Неделя третья Великаго поста Крестопоклонная. Глас 7. ВСЕНОЩНОЕ БДЕНИЕ.УТРЕНЯ (окончание) ЧАС ПЕРВЫЙ
19 мáрта 2023 гóда. Недéля трéтiя Велúкaго постá. Крестопоклóнная. Глас 7. Воскрéсная прáздничная слýжба для домáшнего (келéйнаго) совершéнiя. Послéдованiе ýтрени (окончáнiе). Пéрвый час.
Окончáнiе всенóщного бдéнiя. Начáло здесь ( великая вечéрня), здесь ( ýтреня) здесь ( продолжéнiе ýтрени с канóном)
Глас 1
Хор: Слáва, Гóсподи, Крестý Твоемý Честнóму.
Чтец: Ми́ро в рукáх что держитé вся́ко?/ Когó же взыскýете?/ Ны́не явлéйся ю́ноша во грóбе, вопiя́:/ воскрéсе Хрiстóс и Бог наш,// возстáвивый естествó человéков от áдовых сокрóвищ. (двáжды)
Хор: Слáва, Гóсподи, Крестý Твоемý Честнóму.
Чтец: Рáдуйся требогáтое дрéво и Божéственное, Крéсте,/ свéте сýщим во тьме,/ четвероконéчный мiр сiя́нiем твои́м,/ востáнiя Хрiстóва проявлéй зари́,// сподóби вся вéрныя дости́гнути Пáсху.
Хор: Слáва, Гóсподи, Крестý Твоемý Честнóму.
Чтец: В сiй день благоухáют ми́ра божéственныя мирополóжницы,/ живоми́рственное дрéво Крест Хрiстóв:/ обоня́им егó Богодухновéнныя вони́,// томý покланя́ющеся вéрно во вéки.
Хор: Слáва, Гóсподи, Крестý Твоемý Честнóму.
Чтец: Гряди́ Елiссéе прорóче,/ рцы я́ве, что дрéво óное,/ éже в вóду вложи́л еси́?/ Крест Хрiстóв, и́мже от глубины́ тли извлекóхомся,// томý покланя́ющеся вéрно во вéки.
Хор: Слáва, Гóсподи, Крестý Твоемý Честнóму.
Чтец: Дрéвле Iáков прообразýя Крест Твой Хрiстé,/ Ióсиф покланя́шеся Божéственнаго жезлá крáеви,/ скиптр сей стрáшный Цáрствiя Твоегó предви́дев:// емýже ны́не покланя́емся вéрно во вéки.
Благословúм Отцá, и Сы́на, и Святáго Дýха, Гóспода.
Тропáрь: Еди́на в мáтерех яви́лася еси́/ Дéва Богоневéсто Марíе,/ без мýжа роди́вши Хрiстá Спáса,/ чистоты́ знáменiе сохрани́вши:// Тебé ублажáем вéрнiи во вéки.
И ны́не и прúсно и во вéки векóв, амúнь.
Богорóдичен: Еди́но в трех начертáнiих Существó слáвя,/ не сливáю единоли́чно трех, нижé пресецáю зрáка,/ Отцá, и Сы́на, со Дýхом:// Еди́н бо над всéми Бог в Трóице.
Хор: Хвáлим, благословúм, покланя́емся Гóсподеви, пою́ще и превознося́ще во вся вéки.
Катавáсiя (глас 1): Рýце в ров вéрженый львов,/ иногдá вели́кiй во прорóцех,/ крестообрáзно простéр Данiи́л,/ невреждéн от сих снéди спасéся,// благословя́ Хрiстá Бóга во вéки.
Вóзглас: Богорóдицу и Мáтерь Свéта в пéснех возвелúчим.
Хор: Вели́чит душá Моя́ Гóспода,/ и возрáдовася дух Мой о Бóзе Спáсе Моéм.
Припéв: Честнéйшую Херувíм/ и Слáвнейшую без сравнéнiя Серафíм,/ без истлéнiя Бóга Слóва рóждшую,/ сýщую Богорóдицу, Тя величáем. (На каждый стiх)
Я́ко призрé на смирéнiе рабы́ Своея́,/ се бо от ны́не ублажáт Мя вси рóди.
Я́ко сотвори́ Мне вели́чiе Си́льный,/ и свя́то И҆́мя Егó, и ми́лость Егó в рóды родóв боя́щимся Егó.
Сотвори́ держáву мы́шцею Своéю,/ расточи́ гóрдыя мы́слiю сéрдца их.
Низложи́ си́льныя со престóл, и вознесé смирéнныя;/ áлчущiя испóлни благ, и богатя́щiяся отпусти́ тщи.
Воспрiя́т Iзрáиля óтрока Своегó, помянýти ми́лости,/ я́коже глагóла ко отцéм нáшим, Авраáму и сéмени егó, дáже до вéка.
