Вознесение Господне. ВСЕНОЩНОЕ БДЕНИЕ. ВЕЛИКАЯ ВЕЧЕРНЯ. Служба мирским чином
25 мáя 2023 гóда. Четвéрг 6-й седмúцы по Пáсхе. Вознесéнiе Госпóдне. Всeнóщное бдéнiе для домáшнего (келéйнаго) совершéнiя состоúт из Велúкой вечéрни, ýтрени, тáже канóна и пéрвого чáса. Слýжба мiрскúм чúном.
ВЕЛИКАЯ ВЕЧЕРНЯ
Моли́твами святы́х отéц нáших, Гóсподи Iисýсе Хрїстé, Бóже наш, поми́луй нас, ами́нь.
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжїй, поми́луй нас. Ами́нь.
Гóсподи, поми́луй, (12 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Пріиди́те, поклони́мся Царéви нáшему Бóгу.
Пріиди́те, поклони́мся и припадéм Хрїстý, Царéви нáшему Бóгу.
Пріиди́те, поклони́мся и припадéм Самомý Хрїстý, Царéви и Бóгу нáшему.
Псалом 103, предначинáтельный
Стiхú избрáннiи: Благословѝ, душé моя́, Гóспода./ Благословéн есѝ, Гóсподи./ Гóсподи, Бóже мой, возвели́чился еси́ зелó./ Благословéн есѝ, Гóсподи./ Во исповéданiе и в велелéпоту/ облéклся есѝ. Благословéн есѝ, Гóсподи./ Посредé гор прóйдут вóды./ Ди́вна делá Твоя́, Гóсподи./ Вся премýдростiю сотвори́л есѝ./ Слáва Ти, Гóсподи, сотвори́вшему вся.
[Псалом полностью]Благослови, душé моя, Гóспода, Бóже мой, возвеличился есѝ зелó. Во исповéданiе и в велелéпоту облéклся есѝ. Одея́йся свéтом, яко ри́зою, простирáяй нéбо, яко кóжу. Покрывáяй водáми превы́спренняя Своя́, полагáяй óблаки на восхождéнiе Своé, ходя́й на крилý вéтреню. Творя́й Áнгелы Своя дýхи и слугѝ Своя плáмень óгненный. Основáяй зéмлю на твéрди ея́, не преклони́тся в век вéка. Бéздна, яко ри́за, одея́нiе ея́, на горáх стáнут вóды, от запрещéнiя Твоегó побéгнут, от глáса грóма Твоегó убоя́тся. Восхóдят гóры и нисхóдят поля́ в мéсто, éже основáл есѝ им. Предéл положи́л есѝ, eгóже не прéйдут, нижé обратя́тся покры́ти зéмлю. Посылáяй истóчники в дéбрех, посредé гор прóйдут вóды. Напая́ют вся звéри сéльныя, ждут онáгри в жáжду свою. На тых пти́цы небéсныя привитáют, от среды́ кáменiя дадя́т глас. Напая́яй гóры от превы́спренних Свои́х, от плодá дел Твоих насы́тится земля́. Прозябáяй травý скотóм, и злак на слýжбу человéком, известѝ хлеб от землѝ. И винó весели́т сéрдце человéка, умáстити лицé елéем, и хлеб сéрдце человéка укрепи́т. Насы́тятся древá польскáя, кéдри Ливáнстiи, и҆́хже еси насади́л. Тáмо пти́цы вогнездя́тся, еродíево жили́ще предводи́тельствует и҆́ми. Гóры высóкiя елéнем, кáмень прибéжище зáяцем. Сотвори́л есть лунý во временá, сóлнце познá зáпад свой. Положи́л есѝ тму, и бысть нощь, в нéйже прóйдут вси звéрiе дубрáвнiи. Ски́мни рыкáющiи, восхи́тити и взыскáти от Бóга пи́щу себé. Возсiя́ сóлнце и собрáшася и в лóжах свои́х ля́гут. Изы́дет человéк на дéло своé и на дéланiе своé до вéчера. Яко возвели́чишася делá Твоя, Гóсподи, вся премýдростiю сотвори́л есѝ, испóлнися земля́ твáри Твоея́. Сié мóре вели́кое и прострáнное, тáмо гáди, и҆́мже несть числá, живóтная мáлая с вели́кими, тáмо кораблѝ преплáвают, змiй сей, eгóже создáл есѝ ругáтися eмý. Вся к Тебé чáют, дáти пи́щу им во блáго врéмя. Дáвшу Тебé им соберýт, отвéрзшу Тебé рýку вся́ческая испóлнятся блáгости, отврáщшу же Тебé лицé, возмятýтся, отъи́меши дух их, и исчéзнут, и в персть свою возвратя́тся. Пóслеши Дýха Твоегó, и сози́ждутся, и обнови́ши лицé землѝ. Бýди слáва Госпóдня во вéки, возвесели́тся Госпóдь о дéлех Свои́х, призирáяй на зéмлю, и творя́й ю́ трясти́ся, прикасáяйся горáм, и дымя́тся. Воспою́ Гóсподеви в животé моéм, пою́ Бóгу моемý, дóндеже есмь, да услади́тся Емý бесéда моя, аз же возвеселю́ся о Гóсподе. Да исчéзнут грéшницы от землѝ, и беззакóнницы, я́коже не бы́ти им. Благословѝ, душé моя́, Гóспода. Сóлнце познá зáпад свой. Положи́л еси тму, и бысть нощь. Яко возвели́чишася делá Твоя, Гóсподи, вся премýдростiю сотвори́л есѝ.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебè Бóже. (3 раза)
Гóсподи, поми́луй. (12 раз)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Аллилýїа, аллилýїа, аллилýїа, слáва Тебé Бóже. (трúжды)
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
ГОСПОДИ ВОЗЗВАХ, ГЛАС 6
Хор: Гóсподи, воззвáх к Тебé, услы́ши мя./ Услы́ши мя, Гóсподи./ Гóсподи, воззвáх к Тебé, услы́ши мя:/ вонми́ глáсу молéнія моегó,/ внегдá воззвáти ми к Тебé./ Услы́ши мя, Гóсподи.
Хор: Да испрáвится моли́тва моя́,/ я́ко кади́ло пред Тобóю,/ воздея́ніе рукý моéю/ - жéртва вечéрняя./ Услы́ши мя, Гóсподи.
[В приходской практике пропускается до стихир]Положѝ, Гóсподи, хранéнiе устóм мои́м, и дверь ограждéнiя о устнáх мои́х. Не уклонѝ сéрдце моé в словесá лукáвствiя, непщевáти вины́ о гресéх, с человéки дéлающими беззакóнiе, и не сочтýся со избрáнными их. Накáжет мя прáведник ми́лостiю и обличи́т мя, елéй же грéшнаго да не намáстит главы́ моея́, я́ко ещé и моли́тва моя́ во благоволéнiих их. Пожéрты бы́ша при кáмени судiѝ их: услы́шатся глагóли моѝ, я́ко возмогóша. Я́ко тóлща землѝ просéдеся на землѝ, расточи́шася кóсти и҆́х при áде. Я́ко к Тебé, Гóсподи, Гóсподи, óчи моѝ: на Тя уповáх, не отымѝ дýшу мою́. Сохранѝ мя от сéти, ю́же состáвиша ми, и от соблáзн дéлающих беззакóнiе. Падýт во мрéжу свою́ грéшницы: еди́н есмь аз, дóндеже прейдý.
[В приходской практике пропускается до стихир]Глáсом мои́м ко Гóсподу воззвáх, глáсом мои́м ко Гóсподу помоли́хся. Пролiю́ пред Ним молéнiе моé, печáль мою́ пред Ним возвещý. Внегдá исчезáти от менé дýху моемý: и Ты познáл есѝ стезѝ моя́: на путѝ сем, по немýже хождáх, скры́ша сеть мне. Смотря́х одеснýю и возгля́дах, и не бе знáяй менé: поги́бе бéгство от менé, и несть взыскáяй дýшу мою́. Воззвáх к Тебé, Гóсподи, рех: Ты есѝ уповáнiе моé, часть моя́ есѝ на землѝ живы́х. Вонмѝ молéнiю моемý, я́ко смири́хся зелó, избáви мя от гоня́щих мя, я́ко укрепи́шася пáче менé.
