Неделя 22 по Пятидесятнице. Апостола Иакова, брата Господня по плоти. УТРЕНЯ (окончание) ЧАС ПЕРВЫЙ
5 ноября́ 2023 гóда. Недéля 22 по Пятидеся́тнице. Апóстола Iáкова брáта Госпóдня по плóти. Глас 5. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 5
Хор: Пресвятáя Богорóдице, спасù нас.
Чтец: От чи́стых кровéй Твои́х/ усыри́ся плоть преестéственно/ всех Содéтелю, Единорóдному Сы́ну Роди́телеву,// не от мýжа, без сéмене же ýмна и одушевлéнна, Богорóдице Приснодéво.
Хор: Пресвятáя Богорóдице, спасù нас.
Чтец: Обходи́мое устáвила еси́ смéрти неудержи́мое стремлéнiе,/ рóждши плóтiю вои́стинну пáче умá Жизнь вéчную:/ Éйже прилóжься усты́ гóрькими ад упраздни́ся,// Пресвятáя Мáти Дéво.
Глас 4
Хор: Святы́й апóстоле Iáкове, молù Бóга о нас.
Чтец: Прiиди́те, первопрестóльника вси, Це́ркве свети́льника,/ свяще́нными, Iа́кова, пе́сньми, я́ко iера́рха и Христопропове́дника,// тезоиме́нне пра́веднаго именова́нна, велича́ем. (Двáжды)
Хор: Святы́й апóстоле Iáкове, молù Бóга о нас.
Чтец: Боже́ственнаго óбщника, я́ко я́вльшася Безконе́чнаго Ца́рствiя,/ и Бóжiя нарече́нна бра́та,/ и житiе́м и́стинствующа, именова́нiе прiе́мша,// священнотаи́нника тя величае́м, Iа́кове. (Двáжды)
Слáва Ѻтцý и Сы́ну и Святóму Дýху.
Тропáрь: Престóлу предстоя́, блаже́нне, венценóсец Трóицы,/ ве́рою почита́ющих твою́ па́мять, нетле́ющих наслади́тися че́стей,/ я́ко iера́рх, Iа́кове, благопрiя́тен,// твоегó Влады́ку умоли́.
И ны́не и прúсно и во вéки векóв. Амúнь.
Богорóдичен: Ты, от Де́вы Рожде́ннаго неискусобра́чно, Богоявле́нне,/ уче́нiи твои́ми я́ве чести́ Бóга науча́еши, Воплоще́нное Слóво,// в Негóже мы ве́рующе ны́не, достóйно велича́ем.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чúстая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьмѝ Бог наш.
Хор: Свят Госпóдь Бог наш
Ексапостiлáрiй воскрéсный одúннадцатый: По Божéственнем востáнiи,/ три́жды Петрá, лю́биши ли Мя, вопрошáя Госпóдь,/ Свои́х овéц предлагáет пастыреначáльника:/ и҆́же ви́дя, егóже любля́ше Iисýс, во след грядýща,/ вопрошáше Влады́ку: сей же что?/ Áще хощý, речé, пребывáти семý,/ дóндеже и пáки прiидý,/ что к тебé, дрýже Пéтре?
Слáва Ѻтцý и Сы́ну и Святóму Дýху.
Светúлен ап. Iáкова: Я́ко Госпóдня бра́та бы́вша, блаже́нне Iа́кове Богодохнове́нне,/ ве́рнiи по дóлгу хва́лим тя,/ сла́вяще све́тлую и всечестну́ю, и светонóсную твою́ па́мять:// моли́ся приле́жно за чту́щих тя.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: О стрáшное тáинство, о преслáвное чýдо!/ Смéртiю смерть всеконéчне погублéна бысть./ Кто ýбо не воспоéт; и кто не поклони́тся Твоемý воскресéнiю, Слóве,/ и чи́сто рóждшей Тя плóтiю Богорóдице?/ Ея́же моли́твами, всех геéнны избáви.
