Неделя 2 по Пятидесятнице, всех святых в земле Русской просиявших. ВСЕНОЩНОЕ БДЕНИЕ. УТРЕНЯ. КАНОН
18 iю́ня 2023 гóда. Недéля 2 по Пятидеся́тнице, всех святы́х в землé Рýсской просiя́вших. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (канóн)
Начало зри здесь ( велúкая вечéрня) и здесь ( ýтреня)
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ВЕЛИЧАНИЕ ПРАЗДНИКА
Хор: Ублажáем вас,/ чудотвóрцы нáши слáвнiи,/ зéмлю Рýсскую добродéтельми вáшими озарúвшiи/ и óбраз спасéнiя нам// светоявлéнно показáвшiи.
(И далее хор продолжает чередовать стiхи Избранного псалма и Величанiе)
ПСАЛОМ ИЗБРАННЫЙ
Блáго есть исповéдатися Гóсподеви и пéти И҆́мени Твоемý, Вы́шнiй, возвещáти заýтра ми́лость Твою́ и и́стину Твою́ на вся́ку нощь./ Вéлiй Госпóдь и хвáлен зелó, во грáде Бóга нáшего, в горé святéй Егó./ Род и род восхвáлят делá Твоя́ и си́лу Твою́ возвестя́т./ Великолéпiе слáвы святы́ни Твоея́ возглагóлют и чудесá Твоя́ повéдят./ Пáмять мнóжества блáгости Твоея́ отры́гнут и прáвдою Твоéю возрáдуются./ Госпóдь крéпость лю́дем Свои́м даст, Госпóдь благослови́т лю́ди Своя́ ми́ром./ Я́ко благоволи́т Госпóдь в лю́дех Свои́х и вознесéт крóткiя во спасéнiе./ Возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи И҆́мя Твоé./ Сей род и́щущих Гóспода, и́щущих лицé Бóга Iáковля./ Мне же зелó чéстни бы́ша дрýзи Твои́, Бóже, зелó утверди́шася влады́чествiя их./ Изочтý их, и пáче пескá умнóжатся./ Увéдите, я́ко Госпóдь, Той есть Бог наш, Той сотвори́ нас, а не мы, мы же лю́дiе Егó и óвцы пáжити Егó./ Ми́лости Твоя́, Гóсподи, во век воспою́, в род и род возвещý и́стину Твою́ усты́ мои́ми./ Ми́лость же Госпóдня от вéка и до вéка на боя́щихся Егó./ Боя́щiися Гóспода уповáша на Гóспода, Помóщник и Защи́титель им есть./ Рáдуйтеся Бóгу, Помóщнику нáшему, воскли́кните Бóгу Iáковлю./ Возрáдуемся о спасéнiи Твоéм и во И҆́мя Гóспода Бóга нáшего возвели́чимся./ Госпóдь утверждéнiе людéй Свои́х и Защи́титель спасéнiй Хрiстá Своегó есть./ О Бóзе сотвори́м си́лу, и Той уничижи́т стужáющiя нам./ Гóсподи, си́лою Твоéю возвесели́тся царь, и о спасéнiи Твоéм возрáдуется зелó./ О Бóзе похвáлимся весь день, и о И҆́мени Твоéм исповéмыся во век./ Земля́ дадé плод свой, благослови́ ны, Бóже, Бóже наш, благослови́ ны, Бóже, и да убоя́тся Егó вси концы́ земли́./ Спаси́ ны, Гóсподи Бóже наш, и собери́ ны от язы́к исповéдатися И҆́мени Твоемý святóму и хвали́тися во хвалé Твоéй.// Благословéн Госпóдь, Бог Iзрáилев, от вéка и до вéка, и рекýт вси лю́дiе: бýди, бýди.
Хор: Ублажáем вас,/ чудотвóрцы нáши слáвнiи,/ зéмлю Рýсскую добродéтельми вáшими озарúвшiи/ и óбраз спасéнiя нам// светоявлéнно показáвшiи.
ТРОПАРИ ВОСКРЕСНЫ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвести́,/ я́ко воскрéсл еси́, Хрїстé Бóже,// подая́й мíрови вéлiю ми́лость.
СЕДАЛЬНЫ РУССКИХ СВЯТЫХ
Глас 3 (по 1‑м стiхослóвiи): Мужáйся, Хрiстóва Цéрковь,/ и держáвствуй над всýе борю́щими!/ Хрiстóви бо дрýзи о тебé пекýтся,/ и предстоя́ще, и обстоя́ще,/ и́хже óбщiй прáздник ны́не// совершáеши свéтло.
Глас (по 2‑м стiхослóвiи): Áще и глагóлют сы́нове вéка сегó:/ прiиди́те, отстáвим вся прáздники Бóжiя от земли́,/ но Цáрство Госпóдне и ещé держáвствовати и́мать,/ дéрзость врагóв отражáющее./ Тéмже настоя́щее торжествó свéтло прáзднующе,/ Еди́ному Царю́ и Бóгу нáшему возопiи́м:/ слáва Тебé, Русь Правослáвiем освяти́вшему;/ слáва Тебé, святы́я мнóгiя в ней прослáвльшему;// слáва Тебé, и доны́не вéрным крéпость дáрующему.
Глас 5 (по полiелéи): Красýйся, свети́ся, Русь Правослáвная, лучáми Крестá,/ егóже и́маши всем вéрным храни́теля,/ ты же мнóжество все дéмонское,// тьмы испóлньшееся, отвéргни.
Слáва Отцý и Сы́ну и Святóму Дýху.
Глас 3 (ин по полiелéи): Свéтло совершáюще настоя́щее торжествó,/ восхвáлим и Андрéя Первозвáннаго,/ я́ко Рýсскiя земли́ апóстола,/ пéрваго евáнгельским благовéстiем сiю́ огласи́вшаго,/ той бо, я́коже дрéвле прáотцем нáшим,/ тáко и нам ны́не взывáет:// прiиди́те, обретóхом Желáемаго.
И ны́не и прúсно и во вéки векóв. Амúнь.
Богорóдичен из Минéи, глас 4: Я́ко необори́мую стéну и истóчник чудéс/ стяжáвше Тя, раби́ Твои́, Богорóдице Пречи́стая,/ сопроти́вных ополчéнiя низлагáем./ Тéмже мóлим Тя:/ мир земли́ Рýсстей дáруй// и душáм нáшим вéлiю ми́лость.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебé зовý. (Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромé. (Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есù мя закóнов,// добродéтельми просветù, Бóже, да пою́ Тя. (Двáжды)
Деснóю Твоéю рукóю прiи́м Ты, Слóве,/ сохрани́ мя, соблюди́,// да не огнь менé опали́т грехóвный. (Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы́ Госпóдни,// возвеселúся мой дух, срáдуется сéрдце. (Двáжды)
В домý Дави́дове страх вели́к:/ тáмо бо престóлом постáвленным,// сýдятся вся племенá земнáя, и язы́цы. (Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Прокíмен, глас пéрвый, псалóм Давíдов. Ны́не воскреснý, глагóлет Госпóдь, положýся во Спасéнiе, не обиню́ся о нем. (Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
Чтец: От Мáрка Святáго Евáнгелiя чтéнiе.
Хор: Слáва Тебè, Гóсподи, слáва Тебè.
(Мк.зач.70): Во врéмя óно, минýвши суббóте, Марíа Магдали́на и Марíа Iáковля и Саломíа купи́ша аромáты, да пришéдша помáжут Iисýса. И зелó заýтра во еди́ну от суббóт прiидóша на гроб, возсiя́вшу сóлнцу, и глагóлаху к себé: кто отвали́т нам кáмень от двéрiй грóба? И воззрéвша ви́деша, я́ко отвалéн бе кáмень: бе бо вéлiй зелó. И вшéдша во гроб, ви́деша ю́ношу седя́ща в десны́х, одéяна во одéжду белý: и ужасóшася. Он же глагóла им: не ужасáйтеся: Iисýса и҆́щете Назаряни́на распя́таго: востá, несть зде: се, мéсто, и҆дéже положи́ша Егó: но иди́те, рцы́те ученикóм Егó и Петрóви, я́ко варя́ет вы в Галiлéи: тáмо Егó ви́дите, я́коже речé вам. И изшéдша бежáша от грóба: имя́ше же их трéпет и ýжас: и ни комýже ничтóже рéша: боя́хубося.
[Русский синодальный перевод]В те дни, по прошествии субботы Мария Магдалина и Мария Иаковлева и Саломия купили ароматы, чтобы идти помазать Его. И весьма рано, в первый день недели, приходят ко гробу, при восходе солнца, и говорят между собою: кто отвалит нам камень от двери гроба? И, взглянув, видят, что камень отвален; а он был весьма велик. И, войдя во гроб, увидели юношу, сидящего на правой стороне, облеченного в белую одежду; и ужаснулись. Он же говорит им: не ужасайтесь. Иисуса ищете Назарянина, распятого; Он воскрес, Его нет здесь. Вот место, где Он был положен. Но идите, скажите ученикам Его и Петру, что Он предваряет вас в Галилее; там Его увидите, как Он сказал вам. И, выйдя, побежали от гроба; их объял трепет и ужас, и никому ничего не сказали, потому что боялись.(Мк.16:1-8)
Хор: Слáва Тебè, Гóсподи, слáва Тебè.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещенный с канóном Богорóдицы, глас 1 и канóном Рýсских святы́х, глас 8)
ПЕСНЬ 1
Iрмóс: Твоя́ победи́тельная деснúца/ Боголéпно в крéпости прослáвися:/ та бо, Безсмéртне,/ я́ко всемогýщая, протúвныя сотрé,// Iзрáильтяном путь глубины́ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл еси́ на крестé,/ от земли́ взывáя тлéнное моé тéло,// éже от Дéвы прiя́л еси́.
Хор: Слáва, Гóсподи, Святóму Воскресéнiю Твоемý.
Чтец: Умерщвлéнiе подъя́л еси́ менé рáди,/ и дýшу смéрти прéдал еси́,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил еси́.
Хор:Пресвятáя Богорóдице, спасù нас.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горó несекóмая,// Я́же Жизнодáвца Хрїстá мíрови рóждшая.
Канон Богородицы, глас 1
Хор: Пресвятáя Богорóдице, спасù нас.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пресвятáя Богорóдице, спасù нас.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон русским святым, глас 8
Хор: Вси святíи землù Рýсскiя, молúте Бóга о нас.
Чтец: Вси в пéснех духóвных воспои́м соглáсно/ во благочéстiи просiя́вшiя Божéственныя отцы́ нáша,/ я́же изнесé Рýсскiя земли́ вся́ко мéсто и странá// и я́же Цéрковь Рýсская воспитá.
Хор: Вси святíи землù Рýсскiя, молúте Бóга о нас.
Чтец: Рáдуйтеся, святи́телiе седмочи́сленнiи:/ Васíлiе, Ефрéме, Евгéнiе, Елпíдiе, Агафодóре, Ефéрiе и Капiтóне,/ в Херсóне епíскопствовавшiи// и зéмлю нáшу кровьми́ свои́ми освяти́вшiи.
Хор: Вси святíи землù Рýсскiя, молúте Бóга о нас.
Чтец: Прiиди́те, мучениколю́бцы вéрнiи,/ пéсньми почти́м первомýченики рýсскiя, Феóдора и ю́наго Iоáнна,// íдолом не послужи́вшiя и крóви своя́ за Хрїстá дáвшiя.
Хор: Вси святíи землù Рýсскiя, молúте Бóга о нас.
Чтец: Вели́чiе нáше и похвалá ты еси́, Ѻ́льго Богомýдрая,/ тобóю бо свободи́хомся от бесóвскаго прельщéнiя,// не престáй и ны́не моли́ти за лю́ди, я́же Бóгу привелá еси́.
Хор: Вси святíи землù Рýсскiя, молúте Бóга о нас.
Чтец: Рáдуйся и весели́ся, рáбе Хрїстóв,/ кня́же вели́кiй и мýдрый Влади́мiре, просвети́телю наш,/ тобóю бо избáвихомся от душепáгубнаго iдолослужéнiя,// тéмже, рáдуйся, вопiéм тебé.
Хор: Вси святíи землù Рýсскiя, молúте Бóга о нас.
Чтец: Сiя́ет, я́ко звездá на небеси́, Бóжiй iерáрх Мiхаи́л,/ зéмлю Рýсскую просвети́вый свéтом познáнiя Божéственныя вéры// и Влады́це приведы́й лю́ди нóвы, бáнею крещéнiя обновлéнны.
Слáва Отцý и Сы́ну и Святóму Дýху.
Тропáрь: О блажéннiи страстотéрпцы Хрїстóвы,/ кня́зiе Бори́се, Глéбе, и И҆́горе, и Мiхаи́ле с боля́рином Феóдором!/ Не забýдите отéчества вáшего, глад и озлоблéнiе отгони́те,// от грехопадéнiй междоусóбiй избáвите ны.
И ны́не и прúсно и во вéки векóв. Амúнь.
Богорóдичен: С чи́нми Áнгел, Влады́чице,/ со прорóки, и апóстолы, и со всéми святы́ми/ за ны, грéшныя, Бóгу помоли́ся,// Твоегó Покрóва прáздник Цéркви Рýсской прослáвльшiя.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Едúне вéдый человéческаго существá нéмощь/ и мúлостивно в не вообрáжся,/ препоя́ши мя с высоты́ сúлою,/ éже вопúти Тебé, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил еси́,/ и сни́ти ко мне благоволи́в, вознéсл мя еси́ распя́тiем,/ éже вопи́ти Тебé, Святы́й:// Хрáме одушевлéнный неизречéнныя Твоея́ слáвы, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Живóт ипостáсный Хрїстé сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л еси́,/ и мертв триднéвен воскрéс,// в нетлéнiе мя облéкл еси́.
Хор: Пресвятáя Богорóдице, спасù нас.
Богорóдичен: Бóга зачéнши во чрéве, Дéво, Дýхом Пресвяты́м,/ пребылá еси́ неопали́ма,/ понéже Тя купинá законополóжнику Моисéю,/ пали́мую нежегóмо, я́ве предвозвести́,// огнь нестерпи́мый прiéмшую.
Глас 1
Хор: Пресвятáя Богорóдице, спасù нас.
Чтец: Ѻ́блак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебé Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Пресвятáя Богорóдице, спасù нас.
Чтец: Тя запечáтанный вои́стинну лик прорóческiй истóчник,/ и заключéнную дверь именовá, дéвства Твоегó, Всепéтая,/ я́вственне знáменiя нам пи́шуще:// éже сохрани́ла еси́ и по рождествé.
Глас 8
Хор: Вси святíи землù Рýсскiя, молúте Бóга о нас.
Чтец: Проповéдует преслáвно и пáче трубы́ вопiéт/ вели́кая Лáвра Печéрская,/ тобóю начáло прiи́мшая, óтче преподóбне, Антóнiе слáвне,// всех монáхов Цéркви Рýсскiя первоначáльниче.
Хор: Вси святíи землù Рýсскiя, молúте Бóга о нас.
Чтец: Воспои́м свéтло монáшескаго óбщаго житiя́/ в Рýсстей земли́ устрои́теля, блажéннаго Феодóсiя,/ с ним и Нéстора, достопáмятных дея́нiй списáтеля,// и Али́пiя, живописáнiя на Руси начáльника.
Хор: Вси святíи землù Рýсскiя, молúте Бóга о нас.
Чтец: Рай мы́сленный еси́, Печéрская святáя горó,/ умнóжившая духóвная древесá, блажéнныя отцы́,/ и́хже исчести́ по еди́ному не могýще,// о всех вкýпе хвалý принесéм Еди́ному Влады́це.
Хор: Вси святíи землù Рýсскiя, молúте Бóга о нас.
Чтец: Антóнiе, Iоáнне и Евстáфiе, твéрдiи исповéдницы правослáвныя вéры,/ издрéвле в землé Рýсско-Литóвстей насаждéннiи,/ моли́твами вáшими от зловрéдных иновéрных мудровáнiй// соóтчичей вáших и всех нас ограждáйте.
Хор: Вси святíи землù Рýсскiя, молúте Бóга о нас.
Чтец: Ходáтаи бýдите за отéчество вáше земнóе,/ Афанáсiе преподобномýчениче, и ты, óтроче Гаврiи́ле,/ научи́те ýбо и нас Правослáвiе дерзновéнно исповéдати// и стрáха врáжiя не боя́тися.
Хор: Вси святíи землù Рýсскiя, молúте Бóга о нас.
Чтец: Да почти́тся Íов преподóбный, Лáвры Почáевскiя украшéнiе,/ вкýпе со всéми угóдники и чудотвóрцы Волы́нскими,// дéлы свои́ми и чудесы́ облистáвшiи преслáвно земли́ нáшея концы́.
Слáва Отцý и Сы́ну и Святóму Дýху.
Тропáрь: Пéсньми свящéнными восхвáлим Афанáсiя, Царегрáдскаго святи́теля,/ своé благословéнiе земли́ нашей принéсшаго// и честны́я своя́ мóщи нам остáвльшаго.
И ны́не и прúсно и во вéки векóв. Амúнь.
Богорóдичен: Се врéмя заступлéнiя Пресвяты́я Богорóдицы прiи́де,/ умнóжившимся соблáзном,/ се врéмя нáших к Ней воздыхáнiй, о брáтiе,/ рцем ýбо от всегó сéрдца нáшего:// Влады́чице, Влады́чице, помози́ лю́дем Твои́м.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трижды)
Слáва Отцý и Сыну и Святóму Дýху, и ныне и присно и во вéки векóв, аминь.
Кондáк рýсских святы́х, глас 3: Днесь лик святы́х, в земли́ нáшей Бóгу угоди́вших, предстои́т в Цéркви/ и неви́димо за ны мóлится Бóгу./ Áнгели с ним славослóвят,/ и вси святíи Цéркве Хрїстóвы емý спрáзднуют,/ о нас бо мóлят вси кýпно// Превéчнаго Бóга.
Íкос: Едéмскаго рая́ древесá доброплóдная и крáсная яви́шася святíи,/ цвéты благовóнныя учéнiй и плоды́ дел творя́щiи,/ от ни́хже дýши нáша питáются и глад наш духóвный утоля́ется,/ прiиди́те ýбо, притецéм под сень их и ублажи́м их,/ я́ко страны́ нáшея отрáду и украшéнiе и я́ко житiя́ óбраз нам и начертáнiе,// тíи бо венцы́ прiя́ша нетлéнныя от Превéчнаго Бóга.
Седáлен рýсских святы́х, глас 7: Нощнéй тьме огустевáющей, умножáется звéздный блеск,/ и к томý óчи заблýждших рáдостно возвóдятся./ Тáко и умнóжившейся на земли́ грехóвней тьме,/ возведéм горé óчи нáши, брáтiе,/ и, сiя́нiе духóвных звезд, зéмлю нáшу озаря́ющих, узрéвше,/ к Небéсному отéчеству потщи́мся,// егóже да не лиши́т Госпóдь нас, грéшных, моли́твами святы́х Свои́х.
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен рúзы Госпóдней, глас 4: Притецéм, вéрнiи, к Божéственней и цельбонóсней ри́зе Спаси́теля нáшего Бóга,/ благоизвóлившаго сiю́ плóтiю носи́ти и на Крестé Святýю Свою́ Кровь излiя́ти,/ éюже искупи́ нас от рабóты врáжiя./ Тéмже благодáрственно вопiéм Емý:/ спаси́ Первосвяти́теля нáшего и архiерéи,/ Отéчество нáше и вся лю́ди честнóю Твоéю ри́зою защити́// и спаси́ дýши нáша, я́ко Человеколю́бец.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорлúвыма Аввакýм/ усмотрúв очúма,/ из Тебé изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознести́ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Пресвятáя Богорóдице, спасù нас.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебé прозябé,/ но животá присносýщнаго наслаждéнiе,// во Спасéнiе нас пою́щих Тя.
Глас 1
Хор: Пресвятáя Богорóдице, спасù нас.
Чтец: Слы́ши чудéс нéбо, и внушáй землé,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Пресвятáя Богорóдице, спасù нас.
Чтец: Поéм вели́кое и стрáшное Твоé тáинство,/ премéрных бо утаи́вся чиноначáлiй,/ на Тя И҆́же сый сни́де я́ко дождь на рунó, Всепéтая,// на Спасéнiе нас пою́щих Тя.
Глас 8
Хор: Вси святíи землù Рýсскiя, молúте Бóга о нас.
Чтец: Первоначáльника и устрои́теля грáда Москвы́,/ блажéнне кня́же Данiи́ле, показá тя Госпóдь,/ к Немý же непрестáнно моля́ся, град твой охраня́й,/ зéмлю нáшу от бед спасáй,// правослáвныя же рýсскiя лю́ди посещáти ми́лостивно не престáй.
Хор: Вси святíи землù Рýсскiя, молúте Бóга о нас.
Чтец: Мóлим вас, святи́телiе Хрїстóвы/ Пéтре, Алексíе, Ióно, Фiлíппе и Iннокéнтiе,/ Фóтiе, Кипрiáне и Феогнóсте и вси прóчiи Москóвстiи чудотвóрцы:/ душéвное смущéнiе и печáли нáшея бýрю разори́те// и тишинý нам подáйте вáшими к Бóгу моли́твами.
Хор: Вси святíи землù Рýсскiя, молúте Бóга о нас.
Чтец: И первопрестóльник Русскiя Цéркве, и исповéдник Правослáвныя вéры,/ и обличи́тель грехолюби́вых и мятéжных,/ и строи́тель Рýсскiя земли́ был еси́, святи́телю Ермогéне,/ и за сié темни́цею и глáдом мýчимь был еси́ и прiéмь от Бóга неувядáемый венéц,// со святи́тели и мýченики весели́шися.
Хор: Вси святíи землù Рýсскiя, молúте Бóга о нас.
Чтец: Рáдуется слáвный град Москвá, и весéлiя исполня́ется вся Русь Святáя,/ на твоя́ моли́твы надéющеся, Сéргiе Богоблажéнне,/ оби́тель же твоя́ красýется,// храня́щи честны́я твоя́ мóщи, я́ко сокрóвище свящéнное.
Хор: Вси святíи землù Рýсскiя, молúте Бóга о нас.
Чтец: Пéсньми свящéнными восхвáлим преподóбнаго Нíкона, послушáнiя рачи́теля,/ с ни́мже воспои́м Мiхéя, Сáвву и Дiони́сiя, Стефáна, Андронíка и Сáвву и вся преподóбныя ученики́ и собесéдники вели́каго Сéргiя,// и́хже моли́твами Цéрковь Рýсская утверждáется.
Хор: Вси святíи землù Рýсскiя, молúте Бóга о нас.
Чтец: О премýдрiи и блажéннiи Васíлiе, Максíме и Iоáнне Москóвстiи/ и вси Хрiстá рáди юрóдивiи на Руси́ просiявшiи, чýднiи житiéм и рáзумом,/ мóлим вас прилéжно:/ моли́те Хрїстá Бóга нáшего за земнóе отéчество вáше// и всем вéрным спасéнiе испроси́те.
Слáва Отцý и Сы́ну и Святóму Дýху.
Тропáрь: Нóвый стóлпник в дéбри Калýжстей яви́лся еси́, преподóбне Ти́хоне,/ и кýпно с преподóбным Пафнýтiем, и́ночества стрóгим ревни́телем, и блажéнным Лаврéнтiем/ ко грáду Гóрнему в странé твоéй путь вéрный проложи́л еси́,// на нéмже упаси́ и нас моли́твами твои́ми.
И ны́не и прúсно и во вéки векóв, амúнь.
Богорóдичен: Подóбiем iкóны Íверскiя не тóчiю Афóн просвещáется,/ но и град Москвá украшáется и инíи грáди и вéси освящáются,/ от тоя́ чудéсную пóмощь прiéмлюще и истóчник утешéнiя в ней обретáюще,// и нам, Благáя Вратáрнице, двéри рáйскiя отвéрзи.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Просветúвый сiя́нiем пришéствiя Твоегó, Хрїстé,/ и осветúвый Крестóм Твоúм/ мíра концы́,/ сердцá просветù/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
Хор: Слáва, Гóсподи, Святóму Воскресéнiю Твоемý.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л еси́, Хрїстé:// нáга, обнищáвша показáвый Божéственным востáнiем Твои́м.
Хор: Пресвятáя Богорóдице, спасù нас.
Богорóдичен: Прошéнiя вéрно прося́щих, Всепéтая, не прéзри:/ но прiими́, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебé бо Предстáтельницу стяжáхом.
Глас 1
Хор: Пресвятáя Богорóдице, спасù нас.
Чтец: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Пресвятáя Богорóдице, спасù нас.
Чтец: Да дви́жатся вси язы́цы человéчестiи и мы́сли,/ к похвалé человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесá.
Глас 8
Хор: Вси святíи землù Рýсскiя, молúте Бóга о нас.
Чтец: Вели́каго Новáгрáда первопáстырiе,/ Нiки́то, Нíфонте, Iоáнне, Феоктíсте,/ Моисéе, Евфи́мiе, Ióно и Серапióне, и прóчiи чýднiи святи́телiе,/ в домý Премýдрости Бóжiя, я́ко фíнiксы, процвели́ естé,// словесы́ благоплóдными и непорóчным житiéм.
Хор: Вси святíи землù Рýсскiя, молúте Бóга о нас.
Чтец: Свéтло да похвáлятся кня́зiе Новгорóдстiи,/ Влади́мiр, Святы́я Софíи пречýдныя устрои́тель,/ с мáтерiю своéю Áнною, и Мстислáв, и Феóдор,/ с ни́ми же и вси от рóда князéй Рýсских житiéм богоугóдным просiя́вшiи,// Божéственными да воспою́тся пéсньми.
Хор: Вси святíи землù Рýсскiя, молúте Бóга о нас.
Чтец: Ди́внаго Варлаáма, вели́ка Новaгрáда слáву и украшéнiе, моли́твенника нáшего,/ и Антóнiя слáвнаго, от вéтхаго Ри́ма на кáмени по волнáм морски́м преплы́вшаго,/ Сáвву же, и Ефрéма, и Мiхаи́ла// кто достóйно прослáвит от земны́х?
Хор: Вси святíи землù Рýсскiя, молúте Бóга о нас.
Чтец: Едéмскаго рая́, прiиди́те, ви́дим цвéты присножи́зненныя и богопрозябéнныя,/ пóдвиги отéц, в предéлех Новгорóдских просiя́вших,// и́хже есть еди́н Дéлатель Госпóдь.
Хор: Вси святíи землù Рýсскiя, молúте Бóга о нас.
Чтец: Всéволод крóткiй и Довмóнт, Пскóву стенá необори́мая,/ и Нiкóла блажéнный и Корни́лiй преподóбный,/ святы́м крещéнiем чудь Лiвóнскую просвети́вый,// пéсньми да воспою́тся.
Хор: Вси святíи землù Рýсскiя, молúте Бóга о нас.
Чтец: Вéру правослáвную пред лати́ны проповéдавшiи,/ к вéчным востекóша оби́телем Iсíдор пресви́тер/ и с ним собóр мýченическiй во Ю́рьеве, грáде Лiвóнстем,// Царю́ царéй ны́не предстоя́ще, мóлятся о нас, почитáющих пáмять их.
Слáва Отцý и Сы́ну и Святóму Дýху.
Тропáрь:Авраáмiя Богонóснаго, Смолéнска украшéнiе,/ и Евфроси́нiю, рáдованiе Пóлотское и дéвам сiя́нiе,/ Хрїстé мой, Тебé привóдим моли́твенники,// и́хже рáди спаси́ нас.
И ны́не и прúсно и во вéки векóв, амúнь.
Богорóдичен: Застýпница тéплая иногдá вели́кому Новугрáду былá еси́/ и ненадéющихся надéжда и людéй бéдствующих Помóщница,/ и ны́не óком милосéрдным при́зри на нас/ и, скóрби нáша ви́девши и воздыхáнiе услы́шавши,// знáменiе ми́лости яви́ нам, Пречи́стая.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вменúхомся,/ я́ко óвцы заколéнiя,/ спасù лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся еси́, Хрїстé:// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Возвéл ны еси́ из áда, Гóсподи,/ ки́та уби́в всея́дца, Всеси́льне,/ Твоéю держáвою низложи́в тогó си́лу:// Ты бо Живóт, и Свет еси́, и Воскресéнiе.
Хор: Пресвятáя Богорóдице, спасù нас.
Богорóдичен: Веселя́тся о Тебé, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествá, и по Рождествé еси́.
Глас 1
Хор: Пресвятáя Богорóдице, спасù нас.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествá, и по Рождествé еси́.
Хор: Пресвятáя Богорóдице, спасù нас.
Чтец: Воплоти́ся прéжде сый Безплóтен, Слóво из Тебé, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 8
Хор: Вси святíи землú Рýсскiя, молúте Бóга о нас.
Чтец: Евáнгельски Хрiстá возлюби́вше,/ преподóбнiи Зосíмо, Саввáтiе, Гéрмане, Iринáрше, Елеазáре и прóчiи Соловéцтiи чудотвóрцы,/ мíра отврати́стеся, в непроходи́мыя и пусты́я óстровы Соловéцкiя зашéдше,/ вся́кiя добродéтели óбразу навыкóсте,/ мýдрей пчелé подóбящеся,// и селéнiе, достóйное прiя́ти Дýха Святáго, бы́сте, премýдрiи.
Хор: Вси святíи землú Рýсскiя, молúте Бóга о нас.
Чтец: Вели́каго в чудесéх преподóбнаго Три́фона воспои́м, Лопáрскаго просвети́теля,/ в послéдних концéх сéверныя страны́ от гóрькаго рáбства бесóвскаго лю́ди избáвльшаго/ и святы́м крещéнiем возроди́вшаго.
Хор: Вси святíи землú Рýсскiя, молúте Бóга о нас.
Чтец: Рáдуйся, пусты́не, прéжде безплóдная и необитáемая,/ пóслежде же, я́ко крíн, процвéтшая и и́нок мнóжество возрасти́вшая!/ Взыгрáйте, гóры Валаáма и вся древá дубрáвная,/ хвáляще с нáми Сéргiя и Гéрмана, вкýпе же и Арсéнiя со Алексáндром Сви́рским,// отцы́ всехвáльныя.
Хор: Вси святíи землú Рýсскiя, молúте Бóга о нас.
продолженiе зри здесь