Неделя пятая Великого поста, прп. Марии Египетской. Глас 1. ВСЕНОЩНОЕ БДЕНИЕ. УТРЕНЯ. КАНОН
2 апрéля 2023 гóда. Недéля пя́тая Велúкaго постá. Преподóбной Марíи Егúпетской. Глас 1. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
[НЕПОРОЧНЫ]Избрáннiи стiхи из псалмá 118: (глас 5 всегдá): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 1: Разбóйничо покая́нiе рай окрáде,/ плачь же мvронóсиц рáдость возвести́,/ я́ко воскрéсл еси́, Хрїстé Бóже,// подая́й мíрови вéлiю ми́лость.
СТЕПЕННА, ГЛАС 1
1 АНТИФОН
Хор: Внегдá скорбéти ми, услы́ши моя́ болéзни,// Гóсподи, Тебé зовý. (Двáжды)
Пусты́нным непрестáнное Божéственное желáнiе бывáет,// мíра сýщим сýетнаго кромé. (Двáжды)
Слáва Отцý и Сы́ну и Святóму Дýху.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
И ны́не и прúсно и во вéки векóв. Амúнь.
Святóму Дýху честь и слáва,/ я́коже Отцý подобáет, кýпно же и Сы́ну,// сегó рáди да поéм Трóице Единодержáвiе.
2 АНТИФОН
На гóры Твоúх вознéсл есú мя закóнов,// добродéтельми просветú, Бóже, да пою́ Тя. (Двáжды)
Деснóю Твоéю рукóю прiи́м Ты, Слóве,/ сохрани́ мя, соблюди́,// да не огнь менé опали́т грехóвный. (Двáжды)
Слáва Отцý и Сы́ну и Святóму Дýху.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
И ны́не и прúсно и во вéки векóв. Амúнь.
Святы́м Дýхом вся́кая тварь обновля́ется,/ пáки текýщи на пéрвое,// равномóщен бо есть Отцý и Слóву.
3 АНТИФОН
О рéкших мне, внúдем во дворы́ Госпóдни,// возвеселúся мой дух, срáдуется сéрдце. (Двáжды)
В домý Дави́дове страх вели́к:/ тáмо бо престóлом постáвленным,// сýдятся вся племенá земнáя, и язы́цы. (Двáжды)
Слáва Отцý и Сы́ну и Святóму Дýху.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
И ны́не и прúсно и во вéки векóв. Амúнь.
Святóму Дýху, честь, поклонéнiе, слáву и держáву,/ я́коже Отцý достóит, и Сы́нови подобáет приноси́ти:// Еди́ница бо есть Трóица Естествóм, но не Ли́цы.
ПРОКИМЕН
Чтец: Прокíмен, глас пéрвый, псалóм Давíдов. Ны́не воскреснý, глагóлет Госпóдь, положýся во Спасéнiе, не обиню́ся о нем. (Пс.11:6Б)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Словесá Госпóдня, словесá чи́ста.(Пс.11:7А)
Хор: Ны́не воскреснý, глагóлет Госпóдь,/ положýся во Спасéнiе, не обиню́ся о нем.
Чтец: Ны́не воскреснý, глагóлет Госпóдь.
Хор: Положýся во Спасéнiе, не обиню́ся о нем.
Чтец: Гóсподу помóлимся.
Хор: Гóсподи, помúлуй.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода.
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.65А): Сýщу пóзде в день той, во еди́ну от суббóт, и двéрем затворéнным, идéже бя́ху ученицы́ Егó сóбрани, стрáха рáди iудéйска, прiи́де Iисýс и ста посредé, и глагóла им: мир вам. И сié рек, показá им рýце и нóзе и рéбра Своя. Возрáдовашася же ученицы́, ви́девше Гóспода. Речé же им Iисýс пáки: мир вам. Якоже послá Мя Отéц, и Аз посылáю вы. И сié рек, дýну и глагóла им: прiими́те Дух Свят. И҆́мже отпуститé грехи́, отпýстятся им: и и҆́мже держитé, держáтся. Фомá же, еди́н от обоюнáдесяте, глагóлемый Близнéц, не бе ту с ни́ми, егдá прiи́де Iисýс. Глагóлаху же емý друзíи ученицы́: ви́дехом Гóспода. Он же речé им: áще не ви́жу на рукý Егó я́звы гвозди́нныя, и вложý пéрста моегó в я́звы гвозди́нныя, и вложý рýку мою в рéбра Егó, не имý вéры. И по днех осми́х пáки бя́ху внутрь ученицы́ Егó, и Фомá с ни́ми. Прiи́де Iисýс двéрем затворéнным, и ста посредé их и речé: мир вам. Потóм глагóла Фомé: принеси́ перст твой сéмо, и виждь рýце Мои́, и принеси́ рýку твою, и вложи́ в рéбра Моя, и не бýди невéрен, но вéрен. И отвещá Фомá и речé Емý: Госпóдь мой и Бог мой. Глагóла ему Iисýс: яко ви́дев Мя, вéрова: блажéни не ви́девшiи и вéровавше. Мнóга же и и҆́на знáменiя сотвори Iисýс пред ученики́ Свои́ми, я́же не суть пи́сана в кни́гах сих. Сiя же пи́сана бы́ша, да вéруете, я́ко Iисýс есть Хрiстóс Сын Бóжiй, и да вéрующе животá и҆́мате во и҆́мя Егó.
[Русский синодальный перевод]В тот первый день недели вечером, когда двери дома, где собирались ученики Его, были заперты из опасения от Иудеев, пришел Иисус, и стал посреди, и говорит им: мир вам! Сказав это, Он показал им руки и ноги и ребра Свои. Ученики обрадовались, увидев Господа. Иисус же сказал им вторично: мир вам! как послал Меня Отец, так и Я посылаю вас. Сказав это, дунул, и говорит им: примите Духа Святого. Кому простите грехи, тому простятся; на ком оставите, на том останутся. Фома же, один из двенадцати, называемый Близнец, не был тут с ними, когда приходил Иисус. Другие ученики сказали ему: мы видели Господа. Но он сказал им: если не увижу на руках Его ран от гвоздей, и не вложу перста моего в раны от гвоздей, и не вложу руки моей в ребра Его, не поверю. После восьми дней опять были в доме ученики Его, и Фома с ними. Пришел Иисус, когда двери были заперты, стал посреди них и сказал: мир вам! Потом говорит Фоме: подай перст твой сюда и посмотри руки Мои; подай руку твою и вложи в ребра Мои; и не будь неверующим, но верующим. Фома сказал Ему в ответ: Господь мой и Бог мой! Иисус говорит ему: ты поверил, потому что увидел Меня; блаженны невидевшие и уверовавшие. Много сотворил Иисус пред учениками Своими и других чудес, о которых не писано в книге сей. Это же написано, дабы вы уверовали, что Иисус есть Христос, Сын Божий, и, веруя, имели жизнь во имя Его.(20:19-31)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И҆ ны́не и прúсно и во вéки векóв. Амúнь.
Богорóдичен (Трióди): На спасéнiя стези́ настáви мя Богорóдице,/ стýдными бо окаля́х дýшу грехми́,/ и в лéности все житié моé ижди́х:/ но Твои́ми моли́твами/ избáви мя от вся́кiя нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегó,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 1
(совмещéнный с канóном Богорóдицы, глас 1, с канóном Трióди пéрвым (о богáтом и Лáзаре) глас 8 и с канóном Трióди вторым (прп. Марíи) глас 8)
ПЕСНЬ 1
Iрмóс: Твоя́ победи́тельная десни́ца/ Боголéпно в крéпости прослáвися:/ та бо, Безсмéртне,/ я́ко всемогýщая, проти́вныя сотрé,// Iзрáильтяном путь глубины́ новосодéлавшая.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): И҆́же рукáма пречи́стыма от пéрсти/ богодéтельне испéрва создáв мя,/ рýце распростéрл еси́ на крестé,/ от земли́ взывáя тлéнное моé тéло,// éже от Дéвы прiя́л еси́.
На 12.Хор: Поéм Гóсподеви, слáвно бо прослáвися./ Коня́ и всáдника вéрже в мóре.
Чтец: Умерщвлéнiе подъя́л еси́ менé рáди,/ и дýшу смéрти прéдал еси́,/ И҆́же вдохновéнiем божéственным дýшу ми вложи́вый,/ и отреши́в вéчных уз, и совоскреси́в// нетлéнiем прослáвил еси́.
Хор: Помóщник и Покровúтель бысть мне во спасéнiе,/ Сей мой Бог, и прослáвлю Егó,/ Бог отцá моегó, и вознесý Егó.
Богорóдичен: Рáдуйся, благодáти истóчниче,/ рáдуйся лéствице, и двéре небéсная,/ рáдуйся свéщнице, и рýчко златáя, и горó несекóмая,// Я́же Жизнодáвца Хрїстá мíрови рóждшая.
Канон Богородицы, глас 1
На 10.Хор: Госпóдь, сокрушáяй брáни, Госпóдь И́мя Емý,/ колеснúцы фараóновы и сúлу егó вéрже в мóре.
Чтец: Кýю Ти достóйную песнь нáше принесéт неможéнiе?/ тóчiю обрáдовательную,/ éйже нас Гаврiи́л тáйно научи́л есть:// рáдуйся, Богорóдице Дéво, Мáти Неневéстная.
Хор: Пучúною покры́ я́,/ погрязóша во глубинé я́ко кáмень.
Чтец: Приснодéве и Мáтери Царя́ вы́шних сил,/ от чистéйша сéрдца, вéрнiи, духóвне возопiи́м:// рáдуйся, Богорóдице Дéво, Мáти Неневéстная.
Канон Триоди первый (о богатом и Лазаре), глас 8
На 8.Хор: Тогдá потщáшася влады́ки Едóмстiи, и князéй Моавíтских,/ прiя́т я́ трéпет, растáяша вси живýщiи в Ханаáне.
Чтец: Остáвил мя еси́ богáтству сластéй,/ веселя́щемуся на всяк день в слáдости богáтому./ Тéмже Тя молю́, Спáсе,// огня́ мя я́коже Лáзаря избáви.
Хор: Нападéт на ня́ страх и трéпет,/ велúчiем мы́шцы Твоея́ да окáменятся.
Хор: Одéяхся, Спáсе, сластьми́,/ я́коже обложи́вый себé ви́ссон и злáто, и златýю одéжду,// но мя во огнь я́коже óнаго, да не пóслеши.
На 6.Хор: Дóндеже прóйдут лю́дiе Твоù, Гóсподи,/ дóндеже прóйдут лю́дiе Твоù сíи, я́же стяжáл есù.
Чтец: Веселя́шеся богáтством и слáдостiю богáтый,/ дрéвле в житiи́ тлéннем,/ тéмже на мýки осуди́ся,// ни́щiй орошáшеся Лáзарь.
Хор: Содéлал есù, Гóсподи, святы́ню,/ ю́же уготóвасте рýце Твоù.
Богорóдичен: Чи́ни Тя Áнгел и человéк, безневéстная Мáти,/ хвáлят непрестáнно,/ Творцá бо сих, я́коже Младéнца,// во объя́тiих Твои́х носи́ла еси́.
Канон Триоди второй (прп. Марии), глас 8
На 4.Хор: Госпóдь цáрствуяй вéки и на век, и ещé,/ егдá внúде конь фараóнов с колеснúцами и всáдники в мóре.
Чтец: Любóвiю светонóсную и божéственную твою́ пáмять прáзднующему,/ свет низпосли́ ми,/ предстоя́щая преподóбная свéту непристýпному Хрїстý,// искушéнiй вся́ческих мя житiя́ избавля́ющи.
Хор: Сы́нове же Iзрáилевы проидóша сýшею/ посредé мóря.
Чтец: К еги́птяном плóтiю отшéдый, Неопи́санный и Превéчный,/ из Еги́пта показýет всесвéтлую тя звездý,// вéдый Госпóдь вся прéжде бытiя́.
Слáва Ѻтцý и Сы́ну и Святóму Дýху.
Тропáрь: Божéственных зáповедей честнáя не вéдущи,/ божéственный óбраз Бóжiй окаля́ла еси́,/ Божéственным же прóмыслом пáки очи́стила еси́, всехвáльная,// обожи́вшися дея́ньми божéственными, преподóбная, твои́ми.
И ны́не и прúсно и во вéки векóв. Амúнь.
Богорóдичен: О Твоегó, Бóже мой, мнóгаго благоутрóбiя,/ и неизречéннаго Твоегó снизхождéнiя!/ Кáко пéрвее блудни́цу, Мáтере Твоея́ мольбáми,// я́ко чи́стую и непорóчную, áнгелом уподóбил еси́.
Катавáсiя (глас 4): Отвéрзу устá моя́,/ и напóлнятся Дýха,/ и слóво отры́гну Цари́це Мáтери,/ и явлю́ся, свéтло торжествýя,/ и воспою́, рáдуяся, Тоя́ вхождéнiе.
ПЕСНЬ 3
Iрмóс: Еди́не вéдый человéческаго существá нéмощь/ и ми́лостивно в не вообрáжся,/ препоя́ши мя с высоты́ си́лою,/ éже вопи́ти Тебé, Святы́й,/ одушевлéнный хрáме// неизречéнныя слáвы Твоея́, Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Бог Сый мне, Блáже, пáдшаго ущéдрил еси́,/ и сни́ти ко мне благоволи́в, вознéсл мя еси́ распя́тiем,/ éже вопи́ти Тебé, Святы́й:// Хрáме одушевлéнный неизречéнныя Твоея́ слáвы, Человеколю́бче.
На 12.Хор: Утвердúся сéрдце моé во Гóсподе,/ вознесéся рог мой о Бéзе моéм,/ разширúшася устá моя́ на врагù моя́,/ возвеселúхся о спасéнiи Твоéм.
Чтец: Живóт ипостáсный Хрїстé сый,/ в истлéвша мя, я́ко Милосéрдый Бог, обóлкся,/ в персть смéртную сошéд, Влады́ко,/ смéртную держáву разруши́л еси́,/ и мертв триднéвен воскрéс,// в нетлéнiе мя облéкл еси́.
Хор: Я́ко несть свят, я́ко Госпóдь,/ и несть прáведен я́ко Бог наш,/ и несть свят пáче Тебé.
Богорóдичен: Бóга зачéнши во чрéве, Дéво, Дýхом Пресвяты́м,/ пребылá еси́ неопали́ма,/ понéже Тя купинá законополóжнику Моисéю,/ пали́мую нежегóмо, я́ве предвозвести́,// огнь нестерпи́мый прiéмшую.
Глас 1
На 10.Хор: Не хвалúтеся и не глагóлите высóкая в горды́ни,/ нижé да изы́дет велерéчiе из уст вáших.
Чтец: Ѻ́блак Тя лéгкiй нелóжно, Дéво, именýем,/ прорóческим возслéдующе речéнiем:/ прiи́де бо на Тебé Госпóдь/ низложи́ти еги́петскiя прéлести рукотворéнiя,// и просвети́ти сим служáщiя.
Хор: Я́ко Бог рáзумов Госпóдь,/ и Бог, уготовля́яй начинáнiя Своя́.
Чтец: Тя запечáтанный вои́стинну лик прорóческiй истóчник,/ и заключéнную дверь именовá, дéвства Твоегó, Всепéтая,/ я́вственне знáменiя нам пи́шуще:// éже сохрани́ла еси́ и по рождествé.
Глас 8
На 8.Хор: Дая́й молúтву моля́щемуся,/ и благословù лéта прáведнаго.
Чтец: Лáзаря я́коже спасл еси́ от плáмене, Хрiстé,/ тáко менé от огня́ избáви геéнскаго,// недостóйнаго рабá Твоегó.
Хор: Госпóдь нéмощна сотворù супостáта Егó,/ Госпóдь Свят.
Чтец: Богáтый страстьми́, и сластьми́ есмь, Гóсподи,/ Лáзарь же убóгiй лишéнiем добродéтелей,// но спаси́ мя.
На 6.Хор: Да не хвáлится премýдрый премýдростiю своéю,/ и да не хвáлится сúльный сúлою своéю,/ и да не хвáлится богáтый богáтством своúм.
Чтец: В червлени́цу и ви́ссон облачáшеся богáтый, сластьми́ и грехáми,// сегó рáди плáменствуется.
Хор: Но о сем да хвáлится хваля́йся,/ éже разумéти и знáти Гóспода/ и творúти суд и прáвду посредé землù.
Богорóдичен: Даждь нам пóмощь моли́твами Твои́ми, Всечи́стая,// прилóги отражáющи лю́тых обстоя́нiй.
Глас 8
На 4.Хор: Госпóдь взы́де на Небесá и возгремé,/ Той сýдит концéм землù, прáведен Сый.
Чтец: Ко вратóм поги́бели прибли́жшуюся дея́ньми безмéстными,/ вратá прéжде áдова сокруши́вый си́лою Божествá,/ вратá покая́нiя тебé отверзáет всечестнáя,// дверь сый Сам животá.
Хор: И даст крéпость царю́ нáшему,/ и вознесéт рог Хрiстá Своегó.
Чтец: Орýжiе грехá Долготерпели́ве прéжде бы́вшую,/ орýжiю Крестá Божéственнаго поклонéнiем показáл еси́,// орýжiя бесóв вся, и кóзни вся́ко побеждáющую, Благоутрóбне.
Слáва Ѻтцý и Сы́ну и Святóму Дýху.
Тропáрь: Цéну за всех, Свою́ прéжде излiя́вый кровь,/ бáнею слез чи́стую тя содéловает,/ прокáзою лю́тою болéвшую злéйшаго дея́нiя,// вся́ко éже бы́ти всем дáвый.
И ны́не и прúсно и во вéки векóв. Амúнь.
Богорóдичен: Слóва вся́каго есть вы́шшее, éже на Тебé, Дéво,/ Слóво бо Ѻ́тчее в Тебé боголéпно всели́ся,/ разрешéнiе согрешéнiй всем согрешáющим,// слóвом еди́нем подавáяй.
Катавáсiя (глас 4): Твоя́ песнослóвцы, Богорóдице,/ живы́й и незави́стный Истóчниче,/ лик себé совокýпльшiя, духóвно утверди́,/ в честнéм вхождéнiи Твоéм// венцéв слáвы сподóби.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк Трióди (прп. Марíи), глас 3: Блудáми пéрвее преиспóлнена вся́ческими,/ Хрiстóва невéста днесь покая́нiем яви́ся,/ Áнгельское жи́тельство подражáющи,/ дéмоны Крестá орýжiем погубля́ет./ Сегó рáди Цáрствiя невéста яви́лася еси́,// Марíе преслáвная.
Íкос: Áгницу Хрiстóву и дщерь пéсньми восхвáлим ны́не,/ Марíю приснопáмятную, я́вльшуюся Еги́петское овчá:/ и прéлести сих всея́ избежé,/ и еди́на принесéся Цéркви совершéнное возращéнiе,/ воздержáнiем и моли́твою подвизáющися пáче мéры человéческаго естествá./ Тéмже и возвы́си ея́ и житié и дея́нiе, еди́н Вседержи́тель,// Марíи преслáвныя.
Седáлен Трióди (прп. Марíи), глас 8: Взыгрáнiя вся плотскáя обуздáвши труды́ пóстническими,/ мýжественное яви́ла еси́ души́ твоея́ мудровáнiе./ Крест бо Госпóдень ви́дети возжелáвши,/ самýю себé всечестнáя мíрови распя́ла еси́:/ отню́дуже и к желáнiю áнгельскаго жи́тельства/ любéзно упрáвила еси́ себé всеблажéнная./ Моли́ Хрiстá Бóга, оставлéнiе согрешéнiй даровáти,// чтýщим любóвiю святýю пáмять твою́.
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Богорóдичен Трióди, глас 8: Небéсная вратá и ковчéг, всесвятýю гóру,/ светозáрный óблак воспои́м, неопали́мую купинý,/ словéсный рай, Éвино воззвáнiе,/ вселéнныя всея́ вели́кое сокрóвище:/ я́ко спасéнiе в Ней содéяся мíрови,/ и оставлéнiе дрéвних согрешéнiй./ Тем и вопiéм Ей:/ моли́ся Сы́ну Твоемý и Бóгу,/ согрешéнiй оставлéнiе даровáти,// благочéстно покланя́ющимся всесвятóму Рождествý Твоемý.
ПЕСНЬ 4
Iрмóс: Гóру Тя благодáтiю Бóжiею прiосенéнную,/ прозорли́выма Аввакýм/ усмотри́в очи́ма,/ из Тебé изы́ти Iзрáилеву провозглашáше Святóму,/ во Спасéнiе нáше// и обновлéнiе.
Хор: Слáва, Гóсподи, Святóму Воскресéнiю Твоемý.
Чтец: Кто сей Спас и҆́же из Едóма исходя́, венéц нося́ тернóвен,/ очервлéнну ри́зу имы́й, на дрéве ви́ся;/ Iзрáилев есть Сей Святы́й,// во Спасéнiе нáше и обновлéнiе.
На 12.Хор: Гóсподи, услы́шах слух Твой и убоя́хся;/ Гóсподи, разумéх делá Твоя́ и ужасóхся.
Чтец: Ви́дите лю́дiе непокори́вiи, и устыди́теся:/ Егóже бо я́ко злодéя вы вознести́ на крест у Пiлáта испроси́сте умоврéдне,// смéрти разруши́в си́лу, боголéпно воскрéс из грóба.
Хор: Внегдá смутúтися душù моéй во гнéве,/ мúлость Твою́ помянéши.
Богорóдичен: Дрéво Тя, Дéво, жи́зни вéмы:/ не бо снéди плод смертонóсный человéком из Тебé прозябé,/ но животá присносýщнаго наслаждéнiе,// во Спасéнiе нас пою́щих Тя.
Глас 1
На 10.Хор: Бог от ю́га прiúдет,/ и Святы́й из горы́ приосенéнныя чáщи.
Чтец: Слы́ши чудéс нéбо, и внушáй землé,/ я́ко Дщи пéрстнаго ýбо пáдшаго Адáма, Бóгу наречéна бысть,/ и Своемý Содéтелю Роди́тельница,// на Спасéнiе нáше и обновлéнiе.
Хор: Покры́ Небесá добродéтель Егó,/ и хвалы́ Егó испóлнь земля́.
Чтец: Поéм вели́кое и стрáшное Твоé тáинство,/ преми́рных бо утаи́вся чиноначáлiй,/ на Тя И҆́же сый сни́де я́ко дождь на рунó, Всепéтая,// на Спасéнiе нас пою́щих Тя.
Глас 8
На 8.Хор: Занé смоквь не плодопринесéт,/ и не бýдет рóда в лозáх.
Чтец: Наслаждáшеся богáтый брáшном, и одея́ньми веселя́ся:// Лáзарь же насы́титися желáше сегó трапéзы крупи́ц.
Хор: Солжéт дéло мáслинное,/ и поля́ не сотворя́т я́ди.
Чтец: Пси ýбо облизовáху язы́ком ни́щаго Лáзаря стрýпы,/ сострадáтельнейшее бывáюще,// богáтаго рáзума ко убóгому.
На 6.Хор: Оскудéша óвцы от пúщи,/ и не бýдет волóв при я́слех.
Чтец: Пред враты́ валя́шеся дрéвле богáтаго, Спáсе,/ Лáзарь мýчимь я́звами убóжества,// отонýдуже ны́не прославля́ется.
Хор: Аз же о Гóсподе возрáдуюся,/ возвеселю́ся о Бóзе, Спáсе моéм.
Богорóдичен: Егóже родилá еси́, Пречи́стая,/ моли́ спасти́ся воспевáющим Тя, от рабóты льсти́ваго,// я́ко еди́на еси́ нам Предстáтельница.
Глас 8
На 4.Хор: Госпóдь Бог мой сúла моя́/ и учинúт нóзе моù на совершéнiе.
Чтец: Я́ко Содéтель человéческаго естествá,/ я́ко ми́лости истóчник, и благоутрóбiя богáтство,/ ущéдрил еси́, Человеколю́бче, прибéгницу Твою́,// и исхи́тил еси́ сiю́ губи́тельнаго звéря.
Хор: И на высóкая возвóдит мя́,/ победúти ми в пéсни Егó.
Чтец: Крест ви́дети потщáвшися,/ крéстным просвещéнiем, Марíе, озари́лася еси́,/ Крестóм бесéдовавшаго,// мáнiем Божéственным распéншися мíрови досточýдная.
Слáва Ѻтцý и Сы́ну и Святóму Дýху.
Тропáрь: Злых винá пéрвее, сласть лукáвая, мнóгим бы́вши,/ áки сóлнце просiя́вши,// всем настáвница преподóбная яви́ся согрешáющим.
И ны́не и прúсно и во вéки векóв. Амúнь.
Богорóдичен: Ум превозшлá еси́ и небéсный,/ мы́сленное нéбо всех Царя́,/ закóнов бо естествá вне, Чи́стая,// Законодáтеля и Создáтеля всех родилá еси́.
Катавáсiя (глас 4): Седя́й в Слáве/ на Престóле Божествá/ во óблаце лéгце,/ прiи́ди Iисýс Пребожéственный,/ Нетлéнною Длáнiю/ и спасé зовýщiя:// слáва, Хрїстé, си́ле Твоéй.
ПЕСНЬ 5
Iрмóс: Просвети́вый сiя́нiем пришéствiя Твоегó, Хрїстé,/ и освети́вый Крестóм Твои́м/ мíра концы́,/ сердцá просвети́/ свéтом Твоегó Богоразýмiя,// правослáвно пою́щих Тя.
Хор: Слáва, Гóсподи, Святóму Воскресéнiю Твоемý.
Чтец: Пáстыря овцáм вели́каго и Гóспода,/ iудéи дрéвом крéстным умертви́ша:/ но Той я́ко óвцы, мéртвыя, во áде погребéнныя,// держáвы смéртныя избáви.
На 12.Хор: От нóщи ýтренюет дух мой к Тебé, Бóже,/ занé свет повелéнiя Твоя́ на землù.
Чтец: Крестóм Твои́м мiр благовести́в,/ и проповéдав плéнным, Спáсе мой, оставлéнiе,/ держáву имýщаго посрами́л еси́, Хрїстé:// нáга, обнищáвша показáвый Божéственным востáнiем Твои́м.
Хор: Прáвде научúтеся, живýщiи на землù.
Богорóдичен: Прошéнiя вéрно прося́щих, Всепéтая, не прéзри:/ но прiими́, и сiя́ доношáй Сы́ну Твоемý, Пречи́стая,/ Бóгу Еди́ному Благодéтелю,// Тебé бо Предстáтельницу стяжáхом.
Глас 1
На 10.Хор: Да вóзмется нечестúвый, да не вúдит слáвы Госпóдни./ Гóсподи, высокá Твоя́ мы́шца, и не вéдеша, разумéвше же постыдя́тся.
Хор: Веселя́тся небéсныя си́лы зря́ще Тя:/ рáдуются с ни́ми человéков собрáнiя:/ Рождествóм бо Твои́м совокупи́шася, Дéво Богорóдице,// éже достóйно слáвим.
Хор: Зáвисть прiúмет лю́ди ненакáзанныя,/ и ны́не огнь супостáты поя́ст.
Чтец: Да дви́жатся вси язы́цы человéчестiи и мы́сли,/ к похвалé человéческаго вои́стинну удобрéнiя,/ Дéва предстои́т я́ве слáвящи,// вéрою Тоя́ пою́щих чудесá.
Глас 8
На 8.Хор: Приложù им зла, Гóсподи,/ приложù зла слáвным землù.
Чтец: На Авраáмлих нéдрех, Лáзаря богáтый егдá узрé,/ во свéте и слáве веселя́щася,/ óтче, взывáше, Авраáме, поми́луй мя// во огни́ осуждéннаго, и язы́ком лю́те плáменуема.
Хор: Гóсподи, в скóрби помянýхом Тя,/ в скóрби мáле наказáнiе Твоé нам.
Чтец: Наслади́лся еси́ богáтством житiя́ веселя́ся,/ Авраáм глагóлаше богáтому,/ отню́дуже мýчишися зде вéчно во огни́ сый,// ни́щiй же в весéлiи нескончáемом рáдуется, Лáзарь.
На 6.Хор: И я́ко боля́щая приближáется родúти, и в болéзни своéй вопiя́ше, тáко бы́хом Возлю́бленному Твоемý.
Чтец: Житiя́ прéлестiю богáтый бых,/ я́коже богáтый житié все сластьми́ ижди́вый, Человеколю́бче,/ но молю́ Твои́х щедрóт,// éже свободи́ти ми ся огня́, я́коже спасéся Лáзарь.
Хор: Не падéм, но падýт живýщiи на землù.
Богорóдичен: Мáтернее дерзновéнiе к Сы́ну стяжáвши, Всечи́стая,/ срóднаго промышлéнiя о нас не прéзри, мóлимся,/ я́ко Тя и еди́ну, хрiстiáне ко Влады́це,// умилостивлéнiе благопрiя́тное предлагáем.
Глас 8
На 4.Хор: Воскрéснут мéртвiи, и востáнут, úже во гробéх,/ и возвеселя́тся, úже на землù.
Чтец: Моисéй прослáвися иногдá на Сiнáи,/ Бóжiя зáдняя тáинственно ви́дев преслáвный,/ подписýя стрáнное тáинство:/ маннопрiéмлющiя же стáмны ны́не,/ óбразу пречи́стому тéпле припáдши,// Марíя áнгельское житié нóсит.
Хор: Росá бо, я́же от Тебé, исцелéнiе им есть,/ земля́ же нечестúвых падéт.
Чтец: Храм благолéпiя Твоегó вожделéвши псалóмски ви́дети,/ ýмное же селéнiе слáвы Твоея́, Твой храм оскверни́вшая,/ ýмными моли́твами, Хрiстé, Твоегó хрáма неискусомýжныя бы́вшiя,// храм мя вседéтельнаго сотвори́ Дýха.
Слáва Ѻтцý и Сы́ну и Святóму Дýху.
Тропáрь: У́дою плóти, очесы́ мнóгих улови́вшая, слáстiю крáткою,/ снедь же дiáволу сих сотвóршая,/ уловленá бысть всеи́стинно/ Божéственною благодáтiю Крестá честнáго// сладчáйшая Хрiстóви снедь бы́вши.
И ны́не и прúсно и во вéки векóв. Амúнь.
Богорóдичен: Научéн лик прорóческiй тáинству éже в Тебé,/ тáинственными богоглагóланьми, Пречи́стая,/ Тебé многообрáзно предглагóла:/ маннопрiéмлющiя же стáмны ны́не,/ óбразу пречи́стому сiя́ припáдши,// Марíя спорýчница грéшных к Бóгу.
Катавáсiя (глас 4): Ужасóшася вся́ческая/ о Божéственней слáве Твоéй:/ Ты бо, Неискусобрáчная Дéво,/ имéла еси́ во утрóбе над всéми Бóга/ и родилá еси́ Безлéтнаго Сы́на,/ всем, воспевáющим Тя,// мир подавáющая.
ПЕСНЬ 6
Iрмóс: Обы́де нас послéдняя бéздна,/ несть избавля́яй,/ вмени́хомся,/ я́ко óвцы заколéнiя,/ спаси́ лю́ди Твоя́, Бóже наш,// Ты бо крéпость немощствýющих и исправлéнiе.
Хор: Слáва, Гóсподи, Святóму Воскресéнiю Твоемý.
Чтец: Согрешéнiем первоздáннаго, Гóсподи, лю́те уязви́хомся,/ рáною же исцели́хомся Твоéю,/ éюже за ны уязви́лся еси́, Хрїстé:// Ты бо крéпость немощствýющих и исправлéнiе.
На 12.Хор: Возопúх в скóрби моéй ко Гóсподу Бóгу моемý,/ и услы́ша мя́.
Чтец: Возвéл ны еси́ из áда, Гóсподи,/ ки́та уби́в всея́дца, Всеси́льне,/ Твоéю держáвою низложи́в тогó си́лу:// Ты бо Живóт, и Свет еси́, и Воскресéнiе.
Хор: Отвéргл мя́ есù во глубины́ сéрдца морскáго,/ и рéки обыдóша мя́.
Богорóдичен: Веселя́тся о Тебé, Дéво Пречи́стая,/ рóда нáшего прáотцы, Едéм воспрiéмше Тобóю,/ егóже преступлéнiем погуби́ша:// Ты бо, Чи́стая, и прéжде Рождествá, и по Рождествé еси́.
Глас 1
На 10.Хор: Вся высоты́ Твоя́ и вóлны Твоя́ на мне преидóша.
Чтец: Предстоя́т раболéпне Рождествý Твоемý чи́ни небéснiи,/ дивя́щеся достóйно Твоемý безсéменному Рождествý, Приснодéво:// Ты бо, Чи́стая, и прéжде Рождествá, и по Рождествé еси́.
Хор: Едá приложý призрéти ми ко хрáму святóму Твоемý?
Чтец: Воплоти́ся прéжде сый Безплóтен, Слóво из Тебé, Пречи́стая,/ вся́ческая вóлею творя́й,// безтелéсных вóинства приведы́й от небытiя́, я́ко Всеси́лен.
Глас 8
На 8.Хор: Возлiя́ся водá до душù моея́,/ бéздна обы́де мя́ послéдняя.
Чтец: Богáтый себé плáменю óгненному осуди́ слáстным житiéм,/ убóгiй же Лáзарь нищетý избрáв в сем житiи́,// сподóбися нескончáемыя рáдости.
Хор: Понрé главá моя́ в разсéли гор,/ снидóх в зéмлю, ея́же вереù ея́ заклéпи вéчнiи.
Чтец: В нéдрех Авраáмлих Лáзарь сподóбися,/ вéчнаго животá наслаждáяся,// огню́ же богáтый душéю и тéлом осуди́ся мýчася.
На 6.Хор: И да взы́дет из истлéнiя живóт мой к Тебé, Гóсподи, Бóже мой.
Чтец: Осуждéн есть во огнь богáтый Лáзаря рáди:/ не осуди́ менé окая́ннаго молю́ся, человеколю́бче Гóсподи,// но я́ко Лáзаря, свéта мя Твоегó сподóби.
Хор: И да прiúдет к Тебé молúтва моя́, ко хрáму святóму Твоемý.
Богорóдичен: Да избáвимся лю́тых прегрешéнiй/ моли́твами Твои́ми Богомáти Чи́стая,/ и да получи́м Божéственное просвещéнiе,// из Тебé несказáнно воплóщшагося Сы́на Бóжiя.
Глас 8
На 4.Хор: Храня́щiи сýетная и лóжная, мúлость свою́ остáвиша.
Чтец: Рáдуются, Марíе, Áнгельская вóинства,/ рáвное преподóбная житié сим в тебé зря́ще,// и слáву Гóсподеви зовýт.
Хор: Елúка обещáх, воздáм Тебé во спасéнiе моé, Гóсподеви.
Чтец: Ужасáются бесóв мрáчных состоя́нiя,/ терпели́ваго твоея́ крéпости,/ я́ко женá преслáвно, и нагáя,// и еди́ная сим возмоглá еси́.
Слáва Ѻтцý и Сы́ну и Святóму Дýху.
Тропáрь: Просiя́ла еси́ áки сóлнце Марíе всехвáльная,/ и пусты́ню чудесы́ всю просвети́ла еси́.// Тéмже и менé свéтом уясни́.
И ны́не и прúсно и во вéки векóв. Амúнь.
Богорóдичен: Áнгели, просвети́вшеся слáвою Рождествá Твоегó,/ на земли́ мир всем нам,// и благоволéнiе человéком, Дéво, возопи́ша.
Катавáсiя (глас 4): Божéственное сié и всечестнóе/ совершáюще прáзднество,/ Богомýдрiи, Богомáтере,/ прiиди́те, рукáми восплéщим,// от Нея́ рóждшагося Бóга слáвим.
Гóсподи, поми́луй. (Трúжды)
Слáва Ѻтцý и Сыну и Святóму Дýху, и ны́не и присно и во вéки векóв, аминь.
Кондáк воскрéсный, глас 1: Воскрéсл еси́, я́ко Бог, из грóба во слáве,/ и мiр совоскреси́л еси́;/ и естествó человéческое я́ко Бóга воспевáет Тя, и смерть исчезé;/ Адáм же ликýет, Влады́ко;/ Éва ны́не от уз избавля́ема рáдуется, зовýщи:// Ты еси́, И҆́же всем подая́, Хрїстé, воскресéнiе.
Íкос: Воскрéсшаго триднéвно воспои́м я́ко Бóга Всеси́льна,/ и вратá áдова стéршаго,/ и я́же от вéка из грóба воздви́гшаго,/ миронóсицам я́вльшагося, я́коже благоизвóлил есть,/ прéжде сим éже рáдуйтеся, рекíй:/ и апóстолом рáдость возвещáя, я́ко Еди́н Жизнодáвец./ Тéмже вéрою жены́ ученикóм знáменiя побéды благовествýют,/ и ад стенéт, и смерть рыдáет:/ мiр же весели́тся, и вси с ним рáдуются.// Ты бо пóдал еси́, Хрїстé, всем Воскресéнiе.
Продолженiе здесь