Недeля 20 по Пятидесятнице. Святых отцов VII Вселенского собора. ВСЕНОЩНОЕ БДЕНИЕ УТРЕНЯ. КАНОН
22 октября́ 2023 гóда. Недéля 20 по Пятидеся́тнице. Святы́х отéц VII Вселéнского Собóра. Апóстола Iáкова Алфéева. Глас 3. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебè в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоемý рыдáющiя,/ но предстá к ним Áнгел и речè:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речè, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существè,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила есѝ,/ рáдость же Éве/ в печáли мéсто подалá есѝ,/ пáдшiя же от жи́зни/ к сей напрáви/ из Тебè воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебè Бóже. (3 рáза)
Гóсподи, поми́луй. (3 раз)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 3: Удивля́я видéнiем,/ орошáя глагóланiи,/ блистáяйся Áнгел миронóсицам глагóлаше:/ что живáго и́щете во грóбе;/ востá истощи́вый грóбы./ Тли Премени́теля разумéйте Непремéннаго./ Рцы́те Бóгови: коль стрáшна делá Твоя́,// я́ко род спасл есѝ человéческiй!
СЕДАЛЬНЫ ПО ПОЛИЕЛЕИ
Глас 2 (по 1‑м стiхослóвiи): Улови́в язы́ки апóстол слáвный/ и научи́в концы́ земны́я Тебé клáнятися, со Отцéм и Дýхом, Хрiстè Бóже./ Тогó рáди утвердѝ Цéрковь Твою́/ и вéрным низпослѝ благословéнiе Твоè,// Еди́не Ми́лостиве и Человеколю́бче.
Глас 4 (по 2‑м стiхослóвiи): Я́ко лучý, Сóлнце прáвды испустѝ тя Хрiстóс,/ просвети́ти всю зéмлю, апóстоле слáвный Iáкове,/ Божéственными твои́ми моли́твами озаря́еши/ и Божéственным свéтом невечéрним всех просвещáеши,// вéрою совершáющих святýю пáмять твою́.
Слáва Ѻтцý и Сы́ну и Святóму Дýху.
Седáлен прáздника по полiелéи, глас 8: Мрéжею словéс Божéственных ры́бы уловля́я словéсныя,/ и сiя́ принéсл еси́ начáтки Бóгу нáшему,/ и во Хрiстóвы я́звы желáя облещи́ся,/ подóбник страстéм Егó яви́лся еси́./ Тем сошéдшеся по дóлгу, чтим тя, апóстоле слáвне,/ и соглáсно вопiéм ти:/ моли́ Хрiстá Бóга// грехóв оставлéнiе подáти чтýщим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из минéи: Мы́сленная вратá Жи́зни, Пречи́стая Богорóдице,/ притекáющыя к Тебè вéрно/ избáви от бед,// да слáвим пресвятóе Рождествó Твоè во спасéнiе душ нáших.
СТЕПЕННА, ГЛАС 3
1 АНТИФОН
Плен Сióнь Ты изъя́л есú от Вавилóна:// и менè от страстéй к животý привлецы́, Слóве. (Двáжды)
В юг сéющiи слезáми Божéственными,// жнут клáсы рáдостiю присноживóтiя. (Двáжды)
Слáва Ѻтцý и Сы́ну и Святóму Дýху.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
И ны́не и прúсно и во вéки векóв. Амúнь.
Святóму Дýху вся́кое благодáрiе,/ я́коже Отцý и Сы́ну сооблистáет,// в Нéмже вся живýт и дви́жутся.
2 АНТИФОН
Аще не Госпóдь созúждет дом добродéтелей, всýе труждáемся:// дýшу же покрывáющу, никтóже наш разорúт град. (Дважды)
Плодá чрéвна Дýхом сынотворéное// Тебè, Хрiстý, я́коже и Отцý, святíи всегдá суть. (Двáжды)
Слáва Ѻтцý и Сы́ну и Святóму Дýху.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
И ны́не и прúсно и во вéки векóв. Амúнь.
Святы́м Дýхом прозри́тся вся́кая святы́ня, премýдрость:/ осуществýет бо вся́кую тварь: Томý послýжим:// Бог бо, я́ко Отцý же и Слóву.
3 АНТИФОН
Боя́щiися Гóспода блажéни, в путù ходя́ще зáповедей:// снедя́т бо живóтное всеплóдiе. (Двáжды)
Ѻ́крест трапéзы Твоея́ возвесели́ся,// зря Твоя́, Пастыреначáльниче, исчáдiя, нося́ща вéтви благодéланiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
И ны́не и прúсно и во вéки векóв. Амúнь.
Святы́м Дýхом вся́кое богáтство слáвы,/ от Негóже благодáть, и живóт вся́кой твáри:// со Отцéм бо воспевáемь есть, и с Слóвом.
ПРОКИМЕН
Чтец: Прокíмен, глас трéтiй, псалóм Давíдов. Рцы́те во язы́цех, я́ко Госпóдь воцари́ся, и҆́бо испрáви вселéнную, я́же не подви́жится. (Пс.95:10А)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Воспóйте Гóсподеви песнь нóву, воспóйте Гóсподеви вся земля́. (Пс.95:1)
Хор: Рцы́те во язы́цех, я́ко Госпóдь воцарúся,/ и҆́бо испрáви вселéнную, я́же не подвúжится.
Чтец: Рцы́те во язы́цех, я́ко Госпóдь воцари́ся,
Хор: И҆́бо испрáви вселéнную, я́же не подвúжится.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Ин.зач.65А): Сýщу пóзде в день той, во еди́ну от суббóт, и двéрем затворéнным, идéже бя́ху ученицы́ Егó сóбрани, стрáха рáди iудéйска, прiи́де Iисýс и ста посредè, и глагóла им: мир вам. И сiè рек, показá им рýце и нóзе и рéбра Своя. Возрáдовашася же ученицы́, ви́девше Гóспода. Речè же им Iисýс пáки: мир вам. Якоже послá Мя Отéц, и Аз посылáю вы. И сiè рек, дýну и глагóла им: прiими́те Дух Свят. Имже отпуститè грехи́, отпýстятся им: и и́мже держитè, держáтся. Фомá же, еди́н от обоюнáдесяте, глагóлемый Близнéц, не бе ту с ни́ми, егдá прiи́де Iисус. Глагóлаху же емý друзíи ученицы́: ви́дехом Гóспода. Он же речè им: áще не ви́жу на рукý Егó я́звы гвозди́нныя, и вложý пéрста моегó в я́звы гвозди́нныя, и вложý рýку мою́ в рéбра Егó, не имý вéры. И по днех осми́х пáки бя́ху внутрь ученицы́ Егó, и Фомá с ни́ми. Прiи́де Iисýс двéрем затворéнным, и ста посредè их и речè: мир вам. Потóм глагóла Фомè: принеси́ перст твой сéмо, и виждь рýце Мои́, и принеси́ рýку твою́, и вложи́ в рéбра Моя, и не бýди невéрен, но вéрен. И отвещá Фомá и речè Емý: Госпóдь мой и Бог мой. Глагóла ему Iисýс: яко ви́дев Мя, вéрова: блажéни не ви́девшiи и вéровавше. Мнóга же и и́на знáменiя сотвори Iисýс пред ученики́ Свои́ми, я́же не суть пи́сана в кни́гах сих. Сiя же пи́сана бы́ша, да вéруете, я́ко Iисýс есть Хрїстóс Сын Бóжiй, и да вéрующе животá и́мате во и́мя Егó.
[Синодальный перевод]В тот первый день недели вечером, когда двери дома, где собирались ученики Его, были заперты из опасения от Иудеев, пришел Иисус, и стал посреди, и говорит им: мир вам! Сказав это, Он показал им руки и ноги и ребра Свои. Ученики обрадовались, увидев Господа. Иисус же сказал им вторично: мир вам! как послал Меня Отец, так и Я посылаю вас. Сказав это, дунул, и говорит им: примите Духа Святого. Кому простите грехи, тому простятся; на ком оставите, на том останутся. Фома же, один из двенадцати, называемый Близнец, не был тут с ними, когда приходил Иисус. Другие ученики сказали ему: мы видели Господа. Но он сказал им: если не увижу на руках Его ран от гвоздей, и не вложу перста моего в раны от гвоздей, и не вложу руки моей в ребра Его, не поверю. После восьми дней опять были в доме ученики Его, и Фома с ними. Пришел Иисус, когда двери были заперты, стал посреди них и сказал: мир вам! Потом говорит Фоме: подай перст твой сюда и посмотри руки Мои; подай руку твою и вложи в ребра Мои; и не будь неверующим, но верующим. Фома сказал Ему в ответ: Господь мой и Бог мой! Иисус говорит ему: ты поверил, потому что увидел Меня; блаженны невидевшие и уверовавшие. Много сотворил Иисус пред учениками Своими и других чудес, о которых не писано в книге сей. Это же написано, дабы вы уверовали, что Иисус есть Христос, Сын Божий, и, веруя, имели жизнь во имя Его.(20:19-31)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстè, и святóе Воскресéнiе Твоé поéм и слáвим: Ты бо еси́ Бог наш, рáзве Тебè инóго не знáем, и҆́мя Твоè именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разрушѝ.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 6: Воскрéс Iисýс от грóба,/ я́коже проречè,/ дадè нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 3
(совмещéнный с канóном Апóстола Iáкова Алфéева, глас 6, и канóном святых отцéв, глас 8)
ПЕСНЬ 1
Iрмóс: Вóды дрéвле/ мáнiем Божéственным/ во едúно сóнмище совокупúвый/ и разделúвый мóре Iзрáильтеским лю́дем,/ Сей Бог наш/ препрослáвлен есть.// Томý Едúному поúм, я́ко прослáвися.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же зéмлю осуди́в,/ престýпльшему пóтом изнести́ плодá тéрнiе,/ от тéрнiя венéц из руки́ законопрестýпныя,/ Сей Бог наш, плóтски прiéмый,// кля́тву разруши́л есть, я́ко прослáвися.
Хор: Слáва, Гóсподи, Святóму Воскресéнiю Твоемý.
Чтец: Победи́тель и Одолéтель смéрти,/ и҆́же смéрти убоя́вся, яви́ся:/ стрáстную бо плоть одушевлéнную прiéм,/ Сей Бог наш, и брáвся с мучи́телем,// вся совоскреси́, я́ко прослáвися.
Хор: Пресвятáя Богорóдице, спасù нас.
Богорóдичен: И҆́стинную Богорóдицу вси язы́цы слáвят Тя, без сéмене рóждшую:/ сошéд бо во утрóбу освящéнную Твою́,/ Сей Бог наш, Éже по нам осуществовáся,// Бог же и Человéк из Тебè роди́ся.
Канон апостола Иакова, глас 6
Хор: Святы́й апóстоле Iáкове, молù Бóга о нас.
Чтец: Рýку ми даждь, Богови́дче и ученичè Хрiстóв, Iáкове,/ честны́й твой прáздник похвали́ти устреми́вшуся,// и свет сéрдцу моемý твои́ми моли́твами возсiя́й.
Хор: Святы́й апóстоле Iáкове, молù Бóга о нас.
Чтец: Струя́ми Божéственныя мýдрости напоéн,/ рекá истéкл еси́ от рая́ слáдости// и земнóе лицè течéньми благочéстiя и́стинно я́ве напои́л еси́.
Хор: Святы́й апóстоле Iáкове, молù Бóга о нас.
Чтец: Свящéннейшему ли́ку учени́к Хрiстóвых счетáлся еси́, Iáкове,/ исполня́я чи́сло двонадеся́тных;// с ни́миже, Влады́це предстоя́, нас поминáй.
Хор: Пресвятáя Богорóдице, спасù нас.
Богорóдичен: Тя, Пречи́стая Дéво, нéбо простры́й Госпóдь/ и зéмлю основáвый,/ нéбо земнóе нам яви́л есть,// из Тебè прошéд плóтiю.
Канон святых отцов VII вселенского собора, глас 8
Хор: Святíи отцы́, молúте Бóга о нас.
Чтец: Песнослóвити Седмóе Собрáнiе желáющему ми ны́не,/ седми́х даровáнiй собóр/ даждь ми Паракли́та, Гóсподи,/ умудри́вшаго сей огненноязы́чне// и хýльное все языковрéдiе умолчáти сотвóршаго.(Двáжды)
Хор: Святíи отцы́, молúте Бóга о нас.
Чтец: Бóльшее из начáла числ седмóе:/ и҆́бо создáнiя Божéственнаго/ всегó первообрáзно бысть,/ всесовершéнное престáнiе в седмы́й день;/ и ны́не всех ересéй конéц// в Собóре равночи́сленном.(Двáжды)
Слáва Ѻтцý и Сы́ну и Святóму Дýху.
Тропáрь: Победи́в богобóрнаго Áрiя в Нiкéи/ дрéвле пáстырским жезлóм,/ правослáвными шéствовати Цéрковь учéнiи лик отцéв,/ и ны́не о сем посрами́л есть образобóрцы// я́ко побóрник.
И ны́не и прúсно и во вéки векóв. Амúнь.
Богорóдичен: Я́коже отцы́ благочéстно научи́ша,/ исповéдующе вéрно Деви́ческую утрóбу,/ безболéзненно рóждшую плóтiю Безплóтнаго:// покланя́емся же Семý, столпопи́шуще изображéнiе, и чéстне облобызáем.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: И҆́же от не сýщих вся Приведы́й,/ Слóвом созидáемая,/ совершáемая Дýхом,/ Вседержúтелю Вы́шнiй,// в любвù Твоéй утвердù менè.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м постыдéся нечести́вый,/ содéла бо я́му, ю́же ископá, впадé:/ смирéнных же вознесéся, Хрїстè, рог,// во Твоéм воскресéнiи.
Хор: Слáва, Гóсподи, Святóму Воскресéнiю Твоемý.
Чтец: Благочéстiя проповéданiе язы́ком,/ я́ко водá покры́ моря́, Человеколю́бче:// воскрéс бо от грóба, Трóическiй откры́л еси́ свет.
Хор: Пресвятáя Богорóдице, спасù нас.
Богорóдичен: Преслáвная глагóлана бы́ша о Тебè,/ Грáде Одушевлéнный при́сно Цáрствующаго:// Тобóю бо, Влады́чице, сýщим на земли́ Бог спожи́л есть.
Глас 6
Хор: Святы́й апóстоле Iáкове, молù Бóга о нас.
Чтец: Божéственнаго Дýха я́ве прiéм зарю́,/ во тьме сýщим, я́ко ýтро, показáлся еси́ свéтло,// Сóлнца мы́сленнаго возвещáя всем явлéнiе.
Хор: Святы́й апóстоле Iáкове, молù Бóга о нас.
Чтец: Ногá твоя́ ста я́вственно в прáвости, блажéнне,/ у Царя́ Прáваго же и Благáго,// ликýющи Боголéпно и шéствующи стезю́ Небéсную.
Хор: Святы́й апóстоле Iáкове, молù Бóга о нас.
Чтец: Сы́на Безначáльна Бóжiя, вся творя́щаго Божéственною влáстiю,// нелéстна Тайноучи́теля, знáнiя и́стины тя научáюща, имéл еси́, Iáкове.
Хор: Пресвятáя Богорóдице, спасù нас.
Богорóдичен: Марíе, всех надéждо на Тя надéющихся,/ рóждши Слóво, воплощéнное нас рáди,// разли́чных мя напáстей и бед, Пречи́стая, избáви.
Глас 8
Хор: Святíи отцы́, молúте Бóга о нас.
Чтец: Не поколебáтися Хрiстóве неруши́мей Цéркви,/ от Негó тайнонаучáеми, Божéственнiи пастыреначáльницы,/ и҆́же сiю́ поколебáти хотя́щiя,/ я́коже антíхрiстовы чáсти,// от благочести́вых отри́нуша. (Двáжды)
Хор: Святíи отцы́, молúте Бóга о нас.
Чтец: Очищáет мýтныя и ти́нный потóки,/ от истóчник спасéнiя почéрп,/ и жáждущiя лю́ди Хрiстóвы// насыщáет учéнiй струя́ми отцéв сослóвiе. (Двáжды)
Слáва Ѻтцý и Сы́ну и Святóму Дýху.
Тропáрь: На ненави́дящих и҆́стинно/ и хрiстiанооглагóльников Собрáнiе хрiстолю́бных Седмóе в свéтлем грáде Нiкéйстем бысть,// егóже цáрiе Iри́на и Константíн защи́тницы.
И ны́не и прúсно и во вéки векóв. Амúнь.
Богорóдичен: Всяк да отстýпит нечести́вый,/ не почитáяй iкóну честнýю Богорóдицы/ и Сiю́ не проповéдуяй, Хрiстá Богомýжно рóждшую,/ и во огнь да отшлéтся// сгарáти несожжéнно.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себè совокýпльшiя, духóвно утвердѝ,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк воскрéсный, глас 3: Воскрéсл еси́ днесь от грóба, Щéдре,/ и нас возвéл есѝ от врат смéртных;/ днесь Адáм ликýет, и рáдуется Éва,/ вкýпе же и прорóцы с патрiáрхи воспевáют непрестáнно// Божéственную держáву влáсти Твоея́.
Íкос: Нéбо и земля́ днесь да ликовствýют,/ и Хрiстá Бóга единомýдренно да воспевáют,/ я́ко ýзники от гробóв воскреси́./ Срáдуется вся тварь,/ принося́щи достóйныя пéсни Создáтелю всех,/ и Избáвителю нáшему:/ я́ко человéки из áда днесь, я́ко Жизнодáтель, совозвéд,/ на небесá совозвышáет,/ и низлагáет врáжiя возношéнiя,/ и вратá áдова сокрушáет// Божéственною держáвою влáсти Своея́.
Кондáк апóстола Iáкова Алфéева, глас 2: Твéрдо мýдрости догмáты в дýши благочести́вых вложи́вшаго/ похвалáми да ублажи́м я́ко Боговещáтеля вси Iáкова:/ Престóлу бо слáвы Влады́чню предстоя́/ и со всéми А́нгелы рáдуется,// моля́ непрестáнно о всех нас.
Íкос: Я́ко учени́к Хрiстóв и друг Невещéственным ликóм спребывáяй при́сно,/ и, Свéтом озаря́ем невечéрняго светодая́нiя, умá моегó тьму разреши́, всеблажéнне:/ я́ко да твою́ светонóсную пáмять воспою́,/ ю́же поéт вся тварь, благочéстно прáзднующи днесь;/ всех бо вéрных настáвник и свети́льник был еси́, Iáкове,/ моля́ непрестáнно о всех нас.
Седáлен св. отцéв, глас 4: Свети́льницы пресвéтлiи и҆́стины Хрiстóвы мíру яви́стеся на земли́,/ вои́стинну блажéннейшiй, отцы́ Боговещáннiи,/ изсуши́вше éреси хýльных языковрéдiй/ и угаси́вше пламенови́дная злослáвных смущéнiя:// тéмже, я́ко святи́телiе Хрiстóвы, моли́теся спасти́ся нам.
Слáва Ѻтцý и Сы́ну и Святóму Дýху.
Седáлен ап. Iáкова, глас 8: Мýдрость и́стинно учи́теля имéв,/ тя научáющую сýщим пáче умá,/ мýдрость объюрóдил еси́ éллинскую, Богодухновéнне;/ и язы́ком был еси́ свети́льник Божéственный,/ благочéстiя словесы́ направля́я безýмныя./ Тем избáвленнiи тобóю от прéлести,/ достóйно поéм тя и вéрно ублажáем, Богоглагóливе Iáкове:/ моли́ Хрiстá Бóга грехóв оставлéнiе подáти// чтýщим любóвiю святýю пáмять твою́.
И ны́не и прúсно и во вéки векóв. Амúнь.
Богорóдичен из минéи, глас 8: Сóлнца óблаче разýмнаго,/ Божéственнаго Свéта Свети́льниче златоковáнный,/ Несквéрная, Неблáзная, Всенепорóчная Влады́чице,/ омрачéнную дýшу мою́ ослеплéнiем страстéй,/ безстрáстiя зарéю просвети́, молю́ся;/ и осквернéнное моé сéрдце омы́й потóки умилéнiя, покая́нiя же слезáми,/ и от тимéнiя мя очи́сти дел мои́х,/ да любóвiю зовý Ти:/ Богорóдице Приснодéво, моли́ Хрiстá Бóга прегрешéнiй оставлéнiе подáти ми,// Тебé бо имéю надéжду, раб Твой.
ПЕСНЬ 4
Iрмóс: Положúл есù к нам твéрдую любóвь, Гóсподи,/ Единорóднаго бо Твоегó Сы́на за ны на смерть дал есù./ Тéмже Ти зовéм, благодаря́ще:// слáва сúле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Я́звы, Хрiстé, и рáны ми́лостивно подъя́л еси́,/ досáду по лани́тома ударéнiй терпя́, и долготерпели́вне оплевáнiя нося́,/ и҆́миже содéлал еси́ мне Спасéнiе:// слáва си́ле Твоéй, Гóсподи.
Хор: Слáва, Гóсподи, Святóму Воскресéнiю Твоемý.
Чтец: Тéлом смéртным, Животé, смéрти причасти́лся еси́,/ стрáсти рáди ни́щих, и воздыхáнiя убóгих Твои́х,/ и растли́в тлéющаго, Препрослáвленне,// всех совоскреси́л еси́, я́ко прослáвися.
Хор: Пресвятáя Богорóдице, спасù нас.
Богорóдичен: Помяни́, Хрiстé, éже стяжáл еси́ стáдо стрáстiю Твоéю:/ Препрослáвленныя Твоея́ Мáтере ми́лостивныя мольбы́ прiéм,/ и посети́в озлóбленное,// избáви си́лою Твоéю, Гóсподи.
Глас 6
Хор: Святы́й апóстоле Iáкове, молù Бóга о нас.
Чтец: Сам тя Госпóдь, Еди́н Святы́й,/ честнóму ли́ку ученикóв, блажéнне, сочетá,// честнóе и свéтлое житiя́ твоегó прови́девый.
Хор: Святы́й апóстоле Iáкове, молù Бóга о нас.
Чтец: Чудéс испóлнен Божéственнаго Дýха быв, Богопроповéдниче,/ чудотвори́ши бо, недýги отгоня́я,// и лукáвства духóв человéки свободи́л еси́.
Хор: Святы́й апóстоле Iáкове, молù Бóга о нас.
Чтец: Божéственное сiя́нiе, нашéдшее сéрдцу твоемý, блажéнне,/ Богосвéтло сié содéла// и прiя́тно пáче умá даровáнiй сотвори́.
Хор: Пресвятáя Богорóдице, спасù нас.
Богорóдичен: Божéственным Твои́м Рождествóм, Дéво Всечи́стая,/ А́нгельстiи чи́ни и земны́х собóри совокупи́шася;// мироначáльника бо Хрiстá и Спáса всех родилá еси́.
Глас 8
Хор: Святíи отцы́, молúте Бóга о нас.
Чтец: Глагóл Бóжiй имýще, стрелý и меч,/ вся кýпно ты́я закалáют злоýмныя/ óбразом Крéстным,/ не чтýщiя рáвно изображéнiя Хрiстóва, Богорóдицы и всех святы́х,// отцы́ Богови́днейшiи. (Двáжды)
Хор: Святíи отцы́, молúте Бóга о нас.
Чтец: Я́коже сéдмiю трубáми/ Iерiхóнскiя стéны в седмóм обхождéнiи падóша;/ тáко си́ми сéдмiю Собóры/ весь сонм, на Бóга вознося́щiйся, низведéн в бéздну// в Собрáнiи Седмóм благоглáсных труб Дýха. (Двáжды)
Слáва Ѻтцý и Сы́ну и Святóму Дýху.
Тропáрь: Ю́ношеское настоя́нiе показýя/ и Божéственною рéвностiю распаля́емо,/ отéческое мнóжество,/ я́коже Илiя́, стýдныя свящéнники умертви́ло есть./ Тем со дерзновéнiем Хрiстóве iкóне// любéзно покланя́тися научи́ло есть.
И ны́не и прúсно и во вéки векóв. Амúнь.
Богорóдичен: Ты моя́ надéжда, Всечи́стая, Ты моé и пéнiе,/ Ты моè пристáнище, Ты моè исправлéнiе, я́же Бóга Слóва Ѻ́тча Воплóщшагося несочтáнно родилá есѝ./ Тéмже Твоéй несомнéнно покланя́юся iкóне,// крéпостiю Твоéю укрепля́емь.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, си́ле Твоéй.
ПЕСНЬ 5
Iрмóс: К Тебé ýтреннюю, всех Творцý,/ преимýщему всяк ум мíрови,/ занé свет повелéнiя Твоя́,// в нúхже настáви мя.
Хор: Слáва, Гóсподи, Святóму Воскресéнiю Твоемý.
Чтец: Судiи́ непрáведному,/ еврéйскою зáвистiю прéдан быв, Всеви́дче,/ и всей прáведне судя́й землѝ,// Адáма дрéвняго избáвил есѝ осуждéнiя.
Хор: Слáва, Гóсподи, Святóму Воскресéнiю Твоемý.
Чтец: Твой мир цéрквам Твои́м, Хрiстè,/ непобеди́мою си́лою Крестá Твоегó,// из мéртвых воскресы́й, подáждь, и спасѝ дýши нáша.
Хор: Пресвятáя Богорóдице, спасù нас.
Богорóдичен: Ски́нiя Святáя, и прострáннейши небéс,/ я́ко И҆́же во всей твáри Невмести́маго Слóва Бóжiя прiéмши,// Еди́на яви́лася есѝ, Приснодéво.
Глас 6
Хор: Святы́й апóстоле Iáкове, молù Бóга о нас.
Чтец: Сóлнцу, блажéнне, ýмному собесéдник быв, лучѝ ты оттýду прiéмля,// éже по существý пéрвый Той есть, вторы́й по благодáти был есѝ, слáвне.
Хор: Святы́й апóстоле Iáкове, молù Бóга о нас.
Чтец: Ум чистéйшiй имев, свéтло же и чи́сто сéрдце ты стяжáв,// воплóщшагося Бóга ви́дел есѝ, непостижи́маго рáзумом.
Хор: Святы́й апóстоле Iáкове, молù Бóга о нас.
Чтец: Уступáет ти, ученичè, вся́ко прорóчество, и вся́ко законоположéнiе, пребогáте;// тéми бо дрéвле Проповéдаемаго самови́дно сподóбился есѝ, блажéнне, ви́дети.
Хор: Пресвятáя Богорóдице, спасù нас.
Богорóдичен: Се, Дéво, прорóчески имéла есѝ во чрéве Твоéм, Сýщаго над всéми Влады́ку и Гóспода,/ и неизречéнно Сегó, Чи́стая, родилá есѝ, Дéво, по рождествè нетлéнна пребы́вши.
Глас 8
Хор: Святíи отцы́, молúте Бóга о нас.
Чтец: Высóкою мы́слiю сразсмотри́вше,/ анáфеме образобóрцев предáша,/ я́ко чуждáя сих мýдрствовавших, честнíи отцы́;/ и честь Хрiстóве iкóне, я́коже лéпо,// воздая́ти повелéша. (Трúжды)
Хор: Святíи отцы́, молúте Бóга о нас.
Чтец: Ны́не врéмя весéлiя,/ ны́не день спасéнiя яви́ся,/ возвесели́мся ýбо и Хрiстý рáдостно возопiи́м:/ мир даждь нам Твой// моли́твами отцéв Седмáго Собóра, Человеколю́бче.
Слáва Ѻтцý и Сы́ну и Святóму Дýху.
Тропáрь: Ны́не врéмя весéлiя,/ ны́не день спасéнiя яви́ся,/ возвесели́мся ýбо и Хрiстý рáдостно возопiи́м:/ мир даждь нам Твой// моли́твами отцéв Седмáго Собóра, Человеколю́бче.
И ны́не и прúсно и во вéки векóв. Амúнь.
Богорóдичен: Благоутрóбiя рáди ми́лости,/ от Дéвы роди́ся Сын Бóжiй неврáщно,/ чýждее нося́, я́ко Своè,/ и зрáком сим опи́санный, зри́тся вóлею,// по Существý Сый Неопи́сан.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есѝ во утрóбе над всéми Бóга/ и родилá есѝ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Бéздна послéдняя грехóв обы́де мя,/ и исчезáет дух мой;/ но простры́й, Влады́ко, высóкую Твою́ мы́шцу,// я́ко Петрá, мя, Упрáвителю, спасù.
Хор: Слáва, Гóсподи, Святóму Воскресéнiю Твоемý.
Чтец: Бéздна ми́лости и щедрóт обы́де мя,/ благоутрóбным сни́тiем Твои́м:/ воплóщься бо, Влады́ко,// и быв в рáбiи зрáце, обожи́л есѝ, с Собóю сопрослáвив.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́т умертви́тель,/ умерщвлéнаго оживлéнно ви́дя:/ Твоегó воскресéнiя сíи суть, Хрiстè, óбразы,// и стрáсти Твоея́ пречи́стыя победи́тельная.
Хор: Пресвятáя Богорóдице, спасù нас.
Богорóдичен: Пречи́стая, я́же Еди́на Создáтелю и человéком, пáче умá исходáтаившая,// Сы́на Твоегó ми́лостива прегрéшшим рабóм Твои́м, и побóрника бы́ти, помоли́ся.
Глас 6
Хор: Святы́й апóстоле Iáкове, молù Бóга о нас.
Чтец: Нóги твоя́ крáсныя мир нелéстно я́ко благовествýюще,// мир сýщо преестéственный, и ум преимýщiй, ученичé Хрiстóв всечéстне.
Хор: Святы́й апóстоле Iáкове, молù Бóга о нас.
Чтец: Разумéти тáинство/ и проповéдати стрáшное Бóжiя воплощéнiя сподóбился есѝ, Iáкове,// перводéльныя лучѝ прiéмый от Самáго Высочáйшаго, приснопáмятне.
Хор: Святы́й апóстоле Iáкове, молù Бóга о нас.
Чтец: Неизречéннаго свéта сiя́я светлостьмѝ достóйно,// верхóвный Хрiстóв апóстоле, прилéжно моли́ся о творя́щих пáмять твою́, слáвне, пречестнýю.
Хор: Пресвятáя Богорóдице, спасù нас.
Богорóдичен: Всéми влады́чествующа твáрьми я́ко Бóга Благáго рóждши,/ согрешéнiй мои́х, Пречи́стая, стрýпы до концá потребѝ,// благоутрóбна содевáющи Рóждшагося из Тебè.
Глас 8
Хор: Святíи отцы́, молúте Бóга о нас.
Чтец: Да кáплют слáдость гóры и рáдость:/ ерети́ческое бо мнóжество изгнáся,/ гóрькiй изливáющее яд,// святы́х iкóн отвержéнiе. (Трúжды)
Хор: Святíи отцы́, молúте Бóга о нас.
Чтец: Нéбо и земля́ соглáсно да прáзднуют/ Дщéре Бóжiя вели́чiе:// и҆́бо величáется, отметáющи Сiю́ умаля́ющiя.
Слáва Ѻтцý и Сы́ну и Святóму Дýху.
Тропáрь: Нéбо и земля́ соглáсно да прáзднуют/ Дщéре Бóжiя вели́чiе:// и҆́бо величáется, отметáющи Сiю́ умаля́ющiя.
И ны́не и прúсно и во вéки векóв. Аминь.
Богорóдичен: Мáтернiй Сын, И҆́же Ѻ́тчiй пéрвее безмáтерен,/ безóтчiй же Боголéпно роди́вся/ и возроди́в мя;// тéмже Рóждшую с Рождéнным образýя, облобызáю.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк отцéв, глас 8: И҆́же из Ѻтцá возсiя́в, Сын неизречéнно/ из Жены́ роди́ся, сугýб естествóм,/ Егóже ви́дяще, не отметáемся зрáка изображéнiя,/ но, сiè благочéстно начертáюще,/ почитáем вéрно./ И сегó рáди и҆́стинную вéру Цéрковь держáщи,// лобызáет iкóну вочеловéченiя Хрiстóва.
Íкос: Хотя́й Всещéдрый Бог нас воздвизáти при́сно/ к пáмяти совершéнней Своегó вочеловéченiя,/ подлóг сей предадè человéком,/ шародéланьми iкóн честны́й возображáти зрак;/ я́ко да сiя́ во зрéнiих ви́дяще,/ вéруем, я́же слóвом слы́шахом,/ разумéюще я́ве дея́нiе и и҆́мя,/ начертáнiе и страдáнiя святы́х мужéй,/ и Хрiстá Венцодáвца,/ венцы́ подаю́ща святы́м, страдáльцем же и мýчеником.// И҆́хже рáди яснéйше и҆́стинную вéру держáщи, Цéрковь лобызáет iкóну вочеловéченiя Хрiстóва.
ПЕСНЬ 7
Iрмóс: Я́коже дрéвле/ благочестúвыя три óтроки оросúл есù/ в плáмени халдéйстем,/ свéтлым Божествá огнéм/ и нас озарù,/ благословéн есù, взывáющiя,// Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Раздрáся церкóвная свéтлая катапетáсма, в распя́тiи Содéтеля,/ сокровéнную в Писáнiи явля́ющи вéрным и҆́стину,// благословéн есѝ, зовýщим, Бóже отéц нáших.
Хор: Слáва, Гóсподи, Святóму Воскресéнiю Твоемý.
Чтец: Прободéнным Твои́м рéбром,/ кáплями Боготóчныя Животворя́щiя Крóве, Хрiстé,/ смотри́тельно кáплющiя на зéмлю,/ сýщих от землѝ возсоздáл есѝ,// благословéн есѝ, зовýщих, Бóже отéц нáших.
Хор: Пресвятáя Трóице, Бóже наш, слáва Тебé.
Трóичен: Дýха Благáго со Отцéм прослáвим, и с Сы́ном Единорóдным,/ Еди́но в Трiéх вéрнiи чтýще Начáло, и Еди́но Божествó:// благословéн есѝ, зовýще, Бóже отéц нáших.
Глас 6
Хор: Святы́й апóстоле Iáкове, молù Бóга о нас.
Чтец: Свéтлостьми и сiя́ньми Дýха просвещéннаго,/ язы́к мнóжество сéмя Божéственное тя именýет, зовýще:// благословéн есѝ, Гóсподи, Бóже отéц нáших.
Хор: Святы́й апóстоле Iáкове, молù Бóга о нас.
Чтец: Мýдростiю укрáшен Богодаровáнною ти/ разори́л есѝ мiрскýю мýдрость,/ Богомýдренно зовы́й, апóстоле:// благословéн есѝ, Гóсподи, Бóже отéц нáших.
Хор: Святы́й апóстоле Iáкове, молù Бóга о нас.
Чтец: Во всю зéмлю изы́де вещáнiе твоè, апóстоле Iáкове,/ éже возвести́л есѝ, я́ко гром, всем странáм, премýдре,// Воплощéнное Слóво достóйно проповéдая.
Хор: Пресвятáя Богорóдице, спасù нас.
Богорóдичен: Святы́х святéйши, Дéво Мáти, Ты былá есѝ,/ я́ко рóждши Бóга несказáнно,/ Егóже воспевáюще, непрестáнно зовéм:/ благословéн есѝ, Гóсподи, Бóже отéц нáших.
Глас 8
Хор: Святíи отцы́, молúте Бóга о нас.
Чтец: Побеждáются догмáтами/ Богоглагóливых мужéй ересеначáльницы,/ образóв честь первообрáзным изобразýющих прáво,/ я́коже речé Вели́кiй Васíлiй:// благословéн Бог отéц нáших. (Двáжды)
Хор: Святíи отцы́, молúте Бóга о нас.
Чтец: Хрáми удобря́ются, свéтлыми iкóнами украшáемiи днесь;/ сегó рáди мир в цéрквах, пáче всех человéк краснéйшему добрóтою,/ совоспевáет пою́щему:// благословéн Бог отéц нáших. (Двáжды)
Слáва Ѻтцý и Сы́ну и Святóму Дýху.
Тропáрь: Свет облистá, далéче тьма, нечести́вiи отгнáны./ Сегó рáди вся́ческая свéта испóлнишася,/ Светодáтеля Хрiстá с весéлiем пою́т и глагóлют:// благословéн Бог отéц нáших.
И ныне и прúсно и во вéки векóв. Аминь.
Богорóдичен: Пречи́стая Влады́чица, еди́на всех спасéнiя надéжда,/ я́же стрáшно рóждшая Царя́ царéй Хрiстá,/ на рукáх Свои́х Сегó Младéнца нося́щи,// спокланя́ема есть опи́санне, я́коже отцы́ глагóлют.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есѝ.
ПЕСНЬ 8
Iрмóс: Нестерпúмому огню́ соединúвшеся,/ Богочéстiя предстоя́ще, ю́ноши,/ плáменем же невреждéни,/ Божéственную песнь поя́ху:/ благословúте, вся делá Госпóдня, Гóспода// и превозносúте во вся вéки.
Продолжéнiе здесь