ХВАЛИТНЫ
Хор, глас 5: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 5: Гóсподи, запечáтану грóбу от беззакóнников,/ прошéл еси́ из грóба,/ я́коже роди́лся еси́ от Богорóдицы:/ не уразумéша, кáко воплоти́лся еси́, безплóтнiи Твои́ Áнгели:/ не чýвствоваша, когдá воскрéсл еси́, стрегýщiи Тя вóини./ Обоя́ бо запечатлéстася испытýющим,/ яви́шася же чудесá клáняющимся вéрою тáинству:/ éже воспевáющим,// воздáждь нам рáдость и вéлiю ми́лость.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, вереи́ вéчныя сокруши́в,/ и ýзы растерзáв, от грóба воскрéсл еси́,/ остáвль Твоя́ погребáльная,/ во свидéтельство и҆́стиннаго триднéвнаго Твоегó погребéнiя:/ и предвари́л еси́ в Галiлéи, в пещéре стрегóмый./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, жены́ текóша на гроб,/ ви́дети Тя, Хрiстá, нас рáди пострадáвшаго,/ и пришéдша, обретóша Áнгела на кáмени седя́ща,/ стрáхом отвáльшемся,/ и к ним возопи́, глагóля:/ воскрéсе Госпóдь, рцы́те ученикóм,/ я́ко воскрéсе от мéртвых,// спасáяй дýши нáша.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Гóсподи, я́коже изшéл еси́ от запечáтаннаго грóба,/ тáко вшел еси́ и двéрем заключéным ко ученикóм Твои́м,/ показýя им телéсная страдáнiя,/ я́же подъя́л еси́, Спáсе Долготерпели́вый:/ я́ко от сéмене Давíдова я́звы претерпéл еси́,/ я́ко Сын же Бóжiй, мир свободи́л еси́./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры ап. Iáкова, глас 8: Гóсподи, а́ще и на крилè предста́ святи́лища Iа́ков,/ но, дерзновéнiем возопи́в, Бóга Слóва Тя проповéда,/ Содéтеля всех, в мир пришéдшаго:// Егóже моли́твами и ны́не пода́ждь просвещéнiе душа́м на́шим.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Гóсподи, а́ще и дрéвом глава́ апóстолова сокрушéна бысть,/ но в раи́ дрéво жи́зненное ему́ дадéся/ и, от приврéменных отреши́вся, вéчно весели́тся:// егóже моли́твами Цéрквам мир Твой низпосли́.
Во всю зéмлю изы́де вещáнiе их/ и в концы́ вселéнныя глагóлы их. (Пс.18:5А)
Стiхúра: Гóсподи, Тя исповéдав на земли́ дóблественне, брат Бóжiй,/ Сы́на Бóга Вы́шняго, и́скренно приснопа́мятный,/ злосла́вныя враги́ посрами́ и укроти́:// сегó ра́ди и пострада́в, Тебè предстои́т, ра́дуяся.
Небесá повéдают слáву Бóжiю,/ творéнiе же рукý Егó возвещáет твердь. (Пс.18:2)
Глас 1: Гóсподи, а́ще и свергóша iудéи с высоты́ пра́веднаго,/ но Небéсных чертóгов с весéлiем сподóбися,/ и в пи́щи наслаждéнiя достóйно весели́тся:// тем у́бо подаéши мир душа́м на́шим.
Слáва Отцý и Сыну и Святóму Дýху.
Стiхúра евáнгельская одúннадцатая, глас 8: Явля́я Себè ученикóм Твои́м, Спáсе,/ по воскресéнiи Сíмону дал еси́ овéц пáству,/ за любвè воздая́нiе,/ я́же о пáстве попечéнiя ищя́./ Тéмже и глагóлал еси́:/ áще лю́биши Мя, Пéтре,/ паси́ áгнцы Моя́, паси́ óвцы Моя́./ Он же áбiе показýя друголю́бное,/ о друзéм ученицé вопрошáше./ И҆́хже моли́твами, Хрїстè, стáдо Твоè сохраня́й,// от волкóв губя́щих è.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебè ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебè.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 рáза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моè. Вонмѝ глáсу молéнiя моегó, Царю́ мой и Бóже мой, яко к Тебè помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебè лукáвнуяй, нижè пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебè лю́бящiи имя Твоè. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебè, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредè дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпè мне сéрдце стропти́во, уклоня́ющагося от менè лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредè дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 рáза)
Гóсподи, помúлуй. (3 рáза)
Тропáрь воскрéсный, глас 5: Собезначáльное Слóво Отцý и Дýхови, от Дéвы рóждшееся на Спасéнiе нáше, воспои́м, вéрнiи, и поклони́мся; я́ко благоволи́ Плóтiю взы́ти на Крест, и смерть претерпéти, и воскреси́ти умéршiя слáвным воскресéнiем Свои́м.
Слáва Отцý и Сы́ну и Святóму Дýху.
Тропáрь ап. Iáкова брáта Госпóдня, глас 2: Я́ко Госпóдень учени́к воспрiя́л еси́, прáведне, Евáнгелiе, я́ко мýченик и́маши éже неопи́санное, дерзновéнiе я́ко брат Бóжiй, éже моли́тися я́ко iерáрх: моли́ Хрiстá Бóга спасти́ся душáм нáшим.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицè Твоè просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоè.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 рáза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 рáза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сыне Бóжїй, поми́луй нас. Ами́нь.
КОНДАК
Кондáк апóстола Iáкова, глас 3: Óтчее Единорóдное Бог Слóво, пришéдшее к нам в послéднiя дни, Iáкове Божéственне, пéрваго тя показá Iерусали́млян пáстыря и учи́теля, и вéрнаго строи́теля тáинств духóвных: тéмже тя вси чтим, апóстоле.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстè Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 рáза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 рáза)
Гóсподи, благословᴎ́.
Гóсподи, Iисýсе Хрїстè, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу