Неделя 2 по Пятидесятнице, всех святых в земле Русской просиявших. Глас 1 УТРЕНЯ (ок-ние) ЧАС ПЕРВЫЙ
18 iю́ня 2023 гóда. Недéля 2 по Пятидеся́тнице, всех святы́х в землé Рýсской просiя́вших. Глас 1. Воскрéсная прáздничная слýжба для домáшнего (келéйнаго) совершéнiя. Слýжба мiрскúм чúном. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Чтец: Житiя́ сегó непостоя́нную пучи́ну немятéжно прешéл еси́, преподóбне Кирíлле,/ кóрмчую Мáтерь Бóжiю имéя,/ и ты, Ióсифе, Вóлоцкая похвалó, и Нíле нестяжáтелю,/ на водé покóйне и на злáце воздержáнiя учени́к вáших стадá мýдре упасли́ естé,// и ны́не с ни́ми моли́теся о чтýщих пáмять вáшу.
Хор: Вси святíи землú Рýсскiя, молúте Бóга о нас.
Чтец: Я́ко звéзды вели́кiя, просiя́ша в монáшеских собóрех/ Антóнiй Сíйскiй и Три́фон Вя́тскiй,/ Дими́трiй на Прилýце и Амфiлóхiй и Дiони́сiй, похвалá Глуши́цкая,/ Григóрiй Пéльшемскiй, Пáвел, и Сéргiй, и Корни́лiй Вологóдстiи,// я́ко лучáми, сiя́юще добродéтельми житiя́ своегó, преподóбнiи.
Хор: Вси святíи землú Рýсскiя, молúте Бóга о нас.
Чтец: Богови́дно пожи́вше, пусты́ни, я́ко грáды, сотвори́ли естé,/ Макáрiе, Варнáво и Ти́хоне, Авраáмiе и Геннáдiе./ Тéмже вкýпе с прóчими отцы́, в предéлех Костромски́х и Ярослáвских просiя́вшими,/ ублажáем вас и мóлим:/ моли́те Гóспода, да не лиши́т и нас егóже ны́не наслаждáетеся боговидéнiя// в вéчнем грáде Небéснаго Царя́.
Слáва Отцý и Сы́ну и Святóму Дýху.
Тропáрь: Ликýй, Фиваи́до Рýсская,/ красýйтеся, пусты́ни и дéбри Олонéцкiя, Белоезéрскiя и Вологóдскiя,/ возрасти́вшiя святóе и слáвное отéц мнóжество,/ чýдным житiéм всех наставля́ющее мíру не прилепля́тися,// крест свой на рáмена взя́ти и во след Хрiстý шéствовати.
И ны́не и прúсно и во вéки векóв, амúнь.
Богорóдичен: Твоéю всечестнóю iкóною Ти́хвинскою,/ ю́же вели́кая земля́ нáша я́ко нéкiй дар Божéственный свы́ше благоговéйно прiя́т,/ при́сно странý нáшу, о Госпожé Цари́це Богорóдице, покрывáй и заступáй,// спасáющи сiю́ от всех навéт врáжiих.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трижды)
Слáва Отцý и Сыну и Святóму Дýху, и ныне и прúсно и во вéки векóв, амúнь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты еси́, И҆́же всем подая́, Хрїстé, воскресéнiе.
Íкос: Воскрéсшаго триднéвно воспои́м я́ко Бóга Всеси́льна,/ и вратá áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, рекíй:/ и апóстолом рáдость возвещáя, я́ко Еди́н Жизнодáвец./ Тéмже вéрою жены́ ученикóм знáменiя побéды благовествýют,/ и ад стенéт, и смерть рыдáет:/ мiр же весели́тся, и вси с ним рáдуются.// Ты бо пóдал еси́, Хрїстé, всем Воскресéнiе.
ПЕСНЬ 7
Iрмóс: Тебé ýмную, Богорóдице, пещь/ разсмотря́ем, вéрнiи,/ я́коже бо óтроки спасé три Превозносúмый,/ мiр обновù,/ во чрéве Твоéм всецéл,// хвáльный отцéв Бог и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Убоя́ся земля́, сокры́ся сóлнце, и помéрче свет,/ раздрáся церкóвная божéственная завéса,/ кáменiе же разсéдеся:/ на крестé бо ви́сит Прáведный,// Хвáльный отцéв Бог, и препрослáвлен.
Хор: Слáва, Гóсподи, Святóму Воскресéнiю Твоемý.
Ты быв áки безпомóщен,/ и уя́звен в мéртвых вóлею нас рáди/ превозноси́мый, вся свободи́л еси́,/ и держáвною рукóю совоскреси́л еси́,// хвáльный отцéв Бог, и препрослáвлен.
Хор: Пресвятáя Богорóдице, спасù нас.
Богорóдичен: Рáдуйся, истóчниче присноживы́я воды́./ Рáдуйся, раю́ пи́щный./ Рáдуйся, стенó вéрных./ Рáдуйся, Неискусобрáчная./ Рáдуйся, всемíрная Рáдосте,/ Éюже нам возсiя́// Хвáльный отцéв Бог, и препрослáвлен.
Глас 1
Хор: Пресвятáя Богорóдице, спасú нас.
Чтец: Тя, Богорóдице, лéствицу Iáков прорóчески разумевáет:/ Тобóю бо Превозноси́мый на земли́ яви́ся,/ и с человéки поживé, я́ко благоволи́,// Хвáльный отцéв Бог и Препрослáвлен.
Хор: Пресвятáя Богорóдице, спасú нас.
Чтец: Рáдуйся, Чи́стая, из Тебé прóйде Пáстырь,/ И́же во Адáмову кóжу обóлкся вои́стинну Превозноси́мый,/ во всегó мя человéка, за благоутрóбiе непости́жное:// Хвáльный отцéв Бог и Препрослáвлен.
Глас 8
Хор: Вси святíи землù Рýсскiя, молúте Бóга о нас.
Чтец: Леóнтiй, Исáiя и Iгнáтiй, Iáков и Феóдор,/ честнíи Дýха сосýди и Ростóву украшéнiе,/ Авраáмiй, íдолом покланя́вшiяся ко Хрїстý приведы́й,/ и Петр царéвич, и Iринáрх, самопроизвóльный страдáлец,/ Кассiáн и Паíсiй, князь Ромáн и царéвич Дими́трiй,// и вси Ростóвстiи и У́гличстiи чудотвóрцы Божéственными да воспою́тся пéсньми.
Хор: Вси святíи землù Рýсскiя, молúте Бóга о нас.
Чтец: Да величáется Нéвскiй победи́тель, благовéрный князь Алексáндр,/ да поéтся Геóргiй, вóин хрáбрый и страдáлец,/ да похвáлится Андрéй, пéрвый Рýсскiя земли́ собирáтель,/ вкýпе со Глéбом, ю́ным сы́ном свои́м,/ да воспоéтся же и Авраáмiй мýченик,/ грáда Влади́мiра слáва, Святы́я Руси́ застýпницы// и Цéркве Правослáвныя украшéнiе.
Хор: Вси святíи землù Рýсскiя, молúте Бóга о нас.
Чтец: Феóдору и Iоáнну слáва, Сýждальским свети́льником,/ Сíмону и Дiони́сiю!/ С ни́ми да пою́тся и Евфи́мiй, в пóдвизех превысóкiй,/ и Евфроси́нiя преподóбная, пресвéтлая Сýждальская звездá,// вкýпе же и Космá, на Я́хроме рецé подвизáвыйся.
Хор: Вси святíи землù Рýсскiя, молúте Бóга о нас.
Чтец: Песнь стóлпнику Нiки́те, покая́нiя óбраз яви́вшему,/ хвалá и Данiи́лу, ни́щих и безрóдных согревáтелю,/ слáва и Андрéю, княжéнiе остáвившему и в ни́щетнем óбразе житié скончáвшему,// Переяслáвским чудотвóрцем.
Хор: Вси святíи землù Рýсскiя, молúте Бóга о нас.
Чтец: Константíне кня́же, апóстоле и просвети́телю Мýромскiя земли́,/ с Мiхаи́лом и Феóдором, чáды твои́ми,/ и Пéтре и Феврóнiе, и прáведная Iулiанíе ми́лостивая, Мýрома застýпницы,/ вкýпе же и Васíлiе святи́телю и кня́же Ромáне, Рязáни слáво,// о нас Хрїстá моли́те.
