НЕДЕЛЯ 5 по ПАСХЕ, о самаряныне, Глас 4. ВСЕНОЩНОЕ БДЕНИЕ. УТРЕНЯ.КАНОН. Служба мирским чином
14 мáя 2023 гóда. Недéля пя́тая по Пáсхе, о самаряны́не. Глас 4. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
[НЕПОРОЧНЫ]Избрáннiи стiхù из псалмá 118: (глас 5 всегдá): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоù воскрéсны, глас 4: Я́же Твоегó преслáвнаго востáнiя, предтéкша мvронóсицы,/ апóстолом проповéдаху Хрiстé,/ я́ко воскрéсл еси́ я́ко Бог,// подая́ мíрови вéлiю ми́лость.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступù// и спасù, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
И ны́не и прúсно и во вéки векóв. Амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне.
2 АНТИФОН
Воззвáх Тебé Гóсподи тéпле,/ из глубины́ душù моея́,/ и мне да бýдут на послушáнiе// Божéственная Твоя́ ушесá. (Двáжды)
На Гóспода надéжду всяк кто стяжáв,// вы́шшiй есть всех скорбя́щих. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнiю.
И ны́не и прúсно и во вéки векóв. Амúнь.
Святы́м Дýхом/ тóчатся благодáтныя струи́,/ напая́юща вся́ку тварь// ко оживлéнiю.
3 АНТИФОН
Сéрдце моé/ к Тебé, Слóве, да возвы́сится,/ и да ничтóже усладúт мя// от мiрскúх красóт на слáбость. (Двáжды)
К мáтери своéй/ я́коже и҆́мать кто любóвь,/ ко Гóсподу тéпльше// люблéнiем дóлжни есмы́. (Двáжды)
Слáва Ѻтцý и Сы́ну и Святóму Дýху.
Святы́м Дýхом/ боговéденiя богáтство,/ зрéнiя, и премýдрости:// вся бо в сем отéческая велéнiя слóво открывáет.
И ны́не и прúсно и во вéки векóв. Амúнь.
Святы́м Дýхом/ боговéденiя богáтство,/ зрéнiя, и премýдрости:// вся бо в сем отéческая велéнiя слóво открывáет.
ПРОКИМЕН
Чтец: Прокíмен, глас четвéртый, псалóм Давíдов. Воскресни́, Гóсподи, помози́ нам и избáви нас и́мене Твоегó рáди. (Пс.43:27)
Хор: Воскреснù, Гóсподи, помозù нам/ и избáви нас úмене Твоегó рáди.
Чтец: Бóже, уши́ма нáшима услы́шахом, и отцы́ нáши возвести́ша нам. (Пс.43:2А)
Хор: Воскреснù, Гóсподи, помозù нам/ и избáви нас úмене Твоегó рáди.
Чтец: Воскресни́, Гóсподи, помози́ нам.
Хор: И избáви нас úмене Твоегó рáди.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
Господи, поми́луй. (3раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ЕВАНГЕЛИЕ
Чтец: От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.63): Во врéмя óно, во еди́ну от суббóт, Марíя Магдали́на прiи́де заýтра, ещé сýщи тме, на гроб, и ви́де кáмень взят от грóба. Течé ýбо и прiи́де к Сíмону Петрý, и к другóму ученикý, егóже любля́ше Iисýс, и глагóла и́ма: взя́ша Гóспода от грóба, и не вем, где положи́ша Егó. Изы́де же Петр и другíй учени́к, и идя́ста ко грóбу. Течáста же óба вкýпе: и другíй учени́к течé скорéе Петрá, и прiи́де прéжде ко грóбу. И прини́к ви́де ри́зы лежáща, обáче не вни́де. Прiи́де же Сíмон Петр в след егó, и вни́де во гроб, и ви́де ри́зы еди́ны лежáща. И судáрь, и́же бе на главé Егó, не с ри́зами лежáщь, но осóбь свит на еди́ном мéсте. Тогдá ýбо вни́де и другíй учени́к, пришéдый прéжде ко грóбу, и ви́де, и вéрова. Не у бо вéдяху Писáнiя, я́ко подобáет Емý из мéртвых воскрéснути. Идóста же пáки к себé ученикá.
[Русский синодальный перевод]В то время, в первый же день недели, Мария Магдалина приходит ко гробу рано, когда было еще темно, и видит, что камень отвален от гроба. Итак, бежит и приходит к Симону Петру и к другому ученику, которого любил Иисус, и говорит им: унесли Господа из гроба, и не знаем, где положили Его. Тотчас вышел Петр и другой ученик, и пошли ко гробу. Они побежали оба вместе; но другой ученик бежал скорее Петра, и пришел ко гробу первый. И, наклонившись, увидел лежащие пелены; но не вошел во гроб. Вслед за ним приходит Симон Петр, и входит во гроб, и видит одни пелены лежащие, и плат, который был на главе Его, не с пеленами лежащий, но особо свитый на другом месте. Тогда вошел и другой ученик, прежде пришедший ко гробу, и увидел, и уверовал. Ибо они еще не знали из Писания, что Ему надлежало воскреснуть из мертвых. Итак ученики опять возвратились к себе.(Ин.20:1-10)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.(Трúжды)
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
глас 6: Моли́твами апóстолов,/ Ми́лостиве, очи́сти// мнóжество согрешéнiй нáших.
И҆ ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжество согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Воскрéс Iисýс от грóба,/ я́коже проречé,/ дадé нам живóт вéчный// и вéлiю ми́лость.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ПАСХИ, ГЛАС 1
(Канóн Пáсхи с Богорóдичнами, совмещéнный с канóном Преполовéнiя (2-й) глас 8, о самаряны́не, глас 4)
ПЕСНЬ 1
Iрмóс: Воскресéнiя день,/ просвети́мся, лю́дiе./ Пáсха, Госпóдня Пáсха:/ от смéрти бо к жизни,/ и от землѝ к небесѝ,/ Хрїстóс Бог нас преведé,// побéдную пою́щiя.(Двáжды)
Хор (припéв): Хрїстóс воскрéсе из мéртвых.
Чтец (тропáрь): Очи́стим чýвствiя, и ýзрим/ непристýпным свéтом/ Воскресéнiя, Хрїстá/ блистáющася,/ и рáдуйтеся, рекýща,/ я́сно да услы́шим,// побéдную пою́ще.
Хор (припéв): Хрїстóс воскрéсе из мéртвых.
Чтец (тропáрь): Небесá ýбо достóйно да веселя́тся,/ земля́ же да рáдуется,/ да прáзднует же мiр,/ ви́димый же весь и неви́димый:/ Хрїстóс бо востá,// весéлiе вéчное.
Хор: Пресвятáя Богорóдице, спасù нас.
Богорóдичен: Умерщвлéнiя предéл сломи́ла еси,/ вéчную жизнь рóждшая Хрїстá,/ из грóба возсiя́вшаго днесь,/ Дéво Всенепорóчная,// и мiр просвети́вшаго.
Хор: Пресвятáя Богорóдице, спасù нас.
Богорóдичен: Воскрéсшаго ви́девши Сына Твоегó и Бóга,/ рáдуйся со апóстолы Богоблагодáтная Чи́стая:/ и éже рáдуйся пéрвее,/ яко всех рáдости винá, воспрiя́ла еси,// Богомáти Всенепорóчная.
Канон Преполовения, глас 8
Хор: Слáва Тебé, Бóже наш, слáва Тебé.
Чтец: Язы́цы восплещи́те, еврéи восплáчите,/ животодáвец бо Хрїстóс, ýзы áдовы растóрже,/ и мéртвыя воскреси́, и недýги исцели́ слóвом:// Сей есть Бог наш, дáвый жизнь вéрующим во и́мя Егó.
Хор: Слáва Тебé, Бóже наш, слáва Тебé.
Чтец: Чýдо показáл еси́, вóду в винó прешéдшую,/ во Еги́пте рéки преложи́вый, Влады́ко, в кровь,/ и мéртвыя воскреси́л еси́, знáменiе сié вторóе скончáв./ Слáва, Спáсе, несказáнному Твоемý совéту:// слáва истощáнiю Твоемý, и́мже обнови́л еси́ нас.
Хор: Слáва Тебé, Бóже наш, слáва Тебé.
Чтец: Струя́ приснотекýщая сый, Гóсподи, жи́зни и́стинныя,/ Ты еси́ воскресéнiе нáше,/ хотя́ труди́лся еси́, Спáсе мой,/ и вóлею вжадáлся еси́, закóном естествá повинýяся,// и в Сихáрь шед плóтiю, воды́ проси́л еси́ у самаряны́ни пи́ти.
Хор: Пресвятáя Богорóдице, спасù нас.
Богорóдичен: Еди́на вмести́ла еси́ Зижди́теля Твоегó, Богороди́тельнице, во чрéве,/ и плóтiю родилá еси́ неизречéнно,/ и Дéва пребылá еси́, ничтóже дéвству оскверни́вшуся.// Сегó, Чи́стая, я́ко Сы́на Твоегó и Бóга непрестáнно моли́ о стáде Твоéм при́сно.
Канон цветной Триоди, о самаряныне, глас 4
Хор: Слáва Тебé, Бóже наш, слáва Тебé.
Чтец: Погребéнный востá, Собóю воздви́же род человéческiй:/ да рáдуется тварь вся,// и мы́сленнiи днесь óблацы да кропя́т прáвду я́ве.
Хор: Слáва Тебé, Бóже наш, слáва Тебé.
Самаряны́ни: Покрывáяй водáми превы́спренняя Гóсподи, водá жи́зни сый,/ самаряны́ни, прося́щей твоея́ честны́я воды́,// подáл еси́ разумѣ́вшей благоутрóбiе твоé.
Слáва Отцý и Сыну и Святóму Дýху.
Трóичен: О Трóице, вéрою Тя чи́стою слáвящих,/ Ѻ́тче, Сы́не и Дýше,/ я́ко Творéц всех спасáй,// и очищéнiе дáруй нам грехóв, я́ко Преблагíй.
И ныне и прúсно и во вéки векóв. Аминь.
Богорóдичен: Рáдуйся, престóле óгненный./ Рáдуйся, свéщниче всезлаты́й./ Рáдуйся, Свéта óблаче./ Рáдуйся, палáто Слóва, и ýмная трапéзо,// хлеб жи́зни достóйно Хрїстá носи́вшая.
Катавáсiя: Воскресéнiя день,/ просвети́мся, лю́дiе./ Пáсха, Госпóдня Пáсха:/ от смéрти бо к жизни,/ и от землѝ к небесѝ,/ Хрїстóс Бог нас преведé,// побéдную пою́щiя.
ПЕСНЬ 3
Iрмóс: Прiиди́те, пи́во пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одожди́вша Хрїстá,// в Нéмже утверждáемся. (Двáжды)
Хор: Хрїстóс воскрéсе из мéртвых.
Чтец: Ныне вся испóлнишася свéта,/ нéбо же и земля́, и преиспóдняя:/ да прáзднует ýбо вся тварь/ востáнiе Хрїстóво,// в нéмже утверждáется.
Хор: Хрїстóс воскрéсе из мéртвых.
Чтец: Вчерá спогребóхся Тебé Хрїстé,/ совостаю́ днесь/ воскрéсшу Тебé,/ сраспинáхся Тебé вчерá,// Сам мя спрослáви Спáсе во Цáрствiи Твоéм.
Хор: Пресвятáя Богорóдице, спасù нас.
Богорóдичен: На нетлéнную жизнь прихождý днесь/ блáгостiю рóждшагося из Тебé, Чи́стая,// и всем концéм свет облистáвшаго.
Хор: Пресвятáя Богорóдице, спасù нас.
Богорóдичен: Бóга, Егóже родилá еси́ плóтiю,/ из мéртвых, я́коже речé,/ востáвша ви́девши, Чи́стая, ликýй,// и Сегó я́ко Бóга Пречи́стая возвеличáй.
Глас 8
Хор: Слáва Тебé, Бóже наш, слáва Тебé.
Чтец: Не и́же на лицé суд суди́те, iудéе, учá глагóлаше Влады́ка,/ егдá прiи́де во святи́лище, я́коже пи́сано есть,// преполови́вшуся закóнному прáзднику.
Хор: Слáва Тебé, Бóже наш, слáва Тебé.
Чтец: Не и́же на лицé суд суди́те, iудéе:/ Хрїстóс бо прiи́де,// Егóже нарицáху прорóцы от Сióна грядýща и мир взывáюща.
Хор: Слáва Тебé, Бóже наш, слáва Тебé.
Чтец: Áще и словесéм не вéруете, iудéе, делóм вéруйте Влады́ки:/ что прельщáетеся, отметáющеся Святáго,// Егóже написá в закóне Моисéй?
Хор: Пресвятáя Богорóдице, спасù нас.
Богорóдичен: Еди́н от Трóицы сый быв, плоть ви́делся еси́,/ не прелóжь, Гóсподи, существá,/ нижé опали́в Рóждшiя нетлéнное чрéво,// Бог сый весь и огнь.
Глас 4
Хор: Слáва Тебé, Бóже наш, слáва Тебé.
Чтец: Вóлею на дрéво вознéслся еси́ слóве,/ и зря́щее распадáхуся кáменiе, и тварь преклоня́шеся вся́,// и мéртвiи из гробóв, я́коже от сна востáху.
Хор: Слáва Тебé, Бóже наш, слáва Тебé.
Самаряны́ни: Жизнь сый, Гóсподи, и истóчник безсмéртiя,/ сел еси́ при истóчнице, Щéдре,// и Твои́х премýдрых вод испóлнил еси́ самаряны́ню прося́щую, и пою́щую Тя.
Слáва Отцý и Сыну и Святóму Дýху.
Трóичен: Еди́н над всéми в Трóице Бог поéтся,/ Отéц и Сын и Божéственный Дух,/ Егóже стрáхом слáвят небéснiи чи́нове, я́сно вопiю́ще:// Свят, Свят, Свят еси́ Гóсподи.
И ныне и прúсно и во вéки векóв. Амúнь.
Богорóдичен: Несказáнно зачéнши во утрóбе Твоéй всех Бóга, Дéво Мáти,/ пáче мы́сли и слóва родилá еси́,// пребы́вши Дéва я́ко прéжде рождествá, Богоневéсто.
Катавáсiя: Прiиди́те, пи́во пiéм нóвое,/ не от кáмене неплóдна чудодéемое,/ но нетлéнiя истóчник/ из грóба одожди́вша Хрїстá,// в Нéмже утверждáемся.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк Преполовéнiя, глас 4: Прáзднику закóнному преполовля́ющуся,/ всех Твóрче и Влады́ко,/ к предстоя́щим глагóлал еси́, Хрїстé Бóже:/ прiиди́те и почерпи́те вóду безсмéртiя./ Тéмже Тебé припáдаем и вéрно вопiéм:/ щедрóты Твоя́ дáруй нам,// Ты бо еси́ Истóчник жи́зни нáшея.
Íкос: Оляденéвшую мою́ дýшу прегрешéнiй беззакóньми,/ течéньми Твои́х кровéй напóй,/ и покажи́ плодонóсну добродéтельми:/ Ты бо рекл еси́ всем, éже приходи́ти к Тебé, Слóве Бóжiй Всесвяты́й,/ и вóду нетлéнiя почерпáти, живýю же и очищáющую грехи́,/ пою́щих слáвное и Божéственное Твоé востáнiе,/ подая́, Благíй, с высоты́ сшéдшую вои́стинну ученикóм Твои́м Дýха крéпость,/ Тебé Бóга вéдущим:// Ты бо еси́ истóчник жи́зни нáшея.
Седáлен Трióди (самаряны́ни), глaс 4: Да рáдуется Нéбо, да ликовствýют земнáя,/ я́ко Хрїстóс от Дéвы яви́вся я́ко Человéк,/ избáви из истлéнiя все человéчество Своéю смéртiю:/ чудесы́ же возсiя́вый женé самаряны́не воды́ прося́щей,// подаéт истóчник исцелéнiй, я́ко еди́н безсмéртен.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Седáлен Преполовéнiя, глaс 4: Премýдрости подáтелю и Влады́ко,/ прáзднику закóнному предстáл еси́,/ во святи́лищи сед учи́л еси́, глагóля си́це всем:/ гряди́те, жáждущiи, пíйте вóду, ю́же Аз ны́не подаю́,// éюже жи́зни от Бóга и пи́щи наслади́теся вси человéцы.
ПЕСНЬ 4
Iрмóс: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Áнгела,/ я́сно глагóлюща:/ днесь спасéнiе мíру,/ я́ко воскрéсе Хрїстóс,// я́ко всеси́лен.(Двáжды)
Хор: Хрїстóс воскрéсе из мéртвых.
Чтец: Мýжескiй ýбо пол,/ я́ко развéрзый дéвственную утрóбу,/ яви́ся Хрїстóс:/ я́ко человéк же,/ Áгнец наречéся:/ непорóчен же,/ яко невкýсен сквéрны,/ нáша Пáсха,/ и я́ко Бог и́стинен// совершéн речéся.
Хор: Хрїстóс воскрéсе из мéртвых.
Чтец: Яко единолéтный áгнец,/ благословéнный нам венéц Хрїстóс,/ вóлею за всех заклáн бысть,/ Пáсха чисти́тельная,/ и пáки из грóба крáсное// прáвды нам возсiя́ Сóлнце.
Хор: Пресвятáя Богорóдице, спасù нас.
Богорóдичен: Создáвый Адáма, Твоегó прáотца, Чи́стая,/ зи́ждется от Тебé,/ и смéртное жили́ще разори́ Своéю смéртiю днесь,/ и озари́ вся// божéственными блистáньми воскресéнiя.
Хор: Пресвятáя Богорóдице, спасù нас.
Богорóдичен: Егóже родилá еси́ Хрїстá,/ прекрáсно из мéртвых возсiя́вша, Чи́стая, зря́щи,/ дóбрая и непорóчная в женáх и крáсная,/ днесь во спасéнiе всех,// со апóстолы рáдующися, Тогó прославля́й.
Глас 8
Хор: Слáва Тебé, Бóже наш, слáва Тебé.
Чтец: Áще мессíи подобáет прiити́,/ Мессíа же Хрїстóс есть, беззакóннiи, что не вéруете Емý?/ Се прiи́де, и свидéтельствует, я́же Той твори́т:// вóду винó сотвори́, разслáбленнаго слóвом стягнý.
Хор: Слáва Тебé, Бóже наш, слáва Тебé.
Чтец: Не разумéюще писáнiй, прельщáетеся вси вы, еврéи беззакóннiи:/ вои́стинну бо прiи́де Хрїстóс, и всех просвети́,/ и в вас показá мнóгая знáменiя и чудесá,// и всýе отрицáетеся и́стиннаго животá.
Хор: Слáва Тебé, Бóже наш, слáва Тебé.
Чтец: Еди́но дéло показáх вам, и вси ужé диви́теся, взывáше iудéем Хрїстóс./ Вы обрéзуете и в суббóту человéка, речé,/ Менé же что оклеветáете прóчее,// воздви́гшаго слóвом разслáбленнаго?
Хор: Слáва Тебé, Бóже наш, слáва Тебé.
Чтец: Делá сотвори́х мнóгая, и кóего рáди дéла кáменiем бiетé Мя?/ Iудéем Хрїстóс, обличáя, взывáше:/ едá занé человéка здрáва всегó слóвом сотвори́х,// не суди́те на лицé человéцы.
Глас 4
Хор: Слáва Тебé, Бóже наш, слáва Тебé.
Чтец: Небесá да веселя́тся, да прáзднует тварь вся,// востá Госпóдь, и яви́ся всем премýдрым апóстолом Свои́м.
Хор: Слáва Тебé, Бóже наш, слáва Тебé.
Самаряны́ни: Самаряны́ни, Гóсподи, проси́вшей подáл еси́ вóду, вéденiе держáвы Твоея́:// тéмже во вéки не вжáждет воспевáющи Тя.
Слáва Отцý и Сыну и Святóму Дýху.
Трóичен: О Трóице пресýщная,/ Ѻ́тче, и Слóве, и Божéственный Дýше,/ единоси́льне, собезначáльне!// Спаси́ нас всех, вéрою воспевáющих Тя.
И ныне и прúсно и во вéки векóв. Амúнь.
Богорóдичен: Неопали́мую купинý Тя законоположи́тель зря́ше дрéвле,/ Данiи́л же гóру святýю смотря́ше,// еди́на Дéво Мáти Влады́чице.
Катавáсiя: На Божéственней стрáжи/ богоглагóливый Аввакýм/ да стáнет с нáми, и покáжет/ светонóсна Áнгела,/ я́сно глагóлюща:/ днесь спасéнiе мíру,/ я́ко воскрéсе Хрїстóс,// я́ко всеси́лен.
ПЕСНЬ 5
Iрмóс: Утренюем ýтреннюю глубокý,/ и вмéсто ми́ра песнь принесéм Влады́це,/ и Хрїстá ýзрим/ прáвды Сóлнце,// всем жизнь возсiя́юща.(Двáжды)
Хор: Хрїстóс воскрéсе из мéртвых.
Чтец: Безмéрное Твоé благоутрóбiе,/ áдовыми ýзами содержи́мiи зря́ще,/ к свéту идя́ху Хрїстé,/ весéлыми ногáми,// Пáсху хвáляще вéчную.
Хор: Хрїстóс воскрéсе из мéртвых.
Чтец: Пристýпим свещенóснiи,/ исходя́щу Хрїстý из грóба, я́ко женихý,/ и спрáзднуем любопрáзднственными чи́нми// Пáсху Бóжiю спаси́тельную.
Хор: Пресвятáя Богорóдице, спасù нас.
Богорóдичен: Просвещáется божéственными лучáми и живонóсными/ воскресéнiя Сы́на Твоегó,/ Богомáти Пречи́стая,// и рáдости исполня́ется благочести́вых собрáнiе.
Хор: Пресвятáя Богорóдице, спасù нас.
Богорóдичен: Не развéрзл еси́ вратá дéвства в воплощéнiи,/ грóба не разруши́л еси́ печáтей, Царю́ создáнiя:// отонýдуже воскрéсшаго Тя зря́щи, Мáти, рáдовашеся.
Глас 8
Хор: Слáва Тебé, Бóже наш, слáва Тебé.
Чтец: Чудесы́ украси́л еси́ апóстолы Твоя́,/ дивесы́ возвели́чил еси́ ученики́,// во всем ми́ре прослáвил, Спáсе наш, и дав им Цáрствiе Твоé.
Хор: Слáва Тебé, Бóже наш, слáва Тебé.
Чтец: Вся просвети́ша земли́ концы́ ученицы́, чудесы́ и учéньми,// и разли́чными óбразы слóво проповéдавше, Хрїстé Спáсе, Цáрствiя Твоегó.
Хор: Слáва Тебé, Бóже наш, слáва Тебé.
Чтец: Хвалý возсылáем Цáрствiю Твоемý, пéнiе же Тебé принóсим,// нас рáди на земли́ яви́вшемуся, и мир просвети́вшему, и Адáма воззвáвшему.
Хор: Пресвятáя Богорóдице, спасù нас.
Богорóдичен: Бысть чрéво Твоé святáя трапéза, имýщая небéсный хлеб,/ от негóже всяк яды́й не умирáет,// я́коже речé всех, Богороди́тельнице, Питáтель.
Глас 4
Хор: Слáва Тебé, Бóже наш, слáва Тебé.
Чтец: Смерть умертви́ся, ад плени́ся,/ сýщiи во ýзах свободи́шася Хрїстóвым Воскресéнiем,// возрáдуимся и рукáми восплéщим, прáзднующе свéтло.
Хор: Слáва Тебé, Бóже наш, слáва Тебé.
Самаряны́ни: Истóчник сый, Гóсподи, жи́зни,/ вóду оставлéнiя и разумéнiя даровáл еси́,/ женé проси́вшей дрéвле, самаряны́не.// Тéмже воспевáем неизречéнныя щедрóты Твоя́.
Слáва Отцý и Сыну и Святóму Дýху.
Трóичен: Еди́ницу трiипостáсную, Трóицу единосýщную,/ Отцá, Слóва, и Дýха Святáго,/ нераздéльна Естествóм Бóга еди́наго почитáем,// Творцá и Гóспода и Влады́ку всех.
И ныне и прúсно и во вéки векóв. Амúнь.
Богорóдичен: Тя, дверь непроходи́мую, и селó невоздéланное/ и ковчéг, мáнну нося́щiй, и рýчку, и свéщник,// и кади́льницу невещéственнаго ýгля именýем, Чи́стая.
Катавáсiя: Утренюем ýтреннюю глубокý,/ и вмéсто ми́ра песнь принесéм Влады́це,/ и Хрїстá ýзрим/ прáвды Сóлнце,// всем жизнь возсiя́юща.
ПЕСНЬ 6
Iрмóс: Снизшéл есѝ в преиспóдняя землѝ,/ и сокрушил еси вереѝ вéчныя,/ содержáщiя свя́занныя, Хрїстé,/ и триднéвен, яко от ки́та Ióна,// воскрéсл есѝ от грóба. (Двáжды)
Хор: Хрїстóс воскрéсе из мéртвых.
Чтец: Сохрани́в цéла знáменiя Хрїстé,/ воскрéсл еси от грóба,/ ключѝ Дéвы не вреди́вый в рождествé Твоéм,// и отвéрзл еси нам рáйскiя двéри.
Хор: Хрїстóс воскрéсе из мéртвых.
Чтец: Спáсе мой,/ живóе же и нежéртвенное заколéнiе,/ яко Бог Сам Себé/ вóлею привéл Отцý,/ совоскреси́л еси всерóднаго Адáма,// воскрéс от грóба.
Хор: Пресвятáя Богорóдице, спасù нас.
Богорóдичен: Возведéся дрéвле держи́мое смéртiю и тлéнiем,/ воплоти́вшимся от Твоегó пречи́стаго чрéва,/ к нетлéнней и присносýщней жи́зни,// Богорóдице Дéво.
Хор: Пресвятáя Богорóдице, спасù нас.
Богорóдичен: Сни́де в преиспóдняя земли́,/ в ложеснá Твоя́, Чи́стая, сшéдый,/ и всели́выйся и воплоти́выйся пáче умá,/ и воздви́же с Собóю Адáма,// воскрéс от грóба.
Глас 8
Хор: Слáва Тебé, Бóже наш, слáва Тебé.
Чтец: Вся содержáй концы́, возшéл еси́, Iисýсе,/ и учи́л еси́ во святи́лищи нарóды слóву и́стины,// прáзднику преполови́вшуся, я́коже Iоáнн вопiéт.
Хор: Слáва Тебé, Бóже наш, слáва Тебé.
Чтец: Дéло О́тчее соверши́л еси́,/ дéлы увéрил еси́ словесá Твоя́,/ исцелéнiя совершáя Спáсе, и знáменiя,// разслáбленнаго исправля́я, прокажéнныя очищáя, и мéртвыя воскрешáя.
Хор: Слáва Тебé, Бóже наш, слáва Тебé.
Чтец: Безначáльный Сын начáло бысть прiéм,/ éже по нам вочеловéчися,/ и посредé прáздника учáше, глагóля:// притецы́те ко истóчнику приснотекýщему, жизнь почерпи́те.
Хор: Пресвятáя Богорóдице, спасù нас.
Богорóдичен: Дéву по рождествé поéм Тя,/ Дéву и Мáтерь слáвим Тебé еди́ну,/ Чи́стая Богоневéсто Отрокови́це,// из Тебé бо вои́стинну Бог воплоти́ся, обнови́в нас.
Глас 4
Хор: Слáва Тебé, Бóже наш, слáва Тебé.
Чтец: Что плáчете; что нóсите я́ко смéртному жены́ ми́ра?/ Востá Хрїстóс,/ вопiя́ше дрéвле блистáяйся вельми́, явлéйся ю́ноша,/ тщи плащани́цы остáвив:// шéдше возвести́те другóм Егó востáнiе.
Хор: Слáва Тебé, Бóже наш, слáва Тебé.
Самаряны́ни: Струя́ сый, Гóсподи, жи́зни незави́стная,/ и бéздна ми́лости, Блáже,/ путешéствовав седи́ши близ клáдязя кля́твеннаго,/ и самаряны́ни вопiя́л еси́:// даждь Ми вóду пи́ти, я́ко да прiи́меши оставлéнiя вóды.
Слáва Отцý и Сыну и Святóму Дýху.
Трóичен: Пою́ Отцá безначáльна, и Сы́на сопрестóльна, и Дýха единосýщна вéрно,/ еди́но Существó, и Естествó и слáву,/ и еди́но Цáрство Бóга всех и Творцá,// Содержи́теля всегó, со безплóтными си́лами.
И ныне и прúсно и во вéки векóв. Амúнь.
Богорóдичен: Дéву, еди́ну рóждшую, и утрóбу нетлéнну соблю́дшу поéм Тя, Чи́стая,/ престóл Госпóдень, и дверь, и гóру, и мы́сленный свéщник,/ чертóг всесвéтлый Бóжiй, и сень слáвы я́ве,// ковчéг же и рýчку и трапéзу.
Катавáсія: Снизшéл есѝ в преиспóдняя землѝ,/ и сокрушил есѝ вереѝ вéчныя,/ содержáщiя свя́занныя, Хрїстé,/ и триднéвен, яко от ки́та Ióна,// воскрéсл есѝ от грóба.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и при́сно и во вéки векóв, аминь.
Кондáк прáздника Тріóди (самаряны́ни) глас 8: Вéрою пришéдшая на клáдязь самаряны́ня,/ ви́де Тя премýдрости вóду,/ éюже напои́вшися оби́льно,// Цáрствiе вы́шнее наслéдова вéчно, я́ко приснослáвная.
Íкос: Чи́стая тáинства услы́шим, Iоáнну нас учáщу, в Самарíи бы́вшая:/ кáко женé бесéдоваше Госпóдь, вóду проси́в,/ И҆́же вóды в сóнмища их собрáвый,/ И҆́же Отцý и Дýху сопрестóльный:/ прiи́де бо ищáй óбраз Свой,// вéчно я́ко приснослáвный.
ПЕСНЬ 7
Iрмóс: Ѻ́троки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачи́т благолéпiе,/ Еди́н благословéн// отцéв Бог, и препрослáвлен. (Двáжды)
Хор: Хрїстóс воскрéсе из мéртвых.
Чтец: Жены́ с ми́ры богомýдрыя в след Тебé течáху:/ Егóже, я́ко мéртва, со слезáми искáху,/ поклони́шася рáдующiяся Живóму Бóгу,/ и Пáсху тáйную// Твои́м, Хрiстé, ученикóм благовести́ша.
Хор: Хрїстóс воскрéсе из мéртвых.
Чтец: Смéрти прáзднуем умерщвлéнiе,/ áдово разрушéнiе,/ инóго житiя́ вéчнаго начáло,/ и игрáюще поéм Винóвнаго,/ Еди́наго благословéннаго// отцéв Бóга, и препрослáвленнаго.
Хор: Пресвятáя Богорóдице, спасù нас.
Богорóдичен: Умертви́в Сын Твой смерть, Всенепорóчная, днесь,/ всем смéртным пребывáющiй живóт/ во вéки векóв даровá,/ еди́н благословéнный// отцéв Бог и препрослáвленный.
Хор: Пресвятáя Богорóдице, спасù нас.
Богорóдичен: Всем цáрствуяй создáнiем, быв человéк,/ всели́ся в Твою́, Богоблагодáтная, утрóбу,/ и распя́тiе претерпéв и смерть,/ воскрéсе боголéпно,// совозстáвив нас я́ко всеси́лен.
Глас 8
Хор: Слáва Тебé, Бóже наш, слáва Тебé.
Чтец: Плóтски потруди́лся еси́, упокоéнiе всех,/ вóлею вжадáлся еси́, истóчниче чудéс,// воды́ проси́л еси́, вóду жи́зни, Iисýсе, возвещáяй.
Хор: Слáва Тебé, Бóже наш, слáва Тебé.
Чтец: Самаряны́ни, Гóсподи, женé бесéдовал еси́,/ обличáя безýмiе беззакóнных еврéев,// онá ýбо вéрова Сы́на бы́ти Бóжiя, сíи же отвергóшася.
Хор: Слáва Тебé, Бóже наш, слáва Тебé.
Чтец: Хлеб ядýще Плóти Госпóдни,/ и Кровь прiéмлюще ребрá Влады́чня,// обновлéнiем Дýха да жи́тельствуим, живýще благодáтiю.
Хор: Пресвятáя Богорóдице, спасù нас.
Богорóдичен: Во чрéве Твоéм вмести́ла еси́ невмести́мое Слóво,/ от Твои́х сосéц дои́ла еси́ мíру Питáтеля,/ на объя́тiи носи́ла еси́ Содержи́теля нáшего, Богороди́тельнице Чи́стая.
Глас 4
Хор: Слáва Тебé, Бóже наш, слáва Тебé.
Чтец: Со беззакóнными, Хрїстé Щéдре, вóлею вмени́лся еси́, во врéмя божéственныя стрáсти,/ и сiя́ ви́дящи, колебáшеся земля́,/ и кáменiе вседéтельным мановéнiем распадáшеся непостижи́ме,// и востáша мéртвiи и́же от вéка.
Хор: Слáва Тебé, Бóже наш, слáва Тебé.
Самаряны́ни: Водá еси́ жи́зни, вопiя́ше Хрїстý самаряны́ня:/ напóй мя ýбo слóве жáждущую всегдá твоея́ божéственныя благодáти,/ я́кo да не ктомý, Iисýсе Гóсподи, невѣ́дѣнiя содержýся знóем,// но проповѣ́дую твоя́ вели́чiя.
Слáва Отцý и Сыну и Святóму Дýху.
Трóичен: Отцá, и Сы́на, и Божéственнаго воспевáем Дýха,/ нераздéльную Трóицу Естествóм сýщую,/ разделéнну Ли́цы, еди́но существó,/ срáсленное, безначáльное, Творцá всех, Бóга:// Егóже вси небéснiи пою́т чи́нове.
И ныне и прúсно и во вéки векóв. Амúнь.
Богорóдичен: По рождествé стрáшнем, Дéва чистá сохрани́лася еси́, святáя Богорóдице:/ тéмже Тя вси áнгельстiи ли́цы, и человéчестiи рóди вси,// немóлчными воспевáют глáсы, вмести́лище чи́стое Невмести́маго.
Катавáсія: Ѻ́троки от пéщи избáвивый,/ быв Человéк,/ стрáждет яко смéртен,/ и стрáстiю смéртное,/ в нетлéнiя облачи́т благолéпiе,/ Еди́н благословéн// отцéв Бог, и препрослáвлен.
ПЕСНЬ 8
Iрмóс: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрїстá во вéки. (Двáжды)
Хор: Хрїстóс воскрéсе из мéртвых.
Чтец: Прiиди́те, нóваго виногрáда рождéнiя,/ Божéственнаго весéлiя,/ в нарóчитом дни Воскресéнiя,/ Цáрствiя Хрїстóва приобщи́мся,/ пою́ще Егó// яко Бóга во вéки.
Хор: Хрїстóс воскрéсе из мéртвых.
Чтец: Возведи óкрест óчи твои, Сióне, и виждь:/ се бо прiидóша к тебé,/ яко богосвéтлая свети́ла,/ от зáпада, и сéвера, и мóря,/ и востóка чáда твоя́,// в тебé благословя́щая Хрїстá во вéки.
Хор: Пресвятáя Богорóдице, спасù нас.
Богорóдичен: Прiи́де Тобóю в мiр Госпóдь, Дéво Богорóдице,/ и чрéво áдово растóрг,/ смéртным нам воскресéнiе даровá:// Тéмже благослови́м Егó во вéки.
Хор: Пресвятáя Богорóдице, спасù нас.
Богорóдичен: Всю низложи́в смéрти держáву Сын Твой, Дéво,/ Свои́м воскресéнiем,/ я́ко Бог крéпкiй совознесé нас и обожи́:// тéмже воспевáем Егó во вéки.
Продолженiе здесь