Неделя 22 по Пятидесятнице. Апостола Иакова, брата Господня по плоти. ВСЕНОЩНОЕ БДЕНИЕ. УТРЕНЯ КАНОН
5 ноября́ 2023 гóда. Недéля 22 по Пятидеся́тнице. Апóстола Iáкова брáта Госпóдня по плóти. Глас 5. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 5: Áнгельским зрáком ум смущáюща,/ и Божéственным востáнiем душéю просвещáемы,/ мvронóсицы апóстолом благовествовáху:/ возвести́те во язы́цех Воскресéнiе,/ Гóсподу содéйствующу чудесы́,// подаю́щему нам вéлiю ми́лость.
СТЕПЕННА, ГЛАС 5
1 АНТИФОН
Хор: Внегдá скорбéти мне,/ Давíдски пою́ Тебè, Спáсе мой:// избáви дýшу мою́ от язы́ка льстúваго. (Двáжды)
Пусты́нным живóт блажéн есть,// Божéственным рачéнiем воскриля́ющимся. (Двáжды)
Слáва Ѻтцý и Сы́ну и Святóму Дýху.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
И ны́не и прúсно и во вéки векóв. Амúнь.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
2 АНТИФОН
На гóры душè, воздвúгнемся,// грядù тáмо, отню́дуже пóмощь и҆́дет. (Двáжды)
Деснáя Твоя́ рукá, и менè, Хрїстè, касáющися,// от лéсти вся́кiя да сохрани́т. (Двáжды)
Слáва Ѻтцý и Сы́ну и Святóму Дýху.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
И ны́не и прúсно и во вéки векóв. Амúнь.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
3 АНТИФОН
О рéкших мне: во дворы́ внúдем Госпóдня:// рáдости мнóгiя испóлнен быв, молúтвы возсылáю. (Двáжды)
В домý Давíдове стрáшная совершáются:// огнь бо тáмо паля́ всяк срáмный ум. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцè, кýпно же и Слóве.
И ны́не и прúсно и во вéки векóв. Амúнь.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцè, кýпно же и Слóве.
ПРОКИМЕН
Чтец: Прокíмен, глас пя́тый, псалóм Давíдов: Воскреснѝ, Гóсподи Бóже мой, да вознесéтся рукá Твоя́, я́ко Ты цáрствуеши во вéки. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Исповéмся Тебè, Гóсподи, всем сéрдцем мои́м, повéм вся чудесá Твоя́. (Пс.9:2)
Хор: Воскреснù, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Воскреснѝ, Гóсподи Бóже мой, да вознесéтся рукá Твоя́.
Хор: Я́ко Ты цáрствуеши во вéки.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.67): Во врéмя óно, яви́ся Iисýс ученикóм Свои́м, востáв от мéртвых, и глагóла Сíмону Петрý: Сíмоне Ióнин лю́биши ли мя, пáче сих? Глагóла Емý: ей Гóсподи, Ты вéси, я́ко люблю́ Тя. Глагóла емý: паси́ áгнцы Моя́. Глагóла емý пáки вторóе: Сíмоне Ióнин, лю́биши ли Мя? Глагóла Емý: ей Гóсподи, Ты вéси, я́ко люблю́ Тя. Глагóла емý: паси́ óвцы Моя́. Глагóла емý трéтiе: Сíмоне Ióнин, лю́биши ли Мя? Оскорбé же Петр, я́ко речé емý трéтiе, лю́биши ли Мя? И глагóла Емý: Гóсподи, Ты вся вéси, Ты вéси, я́ко люблю́ Тя. Глагóла емý Iисýс: паси́ óвцы Моя́. Ами́нь, ами́нь глагóлю тебé: егдá бе юн, поя́сашеся сам, и хождáше, áможе хотя́ше: егдá же состарéешися, и воздéжеши рýце твои́: и ин тя поя́шет, и ведéт áможе не хóщеши. Сié же речé, назнáменуя кóею смéртiю прослáвит Бóга. И сiя́ рек, глагóла емý: иди́ по Мне. Обрáщься же Петр ви́де ученикá егóже любля́ше Iисýс, во след идýща, и҆́же и возлежé на вéчери на пéрси Егó, и речé: Гóсподи, кто есть предая́й Тя? Сегó ви́дев Петр, глагóла Iисýсови: Гóсподи, сей же что? Глагóла емý Iисýс: áще хощý, да той пребывáет дóндеже прiидý, что к тебé? Ты по Мне гряди́. Изы́де же слóво се в брáтiю, я́ко учени́к той не ýмрет: и не речé емý Iисýс, я́ко не ýмрет: но áще хощý томý пребывáти дóндеже прiидý, что к тебé? Сей есть учени́к свидéтельствуяй о сих, и҆́же и написá сiя: и вем, я́ко и҆́стинно есть свидéтельство егó. Суть же и и҆́на мнóга, я́же сотвори́ Iисýс: я́же áще по еди́ному пи́сана бывáют, ни самомý мню всемý мíру вмести́ти пи́шемых книг, ами́нь.
[Синодальный перевод]В те дни явился Иисус ученикам своим, и говорит Симону Петру: Симон Ионин! любишь ли ты Меня больше, нежели они? Петр говорит Ему: так, Господи! Ты знаешь, что я люблю Тебя. Иисус говорит ему: паси агнцев Моих. Еще говорит ему в другой раз: Симон Ионин! любишь ли ты Меня? Петр говорит Ему: так, Господи! Ты знаешь, что я люблю Тебя. Иисус говорит ему: паси овец Моих. Говорит ему в третий раз: Симон Ионин! любишь ли ты Меня? Петр опечалился, что в третий раз спросил его: любишь ли Меня? и сказал Ему: Господи! Ты все знаешь; Ты знаешь, что я люблю Тебя. Иисус говорит ему: паси овец Моих. Истинно, истинно говорю тебе: когда ты был молод, то препоясывался сам и ходил, куда хотел; а когда состаришься, то прострешь руки твои, и другой препояшет тебя, и поведет, куда не хочешь. Сказал же это, давая разуметь, какою смертью Петр прославит Бога. И, сказав сие, говорит ему: иди за Мною. Петр же, обратившись, видит идущего за ним ученика, которого любил Иисус и который на вечери, приклонившись к груди Его, сказал: Господи! кто предаст Тебя? Его увидев, Петр говорит Иисусу: Господи! а он что? Иисус говорит ему: если Я хочу, чтобы он пребыл, пока приду, что тебе до того? ты иди за Мною. И пронеслось это слово между братиями, что ученик тот не умрет. Но Иисус не сказал ему, что не умрет, но: если Я хочу, чтобы он пребыл, пока приду, что тебе до того? - Сей ученик и свидетельствует о сем, и написал сие; и знаем, что истинно свидетельство его. Многое и другое сотворил Иисус; но, если бы писать о том подробно, то, думаю, и самому миру не вместить бы написанных книг. Аминь. (21:15-25)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо еси́ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 5
(совмещéнный с канóном крестовоскрéсным, глас 5; Богорóдицы глас 5 и канóном ап. Iáкова брáта Госпóдня, глас 4)
ПЕСНЬ 1
Iрмóс: Коня́ и всáдника в мóре Чермнóе,/ сокрушáяй брáни/ мы́шцею высóкою,/ Хрїстóс истрясè,/ Iзрáиля же спасè,// побéдную песнь пою́ща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Тебè тернонóсный еврéйскiй сонм,/ любвè, Благодéтелю, к Тебè не сохрáнь мáтернiя, Хрїстè, венчá,// родоначáльника разрешáюща тернóвное запрещéнiе.
Хор: Слáва, Гóсподи, Святóму Воскресéнiю Твоемý.
Чтец: Воздви́гл есѝ мя пáдшаго в ров,/ преклóнься, Жизнодáвче Безгрéшне:/ и моея́ злосмрáдныя тли, Хрїстè, претерпéв неискушéнно,// Божéственнаго Существá ми́ром мя облагоухáл есѝ.
Хор: Пресвятáя Богорóдице, спасù нас.
Богорóдичен: Разреши́ся кля́тва, печáль престá:/ Благословéнная бо и Благодáтная,/ вéрным рáдость возсiя́,// благословéнiе всем концéм цветонося́щи Хрїстá.
Канон крестовоскресный, глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же вóлею на крестè пригвождéнному плóтiю,/ и дрéвняго от изречéнiя дрéвом пáдшаго свобóждшему,// Томý Еди́ному воспои́м: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же из грóба мертвецý воскрéсшу Хрїстý, и пáдшаго совозстáвившу,/ и соседéнiем Отéческим украси́вшему,// Томý Еди́ному воспои́м: я́ко прослáвися.
Канон Богородицы, глас 5
Хор: Пресвятáя Богорóдице, спасù нас.
Чтец: Свéта всéльшагося в Тя, Пречи́стая,/ и просвéщшаго мíр лучáми Божествá,/ Хрїстá молѝ,// просвети́ти вся пою́щiя Тя, Мáти Дéво.
Хор: Пресвятáя Богорóдице, спасù нас.
Чтец: Я́ко украшáема добрóтою добродéтелей, Благодáтная,/ добротвóрное благолéпiе лучéю Дýха,// подъя́ла есѝ, Всечи́стая, вся́ческая удобри́вшаго.
Канон ап. Иакова, глас 4
Хор: Святы́й апóстоле Iáкове, молù Бóга о нас.
Чтец: Дая́нiю благóму, Iáкове,/ и дáру совершéнну от Отцá свéтов человéком подая́тися, учи́ши я́ве,// Емýже причасти́тися, апóстоле, тя пою́щим помоли́ся.(Двáжды)
Хор: Святы́й апóстоле Iáкове, молù Бóга о нас.
Чтец: Свéтом просвещéн, дóблiй, Божéственнаго Дýха/ и с Ним закóны изложи́в,// Цéркви управля́еши язы́ков, я́ко Хрїстóв апóстол, священнотаи́нниче всеблажéнне.(Двáжды)
Слáва Ѻтцý и Сы́ну и Святóму Дýху.
Тропáрь: Лик апóстольскiй, всемýдре, я́ве украси́л еси́,/ я́ко пéрвый iерáрх быв, самодéйством Слóва помáзан я́ко учени́к и брат Бóжiй,// священнопроповéдник свящéннейшiй.
И ны́не и прúсно и во вéки векóв. Амúнь.
Богорóдичен: Истóчник Тя исцелéнiй имýще,/ почерпáем, я́ко Истóчник рóждшую жи́зни, Богорóдице Дéво Чи́стая,// и душ врачевствó, и телéс обновлéнiе.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Водрузúвый на ничесóмже зéмлю повелéнiем Твоúм,/ и повéсивый неодержúмо тяготéющую/ на недвúжимем, Хрїстè, кáмени зáповедей Твоúх,// Цéрковь Твою́ утвердù, Едúне Блáже и Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Желчь ýбо и҆́же из кáмене мед ссáвшiи,/ в пусты́ни чудодéйствовавшему Тебè принесóша, Хрїстè:/ óцет же за мáнну воз благодея́нiе Ти воздáша// óтроцы Iзрáилевы неблагодáрнiи.
Хор: Слáва, Гóсподи, Святóму Воскресéнiю Твоемý.
Чтец: И҆́же дрéвле светови́дным óблаком покрывáеми,/ Живóт во грóбе Хрїстá положи́ша:/ но самовлáстно воскрéс, всем вéрным подадè// тáйно осеня́ющее свы́ше Дýха сiя́нiе.
Хор: Пресвятáя Богорóдице, спасù нас.
Богорóдичен: Ты Мáти Бóжiя несочетáнно родилá есѝ,/ И҆́же от Нетлéнна Отцá возсiя́вшаго, кромè болéзней мáтерних:/ тéмже Тя, Богорóдицу, воплощéнна бо родилá еси́ Слóва,// правослáвно проповéдуем.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскрéсл есѝ от грóба, Хрїстè,/ тли смéртныя избáвль// воспевáющих, Жизнодáвче, вóльное Твоè распя́тiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Помáзати ми́ром тéло Твоè мvронóсицы, Хрїстè, тщáхуся,/ и не обрéтша возврати́шася,// воспевáюща Твоè Востáнiе.
Глас 5
Хор: Пресвятáя Богорóдице, спасù нас.
Чтец: Лéствица, Éюже к нам сни́де Вы́шнiй,/ истлéвшее естествó испрáвити,/ Ты я́вственно, Чи́стая, всем ны́не ви́дена былá еси́:// Тобóю бо Преблагíй мíрови бесéдовати благоволѝ.
Хор: Пресвятáя Богорóдице, спасù нас.
Чтец: Éже дрéвле предустáвленное, Дéво, тáинство,/ и прéжде век прови́димое вся вéдущему Бóгу,/ лéтом ны́не напослéдок в ложеснáх Твои́х, Всенепорóчная,// конéц прiéм яви́ся.
Глас 4
Хор: Святы́й апóстоле Iáкове, молù Бóга о нас.
Чтец: Весели́тся о тебé колéно Iýдово днесь,// Хрїстóвыми светлостьми́ ви́де тя свéтло облистáюща.(Двáжды)
Хор: Святы́й апóстоле Iáкове, молù Бóга о нас.
Чтец: Звездý Богосiя́нну Цéрковь язы́чная имýщи тя,/ благослáвнаго проповéдателя,// и Божéственным Свéтом озаря́ется.(Двáжды)
Слáва Ѻтцý и Сы́ну и Святóму Дýху.
Тропáрь: Закóн ты жи́зни Цéркви Хрїстóве положи́л еси́,// Жизнодáтельным Дýхом ты законополагáя и вещáя.
И ны́не и прúсно и во вéки векóв. Амúнь.
Богорóдичен: Егóже родилá еси́ плóтiю, о Богомáти,/ из Отцá Возсiя́вшаго,// Тогó, Чи́стая, Iáков я́ко Бóга всех проповéда.
Катавáсiя (глас 4): Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшiя, духóвно утвердù,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк апóстола Iáкова, глас 3: Óтчее Единорóдное Бог Слóво,/ пришéдшее к нам в послéднiя дни,/ Iáкове Божéственне,/ пéрваго тя показá Iерусали́млян пáстыря и учи́теля,/ и вéрнаго строи́теля тáинств духóвных:// тéмже тя вси чтим, апóстоле.
Íкос: Рождéнiе тя Ióсифово, Iерусали́ма пéрваго iерéрха, Iáкове Богови́дче, и Госпóдня брáта/ пéсньми похвáльными воспоéм вéрно и к тебè возопiéм:/ дáруй нам дар совершéн от Отцá свéтов/ и отжени́ скорбь, настоя́щую от мнóжества прегрешéнiй,/ поднесóша бо врази́ на ны пя́ту и обступи́ша нас iсмáильтяне,// и́хже сокруши́ вскóре лýки, священноявлéнне, я́ко да тя вси почитáем, апóстоле.
Седáлен ап. Iáкова, глас 8: Срóдник по плóти Iисýсов был еси́,/ и от Негó, апóстоле, благодáть мнóгу прiя́л еси́/ и всем препóдал еси́ просвещéнiе и рáзум, всемýдре Iáкове,/ и íдольскую лесть из кóрене истóргнув./ Тем, и́же тьмы предстáтели и лестцы́, непрáведно тя убивáют, Спáса проповéдающа./ Сегó рáди вопiéм ти:/ моли́ Хрїстá Бóга грехóв оставлéнiе даровáти чтýщим любóвiю святýю пáмять твою́.(Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен из минéи, глас 8: Сóлнца óблаче разýмнаго,/ Божéственнаго Свéта Свети́льниче златоковáнный,/ Несквéрная, Неблáзная, Всенепорóчная Влады́чице,/ омрачéнную дýшу мою́ ослеплéнiем страстéй,/ безстрáстiя зарéю просвети́, молю́ся;/ и осквернéнное моé сéрдце омы́й потóки умилéнiя, покая́нiя же слезáми,/ и от тимéнiя мя очи́сти дел мои́х,/ да любóвiю зовý Ти:/ Богорóдице Приснодéво, моли́ Хрїстá Бóга прегрешéнiй оставлéнiе подáти ми,// Тебé бо имéю надéжду, раб Твой.
ПЕСНЬ 4
Iрмóс: Божéственное Твоé разумéв истощáнiе/ прозорлúво, Аввакýм, Хрїстè, со трéпетом вопiя́ше Тебè:/ во Спасéнiе людéй Твоúх// спастù помáзанныя Твоя́ пришéл есù.
Хор: Слáва, Гóсподи, Святóму Воскресéнiю Твоемý.
Чтец: Я́же от Мéрры горчáйшыя вóды,/ я́ко во óбразе проначертáя Пречи́стый Крест Твой, Блáже,/ грехóвное умерщвля́ющ вкушéнiе,// дрéвом услади́л есѝ.
Хор: Слáва, Гóсподи, Святóму Воскресéнiю Твоемý.
Чтец: Крест за дрéво разýмное,/ за слáдкую же пи́щу желчь, Спáсе мой, прiя́л есѝ,// за тлéнiе же смéрти кровь Твою́ Божéственную излiя́л есѝ.
Хор: Пресвятáя Богорóдице, спасù нас.
Богорóдичен: Кромè ýбо сочетáнiя зачалá есѝ нетлéнно во чрéве,/ и без болéзни родилá есѝ,// и по Рождествé, Дéва, Бóга плóтiю рóждши, сохрани́лася есѝ.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко водрузи́ся на землѝ на лóбнем Крест,/ сокруши́шася вереѝ и врáтницы вéчнiи,// и возопи́ша: слáва си́ле Твоéй, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко сни́де Спас к свя́занным я́ко мертв,/ совоскресóша с Ним и҆́же от вéка умéршiи,// и возопи́ша: слáва си́ле Твоéй, Гóсподи.
Глас 5
Хор: Пресвятáя Богорóдице, спасù нас.
Чтец: Сéрдцем и умóм, душéю же и усты́/ исповéдую всеблагочéстно Тя, Богорóдицу вои́стинну, Чи́стая,/ спасéнiя плод объéмля,// и спасáюся Дéво, моли́твами Твои́ми.
Хор: Пресвятáя Богорóдице, спасù нас.
Чтец: Создáвый от не сýщих вся́ческая,/ от Тебè, Чи́стыя, создáтися я́ко Благодéтель, благоволѝ,// на Спасéнiе вéрою и любóвiю Тя пою́щих, Всенепорóчная.
Глас 4
Хор: Святы́й апóстоле Iáкове, молù Бóга о нас.
Чтец: Ввел есѝ в мóре Твоя́ кóни, апóстолы, Спáсе,/ и просвети́ша язы́ки, к Твоемý познáнiю привлéкше, Влады́ко.(Двáжды)
Хор: Святы́й апóстоле Iáкове, молù Бóга о нас.
Чтец: Несквéрно, я́ко зерцáло, я́влься,/ и перводéтельныя лучѝ Несоздáнныя Трóицы извéстно прiéм,// всем возсiя́л есѝ.(Двáжды)
Слáва Ѻтцý и Сы́ну и Святóму Дýху.
Тропáрь: Валя́емаго тя кáменя прорóчество освящéнное зрит/ и сокрушáюща прéлести гнилóе сýетство// си́лою Дýха.
И ны́не и прúсно и во вéки векóв. Амúнь.
Богорóдичен: Вшед, о Богомáти, во чрéво Твоé Превéчное Слóво,/ роди́выйся из Отцá неизречéнно,// Iáкова апóстола явля́ет.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, сúле Твоéй.
ПЕСНЬ 5
Iрмóс: Одея́йся Свéтом, я́ко рúзою,/ к Тебè ýтреннюю, и Тебè зовý:/ дýшу мою́ просветù омрачéнную, Хрїстè,// я́ко Едúн Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: И҆́же слáвы Госпóдь в неслáвне зрáце,/ на дрéве обезчéщен вóлею ви́сит,// о божéственней мне слáве несказáнно промышля́я.
Хор: Слáва, Гóсподи, Святóму Воскресéнiю Твоемý.
Чтец: Ты мя преоблéкл есѝ в нетлéнiе, Хрїстè,/ тли смéртныя неистлéнно плóтiю вкуш,// и возсiя́в из грóба триднéвен.
Хор: Пресвятáя Богорóдице, спасù нас.
Богорóдичен: Ты прáвду же и избавлéнiе нам рóждши Хрїстá без сéмене,// свобóдно содéяла есѝ от кля́твы, Богорóдице, естествó прáотца.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл есѝ длáни, Спáсе наш, на дрéве,// вся призывáя к Себè, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л есѝ ад, Спáсе мой, Твои́м погребéнiем,// и Твои́м Воскресéнiем рáдости вся испóлнил есѝ.
Глас 5
Хор: Пресвятáя Богорóдице, спасù нас.
Чтец: Вси прорóцы Тя я́ве предвозвести́ша/ хотя́щую бы́ти Бóжiю Мáтерь, Богорóдице Чи́стая:// еди́на бо обрелáся еси́, Чи́стая, совершéнна Непорóчная.
Хор: Пресвятáя Богорóдице, спасù нас.
Чтец: Свéтел óблак Тя живóтныя вóды,/ нам тýчу нетлéнiя Хрїстá одожди́вшiй отчáянным,// Чи́стая, познавáем.
Глас 4
Хор: Святы́й апóстоле Iáкове, молù Бóга о нас.
Чтец: Ты, Гóсподи, Свет,/ блистáнiе Iáкова яви́л есѝ светя́ща// и земны́я невéденiя и тьмы изменя́юща.(Двáжды)
Хор: Святы́й апóстоле Iáкове, молù Бóга о нас.
Чтец: Тя, Гóсподи, глáсом свобóдным проповéда/ прáведный брат Твой,// подражáтель же стрáсти бысть, убивáем.(Двáжды)
Слáва Ѻтцý и Сы́ну и Святóму Дýху.
Тропáрь: Кiй земны́й ум похвáл пéнiя тебè принестѝ мóжет,// добродéтелей просвещéнному благодáтьми, Iáкове.
И ны́не и прúсно и во вéки векóв. Амúнь.
Богорóдичен: Тя и́стинно Божéственное обрéт жили́ще,// всели́ся, о Дéво, нáше спасéнiе, Слóво, промышля́я.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилá есù Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Неúстовствующееся бýрею душетлéнною,/ Влады́ко Хрїстè, страстéй мóре укротù,// и от тли возведù мя, я́ко Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: В тлéнiе попóлзся родоначáльник, Влады́ко Хрїстè,/ преслýшаннаго брáшна вкуш,// и к животý возведéн бысть стрáстiю Твоéю.
Хор: Слáва, Гóсподи, Святóму Воскресéнiю Твоемý.
Чтец: Живóт низшéл есѝ ко áду, Влады́ко Хрїстè,/ и тлéнiе растлéвшему быв,// тлéнiем источи́л есѝ Воскресéнiе.
Хор: Пресвятáя Богорóдице, спасù нас.
Богорóдичен: Дéва родѝ, и рóждши пребы́сть чистá,/ на рукý нося́щаго вся́ческая,// я́ко вои́стинну Дéва Мáти понéсшая.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл есѝ длáни Твоѝ, собирáя далéче расточéнная/ язы́к Твои́х собрáнiя, Хрїстè Бóже наш,// живонóсным Крестóм Твои́м, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л есѝ смерть, и вратá áдова сокруши́л есѝ,/ Адáм же свя́занный разрешéн быв, вопiя́ше Тебè:// Спасè мя десни́ца Твоя́, Гóсподи.
Глас 5
Хор: Пресвятáя Богорóдице, спасù нас.
Чтец: И҆́же всемý винóвный, и éже бы́ти всем подáвый,/ я́ко винóвну имя́ше воплощáемь, éже по нам,// Тя, Богомáти Всенепорóчная.
Хор: Пресвятáя Богорóдице, спасù нас.
Чтец: Исцелéнiй, Влады́чице, душепитáтельный точáщiй истóчник/ вéрно притекáющим к покрóву Твоемý благослáвному,// вéмы Тя, Всенепорóчная.
Глас 4
Хор: Святы́й апóстоле Iáкове, молù Бóга о нас.
Чтец: Одéждею закóнною облечé тя лýчшею/ и iерáрха явля́ет, Аарóна дрéвняго честнéйша,// и́же ми́лости рáди в брáтство прiéмый тя. (Двáжды)
Хор: Святы́й апóстоле Iáкове, молù Бóга о нас.
Чтец: Оргáн, дéйствы ударя́емь Дýха,/ все помышлéнiе наслаждáя и Бóгу привéд спасáемыя от рабóты лютéйшiя,// был еси́ изря́днейшiй.(Двáжды)
Слáва Ѻтцý и Сы́ну и Святóму Дýху.
Тропáрь: Возжаждáв, жи́зненныя испи́л еси́ воды́,/ и рéки источáеши Богоглагóливаго твоегó чрéва,// текýщыя вселéнней Божéственным Дýхом.
И ны́не и прúсно и во вéки векóв. Амúнь.
Богорóдичен: Éва ýбо преслушáнiем смерть роди́,/ Богорóдица же, Жизнь зачéнши, роди́ Нестарéющуюся// и дрéвнiй за всех отдадé долг.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 5: Ко áду, Спáсе мой, сошéл есѝ,/ и вратá сокруши́вый я́ко всеси́лен,/ умéрших, я́ко Создáтель, совоскреси́л есѝ,/ и смéрти жáло сокруши́л есѝ,/ и Адáм от кля́твы избáвлен бысть, Человеколю́бче;/ тéмже вси зовéм:// спаси́ нас, Гóсподи.
Íкос: Услы́шавша жены́ Áнгеловы глагóлы, отложи́ша рыдáнiе,/ рáдостны бы́вша и трéпетны, ýжас бо ви́деша,/ и се Хрїстóс прибли́жися к ним, глагóля: éже, рáдуйтеся,/ дерзáйте, Аз мíра победи́х, и ýзники свободи́х,/ потщи́теся ýбо ко ученикóм, возвещáюща им:/ я́ко варя́ю вы во грáде Галiлéйстем, éже проповéдати.// Тéмже вси Тебè зовéм: спасѝ нас, Гóсподи.
ПЕСНЬ 7
Iрмóс: Превозносúмый отцéв Госпóдь/ плáмень угасù, óтроки оросù, соглáсно пою́щiя:// Бóже, благословéн есù.
Хор: Слáва, Гóсподи, Святóму Воскресéнiю Твоемý.
Чтец: Плóтiю облóжься я́коже на ýдице льщéнiя,/ Божéственною Твоéю си́лою змíя низвлéкл еси́// возводя́ вопiю́щiя: Бóже, благословéн еси́.
Хор:Слáва, Гóсподи, Святóму Воскресéнiю Твоемý.
Чтец: Земли́ непрохóдное осуществовáвый составлéнiе,/ во грóбе покрывáется плóтiю Невмести́мый.// Емýже вси поéм: Бóже, благословéн еси́.
Хор: Пресвятáя Богорóдице, спасù нас.
Богорóдичен: Еди́ну ýбо Ипостáсь во Двою́ Естествý, Всенепорóчная/ родилá еси́ Воплощéннаго Бóга.// Емýже вси поéм: Бóже, благословéн еси́.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же дрéвом крéстным íдольскую прéлесть разреши́вый,// благословéн Бог отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскресы́й из мéртвых, и сýщiя во áде совоздви́гнувый,// благословéн Бог отéц нáших.
Глас 5
Хор: Пресвятáя Богорóдице, спасù нас.
Чтец: Неопределéнный пребы́в Непрелóжен,/ плóти по Ипостáси соедини́ся, я́ко Благоутрóбен, в Тебè Пресвятéй:// И҆́же Еди́н благословéн Бог отéц нáших.
Хор: Пресвятáя Богорóдице, спасù нас.
Чтец: Невéсту Тя Всенепорóчную, Богорóдице Влады́чице, соглáсно слáвим и Престóл Зижди́теля Твоегó.// Емýже вси поéм: Бóже, благословéн еси́.
Глас 4
Хор: Святы́й апóстоле Iáкове, молù Бóга о нас.
Чтец: Я́ко в пещѝ, на гóрнице просвещáемь Божéственным пришéствiем Дýха, тáинственно,/ Богоглагóливе, возопи́л есѝ:// благословéн есѝ в хрáме слáвы Твоея́, Гóсподи. (Двáжды)
Хор: Святы́й апóстоле Iáкове, молù Бóга о нас.
Чтец: Свы́ше дыхáнiе зéльное/ апóстола язы́ком огнеобрáзным вещáти Бóжiя вели́чествiя устрóи:// благословéн еси́ в хрáме слáвы Твоея́, Гóсподи.(Двáжды)
Слáва Ѻтцý и Сы́ну и Святóму Дýху.
Тропáрь: Видéнiя дéятельнаго излагáя дщи́цу,/ от скрижáли же, я́ко духóвныя, человéки научи́л есѝ:// благословéн есѝ, Бóже мой, зовы́й, Гóсподи.
И ны́не и прúсно и во вéки векóв. Амúнь.
Богорóдичен: Возсоздáвый мiр во утрóбе Твоéй, Богоневéсто, / Божéственнаго служéнiя показýет соверши́теля Iáкова, взывáюща:// благословéна Ты в женáх, Всенепорóчная Влады́чице.
Катавáсiя (глас 4): Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есù.
ПЕСНЬ 8
Iрмóс: Тебè, Вседéтелю,/ в пещù óтроцы, всемíрный лик сплéтше, поя́ху:/ делá вся́кая, Гóспода пóйте// и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты о вóльней спаси́тельныя стрáсти помоли́лся есѝ чáши, я́коже невóльней:// два хотéнiя, двемá бо по коемýждо нóсиши существóма, Хрїстè, во вéки.
Хор: Слáва, Гóсподи, Святóму Воскресéнiю Твоемý.
Чтец: Твои́м вседéтельным схождéнiем ад, Хрїстè, порýганный/ изблевá вся, я́же дрéвле лéстiю умерщвлéнныя,// Тебé превознося́щiя во вся вéки.
Хор: Пресвятáя Богорóдице, спасù нас.
Богорóдичен: Тя я́же пáче умá/ богомýжне Слóвом Рóждшую Гóспода, и дéвствующую,// вся делá, Дéво, благослови́м, и превознóсим во вся вéки.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на Крéсте вóлею длáни простéршаго,/ и ýзы смéртныя разруши́вшаго Хрїстá Бóга,// свящéнницы пóйте, лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же я́ко Женихá из грóба возсiя́вшаго Хрїстá Бóга,/ и миронóсицам я́вльшагося, и рáдость тем провещáвша,// свящéнницы пóйте, лю́дiе превозноси́те во вся вéки.
Глас 5
Хор: Пресвятáя Богорóдице, спасù нас.
Чтец: Престá ны́не я́же прáотчая печáль,/ рáдость прiéмши Ти Богомáтерни./ Тéмже непрестáнно поéм Тя, Дéво,// и превознóсим во вся вéки.
Хор: Пресвятáя Богорóдице, спасù нас.
Чтец: Поéт с нáми безплóтных собóр, Дéво/ Рождествó Твоé непостижи́мое,/ еди́н лик состáвльше любóвiю,// и превознося́ще Егó во вéки.
Глас 4
Хор: Святы́й апóстоле Iáкове, молù Бóга о нас.
Чтец: Рýце распростéр крéпкiя,/ апóстолы Твоя́, Спáсе, благослови́л есѝ, восходя́, Влады́ко, к Безначáльному Отцý Твоемý,/ и устрóил есѝ ты́я с весéлiем вопи́ти:// благослови́те вся делá Госпóдня Гóспода. (Двáжды)
Хор: Святы́й апóстоле Iáкове, молù Бóга о нас.
Чтец: Я́коже обещáлся есѝ, нелóжно апóстолом Твои́м Дýха послáл есѝ,/ Сегó Iáков, Влады́ко, свéтлостiю просвещáем,/ вселéнную мóлнiями просвещáет я́ве и вопiéт Тебè:// благослови́те вся делá Госпóдня Гóспода.(Двáжды)
Благословúм Отцá, и Сы́на, и Святáго Дýха, Гóспода.
Тропáрь: Мýдрость, Iáкове мýдре, Ипостáсную имéл еси́ Учи́теля,/ учáщу тя неизречéнным и неизглагóланным тáйнам,/ и к благочéстiю лю́ди звáти воздви́гл еси́:/ благослови́те вся делá Госпóдня Гóспода.
И ны́не и прúсно и во вéки векóв. Амúнь.
Богорóдичен: Гóру явлéнну мы́сленную, Дéво Чи́стая, прорóк ви́де Тя,/ из Тебè бо пречестны́й Кáмень отсечéся,/ спасáя вселéнную вои́стину, Божéственно пою́щую:// благослови́те вся делá Госпóдня Гóспода.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочестúвыя в пещù/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делá,// и превозносúте Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы́ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Исáiе, ликýй,/ Дéва имè во чрéве/ и родù Сы́на Емманýила,/ Бóга же и Человéка,/ Востóк и҆́мя Емý,/ Егó же величáюще,// Дéву ублажáем.
Хор: Слáва, Гóсподи, Святóму Воскресéнiю Твоемý.
Чтец: Пáдшаго человéка воспрiя́л еси́, Влады́ко Хрiстé, из ложéсн Деви́ческих/ всемý совокýплься, грехý же ни еди́ному причáщься:// всегó от истлéнiя Ты свободи́л еси́ пречи́стыми Твои́ми страстьми́.
Хор: Слáва, Гóсподи, Святóму Воскресéнiю Твоемý.
Чтец: Боготóчною крóвiю истощéнною, Влады́ко Хрiстé,/ от Твои́х пречи́стых ребр и животворя́щих,/ жéртва ýбо престá и҆́дольская,// вся же земля́ Тебé хвалéнiя жéртву принóсит.
Хор: Пресвятáя Богорóдице, спасù нас.
Богорóдичен: Не Бóга безплóтна, нижé пáки человéка прóста/ произведé Чи́стая Отрокови́ца, и Несквéрная:/ но Человéка совершéнна, и нелóжно совершéнна Бóга.// Егóже величáем со Отцéм же и Дýхом.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé И҆́же на Крестé страсть подъéмшаго,/ и áдову си́лу смéртiю сокруши́вшаго,// вéрнiи правослáвно величáем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé из грóба триднéвно воскрéсша,/ и ад плени́вшаго, и мiр просвети́вшаго,// вéрнiи единомýдренно величáем.
Продолжéнiе здесь