Неделя 6 по Пятидесятнице.Святителя Филиппа митрополита Московского. ВСЕНОЩНОЕ БДЕНИЕ УТРЕНЯ КАНОН
16 ию́ля 2023 гóда. Недéля 6 по Пятидеся́тнице. Перенесéнiе мощéй Святúтеля Фiлíппа, митрополíта Москóвского и всея́ Россíи, чудотвóрца. Глас 5. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ПСАЛОМ ИЗБРАННЫЙ
Услы́шите сiя́ вси язы́цы, внуши́те вси́, живýщiи по вселéнней. Устá моя́ возглагóлют премýдрость, и поучéнiе сéрдца моегó рáзум./ Прiиди́те, чáда, послýшайте менé, стрáху Госпóдню научý вас./ Благовести́х прáвду в цéркви вели́цей./ И҆́стину Твою́ и спасéнiе Твоé рех./ Повéм И҆́мя Твоé брáтiи моéй, посредé цéркве воспою́ Тя./ Услы́шати ми глас хвалы́ Твоея́ и повéдати вся чудесá Твоя́./ Гóсподи, возлюби́х благолéпiе дóму Твоегó, и мéсто селéнiя слáвы Твоея́./ Возненави́дех цéрковь лукáвнующих, и с нечести́выми не ся́ду./ Я́ко сохрани́х пути́ Госпóдни и не нечéствовах от Бóга моегó./ Устá прáведнаго поучáтся премýдрости, и язы́к егó возглагóлет суд./ Прáвда Егó пребывáет в век вéка./ Свящéнницы Твои́ облекýтся прáвдою, и преподóбнiи Твои́ возрáдуются.// Блажéни живýщiи в домý Твоéм, в вéки векóв восхвáлят Тя.
(При пении избранного псалма в воскресные дни заключительное «Слава, и ныне» и «Аллилуия» не поется. Сразу после последнего стиха избранного псалма - величание и тропари воскресные «Ангельский собор...»)
Хор: Величáем Тя,/ святúтелю óтче Фiлíппе,/ и чтим святýю пáмять твою́,/ ты бо мóлиши о нас // Хрїстá Бóга нáшего.
ТРОПАРИ ВОСКРЕСНЫЕ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 5: Áнгельским зрáком ум смущáюща,/ и Божéственным востáнiем душéю просвещáемы,/ мvронóсицы апóстолом благовествовáху:/ возвести́те во язы́цех Воскресéнiе,/ Гóсподу содéйствующу чудесы́,// подаю́щему нам вéлiю ми́лость.
СЕДАЛЬНЫ ПО ПОЛИЕЛЕИ
Глас 1 (по 1‑м стiхослóвiи): Кровь твоя́, мýдре, вопiéт от земли́, я́ко Áвелева,/ нóвый исповéдниче, святи́телю Фiлíппе,/ я́рости бо царéвы не убоя́лся еси́,/ мýдре тогó поучáя и суемýдренная сверéпства обличáя.// Сегó рáди всели́лся еси́ в Небéсный чертóг Хрiстá Бóга нáшего.
Глас 5 (по 2‑м стiхослóвiи): Преподóбне и треблажéнне евященноисповéдниче Фiлíппе,/ пáстырю дóбрый, Началопáстыря Хрiстá угóдниче,/ положи́вый дýшу твою́ за лю́ди москóвскаго нарóда, пáствуемаго тобóю./ Тéмже и ны́не, óтче наш святи́телю Фiлíппе блажéнне,// испроси́ у Гóспода éже даровáти нам вéлiю ми́лость.
Слáва Отцý и Сыну и Святóму Дýху.
Седáлен свт. Фiлíппа по полiелéе, глас 8: Проповéдует, óтче, тебé ны́не Россíйская митропóлiя,/ ю́же от болéзней и скорбéй избавля́еши, Богоблажéнне Фiлíппе,/ Áнгелов собесéдник яви́вся./ Тéмже со апóстолы и мýченики ликýя,/ помóщник бывáеши в скóрбех, всеизря́дне, плáчущих утешéнiе,/ пáстырь и настáвник заблýждших, Фiлíппе блажéнне,/ и нас твои́ми моли́твами избáви от бед/ и моли́ся Хрiстý Бóгу, да оставлéнiе подáст// вéрою и любóвiю чтýщим святýю пáмять твою́.
И ныне и прúсно и во вéки векóв. Амúнь.
Богорóдичен из минéи: Небéсную дверь и кiвóт,/ пресвятýю гóру, свéтлый óблак воспои́м,/ неопали́мую купинý, словéсный рай,/ Éвы воззвáнiе, вселéнныя всея́ вели́кое сокрóвище,/ я́ко спасéнiе в Ней содéлася мíру/ и оставлéнiе дрéвних согрешéнiй./ Сегó рáди вопiéм Ей:/ моли́ся Сы́ну Твоемý прегрешéнiй оставлéнiе даровáти// благочéстно покланя́ющимся Всесвятóму Рождествý Твоемý.
СТЕПЕННА, ГЛАС 5
1 АНТИФОН
Хор: Внегдá скорбéти мне,/ Давíдски пою́ Тебé, Спáсе мой:// избáви дýшу мою́ от язы́ка льстúваго. (Двáжды)
Пусты́нным живóт блажéн есть,// Божéственным рачéнiем воскриля́ющимся. (Двáжды)
Слáва Ѻтцý и Сы́ну и Святóму Дýху.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
И ны́не и прúсно и во вéки векóв. Амúнь.
Святы́м Дýхом одержáтся вся,/ ви́димая же с неви́димыми:/ Самодержáвен бо сый,// Трóицы Еди́н есть нелóжно.
2 АНТИФОН
На гóры душè, воздвúгнемся,// грядú тáмо, отню́дуже пóмощь и҆́дет. (Двáжды)
Деснáя Твоя́ рукá, и менé, Хрiстé, касáющися,// от лéсти вся́кiя да сохрани́т. (Двáжды)
Слáва Ѻтцý и Сы́ну и Святóму Дýху.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
И ны́не и прúсно и во вéки векóв. Амúнь.
Святóму Дýху богослóвяще рцем:/ Ты еси́ Бог, Живóт, Рачéнiе, Свет, Ум:// Ты Благосты́ня, Ты цáрствуеши во вéки.
3 АНТИФОН
О рéкших мне: во дворы́ внúдем Госпóдня:// рáдости мнóгiя испóлнен быв, молúтвы возсылáю. (Двáжды)
В домý Давíдове стрáшная совершáются:// огнь бо тáмо паля́ всяк срáмный ум. (Двáжды)
Слáва Ѻтцý и Сы́ну и Святóму Дýху.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
И ны́не и прúсно и во вéки векóв. Амúнь.
Святóму Дýху живоначáльное достóинство,/ от Негóже вся́кое живóтно одушевля́ется,// я́ко во Ѻтцé, кýпно же и Слóве.
ПРОКИМЕН
Чтец: Прокíмен, глас пя́тый, псалóм Давíдов: Воскресни́, Гóсподи Бóже мой, да вознесéтся рукá Твоя́, я́ко Ты цáрствуеши во вéки. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Исповéмся Тебé, Гóсподи, всем сéрдцем мои́м, повéм вся чудесá Твоя́. (Пс.9:2)
Хор: Воскреснù, Гóсподи Бóже мой, да вознесéтся рукá Твоя́,/ я́ко Ты цáрствуеши во вéки.
Чтец: Воскресни́, Гóсподи Бóже мой, да вознесéтся рукá Твоя́.
Хор: Я́ко Ты цáрствуеши во вéки.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
Гóсподи, поми́луй. (3раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Лк.зач.114): Во врéмя óно, воскрéс Iисýс от мéртвых, ста посредé учени́к свои́х, и глагóла им: мир вам. Убоя́вшеся же и пристрáшни бы́вше, мня́ху дух ви́дети. И речé им: что смущéни естé? И почтó помышлéнiя вхóдят в сердцá вáша? Ви́дите рýце Моѝ и нóзе Моѝ, я́ко Сам Аз есмь: осяжи́те Мя и ви́дите: я́ко дух плóти и кóсти не и҆́мать, я́коже Менé ви́дите имýща. И сié рек, показá им рýце и нóзе. Ещé же не вéрующим им от рáдости и чудя́щимся, речé им: и҆́мате ли что снéдно зде? Онѝ же дáша Емý ры́бы печены́ часть и от пчел сот. И взем пред ни́ми ядé. Речé же им: сiя́ суть словесá, я́же глагóлах к вам ещé сый с вáми, я́ко подобáет скончáтися всем напи́санным в закóне Моисéове и прорóцех и псалмéх о Мне. Тогдá отвéрзе им ум разумéти Писáнiя. И речé им, я́ко тáко пи́сано есть, и тáко подобáше пострадáти Хрїстý, и воскрéснути от мéртвых в трéтiй день, и проповéдатися во и҆́мя Егó покая́нiю и отпущéнiю грехóв во всех язы́цех, начéнше от Iерусали́ма. Вы же естé свидéтелiе сим. И се Аз послю́ обетовáнiе Ѻтцá Моегó на вы: вы же седи́те во грáде Iерусали́мсте, дóндеже облечéтеся си́лою свы́ше. Извéд же их вон до Вифáнiи, и воздви́г рýце Своѝ, и благословѝ их. И҆ бысть егдá благословля́ше их, отступѝ от них, и возношáшеся на нéбо. И тíи поклони́шася Емý, и возврати́шася во Iерусали́м с рáдостiю вели́кою: и бя́ху вы́ну в цéркви, хвáляще и благословя́ще Бóга. Ами́нь.
[Русский синодальный перевод]Когда они говорили о сем, Сам Иисус стал посреди них и сказал им: мир вам. Они, смутившись и испугавшись, подумали, что видят духа. Но Он сказал им: что смущаетесь, и для чего такие мысли входят в сердца ваши? Посмотрите на руки Мои и на ноги Мои; это Я Сам; осяжите Меня и рассмотри́те; ибо дух плоти и костей не имеет, как видите у Меня. И, сказав это, показал им руки и ноги. Когда же они от радости еще не верили и дивились, Он сказал им: есть ли у вас здесь какая пища? Они подали Ему часть печеной рыбы и сотового меда. И, взяв, ел пред ними. И сказал им: вот то, о чем Я вам говорил, еще быв с вами, что надлежит исполниться всему, написанному о Мне в законе Моисеевом и в пророках и псалмах. Тогда отверз им ум к уразумению Писаний. И сказал им: так написано, и так надлежало пострадать Христу, и воскреснуть из мертвых в третий день, и проповедану быть во имя Его покаянию и прощению грехов во всех народах, начиная с Иерусалима. Вы же свидетели сему. И Я пошлю обетование Отца Моего на вас; вы же оставайтесь в городе Иерусалиме, доколе не облечетесь силою свыше. И вывел их вон из города до Вифании и, подняв руки Свои, благословил их. И, когда благословлял их, стал отдаляться от них и возноситься на небо. Они поклонились Ему и возвратились в Иерусалим с великою радостью. И пребывали всегда в храме, прославляя и благословляя Бога. Аминь.(Лк.24:36-53)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 5
(совмещéнный с канóном крестовоскрéсным (глас 5), Богорóдицы (глас 5) и канóном Апóстола Фiлíппа, глас 8)
ПЕСНЬ 1
Iрмóс: Коня́ и всáдника в мóре Чермнóе,/ сокрушáяй брáни/ мы́шцею высóкою,/ Хрїстóс истрясè,/ Iзрáиля же спасè,// побéдную песнь пою́ща.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Тебé тернонóсный еврéйскiй сонм,/ любвé, Благодéтелю, к Тебé не сохрáнь мáтернiя, Хрiстé, венчá,// родоначáльника разрешáюща тернóвное запрещéнiе.
Хор: Слáва, Гóсподи, Святóму Воскресéнiю Твоемý.
Чтец: Воздви́гл еси́ мя пáдшаго в ров,/ преклóнься, Жизнодáвче Безгрéшне:/ и моея́ злосмрáдныя тли, Хрiстé, претерпéв неискушéнно,// Божéственнаго Существá ми́ром мя облагоухáл еси́.
Хор: Пресвятáя Богорóдице, спасù нас.
Богорóдичен: Разреши́ся кля́тва, печáль престá:/ Благословéнная бо и Благодáтная,/ вéрным рáдость возсiя́,// благословéнiе всем концéм цветонося́щи Хрiстá.
Канон крестовоскресный, глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же вóлею на крестé пригвождéнному плóтiю,/ и дрéвняго от изречéнiя дрéвом пáдшаго свобóждшему,// Томý Еди́ному воспои́м: я́ко прослáвися.
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же из грóба мертвецý воскрéсшу Хрiстý, и пáдшаго совозстáвившу,/ и соседéнiем Отéческим украси́вшему,// Томý Еди́ному воспои́м: я́ко прослáвися.
Канон Богородицы, глас 5
Хор: Пресвятáя Богорóдице, спасù нас.
Чтец: Свéта всéльшагося в Тя, Пречи́стая,/ и просвéщшаго мíр лучáми Божествá,/ Хрiстá моли́,// просвети́ти вся пою́щiя Тя, Мáти Дéво.
Хор: Пресвятáя Богорóдице, спасù нас.
Чтец: Я́ко украшáема добрóтою добродéтелей, Благодáтная,/ добротвóрное благолéпiе лучéю Дýха,// подъя́ла еси́, Всечи́стая, вся́ческая удобри́вшаго.
Канон святителя, глас 8
Хор: Святúтелю óтче Фiлíппе, молù Бóга о нас.
Чтец: Áгнче Бóжiй и Слóве, светозарéнiем Святáго Твоегó Дýха/ мрáчному умý моемý светонóсную лучý низпосли́/ и слóво ми вдохни́ восхвали́ти, егóже Сам избрáл и прiя́л еси́,// верх страдáльца свящéннаго Фiлíппа. (Двáжды)
Хор: Святúтелю óтче Фiлíппе, молù Бóга о нас.
Чтец: Благодáть, свя́те, Божéственную рабý твоемý у Бóга испроси́/ и разумéнiя мою́ испóлни дýшу восхвали́ти житié твоé, Фiлíппе святи́телю,/ и́мже вся́ удиви́л еси́, подвизáвся, Гóсподу поя́:// слáвно бо прослáвися. (Двáжды)
Хор: Слáва Отцý и Сы́ну и Святóму Дýху.
Тропáрь: Вели́ких добродéтелей светозарéнiем сiя́юща твоя́ дéтели, преподóбне,/ удиви́шася бо цáрiе крéпкому твоемý мýжеству,/ я́ко в наказáнiи к ним язы́к твой не ослабé, и Гóсподу поя́ше:// слáвно бо прослáвися.
Хор: И ны́не и прúсно и во вéки векóв. Амúнь.
Богорóдичен: Глагóлы Богоглагóливых проповéдников о Тебé, Богомáти, испóлнишася:/ се бо родилá еси́, Дéво, Млáдо Отрочá,/ Адáма дрéвняго старéйшо и сопрестóльна Роди́телю,// мíра всегó на спасéнiе и тлéнiя изменéнiе.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Водрузúвый на ничесóмже зéмлю повелéнiем Твоúм,/ и повéсивый неодержúмо тяготéющую/ на недвúжимем, Хрїстè, кáмени зáповедей Твоúх,// Цéрковь Твою́ утвердù, Едúне Блáже и Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Желчь ýбо и҆́же из кáмене мед ссáвшiи,/ в пусты́ни чудодéйствовавшему Тебé принесóша, Хрїстé:/ óцет же за мáнну воз благодея́нiе Ти воздáша// óтроцы Iзрáилевы неблагодáрнiи.
Хор: Слáва, Гóсподи, Святóму Воскресéнiю Твоемý.
Чтец: И҆́же дрéвле светови́дным óблаком покрывáеми,/ Живóт во грóбе Хрїстá положи́ша:/ но самовлáстно воскрéс, всем вéрным подадé// тáйно осеня́ющее свы́ше Дýха сiя́нiе.
Хор: Пресвятáя Богорóдице, спасù нас.
Богорóдичен: Ты Мáти Бóжiя несочетáнно родилá еси́,/ И҆́же от Нетлéнна Отцá возсiя́вшаго, кромé болéзней мáтерних:/ тéмже Тя, Богорóдицу, воплощéнна бо родилá еси́ Слóва,// правослáвно проповéдуем.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскрéсл еси́ от грóба, Хрїстé,/ тли смéртныя избáвль// воспевáющих, Жизнодáвче, вóльное Твоé распя́тiе.
Хор: Слáва, Гóсподи, Крестý Твоемý Честнóму и Воскресéнiю.
Чтец: Помáзати ми́ром тéло Твоé мvронóсицы, Хрїстé, тщáхуся,/ и не обрéтша возврати́шася,// воспевáюща Твоé Востáнiе.
Глас 5
Хор: Пресвятáя Богорóдице, спасù нас.
Чтец: Лéствица, Éюже к нам сни́де Вы́шнiй,/ истлéвшее естествó испрáвити,/ Ты я́вственно, Чи́стая, всем ны́не ви́дена былá еси́:// Тобóю бо Преблагíй мíрови бесéдовати благоволи́.
Хор: Пресвятáя Богорóдице, спасù нас.
Чтец: Éже дрéвле предустáвленное, Дéво, тáинство,/ и прéжде век прови́димое вся вéдущему Бóгу,/ лéтом ны́не напослéдок в ложеснáх Твои́х, Всенепорóчная,// конéц прiéм яви́ся.
Глас 8
Хор: Святúтелю óтче Фiлíппе, молù Бóга о нас.
Чтец: Добродéтелей на гóру востéкл еси́,/ и во мрак видéнiя вшел еси́, святи́телю Фiлíппе,/ и познáл еси́, ели́ко вмéстно, Непостижи́маго естествóм.// Просвещéнiя испóлнен быв, óтче, прiя́л еси́ Божéственную благодáть. (Двáжды)
Хор: Святúтелю óтче Фiлíппе, молù Бóга о нас.
Чтец: Еди́наго Бóга добрóтою ищá/ и еди́ну Егó получи́ти слáву желáя, блажéнне,/ слáву же и честь земнáго пребывáнiя я́ко преходя́щую остáвил еси́// и я́ко угóдник просiя́л еси́ всех Влады́ки Хрїстá. (Двáжды)
Хор: Слáва Отцý и Сы́ну и Святóму Дýху.
Тропáрь: Желáнiем дýха плóти желáнiе увяди́л еси́/ и себé, блажéнне, обручи́л еси́ сожи́тельницу чистотý,/ от нея́же чáда тебé роди́шася, вся добродéтели, приснослáвне,// чáдо тя содевáющыя Невещéственнаго Свéта.
Хор: И ны́не и прúсно и во вéки векóв. Амúнь.
Богорóдичен: Змíя мы́сленнаго умертви́ла еси́, умертви́вшаго Адáма в раи́/ и Éве прамáтери содéлавшаго печáль./ Жизнь прозя́бши, Дéво Чи́стая, от тлéнiя нас свободи́:// Бог бо из Твои́х ложéсн прошéд неизречéнно.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трижды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк cвятúтеля, глас 3: Правослáвiя настáвника и и́стины провозвéстника,/ Златоýстаго ревни́теля,/ Россíйскаго свети́льника, Фiлíппа премýдраго восхвáлим,/ пи́щею словéс свои́х разýмно чáда своя́ питáюща,/ той бо язы́ком хвалéнiе поя́ше,/ устнáма же пéнiе вещáше,// я́ко таи́нник Бóжiя благодáти.
Íкос: Прiиди́те, любострадáльцы, пéнiем и пéсньми духóвными/ пáмять священному́ченика совершáюще, Божéственне возвесели́мся,/ врéмя нáшего весéлiя и натрижнéнiя настá,/ в нéже прiéмлем страстéй разрешéнiя дар:/ я́ко бо столп óгнен яви́ся, попаля́ющ беззакóннующих главы́,/ вéрных же просвещáющ дýши учéньми Богоразу́мiя/ и в Божéственный град, Гóрнiй Iерусали́м, я́ко другáго Iзрáиля, вводя́щ,// я́ко учени́к Бóжiя благодáти.
Седáлен cвятúтеля, глас 8: Я́ко апóстола избрáннаго тезоимени́т, óтче, и подражáтель,/ беды́ претерпéл еси́ и гонéнiя./ Рéвность воображáя прорóка Илiи́ и Крести́теля,/ мýжески обличи́л еси́ беззакóннующiя/ и престóл, ввéренный тебé, дóбре упрáвил еси́,/ рáвное óных течéнiе скончáв./ Я́ко ми́лоть, тéло твоé на земли́ остáвил еси́,/ испущáеши, я́ко ми́ро, благоухáнiя аромáт/ и, я́ко дождь, изливáеши благодáть духóвну, напоя́я тáйно бразды́ сердéц нáших./ Фiлíппе святи́телю, моли́ Хрїстá Бóга грехóв оставлéнiе даровáти// чтýщим любóвiю святýю пáмять твою́.(Двáжды)
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен минéи, глас 8: Я́ко Дéву и еди́ну в женáх, Тя, без сéмене рóждшую Бóга плóтiю,/ вси ублажáем, рóди человéчестiи:/ огнь бо всели́ся в Тя Божествá,/ и я́ко Младéнца млекóм питáеши Зижди́теля и Гóспода./ Тем, áнгельскiй и человéческiй род, достóйно слáвим пресвятóе рождествó Твоé/ и соглáсно вопiéм Ти:/ моли́ Хрїстá Бóга согрешéнiй оставлéнiе даровáти// покланя́ющимся вéрою пресвятóму рождествý Твоемý.
ПЕСНЬ 4
Iрмóс: Божéственное Твоé разумéв истощáнiе/ прозорлúво, Аввакýм, Хрїстè, со трéпетом вопiя́ше Тебè:/ во Спасéнiе людéй Твоúх// спастù помáзанныя Твоя́ пришéл есù.
Хор: Слáва, Гóсподи, Святóму Воскресéнiю Твоемý.
Чтец: Я́же от Мéрры горчáйшыя вóды,/ я́ко во óбразе проначертáя Пречи́стый Крест Твой, Блáже,/ грехóвное умерщвля́ющ вкушéнiе,// дрéвом услади́л еси́.
Хор: Слáва, Гóсподи, Святóму Воскресéнiю Твоемý.
Чтец: Крест за дрéво разýмное,/ за слáдкую же пи́щу желчь, Спáсе мой, прiя́л еси́,// за тлéнiе же смéрти кровь Твою́ Божéственную излiя́л еси́.
Хор: Пресвятáя Богорóдице, спасù нас.
Богорóдичен: Кромé ýбо сочетáнiя зачалá еси́ нетлéнно во чрéве,/ и без болéзни родилá еси́,// и по Рождествé, Дéва, Бóга плóтiю рóждши, сохрани́лася еси́.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко водрузи́ся на земли́ на лóбнем Крест,/ сокруши́шася вереи́ и врáтницы вéчнiи,// и возопи́ша: слáва си́ле Твоéй, Гóсподи.
Хор: Слáва, Гóсподи, Крестý Твоемý Честнóму и Воскресéнiю.
Чтец: Я́ко сни́де Спас к свя́занным я́ко мертв,/ совоскресóша с Ним и҆́же от вéка умéршiи,// и возопи́ша: слáва си́ле Твоéй, Гóсподи.
Глас 5
Хор: Пресвятáя Богорóдице, спасù нас.
Чтец: Сéрдцем и умóм, душéю же и усты́/ исповéдую всеблагочéстно Тя, Богорóдицу вои́стинну, Чи́стая,/ спасéнiя плод объéмля,// и спасáюся Дéво, моли́твами Твои́ми.
Хор: Пресвятáя Богорóдице, спасù нас.
Чтец: Создáвый от не сýщих вся́ческая,/ от Тебé, Чи́стыя, создáтися я́ко Благодéтель, благоволи́,// на Спасéнiе вéрою и любóвiю Тя пою́щих, Всенепорóчная.
Глас 8
Хор: Святúтелю óтче Фiлíппе, молù Бóга о нас.
Чтец: Злóбою дви́жимiи на тя, незлóбиваго áгнца, я́ко ди́вiи звéрiе, востáша,/ словесы́ твои́ми я́ко остнóм, срéчеми,// не терпя́ще, я́ростiю поощря́хуся, святи́телю Богомýдре. (Двáжды)
Хор: Святúтелю óтче Фiлíппе, молù Бóга о нас.
Чтец: Имéя тя застýпника мир весь и помóщника в напáстех,/ я́ко бо побóрник вéрен и скóрый предстáтель,/ к твоéй пáстве прири́щущыя напáстей и бед изымáеши// свящéнными твои́ми моли́твами. (Двáжды)
Хор: Слáва Отцý и Сы́ну и Святóму Дýху.
Тропáрь: Испóлнив дóбрыя пóдвиги, тезоимени́те,/ желáннаго, Богомýдре, сподóбился еси́ безсмéртiя,/ идéже, рáдуяся, венéц побéды взял еси́ и вопiéши:// слáва си́ле Твоéй, слáва, Хрїстé, пришéствiю Твоемý.
Хор: И ны́не и прúсно и во вéки векóв. Амúнь.
Богорóдичен: Крéпость всех врагóв низложи́, Мáти Бóжiя,/ оскорбля́ющих воспевáющыя Тя, я́ко рóждшая Гóспода слáвы,/ невреди́мо Твоé стáдо спасáй от злых приражéнiй,// я́ко да по дóлгу Тя ублажáем.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Одея́йся Свéтом, я́ко рúзою,/ к Тебé ýтреннюю, и Тебè зовý:/ дýшу мою́ просветù омрачéнную, Хрїстè,// я́ко Едúн Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: И҆́же слáвы Госпóдь в неслáвне зрáце,/ на дрéве обезчéщен вóлею ви́сит,// о божéственней мне слáве несказáнно промышля́я.
Хор: Слáва, Гóсподи, Святóму Воскресéнiю Твоемý.
Чтец: Ты мя преоблéкл еси́ в нетлéнiе, Хрїстé,/ тли смéртныя неистлéнно плóтiю вкуш,// и возсiя́в из грóба триднéвен.
Хор: Пресвятáя Богорóдице, спасú нас.
Богорóдичен: Ты прáвду же и избавлéнiе нам рóждши Хрїстá без сéмене,// свобóдно содéяла еси́ от кля́твы, Богорóдице, естествó прáотца.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ длáни, Спáсе наш, на дрéве,// вся призывáя к Себé, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л еси́ ад, Спáсе мой, Твои́м погребéнiем,// и Твои́м Воскресéнiем рáдости вся испóлнил еси́.
Глас 5
Хор: Пресвятáя Богорóдице, спасú нас.
Чтец: Вси прорóцы Тя я́ве предвозвести́ша/ хотя́щую бы́ти Бóжiю Мáтерь, Богорóдице Чи́стая:// еди́на бо обрелáся еси́, Чи́стая, совершéнна Непорóчная.
Хор: Пресвятáя Богорóдице, спасú нас.
Чтец: Свéтел óблак Тя живóтныя вóды,/ нам тýчу нетлéнiя Хрїстá одожди́вшiй отчáянным,// Чи́стая, познавáем.
Глас 8
Хор: Святúтелю óтче Фiлíппе, молù Бóга о нас.
Чтец: Я́ко лучá прáвды Сóлнца, яви́ся мíру/ светлостьми́ добродéтелей предстáтельство твоé, святи́телю Фiлíппе,/ разоря́ющи óблак нашéдших бед./ Тя и ны́не пою́щыя в ми́ре сохрани́,/ и прослáви я красотóю, и просвети́. (Двáжды)
Хор: Святúтелю óтче Фiлíппе, молù Бóга о нас.
Чтец: Мечь обоюдуóстр язы́к твой показáся,/ в Хрїстóв страх вооружи́вся, блажéнне, разу́мно изобличи́в начáльствующыя// во свидéтельство Хрїстá Всецаря́, винóвна на среду́ приводя́, и Божéственныя Егó ученики́. (Двáжды)
Хор: Слáва Отцý и Сы́ну и Святóму Дýху.
Тропáрь: Нов яви́лся еси́ рéвностiю, я́коже вторы́й Моисéй,/ не знáменiи стрáшными удивля́я, но Божéственных словéс учéнiи наставля́я,// к ти́хому пристáнищу но́ваго Iзрáиля от страстéй Еги́пта изводя́.
Хор: И ны́не и прúсно и во вéки векóв. Амúнь.
Богорóдичен: О́блак разу́мный Тя имену́ем,/ из Тебé бо Хрїстóс возсiя́, Всенепорóчная,/ и прострáннейшу Тя Небéс показá:/ Тогó бо неискусому́жно родилá еси́, Чи́стая,// воплощéнна за милосéрдiе неисповеди́мое.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Неúстовствующееся бýрею душетлéнною,/ Влады́ко Хрiстè, страстéй мóре укротù,// и от тли возведù мя, я́ко Благоутрóбен.
Хор: Слáва, Гóсподи, Святóму Воскресéнiю Твоемý.
Чтец: В тлéнiе попóлзся родоначáльник, Влады́ко Хрiстé,/ преслýшаннаго брáшна вкуш,// и к животý возведéн бысть стрáстiю Твоéю.
Хор: Слáва, Гóсподи, Святóму Воскресéнiю Твоемý.
Чтец: Живóт низшéл еси́ ко áду, Влады́ко Хрiстé,/ и тлéнiе растлéвшему быв,// тлéнiем источи́л еси́ Воскресéнiе.
Хор: Пресвятáя Богорóдице, спасú нас.
Богорóдичен: Дéва роди́, и рóждши пребы́сть чистá,/ на рукý нося́щаго вся́ческая,// я́ко вои́стинну Дéва Мáти понéсшая.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: Простéрл еси́ длáни Твои́, собирáя далéче расточéнная/ язы́к Твои́х собрáнiя, Хрiстé Бóже наш,// живонóсным Крестóм Твои́м, я́ко Человеколю́бец.
Хор: Слáва, Гóсподи, Крестý Твоемý Честнóму и Воскресéнiю.
Чтец: Плени́л еси́ смерть, и вратá áдова сокруши́л еси́,/ Адáм же свя́занный разрешéн быв, вопiя́ше Тебé:// Спасé мя десни́ца Твоя́, Гóсподи.
Глас 5
Хор: Пресвятáя Богорóдице, спасú нас.
Чтец: И҆́же всемý винóвный, и éже бы́ти всем подáвый,/ я́ко винóвну имя́ше воплощáемь, éже по нам,// Тя, Богомáти Всенепорóчная.
Хор: Пресвятáя Богорóдице, спасú нас.
Чтец: Исцелéнiй, Влады́чице, душепитáтельный точáщiй истóчник/ вéрно притекáющим к покрóву Твоемý благослáвному,// вéмы Тя, Всенепорóчная.
Глас 8
Хор: Святúтелю óтче Фiлíппе, молù Бóга о нас.
Чтец: Промышлéнiе óбщее творя́ о пасóмых тобóю,/ éже бы́ти им душéю и сéрдцем еди́но, слáвне, во Хрiстóве еди́ней вéре пребывáющим,/ язы́ческiя же отревáл еси́ обы́чаи// и разделéнiя бежáти, мýдре, научи́л еси́. (Двáжды)
Хор: Святúтелю óтче Фiлíппе, молù Бóга о нас.
Чтец: Рéвностiю Хрiстóвою поостри́вся,/ я́рость самодержáвнаго на крóтость преложи́ти тщáлся еси́/ и к прещéнiем царéвым непреклóнен отню́д был еси́,/ я́ко Хрiстóвых зáповедей дéлатель,/ и показáлся еси́ я́ко крéпок хрáбрник,// за пáству твою́ пострадáв дáже до смéрти, рáдуяся. (Двáжды)
Хор: Слáва Отцý и Сы́ну и Святóму Дýху.
Тропáрь: Светонóсную лучý,/ сiя́ющу во мрáце житiя́ сýщим, святи́телю Фiлíппе, ви́дим тя,/ и я́ко свещý неугаси́мую, Невещéственному приобщи́вшагося Свéту,// и вся освещáюща концы́, и тьму неразýмiя отъéмлюща.
Хор: И ны́не и прúсно и во вéки векóв. Амúнь.
Богорóдичен: Тя иногдá написá скрижáль, Богообрáзне во прорóцех Моисéй,/ свéщник же Свéта, и сень, и жезл процвéтшiй, Всенепорóчная,/ и стáмну, мáнну нося́щую,// и лéствицу, éюже возведóхомся от земли́ к Высотé.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 5: Ко áду, Спáсе мой, сошéл есѝ,/ и вратá сокруши́вый я́ко всеси́лен,/ умéрших, я́ко Создáтель, совоскреси́л есѝ,/ и смéрти жáло сокруши́л есѝ,/ и Адáм от кля́твы избáвлен бысть, Человеколю́бче;/ тéмже вси зовéм:// спаси́ нас, Гóсподи.
Íкос: Услы́шавша жены́ Áнгеловы глагóлы, отложи́ша рыдáнiе,/ рáдостны бы́вша и трéпетны, ýжас бо ви́деша,/ и се Хрiстóс прибли́жися к ним, глагóля: éже, рáдуйтеся,/ дерзáйте, Аз мíра победи́х, и ýзники свободи́х,/ потщи́теся ýбо ко ученикóм, возвещáюща им:/ я́ко варя́ю вы во грáде Галiлéйстем, éже проповéдати.// Тéмже вси Тебé зовéм: спасѝ нас, Гóсподи.
ПЕСНЬ 7
Iрмóс: Превозносúмый отцéв Госпóдь/ плáмень угасù, óтроки оросù, соглáсно пою́щiя:// Бóже, благословéн есù.
Хор: Слáва, Гóсподи, Святóму Воскресéнiю Твоемý.
Чтец: Плóтiю облóжься я́коже на ýдице льщéнiя,/ Божéственною Твоéю си́лою змíя низвлéкл еси́// возводя́ вопiю́щiя: Бóже, благословéн еси́.
Хор: Слáва, Гóсподи, Святóму Воскресéнiю Твоемý.
Чтец: Земли́ непрохóдное осуществовáвый составлéнiе,/ во грóбе покрывáется плóтiю Невмести́мый.// Емýже вси поéм: Бóже, благословéн еси́.
Хор: Пресвятáя Богорóдице, спасú нас.
Богорóдичен: Еди́ну ýбо Ипостáсь во Двою́ Естествý, Всенепорóчная/ родилá еси́ Воплощéннаго Бóга.// Емýже вси поéм: Бóже, благословéн еси́.
Глас 5
Хор: Слáва, Гóсподи, Крестý Твоемý Честнóму и Воскресéнiю.
Чтец: И҆́же дрéвом крéстным íдольскую прéлесть разреши́вый,// благословéн Бог отéц нáших.
Хор: Слáва, Гóсподи, Крестý Твоемý Честнóму и Воскресéнiю.
Чтец: Воскресы́й из мéртвых, и сýщiя во áде совоздви́гнувый,// благословéн Бог отéц нáших.
Глас 5
Хор: Пресвятáя Богорóдице, спасú нас.
Чтец: Неопределéнный пребы́в Непрелóжен,/ плóти по Ипостáси соедини́ся, я́ко Благоутрóбен, в Тебé Пресвятéй:// И҆́же Еди́н благословéн Бог отéц нáших.
Хор: Пресвятáя Богорóдице, спасú нас.
Чтец: Невéсту Тя Всенепорóчную, Богорóдице Влады́чице, соглáсно слáвим и Престóл Зижди́теля Твоегó.// Емýже вси поéм: Бóже, благословéн еси́.
продолженiе зри здесь