Недeля 18 по Пятидесятнице. Преставление прп. Сергия игумена Радонежского.ОБЕДНИЦА (Изобразительные)
8 октября́ 2023 гóда. Недéля 18 по Пятидеся́тнице. Преставлéнiе прп. Сéргiя, игýмена Рáдонежскаго, всея́ Россíи чудотвóрца. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе изобразúтельных.
Прежде глагóли часы. Аще имаши произволéнiе то чти ýтреню с канóном и пéрвым чáсом, áще же ни, тóкмо часы.
ЧИН ОБЕДНИЦЫ
Глагóли сúце: Благословѝ, душè моя́, Гóспода,/ благословéн есѝ Гóсподи.
Псалом 102
Благословѝ, душè моя́, Гóспода,/ и вся внýтренняя моя и҆́мя святóе Егó./ Благословѝ, душè моя, Гóспода,/ и не забывáй всех воздая́нїй Егó,/ очищáющаго вся беззакóнїя твоя́,/ исцеля́ющаго вся недýги твоя́,/ избавля́ющаго от истлéнiя живóт твой,/ венчáющаго тя ми́лостїю и щедрóтами,/ исполня́ющаго во благи́х желáнїе твоè:/ обновится я́ко óрля юность твоя́./ Творя́й ми́лостыни Госпóдь,/ и судьбý всем оби́димым./ Сказá путѝ Своя́ Моисéови,/ сыновóм Iзрáилевым хотéнїя Своя́:/ Щедр и Ми́лостив Госпóдь,/ Долготерпели́в и Многоми́лостив./ Не до концá прогнéвается,/ нижè во век враждýет,/ не по беззакóнїем нáшим сотвори́л есть нам,/ нижè по грехóм нáшым воздáл есть нам./ Я́ко по высотè небéсней от землѝ,/ утверди́л есть Госпóдь ми́лость Свою́ на боя́щихся Егó./ Ели́ко отстоят востóцы от зáпад,/ удáлил есть от нас беззакóнїя нáша./ Я́коже щéдрит отéц сы́ны,/ ущéдри Госпóдь боя́щихся Егó./ Я́ко Той познá создáнїе нáше,/ помянý, яко персть есмы́./ Человéк, яко травá днíе eгó,/ яко цвет сéльный, тáко оцветéт,/ яко дух прóйде в нем,/ и не бýдет, и не познáет ктомý мéста своегó./ Ми́лость же Госпóдня от вéка и до вéка на боя́щихся Егó,/ и прáвда Егó на сынéх сынóв, храня́щих завéт Егó, и пóмнящих зáповеди Егó твори́ти я./ Госпóдь на Небесѝ уготóва Престóл Свой,/ и Цáрство Егó всéми обладáет./ Благослови́те Гóспода вси Áнгели Егó,/ си́льнїи крéпостїю, творя́щїи слóво Егó, услышати глас словéс Егó./ Благослови́те Гóспода вся Си́лы Егó,/ слýги Егó, творя́щїи вóлю Егó./ Благослови́те Гóспода вся делá Егó,/ на всяком мéсте влады́чества Егó.
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Благословѝ, душè моя, Гóспода,/ и вся внýтренняя моя и҆́мя святóе Егó./ Благословéн есѝ, Гóсподи.
Слáва Ѻтцý и Сы́ну и Святóму Дýху.
Псалом 145
Хвалѝ, душè моя, Гóспода./ Восхвалю́ Гóспода в животè моéм,/ пою Бóгу моемý, дóндеже есмь./ Не надéйтеся на кня́зи, на сы́ны человéческїя,/ в ни́хже несть спасéнїя./ Изы́дет дух eгó/ и возврати́тся в зéмлю свою́./ В той день поги́бнут вся помышлéнїя eгó./ Блажéн, eмýже Бог Iáковль Помóщник егó,/ уповáнiе eгó на Гóспода Бóга своегó,/ сотвóршаго нéбо и зéмлю,/ мóре и вся, я́же в них,/ храня́щаго и҆́стину в век,/ творя́щаго суд оби́димым,/ даю́щаго пи́щу áлчущим./ Госпóдь реши́т оковáнныя./ Госпóдь умудря́ет слепцы́./ Госпóдь возвóдит низвéрженныя./ Госпóдь лю́бит прáведники./ Госпóдь храни́т пришéльцы,/ си́ра и вдову прїи́мет/ и путь грéшных погуби́т./ Воцари́тся Госпóдь во век,/ Бог твой, Сióне, в род и род.
И ны́не и прúсно и во вéки векóв. Амúнь.
Единорóдный Сы́не и Слóве Бóжiй, Безсмéртен Сый/ и извóливый спасéнїя нáшего рáди/ воплоти́тися от Святы́я Богорóдицы и Приснодéвы Марíи,/ непрелóжно вочеловéчивыйся,/ распны́йся же, Хрїстè Бóже, смéртїю смерть попрáвый,/ Един Сый Святы́я Трóицы,/ спрославля́емый Отцý и Святóму Дýху, спасѝ нас.
И поем Блаженны с тропарями из Октоиха
Хор: Во Цáрствiи Твоéм помянù нас, Гóсподи,/ егдá прiúдеши, во Цáрствiи Твоéм.
На 12. Хор: Блажéни нúщiи дýхом,/ я́ко тех есть Цáрство Небéсное.
Хор: Блажéни плáчущiи,/ я́ко тíи утéшатся.
На 10. Хор: Блажéни крóтцыи,/ я́ко тíи наслéдят зéмлю.
Чтец (стiхúры воскрéсные, глас 1): Снéдiю изведè из рая́ враг Адáма:/ Крестóм же разбóйника введè Хрїстóс вонь,/ помянѝ мя, зовýща,// егдá прiи́деши во Цáрствiи Твоéм.
Хор: Блажéни áлчущiи и жáждущiи прáвды,/ я́ко тíи насы́тятся.
Чтец: Покланя́юся страстéм Твои́м,/ славослóвлю и Воскресéнiе со Адáмом и разбóйником,/ со глáсом свéтлым вопiю́ Ти:/ помянѝ мя Гóсподи,// егдá прiи́деши во Цáрствiи Твоéм.
На 8. Хор: Блажéни мúлостивiи,/ я́ко тíи помúловани бýдут.
Чтец: Распя́лся есѝ безгрéшне,/ и во грóбе положи́лся есѝ волею,/ но воскрéсл есѝ яко Бог,/ совоздви́гнувый Себè Адáма,/ помянѝ мя, зовýща,// егдá прiи́деши во Цáрствiи Твоéм.
Хор: Блажéни чúстiи сéрдцем,/ я́ко тíи Бóга ýзрят.
Чтец: Храм Твой телéсный триднéвным Воскреси́вый погребéнiем,/ со Адáмом, и и҆́же от Адáма, воскреси́л есѝ Хрїстè Бóже:/ помяни́ нас зовýщих,// егдá прiи́деши во Цáрствiи Твоéм.
На 6. Хор: Блажéни миротвóрцы,/ яко тíи сы́нове Бóжiи нарекýтся.
Чтец: Мvронóсицы прiидóша плáчуща,/ на гроб Твой Хрїстè Бóже, зелó рáно:/ и в бéлых ризах обретóша Áнгела седя́ща,/ что и҆́щете; зовýща.// Воскрéсе Хрїстóс, не рыдáйте прóчее.
Хор: Блажéни изгнáни прáвды рáди,/ я́ко тех есть Цáрство Небéсное.
Чтец: Апóстоли Твоѝ Гóсподи/ на гóру, áможе повелéл есѝ им, пришéдше Спáсе,/ и Тя ви́девше поклони́шася.// И҆́хже и послáл есѝ во язы́ки учи́ти и крести́ти я.
На 4. Хор: Блажéни естé, егдá понóсят вам,/ и изженýт, и рекýт всяк зол глагóл на вы лжýще Менé рáди.
Чтец (стiхúры прп. Сéргiя, глас 8): Благи́х óбраз тебè дав твои́м ученикóм,/ и привлéкл есѝ мнóги дýши во спасéнiе, отлучи́вшихся мiрскáго пристрáстiя,/ и́же утешéнiя улучи́ша рáйскаго наслаждéнiя.
Хор: Рáдуйтеся и веселúтеся, я́ко мзда вáша мнóга на Небесéх.
Чтец: Я́ко доброплóдная мáслина в домý Бóжiи, блажéнне, процвéл есѝ,/ и елéем умащáя дýши любóвiю тя пою́щих, преблажéнне Сéргiе,/ и вéрою Хрiстý вопiю́щих:// несть свят пáче Тебè, Человеколю́бче.
Хор: Слáва Ѻтцý и Сы́ну и Святóму Дýху.
Тропáрь: Стрáсти душетлéнныя успи́л есѝ бóдренными бдéнiи, блажéнне,/ и сих рáди в чертóг Небéсный всели́лся есѝ,// прiéм, богомýдре Сéргiе, благодáть исцелéнiй.
Хор: И ны́не и прúсно и во вéки векóв. Амúнь.
Богорóдичен: Херувíмов и Серафíмов превы́шши яви́лася есѝ, Богорóдице:/ Ты бо еди́на прiя́ла есѝ невмести́маго Бóга во чрéве Твоéм, Несквéрная.// Тéмже Тя, вси вéрнiи, пéсньми, Чи́стая, ублажáем.
Тропари и кондаки
Тропáрь воскрéсный, глас 1: Кáмени запечáтану от iудéй/ и вóином стрегýщим Пречи́стое Тéло Твоè,/ воскрéсл еси триднéвный, Спáсе,/ дáруяй мíрови жизнь./ Сегó рáди си́лы небéсныя вопiя́ху Ти, Жизнодáвче:/ слáва Воскресéнiю Твоемý, Хрїстè,/ слáва Цáрствiю Твоемý,// слáва смотрéнiю Твоемý, еди́не Человеколю́бче.
Тропáрь прп. Сéргiя, глас 4: И́же добродéтелей подви́жник,/ я́ко и́стинный вóин Хрiстá Бóга,/ на стрáсти вельмѝ подвизáлся есѝ в жи́зни врéменней,/ в пéнiих, бдéнiих же и пощéнiих óбраз быв твои́м ученикóм,/ тéмже и всели́ся в тя Пресвяты́й Дух,/ Егóже дéйствiем свéтло укрáшен есѝ;/ но, я́ко имéя дерзновéнiе ко Святéй Трóице,/ поминáй стáдо, éже собрáл есѝ, мýдре,/ и не забýди, я́коже обещáлся есѝ,/ посещáя чад твои́х,// Сéргiе, преподóбне óтче наш.
Кондáк прп. Сéргiя, глас 8: Хрiстóвою любóвiю уязви́вся, преподóбне,/ и Томý невозврáтным желáнiем послéдовав,/ вся́кое наслаждéнiе плотскóе возненави́дел есѝ/ и, я́ко сóлнце, Отéчеству твоемý возсiя́л есѝ;/ тем и Хрiстóс дáром чудéс обогатѝ тя./ Поминáй нас, чтýщих пресвéтлую пáмять твою́, да зовéм ти:// рáдуйся, Сéргiе богомýдре.
Слáва Ѻтцý и Сы́ну и Святóму Дýху.
Ин кондáк прп. Сéргiя, глас 8: Я́ко безплóтным равножи́тель,/ всех преподóбных превозшéл есѝ/ пóстническими труды́ и бдéнiи моли́твенными, мýдре Сéргiе,/ тем воспрiя́л есѝ от Бóга исцели́ти недýги и прогони́ти бéсы,/ и тогó рáди вопiéм ти:// рáдуйся, óтче преподóбне Сéргiе.
И ны́не и прúсно и во вéки векóв, амúнь.
Кондáк воскрéсный, глас 1: Воскрéсл есѝ, я́ко Бог, из грóба во слáве,/ и мiр совоскреси́л есѝ;/ и естествó человéческое я́ко Бóга воспевáет Тя, и смерть исчезè;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты есѝ, И҆́же всем подая́, Хрїстè, воскресéнiе.
Трисвятое
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас. (3 рáза)
Хор: Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Хор: Святы́й Безсмéртный, помúлуй нас.
Хор: Святы́й Бóже,/ Святы́й Крéпкій,/ Святы́й Безсмéртный, помúлуй нас.
Прокимен воскресный, глас 1
Чтец: Прокíмен, глас пéрвый, псалóм Давíдов: Бýди, Гóсподи, ми́лость Твоя́ на нас, я́коже уповáхом на Тя. (Пс.32:22)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Чтец:Рáдуйтеся, прáведнiи, о Гóсподе, прáвым подобáет похвалá.(Пс.32:1)
Хор: Бýди, Гóсподи, мúлость Твоя́ на нас,/ я́коже уповáхом на Тя.
Прокимен преподобного Сергия, глас 7
Чтец: Прокíмен, глас седьмы́й, псалóм Давíдов: Честнá пред Гóсподем/ смерть преподóбных Егó.(Пс.115:6)
Хор: Честнá пред Гóсподем/ смерть преподóбных Егó.
АПОСТОЛ
Чтец: К Корíнфяном послáнiя святáго апóстола Пáвла чтéнiе.
(2Кор.зач.188): Брáтiе, сéяй скýдостiю, скýдостiю и пóжнет, а сéяй о благословéнiи, о благословéнiи и пóжнет. Кóждо я́коже изволéнiе и҆́мать сéрдцем, не от скóрби, ни от нýжды: доброхóтна бо дáтеля лю́бит Бог. Си́лен же Бог вся́ку благодáть изоби́ловати в вас, да о всем всегдá вся́ко довóльство имýще, избы́точествуете во вся́ко дéло блáго, я́коже есть пи́сано: расточѝ, дадè убóгим, прáвда егó пребывáет во вéки. Дая́й же сéмя сéющему и хлеб в снедь, да подáст и умнóжит сéмя вáше, и да возрасти́т жи́та прáвды вáшея, да о всем богатя́щеся во вся́ку простотý, я́же содевáет нáми благодарéнiе Бóгу.
[Русский синодальный перевод]Братья, кто сеет скупо, тот скупо и пожнет; а кто сеет щедро, тот щедро и пожнет. Каждый уделяй по расположению сердца, не с огорчением и не с принуждением; ибо доброхотно дающего любит Бог. Бог же силен обогатить вас всякою благодатью, чтобы вы, всегда и во всем имея всякое довольство, были богаты на всякое доброе дело, как написано: расточил, раздал нищим; правда его пребывает в век. Дающий же семя сеющему и хлеб в пищу подаст обилие посеянному вами и умножит плоды правды вашей, так чтобы вы всем богаты были на всякую щедрость, которая через нас производит благодарение Богу.(2Кор.9:6-11)
(Гал.зач.213): Брáтiе, плод духóвный есть любы́, рáдость, мир, долготерпéнiе, блáгость, милосéрдiе, вéра, крóтость, воздержáнiе: на таковы́х несть закóна. А и҆̀же Хрїстóвы суть, плоть распя́ша со страстьмѝ и похотьмѝ. Áще живéм дýхом, дýхом и да хóдим. Не бывáим тщеслáвни, друг дрýга раздражáюще, друг дрýгу зави́дяще. Брáтiе, áще и впадéт человéк в нéкое прегрешéнiе, вы духóвнiи исправля́йте таковáго дýхом крóтости: блюды́й себè, да не и ты искушéн бýдеши. Друг дрýга тяготы́ носи́те, и тáко испóлните закóн Хрїстóв.
[Русский синодальный перевод]Братия, плод же духа: любовь, радость, мир, долготерпение, благость, милосердие, вера, кротость, воздержание. На таковых нет закона. Но те, которые Христовы, распяли плоть со страстями и похотями. Если мы живем духом, то по духу и поступать должны. Не будем тщеславиться, друг друга раздражать, друг другу завидовать. Братия! если и впадет человек в какое согрешение, вы, духовные, исправляйте такового в духе кротости, наблюдая каждый за собою, чтобы не быть искушенным. Носúте бремена друг друга, и таким образом исполните закон Христов.(Гал.5:22-6:2)
Аллилуарий воскресный, глас 1
Чтец: Аллилýїа, аллилýїа, аллилýїа, глас пéрвый, псалóм Давíдов:
Хор: Аллилýїа, аллилýїа, аллилýїа.
Чтец: Бог дая́й отмщéнiе мне, и покори́вый лю́ди под мя. (Пс.17:48)
Хор: Аллилýїа, аллилýїа, аллилýїа.
Чтец: Величáяй спасéнiя царéва и творя́й ми́лость хрiстý Своемý Давíду и сéмени егó до вéка. (Пс.17:51)
Хор: Аллилýїа, аллилýїа, аллилýїа.
Аллилуиарий преподобного, глас 6
Чтец: Аллилýїа, аллилýїа, аллилýїа, глас шесты́й: Блажéн муж боя́йся Гóспода, в зáповедех Егó восхóщет зелó. (Пс.111:1)
Хор: Аллилýїа, аллилýїа, аллилýїа.
Чтец: Чтец: Си́льно на землѝ бýдет сéмя егó. (Пс.111:2А)
Хор: Аллилýїа, аллилýїа, аллилýїа.
ЕВАНГЕЛИЕ
От Луки́ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.17): Во врéмя óно, стоя́ше Iисýс при éзере Геннисарéтсте, и ви́де два корабля́ стоя́ща при éзере, ры́барiе же отшéдше от нею́, измывáху мрéжи. Влез же в еди́н от кораблю́, и҆́же бе Сíмонов, моли́ егó от земли́ отступи́ти мáло, и сед учáше из корабля́ нарóды. Я́коже престá глагóля, речè к Сíмону: поступи́ во глубинý, и ввéрзите мрéжи вáша в лови́тву. И отвещáв Сíмон речè Емý: Настáвниче, обнóщь всю трýждшеся, ничесóже я́хом, по глагóлу же Твоемý ввéргу мрéжу. И се сотвóрше, я́ша мнóжество рыб мнóго, протерзáшеся же мрéжа их. И поманýша причáстником, и҆́же бéху во друзéм корабли́, да пришéдше помóгут им, и прiидóша, и испóлниша óба корабля́, я́ко погружáтися и҆́ма. Ви́дев же Сíмон Петр, припадè к колéнома Iисýсовома, глагóля: изы́ди от менè, я́ко муж грéшен есмь, Гóсподи. У́жас бо одержáше егó и вся сýщыя с ним, о лови́тве рыб, я́же я́ша, тáкожде же Iáкова и Iоáнна сы́на Зеведéова, я́же бéста обéщника Сíмонови. И речè к Сíмону Iисýс: не бóйся, отсéле бýдеши человéки ловя́. И извлéкше óба корабля́ на зéмлю, остáвльше вся, вслед Егó идóша.
[Русский синодальный перевод]Однажды, когда народ теснился к Нему, чтобы слышать слово Божие, а Он стоял у озера Геннисаретского, увидел Он две лодки, стоящие на озере; а рыболовы, выйдя из них, вымывали сети. Войдя в одну лодку, которая была Симонова, Он просил его отплыть несколько от берега и, сев, учил народ из лодки. Когда же перестал учить, сказал Симону: отплыви на глубину и закиньте сети свои для лова. Симон сказал Ему в ответ: Наставник! мы трудились всю ночь и ничего не поймали, но по слову Твоему закину сеть. Сделав это, они поймали великое множество рыбы, и даже сеть у них прорывалась. И дали знак товарищам, находившимся на другой лодке, чтобы пришли помочь им; и пришли, и наполнили обе лодки, так что они начинали тонуть. Увидев это, Симон Петр припал к коленям Иисуса и сказал: выйди от меня, Господи! потому что я человек грешный. Ибо ужас объял его и всех, бывших с ним, от этого лова рыб, ими пойманных; также и Иакова и Иоанна, сыновей Зеведеевых, бывших товарищами Симону. И сказал Симону Иисус: не бойся; отныне будешь ловить человеков. И, вытащив обе лодки на берег, оставили всё и последовали за Ним.(Лк.6:1-11)
(Лк.зач.24) Во врéмя óно, ста Iисýс на мéсте рáвне, и нарóд учени́к Егó, и мнóжество мнóго людéй от всея́ Iудéи и Iерусали́ма, и помóрiя Ти́рска и Сiдóнска, и́же прiидóша послýшати Егó и исцели́тися от недýг свои́х, и стрáждущiи от дух нечи́стых, и исцеля́хуся. И весь нарóд искáше прикасáтися Емý, я́ко си́ла от Негó исхождáше, и исцеля́ше вся. И той возвéд óчи свои́ на ученики́ своя́, глагóлаше: блажéни ни́щiи дýхом, я́ко вáше есть Цáрствiе Бóжiе. Блажéни, áлчущiи ны́не, я́ко насы́титеся. Блажéни, плáчущiи ны́не, я́ко возсмеéтеся. Блажéни бýдете, егдá возненави́дят вас человéцы, и егдá разлучáт вы и понóсят, и пронесýт и́мя вáше я́ко зло, Сы́на Человéческаго рáди. Возрáдуйтеся в той день и взыгрáйте: се бо мзда вáша мнóга на небеси́.
[Русский синодальный перевод]В те дни стал Иисус на ровном месте, и множество учеников Его, и много народа из всей Иудеи и Иерусалима и приморских мест Тирских и Сидонских, которые пришли послушать Его и исцелиться от болезней своих, также и страждущие от нечистых духов; и исцелялись. И весь народ искал прикасаться к Нему, потому что от Него исходила сила и исцеляла всех. И Он, возведя очи Свои на учеников Своих, говорил: Блаженны алчущие ныне, ибо насытитесь. Блаженны вы, когда возненавидят вас люди и когда отлучат вас, и будут поносить, и пронесут имя ваше, как бесчестное, за Сына Человеческого. Возрадуйтесь в тот день и возвеселитесь, ибо велика вам награда на небесах. (Лк.6:17-23А)
Хор: Слáва Тебè, Гóсподи, слáва Тебè.
Помянѝ нас, Гóсподи, егдá прїи́деши во Цáрствiи Твоéм.
Помянѝ нас, Влады́ко, егдá прїи́деши во Цáрствiи Твоéм.
Помянѝ нас, Святы́й, егдá прїи́деши во Цáрствiи Твоéм.
Лик небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Стiх: Приступи́те к Немý и просвети́теся, и лицá вáша не постыдя́тся.
Лик Небéсный поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
Слáва Ѻтцý и Сы́ну и Святóму Дýху.
Лик святы́х Áнгел и Архáнгел со всéми Небéсными си́лами поéт Тя и глагóлет: Свят, Свят, Свят Госпóдь Саваóф, испóлнь Нéбо и земля́ слáвы Твоея́.
И ны́не и прúсно и во вéки векóв. Амúнь.
Символ веры
Вéрую во Еди́наго Бóга Ѻтцá, Вседержи́теля, Творцá нéбу и землѝ, ви́димым же всем и неви́димым. И во Еди́наго Гóспода Iисýса Хрїстá, Сы́на Бóжiя, Единорóднаго, И҆́же от Ѻтцá Рождéннаго прéжде всех век; Свéта от Свéта, Бóга И҆́стинна от Бóга И҆́стинна, рождéнна, несотворéнна, единосýщна Ѻтцý, И҆́мже вся бы́ша. Нас рáди человéк и нáшего рáди спасéнiя сшéдшаго с небéс и воплоти́вшагося от Дýха Свята и Марíи Дéвы и вочеловéчшася. Распя́таго же за ны при Понтíйстем Пiлáте, и страдáвша и погребéнна. И воскрéсшаго в трéтiй день по Писáнiем, и возшéдшаго на небесá и седя́ща одеснýю Ѻтцá. И пáки грядýщаго со слáвою суди́ти живы́м и мéртвым, Егóже Цáрствiю не бýдет концá. И в Дýха Святáго, Гóспода, Животворя́щаго, И҆́же от Ѻтцá исходя́щаго, И҆́же со Ѻтцéм и Сы́ном спокланя́ема и сслáвима, Глагóлавшего прорóки. Во еди́ну Святýю, Собóрную и Апóстольскую Цéрковь. Исповéдую еди́но крещéнiе во оставлéнiе грехóв. Чáю воскресéнiя мéртвых, и жи́зни бýдущаго вéка. Аминь.
Ослáби, остáви, прости Бóже, прегрешéнiя нáша, вóльная, и невóльная, я́же в слóве и в дéле, я́же в вéденiи и не в вéденiи, я́же во дни и в нощѝ, я́же во умè и помышлéнiи, вся нам простѝ, я́ко Благ и Человеколю́бец.
Ѻ́тче наш, И҆́же есѝ на небесéх. Да святи́тся И҆́мя Твоè, да прiи́дет Цáрствiе Твоè, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
КОНДАК
Кондáк воскрéсный, глас 1: Воскрéсл есѝ, я́ко Бог, из грóба во слáве,/ и мiр совоскреси́л есѝ;/ и естествó человéческое я́ко Бóга воспевáет Тя, и смерть исчезè;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты есѝ, И҆́же всем подая́, Хрїстè, воскресéнiе.
Гóсподи, поми́луй. (12 раз)
И молитву: Всесвятáя Трóице, Единосýщная Держáво, Нераздéльное Цáрство, всех благи́х Винá, благоволѝ же и о мне грéшнем, утвердѝ, вразумѝ сéрдце моè, и всю мою отымѝ сквéрну, просветѝ мою мысль, да вы́ну слáвлю, пою, покланя́юся и глагóлю: Еди́н Свят, Един Госпóдь, Iисýс Хрїстóс, во слáву Бóга Ѻтцá, ами́нь.
Бýди и҆́мя Госпóдне благословéно от ны́не и до вéка. (3 рáза)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Псалом 33
Благословлю́ Гóспода на вся́кое врéмя,/ вы́ну хвалá Его во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Его./ Богáтiи обнищáша и взалкáша,/ взыскáющiи же Гóспода не лишáтся вся́каго блáга./Прiиди́те, чáда, послýшайте менè,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнè твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Óчи Госпóдни на прáведныя,/ и ýши Егó в моли́тву их./ Лицè же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша и҆́х,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Свои́х,/ и не прегрешáт вси уповáющiи на Негó.
Достойно есть
Хор: Достóйно есть я́ко воúстинну блажúти Тя, Богорóдицу,/Присноблажéнную и Пренепорóчную и Мáтерь Бóга нáшего./ Честнéйшую Херувíм и слáвнeйшую без сравнéнiя Серафíм,/ без истлéнiя Бóга Слóва рóждшую, сýщую Богорóдицу Тя величáем.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Гóсподи, помúлуй. (3 рáза)
Гóсподи, благословᴎ́.
ОТПУСТ
Гóсподи, Iисýсе Хрїстè, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, преподóбных и богонóсных отéц наших и всех святы́х, поми́лует и спасéт нас, я́ко Благ и Человеколю́бец.
[1-я молитва преподобному Сергию Радонежскому]О свящéнная главó, преподóбне и богонóсне óтче наш Сéргiе, моли́твою твоéю, и вéрою и любóвiю, я́же к Бóгу, и чистотóю сéрдца, ещè на землѝ во оби́тель Пресвяты́я Трóицы дýшу твою́ устрóивый, и áнгельскаго общéнiя и Пресвяты́я Богорóдицы посещéнiя сподóбивыйся, и дар чудодéйственныя благодáти прiéмый, по отшéствiи же твоéм от земны́х наипáче к Бóгу прибли́живыйся, и небéсныя си́лы приобщи́выйся, но и от нас дýхом любвè своея́ не отступи́вый, и честны́я твоя́ мóщи, я́ко сосýд благодáти пóлный и преизливáющiйся, нам остáвивый! Вéлiе имéя дерзновéнiе ко Всеми́лостивому Влады́це, молѝ спастѝ рабы́ Егó, сýщей в тебè благодáти Егó вéрующiя и к тебè с любóвiю притекáющiя. Испросѝ нам от Великодарови́таго Бóга нáшего вся́кiй дар, всем и коемýждо благопотрéбен, вéры непорóчны соблюдéнiе, градóв нáших утверждéнiе, мíра умирéнiе, от глáда и пáгубы избавлéнiе, от нашéствiя иноплемéнных сохранéнiе, скорбя́щим утешéнiе, недýгующим исцелéнiе, пáдшим возставлéнiе, заблуждáющим на путь и́стины и спасéнiя возвращéнiе, подвизáющимся укреплéнiе, благодéлающим в делáх благи́х преспéянiе и благословéнiе, младéнцем воспитáнiе, ю́ным наставлéнiе, невéдущим вразумлéнiе, сиротáм и вдови́цам заступлéнiе, отходя́щим от сегó врéменнаго житiя́ к вéчному благóе уготовлéнiе и напýтствiе, отшéдшим блажéнное упокоéнiе, и вся ны́ споспешествýющими твои́ми моли́твами сподóби в день Стрáшнаго судá шýiя чáсти избáвитися, десны́я же страны́ óбщники бы́ти и блажéнный óный глас Влады́ки Хрiстá услы́шати: прiиди́те, благословéннiи Отцá Моегó, наслéдуйте уготóванное вам цáрствiе от сложéнiя мíра. Ами́нь.
[2-я молитва преподобному Сергию Радонежскому]О свящéнная главó, преподóбне óтче, преблажéнне áвво Сéргiе вели́кiй! Не забýди убóгих свои́х до концá, но поминáй нас во святы́х свои́х и благопрiя́тных моли́твах к Бóгу. Помяни́ стáдо своè, éже сам упáсл есѝ, и не забýди посещáти чад свои́х. Моли́ за ны, óтче свящéнный, за дéти своя́ духóвныя, я́ко имéя дерзновéнiе к Небéсному Царю́, не премолчи́ за ны ко Гóсподу и не прéзри нас, вéрою и любóвiю чтýщих тя. Поминáй нас, недостóйных, у престóла Вседержи́телева, и не престáй моля́ся о нас ко Хрiстý Бóгу, и́бо данá тебè бысть благодáть за ны моли́тися. Не мним бо тя сýща мéртва: áще бо и тéлом престáвился есѝ от нас, но и по смéрти жив сый пребывáеши. Не отступáй от нас дýхом, сохраня́я нас от стрел врáжiих, и вся́кiя прéлести бесóвскiя, и кóзней дiáвольских, пáстырю наш дóбрый; áще бо и мощéй твои́х рáка пред очи́ма нáшима ви́дима есть всегдá, но святáя твоя́ душá со áнгельскими вóинствы, со безплóтными ли́ки, с Небéсными си́лами, у престóла Вседержи́теля предстоя́щи, достóйно весели́тся. Вéдуще бо тя вои́стинну и по смéрти жи́ва сýща, тебè припáдаем и тебè мóлимся, éже моли́тися о нас Всеси́льному Бóгу о пóльзе душ нáших, и испроси́ти врéмя на покая́нiе, и о невозбрáнном преи́тiи от землѝ на Нéбо, мытáрств же гóрьких, бесóв, воздýшных князéй и вéчныя мýки избáвитися, и Небéсному Цáрствiю наслéдником бы́ти со всéми прáведными, от вéка угоди́вшими Гóсподу нáшему Iисýсу Хрiстý, Емýже подобáет вся́кая слáва, честь и поклонéнiе со Безначáльным Егó Отцéм и с Пресвяты́м, и Благи́м, и Животворя́щим Егó Дýхом ны́не, и при́сно, и во вéки векóв. Ами́нь.
[3-я молитва преподобному Сергию Радонежскому]О Небéснаго граждани́не Iерусали́ма, преподóбне óтче Сéргiе! Воззрѝ на нас ми́лостиво и к землѝ привéрженных возведѝ к высотè Небéсней. Ты горè на Небесѝ; мы, на землѝ ни́зу, удалены́ от Тебè не толи́ко мéстом, ели́ко грехáми свои́ми и беззакóнiями; но к тебè, я́ко нам срóдному, прибегáем и взывáем: настáви нас ходи́ти путéм твои́м, вразумѝ и руковóдствуй. Свóйственно есть тебè, óтче наш, благоутрóбiе и человеколю́бiе: на землѝ живýщу, не о своéм тóкмо спасéнiи бысть тебè попечéнiе, но и о всех к тебè притекáющих. Наставлéнiя твоя́ бы́ша трóстiю кни́жника скоропи́сца, на сéрдце кáждаго глагóлы жи́зни начертавáющаго. Не телéсныя тóкмо врачевáл есѝ болéзни, но пáче душéвных врач изя́щный яви́лся есѝ; и вся твоя́ святáя жизнь бысть зерцáлом вся́кiя добродéтели. Áще толи́к был есѝ, свя́тче Бóжiй, на землѝ, коли́к ны́не есѝ, на Небесѝ! Ты днесь предстои́ши Престóлу Свéта Непристýпнаго и в нем, я́ко в зерцáле, зри́ши вся нáши нýжды и прошéнiя; ты водворя́ешися вкýпе со Áнгелы, о еди́ном грéшнице кáющемся рáдующимися. И человеколю́бiе Бóжiе есть неистощи́мо, и твоé к Немý дерзновéнiе мнóго, не престáни о нас вопiя́ ко Гóсподу. Испросѝ предстáтельством свои́м у Всеми́лостиваго Бóга нáшего мир Цéркви Егó, под знáменiем крестá вóинствующей, соглáсiе в вéре и единомýдрiе, суемýдрiя же и раскóлов истреблéнiе, утверждéнiе во благи́х дéлех, больны́м исцелéнiе, печáльным утешéнiе, оби́женным заступлéнiе, бéдствующим пóмощь. Не посрамѝ нас, к тебè с вéрою притекáющих. Áще бо и недостóйни есмы́ толи́каго отцá и ходáтая, но ты, быв подражáтель человеколю́бiя Бóжiя, сотворѝ нас достóйны чрез обращéнiе от злых дел к благóму житiю́. Вся богопросвещéнная Россíя, твои́ми чудесы́ испóлненная и ми́лостями облагодéтельствованная, исповéдует тя бы́ти своегó покрови́теля и застýпника. Явѝ дрéвнiя ми́лости твоя́ и и́хже отцéм спомоществовáл есѝ, не отри́ни и нас, чад их, стопáми их к тебè шéствующих. Вéруем, я́ко дýхом нам соприсýтствуеши. Идéже бо есть Госпóдь, я́коже слóво Егó учи́т нас, тáмо и слугá Егó бýдет. Ты вéрный есѝ раб Госпóдень, и Бóгу вездè сýщу, ты в Нем есѝ, и Он в тебè есть, пáче же и тéлом с нáми есѝ. Се нетлéнныя и живонóсныя твоя́ мóщи, я́ко сокрóвище безцéнное, вручѝ нам чудéс Бог. Предстоя́ще им, я́ко тебè жи́ву сýщу, припáдаем и мóлимся: прiимѝ молéнiя нáша и вознесѝ их на жéртвенник благоутрóбiя Бóжiя, да прiи́мем тобóю благодáть и благоврéменну в нýждах нáших пóмощь. Укрепѝ нáше малодýшiе и утвердѝ нас в вéре, да несомнéнно уповáем получи́ти вся благáя от благосéрдiя Влады́ки моли́твами твои́ми. Пáству же твою́ духóвную, тобóю сóбранную, не престáни управля́ти жезлóм духóвныя мýдрости: подвизáющимся помозѝ, разслáбленных возстáви, споспешѝ и́го Хрiстóво нестѝ во благодýшiи и терпéнiи и всех нас упрáви в ми́ре и покая́нiи скончáти живóт наш и пресели́тися со уповáнiем в блажéнная нéдра Авраáмова, идéже ты рáдостно по трудéх и пóдвизех ны́не почивáеши, прославля́я со всéми святы́ми Бóга, в Трóице слáвимаго, Отцá и Сы́на и Святáго Дýха. Ами́нь.