БЛАГОВЕЩЕНИЕ ПРЕСВЯТОЙ БОГОРОДИЦЫ. ВСЕНОЩНОЕ БДЕНИЕ. УТРЕНЯ. КАНОН Служба мирским чином
7 апрéля 2023 гóда. Пя́тница 6-й седмúцы, вáiй. Благовéщенiе Пресвятóй Богорóдицы. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( велúкое повечéрiе) и здесь ( ýтреня)
Псалом 106
Исповéдайтеся Гóсподеви, я́ко Благ, я́ко в век ми́лость Егó. Да рекýт избáвленiи Гóсподем, и́хже избáви из руки́ врагá и от стран собрá их, от востóк и зáпад, и сéвера, и мóря. Заблуди́ша в пусты́ни безвóдней, пути́ грáда оби́тельнаго не обретóша. Áлчуще и жáждуще, душá их в них исчезé. И воззвáша ко Гóсподу, внегдá скорбéти им, и от нужд их избáви я́, и настáви я́ на путь прав, вни́ти во град оби́тельный. Да исповéдятся Гóсподеви ми́лости Егó, и чудесá Егó сыновóм человéческим, я́ко насы́тил есть дýшу тщу и дýшу áлчущу испóлни благ. Седя́щiя во тьме и сéни смéртней, оковáнныя нищетóю и желéзом, я́ко преогорчи́ша словесá Бóжiя и совéт Вы́шняго раздражи́ша. И смири́ся в трудéх сéрдце их, и изнемогóша, и не бе помогáяй. И воззвáша ко Гóсподу, внегдá скорбéти им, и от нужд их спасé я́, и изведé я́ из тьмы и сéни смéртныя, и ýзы их растерзá. Да исповéдятся Гóсподеви ми́лости Егó, и чудесá Егó сыновóм человéческим, я́ко сокруши́ вратá мéдная и вереи́ желéзныя сломи́. Воспрiя́т я́ от пути́ беззакóнiя их, беззакóнiй бо рáди свои́х смири́шася. Вся́каго брáшна возгнушáся душá их, и прибли́жишася до врат смéртных. И воззвáша ко Гóсподу, внегдá скорбéти им, и от нужд их спасé я́, послá слóво Своé и исцели́ я́, и избáви я́ от растлéнiй их. Да исповéдятся Гóсподеви ми́лости Егó, и чудесá Егó сыновóм человéческим, и да пожрýт Емý жéртву хвалы́, и да возвестя́т делá Егó в рáдости. Сходя́щiи в мóре в корабля́х, творя́щiи дéланiя в водáх мнóгих, тíи ви́деша делá Госпóдня и чудесá Егó во глубинé. Речé, и ста дух бýрен, и вознесóшася вóлны eгó, восхóдят до небéс и низхóдят до бездн, душá их в злых тáяше: смятóшася, подвигóшася, я́ко пiя́ный, и вся мýдрость их поглощенá бысть. И воззвáша ко Гóсподу, внегдá скорбéти им, и от нужд их изведé я́, и повелé бýри, и ста в тишинý, и умолкóша вóлны eгó. И возвесели́шася, я́ко умолкóша, и настáви я́ в пристáнище хотéнiя своегó. Да исповéдятся Гóсподеви ми́лости Егó, и чудесá Егó сыновóм человéческим: да вознесýт Егó в цéркви людстéй и на седáлищи стáрец восхвáлят Егó. Положи́л есть рéки в пусты́ню, и исхóдища воднáя в жáжду, зéмлю плодонóсную в слáность, от злóбы живýщих на ней. Положи́л есть пусты́ню во езéра воднáя и зéмлю безвóдную во исхóдища воднáя. И насели́ тáмо áлчущiя, и состáвиша грáды оби́тельны, и насéяша сéла, и насади́ша виногрáды, и сотвори́ша плод жи́тен. И благослови́ я́, и умнóжишася зелó, и скоты́ их не умáли. И умáлишася, и озлóбишася от скóрби зол и болéзни. Излiя́ся уничижéнiе на кня́зи их, и облазни́ я́ по непрохóдней, а не по пути́. И помóже убóгу от нищеты́ и положи́ я́ко óвцы отéчествiя. У́зрят прáвiи и возвеселя́тся, и вся́кое беззакóнiе загради́т устá своя́. Кто премýдр и сохрани́т сiя́? И уразумéют ми́лости Госпóдни.
Чтец: Слáва Отцý и Сы́ну и Святóму Дýху.
Хор: И ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 рáза)
Гóсподи, помúлуй. (3 рáза)
Слáва Отцý и Сы́ну и Святóму Дýху.
Чтец: И ны́не и при́сно и во вéки векóв. Ами́нь.
Псалом 107
Готóво сéрдце моé, Бóже, готóво сéрдце моé: воспою́ и пою́ во слáве моéй. Востáни слáва моя́, востáни псалти́рю и гýсли, востáну рáно. Исповéмся Тебé в лю́дех, Гóсподи, пою́ Тебé во язы́цех. Я́ко вéлiя верхý небéс ми́лость Твоя́ и до óблак и́стина Твоя́. Вознеси́ся на Небесá, Бóже, и пo всей земли́ слáва Твоя́, я́ко да избáвятся возлю́бленнiи Твои́: спаси́ десни́цею Твоéю и услы́ши мя. Бог возглагóла во святéм Своéм: вознесýся и разделю́ Сiкíму, и удóль селéнiй размéрю. Мой есть Галаáд и Мой есть Манассíй, и Ефрéм заступлéнiе главы́ Моея́, Iýда царь Мой. Моáв конóб уповáнiя Моегó, на Iдумéю наложý сапóг Мой: Мне иноплемéнницы покори́шася. Кто введéт мя во град ограждéнiя? Или́ кто настáвит мя до Iдумéи? Не Ты ли, Бóже, отри́нувый нас? И не изы́деши, Бóже, в си́лах нáших? Даждь нам пóмощь от скóрби, и сýетно спасéнiе человéческо. О Бóзе сотвори́м си́лу, и Той уничижи́т враги́ нáша.
Псалом 108
Бóже, хвалы́ моея́ не премолчи́, я́ко устá грéшнича и устá льсти́ваго на мя отверзóшася, глагóлаша на мя язы́ком льсти́вым, и словесы́ ненави́стными обыдóша мя, и брáшася со мнóю тýне. Вмéсто éже люби́ти мя, оболгáху мя, аз же моля́хся, и положи́ша на мя злáя за благáя, и нéнависть за возлюблéнiе моé. Постáви на негó грéшника, и дiáвол да стáнет одеснýю eгó. Внегдá суди́тися eмý, да изы́дет осуждéн, и моли́тва eгó да бýдет в грех. Да бýдут днíе eгó мáли, и епíскопство eгó да прiи́мет ин: да бýдут сы́нове eгó си́ри, и женá eгó вдовá: дви́жущеся да преселя́тся сы́нове eгó и воспрóсят, да изгнáни бýдут из домóв свои́х. Да взы́щет заимодáвец вся, ели́ка суть eгó, и да восхи́тят чуждíи труды́ eгó. Да не бýдет eмý застýпника, нижé да бýдет ущедря́яй сироты́ eгó. Да бýдут чáда eгó в погублéнiе, в рóде еди́ном да потреби́тся и́мя eгó. Да воспомянéтся беззакóнiе отéц eгó пред Гóсподем, и грех мáтере eгó да не очи́стится. Да бýдут пред Гóсподем вы́ну и да потреби́тся от земли́ пáмять их. Занéже не помянý сотвори́ти ми́лость, и погнá человéка ни́ща и убóга, и умилéна сéрдцем умертви́ти. И возлюби́ кля́тву, и прiи́дет eмý, и не восхотé благословéнiя, и удали́тся от негó. И облечéся в кля́тву я́ко в ри́зу, и вни́де я́ко водá во утрóбу eгó, и я́ко елéй в кóсти eгó. Да бýдет eмý я́ко ри́за, в ню́же облачи́тся, и я́ко пóяс, и́мже вы́ну опоясýется. Сié дéло оболгáющих мя у Гóспода и глагóлющих лукáвая на дýшу мою́. И ты, Гóсподи, Гóсподи, сотвори́ со мнóю и́мене рáди Твоегó, я́ко блáга ми́лость Твоя́. Избáви мя, я́ко нищ и убóг есмь аз, и сéрдце моé смятéся внутрь менé. Я́ко сень, внегдá уклони́тися ей, отъя́хся, стрясóхся я́ко прýзи. Колéна моя́ изнемогóста от постá, и плоть моя́ измени́ся елéа рáди. И аз бых поношéнiе им, ви́деша мя, покивáша главáми свои́ми. Помози́ ми, Гóсподи Бóже мой, и спаси́ мя по ми́лости Твоéй, и да разумéют, я́ко рукá Твоя́ сiя́, и Ты, Гóсподи, сотвори́л еси́ ю́. Прокленýт тíи, и Ты благослови́ши, востаю́щiи на мя да постыдя́тся, раб же Твой возвесели́тся. Да облекýтся оболгáющiи мя в срамотý, и одéждутся, я́ко одéждею, студóм свои́м. Исповéмся Гóсподеви зелó усты́ мои́ми, и посредé мнóгих восхвалю́ Егó, я́ко предстá одеснýю убóгаго, éже спасти́ от гоня́щих дýшу мою́.
Чтец: Слáва Ѻтцý и Сы́ну и Святóму Дýху, и ны́не и при́сно и во вéки векóв, ами́нь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, поми́луй. (12 раз)
Хор (по кафíсме седáлен Благовéщенiя, глас 3): Днесь вся тварь рáдуется,/ я́ко - éже рáдуйся, - Тебé глагóлет Архáнгел,/ благословéнная честнáя и пречи́стая Мáти Хрїстá Бóга./ Днесь омрачáется змiи́но шатáнiе,/ кля́твы бо прáотчи разрешáется сою́з./ Тéмже и непрестáнно вопiéм Ти:// рáдуйся, Обрáдованная.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Днесь вся тварь рáдуется,/ я́ко - éже рáдуйся, - Тебé глагóлет Архáнгел,/ благословéнная честнáя и пречи́стая Мáти Хрїстá Бóга./ Днесь омрачáется змiи́но шатáнiе,/ кля́твы бо прáотчи разрешáется сою́з./ Тéмже и непрестáнно вопiéм Ти:// рáдуйся, Обрáдованная.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ВЕЛИЧАНИЕ ПРАЗДНИКА
Хор: Архáнгельскiй глас/ вопiéм Ти, Чúстая:/ рáдуйся Благодáтная,// Госпóдь с Тобóю.
(И дáлее хор продолжáет чередовáть стiхи Избранного псалмá и Величанiе)
ПСАЛОМ ИЗБРАННЫЙ
Бóже суд Твой царéви даждь,/ И прáвду Твою́ сы́ну царéву./ Суди́ти лю́дем Твои́м в прáвде,/ И ни́щим Твои́м в судé./ Сýдит ни́щим людски́м, и спасéт сы́ны убóгих./ Благовести́те день от дне спасéнiе Бóга нáшего./ Госпóдь даст глагóл благовествýющим си́лою мнóгою./ Кля́тся Госпóдь Давíду и́стиною, и не отвéржется ея́./ От плодá чрéва твоегó посаждý на престóле твоéм./ Сни́дет я́ко дождь на рунó,/ И я́ко кáпля кáплющая на зéмлю./ И приклони́ небесá и сни́де, и мрак под ногáма Егó./ Я́ко избрá Госпóдь Сióна, извóли егó в жили́ще Себé./ Освяти́л есть селéнiе Своé Вы́шнiй./ Бог посредé егó, и не подви́жится./ Пощади́т ни́ща и убóга, и дýши убóгих спасéт./ Вси язы́цы порабóтают Емý./ Весь день благословя́т Егó./ Бýдет утверждéнiе на земли́ на версéх гор./ Бýдет И́мя Егó благословéно во вéки./ И благословя́тся в Нем вся колéна земнáя./ Благословéн Госпóдь Бог Iзрáилев, творя́й чудесá Еди́н./ И благословéно И́мя слáвы Егó в век, и в век вéка./ И испóлнится слáвы Егó вся земля́:// Бýди, бýди.
Хор: Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (Трúжды)
Хор: Архáнгельскiй глас/ вопiéм Ти, Чúстая:/ рáдуйся Благодáтная,// Госпóдь с Тобóю.
Гóсподи, поми́луй. (12 раз)
СЕДАЛЕН
Седáлен прáздника по полiелéи, глас 4: Гаврiи́л с Небесé, éже рáдуйся, зовéт Честнéй,/ я́ко зачнéт во чрéве Превéчнаго Бóга,/ слóвом концы́ состáвльшаго./ Тéмже Марiáм отвещавáше:/ безмýжна есмь и кáко рождý Сы́на?/ Безсéменное рождéнiе кто ви́де? И, сказýя, глагóлаше Áнгел Богорóдице и Дéве:/ нáйдет на Тя Дух Святы́й,// и си́ла Вы́шняго осени́т Тя.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Пóслан бысть Гаврiи́л к Дéве Марíи и возвести́ Ей неизглагóланную рáдость,/ я́ко безсéменно зачнéт и не истлéет,/ роди́ши бо Сы́на, Предвéчнаго Бóга, и спасéт лю́ди Своя́ от грех их./ И свидéтельствует послáвый мя вопи́ти Тебé, Благословéнная, éже рáдуйся:// Дéва роди́ши, и по рождествé пáки пребýдеши Дéва.
СТЕПЕННА, ГЛАС 4
1 АНТИФОН
Хор: От ю́ности моея́/ мнóзи бóрют мя стрáсти,/ но Сам мя заступú// и спасú, Спáсе мой. (Двáжды)
Ненави́дящiи Сióна,/ посрами́теся от Гóспода,/ я́ко травá бо огнéм// бýдете изсóхше. (Двáжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Святы́м Дýхом/ вся́ка душá живи́тся,/ и чистотóю возвышáется,// светлéется Трóйческим еди́нством, священнотáйне. (Двáжды)
ПРОКИМЕН И ЧТЕНИЕ ЕВАНГЕЛИЯ
Чтец: Прокíмен, глас четвéртый. Благовести́те день от дне спасéнiе Бóга нáшего. (Пс.113:3)
Хор: Благовестúте день от дне/ спасéнiе Бóга нáшего.
Чтец: Что ти есть, мóре, я́ко побéгло еси́, и тебé, Iордáне, я́ко возврати́лся еси́ вспять? (Пс.Пс.113:5)
Хор: Благовестúте день от дне/ спасéнiе Бóга нáшего.
Чтец: Благовести́те день от дне.
Хор: Cпасéнiе Бóга нáшего.
Чтец: Гóсподу помóлимся.
Хор: Гóсподи, помúлуй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.(Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
Гóсподи, помилуй. (3раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
ЕВАНГЕЛИЕ
Чтец: От Луки́ Святáго Евáнгелiя чтéнiе.
Слáва Тебé, Гóсподи, слáва Тебé.
(Лк.зач.4): Во дни óны, востáвши, Марiáм, и҆́де в гóрняя со тщáнiем, во град Iýдов. И вни́де в дом Захáрiин, и целовá Елисавéт. И бысть я́ко услы́ша Елисавéт целовáнiе Марíино, взыгрáся младéнец во чрéве ея́: и испóлнися Дýха Свя́та Елисавéт. И возопи́ глáсом вéлiим, и речé: благословéна Ты в женáх, и благословéн плод чрéва Твоегó. И откýду мне сié, да прiи́де Мáти Гóспода моегó ко мне? Се бо, я́ко бысть глас целовáнiя Твоегó во ýшiю моéю, взыгрáся младéнец рáдощами во чрéве моéм. И блажéнна Вéровавшая, яко бýдет совершéнiе глагóланным Ей от Гóспода. И речé Марiáм: вели́чит душá Моя́ Гóспода, и возрáдовася дух Мой о Бóзе Спáсе Моéм. Я́ко призрé на смирéнiе Рабы́ Своея́: се бо, отны́не ублажáт Мя вси рóди. Я́ко сотвори́ Мне вели́чiе Си́льный, и свя́то и҆́мя Егó. Пребы́сть же Марiáмь с нею я́ко три мéсяцы, и возврати́ся в дом Свой.
[Русский синодальный перевод]Встав же Мария во дни сии, с поспешностью пошла в нагорную страну, в город Иудин, и вошла в дом Захарии, и приветствовала Елисавету. Когда Елисавета услышала приветствие Марии, взыграл младенец во чреве ее; и Елисавета исполнилась Святого Духа, и воскликнула громким голосом, и сказала: благословенна Ты между женами, и благословен плод чрева Твоего! И откуда это мне, что пришла Матерь Господа моего ко мне? Ибо когда голос приветствия Твоего дошел до слуха моего, взыграл младенец радостно во чреве моем. И блаженна Уверовавшая, потому что совершится сказанное Ей от Господа. И сказала Мария: величит душа Моя Господа, и возрадовался дух Мой о Боге, Спасителе Моем, что призрел Он на смирение Рабы Своей, ибо отныне будут ублажать Меня все роды; что сотворил Мне величие Сильный, и свято имя Его; Пребыла же Мария с нею около трех месяцев, и возвратилась в дом Свой.(1:39-49,56)
Хор: Слáва Тебé, Гóсподи, слáва Тебé.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 6: Моли́твами Богорóдицы,/ Ми́лостиве, очи́сти// мнóжества согрешéнiй нáших.
И ны́не и прúсно и во вéки векóв. Амúнь.
Моли́твами Богорóдицы,/ Ми́лостиве, очи́сти// мнóжества согрешéнiй нáших.
Таже, глас 6: Поми́луй мя, Бóже,/ по вели́цей ми́лости Твоéй,/ и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра, глас 6: Благовествýет Гаврiи́л Благодáтней днесь:/ рáдуйся, Неневéстная Мáти и Неискусобрáчная./ Не удивля́йся стрáнному моемý зрáку,/ ни ужасáйся, Архáнгел бо есмь./ Змiй прельсти́ Éву иногдá,/ ны́не же благовествýю Тебé рáдость,/ и пребýдеши нетлéнна,// и роди́ши Гóспода, Пречи́стая.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН БЛАГОВЕЩЕНИЯ, ГЛАС 4
( Канóн Богорóдицы, глас 4 со iрмóсом на 14 (iрмóсы по двáжды). Припéвы: библéйскiе пéсни в прáздничной редáкцiи, тропарù (кáждый по трúжды) мóжно разделúть по припéвам. 5-я, 8-я и 9-я - канóн прáздника со iрмóсом на 6 и трипéснцы Трióди на 8. Катавáсiя - iрмóсы 2-го трипéснца.)
ПЕСНЬ 1
Iрмóс: Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.(Двáжды)
На 12.Хор (припéв): Поéм Гóсподеви, слáвно бо прослáвися./ Коня́ и всáдника вéрже в мóре.
Чтец (тропáрь): Да поéт Тебé, Влады́чице, дви́жа свирéль духóвную, Давíд, прáотец Твой:/ послýшай, Дщи, рáдованнаго глáса от Áнгела,// рáдость бо возвещáет Тебé неизглагóланную.(Трúжды)
Хор: Помóщник и Покровúтель бысть мне во спасéнiе,/ Сей мой Бог, и прослáвлю Егó,/ Бог отцá моегó, и вознесý Егó.
На 10.Хор: Госпóдь, сокрушáяй брáни, Госпóдь И́мя Емý,/ колеснúцы фараóновы и сúлу егó вéрже в мóре.
Хор: Пучúною покры́ я́,/ погрязóша во глубинé я́ко кáмень.
Чтец.Áнгел возопú: Вопiю́ Тебé, веселя́ся,/ приклони́ ýхо Твоé и вонми́ ми,/ Бóжiе возвещáющу безсéменное зачáтiе,/ обрелá бо еси́ благодáть пред Бóгом,// ея́же никогдáже обрéте другáя, Всечи́стая.(Трúжды)
На 8.Хор: Тогдá потщáшася влады́ки Едóмстiи, и князéй Моавíтских,/ прiя́т я́ трéпет, растáяша вси живýщiи в Ханаáне.
Нападéт на ня́ страх и трéпет,/ велúчiем мы́шцы Твоея́ да окáменятся.
На 6: Дóндеже прóйдут лю́дiе Твоù, Гóсподи,/ дóндеже прóйдут лю́дiе Твоù сíи, я́же стяжáл есù.
Чтец.Богорóдица речé: Да разумéю, Áнгеле, твои́х глагóл си́лу,/ кáко бýдет, éже рекл еси́, глагóли я́вственнейше?/ Кáко зачнý, Дéва сýщи, Отрокови́ца?// Кáко же и Мáти бýду Зижди́теля Моегó? (Трúжды)
Хор: Содéлал есù, Гóсподи, святы́ню,/ ю́же уготóвасте рýце Твоù.
На 4: Госпóдь цáрствуяй вéки и на век, и ещé,/ егдá внúде конь фараóнов с колеснúцами и всáдники в мóре.
Сы́нове же Iзрáилевы проидóша сýшею/ посредé мóря.
Чтец.Áнгел возопú: Лéстно мя вещáти помышля́еши, я́ко мню,/ и рáдуюся, зря Твоé утверждéнiе./ Дерзáй, Влады́чице,// Бóгу бо хотя́щу, удóбь скончáются и преслáвная. (Трúжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби. (Двáжды)
На 12.Хор: Утвердúся сéрдце моé во Гóсподе,/ вознесéся рог мой о Бéзе моéм,/ разширúшася устá моя́ на врагù моя́,/ возвеселúхся о спасéнiи Твоéм.
Богорóдица речé: Оскудé князь от Iýды, врéмя настá прóчее,/ в нéже яви́тся язы́ков надéжда, Хрiстóс;// ты же, кáко Сегó рождý, Дéва сýщи, скажи́? (Трúжды)
Хор: Я́ко несть свят, я́ко Госпóдь,/ и несть прáведен я́ко Бог наш,/ и несть свят пáче Тебé.
На 10: Не хвалúтеся и не глагóлите высóкая в горды́ни,/ нижé да изы́дет велерéчiе из уст вáших.
Я́ко Бог рáзумов Госпóдь,/ и Бог, уготовля́яй начинáнiя Своя́.
Áнгел возопú: И́щеши от менé увéдети Дéво, óбраз зачáтiя Твоегó,/ но той несказáнен есть:// Дух же Святы́й, зижди́тельною си́лою осени́в Тя, соверши́т. (Трúжды)
На 8.Хор: Дая́й молúтву моля́щемуся,/ и благословù лéта прáведнаго.
Госпóдь нéмощна сотворù супостáта Егó,/ Госпóдь Свят.
На 6.Хор: Да не хвáлится премýдрый премýдростiю своéю,/ и да не хвáлится сúльный сúлою своéю,/ и да не хвáлится богáтый богáтством своúм.
Богорóдица речé: Моя́ прамáти, прiéмши рáзум змiи́н, пи́щи Божéственныя изгнáна бысть,/ тéмже и Аз бою́ся целовáнiя стрáннаго твоегó,// стыдя́щися поползновéнiя. (Трúжды)
Хор: Но о сем да хвáлится хваля́йся,/ éже разумéти и знáти Гóспода/ и творúти суд и прáвду посредé землù.
На 4: Госпóдь взы́де на Небесá и возгремé,/ Той сýдит концéм землù, прáведен Сый.
Хор: И даст крéпость царю́ нáшему,/ и вознесéт рог Хрiстá Своегó.
Áнгел возопú: Бóжiй предстáтель, пóслан есмь Божéственный повéдати Тебé совéт./ Что менé бои́шися, Всенепорóчная, пáче Тебé боя́щагося?/ Что благоговéеши мне, Влады́чице,// Тебé чéстно благоговéющему?(Трúжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Седáлен Благовéщенiя, глас 8: Слóво Бóжiе на зéмлю ны́не сни́де, Áнгел предстá, вопiя́ Дéве:/ рáдуйся, Благословéнная, Я́же печáтiю еди́на сохрáншися,/ во утрóбе прiéмши предвéчнаго Слóва и Гóспода,// да от прéлести спасéт, я́ко Бог, род человéческiй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Ин седáлен Благовéщенiя, глас 8: Пóслан бысть с Небесé Архiстрати́г Гаврiи́л от Бóга,/ скóро предстá ко одушевлéнному грáду, глагóля к Ней я́вственно:/ Зижди́теля прiи́меши, Дéво, во утрóбе/ и роди́ши Сегó непрелóжне с плóтiю./ Тéмже пóслан есмь возвести́ти Тебé стрáнное рождествó, Чи́стая,/ и стою́, зовя́ Тебé:// рáдуйся, Невéсто Неневéстная.
ПЕСНЬ 4
Iрмóс: Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй. (Двáжды)
На 12.Хор: Гóсподи, услы́шах слух Твой и убоя́хся;/ Гóсподи, разумéх делá Твоя́ и ужасóхся.
Богорóдица речé: Свящéнную нéкую Дéву раждáющую слы́шах прорóка, дрéвле Емманýила прорéкша;// хощý же разумéти, кáко Божествá растворéнiе естествó человéческое претерпи́т?(Трúжды)
Хор: Внегдá смутúтися душù моéй во гнéве,/ мúлость Твою́ помянéши.
На 10: Бог от ю́га прiúдет,/ и Святы́й из горы́ приосенéнныя чáщи.
Покры́ Небесá добродéтель Егó,/ и хвалы́ Егó испóлнь земля́.
Áнгел возопú: Яви́ла есть купинá, неопáльна пребы́вши,/ прiéмши плáмень, обрáдованная Всепéтая, на Тебé таи́нства преслáвное:// по рождествé бо пребýдеши Чи́стая Приснодéва.(Трúжды)
На 8.Хор: Занé смоквь не плодопринесéт,/ и не бýдет рóда в лозáх.
Солжéт дéло мáслинное,/ и поля́ не сотворя́т я́ди.
На 6: Оскудéша óвцы от пúщи,/ и не бýдет волóв при я́слех.
Богорóдица речé: Освещáемь сiя́нiем Бóга Вседержи́теля,/ и́стины проповéдниче, глагóли, Гаврiи́ле, и́стиннейшая:/ кáко, нетлéнне бы́вши чистотé Моéй,// Слóва рождý, с плóтiю Безплóтнаго?(Трúжды)
Хор: Аз же о Гóсподе возрáдуюся,/ возвеселю́ся о Бóзе, Спáсе моéм.
На 4: Госпóдь Бог мой сúла моя́/ и учинúт нóзе моù на совершéнiе.
Хор: И на высóкая возвóдит мя́,/ победúти ми в пéсни Егó.
Áнгел возопú: Со стрáхом Тебé, я́ко раб Госпожé, предстою́,/ с боя́знiю, Отрокови́це, ны́не смотри́ти стыждýся Тебé,// я́ко бо дождь на рунó, сни́дет на Тя Слóво Ѻ́тчее, я́ко благоволи́.(Трúжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.(Двáжды)
На 12.Хор: От нóщи ýтренюет дух мой к Тебé, Бóже,/ занé свет повелéнiя Твоя́ на землù.
Богорóдица речé: Разумéти не могý Твои́х словéс извéстiя:/ чудесá бо бы́ша мнóжицею,/ Божéственною си́лою чудодéйствуема,/ знáменiя и óбразы закóннiи,// роди́ же дéва неискусомýжне никогдáже.
Хор: Прáвде научúтеся, живýщiи на землù.
Áнгел возопú: Диви́т, Всенепорóчная, и стрáнно бо чýдо Твоé,/ еди́на бо Ты всех Царя́ прiи́меши во утрóбе воплощáема,// и Тя прообразýют прорóческая речéнiя, и гадáнiя, и закóннiи óбразы.
На 10.Хор: Да вóзмется нечестúвый, да не вúдит слáвы Госпóдни./ Гóсподи, высокá Твоя́ мы́шца, и не вéдеша, разумéвше же постыдя́тся.
Богорóдица речé: Всéми Невмести́мый и всéми Неви́димый,/ кáко сей мóжет во чрéве деви́че всели́тися, éже Сам создá?// Кáко же и зачнý Бóга Слóва, собезначáльна Отцý и Дýху?
Хор:Зáвисть прiúмет лю́ди ненакáзанныя,/ и ны́не огнь супостáты поя́ст.
Áнгел возопú: К Твоемý прáотцу Давíду обещáвся/ посади́ти от плодá Твоегó чрéва на престóле цáрства егó,// Iáковлю Тя добрóту, еди́ну избрá в словéсное селéнiе.
ПЕРВЫЙ ТРИПЕСНЕЦ ТРИОДИ, ГЛАС 4
На 8.Хор: Приложù им зла, Гóсподи,/ приложù зла слáвным землù.
Чтец: На Крестé Гóсподи Твоéм уснýв,/ преложи́л еси́ на сон влады́ко смерть./ Вопи́л бо еси́: друг Лáзарь ýспе,// но пóйдем возбуди́ти егó ны́не.
Хор: Гóсподи, в скóрби помянýхом Тя,/ в скóрби мáле наказáнiе Твоé нам.
Чтец: Прорóк проповéданiя исполня́я проречéнiя,/ в пророкоубíйственный град Хрiстé щéдрый пришéл еси́, убiéн бы́ти вóлею,// убiéнна мя тлéю, спасáя.
На 6.Хор: И я́ко боля́щая приближáется родúти, и в болéзни своéй вопiя́ше, тáко бы́хом Возлю́бленному Твоемý.
Чтец: Тéло непокори́вое слóву повинýвше, воздержáнiем и мольбáми,/ монáси и простíи лю́дiе Хрїстá усря́щите,// на жребя́ всéдша, грядýща же пострадáти.
Хор: Не падéм, но падýт живýщiи на землù.
Богорóдичен: Кроплéнiем ми́лости Твоея́ напóй Пречи́стая,/ изсóхшую мою́ мысль, плáменем грехá// и угашéнный сéрдца моегó вожжи́ свéщник, двéре свéта.
ИНЫЙ ТРИПЕСНЕЦ ТРИОДИ, ГЛАС 8
На 4.Хор: Воскрéснут мéртвiи, и востáнут, úже во гробéх,/ и возвеселя́тся, úже на землù.
Чтец: Двóицу ученик твои́х, внегдá хотéл еси́ дости́гнути в Вифáнiю Хрїстé,/ посылáеши привести́ Тебé жребя́,/ на нéже никтóже от человéк всéде:// кромé бо Тебé Спáсе никтóже безсловéсныя язы́ки повинý.
Хор: Росá бо, я́же от Тебé, исцелéнiе им есть,/ земля́ же нечестúвых падéт.
Чтец: Сни́деся Iудéов от Iерусали́ма в Вифáнiю мнóжество,/ и с срóдницами Лáзаревыми днесь стрáждут:/ наýтрiе же разумéвше сегó из грóба скáчуща,// дви́жутся на убiéнiе Хрїстóво.
Слáва Ѻтцý и Сы́ну и Святóму Дýху.
Трóичен: Трóице Пресвятáя Ѻ́тче, и Сы́не, и Дýше Вседéтельный,/ Блажéнное Божествó, Безначáльное Существó, и Трисiя́нный Свéте, Всезри́тельная Держáво,// рабы́ твоя́ сохрани́.
И ны́не и прúсно и во вéки векóв, амúнь.
Богорóдичен: На крестé Тя ви́дящи пригвождéнна гвоздьми́ Хрїстé Мáти Твоя́,/ и из ребр живóтных текýщую кровь и вóду,/ уязвля́шеся Мáтерним милосéрдiем,// Сына бо Тя́ познá своегó.
Хор: Слáва Тебé, Бóже наш, слáва Тебé.
Чтец: Се уготóвася Хрїстóс предстáти Iерусали́му,/ и́же в горáх вси и пусты́нях,// собери́теся монáси, тогó рáдостiю усрéсти, со всéю поднебéсною.
Катавáсiя (Трióди, глас 8): Мрак души́ моея́ разжени́ Светодáвче Хрїстé Бóже,/ началорóдную тьму изгнáв бéздны,/ и дáруй ми́ свет повелéнiй Твои́х Слóве,// да ýтренюя слáвлю Тя.
ПЕСНЬ 6
Iрмóс: Возопи́, прообразýя погребéнiе триднéвное,/ прорóк Ióна, в ки́те моля́ся:/ от тли избáви мя,// Iисýсе, Царю́ сил.(Двáжды)
На 12.Хор: Возопúх в скóрби моéй ко Гóсподу Бóгу моемý,/ и услы́ша мя́.
Богорóдица речé: Глагóл твои́х, Гаврiи́ле, глас рáдованен прiéмши, весéлiя Божéственнаго испóлнихся:// рáдость бо повéдаеши и весéлiе возвещáеши безконéчное.(Трúжды)
Хор: Отвéргл мя́ есù во глубины́ сéрдца морскáго,/ и рéки обыдóша мя́.
На 10: Вся высоты́ Твоя́ и вóлны Твоя́ на мне преидóша.
Едá приложý призрéти ми ко хрáму святóму Твоемý?
Áнгел возопú: Тебé дадéся рáдость, Богомáти Божéственная,/ Тебé, éже рáдуйся, вся тварь вопiéт, Богоневéсто:// Ты бо еди́на Мáти Сы́на Бóжiя пронаречéся, Чи́стая.(Трúжды)
На 8.Хор: Возлiя́ся водá до душù моея́,/ бéздна обы́де мя́ послéдняя.
Понрé главá моя́ в разсéли гор,/ снидóх в зéмлю, ея́же вереù ея́ заклéпи вéчнiи.
На 6: И да взы́дет из истлéнiя живóт мой к Тебé, Гóсподи, Бóже мой.
Богорóдица речé: Éвы Мнóю ны́не да упраздни́тся осуждéнiе,/ да воздáстся Мнóю долг днесь,// Мнóю заи́мствованiе дрéвнее да дáстся преиспóлнено.(Трúжды)
Хор: И да прiúдет к Тебé молúтва моя́, ко хрáму святóму Твоемý.
На 4: Храня́щiи сýетная и лóжная, мúлость свою́ остáвиша.
Елúка обещáх, воздáм Тебé во спасéнiе моé, Гóсподеви.
Áнгел возопú: Обещáся Бог Авраáму прáотцу/ благослови́тися в сéмене егó язы́ком, Чи́стая,// Тобóю же конéц обещáнiе прiéмлет днесь.(Трúжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiя (глас 4): Возопи́, прообразýя погребéнiе триднéвное,/ прорóк Ióна, в ки́те моля́ся:/ от тли избáви мя,// Iисýсе, Царю́ сил.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Благовéщенiя, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Íкос: Áнгел предстáтель с Небесé пóслан бысть рещи́ Богорóдице: рáдуйся!/ И со безплóтным глáсом воплощáема Тя зря, Гóсподи, ужасáшеся/ и стоя́ше, зовы́й к Ней таковáя:/ рáдуйся, Éюже рáдость возсiя́ет;/ рáдуйся, Éюже кля́тва исчéзнет./ Рáдуйся, пáдшаго Адáма воззвáнiе;/ рáдуйся, слез Éвиных избавлéнiе./ Рáдуйся, высотó неудобовосходи́мая человéческими пóмыслы;/ рáдуйся, глубинó неудобозри́мая и Áнгельскима очи́ма./ Рáдуйся, я́ко еси́ Царéво седáлище;/ рáдуйся, я́ко нóсиши нося́щаго вся./ Рáдуйся, звездó, явля́ющая Сóлнце;/ рáдуйся, утрóбо Божéственнаго воплощéнiя./ Рáдуйся, Éюже обновля́ется тварь;/ рáдуйся, Éюже покланя́емся Творцý.// Рáдуйся, Невéсто Неневéстная.
ПЕСНЬ 7
Iрмóс: Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
На 12.Хор: Благословéн есù, Гóсподи, Бóже отéц нáших,/ и хвáльно и прослáвлено И́мя Твоé во вéки.
Богорóдица речé: Свет невещéственный повéдая, в вещéственне телеси́ совокупля́емь за милосéрдiе мнóгое,/ свéтлое благовéщенiе, Божéственная проповéданiя, ны́не взывáеши Ми:// благословéн, Всечи́стая, Плод Твоегó чрéва.(Трúжды)
Хор: И вся делá Твоя́ úстинна, и прáви путié Твоù.
На 10: И вси судù Твоù úстинни,/ и судьбы́ úстинны сотворúл есù.
И на град святы́й отéц нáших Iерусалúм.
Áнгел возопú: Рáдуйся, Влады́чице Дéво,/ рáдуйся, Пречи́стая,/ рáдуйся, прiя́телище Бóжiе,/ рáдуйся, свéщниче Свéта, Адáмово воззвáнiе,/ Éвы избавлéнiе, горó святáя,// прея́вственное свящéнiе и чертóг безсмéртiя.(Трúжды)
На 8.Хор: Благословéн есù, Гóсподи Бóже отéц нáших,/ и препéтый и превозносúмый во вéки.
И благословéно И́мя слáвы Твоея́ святóе,/ препéтое и превозносúмое во вéки.
На 6: Благословéн есù в хрáме святы́я слáвы Твоея́,/ препéтый и превозносúмый во вéки.
Богорóдица речé: Дýшу очи́сти, тéло освяти́,/ цéрковь сотвори́ Мя вмести́тельну Бóга,/ ски́нiю Богоукрáшену, одушевлéн храм наи́тiем Пресвятáго Дýха// и Жи́зни чи́стую Мáтерь.(Трúжды)
Хор: Благословéн есù вúдяй бéздны, седя́й на Херувíмех,/ препéтый и превозносúмый во вéки.
На 4: Благословéн есù на престóле слáвы Цáрствiя Твоегó,/ препéтый и превозносúмый во вéки.
Благословéн есù на твéрди Небéсней,/ препéтый и превозносúмый во вéки.
Áнгел возопú: Я́ко многосвéтлую свещý и Богодéланен чертóг,/ ви́жу Тя ны́не, я́ко злат кiвóт,/ закóна Подáтеля прiими́, Богоневéсто,// благоизвóлившаго человéческое избáвити Тобóю тлéнное существó.(Трúжды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Катавáсiя (глас 4): Не послужи́ша твáри Богомýдрiи,/ пáче Создáвшаго,/ но, óгненное прещéнiе мýжески попрáвше,/ рáдовахуся, пою́ще:// препéтый отцéв Госпóдь и Бог, благословéн еси́.
Продолженiе здесь