ПЕСНЬ 9
Iрмóс: Нетлéнiя искушéнiем рóждшая,/ и всехитрецý Слóву плоть взаимодáвшая,/ Мáти неискусомýжная Дéво Богорóдице,/ Прiя́телище Нестерпи́маго,/ Селó Невмести́маго Зижди́теля Твоегó,// Тя величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же божествý страсть прилагáющiи,/ заусти́теся вси чуждемýдреннiи:/ Гóспода бо слáвы плóтiю распя́та,/ не распя́та же естествóм божéственным,// я́ко во двою́ естествý Еди́наго величáем.
Хор: Слáва, Гóсподи, Святóму Воскресéнiю Твоемý.
Чтец: И҆́же телесéм востáнiю невéрующiи,/ ко Хрїстóву шéдше грóбу, научи́теся:/ я́ко умерщвлéна бысть, и воскрéсе пáки плоть Жизнодáвца,// во уверéнiе послéдняго воскресéнiя, на нéже уповáем.
Хор: Пресвятáя Богорóдице, спасú нас.
Богорóдичен: Не божéств Трóицу, но Ипостáсей,/ нижé еди́ницу Лиц, но Божествá чтýще,/ ссецáем же Сiю́ деля́щих:// сливáем же пáки, слiя́нiе дерзáющих на Сiю́, Ю́же величáем.
Глас 7
Хор: Пресвятáя Богорóдице, спасù нас.
Чтец: Рáдости нам вéчныя ходáтаица и весéлiя яви́лася еси́/ Приснодéво Отрокови́це, Избáвителя рóждши,/ и҆́стиною и Дýхом божéственным Тогó чтущих,// я́ко Бóга избавляющаго.
Хор: Пресвятáя Богорóдице, спасù нас.
Чтец: Поя́ Давíд, Твой прáотец, Пречи́стая, Тя/ ковчéг именýет Святы́ни божéственныя,/ преестéственне Бóга вмести́вшую,/ во Отéческих Седя́щаго нéдрех,// Егóже непрестáнно вéрнiи величáем.
Глас 1
Хор: Слáва, Гóсподи, Крестý Твоемý Честнóму.
Чтец: Во гроб сошéл еси́ Жизнодáвче и Бóже,/ и сокруши́л еси́ вся заклéпы же и вереи́,/ и мéртвыя воскреси́л еси́,/ слáва востáнiю Твоемý, вопiю́щiя,// Хрiстé Спáсе всеси́льне. (двáжды)
Хор: Слáва, Гóсподи, Крестý Твоемý Честнóму.
Чтец: Гроб Твой жизнь мне Хрiстé источи́, содержáй бо жизнь,/ предстáв возопи́л еси́ живýщим во гробéх:/ сýщiи во ýзах разреши́теся,// Аз бо мíра избавлéнiе прiидóх.
Хор: Слáва, Гóсподи, Крестý Твоемý Честнóму.
Чтец: Пéсньми да взыгрáют вся древá дубрáвная,/ тезоимени́тое дрéво Крестá зря́ще облобызáемое днесь:/ на нéмже Хрiстóс вознесé главý,// я́коже прорóчествует божéственный Давíд.
Хор: Слáва, Гóсподи, Крестý Твоемý Честнóму.
Чтец: Дрéвом умéрый, дрéво тя обретóх жи́зни Хрiстонóсне Кресте мой,/ храни́телю мой неруши́мый,/ на дéмоны крéпкая держáво,/ тебé покланя́яйся днесь зовý:// освяти́ мя слáвою твоéю.
Хор: Слáва, Гóсподи, Крестý Твоемý Честнóму.
Чтец: Весели́ся, рáдуйся Цéрковь Бóжiя,/ дрéву требогáтному покланя́ющiся днесь,/ всесвятáго Крестá Хрiстóва:/ Емýже слýжат чи́нове А́нгельстiи,// и со стрáхом предстоя́т.
Слáва Отцý и Сыну и Святóму Дýху.
Тропáрь: Трóице Ли́цы, еди́нице Естествóм покланя́юся,/ Тебé Божествó Святóе,/ Отцý, и Сы́ну, со Святы́м же Дýхом,/ еди́ному начáлу, еди́ному Цáрству,// всéми влады́чествующему.
И ныне и прúсно и во вéки векóв, амúнь.
Богорóдичен: Гора́ вели́кая в ню́же всели́ся Хрiстóс,/ Ты яви́лася еси́ Дéво,/ я́коже божéственный Давíд вопiéт:/ Éюже мы вознесóхомся к небеси́,// всыни́вшеся Дýхом Всеблажéнная.
Катавáсiя (глас 1): О Мáти Дéво,/ и Богорóдице нелóжная,/ рóждшая безсéменно Хрiстá Бóга нáшего,/ на Крест вознéсшагося плóтiю,// Тя вéрнiи вси достóйно с Ним ны́не величáем.
Гóсподи, поми́луй. (Трúжды)
Слáва Отцý и Сы́ну и Святóму Дýху, и ны́не и прúсно и во вéки векóв, амúнь.
Свят Госпóдь Бог наш.
Хор: Свят Госпóдь Бог наш
Я́ко Свят Госпóдь Бог наш.
Хор: Свят Госпóдь Бог наш
Над всéми людьми́ Бог наш.
Хор: Свят Госпóдь Бог наш
Ексапостiлáрiй воскрéсный седьмый: Я́ко взя́ша Гóспода, Марíи рéкшей,/ на гроб течáста, Сíмон Петр,/ и другíй таи́нник Хрiстóв, егóже любля́ше:/ течáста же óба, и обретóста плащани́цы еди́ны внутрь лежáща,/ и главны́й же бе судáрь кромé их./ Тéмже пáки умолчáста,/ дóндеже Хрiстá ви́деста.
Слáва Ѻтцý и Сы́ну и Святóму Дýху.
Светúлен Трióди: Крест Хрiстóв честны́й/ днесь предложéнный ви́девше поклони́мся,/ и ве́рно возвесели́мся, облобызáюще любóвiю,/ на сем вóлею распéншагося прося́ще Гóспода, сподóбити всех нас,/ и Крестý Честнóму поклони́тися,// и дости́гнути Воскресéнiе неосуждéнно.
И ны́не и прúсно и во вéки векóв. Амúнь.
Богорóдичен Трióди: Дрéву, на нéмже Всечи́стая,/ пречи́стеи длáни о нас прострé,/ пригвозди́выйся Сын Твой,/ ны́не благочéстно покланя́ющимся,/ даждь нам мир, и мiроспаси́тельныя всечестны́я стрáсти предвари́ти,// и свéтлой мiрорáдостной господоимени́той Пáсце поклони́тися, и светонóсному дню.
ХВАЛИТНЫ
Хор, глас 7: Вся́кое дыхáнiе да хвáлит Гóспода./ Хвали́те Гóспода с небéс,/ хвали́те Егó в вы́шних.// Тебé подобáет песнь Бóгу.
Хвали́те Егó вси áнгели Егó,/ хвалите Егó вся си́лы Егó.// Тебé подобáет песнь Бóгу.
[В приходской практике пропускается до стихир]Хвали́те Егó, сóлнце и лунá, хвали́те Егó, вся звéзды и свет. Хвали́те Егó Небесá небéс и водá, я́же превы́ше небéс. Да восхвáлят и҆́мя Госпóдне: я́ко Той речé, и бы́ша, Той повелé, и создáшася. Постáви я́ в век и в век вéка, повелéние положи́, и не ми́мо и҆́дет. Хвали́те Гóспода от земли́, змíеве и вся бéздны: огнь, град, снег, гóлоть, дух бýрен, творя́щая слóво Егó, гóры и вси хóлми, древá плодонóсна и вси кéдри, звéрiе и вси скóти, гáди и пти́цы пернáты. Цáрiе зéмстiи и вси лю́дiе, кня́зи и вси судiи́ зéмстiи, ю́ноши и дéвы, стáрцы с ю́нотами да восхвáлят и҆́мя Госпóдне, я́ко вознесéся и҆́мя Тогó Еди́наго, исповéданiе Егó на земли́ и на небеси́. И вознесéт рог людéй Свои́х, песнь всем преподóбным Егó, сыновóм Iзрáилевым, лю́дем, приближáющымся Емý.
[В приходской практике пропускается до стихир]Воспóйте Гóсподеви песнь нóву, хвалéнiе Егó в цéркви преподóбных. Да возвеселится Iзрáиль о сотвóршем Егó, и сы́нове Сióни возрáдуются о Царé своéм. Да восхвáлят и҆́мя Егó в ли́це, в тимпáне и псалти́ри да поют Емý. Яко благоволи́т Госпóдь в людех Свои́х, и вознесéт крóткiя во спасéнiе. Восхвáлятся преподóбнiи во слáве и возрáдуются на лóжах свои́х. Возношéнiя Бóжiя в гортáни их, и мечи́ обою́ду остри́ в рукáх их: сотвори́ти отмщéнiе во языцех, обличéнiя в лю́дех, связáти цари́ их пýты, и слáвныя их ручными окóвы желéзными,
На 8.Чтец: Сотворúти в них суд напúсан:/ слáва сiя бýдет всем преподóбным Егó.
Стiхúры воскрéсные, глас 7: Воскрéсе Хрїстóс из мéртвых,/ разрýш смéртныя ýзы:/ благовести́ землé, рáдость вéлiю,// пóйте Небесá Бóжiю слáву.
Хвалúте Бóга во святых Егó,/ хвалúте Егó в утвержéнiи сúлы Егó.
Стiхúра: Воскресéнiе Хрїстóво ви́девше,/ поклони́мся святóму Гóсподу Iисýсу:// еди́ному безгрéшному.
На 6: Хвалúте Егó на сúлах Егó, хвалúте Егó по мнóжеству велúчествiя Егó.
Стiхúра: Хрiстóву воскресéнiю клáняющеся не престáем:/ Той бо спасл есть нас от беззакóнiй нáших,/ Святы́й Госпóдь Iисýс,// явлéй воскресéнiе.
Хвалúте Егó во глáсе трýбнем, хвалúте Егó во псалтúри и гýслех.
Стiхúра: Что воздáмы Гóсподеви о всех, я́же воздадé нам?/ Нас рáди Бог в человéцех,/ за истлéвшее естествó Слóво плоть бысть,/ и всели́ся в ны, к неблагодáрным, Благодéтель:/ к плéнником, Свободи́тель:/ ко и҆́же во тьме седя́щим, Сóлнце Прáвды:/ на Крестé, безстрáстный: во áде, свет:/ в смéрти, живóт: воскресéнiе, пáдших рáди./ К Немýже возопiи́м:// Бóже наш, слáва Тебé.
На 4. Хвалúте Егó в тимпáне и лúце, хвалúте Егó во стрýнах и оргáне.
Стiхúры Трióди, глас 1: Во глáсех воскли́кнем,/ в пéснех возвели́чим,/ Крест честны́й облобызáюще,/ и к нему́ возопiи́м:/ Крéсте всечéстне,/ освяти́ нáша ду́ши и телесá си́лою твоéю,/ и от вся́каго врéда сопроти́вных соблюди́ невреждéны,// благочéстно покланя́ющiяся тебé.
Хвалúте Егó в кимвáлех доброглáсных, хвалúте Егó в кимвáлех восклицáнiя. Всякое дыхáнiе да хвáлит Гóспода.
Приступи́вше почерпи́те неистощáемых вод,/ Крестá благодáтiю проливáемых:/ се предлежáщее ви́дяще Дрéво святóе,/ даровáнiй истóчник,/ напоéное крóвiю и водóю Влады́ки всех,/ на том вóлею вознéсшагося,// и земны́я воздви́гшаго.
На 2. Возносúте Гóспода Бóга нáшего,/ и покланя́йтеся поднóжiю нóгу Егó, я́ко свя́то есть.(Пс.98:5)
Стiхúра: Цéркве утверждéнiе,/ монáшествующих похвалá и спасéнiе,/ ты еси́ Крéсте всечéстне:/ тéмже покланя́ющеся тебé,/ и сéрдцем и душéю просвещáемся днесь,/ Божéственною благодáтiю на тебé Пригвозди́вшагося,/ и держáву льсти́ваго разори́вшаго,// и кля́тву потрéбльшаго.
Бог же Царь наш прéжде вéка,/ содéла спасéнiе посредé землú. (Пс.48:2)
Стiхúра: Во глáсех воскли́кнем,/ в пéснех возвели́чим,/ Крест честны́й облобызáюще,/ и к нему́ возопiи́м:/ Крéсте всечéстне,/ освяти́ нáша дýши и телесá си́лою твоéю,/ и от вся́каго врéда сопроти́вных соблюди́ невреждéны,// благочéстно покланя́ющiяся тебé.
Воскреснú Гóсподи Бóже мой, да вознесéтся рукá Твоя́,/ не забýди убóгих Твоúх до концá.(Пс.9:33)
Стiхúра, самоглáсен дне Трióди, глас 8: Высокомýдраго рáзума злых фарiсéев,/ всех Госпóдь при́тчею убежáти сегó научи́:/ и не высокомýдрствовати пáче,/ éже подобáет мýдрствовати,/ всех наказá, прописáнiе и óбраз Сам быв,/ дáже до распя́тiя и смéрти,/ Сам Себé излiя́в./ Благодаря́ще ýбо с мытарéм рцем:/ пострадáвый за ны, и безстрáстен пребы́вый Бóже,/ от страстéй нас избáви,// и спаси́ дýши нáша.
Слáва Отцý и Сыну и Святóму Дýху.
Глас 8: Высокомýдраго рáзума злых фарiсéев,/ всех Госпóдь при́тчею убежа́ти сего́ научи́:/ и не высокому́дрствовати пáче,/ éже подобáет мýдрствовати,/ всех наказá, прописáние и óбраз Сам быв,/ дáже до распя́тiя и смéрти,/ Сам Себé излiя́в./ Благодаря́ще ýбо с мытарéм рцем:/ пострадáвый за ны, и безстрáстен пребы́вый Бóже,/ от страстéй нас избáви,// и спаси́ дýши нáша.
И ны́не и прúсно и во вéки векóв. Амúнь.
Глас 2: Преблагословéнна еси́, Богорóдице Дéво,/ Воплóщшим бо ся из Тебé ад плени́ся,/ Адáм воззвáся,/ кля́тва потреби́ся,/ Éва свободи́ся,/ смерть умертви́ся, и мы ожи́хом./ Тем воспевáюще вопiéм:/ благословéн Хрїстóс Бог,// благоволи́вый тáко, слáва Тебé.
Возглас: Слáва Тебé, показáвшему нам свет.
Славословие великое
Хор: Слáва в вы́шних Бóгу, и на землѝ мир, в человéцех благоволéнiе. Хвáлим Тя, благослови́м Тя, клáняем Ти ся, славослóвим Тя, благодари́м Тя вели́кiя рáди слáвы Твоея́. Гóсподи, Царю́ Небéсный, Бóже, Ѻ́тче Вседержи́телю, Гóсподи Сы́не Единорóдный, Iисýсе Хрїстé, и Святы́й Дýше. Гóсподи Бóже, Áгнче Бóжiй, Сы́не Ѻтéчь, взéмляй грех мíра, поми́луй нас. Взéмляй грехѝ мíра, прiимѝ молитву нáшу. Седя́й одеснýю Ѻтцá, поми́луй нас. Яко Ты есѝ Един Свят; Ты есѝ Един Госпóдь, Iисýс Хрїстóс, в слáву Бóга Отцá, ами́нь.
На всяк день благословлю́ Тя и восхвалю́ и҆́мя Твоé во вéки, и в век вéка.
Сподóби, Гóсподи, в день сей без грехá сохрани́тися нам. Благословéн есѝ, Гóсподи Бóже отéц нáших, и хвáльно и прослáвлено и҆́мя Твоé во вéки, ами́нь.
Бýди, Гóсподи, милость Твоя на нас, я́коже уповáхом на Тя.
Благословéн есѝ, Гóсподи, научѝ мя оправдáнiем Твои́м.
Благословéн есѝ, Влады́ко, вразумѝ мя оправдáнiем Твои́м.
Благословéн есѝ, Святы́й, просветѝ мя оправдáнiи Твои́ми.
Гóсподи, прибéжище был еси нам в род и род. Аз рех: Гóсподи, поми́луй мя, исцелѝ дýшу мою́, я́ко согреши́х Тебé. Гóсподи, к Тебé прибегóх, научѝ мя твори́ти вóлю Твою́, яко Ты есѝ Бог мой, яко у Тебé истóчник животá, во свéте Твоéм ýзрим свет. Пробáви ми́лость Твою́ вéдущим Тя.
Хор: Святы́й Бóже, Святы́й Крéпкiй, Святы́й Безсмéртный, поми́луй нас. (3 раза)
Хор: Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Хор: Святы́й Безсмéртный, поми́луй нас.
Хор: Святы́й Бóже,/ Святы́й Крéпкiй,/ Святы́й Безсмéртный, помилуй нас.
Тропáрь Трióди (Крестá), глас 1: Спаси́, Гóсподи, лю́ди Твоя́/ и благослови́ достоя́нiе Твоé,/ побéды правослáвным хрїстiáнам на сопроти́вныя дáруя// и Твоé сохраня́я Крестóм Твои́м жи́тельство.(Трúжды)
[Тропарь Креста ц.ч.]Спаси́, Гóсподи, лю́ди Твоя́/ и благослови́ достоя́нiе Твоé,/ побéды грядýщему рýсскому Царю́ и правослáвным хрїстiáнам на сопроти́вныя дáруя// и Твоé сохраня́я Крестóм Твои́м жи́тельство. (Трúжды)
Хор: Крестý Твоемý покланя́емся Влады́ко,/ и святóе Воскресéнiе Твоé слáвим. (Трúжды, после каждого раза один земной поклон)
СТИХИРЫ ТРИОДИ НА ПОКЛОНЕНИЕ КРЕСТУ
Самоглáсны Трióди (Крестá) глас 2: Прiиди́те вéрнiи,/ животворя́щему Дрéву поклони́мся,/ на нéмже Хрiстóс Царь слáвы вóлею рýце распростéр,/ вознесé нас на пéрвое блажéнство,/ и́хже прéжде слáстiю укрáд враг,/ изгнáны от Бóга сотвори́./ Прiиди́те вéрнiи, Дрéву поклони́мся,/ и́мже сподóбихомся неви́димых враг сокруши́ти главы́./ Прiиди́те вся отéчествiя язы́к,/ Крест Госпóдень пéсньми почти́м:/ рáдуйся Крéсте, пáдшаго Адáма совершéнное избавлéнiе!/ О тебé вéрнiи хвáлятся,/ я́ко твоéю си́лою iсмáильтескiя лю́ди держáвно покаря́ющiи./ Тебé ны́не со стрáхом хрiстiáне целýем:/ на тебé пригвозди́вшагося Бóга слáвим, глагóлюще:/ Гóсподи на том пригвозди́выйся поми́луй нас,// я́ко Благ и Человеколю́бец.
Глас 8: Днесь Влады́ка твáри, и Госпóдь слáвы,/ на Крестé пригвождáется и в рéбра прободáется,/ жéлчи и óцта вкушáет, слáдость церкóвная:/ венцéм от тéрнiя облагáется:/ покрывáяй нéбо óблаки,/ одéждею облачи́тся поругáнiя:/ и заушáется брéнною рукóю,/ рукóю создáвый человéка./ По плещéма бiéн бывáет,/ одевáяй нéбо óблаки./ Заплевáнiя и рáны прiéмлет,/ поношéнiя и заушéнiя:/ и вся терпи́т менé рáди осуждéннаго,/ Избáвитель мой и Бог,// да спасéт мiр от прéлести, я́ко благоутрóбен.
Слáва Отцý и Сыну и Святóму Дýху.
Днесь неприкосновéнный существóм,/ прикосновéн мне бывáет,/ и стрáждет стрáсти,/ свобождáяй мя от страстéй./ Свет подавáяй слепы́м,/ от беззакóнных устéн оплевáется,/ и даéт плещи́ за пленéнныя на рáны./ Сегó Чи́стая Дéва и Мáти на Крестé зря́щи,/ болéзненно вещáше:/ увы́ мне Чáдо Моé,/ что сié сотвори́л еси́?/ Крáсный добрóтою пáче всех человéк,/ бездыхáнный, беззрáчный явля́ешися,/ не имéя ви́да, нижé добрóты./ Увы́ Мне Мой Свéте!/ Не могý спя́ща зрéти Тя,/ утрóбою уязвля́юся,/ и лю́тое орýжiе сéрдце Моé прохóдит./ Воспевáю Твоя́ стрáсти,/ покланя́юся благоутрóбiю Твоемý,/ долготерпели́ве слáва Тебé.
И ныне и прúсно и во вéки векóв. Амúнь.
Днесь прорóческое испóлнися слóво:/ се бо покланя́емся на мéсто,/ идéже стоя́ша нóги Твоя́, Гóсподи./ И, Дрéво спасéнiя прiéмше,/ грехóвных страстéй свобóду получи́хом// моли́твами Богорóдицы, Еди́не Человеколю́бче.
Гóсподи поми́луй (40 раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Гóсподи поми́луй (12раз)
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Утвердѝ, Бóже, святýю правослáвную вéру, правослáвных хрiстiáн во век вéка.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
Слáва Ѻтцý и Сыну и Святóму Дýху, и ныне и при́сно и во вéки векóв, ами́нь.
Гóсподи, поми́луй. (3 раза)
Гóсподи, благословѝ.
ОТПУСТ
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, си́лою Честнáго и Животворя́щаго Крестá, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.
МНОГОЛЕТИЕ
Слáва Ѻтцý и Сы́ну и Святóму Дýху, и ны́не и прúсно и во вéки векóв. Амúнь.
Стiхúра евáнгельская седьмáя, глас 7: Се тьма, и рáно, и что у грóба, Марíе, стои́ши,/ мнóгую тьму имéющи в рáзуме,/ в нéйже, где положéн бысть вопрошáеши, Iисýс?/ Но виждь сри́щущася ученики́,/ кáко плащани́цами и сударéм воскресéнiе обретóша,/ и помянýша я́же о сих Писáнiя./ С ни́миже и и́миже и мы вéровавше,// воспевáем Тя жизнодáвца Хрiстá.
ПЕРВЫЙ ЧАС
Прiиди́те, поклони́мся Царéви нáшему Бóгу.
Прiиди́те, поклони́мся и припадéм Хрїстý, Царéви нáшему Бóгу.
Прiиди́те, поклони́мся и припадéм Самомý Хрїстý, Царéви и Бóгу нáшему.
Псалом 5
Глагóлы моя́ внушѝ, Гóсподи, разумéй звáнiе моé. Вонмѝ глáсу молéнiя моегó, Царю́ мой и Бóже мой, яко к Тебé помолю́ся, Гóсподи. Заýтра услы́ши глас мой, заýтра предстáну Ти, и ýзриши мя. Яко Бог не хотя́й беззакóнiя, Ты есѝ: не присели́тся к Тебé лукáвнуяй, нижé пребýдут беззакóнницы пред очи́ма Твои́ма: возненави́дел еси вся дéлающыя беззакóнiе. Погуби́ши вся глагóлющыя лжу: мýжа кровéй и льсти́ва гнушáется Госпóдь. Аз же мнóжеством ми́лости Твоея́, вни́ду в дом Твой, поклоню́ся ко хрáму святóму Твоемý, в стрáсе Твоéм. Гóсподи, настáви мя прáвдою Твоéю, враг моих рáди испрáви пред Тобóю путь мой. Яко несть во устéх их и҆́стины, сéрдце их сýетно, гроб отвéрст гортáнь их: язы́ки свои́ми льщáху. Судѝ им, Бóже, да отпадýт от мы́слей свои́х, по мнóжеству нечéстiя их изри́ни я́, яко преогорчи́ша Тя, Гóсподи. И да возвеселя́тся вси уповáющiи на Тя, во век возрáдуются, и всели́шися в них, и похвáлятся о Тебé лю́бящiи имя Твоé. Яко Ты благослови́ши прáведника, Гóсподи: яко орýжiем благоволéнiя венчáл еси нас.
Псалом 89
Гóсподи, прибéжище был еси нам в род и род. Прéжде дáже горáм не бы́ти и создáтися землѝ и вселéнней, и от вéка и до вéка Ты еси. Не отвратѝ человéка во смирéнiе, и рекл еси: обрати́теся, сы́нове человéчестiи. Яко ты́сяща лет пред очи́ма Твои́ма, Гóсподи, яко день вчерáшнiй, и҆́же мимои́де, и стрáжа нощнáя. Уничижéнiя их лéта бýдут. Утро яко травá мимои́дет, ýтро процветéт и прéйдет: на вéчер отпадéт ожестéет и и҆́зсхнет. Яко исчéзохом гнéвом Твоим, и я́ростiю Твоéю смути́хомся. Положи́л еси беззакóнiя нáша пред Тобóю: век наш в просвещéнiе лицá Твоегó. Яко вси днíе нáши оскудéша, и гнéвом Твоим исчезóхом, лéта нáша яко паучи́на поучáхуся. Днíе лет нáших, в ни́хже сéдмьдесят лет, áще же в си́лах, óсмьдесят лет, и мнóжае их труд и болéзнь: яко прiи́де крóтость на ны, и накáжемся. Кто весть держáву гнéва Твоегó, и от стрáха Твоегó, я́рость Твою исчестѝ? Десни́цу Твою́ тáко скажѝ ми, и оковáнныя сéрдцем в мýдрости. Обрати́ся, Гóсподи, докóле? И умолéн бýди на рабы́ Твоя. Испóлнихомся заýтра ми́лости Твоея, Гóсподи, и возрáдовахомся, и возвесели́хомся, во вся дни нáша возвесели́хомся, за дни в ня́же смири́л ны еси, лéта в ня́же ви́дехом злáя. И при́зри на рабы́ Твоя́, и на делá Твоя, и настáви сы́ны их. И бýди свéтлость Гóспода Бóга нáшего на нас, и делá рук нáших испрáви на нас, и дéло рук нáших испрáви.
Псалом 100
Ми́лость и суд воспою́ Тебé, Гóсподи. Пою́ и разумéю в путѝ непорóчне, когдá прiи́деши ко мне? Прехождáх в незлóбiи сéрдца моегó посредé дóму моегó. Не предлагáх пред очи́ма мои́ма вещь законопрестýпную: творя́щыя преступлéнiе возненави́дех. Не прильпé мне сéрдце стропти́во, уклоня́ющагося от менé лукáваго не познáх. Оклеветáющаго тай и҆́скренняго своегó, сегó изгоня́х: гóрдым óком, и несы́тым сéрдцем, с сим не ядя́х. Ѻ́чи моѝ на вéрныя землѝ, посаждáти я́ со мнóю: ходя́й по путѝ непорóчну, сей ми служáше. Не живя́ше посредé дóму моегó творя́й горды́ню, глагóляй непрáведная, не исправля́ше пред очи́ма мои́ма. Во ýтрiя избивáх вся грéшныя землѝ, еже потреби́ти от грáда Госпóдня вся дéлающыя беззакóнiе.
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Аллилýїа, аллилýїа, аллилýїа, слáва Тебé Бóже. (3 раза)
Гóсподи, помúлуй. (3 раза)
Тропáрь воскрéсный, глас 7: Разруши́л еси́ Крестóм Твои́м смерть, отвéрзл еси́ разбóйнику рай; мvронóсицам плач преложи́л еси́ и Апóстолом проповéдати повелéл еси́, я́ко воскрéсл еси́, Хрїстé Бóже, дáруяй мíрови вéлiю ми́лость.
Слáва Отцý и Сы́ну и Святóму Дýху.
Тропáрь Трióди (Крестá), глас 1: Спаси́, Гóсподи, лю́ди Твоя́/ и благослови́ достоя́нiе Твоé,/ побéды правослáвным хрїстiáнам на сопроти́вныя дáруя// и Твоé сохраня́я Крестóм Твои́м жи́тельство.
[Тропарь Креста ц.ч.]Спаси́, Гóсподи, лю́ди Твоя́/ и благослови́ достоя́нiе Твоé,/ побéды грядýщему рýсскому Царю́ и правослáвным хрїстiáнам на сопроти́вныя дáруя// и Твоé сохраня́я Крестóм Твои́м жи́тельство.
И ны́не и прúсно и во вéки векóв. Амúнь.
Богорóдичен: Что Тя наречéм, о Благодáтная? Нéбо, я́ко возсiя́ла есѝ Сóлнце Прáвды. Рай, я́ко прозяблá есѝ цвет нетлéнiя. Дéву, я́ко пребылá есѝ нетлéнна. Чи́стую Мáтерь, яко имéла есѝ на святы́х Твои́х объя́тiях Сы́на, всех Бóга. Тогó молѝ спасти́ся душáм нáшим.
Стопы́ моя́ напрáви по словесѝ Твоемý и да не обладáет мнóю вся́кое беззакóнiе. Избáви мя от клеветы́ человéческiя, и сохраню́ зáповеди Твоя́. Лицé Твоé просветѝ на рабá Твоегó и научѝ мя оправдáнiем Твои́м.
Да испóлнятся устá моя хвалéнiя Твоегó, Гóсподи, я́ко да воспою́ слáву Твою́, весь день великолéпiе Твоé.
Посем Трисвятое по Отче наш
Святы́й Бóже, Святый Крéпкiй, Святый Безсмéртный, поми́луй нас.(3 раза)
Слáва Отцý и Сыну и Святóму Дýху, и ныне и при́сно и во вéки векóв, ами́нь.
Пресвятáя Трóице, поми́луй нас, Гóсподи, очи́сти грехѝ нáша, Влады́ко, простѝ беззакóнiя нáша, Святы́й, посетѝ и исцелѝ нéмощи нáша и҆́мене Твоегó рáди.
Гóсподи, поми́луй. (3 раза)
Слáва Отцý и Сы́ну и Святóму Дýху, и ны́не и присно и во вéки векóв, аминь.
Ѻ́тче наш, И҆́же еси на небесéх. Да святи́тся И҆́мя Твоé, да прiи́дет Цáрствiе Твоé, да бýдет вóля Твоя, я́ко на небесѝ и на землѝ. Хлеб наш насýщный даждь нам днесь, и остáви нам дóлги нáша, я́коже и мы оставля́ем должникóм нáшим. И не введѝ нас во искушéнiе, но избáви нас от лукáваго.
Гóсподи, Iисýсе Хрїстé, Сыне Бóжїй, поми́луй нас. Ами́нь.
КОНДАК
Кондáк Трióди, глас 7: Не ктомý плáменное орýжiе/ храни́т врат Едéмских:/ на ты́я бо нáйде преслáвный соýз Дрéво крéстное,/ смéртное жáло, и áдова побéда прогнáся./ Предстáл бо еси́ Спáсе мой,/ вопiя́ сýщим во áде:// вни́дите пáки в рай.
Гóсподи, помилуй. (40 раз)
И҆́же на вся́кое врéмя и на вся́кiй час, на небесѝ и на землѝ покланя́емый и слáвимый Хрїстé Бóже, долготерпели́ве, многоми́лостиве, многоблагоутрóбне, И҆́же прáведныя любя́й, и грéшныя ми́луяй, И҆́же вся зовы́й ко спасéнiю обещáнiя рáди бýдущих благ; Сам, Гóсподи, прiимѝ и нáша в час сей моли́твы, и испрáви живóт наш к зáповедем Твои́м; дýши нáша освятѝ, телесá очи́сти, помышлéнiя испрáви, мы́сли очи́сти, и избáви нас от вся́кiя скóрби, зол и болéзней; оградѝ нас святы́ми Твои́ми Áнгелы, да ополчéнiем их соблюдáеми и наставля́еми, дости́гнем в соединéнiе вéры, и в рáзум непристýпныя Твоея́ слáвы, я́ко благословéн есѝ во вéки векóв, ами́нь.
Гóсподи, поми́луй. (3 раза)
Слáва Ѻтцý и Сы́ну и Святóму Дýху, и ны́не и прúсно и во вéки векóв, амúнь.
Честнéйшую Херувíм и слáвнейшую без сравнéнiя Серафíм, без истлéнiя Бóга Слóва рóждшую, сýщую Богорóдицу, Тя величáем.
И҆́менем Госпóдним Гóсподи, благословѝ.
Хрїстé, Свéте И҆́стинный, просвещáяй и освящáяй вся́каго человéка, грядýщаго в мiр, да знáменается на нас свет лицá Твоегó, да в нем ýзрим Свет Непристýпный: и испрáви стопы́ нáша к дéланiю зáповедей Твои́х, моли́твами Пречи́стыя Твоея́ Мáтере, и всех Твои́х святы́х, ами́нь.
Кондáк, глас 8: Взбрáнной Воевóде победи́тельная,/ я́ко избáвльшеся от злы́х,/ благодáрственная восписýем Ти́ раби́ Твои́, Богорóдице;/ но я́ко имýщая держáву непобеди́мую,/ от вся́ких нас бед свободи́, да зовéм Ти́:// рáдуйся, Невéсто Неневéстная.
Слáва Ѻтцý и Сы́ну и Святóму Дýху, и ны́не и прᴎ́сно и во вéки векóв, амᴎ́нь.
Гóсподи, поми́луй. (3 раза)
Гóсподи, благословᴎ́.
Гóсподи, Iисýсе Хрїстé, Сыне Бóжiй, моли́твами пречи́стыя Своея́ Мáтере, святы́х слáвных и всехвáльных Апóстол, си́лою Честнáго и Животворя́щаго Крестá, святы́х и прáведных богоотéц Iоакíма и Áнны, и всех святы́х, поми́лует и спасéт нас, я́ко Благ и Человеколю́бец.
С утрá чти часы и обéдницу