Неделя 6 по Пятидесятнице. Святителя Филиппа митрополита Московского. УТРЕНЯ (окончание) ЧАС ПЕРВЫЙ
16 ию́ля 2023 гóда. Недéля 6 по Пятидеся́тнице. Перенесéнiе мощéй Святúтеля Фiлíппа, митрополíта Москóвского и всея́ Россíи, чудотвóрца. Глас 5. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 8
Хор: Святúтелю óтче Фiлíппе, молù Бóга о нас.
Чтец: Укрáшен боголе́пно, Гóсподу предстáл еси́ доброде́тельными пóдвиги,/ вене́ц же нося́ страдáнiя, испещре́н крóвными кáплями, святи́телю Фiли́ппе./ Те́мже совершáющiя светонóсную пáмять твою́ при́сно поминáй и пою́щiя:// оте́ц нáших Бóже, благослове́н еси́. (Двáжды)
Хор: Святúтелю óтче Фiлíппе, молù Бóга о нас.
Чтец: Фараони́т мы́сленных врагóв ополче́нiя, блаже́нне, избе́г,/ легкó преше́л еси́ к Гóрним, тáмо водворя́яся,/ иде́же пóчесть слáвы получи́в терпе́нiем во све́те прáведных,/ в рáдовании святы́х воспевáя:// оте́ц нáших Бóже, благослове́н еси́. (Двáжды)
Хор: Слáва Отцý и Сы́ну и Святóму Дýху.
Тропáрь: Хвáлят тя, блажáще, любóвiю прити́чущiи к рáце твое́й, блаже́нне,/ в ней бо мóщи твоя́ целу́юще, оби́льно благодáть прiе́млют:/ прикоснове́нiем бо вред оче́с исцели́л еси́/ и боле́знь зубóв облегчи́л еси́ пою́щих:// оте́ц нáших Бóже, благослове́н еси.
Хор: И ны́не и прúсно и во вéки векóв. Амúнь.
Богорóдичен: От любве́ душе́вныя вопiю́ Ти, Влады́чице:/ пресве́тлаго Сóлнца óблаче,/ спаси́тельная две́ре, Небе́сная вратá, ле́ствице мы́сленная,/ всех хрiстiáн мольбу́ прiими́,/ Тя блажáщих, наде́жду душ нáших,/ и Сы́ну Твоему́ зову́щих:// оте́ц нáших Бóже, благослове́н еси́.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: Тебé, Вседéтелю,/ в пещи́ óтроцы, всемíрный лик сплéтше, поя́ху:/ делá вся́кая, Гóспода пóйте// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты о вóльней спаси́тельныя стрáсти помоли́лся еси́ чáши, я́коже невóльней:// два хотéнiя, двемá бо по коемýждо нóсиши существóма, Хрiстé, во вéки.
Хор: Слáва, Гóсподи, Святóму Воскресéнiю Твоемý.
Чтец: Твои́м вседéтельным схождéнiем ад, Хрiстé, порýганный/ изблевá вся, я́же дрéвле лéстiю умерщвлéнныя,// Тебé превознося́щiя во вся вéки.
Хор: Пресвятáя Богорóдице, спаси нас.
Богорóдичен: Тя я́же пáче умá/ богомýжне Слóвом Рóждшую Гóспода, и дéвствующую,// вся делá, Дéво, благослови́м, и превознóсим во вся вéки.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же на Крéсте вóлею длáни простéршаго,/ и ýзы смéртныя разруши́вшаго Хрiстá Бóга,// свящéнницы пóйте, лю́дiе превозноси́те во вся вéки.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же я́ко Женихá из грóба возсiя́вшаго Хрiстá Бóга,/ и миронóсицам я́вльшагося, и рáдость тем провещáвша,// свящéнницы пóйте, лю́дiе превозноси́те во вся вéки.
Глас 5
Хор: Пресвятáя Богорóдице, спасú нас.
Чтец: Престá ны́не я́же прáотчая печáль,/ рáдость приéмши Ти Богомáтерни./ Тéмже непрестáнно поéм Тя, Дéво,// и превознóсим во вся вéки.
Хор: Пресвятáя Богорóдице, спасú нас.
Чтец: Поéт с нáми безплóтных собóр, Дéво/ Рождествó Твоé непостижи́мое,/ еди́н лик состáвльше любóвiю,// и превознося́ще Егó во вéки.
Глас 8
Хор: Святúтелю óтче Фiлíппе, молù Бóга о нас.
Чтец: Цели́ши незави́стно ве́рно призыва́ющия тя,/ я́ко предста́в, а́бiе разсла́бленна возста́вил еси́/ и стра́ждущему ятрó прикоснове́нiем ручны́м уврачи́л еси́,/ уны́нием скорбя́ща явле́нoем твои́м в ра́дость претвори́л еси́,// при́сно де́йствуяй вся, блаже́нне, всем во ве́ки.(Двáжды)
Хор: Святúтелю óтче Фiлíппе, молù Бóга о нас.
Чтец: Честь многоце́нную твоему́ верху́ страда́нiя вене́ц, я́ко победонóсцу,/ живонóсною десни́цею Зижди́тель возложи́, всеблаже́нне,/ те́ло же твое́ соблюде́ невреди́мо от бокóв землены́х,/ испуща́ющее благоуха́нiя арома́т.// Си́це тя просла́ви Подвигополóжник во вся ве́ки. (Двáжды)
Хор: Благословúм Отцá, и Сы́на, и Святáго Дýха, Гóспода.
Тропáрь: Шата́нiя и бра́ни междоусóбныя укроти́,/ и свире́пеющiя вóлки на ста́до твое́, блаже́нне,/ я́ко и́стинный па́стырь, моли́тв твои́х па́лицею дале́че отжени́,/ и воста́нiя язы́ков покори́:// да я́ко предста́теля тя воспева́ем во ве́ки.
Хор: И ны́не и прúсно и во вéки векóв. Амúнь.
Богорóдичен: Щитóм ве́ры храм Твой святы́й, Богорóдице Де́во, сохрани́,/ и в нем славосло́вящiя Тя ку́пно сла́вы Твоея́ сподóби,/ и нахожде́нiя ва́рварскаго и томле́нiя их изба́ви ны,// ума́ на́шего вóлны свире́пыя укроти́ моли́твою Твое́ю, Всепе́тая.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пещѝ/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Исáiе, ликýй,/ Дéва имé во чрéве/ и роди́ Сы́на Емманýила,/ Бóга же и Человéка,/ Востóк и҆́мя Емý,/ Егó же величáюще,// Дéву ублажáем.
Хор: Слáва, Гóсподи, Святóму Воскресéнiю Твоемý.
Чтец: Пáдшаго человéка воспрiя́л еси́, Влады́ко Хрiстé, из ложéсн Деви́ческих/ всемý совокýплься, грехý же ни еди́ному причáщься:// всегó от истлéнiя Ты свободи́л еси́ пречи́стыми Твои́ми страстьми́.
Хор: Слáва, Гóсподи, Святóму Воскресéнiю Твоемý.
Чтец: Боготóчною крóвiю истощéнною, Влады́ко Хрiстé,/ от Твои́х пречи́стых ребр и животворя́щих,/ жéртва ýбо престá и҆́дольская,// вся же земля́ Тебé хвалéнiя жéртву принóсит.
Хор: Пресвятáя Богорóдице, спаси нас.
Богорóдичен: Не Бóга безплóтна, нижé пáки человéка прóста/ произведé Чи́стая Отрокови́ца, и Несквéрная:/ но Человéка совершéнна, и нелóжно совершéнна Бóга.// Егóже величáем со Отцéм же и Дýхом.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé И҆́же на Крестé страсть подъéмшаго,/ и áдову си́лу смéртiю сокруши́вшаго,// вéрнiи правослáвно величáем.
Хор: Слáва, Гóсподи, Крестý Твоемý Честнóму и Воскресéнiю.
Чтец: Тебé из грóба триднéвно воскрéсша,/ и ад плени́вшаго, и мiр просвети́вшаго,// вéрнiи единомýдренно величáем.
Глас 5
Хор: Пресвятáя Богорóдице, спасú нас.
Чтец: От чи́стых кровéй Твои́х/ усыри́ся плоть преестéственно/ всех Содéтелю, Единорóдному Сы́ну Роди́телеву,// не от мýжа, без сéмене же ýмна и одушевлéнна, Богорóдице Приснодéво.
Хор: Пресвятáя Богорóдице, спасú нас.
Чтец: Обходи́мое устáвила еси́ смéрти неудержи́мое стремлéнiе,/ рóждши плóтiю вои́стинну пáче умá Жизнь вéчную:/ Éйже прилóжься усты́ гóрькими ад упраздни́ся,// Пресвятáя Мáти Дéво.
Глас 8
Хор: Святúтелю óтче Фiлíппе, молù Бóга о нас.
Чтец: Еди́но естествó Трóицы богослóвил еси́,/ су́етным же поуча́ющияся сме́ло, всему́дре, обличи́в/ и Боже́ственными наказа́нiи твои́ми ве́рныя увеща́в, му́дре укрепи́л еси́,/ А́нгелов сожи́телю святи́телю Фiли́ппе,// па́мять твою́ пра́зднующiя в ми́ре соблюди́.(Двáжды)
Хор: Святúтелю óтче Фiлíппе, молù Бóга о нас.
Чтец: Ю́ношам немова́нiе срóдно присвое́нiе быва́ет,/ но отце́м любе́зно вои́стинну./ Ты же, óтче, прiими́ на́ше сiе́ благодаре́нiе,/ не я́ко достóйно и́стинно твоея́ хвалы́,/ но я́ко от усе́рдiя тебе́ приноси́мо:// не бо мóжем ле́потно хвали́ти тя и велича́ти. (Двáжды)
Хор: Слáва Отцý и Сы́ну и Святóму Дýху.
Тропáрь: Я́ко апóстолов сопрестóлен и му́чеников сликóвен,/ святи́телем равноче́стен, страстоте́рпче Фiли́ппе,/ предста́тельством твои́м пою́щiя тя в ми́ре сохрани́/ и правосла́вных рог возвы́си,/ ва́рварская же свире́пства низложи́,// да, ра́дующеся, пое́м, тя велича́юще.
Хор: И ны́не и прúсно и во вéки векóв. Амúнь.
Богорóдичен: О, Све́та прiя́телище, Богора́дованная Влады́чице,/ святи́телем вои́стинну утвержде́нiе и преподóбным похвалó!/ Спаси́ ны от бед, и обстоя́нiй, и язы́ков наше́ствiя,// воспева́ющiя Тя, Многопе́тую.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй воскрéсный шесты́й: Показýя, я́ко человéк еси́ Спáсе, по существý,/ посредé став воскрéс от грóба,/ и брáшна сопричасти́лся еси́,/ учи́л еси́ крещéнiю покая́нiя./ Áбiе же к Небéсному вознéслся еси́ Ѻтцý,/ и ученикóм Утéшителя послáти обещáл еси́, Пребожéственный Богочеловéче.// Слáва Твоемý востáнiю.
Слáва Ѻтцý и Сы́ну и Святóму Дýху.
Светúлен свт. Фiлíппа: Ревни́телю целому́дрия от ю́наго воспита́ния, святи́телю Фили́ппе,/ потща́лся еси́ за и́стину укаря́емь и изгна́н бы́ти/ и тоя́ ра́ди смерть го́рькую подъя́л еси́./ И ны́не, на Небесе́х предстоя́ престо́лу Святы́я Тро́ицы, при́сно о нас моли́ся,// ве́рою и любо́вию соверша́ющих па́мять твою́.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Творе́ц созда́ния, и Бог всех,/ плоть челове́ческую прия́т от пречи́стых крове́й Твои́х, всесвята́я Де́во,/ и истле́вшее мое́ все естество́ новосоде́ла,/ па́ки я́коже пре́жде рождества́ оста́вль по рождестве́./ Те́мже Тя ве́рно вси восхваля́ем, зову́ще:// ра́дуйся, Влады́чице ми́ра.
ХВАЛИТНЫ
Хор, глас 5: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 5: Гóсподи, запечáтану грóбу от беззакóнников,/ прошéл еси́ из грóба,/ я́коже роди́лся еси́ от Богорóдицы:/ не уразумéша, кáко воплоти́лся еси́, безплóтнiи Твои́ Áнгели:/ не чýвствоваша, когдá воскрéсл еси́, стрегýщiи Тя вóини./ Обоя́ бо запечатлéстася испытýющим,/ яви́шася же чудесá клáняющимся вéрою тáинству:/ éже воспевáющим,// воздáждь нам рáдость и вéлiю ми́лость.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Гóсподи, вереи́ вéчныя сокруши́в,/ и ýзы растерзáв, от грóба воскрéсл еси́,/ остáвль Твоя́ погребáльная,/ во свидéтельство и҆́стиннаго триднéвнаго Твоегó погребéнiя:/ и предвари́л еси́ в Галiлéи, в пещéре стрегóмый./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Гóсподи, жены́ текóша на гроб,/ ви́дети Тя, Хрiстá, нас рáди пострадáвшаго,/ и пришéдша, обретóша Áнгела на кáмени седя́ща,/ стрáхом отвáльшемся,/ и к ним возопи́, глагóля:/ воскрéсе Госпóдь, рцы́те ученикóм,/ я́ко воскрéсе от мéртвых,// спасáяй дýши нáша.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Гóсподи, я́коже изшéл еси́ от запечáтаннаго грóба,/ тáко вшел еси́ и двéрем заключéным ко ученикóм Твои́м,/ показýя им телéсная страдáнiя,/ я́же подъя́л еси́, Спáсе Долготерпели́вый:/ я́ко от сéмене Давíдова я́звы претерпéл еси́,/ я́ко Сын же Бóжiй, мир свободи́л еси́./ Вéлiя Твоя́ ми́лость, Непостижи́ме Спáсе,// поми́луй и спаси́ нас.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры свт. Фiлíппа, глас 4: Тече́ние соверши́л еси́/ и ве́ру соблю́л еси́,/ святи́телю блаже́нне Фили́ппе, сего́ ра́ди Христо́с тя венча́/ све́тлым венце́м пра́вды/ и украси́ твое́ испове́дание, досточу́дне./ Тем Небе́сное насле́дие прие́м, Спа́су моли́ся// о воспева́ющих па́мять твою́.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Фили́ппе блаже́нне,/ испове́дников подража́телю,/ те́пле хва́лящим тя предста́тель бу́ди/ и от вся́кия беды́, греха́ же и бу́ри/ и страсте́й мучи́тельства, о́тче, изба́ви ны,/ я́ко му́ченик неосла́блен/ и святи́тель Богоприя́тен./ Дерзнове́ние име́я ко Христу́ Бо́гу,// моли́ся о воспева́ющих па́мять твою́.
Устá моя́ возглагóлют премýдрость,/ и поучéнiе сéрдца моегó рáзум. (Пс.48:3)
Стiхúра: Фили́ппе святи́телю,/ разу́мнаго све́та заря́,/ церко́вное свети́ло,/ архиере́йская красото́,/ мона́шескаго по́стническаго жи́тельства и́стинное пра́вило,/ наш же засту́пник те́плый показа́лся еси́,/ свобожда́я от губи́тельства лука́вых.// Моли́ся, о́тче, о пою́щих па́мять твою́.
Устá прáведнаго поучáтся премýдрости, и язы́к егó возглагóлет суд. (Пс.36:30)
Глас 6: Ты еси́ па́стырь до́брый и учи́тель изря́дный,/ святи́телю Фили́ппе,/ тя всегда́ восхваля́юще, вопие́м:/ тобо́ю Бог украси́ це́рковь Ма́тере Своея́,/ и те́ло твое́, за па́ству твою́ во изгна́нии пострада́вшее,/ многоле́тно же в земли́ сокрове́нное,/ престо́лу твоему́ возврати́,/ и лю́ди твоя́ возвесели́./ Те́мже моля́ся не преста́й/ о хва́лящих и чту́щих па́мять твою́,/ прося́ оставле́ния грехо́в// и спасе́ния душа́м на́шим.
Слáва Отцý и Сыну и Святóму Дýху.
Стiхúра евáнгельская шестáя, глас 6: И҆́стинный мир Ты, Хрїстé, к человéком Бóжiй,/ мир Твой дая́, по востáнiи ученикóм,/ пристрáшны показáл еси́ я́,/ мня́щiя дух ви́дети:/ но ути́шил еси́ мятéж души́ их,/ показáвый рýце и нóзе Твои́./ Обáче не вéрующим ещé,/ брáшен причащéнiем, и учéнiй воспоминáнiем,/ отвéрзл еси́ их ум, éже разумéти Писáнiя:/ и҆́мже и Ѻ́тческое обетовáнiе обещáв, и благослови́в я́,/ отступи́л еси́ на нéбо./ Тéмже с ни́ми покланя́емся Тебé,// Гóсподи, слáва Тебé.
И ныне и прúсно и во вéки векóв, амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Вóзглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжій, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 5: Собезначáльное Слóво Отцý и Дýхови, от Дéвы рóждшееся на Спасéнiе нáше, воспои́м, вéрнiи, и поклони́мся; я́ко благоволи́ Плóтiю взы́ти на Крест, и смерть претерпéти, и воскреси́ти умéршiя слáвным воскресéнiем Свои́м.
Слáва Отцý и Сы́ну и Святóму Дýху.
Тропáрь свт. Фiлíппа, глас 8: Первопрестóльников преéмниче,/ стóлпе Правослáвiя, и́стины побóрниче,/ нóвый исповéдниче, святи́телю Фiлíппе,/ положи́вый дýшу за пáству твою́,/ тéмже, я́ко имéя дерзновéнiе ко Хрїстý,/ моли́ за град же и лю́ди,// чтýщiя достóйно святýю пáмять твою́.
И ны́не и прúсно и во вéки векóв. Амúнь.
Богорóдичен 1‑го часá: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк cвятúтеля, глас 3: Правослáвiя настáвника и и́стины провозвéстника, Златоýстаго ревни́теля, Россíйскаго свети́льника, Фiлíппа премýдраго восхвáлим, пи́щею словéс свои́х разýмно чáда своя́ питáюща, той бо язы́ком хвалéнiе поя́ше, устнáма же пéнiе вещáше, я́ко таи́нник Бóжiя благодáти.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжій, моли́твами Пречи́стыя Своея́ Мáтере, святы́х слáвных и всехвáльных Апóстол, святы́х и прáведных богоотéц Iоакíма и Áнны, и всех святы́х, поми́лует и спасéт нас, яко Благ и Человеколю́бец. Ами́нь.
С утрá чти часы и обéдницу