Хор: Вси святíи землù Рýсскiя, молúте Бóга о нас.
Чтец: Тверскáя похвалó, Арсéнiе святи́телю,/ Мiхаи́ле, кня́же и мýчениче,/ и Áнно, грáда Кáшина сокрóвище,/ Нíле и Макáрiе преподóбнiи,/ Ефрéме, грáда Торжкá просвети́телю,/ со Аркáдiем и Iулiанíею, цвéтом целомýдрiя,// о нас Хрїстá моли́те.
Слáва Отцý и Сы́ну и Святóму Дýху.
Тропáрь: Орýжiем вáших моли́тв, благовéрнiи кня́зiе Феóдоре и Давíде с Константíном/ и Васíлiе и Константíне, Ярослáвля слáво,/ охраня́йте и ны́не отéчество вáше// и людéй правослáвных от вся́ких бед и напáстей.
И ны́не и прúсно и во вéки векóв, амúнь.
Богорóдичен: Я́ко благодáтное сокрóвище даровáла еси́ Святéй Руси́ iкóну Твою́ Влади́мiрскую,/ éюже отцéм нáшим многочáстне и многообрáзне благодéяла еси́./ Не оскудéй и ны́не, о Мáти Бóжiя,// утоля́ющи лю́тое на нас востáнiе, и зéмлю Рýсскую спаси́.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
ПЕСНЬ 8
Iрмóс: В пещù óтроцы Iзрáилевы,/ я́коже в горнúле,/ добрóтою благочéстiя чистéе злáта блещáхуся, глагóлюще:/ благословúте, вся делá Госпóдня, Гóспода,// пóйте и превозносúте во вся вéки.
Хор: Слáва, Гóсподи, Святóму Воскресéнiю Твоемý.
Чтец: И҆́же вóлею вся творя́й, и претворя́яй,/ обращáяй сень смéртную в вéчную жизнь,/ стрáстiю Твоéю, Слóве Бóжiй,/ Тебé непрестáнно вся делá Госпóдня,// Гóспода пои́м, и превознóсим во вся вéки.
Хор: Слáва, Гóсподи, Святóму Воскресéнiю Твоемý.
Чтец: Ты разори́л еси́ сокрушéнiе, Хрїстé, и окая́нство,/ во вратéх и тверды́нях áдовых,/ воскрéс из грóба триднéвен./ Тебé непрестáнно вся делá, я́ко Гóспода, пою́т,// и превознóсят во вся вéки.
Хор: Пресвятáя Богорóдице, спасù нас.
Богорóдичен: Я́же без сéмене и преестéственне от облистáнiя Божéственнаго/ Рóждшую би́сера многоцéннаго Хрїстá, воспои́м глагóлюще:/ благослови́те вся делá Госпóдня, Гóспода,// пóйте и превозноси́те Егó во вся вéки.
Глас 1
Хор: Пресвятáя Богорóдице, спасù нас.
Чтец: Чертóг светови́дный, из негóже всех Влады́ка,/ я́ко Жени́х произы́де Хрїстóс,/ воспои́м вси вопiю́ще:/ вся делá Госпóдня, Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Чтец: Рáдуйся, Престóле слáвный Бóжiй,/ рáдуйся, вéрных стенó,/ Éюже сýщим во тьме возсiя́ свет Хрїстóс,/ Тебé блажáщим, и вопiю́щим:/ вся делá Госпóдня, Гóспода пóйте,// и превозноси́те во вся вéки.
Глас 8
Хор: Вси святíи землù Рýсскiя, молúте Бóга о нас.
Чтец: Красýйся, грáде Казáнь, имéя моли́твенники своя́,/ преподóбных святи́телей Гýрiя, Варсонóфiя и Гéрмана, отгнáвших от тебé тьму невéрiя,/ и Iоáнна мýченика, и Стефáна, и Петрá,// отéческое нечéстiе остáвивших и мýченически в Небéсное отéчество прешéдших.
Хор: Вси святíи землù Рýсскiя, молúте Бóга о нас.
Чтец: Свящéннаго Писáнiя от ю́ности научи́вся, богонóсе Стефáне,/ рáлом словéс твои́х оляденéвшая зыря́нских людéй сердцá воздéлал еси́/ и Божéственное сéмя в них всéял еси́./ Ны́не же вкýпе со святы́ми продолжáтели дéла твоегó/ Герáсiмом, Пiтири́мом и Ióною// пáству вáшу и всю Рýсскую зéмлю моли́твами вáшими ограждáйте.
Хор: Вси святíи землù Рýсскiя, молúте Бóга о нас.
Чтец: Весели́ся, Сиби́рская странó,/ в тебé бо Госпóдь яви́ угóдники Своя́:/ прáведнаго Симеóна Верхотýрскаго, и Иркýтскiя святи́тели Iннокéнтiя и Софрóнiя, и Iоáнна Тобóльскаго,// нóвыя ди́вныя свети́льники и чудотвóрцы.
Хор: Вси святíи землù Рýсскiя, молúте Бóга о нас.
Чтец: Рáдуйся, Iвéрiе и вся землé Грузи́нская, торжествýй, Армéнiе,/ воспевáющи равноапóстольную Ни́ну и Тамáру, Григóрiя Просвети́теля/ и ины́х мнóгих, в странáх Кавкáзских вéру правослáвную исповéдавших// и ны́не о земнéм отéчестве Хрiстý моля́щихся.
Хор: Вси святíи землù Рýсскiя, молúте Бóга о нас.
Чтец: Iерáрше Богомýдре Дими́трiе,/ житíй святы́х списáтелю и подражáтелю óным рéвностный,// слáвы óных моли́твами твои́ми содéлай нас óбщники.
Хор: Вси святíи землù Рýсскiя, молúте Бóга о нас.
Чтец: Святи́телю óтче Митрофáне, пéрвый Ворóнежу пáстырю,/ мýжество вéлiе яви́вый, прещéнiя царéва и смéрти не убоя́выйся// и в простотé дýшу свою́ спасы́й, моли́ Бóга о нас.
Благословúм Отцá, и Сы́на, и Святáго Дýха, Гóспода.
Тропáрь: Я́ко пчелá, мед слáдкiй от цветóв скороувядáющих собрáл еси́, óтче Ти́хоне,/ от тлéннаго ми́ра духóвное сокрóвище,// и́мже всех нас услаждáеши.
И ны́не и прúсно и во вéки векóв, амúнь.
Богорóдичен: Застýпницу усéрдную восхвáлим и честнóму Ея́ поклони́мся óбразу,/ и́мже в новопросвещéнней странé правовéрiе утверди́/ и в годи́ну лю́тую мáтерь рýсских градóв спасé./ Сей и грáда святáго Петрá вели́кое сокрóвище,// и всея́ земли́ нáшея преслáвное богáтство.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 4): Óтроки благочести́выя в пéщи/ Рождествó Богорóдичо спаслó есть;/ тогдá ýбо образýемое,/ ны́не же дéйствуемое,/ вселéнную всю воздвизáет пéти Тебé:/ Гóспода пóйте, делá,// и превозноси́те Егó во вся вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Óбраз чúстаго рождествá Твоегó,/ огнепалúмая купинá/ показá неопáльная;/ и ны́не на нас/ напáстей свирéпеющую угасúти, мóлимся, пещь,/ да Тя, Богорóдице,// непрестáнно величáем.
Хор: Слáва, Гóсподи, Святóму Воскресéнiю Твоемý.
Чтец: О кáко, лю́дiе беззакóннiи и непокори́вiи,/ лукáвая совещáвше,/ гóрдаго и нечести́ваго оправди́ша:/ Прáведнаго же на дрéве осуди́ша Гóспода слáвы,// Егóже достóйно величáем!
Хор: Слáва, Гóсподи, Святóму Воскресéнiю Твоемý.
Чтец: Спáсе Áгнче Непорóчне,/ И҆́же мíра грехи́ взéмый,/ Тебé слáвим воскрéсшаго триднéвно,/ со Отцéм и Божéственным Твои́м Дýхом,/ и Гóспода слáвы:// Егóже богослóвяще, величáем.
Хор: Пресвятáя Богорóдице, спасú нас.
Богорóдичен: Спаси́ лю́ди Твоя́, Гóсподи,/ и҆́хже стяжáл еси́ честнóю Твоéю крóвiю,/ цéрквам Твои́м подая́ мир, Человеколю́бче,// Богорóдицы моли́твами.
Глас 1
Хор: Пресвятáя Богорóдице, спасú нас.
Чтец: Из кóрене Давíдова прозяблá еси́ прорóческаго, Дéво, и богоотéческаго:/ но и Давíда я́ко вои́стинну Ты прослáвила еси́,/ я́ко рóждши прорóчествованнаго Гóспода слáвы:// Егóже достóйно величáем.
Хор: Пресвятáя Богорóдице, спасú нас.
Чтец: Всяк похвáльный, Пречи́стая, закóн/ побеждáется вели́чеством слáвы Твоея́./ Но о, Влады́чице, от раб Твои́х недостóйных,/ от любвé Тебé приноси́мое прiими́, Богорóдице,// со усéрдiем пéнiе похвáльное.
Глас 8
Хор: Вси святíи землú Рýсскiя, молúте Бóга о нас.
Чтец: О благíй просвети́телю и ти́хiй áнгеле Цéркве Тамбóвскiя, святи́телю Пiтирíме,/ весели́ся о пáстве твоéй и всея́ Руси́,// в ней бо нóвая и вéчная рáдость процветé, преподóбный Серафíм, ди́вный трýдник спасéнiя нáшего.
Хор: Вси святíи землú Рýсскiя, молúте Бóга о нас.
Чтец: О святи́телiе Богомýдрiи Феодóсiе и Iоасáфе, ди́вным нетлéнiем от Гóспода прослáвленнiи!/ Вáми возвели́чени есмы́ и мы, чáда сýще Цéркве Правослáвныя,/ в нéйже и доны́не Госпóдь чýдная явля́ет// и рабóв Свои́х прославля́ет.
Хор: Вси святíи землú Рýсскiя, молúте Бóга о нас.
Чтец: О нóвый чудотвóрче, Ióсифе, святи́телю и мýчениче!/ Град Áстрахань и вся Повóлжская странá тобóю хвáлится/ и почитáет тя, за прáвду от невéрных мятéжников лю́те пострадáвша.
Хор: Вси святíи землú Рýсскiя, молúте Бóга о нас.
Чтец: О, пáче слóва и превы́ше похвáл святы́х страстотéрпцев пóдвига! / Злóбу ýбо лю́тых отстýпников и нáглое iудéйское неи́стовство претерпéша, / вéру Хрїстóву проти́ву учéнiй мíра сегó, я́ко щит, держáще // и нам óбраз терпéнiя и злострадáнiй достóйно явля́юще.
Хор: Вси святíи землú Рýсскiя, молúте Бóга о нас.
Чтец: О, твéрдости и мýжества пóлка мýченик Хрїстóвых, / от хи́нов лю́тых за Хрїстá убiéнных! / Тíи бо Цéрковь Правослáвную украси́ша / и в странé своéй крóви своя́, я́ко сéмя вéры, дáша, // и кýпно со всéми святы́ми достóйно да почтýтся.
Хор: Вси святíи землú Рýсскiя, молúте Бóга о нас.
Чтец: О вели́цыи срóдницы нáши, именóваннiи и безымéннiи, явлéннiи и неявлéннiи,/ Небéснаго Сióна дости́гшiи и слáву мнóгу от Бóга прiи́мшiи,/ утешéнiе нам, в скóрби сýщим, испроси́те,/ вéру нáшу пáдшую возстáвите и лю́ди расточéнныя собери́те,// от нас, я́ко дар, песнь благодарéнiя прiéмлюще.
Слáва Отцý и Сы́ну и Святóму Дýху.
Тропáрь: О Трóице Честнáя,/ прiими́, я́же земля наша принóсит Ти,/ я́ко начáтки и я́ко фимiáм избрáнный,/ вся угоди́вшiя и прéжде, и пóслежде в ней,/ знáемыя и незнáемыя,// и моли́твами их от вся́каго врéда сiю́ сохраня́й.
И ны́не и прúсно и во вéки векóв, амúнь.
Богорóдичен: О Дéво Благодáтная,/ грáды и вéси нáша честнáго ли́ка Твоегó изображéнiи,/ я́ко благоволéнiя знáменiи, обогати́вшая,/ благодарéнiе нáше прiими́ и от бед лю́тых отéчество нáше избáви,// вси бо Тя, я́ко Покрóв всемóщный страны́ нáшея, величáем.
Катавáсiя (глас 4): Всяк земнорóдный/ да взыгрáется, Дýхом просвещáемь,/ да торжествýет же Безплóтных умóв естествó,/ почитáющее свящéнное торжествó Богомáтере,/ и да вопiéт:/ рáдуйся, Всеблажéнная,// Богорóдице, Чи́стая Приснодéво.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный вторы́й: Кáмень узрéвша отвалéн, миронóсицы рáдовахуся,/ ви́деша бо ю́ношу седя́ща во грóбе,/ и той тем речé: се Хрїстóс востáл есть,/ рцы́те с Петрóм ученикóм:/ на гóру приспéйте Галiлéйскую, тáмо вам яви́тся,// я́коже предречé другóм.
Слáва Ѻтцý и Сы́ну и Святóму Дýху.
Светúлен рýсских святы́х: В пéснех восхвáлим свети́ла незаходи́мая земли́ нашея,/ таи́нники Божéственнаго Слóва,/ Хрїстá слáвяще, сих просвети́вшаго и возлюби́вшаго// и помóщники нам дáвшаго в скóрби.
И ны́не и прúсно и во вéки векóв. Амúнь.
Богорóдичен воскрéснаго Ексапостiлáрiя: Áнгел ýбо принесé Дéве, éже рáдуйся,/ прéжде Твоегó зачáтiя, Хрїстé,/ Áнгел же кáмень отвали́ грóба Твоегó,/ вмéсто печáли ов ýбо рáдости неизречéнныя знáменiя,/ ов же в смéрти мéсто подáтеля Тя жи́зни проповéдуя и величáя,// и глагóля воскресéнiе женáм, и таи́нником.
ХВАЛИТНЫ
Хор, глас 1: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 1: Поéм Твою́, Хрїстé, спаси́тельную страсть,// и слáвим Твоé Воскресéнiе.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Крест претерпéвый, и смерть упраздни́вый,/ и воскресы́й из мéртвых,/ умири́ нáшу жизнь, Гóсподи,// я́ко еди́н Всеси́лен.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Áда плени́вый, и человéка воскреси́вый,/ Воскресéнiем Твои́м, Хрiстé,/ сподóби нас чи́стым сéрдцем// Тебé пéти и слáвити.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Боголéпное Твоé снисхождéнiе слáвяще,/ поéм Тя, Хрїстé./ Роди́лся еси́ от Дéвы,/ и не разлучéн был еси́ от Отцá,/ пострадáл еси́, я́ко человéк,/ и вóлею претерпéл еси́ Крест,/ воскрéсл еси́ от грóба, я́ко от чертóга произшéд,/ да спасéши мiр,// Гóсподи слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры рýсских святы́х, глас 5: Рáдуйся, Цéрковь Рýсская вéрная,/ рáдуйся, кня́же благовéрный Влади́мiре преслáвный,/ рáдуйся, Ѻ́льго избрáнная!/ Вы бо естé ко Влады́це всех/ пéрвейшiи нáши ходáтаи,/ и начáльницы правослáвiя,/ и настáвницы ко и́стинней вéре./ Рáдуйся, вся́ко мéсто, и странá, и град,/ грáжданы воспитáвшiи Небéснаго Цáрствiя,/ сíи святáя свети́ла душáм нáшим яви́шася,/ сíи чудéс зарéю, и дéлы, и знáменiи просiя́ша мы́сленно во вся концы́/ и ны́не Хрiстý мóлятся// подáти душáм нáшим вéлiю ми́лость.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Рáдуйтеся, земли́ Рýсскiя украшéнiе,/ Цéркве нáшея непоколеби́мое утверждéнiе,/ слáво правослáвных,/ чудéс истóчницы,/ любвé струи́ неистощи́мыя,/ свети́льницы многосвéтлiи,/ Дýха Святáго оргáни,/ крóтцыи и незлóбивiи,/ добродéтельми укрáшеннiи,/ человéцы небéснiи,/ земнíи áнгели,/ Хрiстá дрýзи и́скреннiи!/ Тогó прилéжно моли́те// подáти вас чтýщим вéлiю ми́лость.
Бог нам прибéжище и сúла,/ Помóщник в скóрбех, обрéтших ны зелó.
Стiхúра: Прiиди́те, Небéснiи предстáтелiе нáши, к нам,/ вáшего трéбующим ми́лостивнаго посещéнiя,/ и избáвите озлóбленныя мучи́тельскими прещéнiи/ лю́таго неи́стовства невéрных,/ от ни́хже, я́ко плéнницы и нáзи, гони́мы есмы́,/ от мéста на мéсто чáсто преходя́ще/ и заблуждáюще в вертéпех и горáх./ Ущéдрите ýбо, прехвáльнiи,/ и дáруйте нам ослáбу,/ утоли́те бýрю/ и угаси́те éже на ны негодовáнiе,/ Бóга моля́ще,// подаю́щаго вáми земли́ нáшей вéлiю ми́лость.
Госпóдь сил с нáми,/ Застýпник наш, Бог Iáковль.
Глас 4: Глас евáнгельскiй услы́шавше/ и апóстольскою рéвностiю распали́вшеся,/ в научéнiе невéрных язы́ков устреми́стеся,/ богоблажéннiи равноапóстольнiи/ Кýкше, Леóнтiе, Стефáне и Гýрiе,/ Гéрмане Аля́скинскiй, и святи́телю óтче Нiкóлае Япóнскiй,/ и досточýдный Iннокéнтiе,/ вели́кiя Сиби́рскiя страны́ апóстоле/ и просвещéнiя за мóрем сýщих нóвых стран во Амéрице первоначáльниче./ Тéмже со всéми прóчими,/ во благовéстiи Хрiстóве потруди́вшимися,// достóйно ублажáетеся.
Слáва Отцý и Сыну и Святóму Дýху.
Стiхúра евáнгельская вторáя, глас 2: С ми́ры пришéдшим я́же с Марíею женáм,/ и недоумевáющимся,/ кáко бýдет им улучи́ти желáнiе,/ яви́ся кáмень взят,/ и Божéственный ю́ноша утоля́я мятéж душ их,/ востá бо, глагóлет, Iисýс Госпóдь./ Тéмже проповéдите проповéдником Егó,/ ученикóм в Галiлéю тещи́,/ и ви́дети Егó воскрéсша из мéртвых,// я́ко Жизнодáвца и Гóспода.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 1: Днесь Спасéнiе мíру бысть,/ поéм Воскрéсшему из грóба,/ и Начáльнику жи́зни нáшея:/ разруши́в бо смéртiю смерть,// побéду дадé нам и вéлiю ми́лость.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 рáза)
Гóсподи, благословѝ.
ОТПУСТ
Хрїстóс, и҆́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 1: Кáмени запечáтану от iудéй и вóином стрегýщим Пречи́стое Тéло Твоé, воскрéсл еси триднéвный, Спáсе, дáруяй мíрови жизнь. Сегó рáди си́лы небéсныя вопiя́ху Ти, Жизнодáвче: слáва Воскресéнiю Твоемý, Хрїстé, слáва Цáрствiю Твоемý, слáва смотрéнiю Твоемý, еди́не Человеколю́бче.
Слáва Отцý и Сы́ну и Святóму Дýху.
Тропáрь рýсских святы́х, глас 8: Я́коже плод крáсный Твоегó спаси́тельнаго сéянiя,/ земля́ Рýсская принóсит Ти, Гóсподи, вся святы́я, в той просiя́вшiя./ Тех моли́твами в ми́ре глубóце// Цéрковь и странý нáшу Богорóдицею соблюди́, Многоми́лостиве.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк воскрéсный, глас 1: Воскрéсл еси́, я́ко Бог, из грóба во слáве, и мiр совоскреси́л есѝ; и естествó человéческое я́ко Бóга воспевáет Тя, и смерть исчезé; Адáм же ликýет, Влады́ко; Éва ны́не от уз избавля́ема рáдуется, зовýщи: Ты есѝ, И҆́же всем подая́, Хрїстé, воскресéнiе.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Хрїстóс, и҆́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу