НЕДЕЛЯ 5 по ПАСХЕ, о самаряныне, Глас 4. ВСЕНОЩНОЕ БДЕНИЕ. УТРЕНЯ (окончание) ЧАС ПЕРВЫЙ
14 мáя 2023 гóда. Недéля пя́тая по Пáсхе, о самаряны́не. Глас 4. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 8
Хор: Слáва Тебé, Бóже наш, слáва Тебé.
Чтец: Прiиди́те ви́дите, лю́дiе, на престóле слáвы воспевáемаго,/ от людéй беззакóнных хýлимаго,// и ви́дяще пóйте во прорóцех Мессíю предречéннаго.
Хор: Слáва Тебé, Бóже наш, слáва Тебé.
Чтец: Ты еси́ вои́стинну Хрiстóс, в мир сей пришéдый,/ из Негóже спасéнiе и оставлéнiе отéческих согрешéнiй:// Ты еси́ вои́стинну живóт, в Тя вéровавшим.
Хор: Слáва Тебé, Бóже наш, слáва Тебé.
Чтец: Премýдрость Бóжiя, преполови́вшуся прáзднику, я́коже пи́сано есть,/ во святи́лищи предстá и учáше,// я́ко вои́стинну Сей бя́ше Мессíа Хрiстóс, И́мже спасéнiе.
Хор: Пресвятáя Богорóдице, спасù нас.
Богорóдичен: Кáко родилá еси́, рцы, от Отцá безлéтно просiя́вшаго,/ и со Святы́м Дýхом воспевáемаго?// Или́ я́ко весть еди́н благоволи́вый из Тебé роди́тися, Богорóдице.
Глас 4
Хор: Слáва Тебé, Бóже наш, слáва Тебé.
Чтец: Смерть претерпѣ́л еси́, еди́не безсмéртне вóлею, áда плѣни́л еси́, вратá мѣ́дная стерл еси́ Царю́ небéсный, и отъя́л еси́ ýзники от вѣ́ка тáмо сýщыя, воспѣвáющыя держáву непрестáнно твоея́ блáгости.
Хор: Слáва Тебé, Бóже наш, слáва Тебé.
Самаряны́ни: Близ сел еси́ истóчника, в час Спáсе шесты́й,/ и самаряны́ни вóду живýю пóдал еси́,/ и рáзума воды́ за мнóгое благоутрóбiе./ С нéюже вси вопiéм, воспевáюще:// благослови́те, делá Госпóдня, непрестáнно Гóспода.
Благословúм Отцá, и Сы́на, и Святáго Дýха, Гóспода.
Трóичен: Отцá безначáльна, Сы́на собезначáльна поéм, и Дýха Святáго,/ Бóга еди́наго трóе, неслiя́нна, непресекóма, Содéтеля всех,/ единоси́льную держáву, самовлáстную, и вопiéм:// благослови́те, делá Госпóдня, непрестáнно Гóспода.
И ны́не и прúсно и во вéки векóв. Амúнь.
Богорóдичен: У́глем очищáется Исáiа,/ предпроповéдуя мы́сленнаго ýгля,/ воплощáема, Дéво, из Тебé пáче мы́сли,/ опаля́юща человéков вся вéщныя грехи́,// и обожáюща за милосéрдiе естествó нáше, Всенепорóчная.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсія: Сей наречéнный и святы́й день,/ Еди́н суббóт Царь и Госпóдь,/ прáздников прáздник/ и торжествó есть торжéств,// вóньже благослови́м Хрiстá во вéки.
ПЕСНЬ 9
Iрмóс: Свети́ся, свети́ся,/ нóвый Iерусали́ме:/ слáва бо Госпóдня/ на тебé возсiя́./ Ликýй ны́не/ и весели́ся, Сióне./ Ты же, Чи́стая, красýйся, Богорóдице,// о востáнiи Рождествá Твоегó. (Двáжды)
Хор: Хрїстóс воскрéсе из мéртвых.
Чтец: О Божéственнаго, о любéзнаго,/ о сладчáйшаго Твоегó глáса!/ С нáми бо нелóжно/ обещáлся еси бы́ти,/ до скончáнiя вéка Хрїстé:/ Егóже, вéрнiи,// утверждéнiе надéжди имýще, рáдуемся.
Хор: Хрїстóс воскрéсе из мéртвых.
Чтец: О Пáсха вéлiя и свящéннейшая, Хрїстé!/ О мýдросте, и Слóве Бóжiй, и си́ло!/ Подавáй нам и́стее Тебé причащáтися,// в невечéрнем дни Цáрствiя Твоегó.
Хор: Пресвятáя Богорóдице, спасù нас.
Богорóдичен: Соглáсно, Дéво, Тебé блажи́м вéрнiи:/ рáдуйся, двéре Госпóдня:/ рáдуйся, грáде одушевлéнный:/ рáдуйся, Ея́же рáди нам ны́не возсiя́ свет,// из Тебé Рождéннаго из мéртвых Воскресéнiя.
Хор: Пресвятáя Богорóдице, спасù нас.
Богорóдичен: Весели́ся и рáдуйся божéственная двéре Свéта:/ зашéдый бо Iисýс во гроб возсiя́,/ просiя́в сóлнца светлéе,/ и вéрныя вся озари́в,// Богорáдованная Влады́чице.
Глас 8
Хор: Слáва Тебé, Бóже наш, слáва Тебé.
Чтец: Пра́зднику преполовля́ющуся иуде́йскому,/ возше́л еси́, Спа́се мой, во святи́лище Твое́, и науча́л еси́ всех:// чудя́хуся же иуде́е, и отку́ду Сей весть пи́смена не научи́вся, глаго́лаху.
Хор: Слáва Тебé, Бóже наш, слáва Тебé.
Чтец: Исцеле́ния дарова́ний Изба́витель мой источа́я,/ сотворя́ше чудеса́ и зна́мения,/ прогоня́ неду́ги, целя́ немощству́ющия:// но иуде́и беснова́хуся мно́жеством чуде́с Его́.
Хор: Слáва Тебé, Бóже наш, слáва Тебé.
Чтец: Пло́тский иуде́й по пло́ти разумева́яй,/ помышля́яй пи́санная, Писа́нием претыка́ется,/ проти́ву па́дает же па́ки Ду́хом и́стины:// мы же сие́ отри́нувше, му́дрствуим духо́вная.
Хор: Пресвятáя Богорóдице, спасù нас.
Богорóдичен: Вмести́ла еси́ во чре́ве Твое́м, Де́во Ма́ти,/ еди́наго от Тро́ицы Хрiста́ Жизнода́вца,/ Его́же пое́т вся тварь, и трепе́щут го́рнии престо́ли:// Того́ моли́, Всеблаже́нная, спасти́ ду́ши на́ша.
Глас 4
Хор: Слáва Тебé, Бóже наш, слáва Тебé.
Чтец: Красéн из грóба, я́ко Жени́х от чертóга изшéл еси́,/ смéрти разори́вый мучи́тельство, Хрiстé,/ и áдовы вереи́ сокруши́вый си́лою Божéственною,// и востáнiя Твоегó, свéтом у́мным просвети́вый мiр.
Хор: Слáва Тебé, Бóже наш, слáва Тебé.
Самаряны́ни: Жизнь живу́щих, истóчник благи́х Госпóдь,/ богáтно источáяй вóду учéнiй, вопiéт женé:/ подáждь Ми вóду пи́ти, я́ко да подáм ти вóду,// грехóв твои́х истóчники изсушáющую.
Слáва Отцý и Сыну и Святóму Дýху.
Трóичен: Свет еди́н нераздéльно, трисóлнечная Еди́ница,/ безначáльный Отéц, Сын, и Дух, Божествó еди́но,/ Жизнь и всех Творéц./ Тогó воспои́м вéрнiи со безплóтными,// трисвяты́ми пéсньми священнослóвяще.
И ныне и прúсно и во вéки векóв. Амúнь.
Богорóдичен: Свéту бы́вши жили́ще, Чи́стая,/ озари́ зéницы души́ моея́,/ омрачéнныя мнóгими козньми́ врагá,/ и ви́дети сподóби я́сно от Тебé возсiя́вшiй Свет// пáче мы́сли, чи́стым сéрдцем.
Катавáсiя: Свети́ся, свети́ся,/ нóвый Iерусали́ме:/ слáва бо Госпóдня/ на тебé возсiя́./ Ликýй ны́не/ и весели́ся, Сióне./ Ты же, Чи́стая, красýйся, Богорóдице,// о востáнiи Рождествá Твоегó.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостилáрiй: Плóтiю уснýв,/ яко мертв,/ Царю́ и Гóсподи,/ триднéвен воскрéсл еси,/ Адáма воздви́г от тли,/ и упраздни́в смерть:/ Пáсха нетлéнiя,// ми́ра спасéнiе.
Слáва Ѻтцý и Сы́ну и Святóму Дýху.
Светúлен Трióди (Самаряны́ни): В Самарíю пришéл еси́, Спáсе мой Всеси́льне,/ и женé бесéдовав проси́л еси́ воды́ пи́ти,/ еврéем вóды источи́вый из кáмене несекóмаго,/ ю́же к вéре совоспрiя́л еси́,// и ны́не жи́зни наслаждáется на небесéх вéчно.
И ны́не и прúсно и во вéки векóв. Амúнь.
Светúлен Преполовéнiя: Преполови́вшуся пришéл еси́ прáзднику, Человеколю́бче во святи́лище, и глагóлал еси́:/ жáжды испóлненнiи, ко Мне прiиди́те,/ и почерпи́те вóду живу́ю и питáющую.// Éюже пи́щи, и благодáти, жи́зни же безсмéртныя наслади́теся вси.
ХВАЛИТНЫ
Хор, глас 4: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéнiе положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 4: Крест претерпéвый и смерть,/ и воскресы́й из мéртвых, Всеси́льне Гóсподи,// слáвим Твоé Воскресéнiе.
Хвалúте Бóга во святы́х Егó,/ хвалúте Егó в утвержéнiи сúлы Егó.
Стiхúра: Крестóм Твои́м, Хрiстé,/ от дрéвнiя кля́твы свободи́л еси́ нас,/ и смéртiю Твоéю/ естествó нáше мýчащаго дiáвола упраздни́л еси́:/ востáнiем же Твои́м рáдости вся испóлнил еси́./ Тéмже вопiéм Ти:// воскресы́й из мéртвых, Гóсподи, слáва Тебé.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Твои́м Крестóм, Хрiстé Спáсе,/ настáви нас на и́стину Твою́,/ и избáви нас от сéтей врáжiих,/ воскресы́й из мéртвых,/ возстáви ны пáдшыяся грехóм,/ простéр рýку Твою́, Человеколю́бче Гóсподи,// моли́твами святы́х Твои́х.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Отéческих Твои́х недр не разлучи́вся,/ Единорóдный Слóве Бóжiй,/ пришéл еси́ на зéмлю за человеколю́бiе,/ Человéк быв непрелóжен,/ и крест и смерть претерпéл еси́ плóтiю,/ безстрáстный Божествóм:/ воскрéс же из мéртвых,/ безсмéртiе пóдал еси́ рóду человéческому,// я́ко Еди́н Всеси́лен.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры востóчны, глас 3: Смерть прiя́л еси́ пло́тiю,/ нам безсме́ртiе хода́тайствуя, Спа́се,/ и во гроб всели́лся еси́,/ да нас от а́да свободи́ши, воскреси́в с Собо́ю:/ пострада́ у́бо я́ко челове́к,/ но воскре́с, я́ко Бог./ Сего́ ра́ди вопие́м:/ сла́ва Тебе́, Жизнода́вче Го́споди,// Еди́не Человеколю́бче.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Стiхúра: Ка́менiе распада́шеся, Спа́се,/ егда́ на ло́бнем Крест Твой водрузи́ся,/ устраши́шася а́довы вра́тницы,/ егда́ во гро́бе я́ко мертв положе́н был еси́:/ и́бо сме́ртную упраздни́вый кре́пость,/ уме́ршим всем нетле́ние по́дал еси́ воскресе́нием Твои́м, Спа́се,// Жизнода́вче Го́споди, сла́ва Тебе́.
На 2. Наляцы́, и успевáй, и цáрствуй úстины рáди, и крóтости, и прáвды.
Сти́хиры Триóди (самаряны́ни), глас 3: Да ра́дуется днесь све́тло не́бо и земля́,/ я́ко Христóс яви́ся воплоща́емь я́ко Челове́к,/ да Ада́ма изме́т от кля́твы всерóдна,/ и удивля́ется чудесы́ в Самари́ю прише́д:/ жене́ же бесе́доваше воды́ прося́,/ И́же óблаки вода́ми одева́яй./ Те́мже вси ве́рнии поклони́мся,/ нас ра́ди вóлею Обнища́вшему,// благоутрóбным сове́том.
Возлюбúл есù прáвду, и возненавúдел есù беззакóнiе.
Стiхира, Глас 6: Тáко глаго́лет Госпóдь самаряны́ни:/ áще бы еси́ ве́дала дар Бóжий,/ и Кто есть глагóляй тебе́, даждь Ми воды́ пи́ти,/ ты бы проси́ла у Негó, и дал бы ти пи́ти,// да не вжáждешися во ве́ки, глагóлет Госпóдь.
Слáва Ѻтцý и Сы́ну и Святóму Дýху.
Стiхира Трióди (самаряны́ни), глас 6: Истóчник живоначáлiя Iисýс Спас наш,/ ко истóчнику пришéд патрiáрха Iа́кова,/ пи́ти прошáше воды́ от жены́ самаряны́ни./ Сей же неприобщи́тельное iудéом прирéкшей,/ му́дрый Зижди́тель привóдит ю́, слáдкими глагóлы,/ пáче к прошéнiю присносýщныя воды́,/ ю́же и прiи́мши всем проповéда рекýщи:/ прiиди́те, ви́дите сокровéнных ви́дца и Бóга,// пришéдшаго плóтiю, за éже спасти́ человéка.
И ны́не и прúсно и во вéки векóв. Амúнь.
Глас 2: Преблагословéнна есѝ, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смeрть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вши тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь воскрéсный, глас 2: Воскрéс из грóба и ýзы растерзáл еси áда,/ разруши́л еси осуждéнiе смéрти, Гóсподи,/ вся от сетéй врагá избáвивый;/ яви́вый же Себé апóстолом Твоим,/ послáл еси я на прóповедь,/ и тéми мир Твой пóдал еси вселéнней,// Еди́не Многоми́лостиве.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрїстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Воскресы́й из мéртвых, Хрїстé, и́стинный Бог наш, моли́твами Пречи́стыя Своея́ Мáтере, святы́х слáвных и всехвáльных Апóстол, святых и прáведных богоотéц Iоакíма и Áнны, и всех святых, поми́луй и спасѝ нас, яко Благ и Человеколю́бец. Ами́нь.
МНОГОЛЕТИЕ
Слáва Отцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская седьмáя, глас 7: Се тьма, и рáно, и что у грóба, Марíе, стои́ши,/ мнóгую тьму имéющи в рáзуме,/ в нéйже, где положéн бысть вопрошáеши, Iисýс?/ Но виждь сри́щущася ученики́,/ кáко плащани́цами и сударéм воскресéнiе обретóша,/ и помянýша я́же о сих Писáнiя./ С ни́миже и и́миже и мы вéровавше,// воспевáем Тя жизнодáвца Хрiстá.
ПЕРВЫЙ ЧАС
Хрїстóс воскрéсе из мéртвых,/ смéртiю смерть попрáв/ и сýщим во гробéх живóт даровáв. (Трúжды)
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 4: Свéтлую Воскресéнiя прóповедь от Áнгела увéдевша Госпóдни учени́цы и прáдеднее осуждéнiе отвéргша, апóстолом хвáлящася глагóлаху: испровéржеся смерть, воскрéсе Хрїстóс Бог, дáруяй мíрови вéлiю ми́лость.
Слáва Отцý и Сы́ну и Святóму Дýху.
Тропáрь Преполовéнiя, глас 8: Преполови́вшуся прáзднику, жáждущую дýшу мою́ благочéстiя напóй водáми, я́ко всем, Спáсе, возопи́л еси́: жáждай да грядéт ко Мне и да пiéт. Истóчниче жи́зни нáшея, Хрїстé Бóже, слáва Тебé.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк Преполовéнiя, глас 4: Прáзднику закóнному преполовля́ющуся, всех Твóрче и Влады́ко, к предстоя́щим глагóлал еси́, Хрїстé Бóже: прiиди́те и почерпи́те вóду безсмéртiя. Тéмже Тебé припáдаем и вéрно вопiéм: щедрóты Твоя́ дáруй нам, Ты бо еси́ Истóчник жи́зни нáшея.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстè, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк Пáсхи, глас 8: Áще и во гроб снизшéл есѝ, Безсмéртне,/ но áдову разруши́л есѝ си́лу,/ и воскрéсл есѝ, я́ко победи́тель, Хрїстé Бóже,/ женáм мироно́сицам вещáвый: рáдуйтеся,/ и Твои́м апóстолом мир дáруяй,// пáдшим подая́й воскресéнiе.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Воскресы́й из мéртвых, Хрїстè, и҆́стинный Бог наш, моли́твами пречи́стыя Своея́ Мáтере, и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу