Неделя третья Великаго поста, Крестопоклонная. Глас 7. ВСЕНОЩНОЕ БДЕНИЕ. УТРЕНЯ. КАНОН
19 мáрта 2023 гóда. Недéля трéтiя Велúкaго постá. Крестопоклóнная. Глас 7. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (канóн)
Начало зри здесь ( великая вечéрня) и здесь ( ýтреня)
[НЕПОРОЧНЫ]Избрáннiи стiхи из псалмá 118: (глас 5 всегдá): Блажéни непорóчнiи в путь, ходя́щiи в закóне Госпóдни. Блажéни испытáющiи свидéнiя Егó, всем сéрдцем взы́щут Егó, не дéлающiи бо беззакóнiя, в путéх Егó ходи́ша. Ты заповéдал еси зáповеди Твоя сохрани́ти зелó. Дабы́ испрáвилися путié мои, сохрани́ти оправдáнiя Твоя. Тогдá не постыжýся, внегдá призрéти ми на вся зáповеди Твоя. Исповéмся Тебé в прáвости сéрдца, внегдá научи́ти ми ся судьбáм прáвды Твоея́. Оправдáнiя Твоя сохраню́, не остáви менé до зелá. В чесóм испрáвит юнéйшiй путь свой? Внегдá сохрани́ти словесá Твоя. Всем сéрдцем мои́м взыскáх Тебé, не отри́ни менé от зáповедей Твои́х. В сéрдце моéм скрых словесá Твоя, яко да не согрешý Тебé. Благословéн еси, Гóсподи: научи́ мя оправдáнiем Твои́м.
ПОЛИЕЛЕЙ
Хор: Хвали́те И҆́мя Госпóдне, хвали́те, раби́ Гóспода.
Аллилýїа (трúжды)
Благословéн Госпóдь от Сióна, живы́й во Iерусали́ме.
Аллилýїа (трúжды)
Исповéдайтеся Гóсподеви, я́ко Благ, я́ко в век ми́лость Егó.
Аллилýїа (трúжды)
Исповéдайтеся Бóгу Небéсному, я́ко в век ми́лость Егó.
Аллилýїа (трúжды)
ТРОПАРИ ВОСКРЕСНЫ ПО НЕПОРОЧНАХ, ГЛАС 5
Благословéн есù, Гóсподи,/научù мя оправдáнiем Твоúм. (Пс.118:12)
Áнгельскiй собóр удиви́ся,/ зря Тебé в мéртвых вмени́вшася,/ смéртную же, Спáсе, крéпость разори́вша,/ и с Собóю Адáма воздви́гша,/ и от áда вся свобóждша.
Благословéн есù, Гóсподи,/научù мя оправдáнiем Твоúм.
Почтó ми́ра с ми́лостивными слезáми,/ о учени́цы, растворя́ете?/ Блистáяйся во грóбе Áнгел мvронóсицам вещáше:/ ви́дите вы гроб и уразумéйте,/ Спас бо воскрéсе от грóба.
Благословéн есù, Гóсподи,/научù мя оправдáнiем Твоúм.
Зелó рáно мvронóсицы течáху/ ко грóбу Твоему рыдáющiя,/ но предстá к ним Áнгел и речé:/ рыдáнiя врéмя престá, не плáчите,/ воскресéнiе же апóстолом рцы́те.
Благословéн есù, Гóсподи,/научù мя оправдáнiем Твоúм.
Мvронóсицы жены́ с ми́ры пришéдшiя/ ко грóбу Твоемý, Спáсе, рыдáху,/ Áнгел же к ним речé, глагóля:/ что с мéртвыми живáго помышля́ете?/ Яко Бог бо, воскрéсе от грóба.
Слáва Ѻтцý и Сы́ну и Святóму Дýху.
Трóичен: Поклони́мся Ѻтцý/ и Егó Сы́нови, и Святóму Дýху,/ Святéй Трóице во еди́ном существé,/ с Серафíмы зовýще:/ Свят, Свят, Свят еси, Гóсподи.
И ны́не и прúсно и во вéки векóв. Амúнь.
Богорóдичен: Жизнодáвца рóждши,/ грехá, Дéво, Адáма избáвила еси,/ рáдость же Éве/ в печáли мéсто подалá еси,/ пáдшiя же от жи́зни/ к сей напрáви/ из Тебé воплоти́выйся Бог и Человéк.
Чтец: Аллилýїа, аллилýїа, аллилýїа, слáва Тебé Бóже. (3 рáза)
Гóсподи, поми́луй. (3 рáза)
Слáва Ѻтцý и Сыну и Святóму Дýху, и ныне и при́сно и во вéки векóв. Аминь.
Ипакоú воскрéсны, глас 7: И҆́же наш зрак воспрiéмый,/ и претерпéвый Крест плóтски,/ спаси́ мя воскресéнiем Твои́м Хрiстé Бóже,// я́ко Человеколю́бец.
СТЕПЕННА, ГЛАС 7
1 АНТИФОН
Хор: Плен Сióнь от лéсти обратúв,/ и менé Спáсе, оживù,// изимáя рабóтныя стрáсти. (Двáжды)
В юг сéяй скóрби пóстныя со слéзами,// сей рáдостныя пóжнет рукоя́ти присноживопитáнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
И ны́не и прúсно и во вéки векóв. Амúнь.
Святы́м Дýхом истóчник Божéственных сокрóвищ,/ от Негóже премýдрость, рáзум, страх:// Томý хвалá и слáва, честь и держáва.
2 АНТИФОН
Áще не Госпóдь созúждет дом душéвный, всýе труждáемся:// рáзве бо Тогó ни дея́нiе, ни слóво совершáется. (Двáжды)
Плодá чрéвна, святíи духодви́жно прозябáют// отéческая предáнiя, сыноположéнiя. (Двáжды)
Слáва Ѻтцý и Сы́ну и Святóму Дýху.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
И ны́не и прúсно и во вéки векóв. Амúнь.
Святы́м Дýхом, вся́ческая éже бы́ти и҆́мут:/ прéжде бо всех Бог, всех Госпóдьство,// свет непристýпен, живóт всех.
3 АНТИФОН
Боя́щiися Гóспода, путù животá обрéтше,// ны́не и прúсно ублажáются слáвою нетлéнною. (Двáжды)
Óкрест трапéзы твоея́, я́ко стéблiе ви́дя исчáдiя твоя́,// рáдуйся и весели́ся, приводя́ сiя́ Хрiстóви пастыреначáльнику. (Двáжды)
Слáва Ѻтцý и Сы́ну и Святóму Дýху.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
И ны́не и прúсно и во вéки векóв. Амúнь.
Святы́м Дýхом глубинá даровáнiй,/ богáтство слáвы, судéб глубинá вéлiя:// единослáвен Отцý, и Сы́ну, служи́мь бо.
ПРОКИМЕН
Чтец: Прокíмен, глас седьмы́й, псалóм Давíдов: Воскресни́, Гóсподи Бóже мой, да вознесéтся рукá Твоя́, не забýди убóгих Твои́х до концá. (Пс.9:33)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Исповéмся Тебé Гóсподи всем сéрдцем мои́м, повéм вся чудесá Твоя́.(Пс.9:2)
Хор: Воскреснù, Гóсподи Бóже мой, да вознесéтся рукá Твоя́,// не забýди убóгих Твоúх до концá.
Чтец: Воскресни́, Гóсподи Бóже мой, да вознесéтся рукá Твоя́.
Хор: Не забýди убóгих Твоúх до концá.
Чтец: Гóсподу помóлимся.
Хор: Гóсподи, помúлуй.
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Чтец: Вся́кое дыхáнiе да хвáлит Гóспода. (Пс.150:6)
Хор: Всякое дыхáнiе да хвáлит Гóспода.
Чтец: Хвали́те Бóга во святы́х Егó, хвали́те Егó во утвержéнiи си́лы Егó.(Пс.150:1)
Хор: Всякое дыхáнiе да хвáлит Гóспода.
Чтец:Вся́кое дыхáнiе.
Хор: Да хвáлит Гóспода.
ЕВАНГЕЛИЕ
От Iоáнна Святáго Евáнгелiя чтéнiе.
Хор: Слáва Тебé, Гóсподи, слáва Тебé.
(Ин.зач.63): Во врéмя óно, во еди́ну от суббóт, Марíя Магдали́на прiи́де заýтра, ещé сýщи тме, на гроб, и ви́де кáмень взят от грóба. Течé ýбо и прiи́де к Сíмону Петрý, и к другóму ученикý, егóже любля́ше Iисýс, и глагóла и҆́ма: взя́ша Гóспода от грóба, и не вем, где положи́ша Егó. Изы́де же Петр и другíй учени́к, и идя́ста ко грóбу. Течáста же óба вкýпе: и другíй учени́к течé скорéе Петрá, и прiи́де прéжде ко грóбу. И прини́к ви́де ри́зы лежáща, обáче не вни́де. Прiи́де же Сíмон Петр в след егó, и вни́де во гроб, и ви́де ри́зы еди́ны лежáща. И судáрь, и҆́же бе на главé Егó, не с ри́зами лежáщь, но осóбь свит на еди́ном мéсте. Тогдá ýбо вни́де и другíй учени́к, пришéдый прéжде ко грóбу, и ви́де, и вéрова. Не у бо вéдяху Писáнiя, я́ко подобáет Емý из мéртвых воскрéснути. Идóста же пáки к себé ученикá.
[Русский синодальный перевод]В то время, в первый же день недели, Мария Магдалина приходит ко гробу рано, когда было еще темно, и видит, что камень отвален от гроба. Итак, бежит и приходит к Симону Петру и к другому ученику, которого любил Иисус, и говорит им: унесли Господа из гроба, и не знаем, где положили Его. Тотчас вышел Петр и другой ученик, и пошли ко гробу. Они побежали оба вместе; но другой ученик бежал скорее Петра, и пришел ко гробу первый. И, наклонившись, увидел лежащие пелены; но не вошел во гроб. Вслед за ним приходит Симон Петр, и входит во гроб, и видит одни пелены лежащие, и плат, который был на главе Его, не с пеленами лежащий, но особо свитый на другом месте. Тогда вошел и другой ученик, прежде пришедший ко гробу, и увидел, и уверовал. Ибо они еще не знали из Писания, что Ему надлежало воскреснуть из мертвых. Итак ученики опять возвратились к себе.(Ин.20:1-10)
Хор: Слáва Тебé, Гóсподи, слáва Тебé.
Воскресéнiе Хрїстóво ви́девше, поклони́мся Святóму Гóсподу Iисýсу, еди́ному безгрéшному, Крестý Твоемý покланя́емся, Хрїстé, и святóе Воскресéнiе Твоé поéм и слáвим: Ты бо еси́ Бог наш, рáзве Тебé инóго не знáем, и҆́мя Твоé именýем. Прiиди́те вси вéрнiи, поклони́мся Святóму Хрїстóву Воскресéнiю: се бо прiи́де Крестóм рáдость всемý мíру. Всегдá благословя́ще Гóспода, поéм Воскресéнiе Егó: распя́тiе бо претерпéв, смéртiю смерть разруши́.
Псалом 50
Поми́луй мя, Бóже, по вели́цей ми́лости Твоéй, и по мнóжеству щедрóт Твоих очи́сти беззакóнiе моé. Наипáче омы́й мя от беззакóнiя моегó, и от грехá моегó очи́сти мя. Яко беззакóнiе моé аз знáю и грех мой прéдо мнóю есть выну. Тебе Единому согреши́х, и лукáвая пред Тобóю сотвори́х; яко да оправди́шися во словесéх Твоих и победи́ши, внегдá суди́ти Ти. Се бо в беззакóнiих зачáт есмь, и во гресéх роди́ мя мáти моя. Се бо и҆́стину возлюби́л еси́, безвéстная и тáйная премýдрости Твоея яви́л ми еси́. Окропи́ши мя иссóпом и очи́щуся, омы́еши мя, и пáче снéга убелюся. Слýху моемý дáси рáдость и весéлiе, возрáдуются кóсти смирéнныя. Отврати́ лицé Твоé от грех мои́х, и вся беззакóнiя моя очи́сти. Сéрдце чи́сто сози́жди во мне, Бóже, и дух прав обнови́ во утрóбе моéй. Не отвéржи менé от лицá Твоегó, и Дýха Твоегó Святáго не отыми́ от менé. Воздáждь ми рáдость спасéнiя Твоегó, и Дýхом Влады́чним утверди́ мя. Научý беззакóнныя путéм Твоим, и нечести́вiи к Тебé обратятся. Избáви мя от кровéй, Бóже, Бóже спасéнiя моегó, возрáдуется язык мой прáвде Твоéй. Гóсподи, устнé мои отвéрзеши, и устá моя возвестя́т хвалý Твою́. Яко áще бы восхотéл еси жéртвы, дал бых ýбо, всесожжéнiя не благоволи́ши. Жéртва Бóгу дух сокрушéн, сéрдце сокрушéнно и смирéнно Бог не уничижи́т. Ублажи́, Гóсподи, благоволéнiем Твои́м Сióна, и да сози́ждутся стéны Iерусали́мскiя. Тогдá благоволи́ши жéртву прáвды, возношéнiе и всесожегáемая; тогдá возложáт на олтáрь Твой тельцы́.
Слáва Ѻтцý и Сы́ну и Святóму Дýху.
Глас 8 (Трióди): Покая́нiя отвéрзи ми двéри Жизнодáвче,/ ýтренюет бо дух мой ко хрáму святóму Твоемý,/ храм нося́й телéсный весь осквернéн:/ но я́ко щедр, очи́сти// благоутрóбною Твоéю ми́лостiю.
И҆ ны́не и прúсно и во вéки векóв. Амúнь.
Богорóдичен (Трióди): На спасéнiя стези́ настáви мя Богорóдице,/ стýдными бо окаля́х дýшу грехми́,/ и в лéности все житié моé ижди́х:/ но Твои́ми моли́твами/ избáви мя от вся́кiя нечистоты́.
Таже, глас 6: Поми́луй мя, Бóже,/ по вели́цей ми́лости Твоéй, / и по мнóжеству щедрóт Твои́х,/ очи́сти беззакóнiе моé. (Пс.50:3)
Стiхúра (Трióди), глас 6: Мнóжества содéянных мнóю лю́тых, помышля́я окая́нный,/ трепéщу стрáшнаго дне сýднаго:/ но надéяся на ми́лость благоутрóбiя Твоегó,/ я́ко Давíд вопiю́ Ти:/ поми́луй мя Бóже// по вели́цей Твоéй ми́лости.
Гóсподи, поми́луй. (12 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
КАНОН ВОСКРЕСНЫЙ, ГЛАС 7
(совмещéнный с канóном Богорóдицы, глас 7 и канóном Трióди (Креста) глас 1)
ПЕСНЬ 1
Iрмóс: Мáнiем Твои́м/ на земны́й óбраз преложи́ся/ прéжде удоборазливáемое/ воднóе естествó, Гóсподи./ Тéмже немóкренно пешешéствовав Iзрáиль,// поéт Тебé песнь побéдную.
Хор (припéв): Слáва, Гóсподи, Святóму Воскресéнiю Твоемý.
Чтец (тропáрь): Осуди́ся смéртное мучи́тельство дрéвом,/ непрáведною смéртiю осуждéну Ти, Гóсподи:/ отню́дуже князь тьмы Тебé не одолéв,// прáведно изгнáн бысть.
Хор: Слáва, Гóсподи, Святóму Воскресéнiю Твоемý.
Чтец: Ад Тебé прибли́жися,/ и зубы́ не возмóг стéрти тéло Твоé,/ челюстьми́ сокруши́ся./ Отню́дуже Спáсе, болéзни разрýш смéртныя,// воскрéсл еси́ триднéвен.
Хор: Пресвятáя Богорóдице, спасù нас.
Богорóдичен: Разреши́шася болéзни прамáтере Éвы:/ болéзни бо избежáвше, неискусомýжно родилá еси́.// Отню́дуже я́ве Богорóдицу, Пречи́стая, вéдуще Тя, вси слáвим.
Канон Богородицы, глас 7
Хор: Пресвятáя Богорóдице, спасù нас.
Чтец: Бéздну рóждшая благоутрóбiя, Дéво,/ дýшу мою́ озари́ светонóсным Твои́м сiя́нiем,// я́ко да достóйно воспою́ твои́х чудéс бéздну.
Хор: Пресвятáя Богорóдице, спасù нас.
Чтец: Стрелóю грехóвною уя́звлены нас Слóво ви́дев,/ я́ко Благодéтель ущéдри:/ отню́дуже несказáнно соедини́ся, Всечи́стая, плóтiю,// и҆́же из Тебé Пребожéственный.
Канон Триоди (Креста), глас 1
Хор: Слáва, Гóсподи, Крестý Твоемý Честнóму.
Чтец: Торжествá день, востáнiем Хрiстóвым,/ смерть безвéстна показáся,/ жи́зни возсiя́ заря́,/ Адáм востáв ликýет рáдостiю:// тéмже воскли́кнем, побéдную пою́ще. (двáжды)
Хор: Слáва, Гóсподи, Крестý Твоемý Честнóму.
Чтец: Поклонéнiя день честнáго Крестá,/ прiиди́те к семý вси:/ востáнiя бо Хрiстóва зари́,/ светосiя́яй предлагáет ны́не,// тогó облобызáим душéвно рáдующеся. (двáжды)
Хор: Слáва, Гóсподи, Крестý Твоемý Честнóму.
Чтец: Яви́ся вели́кiй Госпóдень Крéсте,/ покажи́ ми зрак Божéственный красоты́ твоея́ ны́не,/ достóйно поклóнника хвалы́ твоея́:/ и́бо я́ко одушевлéнну тебé,// и возглашáю, и облобызáю тя.
Хор: Слáва, Гóсподи, Крестý Твоемý Честнóму.
Чтец: Да восхвáлят соглáсно нéбо и земля́,/ я́ко предлежи́т всем всеблажéннейшiй Крест,/ на нéмже пригвождéн телéсне пожрéся Хрiстóс:// тогó лобызáим душéвно рáдующеся.
Слáва Отцý и Сыну и Святóму Дýху.
Тропáрь: О Трóице начертáньми! О Еди́нице зрáком!/ Óтче, Сы́не, и Дýше,/ единоси́льная Еди́нице,/ в совéте и хотéнiи, и держáвы начáле, мiр Твой сохрани́,// мир подаю́щи.
И ныне и прúсно и во вéки векóв, амúнь.
Богорóдичен: Искýса никáкоже вéдущи мýжеска Дéво,/ безсéменно раждáеши Младéнца,/ чи́сто нóсиши рождéнiе,/ мíра Творцá Хрiстá Бóга:// Тогó моли́ умири́ти вся́ческая.
Катавáсiя Трióди (глас 1): Божéственнейшiй прообрази́ дрéвле Моисéй,/ в Чермнéм мóри/ провéд Iзрáиля Крестóм Твои́м,/ вóду жезлóм пресéк,/ песнь Тебé исхóдную// воспевáя Хрiстé Бóже.
ПЕСНЬ 3
Iрмóс: В начáле Небесá/ всеси́льным Слóвом Твои́м утверждéй Гóсподи Спáсе,/ и Вседéтельным и Бóжiим Дýхом,/ всю си́лу их,/ на недви́жимем мя кáмени// исповéданiя Твоегó утверди́.
Хор: Слáва, Гóсподи, Святóму Воскресéнiю Твоемý.
Чтец: Ты возшéд на дрéво,/ о нас болéзнуеши вóлею, благоутрóбне Спáсе,/ и терпи́ши я́зву, примирéнiя ходáтайственну, и спасéнiя вéрным:// éюже Твоемý, Ми́лостиве, вси примири́хомся Роди́телю.
Хор: Слáва, Гóсподи, Святóму Воскресéнiю Твоемý.
Чтец: Ты мя очи́стив от я́звы,/ душéю уя́звленнаго змíевым угрызéнiем, Хрiстé,/ и показáл еси́ свет, во тьме дрéвле мне слежáщу и во тлéнiи:// Крестóм бо во ад сошéд, менé совоскреси́л еси́.
Хор: Пресвятáя Богорóдице, спасú нас.
Богорóдичен: Неискусомýжныя Твоея́ Мáтере мольбáми/ мир мíрови подáждь, Спáсе,// и несказáнныя Твоея́ слáвы славослóвящiя Тя сподóби.
Глас 7
Хор: Пресвятáя Богорóдице, спасù нас.
Чтец: Змiй поползы́й из Едéма,/ менé обожéнiя желáнiем прельсти́в, вéрже в зéмлю:/ но И҆́же ми́лостив, и естествóм благоутрóбен, ущéдрив богосодéла,// во чрéво Твоé всéлься, и подóбен мне быв, Мáти Дéво.
Хор: Пресвятáя Богорóдице, спасù нас.
Чтец: Благословéн плод Твоегó чрéва, Дéво Богорóдице, всех рáдосте,/ рáдость бо всемý мíру родилá еси́, и весéлiе вои́стинну// разгоня́ющее печáль грехóвную, Богоневéсто.
Глас 1
Хор: Слáва, Гóсподи, Крестý Твоемý Честнóму.
Чтец: Прiиди́те, песнь пои́м нóву,/ разрушéнiе áдово торжествýюще:/ из грóба бо Хрiстóс воскрéсе,// смерть плени́в, и спасé вся́ческая. (двáжды)
Хор: Слáва, Гóсподи, Крестý Твоемý Честнóму.
Чтец: Прiиди́те, почерпéм вéрнiи,/ не от истóчника источáющаго вóду тлéнную,/ но от истóчника просвещéнiя,/ Крестá Хрiстóва поклонéнiем,// о нéмже и хвáлимся. (двáжды)
Хор: Слáва, Гóсподи, Крестý Твоемý Честнóму.
Чтец: Дрéвле егóже прообразовáше Моисéй длáньма,/ Крест Твой ны́не облобызáюще,/ ýмнаго Амали́ка побеждáем, Влады́ко Хрiстé,// и́мже и спасáемся.
Хор: Слáва, Гóсподи, Крестý Твоемý Честнóму.
Чтец: Очи́ма и устнáма чи́стыма/ пою́ще песнь рáдованiя,/ Госпóдню Крестý рáдостiю// поклони́мся вéрнiи, плéщуще пéсньми.
Слáва Отцý и Сыну и Святóму Дýху.
Тропáрь: Еди́наго в трех Ипостáсех Бóга безначáльнаго чту:/ нераздéльнаго Существá зрáком,/ Отцá, Сы́на, и Дýха Живáго,// в ни́хже крести́хомся.
И ныне и прúсно и во вéки векóв, амúнь.
Богорóдичен: В купинé Моисéй Твоé обрáзно тáинство дрéвле Чи́стая ви́де:/ я́коже бо óныя плáмень,// огнь Божествá Твою́ утрóбу не опали́.
Катавáсiя Трióди (глас 1): Утверди́ Влады́ко Хрiстé Крестóм на кáмени мя вéры,/ не поколебáтися умý прилóги врагá злáго:// еди́н бо еси́ Свят.
Гóсподи, помилуй. (3 раза)
Седáльны Трióди, глaс 6: Крест Твой, Гóсподи, освяти́ся:/ в нем бо бывáют исцелéнiя боля́щим во гресéх:// и́мже Тебé припáдаем, поми́луй нас.
Стих: Возносúте Гóспода Бóга нáшего, и покланя́йтеся поднóжiю нóгу Егó, я́ко свя́то есть.
Днесь прорóческое испóлнися слóво:/ се бо покланя́емся, на мéсто,/ идéже стоя́сте нóзе Твои́ Гóсподи:/ и дрéва спасéния вкуси́вше,/ грехóвных страстéй свобóду улучи́хом,// моли́твами Богорóдицы, еди́не Человеколю́бче.
Слáва Отцý и Сыну и Святóму Дýху.
Тóкмо водрузи́ся дрéво Хрiстé Крестá Твоегó,/ основáнiя поколебáшася смéрти Гóсподи:/ егóже бо поглоти́ желáнiем ад, отпусти́ трéпетом./ Яви́л еси́ нам спасéнiе Твоé Святы́й,// и славослóвим Тя Сы́не Бóжiй, поми́луй нас.
И ныне и прúсно и во вéки векóв, амúнь.
Богорóдичен, Трióди, глас 6: Богорóдице Дéво, моли́ Сы́на Твоегó/ пригвóждшагося вóлею на Крестé,/ и воскрéсша из мéртвых, Хрiстá Бóга нáшего,// спасти́ся душáм нáшим.
ПЕСНЬ 4
Iрмóс: Óтча нéдра не остáвль,/ и сошéд на зéмлю, Хрiстé Бóже,/ тáйну услы́шах смотрéнiя Твоегó,// и прослáвих Тя, Еди́не Человеколю́бче.
Хор: Слáва, Гóсподи, Святóму Воскресéнiю Твоемý.
Чтец: Своя́ плещи́ дав, и҆́же от Дéвы воплóщься, на рáны, рабý прегреши́вшу,/ бiéн бывáет Влады́ка непови́нен,// разрешáя моя́ согрешéнiя.
Хор: Слáва, Гóсподи, Святóму Воскресéнiю Твоемý.
Чтец: Предстоя́в суди́щу судíй законопрестýпных,/ я́ко осуди́мый пови́нен бывáет, и заушáется брéнною рукóю,// создáвый человéка я́ко Бог, и судя́й прáведно земли́.
Хор: Пресвятáя Богорóдице, спасù нас.
Богорóдичен: Я́ко вои́стинну Мáти Бóжiя, Творцá Твоегó и Сы́на моли́,// к спаси́тельному напрáвити мя пристáнищу, Всенепорóчная, слáвнаго Егó хотéнiя.
Глас 7
Хор: Пресвятáя Богорóдице, спасù нас.
Чтец: Избрáнная вся и дóбрая,/ я́вльшися Бóгу прéжде создáнiя свéтлостiю, Всепéтая,// светоли́тiем Твои́м пою́щiя Тя просвети́.
Хор: Пресвятáя Богорóдице, спасù нас.
Чтец: Бóга человéком родилá еси́, Чи́стая,/ воплощéнна от чи́стых кровéй Твои́х,/ избавля́юща согрешéнiй мнóгих,// любóвiю слáвящiя и почитáющiя Тя, Мáти Дéво.
Глас 1
Хор: Слáва, Гóсподи, Крестý Твоемý Честнóму.
Чтец: Се воскрéсе Хрiстóс,/ миронóсицам женáм Áнгел речé:/ не рыдáйте, шéдше рцы́те апóстолом:/ рáдуйтеся, днесь спасéнiе мíру,// мучи́тельство врагá смéртiю разруши́ся. (двáжды)
Хор: Слáва, Гóсподи, Крестý Твоемý Честнóму.
Чтец: Живонóснаго Твоегó Крестá,/ поклóнную рáдость днесь Хрiстé сретáюще,/ предсрéтенiе твори́м всесвяты́я стрáсти Твоея́,/ ю́же во спасéнiе мíра// содéлал еси́ Спáсе, я́ко всеси́лен. (двáжды)
Хор: Слáва, Гóсподи, Крестý Твоемý Честнóму.
Чтец: Днесь бывáет рáдость на небеси́ и на земли́,/ я́ко Хрiстóво знáменiе мíру явля́ется Крест треблажéнный:/ сей бо предложéн быв,// источáет клáняющимся емý рáдость приснотекýщую.
Хор: Слáва, Гóсподи, Крестý Твоемý Честнóму.
Чтец: Что Ти принесéм Хрiстé,/ я́ко Честнóму Крестý дал еси́ нам поклони́тися?/ На нéмже всесвятáя кровь Твоя́ излiя́ся,/ идéже и плоть Твоя́ гвоздьми́ водрузи́ся,// егóже облобызáюще ны́не благодари́м Тя.
Слáва Отцý и Сыну и Святóму Дýху.
Тропáрь: Еди́наго Божествá пою́ три Ипостáси,/ нераздéльно, естéственне прóсто проповéдая,/ Отцá безначáльна, Сы́на, и Дýха Святáго сопрестóльна,/ госпóдство еди́но, и еди́но цáрство,// еди́ну держáву присносýщную.
И ныне и прúсно и во вéки векóв, амúнь.
Богорóдичен: Еди́на в женáх яви́лася еси́/ вещь пречýдна Чи́стая, слы́шанiе стрáшное:/ естествó бо Ты обнови́ла еси́, без сéмене рóждши,/ пребывáющи пáки я́коже прéжде Дéва:// роди́выйся бо из Тебé, Бог есть и́стинный.
Катавáсiя (глас 1): На Крестé Тя Си́льне,/ свети́ло вели́кое ви́дев,/ трéпетом взя́тся,/ лучи́ сопря́тав скры,/ вся же тварь воспé со стрáхом Твоé долготерпéнiе:/ и́бо испóлнися земля́// Твоегó хвалéнiя.
ПЕСНЬ 5
Iрмóс: Нощь не светлá невéрным Хрiстé,/ вéрным же просвещéнiе в слáдости словéс Твои́х./ Сегó рáди к Тебé ýтренюю,// и воспевáю Твоé Божествó.
Хор: Слáва, Гóсподи, Святóму Воскресéнiю Твоемý.
Чтец: За Твоя́ рабы́ продаéшися, Хрiстé,/ и по лани́те ударéнiе терпи́ши,/ свобóде ходáтайственно пою́щим:// к Тебé ýтренюю, и воспевáю Твоé Божествó.
Хор: Слáва, Гóсподи, Святóму Воскресéнiю Твоемý.
Чтец: Божéственною Твоéю си́лою, Хрiстé,/ нéмощiю плотскóю крéпкаго низложи́л еси́,// и победи́теля мя смéрти, Спáсе, воскресéнiем показáл еси́.
Хор: Пресвятáя Богорóдице, спасù нас.
Богорóдичен: Бóга родилá еси́ Мáти чи́стая,/ воплощéннаго из Тебé боголéпно, Всепéтая:/ понéже не познáла еси́ мýжеска пóла,// но от Святáго раждáеши Дýха.
Глас 7
Хор: Пресвятáя Богорóдице, спасù нас.
Чтец: Лéствицу узрéв Iáков, к высотé утверждéну,/ óбразу научи́ся, неискусобрáчная Тебé:// Тобóю бо Бог человéком прiобщи́ся, Всечи́стая Влады́чице.
Хор: Пресвятáя Богорóдице, спасù нас.
Чтец: Избавлéнiе вéчное Тобóю, Дéво, ны́не обрéтше/ усéрдно зовéм Ти: éже рáдуйся, Богоневéстная:// и Твои́м свéтом возрáдовавшеся, Всепéтая, пéсньми Тя поéм.
Глас 1
Хор: Слáва, Гóсподи, Крестý Твоемý Честнóму.
Чтец: Возсiя́л еси́ от грóба незаходи́мый Свéте,/ мíру облистáя нетлéнiе,/ потреби́л еси́ Гóсподи смéртный плач от конéц,// я́ко благоутрóбен. (двáжды)
Хор: Слáва, Гóсподи, Крестý Твоемý Честнóму.
Чтец: Пристýпим очищéннiи воздержáнiем,/ тéпле облобызáюще во хвалéнiи Дрéво всесвятóе,/ на нéмже Хрiстóс распинáемь,// спасé мiр, я́ко благоутрóбен. (двáжды)
Хор: Слáва, Гóсподи, Крестý Твоемý Честнóму.
Чтец: Ликýют в весéлiи Áнгельсти чи́ни,/ днесь Крестá Твоегó поклонéнiем:/ тем бо низложи́л еси́ бесóвскiя полки́,// спасы́й Хрiстé человéчество.
Хор: Слáва, Гóсподи, Крестý Твоемý Честнóму.
Чтец: Рай другíй познáся Цéрковь,/ я́коже прéжде дрéво имýщая живонóсное,/ Крест Твой Гóсподи,// из негóже прикосновéнiем безсмéртiю причасти́хомся.
Слáва Отцý и Сыну и Святóму Дýху.
Тропáрь: Собезначáльны три слáвлю, еди́наго Существá:/ Бóга Отцá, Сы́на, и Дýха,/ Свет еди́н трисiя́тельный,// кýпно держáвное цáрство, в неслiя́нном тóждестве.
И ныне и прúсно и во вéки векóв, амúнь.
Богорóдичен: Родилá еси́ естествá закóном, но пáче закóна:/ Тебé бо еди́ныя безсéменно Рождествó,/ стрáшный и помышля́емый нрав,// и глагóлемый рождéнiя Твоегó, Всенепорóчная.
Катавáсiя (глас 1): У́тренююще Тя воспевáем Спáсе щéдре,/ мир обрéтше Крестóм Твои́м,/ и́мже обнови́л еси́ род человéческiй// ко свéту невечéрнему вводя́ нас.
ПЕСНЬ 6
Iрмóс: Плáвающаго в молвé житéйских попечéнiй,/ с кораблéм потопля́ема грехи́,/ и душетлéнному звéрю приметáема,/ я́ко Ióна, Хрiстé, вопiю́ Ти:// из смертонóсныя глубины́ возведи́ мя.
Хор: Слáва, Гóсподи, Святóму Воскресéнiю Твоемý.
Чтец: Воспоминáху Тя заключéнныя во áде дýши, и остáвльшiяся прáведных,/ и от Тебé спасéнiя моля́хуся:/ éже Крестóм, Хрiстé, пóдал еси́ преиспóдним,// пришéд я́ко благоутрóбен.
Хор: Слáва, Гóсподи, Святóму Воскресéнiю Твоемý.
Чтец: Ко одушевлéнному Твоемý и нерукотворéнному хрáму,/ разрушéну бы́вшу страдáньми,/ воззрéти пáки лик апóстольскiй отчáяся:/ но пáче надéжды поклóнься,// воскрéсша повсю́ду проповéда.
Хор: Пресвятáя Богорóдице, спасù нас.
Богорóдичен: Неизречéннаго рождествá Твоегó всенепорóчнаго óбраз,/ Дéво богоневéстная, и҆́же нас рáди,/ кто от человéк сказáти возмóжет?/ Я́ко Бог неопи́санне, Слóво соедини́вся Тебé,// плоть из Тебé бысть.
Глас 7
Хор: Пресвятáя Богорóдице, спасù нас.
Чтец: Закóннiи Тя óбразы, и прорóческая проречéнiя я́ве предвозвещáху,/ хотя́щую роди́ти Благодéтеля, Чи́стая, всея́ твáри,/ многочáстне и многообрáзне благодéйствовавшаго// вéрно воспевáющих Тя.
Хор: Пресвятáя Богорóдице, спасù нас.
Чтец: Устрáншагося дрéвле навéтом человекоубíйцы, Адáма первоздáннаго/ рáйскiя божéственныя слáдости,/ Неискусобрáчная, пáки возвелá еси́,// рóждши и҆́же от преступлéнiя нас избáвившаго.
Глас 1
Хор: Слáва, Гóсподи, Крестý Твоемý Честнóму.
Чтец: Воскрéсл еси́ смерть упраздни́в Хрiстé,/ я́коже вели́кiй Царь,/ от áдовых сокрóвищ воззвáл еси́ нас// в наслаждéнiе Цáрства Небéснаго, в зéмлю безсмéртiя. (двáжды)
Хор: Слáва, Гóсподи, Крестý Твоемý Честнóму.
Чтец: Плéщуще пéсньми Божéственными вéрнiи, воскли́кнем Бóгу,/ Крест Госпóдень целýюще:// освящéнiя бо источáет истóчник, всем сýщим в мíре.
Хор: Слáва, Гóсподи, Крестý Твоемý Честнóму.
Чтец: Исполня́ется песнописáтельный глас:/ се бо покланя́емся пречи́стых ног Твои́х поднóжiю Всеси́льне,// Крестý Твоемý Честнóму, тривожделéнному дрéву.
Хор: Слáва, Гóсподи, Крестý Твоемý Честнóму.
Чтец: Éже ви́де дрéво в Твой хлеб вложéное, во прорóцех рыдáтель,/ Крест Твой Щéдре облобызáюще,// воспевáем Твоя́ ýзы, и погребéнiе, копié же и гвóздiя.
Хор: Слáва, Гóсподи, Крестý Твоемý Честнóму.
Чтец: На рáмех егóже извóлил еси́ Хрiстé носи́ти святы́й Крест,/ и на сем вознести́ся, и распя́тися плóтiю,// облобызáюще собирáем крéпость на враги́ неви́димыя.
Слáва Отцý и Сыну и Святóму Дýху.
Тропáрь: Еди́ницу в трех начертáнiих пою́,/ и Трóицу во еди́ном естествé покланя́емую,/ Бóга трóе кýпно, Свет трисóлнечный,// Отцá, и Сы́на, и Святáго Дýха.
И ныне и прúсно и во вéки векóв, амúнь.
Богорóдичен: Чудéс вели́кое чýдо в Тебé яви́ся несквéрная Áгнице,/ взéмлющаго бо мíра грех, Áгнца родилá еси́:// Егóже моли́ прилéжно о пою́щих Тя.
Катавáсiя (глас 1): Óбраз Божéственнаго Крестá,/ Ióна во чрéве ки́тове/ простéртыма длáньма проначертá,/ и взирáше спасéн от звéря// си́лою Твоéю Слóве.
Гóсподи, поми́луй. (Трижды)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Кондáк Трióди (самоглáсен), глас 7: Не ктомý плáменное орýжiе/ храни́т врат Едéмских:/ на ты́я бо нáйде преслáвный соýз Дрéво крéстное,/ смéртное жáло, и áдова побéда прогнáся./ Предстáл бо еси́ Спáсе мой,/ вопiя́ сýщим во áде:// вни́дите пáки в рай.
Íкос: Три кресты́ водрузи́ на Голгóфе Пiлáт,/ два разбóйников, и еди́н Жизнодáвца./ Егóже ви́де ад, и речé сýщим дóле:/ о слуги́ мои́, и си́лы моя́!/ Кто водрузи́в гвóздiе в сéрдце моé,/ древяны́м мя копiéм внезáпу прободé?/ И растерзáюся, внýтренними мои́ми болю́, утрóбою уязвля́юся,/ чýвства моя́ смущáют дух мой,/ и понуждáются изрыгáти Адáма, и сýщiя от Адáма, дрéвом дáнныя ми:// Дрéво бо сiя́ ввóдит пáки в рай.
ПЕСНЬ 7
Iрмóс: Пещь óтроцы огнепáльну/ дрéвле росоточáщу показáша,/ Еди́наго Бóга воспевáюще и глагóлюще:/ превозноси́мый отцéв Бог// и препрослáвлен.
Хор: Слáва, Гóсподи, Святóму Воскресéнiю Твоемý.
Чтец: Дрéвом умерщвля́ется Адáм, вóлею преслушáнiе содéлав:/ послушáнiем же Хрiстóвым пáки обновля́емь есть.// Менé бо рáди распинáется Сын Бóжiй, препрослáвленный.
Хор: Слáва, Гóсподи, Святóму Воскресéнiю Твоемý.
Чтец: Тебé воскрéсшаго, Хрiстé, из грóба, тварь вся воспé:/ Ты бо жизнь сýщим во áде процвéл еси́,/ мéртвым воскресéнiе,// и́же во тьме, свет препрослáвленный.
Хор: Пресвятáя Богорóдице, спасù нас.
Богорóдичен: Рáдуйся, Дщи Адáма тлéннаго./ Рáдуйся, еди́на Богоневéсто./ Рáдуйся, éюже тля изгнáна бысть, я́же Бóга рóждши:// Егóже моли́, Чи́стая, спасти́ся всем нам.
Глас 7
Хор: Пресвятáя Богорóдице, спасù нас.
Чтец: Преиспещрéну, позлащéну ýтварь Тя имýщу/ возлюби́ Создáтель Твой, Дéво, и Госпóдь:// превозноси́мый отцéв Бог и препрослáвлен.
Хор: Пресвятáя Богорóдице, спасù нас.
Чтец: Очищáется, Отрокови́це, угль дрéвле Исáiа прiéм:/ знаменáтельне Твоé рождествó ви́дев,// превозноси́маго отцéв Бóга, и препрослáвлена.
Глас 1
Хор: Слáва, Гóсподи, Крестý Твоемý Честнóму.
Чтец: Воскрéсл еси́ из грóба триднéвно, я́ко спяй Гóсподи,/ áдовы врáтари порази́в Божéственною си́лою,/ и дрéвнiя воздви́г прáотцы/ еди́не благословéнный// отцéв Бóже, и препрослáвленный. (двáжды)
Хор: Слáва, Гóсподи, Крестý Твоемý Честнóму.
Чтец: Цевни́цею пéсней ликýюще/ возрáдуемся днесь лю́дiе Крéстным поклонéнiем/ на сем пригвозди́вшагося Хрiстá слáвяще,/ еди́наго благословéннаго// отцéв Бóга, и препрослáвленнаго. (двáжды)
Хор: Слáва, Гóсподи, Крестý Твоемý Честнóму.
Чтец: Показáвый умерщвлéния оргáн, жи́зни дéлателище,/ мíру облобызáтельное, Твой Крест Всещéдре,/ томý покланя́ющiяся освяти́,/ еди́не благословéнный// отцéв Бóже и препрослáвленный.
Хор: Слáва, Гóсподи, Крестý Твоемý Честнóму.
Чтец: Еди́не ми́лостиве и благоутрóбне, просвети́,/ освяти́ еди́не Iису́се,/ покланя́ющiяся вéрно Твоемý Крестý,/ и Божéственным страдáнiем,/ еди́не благословéнный// отцéв Бóже, и препрослáвленный.
Слáва Отцý и Сыну и Святóму Дýху.
Тропáрь: Еди́ницу в трех Ипостáсех, пою́ Божествó:/ Свет бо Отéц, Свет Сын, Свет Дух,/ Свéту нераздéльну пребывáющу,/ еди́нством естéственным,// и треми́ лучáми Лиц сiя́ющу.
И ныне и прúсно и во вéки векóв, амúнь.
Богорóдичен: Всех прорóк многоимени́тое Ты еси́ проповéданiе,/ вратá бо Бóжiя, рýчка златáя, земля́ святáя,/ яви́лася еси́ Дéво Богоневéстная,/ рóждшая плóтiю Iисýса Хрiстá,// отцéв Бóга, и препрослáвленна.
Катавáсiя (глас 1): Из плáмене óтроки избавлéй,/ плоть прiи́м пришéл еси́ на зéмлю,/ и на Крестé пригвождéн,/ спасéнiе нам даровáл еси́ Хрiстé,/ еди́н благословéн отцéв Бóже,// и препрослáвлен.
ПЕСНЬ 8
Iрмóс: Неопáльная огню́ в Сiнáи причáщшаяся Купинá,/ Бóга яви́ медленоязы́чному и гугни́вому Моисéови,/ и óтроки рéвность Бóжiя/ три непребори́мыя во огни́ певцы́ показá:/ вся делá Госпóдня Гóспода пóйте,// и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Пречи́стый Áгнец словéсный за мiр заклáн быв,/ престáви я́же по закóну приноси́мая,/ очи́стив сегó кромé прегрешéнiй я́ко Бог, при́сно зовýща:// вся делá Госпóдня, Гóспода пóйте, и превозноси́те во вся вéки.
Хор: Слáва, Гóсподи, Святóму Воскресéнiю Твоемý.
Чтец: Нетлéнна не сýщи прéжде стрáсти,/ воспрiя́тая от Создáтеля плоть нáша,/ по стрáсти и воскресéнiи неприкосновéнна тлéнiю устрóися,/ и смéртныя обновля́ет, зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Богорóдичен: Твоé чистóтное и всенепорóчное, Дéво,/ сквéрное и мéрзское вселéнныя очи́сти,/ и былá еси́ нáшего примирéнiя к Бóгу винá, Пречи́стая:/ тéмже Тя, Дéво, вся делá благослови́м,// и превознóсим во вся вéки.
Глас 7
Хор: Пресвятáя Богорóдице, спасù нас.
Чтец: Свéтом рождествá Твоегó,/ страннолéпно вселéнную просвети́ла еси́, Богороди́тельнице,/ сýща бо вои́стинну Бóга на объя́тiях нóсиши Твои́х,/ просвещáюща вéрныя при́сно зовýщiя:/ вся делá Госпóдня Гóспода пóйте,// и превозноси́те во вся вéки.
Хор: Пресвятáя Богорóдице, спасù нас.
Чтец: Поéм, Чи́стая, благочéстно Твоé чрéво,/ Бóга вмести́вшее несказáнно воплощáема,/ дáвшаго всем вéрным богоразýмiя просвещéнiе, при́сно зовýщим:/ вся делá Госпóдня Гóспода пóйте,// и превозноси́те во вся вéки.
Продолженiе здесь