýю понéсл еси́,// о всех Томý восхождéнiя в сéрдцы своéм полагáя. (Двáжды)
Хор: Преподóбне óтче Варлаáме, молù Бóга о нас.
Чтец: Вéтрилом окриля́емь воздержáнiя,/ и оттýду дости́гл еси́ в пристáнище благоути́шное, пощéнiем питáя дýшу твою́, преподóбне,/ и свéтлу всех Творцý предстáвил еси́ ю́./ Тéмже и Хрiстóс прiя́т ю́, я́ко светозáрную звездý,// и своея́ слáвы сопричáстну содéла. (Двáжды)
Слáва Ѻтцý и Сы́ну и Святóму Дýху.
Тропáрь: Áнгельская вóинства сýщему во плóти житiю́ твоемý удиви́шася, óтче Варлаáме,/ бýри бо страстéй отбéгл и совершéннаго рáди житiя́,// вéтрилом воздержáнiя дости́гл еси́ в благоути́шное пристáнище Хрiстóво.
И ны́не и прúсно и во вéки векóв. Амúнь.
Богорóдичен: Обетшáвшыя ны гóрьким дрéвле дрéва вкушéнiем/ и пáдшыя поползновéнiем, Пречи́стая, обнови́ла еси́,// Зижди́теля рóждши, Слóво ипостáсное, Девомáти Влады́чице.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 7: Не ктомý держáва смéртная/ возмóжет держáти человéки:/ Хрїстóс бо сни́де, сокрушáя и разоря́я си́лы ея́./ Связýем бывáет ад,/ прорóцы соглáсно рáдуются:/ предстá, глагóлюще, Спас сýщим в вéре,// изыди́те, вéрнiи, в воскресéнiе.
Íкос: Вострепетáша дóле преиспóдняя днесь,/ ад и смерть Еди́наго от Трóицы:/ земля́ поколебáся, врáтницы же áдовы ви́девше Тя, ужасóшася:/ вся же тварь со прорóки рáдующися поéт Тебè побéдную песнь,/ избáвителю Бóгу нáшему,/ разруши́вшему ны́не смéртную си́лу./ Да воскли́кнем и возопiи́м ко Адáму, и к сýщим из Адáма:/ дрéво сегó пáки введè.// Изыди́те, вéрнiи, в воскресéнiе.
ПЕСНЬ 7
Iрмóс: Пещь óтроцы огнепáльну/ дрéвле росоточáщу показáша,/ Едúнаго Бóга воспевáюще и глагóлюще:/ превозносúмый отцéв Бог// и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Дрéвом умерщвля́ется Адáм, вóлею преслушáнiе содéлав:/ послушáнiем же Хрїстóвым пáки обновля́емь есть.// Менè бо рáди распинáется Сын Бóжiй, препрослáвленный.
Хор: Слáва, Гóсподи, Святóму Воскресéнiю Твоемý.
Чтец: Тебè воскрéсшаго, Хрїстè, из грóба, тварь вся воспè:/ Ты бо жизнь сýщим во áде процвéл еси́,/ мéртвым воскресéнiе,// и́же во тьме, свет препрослáвленный.
Хор: Пресвятáя Богорóдице, спасù нас.
Богорóдичен: Рáдуйся, Дщи Адáма тлéннаго./ Рáдуйся, еди́на Богоневéсто./ Рáдуйся, éюже тля изгнáна бысть, я́же Бóга рóждши:// Егóже моли́, Чи́стая, спасти́ся всем нам.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на дрéве крéстнем грехóвное жáло притупи́в,/ и Адáмова преступлéнiя рукописáнiе разруши́в копiéм ребрá Твоегó,// благословéн еси́, Гóсподи Бóже отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же в ребрó прободéн быв,/ и кроплéньми крóве божéственныя зéмлю очи́стив,/ кровьми́ идолобéсiя осквернéнную,// благословéн еси́, Гóсподи Бóже отéц нáших.
Глас 7
Хор: Пресвятáя Богорóдице, спасù нас.
Чтец: Преиспещрéну, позлащéну ýтварь Тя имýщу/ возлюби́ Создáтель Твой, Дéво, и Госпóдь:// превозноси́мый отцéв Бог и препрослáвлен.
Хор: Пресвятáя Богорóдице, спасù нас.
Чтец: Очищáется, Отрокови́це, угль дрéвле Исáiа прiéм:/ знаменáтельне Твоé рождествó ви́дев,// превозноси́маго отцéв Бóга, и препрослáвлена.
Глас 2
Хор: Преподóбне óтче Варлаáме, молù Бóга о нас.
Чтец: Зéльным пощéнiем, я́ко благовóнною пи́щею, питáя дýшу твою́, преподóбне Варлаáме,/ тéмже и Трисóлнечному Божествý предстоя́, со áнгелы поéши:// благословéн Бог отéц нáших. (Двáжды)
Хор: Преподóбне óтче Варлаáме, молù Бóга о нас.
Чтец: Облистáл еси́ я́коже невечéрнее сóлнце, отéчество твоè просвещáя, преподóбне Варлаáме,/ тьмы избавля́я страстéй, и на нас навéтующих совéты разори́,/ от враг непреткновéнным бы́ти нам, пою́щим:// благословéн Бог отéц нáших.
Хор: Преподóбне óтче Варлаáме, молù Бóга о нас.
Чтец: Я́ко на Божéственную добродéтелей лéствицу воздержáнiем, óтче, возшéд,/ ýмными очесы́ Хрїстá Царя́ ви́дел еси́,/ оби́льною десни́цею по числý добродéтелей, Варлаáме, даровáнiя даю́ща от души́ вопiю́щим:// благословéн Бог отéц нáших.
Слáва Ѻтцý и Сы́ну и Святóму Дýху.
Тропáрь: Дремáнiя отню́д и сна твои́м очесéм не дал еси́,/ дóндеже возмéздiе от Хрїстá трудóв обрéл еси́, наслаждéнiе Небéснаго Цáрствiя,/ éже уготóва от вéры пою́щим:// благословéн Бог отéц нáших.
И ны́не и прúсно и во вéки векóв. Амúнь.
Богорóдичен: Обновля́ются в Тебè естествá закóни:/ пáче естествá бо естествóм Непостижи́маго, Дéво,/ Бóга Емманýила преслáвно, Чи́стая, родилá еси́// в нáше вéрных обновлéнiе.
Катавáсiя (глас 4): Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: Неопáльная огню́ в Сiнáи причáщшаяся Купинá,/ Бóга явù медленоязы́чному и гугнúвому Моисéови,/ и óтроки рéвность Бóжiя/ три непреборúмыя во огнù певцы́ показá:/ вся делá Госпóдня Гóспода пóйте,// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Пречи́стый Áгнец словéсный за мiр заклáн быв,/ престáви я́же по закóну приноси́мая,/ очи́стив сегó кромè прегрешéнiй я́ко Бог, при́сно зовýща:// вся делá Госпóдня, Гóспода пóйте, и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Нетлéнна не сýщи прéжде стрáсти,/ воспрiя́тая от Создáтеля плоть нáша,/ по стрáсти и воскресéнiи неприкосновéнна тлéнiю устрóися,/ и смéртныя обновля́ет, зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Богорóдичен: Твоé чистóтное и всенепорóчное, Дéво,/ сквéрное и мéрзское вселéнныя очи́сти,/ и былá еси́ нáшего примирéнiя к Бóгу винá, Пречи́стая:/ тéмже Тя, Дéво, вся делá благослови́м,// и превознóсим во вся вéки.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Претерпéвшаго стрáсти вóлею,/ и на крестè пригвождéна хотéнiем,/ и разрýшшаго си́лы áдовы,// пóйте свящéнницы, лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: Упраздни́вшаго смéрти держáву,/ и от грóба воскрéсшаго со слáвою,/ и спáсшаго человéческiй род,// пóйте свящéнницы, лю́дiе превозноси́те во вся вéки.
Глас 7
Хор: Пресвятáя Богорóдице, спасù нас.
Чтец: Свéтом рождествá Твоегó,/ страннолéпно вселéнную просвети́ла еси́, Богороди́тельнице,/ сýща бо вои́стинну Бóга на объя́тiях нóсиши Твои́х,/ просвещáюща вéрныя при́сно зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Чтец: Поéм, Чи́стая, благочéстно Твоè чрéво,/ Бóга вмести́вшее несказáнно воплощáема,/ дáвшаго всем вéрным богоразýмiя просвещéнiе, при́сно зовýщим:/ вся делá Госпóдня Гóспода пóйте,// и превозноси́те во вся вéки.
Глас 2
Хор: Преподóбне óтче Варлаáме, молù Бóга о нас.
Чтец: Слезáми твои́ми, óтче Варлаáме, умывáяся, житiè прошéл еси́,/ и тéми мнóжества дéмонов потопи́л еси́,/ вéрных же мы́сли возвесели́л еси́, пою́щих:// вся делá Гóспода пóйте и превозноси́те Егó во вéки. (Двáжды)
Хор: Преподóбне óтче Варлаáме, молù Бóга о нас.
Чтец: Уязви́лся еси́ Божéственным желáнiем, всеблажéнне,/ тéмже и непорóчное и прáведное житiè проходи́, дóндеже дости́гл еси́ цáрскаго престóла,/ отонýдными светлостьми́ осiя́я пою́щiя:// вся делá Гóспода пóйте и превозноси́те Егó во вéки. (Двáжды)
Благословúм Отцá, и Сы́на, и Святáго Дýха, Гóспода.
Тропáрь: К Свéту незаходи́мому, слáвне, взя́лся еси́,/ наслаждéнiе же земны́х вещéй оплевáв вы́шняго рáди наслаждéнiя,/ пáче воздержáнiю поревновáл еси́/ и страстéй плáмень потщáлся еси́ угаси́ти слезáми твои́х истóчник, Варлаáме, вопiя́:// вся делá Гóспода пóйте и превозноси́те Егó во вéки.
И ны́не и прúсно и во вéки векóв. Амúнь.
Богорóдичен: Распя́тiе и погребéнiе, И́же от Тебè небрáчно, Дéво, произы́де,/ претерпéв нас рáди мучéнiе, / Егóже страстéм ревнýя, преподóбный Варлаáм// крестови́дно мучéнiя пощéнiем Томý, Чи́стая, послéдова.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочестúвыя в пещù/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делá,// и превозносúте Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Продолжéнiе здесь