Неделя 24 по Пятидесятнице. Прп. Варлаама Хутынского, глас 7 УТРЕНЯ (окончание) ЧАС ПЕРВЫЙ
19 ноября́ 2023 гóда. Недéля 24 по Пятидеся́тнице. Преподóбнаго отцá нáшего Варлаáма Новгорóдскаго чудотвóрца, игýмена Хýтыня монастыря́. Глас 7. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы́ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нетлéнiя искушéнiем рóждшая,/ и всехитрецý Слóву плоть взаимодáвшая,/ Мáти неискусомýжная Дéво Богорóдице,/ Прiя́телище Нестерпúмаго,/ Селó Невместúмаго Зиждúтеля Твоегó,// Тя величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же божествý страсть прилагáющiи,/ заусти́теся вси чуждемýдреннiи:/ Гóспода бо слáвы плóтiю распя́та,/ не распя́та же естествóм божéственным,// я́ко во двою́ естествý Еди́наго величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же телесéм востáнiю невéрующiи,/ ко Хрїстóву шéдше грóбу, научи́теся:/ я́ко умерщвлéна бысть, и воскрéсе пáки плоть Жизнодáвца,// во уверéнiе послéдняго воскресéнiя, на нéже уповáем.
Хор: Пресвятáя Богорóдице, спасù нас.
Богорóдичен: Не божéств Трóицу, но Ипостáсей,/ нижè еди́ницу Лиц, но Божествá чтýще,/ ссецáем же Сiю́ деля́щих:// сливáем же пáки, слiя́нiе дерзáющих на Сiю́, Ю́же величáем.
Глас 7
Хор: Слáва, Гóсподи, Крестý Твоемý Честнóму и Воскресéнiю.
Чтец: Свет от Свéта, Ѻ́тчее сiя́нiе слáвы безлéтно осiя́вый,/ я́коже во тьме человéческому житiю́ Хрїстóс возсiя́,/ и гоня́щую прогнá тьму:// егóже непрестáнно вéрнiи величáем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Стрáсти плотскíя, и крéпость божествá, во Хрїстè ви́дяще,/ мýдрствующiи еди́но слóжное естествó, да посрáмятся:/ той бо я́ко человéк ýбо умирáет,// я́коже всегó Содéтель востаéт.
Глас 7
Хор: Пресвятáя Богорóдице, спасù нас.
Чтец: Рáдости нам вéчныя ходáтаица и весéлiя яви́лася еси́/ Приснодéво Отрокови́це, Избáвителя рóждши,/ и҆́стиною и Дýхом божéственным Тогó чтущих,// я́ко Бóга избавля́ющаго.
Хор: Пресвятáя Богорóдице, спасù нас.
Чтец: Поя́ Давíд, Твой прáотец, Пречи́стая, Тя/ ковчéг именýет Святы́ни божéственныя,/ преестéственне Бóга вмести́вшую,/ во Отéческих Седя́щаго нéдрех,// Егóже непрестáнно вéрнiи величáем.
Глас 2
Хор: Преподóбне óтче Варлаáме, молù Бóга о нас.
Чтец: Пожи́в на земли́ равноáнгельно, равноáнгельну обрéл еси́ свéтлость,/ моли́ непрестáнно Избáвителя, Варлаáме, о творя́щих благочéстно пáмять твою́,// о преблажéнне! монáшествующих похвалó. (Двáжды)
Хор: Преподóбне óтче Варлаáме, молù Бóга о нас.
Чтец: Узкiй и прискóрбный шéствовав путь, óтче Варлаáме,/ и телéсне ýбо престáвился еси́, дýхом же жив, предстои́ши Бóгу.// Но я́ко имéя дерзновéнiе, Емýже в житiи́ рабóтал еси́, моли́ спасти́ дýшы нáша. (Двáжды)
Слáва Ѻтцý и Сы́ну и Святóму Дýху.
Тропáрь: Исцелéнiй яви́лся еси́ струя́ оби́льная,/ многомятéжнаго плáмене ýглiе страстéй угаси́л еси́./ Ум бо твóй неокрáден, преподóбне óтче, соблю́л еси́// и, я́ко крéпок, Варлаáме, побеждáеши искуси́теля.
И ны́не и прúсно и во вéки векóв. Амúнь.
Богорóдичен: Еди́на имýщи дерзновéнiе, Влады́чице,/ за весь мір Сы́ну Твоемý моли́ся, не поминáя безчи́сленных соблáзн нáших,/ и покры́й лю́ди, вопiю́щыя Ти́ умилéнным глáсом:// спаси́, Чи́стая Богорóдице, тебè достóйно величáющыя.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чúстая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный вторы́й: Кáмень узрéвша отвалéн, миронóсицы рáдовахуся,/ ви́деша бо ю́ношу седя́ща во грóбе,/ и той тем речè: се Хрїстóс востáл есть,/ рцы́те с Петрóм ученикóм:/ на гóру приспéйте Галiлéйскую, тáмо вам яви́тся,// я́коже предречè другóм.
Слáва Ѻтцý и Сы́ну и Святóму Дýху.
Светúлен прп. Варлаáма Хýтынскаго: Востóка востóков, разýмнаго Сóлнца, Хрїстá, светозáрная лучá возсiя́, / и свети́льник многосвéтлый, пусты́нное воспитáнiе и чистоты́ крáсная оби́тель, / Хрїстóвы добрóты я́сно зря, / Егóже сiя́ньми ум твой озари́л еси́. / Тéмже тя свети́льника стяжáвше, óтче наш Варлаáме, // мóлим тя́ в ми́ре сохранéнным бы́ти пáмять твою́ почитáющим.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Áнгел ýбо принесè Дéве, éже рáдуйся,/ прéжде Твоегó зачáтiя, Хрїстè,/ Áнгел же кáмень отвали́ грóба Твоегó,/ вмéсто печáли ов ýбо рáдости неизречéнныя знáменiя,/ ов же в смéрти мéсто подáтеля Тя жи́зни проповéдуя и величáя,// и глагóля воскресéнiе женáм, и таи́нником.
ХВАЛИТНЫ
Хор, глас 7: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебè подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебè подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 7: Воскрéсе Хрїстóс из мéртвых,/ разрýш смéртныя ýзы:/ благовести́ землè, рáдость вéлiю,// пóйте Небесá Бóжiю слáву.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Воскресéнiе Хрїстóво ви́девше,/ поклони́мся святóму Гóсподу Iисýсу:// еди́ному безгрéшному.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Хрїстóву воскресéнiю клáняющеся не престáем:/ Той бо спасл есть нас от беззакóнiй нáших,/ Святы́й Госпóдь Iисýс,// явлéй воскресéнiе.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Что воздáмы Гóсподеви о всех, я́же воздадè нам?/ Нас рáди Бог в человéцех,/ за истлéвшее естествó Слóво плоть бысть,/ и всели́ся в ны, к неблагодáрным, Благодéтель:/ к плéнником, Свободи́тель:/ ко и҆́же во тьме седя́щим, Сóлнце Прáвды:/ на Крестè, безстрáстный: во áде, свет:/ в смéрти, живóт: воскресéнiе, пáдших рáди./ К Немýже возопiи́м:// Бóже наш, слáва Тебè.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры Варлаáма Хýтынскаго, глас 4: Божéственная и светонóсная настá пáмять/ в пóстницех вели́каго Варлаáма,/ дýшу и тéло веселя́щая,/ Тéмже прiиди́те, празднолю́бцы,/ я́ко да наслади́мся ны́нешняго торжествá./ Се бо нáше звáнiе прiи́де,/ всея́ вели́кiя Россíйскiя земли́ удобрéнiе,/ вели́каго же Новáграда похвалá и утверждéнiе,/ снаслéдник бо Хрїстóв быв/ и Безплóтных житiя́ подражáтель,/ мóлится Спáсу всех// умири́ти мір и спасти́ дýшы нáша.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Я́ко в терпéнiи мног и в злóбе удобоотдáтлив/ в животè и по смéрти, óтче, показáлся еси́./ Всем, вéрою приходя́щим, исцелéнiя оби́льно подавáеши,/ хромы́м хождéнiе и дýхи лукáвыя прогоня́еши./ Пáмять твоя́ слáвна, и успéнiе со святы́ми,/ Варлаáме, óтче наш./ Тéмже, уверя́еми, глагóлем:/ пáмять прáведнаго с похвалáми бывáет.
Честнá пред Гóсподем/ смерть преподóбных Егó. (Пс.115:6)
Стiхúра: Дýха Божéственнаго благодáтiю сóбрани, празднолю́бцы,/ Варлаáма, благочéстiя подражáтеля,/ веселя́щеся, восхвáлим днесь,/ Цéркве пресвéтлаго свети́льника,/ тéло бо неудобопокори́вое/ воздержáнiя броздáми я́ве низложи́/ и благопокори́во души́ повинýл есть./ Тéмже Божéственнаго Дýха сосýд достóин уготóвася/ и, Трóице со Áнгелы предстоя́,/ мóлится непрестáнно/ о умирéнiи мíра и спасéнiи душ нáших.
Блажéн муж, боя́йся Гóспода,/ в зáповедех Егó восхóщет зелó.(Пс.111:1)
Глас 8: Всечестнáѧ и҆ чꙋдотвóрнаѧ рáка, идѣ́же лежи́т всечестнóе и святóе тѣ́ло твоè,/ Варлаáме, óтче наш,/ исцелéнiя неоску́дно подаéт притекáющим с вéрою,/ и душетлéнная стрáсти исцеля́ющи,/ мнóжества же дéмонская отревáющи./ Тéмже и стадá монáхов/ со архiерéйскими ли́ки, чудесы́ удивля́еми,/ достолéпно и рáдостно от души́ вопiéм:/ Богоблажéнне и преподóбне óтче наш Варлаáме,/ моли́ Хрїстá Бóга/ ущéдрити мiр и спасти́ дýшы нáша.
Слáва Отцý и Сыну и Святóму Дýху.
Стiхúра евáнгельская вторáя, глас 2: С ми́ры пришéдшим я́же с Марíею женáм,/ и недоумевáющимся,/ кáко бýдет им улучи́ти желáнiе,/ яви́ся кáмень взят,/ и Божéственный ю́ноша утоля́я мятéж душ их,/ востá бо, глагóлет, Iисýс Госпóдь./ Тéмже проповéдите проповéдником Егó,/ ученикóм в Галiлéю тещи́,/ и ви́дети Егó воскрéсша из мéртвых,// я́ко Жизнодáвца и Гóспода.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоè во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был есѝ нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 рáза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегó, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредè дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 7: Разруши́л есѝ Крестóм Твои́м смерть,/ отвéрзл есѝ разбóйнику рай;/ мvронóсицам плач преложи́л есѝ/ и Апóстолом проповéдати повелéл есѝ/, я́ко воскрéсл есѝ, Хрїстè Бóже,/ дáруяй мíрови// вéлiю ми́лость.
Слáва Отцý и Сы́ну и Святóму Дýху.
Тропáрь прп. Варлаáма Хýтынскаго, глас 3: И́же на землѝ легáнiем,/ пощéнiем же и бдéнiем/ тéло твоè изнуря́я, преподóбне,/ вся плотскáя мудровáнiя умертви́л есѝ;/ и исцелéнiй струя́ незави́стная яви́лся есѝ/ вéрою притекáющим к тебè, Варлаáме óтче наш,/ молѝ Хрїстá Бóга/ спасти́ся душáм нáшим.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк Варлаáма Хýтынскаго, глас 8: Я́коже другíй Илiя́, óтче, дождь с небесè свел есѝ,/ он ýбо огнь сведè и царя́ удивѝ,/ ты же лю́ди твоя́ возвесели́л есѝ/ и торжествовáти устрóил есѝ./ Вели́кiй бо Новгрáд вельмѝ тобóю хвáлится,/ имéя мóщи твоя́ в себè,/ егóже сохраня́й от враг непоколеби́ма, да зовéм ти:/ рáдуйся, преподóбне Варлаáме, óтче наш.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победúтельная,/ я́ко избáвльшеся от злых,/ благодáрственная восписýем Ти рабù Твоù, Богорóдице;/ но я́ко имýщая держáву непобедúмую,/ от вся́ких нас бед свободù, да зовéм Ти:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу