Покров Пресвятой Владычицы нашей Богородицы и Приснодевы Марии. ВСЕНОЩНОЕ БДЕНИЕ. УТРЕНЯ КАНОН
14 октября́ 2023 гóда. Суббóта 19-й седмúцы по Пятидеся́тнице. Покрóв Пресвяты́я Влады́чицы нáшея Богорóдицы и Приснодéвы Марíи. Прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступù// и спасù, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
ПРОКИМЕН
Чтец: Прокíмен, глас четвéртый. Помянý и҆́мя Твоé во вся́ком рóде и рóде.
Хор: Помянý и҆́мя Твоé/ во вся́ком рóде и рóде.(Пс.44:18А)
Чтец: Отры́гну сéрдце мое слóво блáго, глагóлю аз делá моя Царéви. (Пс.44:2А)
Хор: Помянý и҆́мя Твоé/ во вся́ком рóде и рóде.
Чтец: Помянý и҆́мя Твоé.
Хор: Во вся́ком рóде и рóде.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.4): Во дни óны, востáвши, Марiáм, и҆́де в гóрняя со тщáнiем, во град Iýдов. И вни́де в дом Захáрiин, и целовá Елисавéт. И бысть я́ко услы́ша Елисавéт целовáнiе Марíино, взыгрáся младéнец во чрéве ея́: и испóлнися Дýха Свя́та Елисавéт. И возопи́ глáсом вéлiим, и речè: благословéна Ты в женáх, и благословéн плод чрéва Твоегó. И откýду мне сiè, да прiи́де Мáти Гóспода моегó ко мне? Се бо, я́ко бысть глас целовáнiя Твоегó во ýшiю моéю, взыгрáся младéнец рáдощами во чрéве моéм. И блажéнна Вéровавшая, яко бýдет совершéнiе глагóланным Ей от Гóспода. И речè Марiáм: вели́чит душá Моя́ Гóспода, и возрáдовася дух Мой о Бóзе Спáсе Моéм. Я́ко призрè на смирéнiе Рабы́ Своея́: се бо, отны́не ублажáт Мя вси рóди. Я́ко сотвори́ Мне вели́чiе Си́льный, и свя́то и҆́мя Егó. Пребы́сть же Марiáмь с нею я́ко три мéсяцы, и возврати́ся в дом Свой.
[Синодальный перевод]Встав же Мария во дни сии, с поспешностью пошла в нагорную страну, в город Иудин, и вошла в дом Захарии, и приветствовала Елисавету. Когда Елисавета услышала приветствие Марии, взыграл младенец во чреве ее; и Елисавета исполнилась Святого Духа, и воскликнула громким голосом, и сказала: благословенна Ты между женами, и благословен плод чрева Твоего! И откуда это мне, что пришла Матерь Господа моего ко мне? Ибо когда голос приветствия Твоего дошел до слуха моего, взыграл младенец радостно во чреве моем. И блаженна Уверовавшая, потому что совершится сказанное Ей от Господа. И сказала Мария: величит душа Моя Господа, и возрадовался дух Мой о Боге, Спасителе Моем, что призрел Он на смирение Рабы Своей, ибо отныне будут ублажать Меня все роды; что сотворил Мне величие Сильный, и свято имя Его; Пребыла же Мария с нею около трех месяцев, и возвратилась в дом Свой.(Лк.1:39-49,56)
Хор: Слáва Тебè, Гóсподи, слáва Тебè.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моè. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моè аз знáю и грех мой прéдо мнóю есть выну. Тебè Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх родѝ мя мáти моя. Се бо и҆́стину возлюби́л есѝ, безвéстная и тáйная премýдрости Твоея яви́л ми есѝ. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отвратѝ лицè Твоè от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обновѝ во утрóбе моéй. Не отвéржи менè от лицá Твоегó, и Дýха Твоегó Святáго не отымѝ от менè. Воздáждь ми рáдость спасéнiя Твоегó, и Дýхом Влады́чним утвердѝ мя. Научý беззакóнныя путéм Твоим, и нечести́вiи к Тебè обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнè мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажѝ, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами Богорóдицы,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Тáже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моè. (Пс.50:3)
Стiхúра, глас 8: Срáдуются с нáми ýмная вся чиноначáлiя,/ духóвно совокýпльше чýвственный лик,/ ви́дяще Цари́цу и Влады́чицу всех, многоимéнне вéрными слáвиму,/ рáдуются же и дýси прáведных, сýщiи зри́телiе видéнiя,/ на воздýсе молéбно простирáющу всечестнéи Свои́ рýце,/ прося́щу умирéнiя мíру// и спасéнiя душ нáших.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ПРАЗДНИКА, ГЛАС 4
ПЕСНЬ 1
Iрмóс: Отвéрзу устá моя́,/ и напóлнятся Дýха,/ и слóво отры́гну Царúце Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе. (Двáжды)
Хор (припéв): Пресвятáя Богорóдице, спасù нас.
Чтец (тропáрь): С чи́нми святы́х Áнгел и с собóры прорóк и апóстол,/ в слáве вели́цей, я́ко Мáти Бóжiя,/ днесь в цéрковь вшéдши, за хрiстiáны мóлишися,/ от напáсти и печáли избавля́еши вся,// покрывáющи Твоéю ми́лостiю. (Трúжды)
Припéв: Пресвятáя Богорóдице, спасù нас.
Тропáрь: Ски́нiю Тя Моисéй и жезл Аарóнов именовá:/ Ты бо живóтное дрéво, Хрiстá, процвелá еси́,/ к Немýже дерзновéнiе имýщи, за ны, чéствующiя Тя, Цари́це, помоли́ся/ избáвити нас от вся́каго зла,// да Твоегó Покрóва прáздник слáвим. (Трúжды)
Припéв: Пресвятáя Богорóдице, спасù нас.
Тропáрь: Не я́ко пред кiвóтом дрéвле, собрáв, Давíд, ли́ки, игрáет,/ но пáче ны́не с чи́нми святы́х пред Тобóю текýще в цéрковь, Тебè клáняющеся, глагóлют:/ моли́ за чéствующiя Тя лю́ди,// да Твой слáвяще Покрóв, чéстно прáзднуем. (Двáжды)
Слáва Отцý и Сы́ну и Святóму Дýху.
Тропáрь: Пою́т Тя, Богорóдице, Áнгельстiи чи́ни,/ и слáвят патрiáрси со святи́тели пред лицéм Ти, текýще в цéрковь./ С ни́миже Тя тогдá святы́й Андрéй ви́де, за ны грéшныя, к Бóгу моля́щуюся,// поми́ловати лю́ди, слáвящiя Твоегó Покрóва прáздник.
И ны́не и прúсно и во вéки векóв. Амúнь.
Тропáрь: Пою́т Тя, Богорóдице, Áнгельстiи чи́ни,/ и слáвят патрiáрси со святи́тели пред лицéм Ти, текýще в цéрковь./ С ни́миже Тя тогдá святы́й Андрéй ви́де, за ны грéшныя, к Бóгу моля́щуюся,// поми́ловати лю́ди, слáвящiя Твоегó Покрóва прáздник.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Твоя́ песнослóвцы, Богорóдице,/ живы́й и незавúстный Истóчниче,/ лик себè совокýпльшiя, духóвно утвердù,/ в честнéм вхождéнiи Твоéм// венцéв слáвы сподóби. (Двáжды)
Хор: Пресвятáя Богорóдице, спасù нас.
Чтец: Клас прозя́бшая Божéственный,/ я́ко ни́ва неорáнная я́ве,/ рáдуйся, одушевлéнная трапéзо,/ Хлеб Живóтный вмéщшая.// Рáдуйся, Живóтныя воды́ истóчниче неистощи́мый, Влады́чице. (Трúжды)
Хор: Пресвятáя Богорóдице, спасù нас.
Чтец: Твои раби́, Влады́чице,/ в цéркви Твоéй вéрою предстоя́ще, Твоея́ ожидáем ми́лости:// посети́ нáше смирéнiе и Твои́м святы́м Покрóвом защити́ лю́ди от вся́каго зла. (Трúжды)
Хор: Пресвятáя Богорóдице, спасù нас.
Чтец: Многоимени́тая Дéво,/ прорóки проображенá чéстно, и́же Тебè ны́не со Áнгелы слýжат./ С ни́миже о нас к Бóгу моли́ся,// да Твоегó Покрóва святы́й день, рáдующеся, вси свéтло прáзднуем. (Двáжды)
Слáва Отцý и Сы́ну и Святóму Дýху.
Тропáрь: Гедеóн Тя рунó прообрази́,/ на Тя бо, я́ко росá, Хрiстóс Бог сни́де,/ к Немýже, Богорóдице, моли́ся, побéду дáти вóинству нáшему на враги́,// да я́ко Мадiáмы низложи́в, прослáвим святы́й Твой прáздник.
И ны́не и прúсно и во вéки векóв. Амúнь.
Тропáрь: Пáче сóлнечных луч Твои́м блистáющим омофóром освещáеши Цéрковь и лю́ди/ и тьму грехóв нáших отгóниши посещéнiем Твои́м, Богорóдице,// к Сы́ну Твоемý и Бóгу за ны моля́щися.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себè совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Седáлен прáздника, глас 5: Тéплая Предстáтельнице и непобеди́мая,/ уповáнiе извéстное и непосты́дное,/ стенó, и покрóве, и пристáнище прибегáющим к Тебè,/ Приснодéво Чи́стая,/ Сы́на Твоегó и Бóга моли́ со Áнгелы/ умирéнiе дáти мíру, и спасéнiе,// и вéлiю ми́лость.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Тéплая Предстáтельнице и непобеди́мая,/ уповáнiе извéстное и непосты́дное,/ стенó, и покрóве, и пристáнище прибегáющим к Тебè,/ Приснодéво Чи́стая,/ Сы́на Твоегó и Бóга моли́ со Áнгелы/ умирéнiе дáти мíру, и спасéнiе,// и вéлiю ми́лость.
ПЕСНЬ 4
Iрмóс: Седя́й в Слáве/ на Престóле Божествá/ во óблаце лéгце,/ прiúди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, сúле Твоéй. (Двáжды)
Хор: Пресвятáя Богорóдице, спасù нас.
Чтец: Во глáсех пéнiй, Дéво, Тебè вопiéм, Всепéтая:/ рáдуйся, тýчная горó и усырéнная Дýхом./ Рáдуйся, свéщниче и стáмно, Мáнну нося́щая,// услаждáющая всех благочести́вых чýвства. (Трúжды)
Хор: Пресвятáя Богорóдице, спасù нас.
Чтец: Пáче Аарóня кiвóта всю Тя Бог освяти́л есть Дýхом, Богорóдице, Святы́м,/ и Áнгелом служи́ти Тебè повелè,/ с ни́миже за град и лю́ди моли́ся,// Твой слáвящих честны́й прáздник. (Трúжды)
Хор: Пресвятáя Богорóдице, спасù нас.
Чтец: Прiиди́ ны́не в слáве в Твою́, Богорóдице, цéрковь с собóры всех святы́х,/ я́коже иногдá Тя святы́й Андрéй ви́де на воздýсе свéтле, за хрiстiáны моля́щуюся,// и подáждь нам Твою́ ми́лость. (Двáжды)
Слáва Отцý и Сы́ну и Святóму Дýху.
Тропáрь: Укрепи́, Влады́чице, слáвящее Тя вóинство нáше на проти́вныя враги́,/ я́ко Давíда на Голiáфа;/ да Тебè, веселя́щеся, вопiéм:// рáдуйся, покрóве святы́й и Застýпнице грáду нáшему.
И ны́не и прúсно и во вéки векóв. Амúнь.
Тропáрь: Тебè припáдаем, Госпожè, вéрою и, покланя́ющеся, благодáрно вопiéм Ти:/ рáдуйся, Богоблагодáтная Дéво, покрóве, и ограждéнiе нáше, и Помóщнице в бедè сýщим,// спаси́ нас, к Тебè прибегáющих, на Тя бо надéемся.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасè зовýщiя:// слáва, Хрїстè, си́ле Твоéй.
ПЕСНЬ 5
Iрмóс: Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла есù во утрóбе над всéми Бóга/ и родилá есù Безлéтнаго Сы́на,/ всем, воспевáющим Тя,// мир подавáющая. (Двáжды)
Хор: Пресвятáя Богорóдице, спасù нас.
Чтец: Одр Тя дрéвле Соломóн написá/ и лóжницу Небéснаго Царя́, обступáему Серафíмы, éже о Тебè речéся, Богорóдице./ Тем Тя ны́не мóлим, Мáти Бóжiя Всесвятáя:// покры́й нас от всех бед. (Трúжды)
Хор: Пресвятáя Богорóдице, спасù нас.
Чтец: Тебè Áнгелов старéйшины и честнíи прорóцы со апостóлы/ я́ко Мáтери Бóжiи чéстно слýжат,/ ви́дяще Тя за мир моли́тву творя́щу;// Твоя́ же прошéнiя послýшав, Госпóдь спасáет град и лю́ди, на Тя наде́ющiяся. (Трúжды)
Хор: Пресвятáя Богорóдице, спасù нас.
Чтец: Вели́кiй Тя во прорóцех Исáiя проречè, глагóля, Бóга роди́ти неискусобрáчно:/ Ты бо, Чи́стая Марíе, святéйши всех бы́ла éси,/ Бóга бо во утрóбе и на руку́ носи́ла еси́.// Ему́же за ны моли́ся, Твои́м осеня́ющи Покрóвом вéрою Тя слáвящих. (Двáжды)
Слáва Отцý и Сы́ну и Святóму Дýху.
Тропáрь: Духóвными паря́ще кри́лы, святы́х собóри тáйно прiидóша Тебè послужи́ти, Богорóдице,/ ви́дяще Тя на лéгце óблаце слáвы, ко Спáсу Хрiстý моля́щуюся// подáти побéду вóинству нáшему, погуби́ти вою́ющих нас.
И ны́не и прúсно и во вéки векóв. Амúнь.
Тропáрь: Духóвными паря́ще кри́лы, святы́х собóри тáйно прiидóша Тебè послужи́ти, Богорóдице,/ ви́дяще Тя на лéгце óблаце слáвы, ко Спáсу Хрiстý моля́щуюся// подáти побéду вóинству нáшему, погуби́ти вою́ющих нас.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiидúте, рукáми восплéщим,// от Нея́ рóждшагося Бóга слáвим. (Двáжды)
Хор: Пресвятáя Богорóдице, спасù нас.
Чтец: Iерéи Богомýдрiи, в цéркви Твоéй с людьми́ благочести́выми предстоя́ще,/ Твоéй ожидáют, Богорóдице, ми́лости:/ премени́ на рáдость нáшу печáль, Рáдость бо родилá еси́,// всех человéков грехи́ отпусти́вшаго. (Трúжды)
Хор: Пресвятáя Богорóдице, спасù нас.
Чтец: Тебè вся земля́ дáры принóсит/ я́ко Цари́це Бóжiи Мáтери:/ архiерéи клáняются и лю́дiе вси веселя́тся,// покрывáеми от вся́каго зла Твои́ми, Богорóдице, моли́твами. (Трúжды)
Хор: Пресвятáя Богорóдице, спасù нас.
Чтец: Гóру Тя вели́ку Данiи́л пронаписá:/ из Тебè бо без сéмене роди́ся Хрiстóс/ и сокруши́ всю дéмонскую лесть, и всю Своея́ вéры испóлни зéмлю.// К Нéмуже за ны, Богорóдице, моли́ся, слáвящiя Твоегó Покрóва прáздник. (Двáжды)
Слáва Отцý и Сы́ну и Святóму Дýху.
Тропáрь: Áнгельскiй глас взывáем Ти, Пречи́стая:/ рáдуйся, Престóле Бóжiй, на нéмже Iезекiи́ль ви́де Гóспода в подóбiи человéка, носи́ма Херувíмы.// С ни́миже за ны, Богорóдице, моли́ся, да спасéт дýши нáша.
И ны́не и прúсно и во вéки векóв. Амúнь.
Тропáрь: Áнгельскiй глас взывáем Ти, Пречи́стая:/ рáдуйся, Престóле Бóжiй, на нéмже Iезекiи́ль ви́де Гóспода в подóбiи человéка, носи́ма Херувíмы.// С ни́миже за ны, Богорóдице, моли́ся, да спасéт дýши нáша.
Катавáсiя (глас 4): Божéственное сiè и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк прáздника, глас 3: Дéва днесь предстои́т в цéркви/ и с ли́ки святы́х неви́димо за ны мóлится Бóгу,/ Áнгели со архiерéи покланя́ются,/ апóстоли же со прорóки ликовствýют:// нас бо рáди мóлит Богорóдица Превéчнаго Бóга.
Íкос: Тоя́ преслáвных чудéс,/ прiиди́те, лю́дiе, наслади́мся:/ Сéю бо Адáм от тли избáвися./ Та бо и ковчéг, не Нóем, но Бóгом сотворéн бысть./ Дрéвле ýбо Моисéй в купинè óгненней Бóга ви́дети не возмóже,/ ны́не же от Тоя́ Рóждшагося вся земля́ знáет Сы́на Бóжiя,/ к Немýже за ны мóлится./ Сегó рáди прославля́ем Ю́ я́ко Бóжiю Мáтерь:// нас бо рáди Богорóдица мóлит Превéчнаго Бóга.
ПЕСНЬ 7
Iрмóс: Не послужúша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есѝ. (Двáжды)
Хор: Пресвятáя Богорóдице, спасù нас.
Чтец: Неиспи́санная мнóгими прорóки,/ несвéдома же бысть, Дéво, Небéсными служáщими Бóгу Áнгелы;/ ны́не же вси вéмы Тя Богорóдицу,// и Твоея́ трéбуем пóмощи и заступлéнiя, Благословéнная. (Трúжды)
Хор: Пресвятáя Богорóдице, спасù нас.
Чтец: Горá, усырéнная Дýхом,/ ю́же Аввакýм ви́де точáщу вéрным целéбную слáдость, Богорóдице Дéво,/ исцели́ ны, Сы́ну Твоемý вопiю́щiя:// благословéн Бог отéц нáших. (Трúжды)
Хор: Пресвятáя Богорóдице, спасù нас.
Чтец: Преклони́вый Небесá в Тя, Дéво, всели́ся/ и ны́не на моли́тву Твою́ зрит, Богорóдице Чи́стая, Твоè, Цари́це, исполня́я прошéнiе:// Емýже за ны усéрдно помоли́ся, на Тя бо надéемся, Благословéнная. (Двáжды)
Слáва Отцý и Сы́ну и Святóму Дýху.
Тропáрь: Твóрче, Спáсе наш, Хрiстè Бóже, прiими́ моли́тву Твоея́ Мáтере,/ ю́же Тебè за ны, грéшныя, принóсит,/ да Тебè, рáдующеся, поéм:// препéтый отéц нáших Бóже, благословéн еси́.
И ны́не и прúсно и во вéки векóв. Амúнь.
Тропáрь: Твóрче, Спáсе наш, Хрiстè Бóже, прiими́ моли́тву Твоея́ Мáтере,/ ю́же Тебè за ны, грéшныя, принóсит,/ да Тебè, рáдующеся, поéм:// препéтый отéц нáших Бóже, благословéн еси́.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн есѝ.
ПЕСНЬ 8
Iрмóс: Óтроки благочестúвыя в пещù/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делá,// и превозносúте Егó во вся вéки. (Двáжды)
Хор: Пресвятáя Богорóдице, спасù нас.
Чтец: С чи́нми Áнгел, Влады́чице,/ с честны́ми и слáвными прорóки, с верхóвными апóстолы, и со священному́ченики, и со архiерéи за ны, грéшныя, Бóгу помоли́ся,// Твоегó Покрóва прáздник в Россíйстей земли́ прослáвльшiя. (Трúжды)
Хор: Пресвятáя Богорóдице, спасù нас.
Чтец: Горды́ню и шатáнiя низложи́ и совéты непрáведных разори́,/ зачинáющих рáти погуби́, о Бóжiя Мáти, Цари́це Всечестнáя,/ правослáвных рог возвы́си, да Твой прáздник слáвим, Пречи́стая Богорóдице Дéво, зовýще:// Гóспода воспевáйте делá и превозноси́те Егó во вся вéки. (Трúжды)
Хор: Пресвятáя Богорóдице, спасù нас.
Чтец: Усты́ принося́ще Тебè пéнiе, и душéю вéрно покланя́емся,/ и́бо внутрь сердцá нáша горя́т./ Мáти Бóжiя Пречи́стая, поми́луй нас, моля́щихся Тебè, и Гóспода воспевáющих,// и превознося́щих Егó во вся вéки. (Двáжды)
Благословúм Отцá, и Сы́на, и Святáго Дýха, Гóспода.
Тропáрь: Мнóгими отягчи́хся грехи́, недоумéю по достоя́нiю написáти Твоегó Покрóва, Богорóдице, похвалы́,/ но я́ко Мáти Бóжiя украси́ Твой прáздник чудесы́,// да вси, рáдующеся, поéм Гóспода и превознóсим Егó во вся вéки.
И ны́не и прúсно и во вéки векóв. Амúнь.
Тропáрь: Мнóгими отягчи́хся грехи́, недоумéю по достоя́нiю написáти Твоегó Покрóва, Богорóдице, похвалы́,/ но я́ко Мáти Бóжiя украси́ Твой прáздник чудесы́,// да вси, рáдующеся, поéм Гóспода и превознóсим Егó во вся вéки.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пещѝ/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебè:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрè на смирéнiе рабы́ Своея́,/ се бо от ны́не ублажáт Мя вси рóди.
Я́ко сотворѝ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотворѝ держáву мы́шцею Своéю,/ расточѝ гóрдыя мы́слiю сéрдца их.
Низложѝ си́льныя со престóл, и вознесè смирéнныя;/ áлчущiя испóлни благ, и богатя́щiяся отпустѝ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чúстая Приснодéво. (Двáжды)
Хор: Пресвятáя Богорóдице, спасù нас.
Чтец: Высóкiй Царю́, со Отцéм седя́й и от Серафíм воспевáемый,/ при́зри на моли́тву Мáтерню, ю́же Тебè за ны, грéшныя, принóсит,/ и очи́сти грехи́ нáша, спаси́ град, и лю́ди умнóжи,// даждь нам здрáвiе телесè и на погáныя побéды, моли́твами Рóждшiя Тя. (Трúжды)
Хор: Пресвятáя Богорóдице, спасù нас.
Чтец: Áнгельскiй глас вопiéм Тебè, Дéво Богоизбрáнная:/ рáдуйся, я́же Адáма пáки в рай ввéдшая;/ рáдуйся, дéмоны прогоня́щи Твои́м и҆́менем;/ рáдуйся, надéжде хрiстiáн;/ рáдуйся, освящéнiе душ;// рáдуйся, Храни́тельнице грáда нáшего. (Трúжды)
Хор: Пресвятáя Богорóдице, спасù нас.
Чтец: Помяни́ нас во Твоих моли́твах, Госпожè Дéво Богорóдице,/ да не поги́бнем за умножéнiе грехóв нáших./ Покры́й нас от вся́каго зла и лю́тых напáстей:// на Тя бо уповáем и, Твоегó Покрóва прáздник чéствующе, Тя величáем. (Двáжды)
Слáва Отцý и Сы́ну и Святóму Дýху.
Тропáрь: Дар от Бóга прiя́ла еси́ я́ко Мáти Бóжiя/ всех хрiстiáн недýги исцеля́ти,/ и от бед избавля́ти, и грехи́ отпущáти,/ и от пленéнiя спасáти и вся́кiя нýжды./ Но и нас не прéзри, Госпожè: вéси бо, и҆́хже трéбуем,// здрáвiя телесéм и душáм спасéнiя.
И ны́не и прúсно и во вéки векóв. Амúнь.
Тропáрь: Дар от Бóга прiя́ла еси́ я́ко Мáти Бóжiя/ всех хрiстiáн недýги исцеля́ти,/ и от бед избавля́ти, и грехи́ отпущáти,/ и от пленéнiя спасáти и вся́кiя нýжды./ Но и нас не прéзри, Госпожè: вéси бо, и҆́хже трéбуем,// здрáвiя телесéм и душáм спасéнiя.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Светúлен прáздника: О Пресвятáя Госпожè, Дéво Богорóдице!/ Покры́й нас чудéсным Твои́м омофóром,/ сохраня́я град и лю́ди от вся́каго зла,/ я́коже Тя пречýдный Андрéй ви́де во Влахéрнстей цéркви моля́щуюся;// и ны́не нам, Госпожè, посли́ вели́кую Твою́ ми́лость.(Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
О Пресвятáя Госпожè, Дéво Богорóдице!/ Покры́й нас чудéсным Твои́м омофóром,/ сохраня́я град и лю́ди от вся́каго зла,/ я́коже Тя пречýдный Андрéй ви́де во Влахéрнстей цéркви моля́щуюся;// и ны́не нам, Госпожè, посли́ вели́кую Твою́ ми́лость.
ХВАЛИТНЫ
Хор, глас 8: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речè, и бы́ша, Той повелè, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царè своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
[Пропускается до стихир]Сотвори́ти в них суд напи́сан: слáва сiя бýдет всем преподóбным Егó. Хвали́те Бóга во святы́х Егó, хвали́те Егó в утвержéнiи си́лы Егó.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúры прáздника, глас 8: Тебè припáдаем, Госпожè,/ уми́льно клáняющеся, мóлим Тя:/ рáдуйся, Богоблажéнная Влады́чице,/ многоимени́тая Дéво,/ прорóки проображéнная чéстно:/ в Тя бо, я́ко росá, Хрiстóс Бог сни́де,/ и родилá еси́, Браконеискýсная Чи́стая, и на рукý носи́ла еси́ всех Творцá и Гóспода./ Емýже ны́не о нас моли́ся,// слáвящих вéрно Твоегó Покрóва прáздник.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Тебè припáдаем, Госпожè,/ уми́льно клáняющеся, мóлим Тя:/ рáдуйся, Богоблажéнная Влады́чице,/ многоимени́тая Дéво,/ прорóки проображéнная чéстно:/ в Тя бо, я́ко росá, Хрiстóс Бог сни́де,/ и родилá еси́, Браконеискýсная Чи́стая, и на рукý носи́ла еси́ всех Творцá и Гóспода./ Емýже ны́не о нас моли́ся,// слáвящих вéрно Твоегó Покрóва прáздник.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúра: Пою́т Тя, Дéво Богорóдице, А́нгельстiи чи́ни,/ и слáвят патрiáрси со архiерéи/ и святíи апóстоли,/ я́ко Мáтери Бóжiи чéстно слýжат Тебè,/ ви́дяще Тя за мiр моли́тву творя́щую/ ко Спáсу всех, Хрiстý Бóгу./ Емýже помоли́ся избáвити град и лю́ди,/ слáвящiя Тя вéрно// и Твоегó Покрóва прáздник чéствующiя.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Пáче Аарóня кiвóта/ всю Тя Бог освяти́/ Дýхом, Богорóдице, Святы́м,/ и пáче сóлнечных луч/ Твои́м светя́щимся омофóром/ освещáеши Цéрковь и лю́ди/ и тьму грехóв нáших отгоня́еши,/ избавля́еши же от бед и скорбéй// вéрою чéствующiя Твоегó честнáго Покрóва прáздник.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Глас 6: Я́ко ви́де Тя пречýдный Андрéй на воздýсе/ со Архáнгельским мнóжеством,/ со апóстолы, и прорóки,/ и мнóжеством мýчеников,/ Сы́ну Твоемý и Бóгу нáшему о грáде и лю́дех моля́щуюся, Влады́чице,/ и честны́м Твои́м Покрóвом покрывáющую,/ не оскудéй и ны́не, Пречи́стая,/ спасти́ изря́дное достоя́нiе Твоегó Сы́на,// пречестны́й прáздник Твой прáзднующе, Многопéтая.
Вóзглас: Слáва Тебè, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстè, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоè во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебè. Гóсподи, к Тебè прибегóх, научѝ мя твори́ти вóлю Твою́, яко Ты есѝ Бог мой, яко у Тебè истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 рáза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь прáздника, глас 4: Днесь благовéрнiи лю́дiе свéтло прáзднуем,/ осеняеми Твои́м, Богомáти, пришéствiем,/ и к Твоемý взирáюще пречи́стому óбразу, уми́льно глагóлем:/ покры́й нас честны́м Твои́м Покрóвом/ и избáви нас от вся́каго зла,/ моля́щи Сы́на Твоегó, Хрiстá Бóга нáшего,// спасти́ дýши нáша.
Гóсподи поми́луй (40 раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи поми́луй (12раз)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстè, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
С утрá чти часы и обéдницу