На 10 Чтец: Изведù из темнúцы дýшу мою́,// исповéдатися и҆́мени Твоемý.
Стiхúры Прáздника, глас 6, самоглáсны: Госпóдь вознесéся на небесá,/ да пóслет Утéшителя мíру:/ небесá уготóваша престóл Егó,/ óблацы восхождéнiе Егó./ Áнгели дивя́тся, Человéка зря́ще превы́ше себé./ Отéц ждет, Егóже в нéдрах и́мать соприсносýщна:/ Дух же Святы́й вели́т всем áнгелом Егó:/ возми́те вратá кня́зи вáша,/ вси язы́цы восплещи́те рукáми,// я́ко взы́де Хрїстóс, идéже бе пéрвее.
Менé ждут прáведницы,// дóндеже воздáси мне.
Стiхúра: Госпóдь вознесéся на небесá,/ да пóслет Утéшителя мíру:/ небесá уготóваша престóл Егó,/ óблацы восхождéнiе Егó./ Áнгели дивя́тся, Человéка зря́ще превы́ше себé./ Отéц ждет, Егóже в нéдрах и́мать соприсносýщна:/ Дух же Святы́й вели́т всем áнгелом Егó:/ возми́те вратá кня́зи вáша,/ вси язы́цы восплещи́те рукáми,// я́ко взы́де Хрїстóс, идéже бе пéрвее.
На 8. Стiх: Из глубины́ воззвáх к Тебè, Гóсподи,// Гóсподи, услы́ши глас мой.
Стiхúра: Гóсподи, Твоемý Вознесéнiю удиви́шася Херувíми,/ зря́ще Тебé Бóга на óблацех восходя́ща, на них седя́щаго:/ и слáвим Тя, я́ко блáга ми́лость Твоя́,// слáва Тебé.
Да бýдут ýши Твоù// внéмлюще глáсу молéнiя моегó.
Стiхúра: Гóсподи, Твоемý Вознесéнiю удиви́шася Херувíми,/ зря́ще Тебé Бóга на óблацех восходя́ща, на них седя́щаго:/ и слáвим Тя, я́ко блáга ми́лость Твоя́,// слáва Тебé.
На 6. Стiх: Áще беззакóнiя нáзриши, Гóсподи, Гóсподи, кто постоúт?// Яко у Тебè очищéнiе есть.
Стiхúра: На горáх святы́х зря́ще Твоé Вознесéнiе, Христé,/ сiя́нiе слáвы Ѻ́тчи,/ воспевáем Твой светообрáзный лицá зрак,/ клáняемся страстéм Твои́м,/ почитáем воскресéнiе,/ слáвное Вознесéнiе слáвяще:// поми́луй нас.
И҆́мене рáди Твоегó потерпéх Тя, Гóсподи, потерпè душá моя́ в слóво Твоè,// уповá душá моя на Гóспода.
Стiхúра: На горáх святы́х зря́ще Твоé Вознесéнiе, Христé,/ сiя́нiе слáвы Ѻ́тчи,/ воспевáем Твой светообрáзный лицá зрак,/ клáняемся страстéм Твои́м,/ почитáем воскресéнiе,/ слáвное Вознесéнiе слáвяще:// поми́луй нас.
На 4. Стiх: От стрáжи ýтреннiя до нóщи, от стрáжи ýтреннiя,// да уповáет Iзрáиль на Гóспода.
Стiхúра: Гóсподи, апóстоли я́ко ви́деша Тя, на óблацех возноси́ма,/ рыдáнiем слез, Жизнодáвче Хрiстé, скóрби исполня́еми,/ рыдáюще глагóлаху:/ Влады́ко, не остáви нас си́рых,/ и́хже за милосéрдiе возлюби́л еси́ рабы́ Твоя́,/ я́ко благоутрóбен,/ но посли́ я́коже обещáл еси́ нам,/ Пресвятáго Твоегó Дýха,// просвещáюща дýши нáша.
Яко у Гóспода мúлость, и мнóгое у Негó избавлéнiе,// и Той избáвит Iзрáиля от всех беззакóнiй eгó.
Стiхúра: Гóсподи, апóстоли я́ко ви́деша Тя, на óблацех возноси́ма,/ рыдáнiем слез, Жизнодáвче Хрiстé, скóрби исполня́еми,/ рыдáюще глагóлаху:/ Влады́ко, не остáви нас си́рых,/ и́хже за милосéрдiе возлюби́л еси́ рабы́ Твоя́,/ я́ко благоутрóбен,/ но посли́ я́коже обещáл еси́ нам,/ Пресвятáго Твоегó Дýха,// просвещáюща дýши нáша.
На 2. Стiх: Хвалúте Гóспода вси язы́цы, похвалúте Егó вси лю́дiе.
Стiхúра (глас 2): Гóсподи, смотрéнiя соверши́в тáинство,/ пои́м Твоя́ ученики́ на гóру Елеóнскую,/ возноси́лся еси́,/ и се твердь небéсную прошéл еси́,/ менé рáди обнищáвый по мне,/ и возшéд отонýдуже не разлучи́лся еси́,/ Всесвятáго Твоегó Дýха низпосли́,// просвещáюща дýши нáша.
Яко утвердúся мúлость Егó на нас,// и и҆́стина Госпóдня пребывáет во век.
Стiхúра: Гóсподи, смотрéнiя соверши́в тáинство,/ пои́м Твоя́ ученики́ на гóру Елеóнскую,/ возноси́лся еси́,/ и се твердь небéсную прошéл еси́,/ менé рáди обнищáвый по мне,/ и возшéд отонýдуже не разлучи́лся еси́,/ Всесвятáго Твоегó Дýха низпосли́,// просвещáюща дýши нáша.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Глас 6: Недр Отéческих не разлýчься, сладчáйший Iисýсе,/ и с земны́ми я́ко Человéк пожи́в,/ днесь от горы́ Елеóнскiя вознéслся еси́ во слáве,/ и пáдшее естествó нáше ми́лостивно вознéс,/ Отцý спосади́л еси́./ Тéмже небéснiи безплóтных чи́нове,/ чудеси́ удивля́ющеся, ужасáхуся ýжасом,/ и трéпетом содержи́ми, Твоé человеколю́бiе величáху./ С ни́миже и мы земнíи,/ éже к нам Твоé снисхождéнiе,/ и éже от нас Вознесéнiе славослóвяще,/ мóлимся глагóлюще:/ ученики́, и рóждшую Тя Богорóдицу,/ рáдости безчи́сленныя испóлнивый во Твоé Вознесéнiе,/ и нас сподóби избрáнных Твои́х рáдости, моли́твами их,// вели́кiя рáди Твоея́ ми́лости.
СВЕТЕ ТИХИЙ
Хор: Свéте Ти́хiй святы́я слáвы Безсмéртнаго Ѻтцá Небéснаго, Святáго, Блажéннаго, Iисýсе Хрїстé! Пришéдше на зáпад сóлнца, ви́девше свет вечéрнiй, поéм Ѻтцá, Сы́на и Святáго Дýха, Бóга. Достóин есѝ во вся временá пет бы́ти глáсы преподóбными, Сы́не Бóжiй, живóт дая́й; тéмже мiр Тя слáвит.
ПРОКИМЕН ДНЯ
Чтец: Прокíмен, глас пя́тый: Бóже, во и́мя Твоé спаси́ мя,/ и в си́ле Твоéй суди́ ми. (Пс.53:3)
Хор: Бóже, во úмя Твоé спасú мя,/ и в сúле Твоéй судú ми.
Чтец: Бóже, услы́ши моли́тву мою́, внуши́ глагóлы уст мои́х.(Пс.53:4)
Хор: Бóже, во úмя Твоé спасú мя,/ и в сúле Твоéй судú ми.
Чтец: Бóже, во и́мя Твоé спаси́ мя.
Хор: И в сúле Твоéй судú ми.
ПАРИМИИ
Чтец: Прорóчества Исáiина чтéнiе.
(Из главы 2): Тáко глагóлет Госпóдь: бýдет в послéдняя дни явлéна горá Госпóдня, и дом Бóжiй на версéх гор, и вознесéтся превы́ше холмóв, и прiи́дут на ню вси язы́цы. И пóйдут лю́дiе мнóзи, и рекýт: прiиди́те взы́дем на гóру Госпóдню, и в дом Бóга Iáковля, и возвести́т нам путь Свой, и пóйдем по немý.
[Русский синодальный перевод]Так говорит Господь: и будет в последние дни, гора дома Господня будет поставлена во главу гор и возвысится над холмами, и потекут к ней все народы. И пойдут многие народы и скажут: придите, и взойдем на гору Господню, в дом Бога Иаковлева, и научит Он нас Своим путям и будем ходить по стезям Его. (Ис 2:2-3)
Чтец: Прорóчества Исáiина чтéнiе.
(Из главы 62 и 63): Тáко глагóлет Госпóдь: поиди́те и вни́дите враты́ Мои́ми, уготóвите путь Мой, и путь твори́те лю́дем Мои́м, и кáменiя от пути́ размещи́те, вознеси́те знáменiе на язы́ки. Се бо Госпóдь сотвори́ слы́шано дáже до послéдних земли́: рцы́те дщéри Сióнове, се Спаси́тель твой прихóдит, имéя с Собóю мзду, и дéло Егó пред лицéм Егó. И прозовéт я́ лю́ди свя́ты, избáвлены от Гóспода: ты же наречéшися взы́сканный град, и не остáвленный. Кто Сей пришéдый из Едóма, оброщéнiе риз Егó от Восóра? Сей красéн во одéжди Своéй, вопiéт с крéпостiю вéлiею: Аз глагóлю прáвду, и суд спасéнiя. Почтó ти оброщéны ри́зы, и одéжды твоя́ я́ко от истоптáнiя точи́ла испóлнены истоптáнiя? Точи́ло истоптáх еди́н, и от язы́к несть муж со Мнóю. Ми́лость Госпóдню помянýх, добродéтели Госпóдни во всех, и́миже нам воздавáет. Госпóдь, судiя́ благíй дóму Iзрáилеву, нанóсит нам по ми́лости Своéй, и по мнóжеству прáвды Своея́. И речé: не лю́дiе ли Мои́; чáда не отвéргут ли ся? И бысть им во спасéнiе от вся́кiя скóрби их. Не ходáтай, нижé Áнгел, но Сам Госпóдь спасé их: за éже люби́ти их, и щадéти их, Сам избáви их, и восприя́т их, и вознесé их во вся дни вéка.
[Русский синодальный перевод]Так говорит Господь: проходите, проходите в ворота, приготовляйте путь народу! Ровняйте, ровняйте дорогу, убирайте камни, поднимите знамя для народов! Вот, Господь объявляет до конца земли: скажите дщери Сиона: грядет Спаситель твой; награда Его с Ним и воздаяние Его пред Ним. И назовут их народом святым, искупленным от Господа, а тебя назовут взысканным городом, не оставленным. Кто это идет от Едома, в червленых ризах от Восора, столь величественный в Своей одежде, выступающий в полноте силы Своей? «Я - изрекающий правду, сильный, чтобы спасать». Отчего же одеяние Твоё красно, и ризы у Тебя, как у топтавшего в точиле? «Я топтал точило один, и из народов никого не было со Мною». Воспомяну милости Господни и славу Господню за всё, что Господь даровал нам, и великую благость Его к дому Израилеву, какую оказал Он ему по милосердию Своему и по множеству щедрот Своих. Он сказал: «подлинно они народ Мой, дети, которые не солгут», и Он был для них Спасителем. Во всякой скорби их Он не оставлял их, и Ангел лица Его спасал их; по любви Своей и благосердию Своему Он искупил их, взял и носил их во все дни древние. (Ис 62:10-12; 63:1-3, 7-9)
Чтец: Прорóчества Захáрiина чтéнiе.
(Из главы 14) Тáко глагóлет Госпóдь: се день грядéт Госпóдень, и стáнут нóзе Егó в день óный на горé Елеóнстей, пря́мо Iерусали́ма, от востóк сóлнца. И в день óный изы́дет водá живá из Iерусали́ма, пол ея́ в мóре пéрвое, и пол ея́ в мóре послéднее: в жáтву и в вéсну бýдет тáко. И бýдет Госпóдь Царь по всей земли́, в день óный бýдет Госпóдь Еди́н. И́мя Егó еди́но, окружáющее всю зéмлю и пусты́ню, от Гáвы дáже до Реммóна, проти́ву хребтý Iерусали́млю: и вознесéтся, и на мéсте пребýдет, от врат Вениами́новых, дáже до мéста дверéй пéрвых, дáже до врат угóльных, и дáже до столпá Анамеи́лева, дáже до подточи́лiй царéвых, обитáют в нем: и анáфема не бýдет ктомý, и всели́тся Iерусали́м надéяйся.
[Русский синодальный перевод]Так говорит Господь: вот наступает день Господень. И станут ноги Господа в тот день на горе Елеонской, которая перед лицом Иерусалима к востоку. И будет в тот день, живые воды потекут из Иерусалима, половина их к морю восточному и половина их к морю западному: летом и зимой так будет. И Господь будет Царем над всею землею; в тот день будет Господь един, и имя Его едино. Вся эта земля будет, как равнина, от Гаваона до Реммона, на юг от Иерусалима, который высоко будет стоять на своем месте и населится от ворот Вениаминовых до места первых ворот, до угловых ворот, и от башни Анамеила до царских точил. И будут жить в нём, и проклятия не будет более, но будет стоять Иерусалим безопасно. (Зах 14:4, 8-11)
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СПОДОБИ ГОСПОДИ
Хор: Сподóби, Гóсподи, в вéчер сей без грехá сохрани́тися нам./ Благословéн есѝ, Гóсподи Бóже ѻтéц нáших,/ и хвáльно и прослáвлено и҆́мя Твоé во вéки, ами́нь.
Бýди, Гóсподи, ми́лость Твоя́ на нас, я́коже уповáхом на Тя./ Благословéн есѝ, Гóсподи, научѝ мя оправдáнiем Твои́м./ Благословéн есѝ, Влады́ко, вразумѝ мя оправдáнiем Твои́м./ Благословéн есѝ, Святы́й, просветѝ мя оправдáнiи Твои́ми.
Гóсподи, ми́лость Твоя́ во век, дел рукý Твоéю не прéзри./ Тебé подобáет хвалá. Тебé подобáет пéнiе,/ Тебé слáва подобáет, Ѻтцý и Сы́ну и Святóму Дýху, ны́не и при́сно и во вéки векóв. Ами́нь.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
ЛИТИЯ
Стiхúры Вознесéнiя, глас 1, самоглáсны: Возшéд на небесá, отонýдуже и сошéл еси́,/ не остáви нас си́рых Гóсподи:/ да прiи́дет Твой Дух, нося́ мир мíрови,/ покажи́ сынóм человéческим делá си́лы Твоея́,// Гóсподи Человеколю́бче.
Возшéл еси́ Хрiстé к Безначáльному Отцý Твоемý,/ неопи́санных Егó недр не разлучи́выйся,/ и прилóг си́лы хвалéнiя трисвятáго не прiя́ша,/ но Еди́наго Сы́на и по вочеловéченiи/ познáша Тя Гóсподи, Единорóдна Отцý:// во мнóжестве щедрóт Твои́х поми́луй нас.
Áнгели Твои́ Гóсподи, апóстолом глагóлаху:/ мýжiе галiлéйстiи, что стоитé, зря́ще на нéбо?/ Сей есть Хрiстóс Бог, вознесы́йся от вас на нéбо,/ Той прiи́дет пáки,/ и́мже óбразом ви́десте Егó идýща на нéбо:// послужи́те Емý в преподóбiи и прáвде.
Глас 4: Егдá пришéл еси́ на гóру Хрiстé Елеóнскую,/ Ѻ́тчее соверши́ти благоволéнiе,/ ужасóшася небéснiи Áнгели,/ и устраши́шася преиспóднiи./ Предстáша же ученицы́ с рáдостiю трéпетни,/ я́ко глагóлал еси́ им,/ я́ко престóл же готовля́шеся проти́в óблак ждýщiй:/ вратá же нéбо отвéрзшее добрóту явля́ше,/ и земля́ сокрóвища открывáет,/ Адáмову схождéнiю я́ко познáтися, и пáки восхождéнiю./ Но стопы́ ýбо возвышáхуся, я́коже рýце,/ устá же вельми́ благословля́ху, я́коже слы́шашеся,/ óблак подъéмляше, и нéбо внутрь Тебé прiя́т./ Дéло сié Гóсподи содéлал еси́ вели́кое и преслáвное,// во спасéнiе душ нáших.
Низшéдшее естествó Адáмово,/ в дóльнейшiя страны́ земли́, Бóже/ новосотвори́вый Собóю превы́ше вся́каго начáла и влáсти, возвéл еси́ днесь:/ я́ко бо возлюби́в спосади́л еси́,/ я́коже поми́ловав соедини́л еси́ Себé,/ я́ко соедини́вый спострадáл еси́,/ я́ко безстрáстен пострадáв, и спрослáвил еси́./ Но безплóтнiи, кто есть Сей, глагóлаху крáсный Муж?/ Но не человéк тóчiю, Бог же и Человéк,/ совокуплéнно и явля́емо./ Тéмже удивлéни Áнгели,/ во одéждах летáюще óкрест ученикóв,/ друзíи же стоя́ще вопiя́ху:/ мýжiе галiлéйстiи, И́же от вас оты́де,/ Сей есть Iисýс Человéк Бог./ Бог Человéк пáки прiи́дет,/ Судiя́ живы́х и мéртвых,/ вéрным же дáруяй// грехóв прощéнiе и вéлiю ми́лость.
Егдá вознéслся еси́ во слáве Хрiстé Бóже,/ ученикóм зря́щим,/ óблацы подымáху Тя с плóтiю,/ вратá взя́шася небéсная,/ лик áнгельскiй рáдовашеся с весéлiем,/ гóрнейшiя си́лы зовя́ху глагóлюще:/ возми́те вратá кня́зи вáша,/ и вни́дет Царь слáвы./ Ученицы́ же дивя́щеся глагóлаху:/ не разлучи́ся нас Пáстырю дóбрый,/ но посли́ нам Дýха Твоегó Пресвятáго,/ наставля́юща, и утверждáюща, и просвещáюща,// и освящáюща дýши нáша.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Глас 4: Гóсподи, тáинство éже от векóв сокровéнное и от родóв,/ испóлнив я́ко Благ,/ пришéл еси́ со ученики́ Твои́ми на гóру Елеóнскую,/ имéя Рóждшую Тя Творцá и всех Содéтеля:/ Той бо в стрáсти Твоéй мáтерски пáче всех болéзновавшей,/ подобáше и слáвою плóти Твоея́,/ премнóгiя наслади́тися рáдости./ Ея́же и мы причащáющеся,/ éже на небесá восхóдом Твои́м Влады́ко,// вели́кую Твою́ ми́лость на нас бы́вшую слáвим.
Гóсподи, поми́луй. (40 раз)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
СТИХИРЫ НА СТИХОВНЕ
Чтец (Стiхúры Прáздника, глас 2, самоглáсны): Роди́лся еси́ я́ко Сам восхотéл еси́,/ яви́лся еси́ я́ко Сам извóлил еси́:/ пострадáл еси́ плóтiю Бóже наш,/ из мéртвых воскрéсл еси́ попрáв смерть./ Вознéслся еси́ во слáве, вся́ческая исполня́яй,/ и послáл еси́ нам Дýха Божéственнаго,// éже воспевáти и слáвити Твоé Божествó.
Стiх: Вси язы́цы восплещúте рукáми,/ восклúкните Бóгу глáсом рáдованiя.
Воспрiéмлему Тебé Хрiстé от горы́ Мáсличныя,/ си́лы зря́ще, друг дрýгу вопiя́ху:/ кто есть Сей? И глагóлет к ним:/ Сей есть держáвный и си́льный,/ Сей есть си́льный в брáни,/ Сей есть вои́стинну Царь слáвы./ И почтó Емý червлéны ри́зы?/ Из Восóра прихóдит, éже есть плóти./ Ты же Сам я́ко Бог одеснýю сед вели́чествiя,/ послáл еси́ нам Дýха Святáго,// да настáвит и спасéт дýши нáша.
Стiх: Взы́де Бог в воскликновéнiи,/ Госпóдь во глáсе трýбне.
Вознéслся еси́ во слáве на горé Мáсличней Хрiстé Бóже,/ пред Твои́ми ученики́,/ и сел еси́ одеснýю Отцá,/ вся́ческая исполня́яй Божествóм,/ и послáл еси́ им Дýха Святáго,/ просвещáюща и утверждáюща,// и освящáюща дýши нáша.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Стiхúра: Взы́де Бог в воскликновéнiи,/ Госпóдь во глáсе трýбне,/ éже вознести́ пáдшiй óбраз Адáмов,/ и послáти Дýха Утéшителя,// éже освяти́ти дýши нáша.
Молитва святаго Симеона Богоприимца
Ны́не отпущáеши рабá Твоегó, Влады́ко,/ по глагóлу Твоемý, с ми́ром;/ я́ко ви́деста óчи моѝ спасéнiе Твоé,/ éже есѝ уготóвал пред лицéм всех людéй,/ свет во откровéнiе язы́ков,// и слáву людéй Твои́х Iзрáиля.
Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Ѻтцý и Сы́ну и Святóму Дýху, и ныне и при́сно и во вéки векóв, аминь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (трúжды)
Слáва Ѻтцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же есѝ на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя́, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстè, Сы́не Бóжiй, поми́луй нас. Ами́нь.
Тропáрь Вознесéнiя, глас 4: Вознéслся есѝ во слáве, Хрiстé Бóже наш,/ рáдость сотвори́вый ученикóм,/ обетовáнiем Святáго Дýха,/ извещéнным им бы́вшим благословéнiем,// я́ко Ты есѝ Сын Бóжiй, Избáвитель мíра. (Трúжды)
Бýди и҆́мя Госпóдне благословéно от ны́не и до вéка. (Трúжды)
Псалом 33
Благословлю́ Гóспода на вся́кое врéмя,/ вы́ну хвалá Егó во устéх мои́х./ О Гóсподе похвáлится душá моя́,/ да услы́шат крóтцыи и возвеселя́тся./ Возвели́чите Гóспода со мнóю,/ и вознесéм и҆́мя Егó вкýпе./ Взыскáх Гóспода и услы́ша мя,/ и от всех скорбéй мои́х избáви мя./ Приступи́те к Немý и просвети́теся,/ и лицá вáша не постыдя́тся./ Сей ни́щiй воззвá, и Госпóдь услы́ша и҆̀,/ и от всех скорбéй егó спасé и҆̀./ Ополчи́тся Áнгел Госпóдень óкрест боя́щихся Егó,/ и избáвит их./ Вкуси́те и ви́дите, я́ко благ Госпóдь;/ блажéн муж, и҆́же уповáет нань./ Бóйтеся Гóспода, вси святíи Егó,/ яко несть лишéнiя боя́щымся Егó./ Богáтiи обнищáша и взалкáша,/ взыскáющiи же Гóспода не лишáтся вся́каго блáга.[B приходской практитке пропускается]/ Прiиди́те, чáда, послýшайте менé,/ стрáху Госпóдню научý вас./ Кто есть человéк хотя́й живóт,/ любя́й дни ви́дети блáги;/ Удержѝ язык твой от зла,/ и устнé твоѝ, éже не глагóлати льсти./ Уклони́ся от зла и сотворѝ блáго,/ взыщѝ ми́ра, и поженѝ и҆̀./ Ѻ́чи Госпóдни на прáведныя,/ и ýши Егó в моли́тву их./ Лицé же Госпóдне на творя́щiя злáя,/ еже потреби́ти от землѝ пáмять их./ Воззвáша прáведнiи, и Госпóдь услы́ша их,/ и от всех скорбéй их избáви их./ Близ Госпóдь сокрушéнных сéрдцем,/ и смирéнныя дýхом спасéт./ Мнóги скóрби прáведным,/ и от всех их избáвит я́ Госпóдь./ Храни́т Госпóдь вся кóсти их,/ ни еди́на от них сокруши́тся./ Смерть грéшников лютá,/ и ненави́дящiи прáведнаго прегрешáт./ Избáвит Госпóдь дýши раб Своих,/ и не прегрешáт вси уповáющiи на Негó.
И глаголи ýтреню